sinawuŋ sĕkar macapat. amĕjaṅakĕn ṅilmi makripat sarta tokhid dalaḥ ṅakahid sèkĕt, punapadéné khikmaḥ sarta kawigatosanipun rukun islam. aṅgitanipun : iṅkaŋ sinandi.
baṇḍa danya iku añjaluk ṛĕkṣa iŋ manusa, naṅiŋ ṅilmu malaḥ aṅrĕkṣa iŋ manusa.
makatĕn uṅĕlipun satuṅgaliŋ waraḥ. amila pañjĕnĕṅan sadaya, sampun ṅantos ṛĕmĕn simpĕn baṇḍa iṅkaŋ lajĕŋ aṅiwakakĕn ṅilmu iṅkaŋ piguna tumrapiŋ danya akirat.
kaananiŋ manuṅsa sawusé mati.
بِسْمِاللّهِالرَّحْمنِالرَّحِيْمِ
1. ḍaṇḍaŋgula
1. piṇḍa ṛĕsi rasèŋ sru mriḥ manis, dĕṛĕṅiŋ tyas dènira yun mĕḍar, wasitadi ṅaraḥ yuné, myaŋ sĕdyarṣa bérat dur, ojokaniŋ iblis kaŋ jahil, riŋ janma kaŋ atéla, asriŋ tindak diguŋ, tan aṅgugu wiyatarja, jĕr aṅgĕpnya yayaḥ bĕnĕra pribadi, datan èṅĕt takaña.
2. taka iku pan atĕgĕs pati, patiniŋ woŋ yĕkti aprabéda, lan patiniŋ sato kabèḥ, patiniŋ sato iku, yèn wis dadya ḷĕbu nulya wis, rampuŋ prakaranira, tanpa tuwas tuhu, nadyan ṅayani manusa, kadidéné rajakaya yèn wus mati, pan amuŋ dadya ḷĕmaḥ.
3. nadyan uga sato iŋ wanadri, kaŋ arudra iŋ sabĕn rinaña, ṅruraḥ momoṅsa karyané, tarkaḍaŋ maṅsaḥ ṅawud, ṅĕraḥ janma iṅkaŋ lumaris, nèŋ madyèŋ wanapriṅga, ṅiŋ ta iku mahu, muṅguhiŋ hyaŋ mahanasa, tan kagoloŋ dosa kaŋ dèn gagantuṅi, pidana nèŋ akirat.
4. jĕr patiné uga muŋ nĕmahi, dadya ḷĕmaḥ luḍĕs prakaraña, datan ana wawaḷĕsé, balik manusa iku, yèn wus mati nèŋ akhirati, bakal kinisab iŋ hyaŋ, saguŋ amalipun, liré kinisab pinrikṣa, paran dènnya ṅamal iŋ nalika urip, taṅat apa makṣiyat.
5. liré taṅat anĕtĕpi bĕkti, saguŋ tindak anĕtĕpi préntaḥ, cocog kalawan syaraké, déné makṣiyat iku, nrak papacuḥ kaŋ amlarati, lir kaṛĕm ma lilima, madat madon minum, maṅani mahin botohan, kaṅgonira ñilakani maraŋ ḍiri, baṅkit ṅlèpèti brayat.
6. dé liyané ma lima ṅapusi, ḍĕmĕn mitnaḥ lan ambĕg niaya, ṅrudapĕkṣa lan aṅraṅkèd, ṅrèmèhkĕn myaŋ añatur, lan samaniŋ tindak tan yukti, kaŋ maṣṭi ginantuṅan, pidanèŋ hyaŋ aguŋ, tanapi sasar iŋ tékad, iŋ jroniŋ tyas blĕkĕṭĕkan kĕbak musyrik, ñakuṭokkĕn iŋ allaḥ.
7. laḥ ta woŋ kaŋ maṅkono kaŋ urip, kasidané apa bakal paḍa, lan kaŋ bĕkti paṅérané, myaŋ kèḥ ṅamalé bagus, lir aḍaṅan tutuluŋ bĕcik, tyasé ambĕk wĕlasan, susila iŋ laku, lan ṅadil aparamarta, ḍĕmĕn danadriyaḥ maraŋ para pakir, lan maraŋ pakumpulan.
8. lamun ṅakal kaŋ waras lan wĕniŋ, yĕkti ṅaṅgĕp lamun nora paḍa, jĕr kalamun paḍa bahé, apa gunané iḍup, darbé iḍĕp kaŋ bĕnĕr bĕcik, bok uwis ñara kéwan, kéwala rak cukup, lan lamun sinuŋ kawasa, bok atindak arda aṅkara iŋ ati, aniṇḍĕs mriŋ kaŋ ina.
9. gampaŋ lamun, tĕmbé wusnya mati, atumimbal lahir maraŋ doña, yèku bali urip manèḥ, nulya baguṣkĕn laku, karbèn dadya sampurṇa jati, o kok énak aṅgĕpña, liñca liñci iḍup, apa ta woŋ kaŋ maṅkana, nora ṅrĕti lamun saguŋ para nabi, sugĕṅé muŋ sapisan.
10. tanna swiji bahé kaŋ ṅakoni, yèn sugĕṅé anèŋ ṅalam doña, bola bali tumimbalé, lan para nabi rasul, uga nora nana kaŋ maṅsit, yèn uripé pra janma, iku woṅsal waṅsul, kaŋ bĕnĕr iku muŋ pisan, naṅiŋ ana urip iŋ sawusé mati, yèku béñjaŋ ri baṅas.
11. ari baṅas taṅi sakiŋ pati, dé klakoné iku ari baṅas, wusnya ṅalam kyamat kabèḥ, binraṣṭa iŋ hyaŋ aguŋ, jĕr wus tĕkèŋ wawatĕsnèki, yèn sira yun uniṅa, kabar kyamat iku, myaŋ tĕkané ari baṅas, laḥ macaa wĕcané allaḥ pribadi, nèŋ kitab suci kuran.
12. yèn luguné kuran nora ṅrĕti, cukup sira ṅrĕtèni kaŋ jawan, kaŋ uga wus winĕtokké, katam tĕluŋ puluḥ juj, yĕkti sira nulya mĕruhi, wĕca wĕcané allaḥ, kaŋ mrĕñca gonipun, anèŋ sawĕtara surat, kadidéné nèŋ surat kyamat lan maniŋ, mutapipin murṣalat.
13. laḥ apa ta béñjaŋ kaŋ pinaṅgiḥ, pra manuṅsa wusnya ari baṅas, yèku yun kinisab kabèḥ, saguṅé ṅamalipun, déniŋ allaḥ kaŋ maha aguŋ, parlu yun tinuhonan, lan waḷĕs kaŋ urus, dosa pinidanèŋ krama, bĕkti yĕkti pinradana nèŋ suwargi, kadwi samya laṅgĕṅña.
14. marma urip muŋ sapisan iki, sira paḍa akumawulaa, maraŋ hyaŋ kaŋ amurbèṅrèḥ, ruruḥna sakèḥ laku, dèn araha bisa nĕtĕpi, iŋ khukumirèŋ syarak, kaŋ mardi rèḥ hayu, khukumiŋ syarak pinéraŋ, dadya pituŋ warṇa iṅkaŋ ḍiṅin wajib, kapiṇḍo aran sunat.
15. katri kharam makruḥ piŋ patnèki, kalimané iṅaran wĕnaŋ, nĕm saḥ batal kapituné, dé karam wajib iku, saguŋ tindak kaŋ dèn gantuṅi, gañjaran iŋ akirat, tumrap kaŋ amèstu, kaŋ nora sinikṣèŋ nraka, dé kaŋ aran sunat saka kaŋ ṅlakoni, ginantuṅan gañjaran.
16. naṅiŋ lamun nora aṅlakoni, nora pinidana nèŋ naraka, dé kharam iku tĕraṅé, cĕcĕgahé hyaŋ aguŋ, sapa iṅkaŋ nĕrak ṅlakoni, pinidana iŋ nraka, anaṅiŋ kalamun, ñiṅkiri paṅgawé kharam, ginantuṅan gañjaran anèŋ suwargi, wus maṅkono ṅadilña.
17. déné makruḥ iku aṅlakoni, nadyan nora sinikṣa naraka, ṅiŋ sinĕṅit hyaŋ murbèṅrèḥ, ṅiŋ kaŋ ñiṅkiri iku, ginantuṅan gañjaran swargi, déné kaŋ aran wĕnaŋ, kĕna kĕna iku, kaŋ ṅlakoni lan kaŋ ora, paḍadéné tan ana wawaḷĕsnèki, anané nèŋ klaṅgĕṅan.
18. dé kaŋ aran saḥ utawa sahiḥ, saguŋ ṅamal kaŋ cocog dalilña, kaŋ pataŋ prakara kèhé, kuran khadis jĕŋ rasul, ijmak kiyas salaḥ sawiji, ijmak mupakatira, pra ṅulama mashur, kiyas mirid khadis kuran, dé kaŋ samya katĕtĕpan aṅlakoni, yèku para mukalap.
19. dé mukalap liré kaŋ pinardi, aṅlakoni saguŋ khukum syarak, yèku janma kaŋ ṅumuré, wus tĕkèŋ baligḥ tuhu, lan kaŋ nora bisu myaŋ tuli, lan nora lara owaḥ, giṅsir ṅakalipun, tanapi nora alasan, lan manèhé wus kĕtĕkanan mubaligḥ, kaŋ ṅajak maraŋ islam.
20. dé tumrapé woŋ iŋ tanaḥ jawi, khukumira kaḷĕbu mukalap, jĕr wus islam agamané, lan duk iŋ supitipun, wus sinahdat boṅé kaŋ ñupit, marma kabèḥ kéwala, baṅsa kita iku, wajib mèstu khukum syarak, dé kaŋ aran tindak wajib lir kaŋ dadi, pikukuhé agama.
21. pikukuhé agama winarṇi, islam iman tokhid lan makripat, papat awigati kabèḥ, liré makripat iku, maṅrĕtèni sipat hyaŋ widdhi, kaŋ wajib lan kaŋ mokal, muṅguhiŋ hyaŋ aguŋ, kaŋ wajib roṅpuluḥ sipat, lan kaŋ mokal uga roṅpuluḥ kèhnèki, lan swiji sipat wĕnaŋ.
22. iku sipat pataṅpuluḥ siji, kalumpuké apan nuli dadya, kalimaḥ tokhid arané, déné ta iman iku, wruha yèku paṅandĕl ati, riŋ ghahib kaŋ winĕca, nèŋ kuran kaŋ luhuŋ, lir pracaya maraŋ allaḥ, malékatnya lan kitabé iṅkaŋ suci, rasulé myaŋ ri kyamat.
