Déwi Srênggana dan Déwi Srênggini iku anaké kêmbar Rêsi Badawanganala ing
pêrtapan Sumur Upas lan sisihané sing jênêngé Déwi Srunggagini. Ing jagad
pêḍalangan putri loro kêmbar iki sinêbut Déwi Srêngganawati lan Dewi
Srêngginiwati. Déwi Srêngganawati ḍaup lan Naluka, nurunaké Déwi Sritanjung.
Déwi Srêngginiwati ḍaup lan Sahadéwa, nurunaké Bambang Widapaksa utawa
Sidapaksa. Ing lakon ḍaupé Nakula Sahadéwa dicritakaké saka kawitan malih rumapé
Baṭari Durga dadi Déwi Kunṭi.
Baṭari Durga sing njilma wujud Déwi Kunti iku banjur andon wasis lan
andon ilmu bab sêjatining lanang, sêjatining wadon kalawan Sahadéwa. Sawisé
dibabar kabèh, Déwi Kunṭi dadèn-dadèn iku banjur njaluk sarêsmi kalawan Sahadéwa.
Ananging Sahadéwa nampik pêpénginané Déwi Kunṭi dadèn-dadèn iku amarga kèlingan
yèn Déwi Kunṭi iku ibuné. Déwi Kunti dadèn-dadèn têtêp mêksa pèngin sarêsmi
kalawan Sahadéwa, ananging Sahadéwa milih mlayu ninggalaké. Déwi Kunti
dadèn-dadèn banjur nyuwèk sanḍangané lan wadul marang Wêrkudara.
Bima dadi lan nêsuné nalika wêruh kaanané Déwi Kunṭi (dadèn-dadèn iku).
Luwih-luwih sawisé ngêrti yèn suwèké sanḍangané iku amarga pokalé Sahadéwa.
Tanpa suka kaloḍangan tumrap Sahadewa kanggo njlèntrèhaké apa sing kêdadèn
satêmêné, Bima banjur ngajar Sahadéwa sakkatogé. Sahadéwa uga banjur diguwang
ing Sumur Upas éngga nêmahi pati. Sawijining dina, Déwi Srênggana dan Déwi
Srênggini ngimpi dadi sisihané ragile Panḍawa, yaiku si kembar Nakula dan
Sahadéwa. Sahadewa sing ditêmokaké mati banjur diuripake manèh déning Rêsi
Badawanganala.
Sawisé takon tinakokan kalawan Sahadéwa, Rêsi Badawanganala banjur
nêmokaké Sahadéwa kalawan anaké wadon. Sahadewa arêp dijoḍokaké kalawan salah
sijiné anaké kêmbar iku. Putri kêmbar anaké Badawanganala ora kabotan waton
Sahadéwa bisa napsiraké ilmu sêjatining lanang, sêjatining wadon. Wusana
Sahadéwa kasil nḍuḍah lan napsiraké ilmu kasêbut. Putri loro kêmbar iku
déning Rêsi Badawanganala banjur dipasrahaké marang Sahadéwa, sabanjuré
diboyong tumuju Amarta utawa Amêrta.
Satêkané ing Éndraprasta, Sahadéwa lan Nakula bisa malês tumindaké Déwi
Kunti dadèn-dadèn lumantar pitulungané Sêmar. Déwi Kunṭi banjur badar manèh ing
wujud sakawit, yaiku Baṭari Durga. Baṭari Durga banjur sumingkir tumuju
Krêndayana ing pasétran Ganda Umayi utawa Gandamayit. Wusana, Déwi Srênggana
utawa Sêngganawati ḍaup lan Nakula, déné Déwi Srênggini utawa Srêngginiwati
têtêp dadi sisihané Sahadéwa.