23. dé makripat iku maṅrĕtèni, sipat wajib mokal lawan wĕnaŋ, tumrap allaḥ lan rasulé, sipat wajib hyaŋ aguŋ, iku apan roṅpuluḥ warṇi, mokal uga dwidasa, swiji wĕnaṅipun, dé kaŋ tumrap rasuliŋ hyaŋ, wajib papat mokal papat wĕnaŋ swiji, guṅguŋ sèkĕt kumpulña.
24. déné amriḥ bisa dèn ṅrĕtèni, binuṇḍĕlan anèŋ sajroniŋ tyas, sayogya rada jinèrèŋ, wijaŋ wijaṅé iku, sipat iṅkaŋ sèkĕt ṅakahid, kaŋ ḍiṅin yogya mijaŋ, sipaté hyaŋ aguŋ, iṅkaŋ pataṅpuluḥ juga, sayogyané gatèkna lan tyas kaŋ wĕniŋ, mriḥ gambuḥ sajroniŋ tyas.
2. gambuḥ
1. sipaté hyaŋ kaŋ aguŋ, iṅkaŋ ḍiṅin yèku aran wujud, liré wujud allaḥ iku ana yĕkti, kaŋ nitahkĕn para mahluk, kaŋ katon myaŋ nora katon.
2. mokalé allaḥ iku, yèn ta lamun nora sipat wujud, jĕr wujudiŋ mahluk wus dadi taṇḍaniŋ, wujudé kaŋ gawé mahluk, laḥ iku iṅkaŋ gumaṭok.
3. kadi anané prahu, iṅkaŋ layar anèŋ samodra guŋ, nuduhakĕn anané kaŋ ṅĕmuḍèni, lan kaŋ gawé prahu mahu, laḥ iku piṇḍan kaŋ cocog.
4. dé yèn duruŋ aṅgambuḥ, dèn aṅgagas kaanané mahluk, tanĕm tuwuḥ puspita kaŋ mañca warṇi, bhumi ardi samodra guŋ, kartika kaŋ añjraḥ abyor.
5. srĕṅéṅé lan sitèṅsu, hawa aṅin méga lan kĕkuwuŋ, kaŋ aṅawĕŋ nèŋ ṅawiyat milaṅoni, sapa kaŋ nitahkĕn iku, lamun nora gusti alloḥ.
5. srĕṅéṅé lan sitèṅsu, hawa aṅin méga lan kĕkuwuŋ, kaŋ aṅawĕŋ nèŋ ṅawiyat milaṅoni, sapa kaŋ nitahkĕn iku, lamun nora gusti alloḥ.
6. apa ta ṅalam iku, kaŋ lakuné tata lan aruntut, nora nana kaŋ maṅrèḥ lan iṅkaŋ kardi, kabèḥ wiwit duk rumuhun, ya wus dumadi maṅkono.
7. o yèn maṅkono luput, ṅalam miwaḥ isiné sawĕguŋ, iku kabèḥ klĕbu goloṅan khawadis, kaŋ mahuné nora wujud, dé wujudé saka alloḥ.
8. marmané allaḥ iku, mokal yèn ta lamun nora wujud, déné sipat wujud uga dèn arani, sipat napsiyaḥ ranipun, baṅsa sarira kaŋ artos.
9. dadya napsiyaḥ iku, baṅsa djat kaŋ ana sipatipun, dé wujudé allaḥ kidam liré ḍiṅin, kaŋ tanpa kawitan tuhu, murwani saguŋ dumados.
10. dadya anané iku, maṅka pantogané sakèḥ mahluk, miwaḥ dadi sababé saguŋ dumadi, kaŋ raranté ananipun, pantogé muhuŋ mriŋ alloḥ.
11. marmané allaḥ iku, mokal yèn ta kaḍiṅinan mahluk, jĕr sakèhiŋ mahluk asipat khawadis, lan wujudé allaḥ iku, uga wajib sipat bakok.
12. liré laṅgĕŋ atĕrus, kaŋ sugĕṅé tanpa séda tuhu, dadi nora kĕna owaḥ lawan giṅsir, jĕr sakèḥ mahluk sawĕguŋ, tan bisa ñababi alloḥ.
13. marmané allaḥ iku, mokal lamun nora laṅgĕŋ tĕrus, dadya uga allaḥ iku yĕkti wajib, asipat mukhalapatu, lilkhawadis kaŋ sayĕktos.
14. déné mokalé iku, kalamun ta paḍa lawan mahluk, allaḥ uga kiyamuhu bi napsihi, jumnĕŋ lan pribadinipun, tur jumnĕṅé dahat élok.
15. liré jumnĕṅé iku, sarirané allaḥ nora butuḥ, kaŋ jumnĕṅkĕn tanapi kaŋ dèn jumnĕṅi, mokal yèn jumĕnĕṅipun, dèn jumnĕṅkĕn liya alloḥ.
16. jumnĕṅé allaḥ iku, dadi nora kadi adĕgipun, méja kurṣi kaŋ dèn dĕgakĕn uṇḍagi, kaŋ adĕgé ṅaṅgo butuḥ, kaŋ dèn dĕgi anèŋ ṅisor.
17. lan kaŋ dèn dĕgi iku, upamané jobin uga butuḥ, maraŋ ḷĕmaḥ kaŋ anèŋ saṅisorṇèki, déné bhumi uga butuḥ, muriḥ nora bisa runtoḥ.
18. maṅkono iku tĕrus, éṅga maraŋ allaḥ pantogipun, balik allaḥ jumnĕṅé pratéla yĕkti, tan kadi maṅkono iku, laḥ muga sira maṅrĕtos.
19. lan manèḥ allaḥ iku, wajib sipat wahdaniyaḥ tuhu, wahdaniyaḥ tĕgĕsé sarwa sawiji, sawiji tumrap djatipun, lan sipat apṅalé alloḥ.
20. sawijiné djatipun, yèku djaté nora loro tĕlu, lan swijiné tan ana péraṅannèki, puputra ya nora tuhu, laḥ iku swijiné alloḥ.
21. dé apṅalullaḥ iku, sawijiné yèku duk hyaŋ aguŋ, karṣa damĕl mahluk amuŋ dèn ijèni, kinañcanan nora butuḥ, ijèné mrantasi yĕktos.
22. jĕr lamun allaḥ iku, damĕl mahluk muŋ cinipta cukup, klawan kalam sabda paṅandikanèki, yèku lawan sabdané kun, anaa ana sayĕktos.
23. déné sipat hyaŋ aguŋ, kidam bakok lan mukhalapatu, lilkhawadis kiyamuhu bi napsihi, wahdaniyaḥ limanipun, dadya bĕbètèṅiŋ alloḥ.
24. yèku kaŋ nulak tuhu, maraŋ saguŋ sipat liyanipun,, iṅkaŋ nora pantĕs tumrap iŋ hyaŋ widdhi, sipat kaŋ maṅkono iku, salbiyaḥ tĕmbuṅé ṅarob.
25. déné lamun kinumpul, sipat napsiyaḥ salbiyaḥ iku, mañjiŋ sipat istighnak artiné sugiḥ, yèku iṅkaŋ nora butuḥ, riŋ baraŋ liné alloḥ.
26. dadya tĕraṅé iku, pan wujudé allaḥ nora butuḥ, maraŋ liyan kaŋ mujudkĕn djatirèki, kaŋ ḍiṅini wujudipun, uga tan ana sayĕktos.
27. sarta manèḥ kaŋ ṅlampus, kaŋ ñamèni lan jumnĕṅkĕn iku, tanapiné kaŋ ñĕkuṭoni djatnèki, kabèḥ kabèḥ iku mahu, nora nana muṅguḥ alloḥ.
28. maṅkya kaya wus cukup, iŋ tĕraṅé yèn allaḥ tan butuḥ, maraŋ liyan sakiŋ déniŋ mahasugiḥ, laḥ rasakna kabèḥ iku, ywa ṅanti nora maṅrĕtos.
29. wosé djatullaḥ iku, djat kaŋ aguŋ tan kĕna dinumuk, dèn pépéraŋ iya uga ora kĕni, mlĕtik cuwil nora tuhu, tanapi tan ṅalap ĕṅgon.
30. marmané allaḥ iku, djaté tĕtĕp alayu kalapu, nora kĕna kinaya ṅapa sayĕkti, sapa tan laṇḍĕp tyasipun, tan bisa asmarèŋ batos.
3. asmaradana
1. samĕṅko yogya miwiti, mijaŋ riŋ sipatiŋ allaḥ, sipat maṅani arané, kaŋ aṅguṣṭi rèhiŋ sipat, iṅkaŋ pituŋ prakara, kudrat iradat lan ṅilmu, khayat samà basar kalam.
2. kudrat kuwasa kaŋ arti, liré allaḥ sipat kwasa, mokal yèn apĕs anané, taṇḍané yèn allaḥ kwasa, wujudé iki ṅalam, kaŋ anané dahat runtut, aṅgawokkĕn maraŋ akal.
3. tuhu aṅébat ébati, sipat kuwasaniŋ allaḥ, kaŋ molahkĕn ṅalam kabèḥ, bhawana miwaḥ kartika, makitĕr nèŋ palakña, datan ana lèrènipun, ajĕg trus tan bĕbĕntusan.
4. myaŋ tumitahiŋ pra janmi, nadyan ta mayuta yuta, agèsèḥ kabèḥ rupané, siji kéwala tan ana, iṅkaŋ paḍa rupaña, lan kabèḥ ginawé patut, nadyan tumitahé cacad.
5. cĕkaké sapa mĕruhi, maraŋ kahananiŋ ṅalam, kaŋ anané dahat élok, myaŋ isiné kaŋ manéka, yĕkti bisa makripat, riŋ kwasané hyaŋ kaŋ aguŋ, srana laṇḍĕpiŋ paṅrasa.
6. samĕṅko iṅkaŋ winarṇi, allaḥ iradat sipatña, iradat karṣa tĕgĕsé, mokalé lamun kapĕkṣa, déné prataṇḍanira, lamun allaḥ karṣa iku, dènnya wus nitahkĕn ṅalam.
7. lan anané para janmi, kaŋ mawarṇa lalakonña, tuhu karṣèŋ allaḥ kabèḥ, allaḥ upama ki ḍalaŋ, para manusa wayaŋ, ana kaŋ kinarya bagus, ana kaŋ kinarya ala.
8. ana mukmin ana kapir, taṅat tanapi makṣiyat, sugiḥ miṣkin sasamané, amuŋ ta cilakèŋ janma, kaŋ tumitaḥ sapisan, uripé nĕtĕpi kupur, kapir tan iman iŋ allaḥ.
9. tanapi tinitaḥ miṣkin, yèn sugiḥ asriŋ daluya, nuṅsaŋ sarik sĕnĕṅané, miliḥ kupur lan makṣiyat, kaŋ dadya cĕgahiŋ hyaŋ, nampik iman lan pituduḥ, kaŋ dèn paréntahkĕn allaḥ.
10. o paranbaya woŋ kuwi, béñjaŋ anèŋ kalaṅgĕṅan, nĕmu cilaka sajĕgé, ḍuḥ allaḥ iṅkaŋ kuwasa, lan iṅkaŋ sipat karṣa, mugi mugi awak ulun, tuwan karṣakkĕn abagya.
11. bagya danya bagya ṅakir, iŋ danya ṛĕmĕn ṅibadaḥ, jinĕmbarkĕn rijĕkiné, kaṭaḥ èṅĕté iŋ tuwan, myaŋ kasahénan amba, iṅkaŋ ḍumatĕŋ iŋ umum, ḍuḥ allaḥ siha iŋ amba.
12. kĕlantur kĕḍik kĕtarik, déniŋ laṅipé kaŋ nitra, sru èṅĕt maraŋ sipaté, allaḥ kaŋ kwasa lan karṣa, tĕmaḥ klahir doṅaña, ḍuḥ ḍuḥ muga doṅa iku, barkatana pra miyarṣa.
13. déné muṅguḥ mĕmpannèki, sipat kudrat lan iradat, iku pantĕs mujudaké, baraŋ kaŋ ayun tumitaḥ, miwaḥ kaŋ bakal sirṇa, kabèḥ saka dayanipun, kudrat iradatiŋ allaḥ.
14. kadi ta ananiŋ janmi, urip miwaḥ patinira, yĕkti dèn kwasani kabèḥ, lan kinarṣan déniŋ allaḥ, woŋ urip muŋ sadarma, lan mati bakal kabubuḥ, maṅkono iku paṣṭiña.
15. marmané tumrap woŋ mukmin, sabĕn ari yèn sĕmbahyaŋ, tansaḥ ṅaturkĕn uñjuké, kawula umaḍĕp iŋ djat, kaŋ nitahkĕn akasa, myaŋ bhumi kaṇṭi kayuṅyun, mèstuti aṅèstupada.
16. saha kawula puniki, tuhu sanèn goloṅanña, tiyaŋ iṅkaŋ sami maṅro, ḍumatĕŋ iŋ sĕsĕmbahan, tuhu sĕmbaḥ kawula, bĕkti pĕjaḥ gĕsaŋ ulun, kadarbé paṅraniŋ ṅalam.
17. maṅkya gantya mijaŋ mariŋ, sipat ṅilmu muṅguḥ allaḥ, liré allaḥ wajib darbé, sipat ṅilmu kaŋ tĕgĕsña, ṅudanèni sabaraŋ, mokalé yèn allaḥ iku, lamun boḍo iŋ sabaraŋ.
18. déné ṅilmuné hyaŋ widdhi, saguŋ baraŋ kaŋ tumitaḥ, dèn ṅilmoni sakabèhé, tan ana baraŋ titahña, kaŋ dadiné muŋ lahan, tan ana pigunanipun, myaŋ tan ana parlunira.
19. tumitahé ṅalam iki, baraŋ siji lan wĕnèhña, butuḥ sasambuṅan kabèḥ, pantog pantogiŋ sambuṅan, butuḥ maraŋ iŋ allaḥ, kaŋ sipat maṅani pitu, iku nora kĕna ora.
20. dé tumrapiŋ para janmi, kaŋ tan wruḥ gunaniŋ baraŋ, kaŋ gumlar nèŋ ṅalam kiyé, iku tan lyan darunaña, sakiŋ kuraŋ ṅrĕtiña, maraŋ iŋ saguṅiŋ ṅilmu, kaŋ makṣiḥ piniṅid iŋ hyaŋ.
21. kadi ta duk para janmi, duruŋ wruḥ gunaniŋ hawa, listrik kaŋ ṅanakké blĕḍèg, yĕkti woŋ muŋ ṅaṅgĕp ala, jĕr amuŋ karya samar, yèn ñambĕr woŋ tĕmaḥ lampus, nĕrak wisma dadya braṣṭa.
22. ṅiŋ dupi woŋ wus mĕruhi, lan baṅkit mikuté pisan, aṅalap maraŋ dayané, pratéla yèn gunanira, dahat aguŋ sañata, mèḥ sakèḥ pakaryan aguŋ, migunakkĕn dayanira.
23. kaya ta listrik iŋ pabrik, dayané ébat kaliwat, baṅkit ṅaṅkat kaŋ lwiḥ abot, lamun kinarya dadamar, paḍaṅé lir rahina, laḥ iku swĕnèhiŋ ṅilmu, kaŋ wus kababar iŋ allaḥ.
24. maṅkya gantya mijaŋ mariŋ, sipat khayatirèŋ allaḥ, khayat pan urip tĕgĕsé, mokal allaḥ sipat séda, déné prataṇḍanira, lamun allaḥ khayat iku, dènnya asipat tri ṅarṣa.
25. lirira mokal sayĕkti, lamun allaḥ sipat kudrat, iradat muwaḥ ṅilmuné, iku tĕka sipat séda, yèn séda sayĕktiña, allaḥ tan asipat ṅilmu, iradat tanapi kudrat.
26. déné khayaté hyaŋ widdhi, tan kadi uripiŋ janma, kaŋ butuḥ ana ñawané, balik khayatirèŋ allaḥ, sugĕŋ datanpa ñawa, tur sugĕṅé allaḥ iku, nora ṅaṅgo séda séda.
27. pan maṅkono uga yĕkti, sipat samà basar kalam, allaḥ tuhu miḍaṅĕté, mirṣa tanapi ṅandika, mokal kalamun allaḥ, tuli wuta lawan bisu, tan sampurṇa sipatira.
28. samà basaré hyaŋ widdhi, tanapi sipaté kalam, tanpa taliṅan miṛĕṅé, tanpa paniṅal mirṣaña, lan paṅandikanira, uga nora ṅagĕm tutuk, kadidéné pra manusa.
29. samà basaré hyaŋ widdhi, tanapi sipaté kalam, iku apan tĕrus kabèḥ, tanpa aṅaso sakĕḍap, wiwit duk mulanira, éṅga iŋ satĕrusipun, ajali abadi ranña.
30. sipat kaŋ tĕtĕlu iki, sayĕkti uga amĕmpan, maraŋ saguŋ titaḥ kabèḥ, liré pamyarṣané allaḥ, miyarṣa saguŋ swara, kaŋ aliriḥ lan kaŋ sĕru, myaŋ saguŋ gunĕmiŋ janma.
31. pra kawula kaŋ bibisik, nalika lagya sĕmbahyaŋ, uga kapiyarṣa kabèḥ, maṅkono uga pra janma, kaŋ samya ñatur liyan, uga piniyarṣa tuhu, iŋ pañjĕnĕṅané allaḥ.
32. dé paniṅalé hyaŋ widdhi, iku mirṣa iŋ sabaraŋ, aguŋ alit sakabèhé, nadyan sĕmut nèŋ pĕtĕṅan, allaḥ mirṣa kéwala, allaḥ uga mirṣa tuhu, woŋ kaŋ bĕkti lan kaŋ makṣyat.
33. nadyan makṣiyaté ñĕpi, tan tinon iŋ liyan janma, ṅiŋ allaḥ maṣṭi mirṣané, marma wajib pra kawula, kaŋ wus makripat iŋ hyaŋ, tansaḥ ṅrĕkṣaa iŋ wuwus, lan ragané ywa makṣiyat.
34. dé kalamirèŋ hyaŋ widdhi, iku tanpa ṅaṅgo swara, lan tanpa kurup jatiné, kadadyané saguŋ titaḥ, dumadi lan sirṇaña, kalawan kalam hyaŋ aguŋ, apa sasabdané dadya.
35. samà basaré hyaŋ widdhi, tanapi sipat kalamña, iku pan sawiji kabèḥ, nora ṅaṅgo wiwilaṅan, sawiji wus sampura, nora kaya manuṅsèku, tumindak mawa ambalan.
36. yèn nuju myat lan miyarṣi, wuwusé woŋ kaŋ nèŋ ṅarṣa, yĕkti tan uniŋ rupané, myaŋ miyarṣa iŋ liṅira, woŋ kaŋ anèŋ puṅkurṇya, maṅkono satĕrusipun, kaŋ butuḥ maraŋ ambalan.
37. dadya yèn kaṛĕp tumuli, myat lan myarṣakkĕn liṅira, janma kaŋ anèŋ puṅkuré, tandya nilar kaŋ nèŋ ṅarṣa, taṅgap apasaŋ karṇa, lan myat woŋ kaŋ anèŋ puṅkur, kaŋ ṅajak awawansabda.
38. pahé lan samà hyaŋ widdhi, tanapi basar kalamña, pan amuŋ sawiji bahé, nora aṅaṅgo wilaṅan, kaŋ mawali trapira, kadi myaté allaḥ iku, bablas tan bisa kaliṅan.
39. myat kawula kaŋ nèŋ jawi, uga myat kaŋ nèŋ jro wisma, nadyan tinutup koriné, laḥ maṅkono dunuṅira, swijiniŋ sipat samà, basar lan kalam hyaŋ aguŋ, kaŋ tan ṅaṅgo ṅraras driya.
4. mijil
1. wus palaṣṭa kaŋ sipat maṅani, winijaŋ surahos, pan iŋ maṅkya gantya mĕḍaraké, sipat maknawiyaḥ pituŋ warṇi, maknawiyaḥ arti, tĕtĕpirèŋ wujud.
2. sipat maknawiyaḥ lan maṅani, mapan gaṇḍèŋ yĕktos, kadi sipat kadiran agaṇḍèŋ, lawan sipat kudratiŋ hyaŋ widdhi, maṅkonèku maṣṭi, nora bisa luput.
3. déné sipat kadiran kaŋ arti, yèku kaŋ kuwahos, mokal allaḥ kaŋ apĕs anané, allaḥ uga muridan sayĕkti, muridan lirṇèki, kaŋ akarṣa tuhu.
4. mokal lamun allaḥ sipatnèki, kapĕkṣa iŋ pakon, allaḥ uga ṅaliman sipaté, pan tĕgĕsé iṅkaŋ ṅudanèni, mokal yèn ta ṅanti, kaŋ aboḍo iku.
5. allaḥ uga khayat sipatnèki, kaŋ sugĕŋ sajatos, mokal lamun kaŋ séda anané, allaḥ uga samiṅan sayĕkti, liré kaŋ miyarṣi, mokal kaŋ tan ṅruṅu.
6. allaḥ uga basiron kaŋ maṣṭi, dé liré basiron, yèku iṅkaŋ mirṣa iŋ saguṅé, mokal lamun kaŋ wuta tan uniŋ, riŋ sawiji wiji, kaŋ asipat makhluk.
7. sipat mutakaliman kaŋ kèri, déné iṅkaŋ artos, allaḥ iṅkaŋ ṅandika anané, mokal lamun kaŋ bisu tan aṅliŋ, laḥ iku wijaṅiŋ, maknawiyaḥ pitu.
8. marma maṅkya wus tĕraŋ sayĕkti, sipat warṇa roro, iku tĕtĕp agaṇḍèŋ anané, maknawiyaḥ ñĕṭakkĕn maknawi, sakaroné iku, iptikor ranipun.
9. yèku iṅkaŋ maṣṭi dèn butuhi, iŋ makhluké alloḥ, naṅiŋ nora butuḥ iŋ liyané, jĕr djatullaḥ iku mahasugiḥ, tĕmbuṅé ṅarabi, istighnak ranipun.
10. maṅkya gantya mijaŋ sipat jahij, wĕwĕnaṅiŋ alloḥ, allaḥ iku pan wĕnaŋ yĕktiné, paṅgawéné maraŋ saguŋ mumkin, nadyan tan akardi, uga wĕnaŋ tuhu.
11. dadya muṅguḥ ananirèŋ laṅit, lan bhumi kaŋ katon, tanapiné saguŋ makhluk kabèḥ, datan wajib muṅguhiŋ hyaŋ widdhi, piklukulli mumkin, utawa tarkuhu.
12. gawé lawan tiṅgal gawé mumkin, wĕnaŋ muṅguḥ alloḥ, liré mumkin kaŋ wĕnaŋ anané, nadyan solan saliniŋ pra nabi, dutaniŋ hyaŋ widdhi, uga wĕnaŋ iku.
13. tanapiné tuprapé saliniŋ, syaréṅaté alloḥ, iku uga pan wĕnaŋ yĕktiné, lir syaréṅatiŋ tahorét salin, syaréṅatiŋ iñjil, gya sréṅat kuran guŋ.
14. ṅiŋ rèhira tumrapé iŋ maṅkin, kapaṛĕṅiŋ alloḥ, tan ñalini saréṅat liyané, kaṅjĕŋ nabi mukhamad kaŋ sidik, iku tĕtĕp dadi, nabi kaŋ panutup.
15. lan kitabé kuran tĕtĕp dadi, panutan saguŋ woŋ, marma sapa kaŋ tan agé agé, ṅimanakĕn tanapi mèstuti, woŋ iku sayĕkti, tĕtĕp dadya kupur.
16. nadyan iku woŋ ṅimankĕn mariŋ, ananirèŋ alloḥ, uga tĕtĕp akapir ĕnasé, manèḥ dèn wruḥ wĕnaṅé hyaŋ widdhi, nitahkĕn pra janmi, uga wĕnaŋ iku.
17. pariŋ waras miwaḥ pariŋ sugiḥ, riŋ sawĕnèhiŋ woŋ, allaḥ uga pan wĕnaŋ yĕktiné, tanapiné pariŋ mukmin kamil, uga wĕnaŋ yĕkti, nora wajib tuhu.
18. manèḥ allaḥ uga nora wajib, aṅlastarèkkĕn woŋ, lir kaŋ mukmin tĕtĕp nèŋ imané, lan kaŋ islam anèŋ islamnèki, pan maṅkono yĕkti, wĕnaṅé hyaŋ aguŋ.
19. marma tumrap saguṅé woŋ mukmin, kaŋ makripatulloḥ, kaŋ wus wĕruḥ yèn hyaŋ kaŋ murbèŋ rèḥ, pan maṅkono sipat wĕnaṅnèki, yĕkti saṅsaya jriḥ, riŋ wisésanipun.
20. yèku ajriḥ kalamun aṅanti, imané cinopot, ḍèḍèl sakiŋ iŋ jroniŋ atiné, murudira mriŋ kasidan jati, dadya anĕmahi, mati lawan kupur.
21. yèn maṅkono sayĕktiné dadi, ala wĕkasiŋ don, aran syukulkhatimaḥ tĕmbuṅé, ḍuḥ ḍuḥ allaḥ hyaŋ kaŋ mahaasiḥ, mugi tuwan gusti, ṅasihi iŋ ulun.
22. ṅlastarèkkĕn iman ulun gusti, dumuginiŋ layon, atĕtĕpa tan ṅantos kaḍèḍèl, ḍud ḍuḥ gusti mugi amĕlasi, riŋ ulun kaŋ dlakip, ṅabulkĕn pañuwun.
23. laḥ maṅkono traṅé sipat jahij, wĕwĕnaṅé alloḥ, muga muga pra sudara kabèḥ, baṅkit ṅalap riŋ pituduḥ jati, sakiŋ sipat jahij, wĕnaṅé hyaŋ aguŋ.
24. yèku nuli iŋ tyas darbé ajriḥ, riŋ pamurbèŋ alloḥ, tĕmahané tansaḥ aḍĕḍépé, gégéyoṅan maraŋ iŋ hyaŋ widdhi, umaḍĕp iŋ tokhid, dahad dènnya kukuḥ.
25. maṅkya kaya wus tĕraŋ sayĕkti, wĕwĕnaṅé alloḥ, kaŋ jlèntrèhnya baṅĕt anĕtĕpké, kapaṅrané allaḥ mahaḷĕwiḥ, muga dèn ṅrĕtèni, lan cinakup kalbu.
26. dé kumpulé sipat iṅkaŋ wajib, lan mokalé alloḥ, tanapiné sipat wĕwĕnaṅé, iku apan dadi klimaḥ tokhid, kaŋ minaṅka djikir, pra mukmin sawĕguŋ.
27. napi isbat tĕmbuṅé ṅarabi, déné iṅkaŋ artos, napi iku baṅĕt aṅorakké, iŋ anané paṅéran sajati, dé isbat kaŋ arti, nĕtĕpakĕn tuhu.
28. yèku nĕtĕpakĕn iŋ ananiŋ, paṅéran sajatos, iṅkaŋ asma allaḥ kaŋ murbèŋ rèḥ, la ilaha iku iṅkaŋ napi, dé ilalloḥ nèki, dadya isbatipun.
29. wus palaṣṭa pamijaṅé mariŋ, makripat iŋ alloḥ, muga iki wĕjaṅan kaŋ jlèntrèḥ, tĕtĕp dadya pituduḥ sajati, makripat iŋ gusti, allaḥ kaŋ mahaguŋ.
30. jĕr makripat dadya pikukuhiŋ, agama kaŋ kukoḥ, lan makripat riŋ hyaŋ kaŋ murbèŋ rèḥ, iku dadya wajib iṅkaŋ ḍiṅin, tumrapiŋ ahurip, kaŋ nĕdya tan muṅkur.
5. paṅkur
1. sapa tan muṅkur mriŋ allaḥ, myaŋ wus ñakup riŋ wĕjaṅan iŋ ṅarṣi, tĕtĕp wus makripat tuhu, riŋ hyaŋ kaŋ murbèŋ titaḥ, kari wajib aṅrĕkṣa iŋ tokhidipun, mriḥ ywa rusak makripatña, déniŋ ṛĕṛĕgĕdiŋ syirik.
2. krana tokhid iku uga, dadya baku pikukuḥ kaŋ sajati, tumrap agamèŋ hyaŋ aguŋ, sapa rusak tokhidña, sayĕktiné tumibèŋ syirik tyasipun, lan sapa syirik tyasira, tĕtĕp najis tyasirèki.
3. dé tokhid iku artiña, ñawijèkkĕn paṅéran kaŋ sajati, yèku hyaŋ kaŋ mahaaguŋ, allaḥ kaŋ murbèŋ titaḥ, kaŋ kuwasa lan sampurṇa sipatipun, lan mahasuci sañata, sakiŋ sipat kaŋ tan yukti.
4. dé syirik iku artiña, maṅro mariŋ sĕsĕmbahan sajati, lir nĕmbaḥ mriŋ brahalèku, gambar lan kayu palaŋ, lan aṅaṅgĕp saliyané allaḥ iku, ana kaŋ bisa wèḥ bagya, lan ana iṅkaŋ mlarati.
5. maṅkono lir aṅgĕpira, swĕnèḥ janma kaŋ boḍo ṅilmu tokhid, aṅgaṅgĕp yèn kubur iku, pan kĕna sinuwunan, apa iṅkaŋ dadya kabutuhanipun, lan jimat bisa wèḥ bagya, pétuŋ bĕcik añlamĕti.
6. paṅaṅgĕp iṅkaŋ maṅkana, ñata syirik klĕbu cĕgaḥ hyaŋ widdhi, yèn sira sĕdyarṣa hayu, iŋ kalaṅgĕṅanira, ṅĕdohana syirik kaŋ klĕbu dosa guŋ, lan ywa ñĕñuwun mriŋ baraŋ, kaŋ ñata sipaté mati.
7. yèn sira mamriḥ lantaran, amuriha iṅkaŋ dèn karilani, kaŋ tan ana bahyanipun, maraŋ tahokhidira, yèn gonira muriḥ lalantaran iku, riŋ baraŋ kaŋ sipat pĕjaḥ, gampaŋ tumiba iŋ syirik.
8. sirik sayogya dohana, sapa syirik yĕkti paṅéranèki, patiŋ tlècèk dunuṅipun, ḍañaŋ pĕri prayaṅan, cikal bakal smarabhumi lan lyanipun, bisa dadi paṅranira, kaŋ asriŋ dèn susuwuni.
9. woŋ kaŋ syirik maraŋ allaḥ, nora darbè bubuṇḍĕlan jro ati, lan tékad iṅkaŋ linuhuŋ, pahé lan woŋ kaŋ iman, buṇḍĕlané tokhid lan tékad kaŋ luhuŋ, kaŋ tuhu guŋ dayanira, bandĕl lan ṅandĕlkĕn ati.
10. lan yèn wus muntu iŋ tékad, woŋ kaŋ tokhid muŋ maḍĕp mriŋ hyaŋ widdhi, tan ajriḥ tumĕkèŋ lampus, baṇḍa miwaḥ ñawaña, dèn ĕcoṅkĕn maṅka labuḥ iŋ hyaŋ aguŋ, lamun agamaniŋ allaḥ, ṅantya dèn ĕsorkĕn janmi.
11. woŋ kaŋ tokhidé maṅkana, nadyan kasor nèŋ madyaniŋ ajurit, kapupu nĕmahi lampus, ṅiŋ wawaṅsitiŋ allaḥ, anèŋ kuran ñĕbut woŋ iku tan lampus, namuŋ urip sajatiña, nèŋ ṅarṣèŋ paṅérannèki.
12. dadya woŋ kaŋ tokhid iŋ hyaŋ, iku ñata woŋ kaŋ mĕnaŋ sajati, nadyan kasor lahiripun, ṅiŋ sajatiné mĕnaŋ, baṅkit jaraḥ swarganiŋ allaḥ kaŋ luhuŋ, laḥ ta iku pigunaña, darbè bubuṇḍĕlan tokhid.
13. wus palaṣṭa pamijaṅña, ṅilmu tokhid kaŋ dahat awigati, maṅkya sĕdya mijaŋ tĕrus, ṅakakid iṅkaŋ saṅa, wajib mokal lan wĕnaṅé para rasul, wajibé pan ana papat, mokal papat wĕnaŋ swiji.
14. sipat wajib kaŋ kapisan, rasuliŋ hyaŋ iku asipat sidik, sidik atĕmĕn liripun, mokalé lamun dora, saguŋ waraḥ lan sabdané para rasul, nadyan kaŋ mĕca akirat, nora dora ananèki.
15. tĕkané pra rasuliŋ hyaŋ, mriŋ manusa dèn utus iŋ hyaŋ widdhi, mriḥ ṅañcam pra manuṅsèku, kaŋ kapir maraŋ allaḥ, lan tan mèstu riŋ préntaḥ cĕgaḥ hyaŋ aguŋ, kalawan sikṣa naraka, kaŋ laṅgĕŋ datanpa uwis.
16. lan aṅĕbaŋ woŋ kaŋ iman, myaŋ mèstuti riŋ ḍawuhiŋ hyaŋ widdhi, klawan gañjaran swarga guŋ, dé wajib kapiṇḍoña, para rasul sipat amanat satuhu, liré pinracayèŋ allaḥ, mokal cidra iŋ pakarti.
17. jĕr allaḥ uwus mitaya, miliḥ rasul sayĕkti tan ñidrani, yèn cidra dènnya kahutus, yĕkti wus rinampuṅan, pinidana tanpa dèn srantèkkĕn tuhu, dé sipat kaŋ katĕluña, yèku aran sipat tabligḥ.
18. tabligḥ nĕkakkĕn lirira, pan mokalé yèn ta aṅumpĕt ṅanti, kahutusé para rasul, mapan amuŋ sadarma, saguŋ ḍawuḥ tanna kaŋ dèn umpĕt iku, tinĕkakkĕn pra manuṅsa, datan ana kaŋ acicir.
19. piŋ paté sipat patanaḥ, liré limpad micara mriŋ agami, mokal yèn pra rasul iku, boḍo kaananira, nora wasis micara agama luhuŋ, yèn nĕkakkĕn ḍawuhiŋ hyaŋ, mriŋ manusa bisa nlisir.
20. mapan srana sipat papat, iṅkaŋ wajib lan papat mokalnèki, dadya sampurṇa satuhu, sipaté rasulullaḥ, nora ṅuciwani dènnira kahutus, riŋ saguŋ para manusa, miwaḥ riŋ saguŋ para jin.
21. marma siŋ sapa wus paham, yèn pra rasul sipaté lir iŋ ṅarṣi, yogya sumaraḥ agupuḥ, anut saparéntahña, paréntahiŋ rasul paréntaḥ hyaŋ aguŋ, lan tindaké rasuliŋ hyaŋ, tuhu panutan kaŋ bĕcik.
22. nèŋ jro kuran wus winĕḍar, rasulullaḥ iku panutan bĕcik, tumrap manuṅsa sawĕguŋ, kaŋ ṅaṛĕp aṛĕp maraŋ, rahmatiŋ hyaŋ anèŋ kalaṅgĕṅan bésuk, laḥ iku nasirèŋ allaḥ, kaŋ aṅutus para nabi.
23. pan iŋ maṅkya gantya mijaŋ, sipat wĕnaŋ tumrap rasulullahi, yèku yèn pra rasul iku, apan wĕnaŋ kataman, ṅaral basariyaḥ wĕnaṅé pra manus, lir wĕnaŋ kataman gĕraḥ, wĕnaŋ tumĕka iŋ lalis.
24. anané wĕnaŋ maṅkana, jĕr pra rasul iku uga pra janmi, tan kĕna pra rasul iku, dèn aṅgĕp sĕsĕmbahan, sinakuṭokakĕn lan allaḥ hyaŋ aguŋ, lan iṅaṅgĕp putrèŋ allaḥ, uga tan kĕna sayĕkti.
25. jĕr paṅaṅgĕp kaŋ maṅkana, iku tĕtĕp luluwihan sayĕkti, tumibèŋ syirik satuhu, sapa syirik mriŋ allaḥ, nasiŋ kuran kharam malbèŋ swarga luhuŋ, yon nora tobat mriŋ allaḥ, duk nalika makṣiḥ urip.
26. wus palaṣṭa pamijaṅña, sipat iṅkaŋ tumrap rasulullahi, wajib papat mokal catur, lan wĕnaṅé sajuga, pan kumpulé lan sipat allaḥ kaŋ aguŋ, kaŋ pataŋ puluḥ sajuga, ganĕp sèkĕt nora luwiḥ.
27. maṅkya yèn sira wus paham, maraŋ sèkĕt ṅakahid kasbut ṅarṣi, lan wus aṅandĕl satuhu, yèn allaḥ lan rasulña, tĕmĕn yakin sipaté lir kaŋ tinutur, klawan mantĕp jroniŋ driya, ṅanti tumĕkaniŋ lalis.
28. tĕmĕn yèn sira wus iman, anĕtĕpi pikukuhiŋ agami, wajib sira dèn agupuḥ, amaca iŋ syahadat, kaŋ adadya taṇḍaniŋ islam kaŋ baku, yèku rukun kaŋ sapisan, sakiŋ rukun limaŋ warṇi.
29. asyhadualla ilaha, ilalahu yèku syahadat tokhid, kapiŋ dwi syahadat rasul, yèku asyhaduanna, mukhammadan ṅabduhu warasuluhu, dé muṅguḥ liré syahadat, iku ṅakoni nĕkṣèni.
30. yèn tan ana sĕsĕmbahan, iṅkaŋ wajib sinĕmbaḥ lan sajati, kajaba allaḥ hyaŋ aguŋ, lan anĕkṣèni uga, yèn jĕŋ nabi mukhamad iku satuhu, kawula lan dutèŋ allaḥ, iṅkaŋ aṅĕmban agami.
31. agama aṅgon manusa, jalu èstri mlarat tanapi sugiḥ, pra sudra tumĕkèŋ ratu, kaŋ boḍo lan ka limpad, anom tuwa sanadyan duruŋ pènsiun, kabèḥ nora kĕna tiṅgal, saréṅat agama suci.
32. apa ta liré saréṅat, liré yèku pranataniŋ agami, kaŋ mĕṅku tatanan luhuŋ, tumrap paṅĕmbat praja, paṅadilan myaŋ uṇḍaŋ lan khukum khukum, maṅka pranatan manusa, jro urip tumĕkèŋ lalis.
33. kadi ta tatanan nikaḥ, myaŋ amaris baṇḍa tiṅgalan mayit, lakuné adol tinuku, myaŋ tataniŋ tataṅgan, sarawuṅan lan tataniŋ magut pupuḥ, miwaḥ tataniŋ ṅibadaḥ, kumawula iŋ hyaŋ widdhi.
34. tumrap lahir lan batinña, tanapiné danya akiratnèki, kabèḥ tinata aruntut, tan ana cacadira, jĕr kaŋ karya pranatan allaḥ kaŋ aguŋ, kaŋ wicakṣaṇa sipatña, yĕkti tan aṅuciwani.
35. dosa baṅĕt yèn ta ṅantya, ana janma kumasura ṅiṅkari, ñélaki syaréṅat iku, déniŋ aṅgĕpiŋ tyasña, asapélé tan ana wigatinipun, syaréṅat ṅilmu kaŋ aṇḍap, nora wajib dèn lakoni.
36. woŋ kaŋ maṅkono aṅgĕpña, tuhu boḍo maraŋ agama suci, paran katĕmahanipun, woŋ kaŋ boḍo agama, yèku kinawulakkĕn iŋ hawa napsu, woŋ kaŋ maṅkono sipatña, nora mardika iŋ ati.
37. jĕr atiné wus kadayan, ṅilmu kaŋ tan dèn paṛĕṅkĕn hyaŋ widdhi, tumrapé lamun rinasuk, wit ṅilmu kaŋ maṅkana, iku amuŋ ṅĕdohkĕn agama tuhu, tĕmaḥ pamawasiŋ ṅakal, mriŋ syaréṅat nuṅsaŋ syarik.
38. kaŋ maṅka syaréṅat islam, kabèḥ mĕṅku piguna kaŋ sajati, tumrapé iṅkaŋ aṅrasuk, syaréṅat apan tĕraŋ, mĕṅku watĕs watĕs tindak kaŋ tan jujur, kaŋ anut ijajil laknat, lan hawa napsu kaŋ jahil.
39. mapan maṅkono ñataña, syaréṅatiŋ agama islam suci, yĕkti abakaḥ satuhu, lan ojokaniŋ sétan, miwaḥ hawa napsu kaŋ wĕgahan iku, mriŋ saguŋ laku utama, lan tindak kaŋ bĕcik bĕcik.
40. déné maca iŋ syahadat, iku uga atĕgĕs añaguhi, mèstuti ḍawuḥ hyaŋ aguŋ, lan ḍawuḥ utusanña, kaŋ ginĕlar nèŋ syaréṅat kaŋ linuhuŋ, apapakĕm kitab kuran, kaŋ wajib lamun kinaṇṭi.
6. kinaṇṭi
1. samĕṅko gantya anutur, rukuniŋ islam kapiŋ dwi, yèku salat limaŋ wĕkdal, dluhur ṅasar miwaḥ magrib, ṅisak subuḥ kalimaña, kabèḥ khukumira wajib.
2. ḍawuhé allaḥ kaŋ aguŋ, nèŋ jroniŋ kuran wus maṅsit, lan ora nitahkĕn iṅwaŋ, iŋ jin miwaḥ para janmi, ṅiŋ muriḥ samya ṅibadaḥ, maraŋ pañjĕnĕṅan mami.
3. laḥ ta iku iṅkaŋ parlu, allaḥ nitahkĕn pra janmi, muriḥ samya aṅibadaḥ, aywa tĕka kita iki, nora sudi aṅibadaḥ, maraŋ hyaŋ kaŋ mahasuci.
4. yèn kita tan sudi iku, yĕkti malaḥ kita iki, nuli aran kumawula, hawa napsu kaŋ tan yukti, kaŋ watĕké awĕgahan, abot tumindak iŋ bĕcik.
5. allaḥ iṅkaŋ mahaaguŋ, niŋ kuran uga wus maṅsit, sira harak uwis miyat, woŋ kaŋ ṅalap hawanèki, tinurut maṅka paṅranña, laḥ iku sabda kaŋ suci.
6. sumarmané sira iku, amriḥ nora tansaḥ dadi, kawulaniŋ hawanira, yogya éṅgala nĕtĕpi, riŋ laku lakuniŋ syarak, iṅkaŋ sunat lan kaŋ wajib.
7. salat limaŋ wĕktu iku, bakuniŋ salat kaŋ wajib, salat liyanya muŋ sunat, kèhira mawarṇi warṇi, kabèḥ sayogya gurokna, mriŋ kyahi lan dèn lakoni.
8. maguru salat ywa rikuḥ, lan ywa isin aṅlakoni, jĕr iku pakarti mulya, lan laku iṅkaŋ pinuji, baṅĕt dudu bĕnĕrira, yèn salat rikuḥ lan isin.
9. nadyan ta awakirèku, tiṅgal muṅkar duruŋ baṅkit, ṅiŋ ywa ṅanti tiṅgal salat, isya allaḥ mĕṅko dadi, mari kamuṅkaranira, jĕr salat iku barkahi.
10. allaḥ iṅkaŋ mahaaguŋ, nèŋ jroniŋ kuran wus maṅsit, sañata kalamun salat, iku baṅkit ñĕgaḥ sakiŋ, paṅgawé dosa lan muṅkar, laḥ iku pituduḥ jati.
11. paṅgawé salat satuhu, dadya panañcaṅiŋ ati, bĕkti lan èṅĕt iŋ allaḥ, marma sapa aṅlakoni, salat manĕmbaḥ iŋ allaḥ, yĕkti iŋ tyas kĕṛĕp éliŋ.
12. lan nora dupèḥ woŋ iku, kèḥ éliṅé iŋ hyaŋ widdhi, ṅiŋ yèn tan sudi ṅibadaḥ, sayĕktiné nora bĕcik, éliṅé tan tinarima, jĕr tan dadya paṅastuti.
13. iŋ khadisé kaṅjĕŋ rasul, wus maṅsit lawan wigati, kalamun paṅgawé salat, iku dadi kawitaniŋ, ṅamal iṅkaŋ dipunkisab, déniŋ hyaŋ nèŋ jaman akir.
14. lamun ṅamal salat iku, bisa tinrimèŋ hyaŋ widdhi, paṅgawé liya liyaña, uga tinarima nuli, marma ambagusna salat, lan ṅilmu myaŋ ihlas ati.
15. salat manĕmbaḥ hyaŋ aguŋ, muŋ kudu ihlas iŋ ati, krana mèstuti iŋ préntaḥ, lan amriḥ kalilannèki, mriḥ béñjaŋ anèŋ akirat, antuk rahmatiŋ hyaŋ widdhi.
16. dé yèn kaṛĕp sugiḥ iku, dalané muŋ nambut kardi, maṅgahota lan adagaŋ, srĕgĕp gĕmi ṅati ati, myaŋ ṅrĕti lakuniŋ pasar, bĕciké lambaran batin.
17. yèku lamun wañci dalu, nalikané ayun guliŋ, ṅlakonana salat kajat, kaŋ ajĕg nora wis uwis, sahéṅga ṅanti kĕtĕkan, gonira kapéṅin sugiḥ.
18. yèn tĕmĕn kajatirèku, insya allaḥ sira nuli, pinariṅan kasugihan, jĕr allaḥ wus aprajaṅji, anèŋ jroniŋ kitab kuran, lamun bakal ñĕmbadani.
19. pan maṅkéné ḍawuhipun, nalika kawula mami, tanya iŋ sira mukhammad, sakiŋ sun waṅsulana glis, iṅsun iki djat kaŋ cĕḍak, ṅabulkĕn doṅaniŋ janmi.
20. nalikané samya ñuwun, maraŋ pañjĕnĕṅan mami, marmané sira ñuwuna, lan ṅimanĕna iŋ mami, muriḥ sira iku samya, antuk pituduḥ sajati.
21. muŋ kéwala sira iku, aywa kuraŋ iŋ panampi, ṅira lamun wus andoṅa, yĕkti gya dèn sĕmbadani, apa sapañuwunira, laḥ iku nora sayĕkti.
22. balik kaŋ maṣṭi kinabul, iku doṅané woŋ kaŋ jriḥ, liré jriḥ bĕkti iŋ allaḥ, mèstu préntaḥ cĕgahnèki, allaḥ nora pisan karṣa, aṅobralakĕn pépariŋ. 23. maṅkéné ḍawuḥ hyaŋ aguŋ, kaŋ kasbut nèŋ kuran suci, tuhu kaŋ tinampa allaḥ, iku ṅamalé woŋ kaŋ jriḥ, marmané sira wĕdiya, riŋ allaḥ kaŋ mahasuci.
24. wĕdi maraŋ iŋ hyaŋ aguŋ, sarta tĕmĕn amèstuti, iŋ préntaḥ lan cĕgahira, iku tuhu añjalari, kabĕgyaniŋ pra manusa, iŋ danya tumĕkèŋ akir.
25. dé samĕṅko parlu nutur, salat liyanya kaŋ wajib, yèku salat ari jumṅaḥ, tumindak anèŋ iŋ masjid, saduruṅé salat jumṅaḥ, dèn anani khutbaḥ ḍiṅin.
26. yèku pitutur kaŋ luhur, sakiŋ sawijiniŋ khatib, mĕḍarkĕn soraḥ mawarṇa, yèn parlu bab ékonomi, ṅajokkĕn kadañanira, saguṅé para muslimin.
27. nadyan jroniŋ khutbaḥ iku, ṅrĕmbug babiŋ ékonomi, mriḥ bĕcik danya akirat, yèn tan bakaḥ lan agami, yĕkti tan ran ṅrĕmbug daña, iku khutbahé ki khĕtib.
28. malaḥ yèn woŋ islam mundur, tumrabiŋ ékonominé, lamun khutbaḥ ari jumṅaḥ, parlu baṅĕt kyahi khatib, khutbaḥ bab paṅupajiwa, mriḥ ajuniŋ budi sugiḥ.
29. jĕr khutbaḥ ri jumṅaḥ iku, dunuṅé pra kyahi katib, ṅajokakĕn umat islam, bab danya akiratnèki, yèn parlu aṇḍiḍik tékad, ṅobarkĕn sĕmaṅatnèki.
30. dé syaraté khutbaḥ iku, iṅkaŋ ḍiṅin kudu suci, sakiŋ khadas sakaraña, khadas aguŋ khadas alit, piŋ dwi ṅadĕg lan katriña, luṅguḥ antarèŋ khutbaḥ dwi.
31. dé rukuné khutbaḥ iku, maca syahadat kaŋ ḍiṅin, kaŋ kapiŋ dwi awasiyat, maca ayat kaŋ kapiŋ tri, kapiŋ paté maca slawat, lima doṅa riŋ hyaŋ widdhi.
32. yèn kĕtib wus khutbaḥ iku, saguṅé para muslimin, iṅkaŋ samya jumuṅahan, nuli ṅadĕg salat sami, babaṛĕṅan makmum imam, jèjèr lan sab ṭarik ṭarik.
33. jroniŋ samya makmum iku, tan ana kaŋ ṅrumaṅsani, swĕnèhiŋ woŋ lan swĕnèhña, ṅaku luhur drajatnèki, kabèḥ rumasa kawula, nèŋ ṅarṣèŋ gusti sawiji.
34. baṛĕŋ anĕmbaḥ hyaŋ aguŋ, kalawan koñjĕm iŋ ati, sahéṅga tumĕkèŋ salam, muji yuniŋ pra muslimin, kaŋ iku pujiniŋ salam, maṅka isyaraḥ sayĕkti.
35. yèn asasé islam iku, nĕdya mamayu pra janmi, marmané para woŋ islam, yogya samya anuhoni, makṣud pupujiniŋ salam, tumandaŋ mriḥ yuniŋ janmi.
36. srana nindakakĕn laku, sosial mriŋ para janmi, yèku ṅamal kabĕcikan, kaŋ tumrap iŋ liyan janmi, lir ṅĕdĕgakĕn madrasaḥ, laṅgar masjid rumaḥ miṣkin.
37. srana ṅamal maṅkonèku, baṅkit kinawruhan yĕkti, yèn asas agama islam, sosio lan démokrasi, marma sapa ñéda islam, yĕkti mĕgat imannèki.
7. mĕgatruḥ
1. pan iŋ maṅkya sayogya nuli anutur, rukuniŋ islam kapiŋ tri, jakat kaŋ pranatanipun, uga dadya taṇḍa yĕkti, yèn islam iku sosio.
2. iya iku bĕcikiŋ bĕbrayan iḍup, ṅayomi pra pakir miṣkin, ĕndi kĕkuraṅan butuḥ, iŋ pranatan wus ñalaṅi, mriḥ kaŋ sugiḥ wajib asok.
3. pranataniŋ jakat kaŋ uwus tinamtu, miturut ḍawuhiŋ khadis, tiba saprapataṅpuluḥ, sakiŋ saguŋ baṇḍanèki, mas picis kaŋ wus sanisob.
4. nadyan picis kĕrtas kaŋ ginĕbuŋ gĕbuŋ, uga kudu dèn jakati, déné lamun rijki iku, saguŋ kaŋ ṅuwati urip, anèṅé nagara kono.
5. kadidéné pari gaplèk lawan jaguŋ, tumrapé iŋ tanaḥ jawi, papaḍané sagu gandum, tumrap liyan tanaḥ jawi, lan kurma iŋ tanaḥ ṅarob.
6. dé jakaté kalamun rijki iku, sabĕn panèn wĕtunèki, yèn nisob watĕsé cukup, iku kudu dèn jakati, takokna ṅulama kaŋ khos.
7. déné sato yèku kéwan kaŋ kaḷĕbu, rajakayané woŋ bhumi, lir kĕbo sapi myaŋ wĕḍus, jakaté tañakna ugi, mriŋ ṅulama ṅalim kaŋ khos.
8. jĕr nèŋ kéné jinlèntrèhkĕn kuraŋ prĕlu, traṅé nèŋ luguniŋ khadis, wajib gya gurokna iku, yèn sira dadi woŋ sugiḥ, wus maṅsané kudu asok.
9. dé maṅsané asok yèn uwus satahun, iku tumrap lamun picis, sabĕn satus rupyaḥ iku, jakaté kudu sariṅgit, binagé maraŋ woluŋ woŋ.
10. iṅkaŋ kasbut nèŋ kuran woŋ wolu iku, pakir miṣkin sarta ṅamil, yèku kaŋ karyané dundum, mualap woŋ kaŋ sinupriḥ, tĕtĕp islamé tan maṅro.
11. sarta manèḥ jakat kudu kaṅgo nĕbus, saka paṅawulan janmi, mriḥ éṅgal mardikanipun, sakiŋ bandaranirèki, kaŋ ṅawulakkĕn iku woŋ.
12. manèḥ jakat kudu dèn wèhkĕn gharimun, woŋ kaŋ darbé utaŋ picis, krana paṅgawé kaŋ bagus, lir aṅrayat anak rabi, lan tuluŋ bĕcik maraŋ woŋ.
13. manèḥ iṅkaŋ kudu tampa jakat iku, sabililaḥ ibnu sabil, kaŋ ran sabililaḥ iku, béya ṅajokkĕn agami, lir tabligḥ maraŋ sakèḥ woŋ.
14. ṅadĕgakĕn madrasaḥ tanapinipun, laṅgar masjid rumaḥ miṣkin, déné ibnu sabil iku, woŋ woŋ kaŋ luluṅan tĕbiḥ, kĕntékan saṅu iŋ kaṇṭoŋ.
15. utawané kĕna dèn wèhakĕn iku, sĕtiḍipon kaŋ mragadi, sĕtiḍèn madrasaḥ luhur, iṅkaŋ samya muslim muslim, laḥ iku tĕtĕp sosio.
16. laḥ ta iku wajibé kalamun dundum, jakat lan pitraḥ kaŋ wajib, winĕtokkĕn sabĕn tahun, yèn pitraḥ nuju riyadin, ĕntèké sasi ramĕlon.
17. wiwit surup srĕṅéṅé tumĕkanipun, surupé srĕṅéṅé maniŋ, sayogyané pitraḥ iku, winèhkĕn woŋ saduruṅiŋ, salat riaya lan pra woŋ.
18. dé pamrihé supaya iŋ ésuk iku, tan ana woŋ pakir miṣkin, kaŋ nora riaya iku, ṅrasakkĕn bukti wañcyéñjiŋ, saduruŋ salat iŋ alloḥ.
19. dé kaŋ samya kuwajiban pitraḥ iku, woŋ kaŋ iŋ riyadin pitir, darbé turahan satuhu, kaŋ binukti iŋ saari, pitrahé pataŋ mud uwos.
20. upamané sabrayatiŋ omaḥ iku, cacaḥ siraḥ pituŋ iji, nuju dina pitraḥ iku, darbé turahan rijĕki, cukup dèn aṅgo woŋ roro.
21. yèn maṅkono iṅkaŋ dèn pitrahi iku, apan iya amuŋ woŋ dwi, liyané tan wajib iku, sabaliké yèn duwé dwi, kaŋ lima khak antuk pitroḥ.
22. amuŋ poma yèn pitraḥ ywa cara nĕmpur, mriŋ kahum kaŋ muŋ woŋ swiji, kahum uga kĕna iku, winéhan pitraḥ yèn pakir, ṅiŋ muŋ sacukupiŋ pitroḥ.
23. kĕna uga dadi ṅamil kahum iku, malaḥ kahum yogya dadi, ṅamil kaŋ andundum iku, dadi olèhé tan kĕḍik, jĕr bisantuk saprawolon.
24. pan samĕṅko sayogya gantya anutur, rukun islam kapatnèki, puwasa ramĕlan iku, iṅkaŋ kudu dèn lakoni, woŋ islam lanaŋ lan wadon.
25. jaṅji uwus baligḥ wajib pasa iku, miturut ḍawuḥ hyaŋ widdhi, kaŋ nèŋ jro kuran kaŋ luhuŋ, maṅkéné ḍawuḥ hyaŋ widdhi, kaŋ tan kĕna dèn baṅkaŋ woŋ.
26. wus dèn wajibkĕn tumrap sira sadarum, puwasa lir pasanèki, woŋ woŋ saduruṅirèku, muriḥ sira samya ajriḥ, bĕkti maraŋ gusti alloḥ.
27. dadya pasa iku pañcèn aṅgonipun, woŋ kaŋ ṅimankĕn agami, nadyan woŋ kuna rumuhun, uga pasa asisiriḥ, ṅéstokkĕn ḍawuhiŋ alloḥ.
28. puwasané malaḥ lwiḥ abot satuhu, tinimbaŋ puwasanèki, woŋ islam samaṅkya iku, pasa biyèn yèn wus bukti, trus pasa manèḥ ṅrĕkahos.
29. béda lawan pasa kaŋ samaṅkya iku, wajibé muŋ kudu ñirik, cĕgaḥ ḍahar lawan ṅinum, tanapi akaron ṛĕsmi, wiwit pajar éñjiŋ yĕktos.
30. yèku pajar sidik antar èŋ jam catur, tumĕkèŋ surupiŋ rawi, lagya kĕna maṅan ṅinum, tumĕkèŋ akiriŋ ratri, kĕna sahur nora abot.
31. marma pasa samĕṅko iki satuhu, kamurahaniŋ hyaŋ widdhi, sapa nora pasa iku, yèn nuju ramlan kaŋ sasi, tĕtĕp waṅkot maraŋ alloḥ.
32. nora bisa kĕrilan maraŋ hyaŋ aguŋ, pra malékat lan pra mukmin, uga tan rila tyasipun, yèn sumurup baṅsanèki, kaŋ tan pasa sasi ramlon.
33. kèḥ kéwala baṅsa kita jawa iku, ṅaku islam sĕṅit kapir, naṅiŋ tindaké ajĕbul, yèn mriŋ sréṅat islam sĕṅit, lir tan sudi pasa ramlon.
34. yèn kantoran wayaḥ rina kèḥ kaŋ udut, nora ṅaṅgo rikuḥ isin, yèn dadya paṅgĕḍé jĕbul, malaḥ limun kaŋ dèn ḍĕpi, taṇḍa yèn tan pasa ramlon.
35. yèn maṅkono laḥ ĕndi wujudiŋ suwur, woŋ jawa ḍĕmĕn sisiriḥ, ḍuḥ ḍuḥ para baṅsaniṅsun, bok samya dèn iḍĕp bĕcik, atékad utama yĕktos.
36. lamun nuju ramĕlan pasa satuhu, ora orané yèn lalis, yèn dèn niyati satuhu, yĕkti aṅglèntèr tan ṅanti, rasa luwé lawan ṅoroŋ.
37. jĕr barkaté niyat iku dahat aguŋ, marma niyata kaŋ sidik, ṅéstokkĕn ḍawuḥ hyaŋ aguŋ, kaŋ wus nèŋ kuran tinulis, tĕtĕpiŋ pasa ramĕlon.
38. déné lamun aṅlakoni pasa iku, wajib mĕruhana mariŋ, wajibé woŋ pasa iku, niyat anèŋ wañci ratri, ṅéstokkĕn ḍawuhé alloḥ.
39. kadwi ñĕgaḥ kaŋ batalkĕn pasa iku, lirma amutaḥ lan maniŋ, ḷĕbuniŋ baraŋ mriŋ waḍuk, lan maraŋ boloṅan ḍiri, kaŋ tĕrus maraŋ iŋ jĕro.
40. karonlulut kèl nipas lan manèhipun, wĕtuniŋ hyaŋ kamajati, murtad uga batal iku, kabèḥ ṛĕkṣanĕn dibĕcik, ywa ṅibadaḥ tanpa kawroḥ.
41. dé sunaté pasa lilima kèhipun, éṅgal buka surup rawi, utamané buka iku, maṅan woḥ kaŋ rasa ḷĕgi, kurma gĕḍaŋ jĕruk kĕprok.
42. yèn tan ana woḥ wohan kaŋ ḷĕgi iku, ṅinuma bañu kaŋ ṛĕsik, dèn tindakna kabèḥ mahu, saduruŋ sĕmbahyaŋ magrib, mriḥ khusuk nĕmbahé alloḥ.
43. déné sunat kaŋ piŋ dwi ṅakirkĕn sahur, kèḥ maca kuran kapiŋ tri, piŋ pat iktikap kaŋ khusuk, lima ywa ṅucap tan yukti, lir ñatur kaṛĕmé woŋ nom.
8. sinom
1. maṅkya parlu winurṣita, kĕnané woŋ tan ṅlakoni, puwasa sasi ramĕlan, iku yèn wus pikun yĕkti, lan nuju sukĕr sakit, tan waras tumĕkèŋ lampus, ṅiŋ iku wajib pidyaḥ, sadakaḥ mriŋ pĕkir miṣkin, sabĕn ari sadina sakati bĕras.
2. luṅa adoḥ roŋ inĕpan, kaŋ luṅané krana bĕcik, lara kaŋ linaraŋ pasa, déniŋ ḍoktĕr kaŋ wèḥ jampi, iku uga akĕni, nora puwasa rumuhun, muŋ iku kudu kaḍla, ñahuri salowoṅnèki, nèŋ lyan ari saliyané sasi ramlan.
3. kaḷĕbu para wanita, kaŋ lagya aṅgarapsari, kaŋ kharam ṅlakoni pasa, uga wajib añahuri, amuŋ ta yèn ñahuri, kudu nèŋ jroniŋ satahun, tan kĕna kĕtĕkanan, pasa sasi ramlan maniŋ, kaŋ pamrihé ywa ṅantyakèḥ utaŋ pasa.
4. manèḥ kaŋ kĕna tan pasa, yèku woŋ anambut kardi, kaŋ awrat nèŋ pamĕlikan, aṛĕŋ watu iŋ jro bhumi, lan masnis lokomotip, kaŋ trus aṅlakokkĕn sĕpur, swĕnèḥ kahol ṅulama, nora susaḥ aṅadlani, muŋ ḍèwèké kudu wajib bayar pidyaḥ.
5. lan tumrap para wanita, iṅkaŋ lagya aṅgarbini, tanapi nĕsĕpi wĕka, iku yèn tan ṅwatirkĕn mriŋ, rogané ponaŋ ḍiri, kĕna datan pasa iku, nora susaḥ akadla, naṅiŋ pidyaḥ bĕras maṣṭi, mriŋ woŋ miṣkin saari sakati bĕras.
6. lan kalamun sakiŋ wĕlas, mĕsakakĕn maraŋ siwi, iṅkaŋ lagya sinĕsĕpan, lan aṅaṇḍut jro garbini, kĕna tan pasa ugi, naṅiŋ kudu kadla iku, lan ṅaṅgo bayar pidyaḥ, maṅkono aṅgĕriŋ pakiḥ, dé yèn khadis cukup pidyaḥ tanpa kadla.
7. déné kaŋ wajib kiparat, maṅka ḍĕṇḍaniŋ hyaŋ widdhi, tur kaŋ ḍiṅin wajib kadla, iku woŋ kaŋ karon ṛĕsmi, nèŋ riniŋ ramlan sasi, kiparaté wus kahurut, mardikakkĕn kawula, yèn nora kuwasa kĕni, srana pasa roŋ sasi atĕtĕrusan.
8. tur nora kĕna agoṭaŋ, yèn goṭaŋ ṅawiti maniŋ, tan kapétuŋ kaŋ linakyan, kalamun pasa roŋ sasi, tan kuwasa ṅlakoni, wajib sidkaḥ bras swidak mud, mriŋ pra woŋ kĕkuraṅan, tuhu dahat awrat yĕkti, marma ywa nrak kaŋ añjalari kiparat.
9. dé paṅkat paṅkatiŋ pasa, iku ana tĕluŋ warṇi, sajuga ran puwasa ṅam, aṅgĕré kudu nĕtĕpi, pranatan kasbut pakiḥ, kadi kaŋ uwus tinutur, piŋ dwi pasa khos ranña, yèku pasaniŋ pra janmi, iṅkaŋ dadya éwoné woŋ pipilihan.
10. pasa khos gĕr aṅgĕrira, kajaba nĕtĕpi pakiḥ, ñĕgaḥ syahwat ṅinum maṅan, lan syahwatiŋ karon ṛĕsmi, kudu añĕgaḥ ugi, syahwatiŋ pañcadriyèku, miwaḥ aṅgotanira, sakiŋ dosa aguŋ alit, kabèḥ aywa ṅanti linakon jro pasa.
11. déné paṅkat kapiŋ triña, khawasil khawas rannèki, kaŋ maṅkono pasanira, pilihané woŋ piniliḥ, yèku para kinasiḥ, pra wali nabi lan rasul, kaŋ jroniŋ ulaḥ pasa, muŋ mĕḷĕŋ éliŋ hyaŋ widdhi, tĕtĕp bisa tarkumasi wallaḥ jro tyas.
12. marma yèn kita tan bisa, nĕtĕpi pasa paṅkat tri, sayogya anĕtĕpana, puwasa paṅkat kaŋ kadwi, ywa trima muŋ nĕtĕpi, puwasané woŋ ṅam iku, iṅkaŋ piniṇḍanira, muŋ ṅaliḥ wañciniŋ bukti, rina ñĕgaḥ dupi ratri ṅumbar maṅan.
13. déné rahsaniŋ puwasa, myaŋ sarat pasaniŋ ati, iṅkaŋ baṅsa kabatinan, iku pan ana nĕm warṇi, kaŋ sajuga winarṇi, kudu aṅlĕṛĕmkĕn kalbu, myaŋ amĕpĕr gagasan, kaŋ maraŋ tindak tan yukti, lan kĕtuṅkul aṅlirwakkĕn iŋ dikrillaḥ.
14. piŋ dwi aṅrĕkṣa iŋ ucap, sakiŋ goroḥ ñatur janmi, du adu tumbak cucukan, padudon sasamanèki, piŋ tri rumĕkṣa mariŋ, paṅruṅu sakiŋ kĕtuṅkul, ṅruṅokkĕn swara lahan, lan swara kaŋ syarak ñirik, jĕr ñwara lan ṅruṅokkĕn maṅkono dosa.
15. piŋ catur kudu rumĕkṣa, saranduniŋ badannèki, saka sawarṇaniŋ tindak, kaŋ iŋ aṅgĕr syarak ñirik, lan ṅrĕkṣa ywa abukti, rijĕki kaŋ kharam iku, jĕr tan ana artiña, pasa kaŋ duk bukanèki, bukti rijki iṅkaŋ ñata nora khalal.
16. lan bukti baraŋ kaŋ subhat, khalal kharamé ñamari, jĕr woŋ pasa kaŋ abuka, rijĕki kaŋ lir iŋ ṅarṣi, pipiṇḍané lir kadi, aṅganiŋ woŋ ṅĕṇṭu ĕṇṭu, marlok marlokkĕn karya, paṇḍĕmèn wisma jro siti, kuciwané tan ana pigunanira.
17. déniŋ woṅé nuli ṅrusak, nagara kaŋ dèn dunuṅi, iŋ iku paṇḍĕmèn wisma, dé kaŋ kasbut ḍawuḥ khadis, nora kuraŋ pra janmi, kaŋ pasané iku amuŋ, antuk luwé lan ṅĕlak, kaŋ maṅkono pasanèki, woŋ kaŋ pasa abukti rijki kaŋ kharam.
18. utawa kaŋ woŋ puwasa, tansaḥ ambudi rijĕki, kaŋ khalal lamun pinaṅan, ṅiŋ ḍèwèké tansaḥ criwis, ñatur samané janmi, tanapi pasané iku, tan ṅrĕkṣa pisan pisan, maraŋ saranduniŋ ḍiri, sakiŋ laku lan tindak iṅkaŋ makṣiyat.
19. piŋ lima nalika buka, tan ṅatogkĕn iŋ pambukti, nadyan bukti rijki khalal, jĕr janma iṅkaŋ abukti, kaŋ ṅanti aṅĕbaki, lan karya laraniŋ waḍuk, iku binĕndon allaḥ, marma yèn pasa pra janmi, linaraṅan bukti ṅanti satuwukña.
20. awit kalamun maṅkana, tanpa piguna sayĕkti, utawané maṣṭi nora, bisa kasil pasanèki, jĕr makṣudé kaŋ jati, pasa iku kaŋ lwiḥ parlu, misésa maraŋ sétan, lan mĕpĕr napsunirèki, aywa ṅanti umbaran lir sabĕnira.
21. nadyan syarak aparéntaḥ, añjĕmbarakĕn rijĕki, anèŋ jroniŋ sasi pasa, ṅiŋ kaṅgowa anak rabi, karbèn sĕnĕŋ jro ati, aṅgonira pasa iku, dé sira woŋ kaŋ priya, dèn ta añjĕmbarkĕn rijki, kinaryaa ñĕñĕṅgriŋ iŋ napsunira.
22. dimèn napsuné tan arda, tĕmaḥ tobat nulya kĕni, kinarya maṛĕk iŋ allaḥ, kalawan khusuk iŋ ati, tan gorèḥ sru kapéṅin, rijki kaŋ mawarṇa iku, yèn pasané maṅkana, sayĕkti dahat pinuji, déniŋ sarya mujahadaḥ lan riyadlat.
23. coba samya rinasakna, yèn bukané ṅĕtor bukti, rak malaḥ ṅlĕḷĕmu hawa, lan ṅuwatkĕn ardanèki, kaŋ maṅkono sayĕkti, tan béda lir aṅganipun, tanĕman kaŋ kacĕṅklak, gya rinabuk dèn sirami, namtokakĕn tuwuhé dadya ṅrĕmbaka.
24. dé lamun syahwatiŋ hawa, saya kuwat ardanèki, wus maṣṭi gampaŋ kéwala, sétan gonira aṅliṇḍiḥ, lan malèñcèṅkĕn sakiŋ, garis kabĕnĕran iku, marma ana pocapan, sapa kĕtuwukĕn bukti, saka buka pasa sétané jogédan.
25. pocapan manèḥ liyanña, sapa woṅé aṅĕbaki, waḍuké sakiŋ paṅanan, tan ana kaŋ pinakoliḥ, kajaba ṅĕdohkĕn mriŋ, martabat sakiŋ hyaŋ aguŋ, tanapiné akarya, pĕpĕt lan buntuniŋ margi, lumakṣaṇa maraŋ paṅkat kaluhuran.
26. déné ta sayogyanira, yèn buka ṅaraḥ abukti, tuwuké amuŋ mĕjana, lan wusnya bukti dèn aglis, ṅaṛĕp apaṛĕpa mariŋ, rahmatiŋ allaḥ kaŋ aguŋ, nrima puwasanira, aywa ṅanti dèn bĕndoni, bok jro pasa tan bisa mucuŋ jroniŋ tyas.
.9. pocuŋ
1. pan iŋ maṅkya pasa kaŋ sunat tinutur, ana kaŋ tahunan, kaŋ anané sabĕn warṣi, kadi pasa sawal nĕm ari cacahña.
2. utamané dènnya aṅlakoni iku, iŋ taṅgal dwi sawal, ṅanti tumĕkèŋ nĕm ari, taṅgal wolu lagya ariyaya sawal.
3. piŋ dwi pasa sasi dulhijaḥ winuwus, ran pasa ri ṅarpaḥ, myaŋ ri tarwiyaḥ kaŋ kadwi, dé taṅgalé yèku taṅgal wolu saṅa.
4. piŋ tri pasa nèŋ sasi sura winuwus, iŋ ari tasuṅa, lan ṅasura anujwari, taṅgal saṅa myaŋ sadasané mukharam.
5. piŋ pat pasa nèŋ sasi ṛĕjĕp piŋ tĕlu, riné sakaṛĕpña, ugĕr ganĕp tĕluŋ ari, kĕna uga rinaṅkĕp sĕnèn kĕmisan.
6. kapiŋ lima wusnya sasi sakban iku, ṅĕkèḥ kèhkĕn pasa, awit gusti kaṅjĕŋ nabi, uga ṅĕkèḥ kèhkĕn pasa sasi sakban.
7. kaŋ kasĕbut khadisé jĕŋ nabi rasul, amaraḥ yèn pasa, saṅisoré pasa wajib, iku pasa anèŋ iŋ sasi mukharam.
8. marga sasi mukharam kawitan tahun, kaŋ maṅka tumindak, iŋ bĕcik kawitan warṣi, iku parlu binudi para manuṅsa.
9. pamrihira bisa ambarkati tuhu, riŋ saguṅiŋ tindak, kaŋ bĕcik dimèn lastari, parlu krana muriḥ tindak kaŋ sampurṇa.
10. swiji khadis ana manèḥ iṅkaŋ ḍawuḥ, wusnya nispu sakban, sira kabèḥ aywa ṅanti, pasa gaṭuk karo pasa sasi ramlan.
11. kaŋ wulané wusnya nispu sakban iku, yèn kita puwasa, ywa dèn tĕrusakĕn ṅanti, éṅga sambuŋ lan pasa iŋ sasi ramlan.
12. kajaba yèn puwasa lir sabĕnipun, lir ṅadatkĕn pasa, sabĕn ari sĕnèn kĕmis, yèn maṅkono iku tan dadi cĕcĕgaḥ.
13. ana manèḥ pasa sasèn aranipun, yèku kaŋ tumindak, sabĕn tĕṅahaniŋ sasi, anèŋ taṅgal tutulas patblas limalas.
14. manèḥ iṅkaŋ tumindak wĕkasan tèṅsu, yèku sabĕn taṅgal, pitulikur lawan maliḥ, wolulikur saṅalikur sabĕn candra.
15. ana manèḥ pasa miṅgon aranipun, yèku kaŋ tumindak, sabĕn ari sĕnèn kĕmis, lan jumuṅaḥ yèn tĕrusané kĕmisan.
16. lawan manèḥ kaŋ luwiḥ utama iku, pasa dawut ranña, tumindaké dèn ĕḷĕti, gèk puwasa lan manèḥ gèk nora pasa.
17. déné pasa kaŋ dèn cĕgaḥ syarak iku, yèku yèn pasaña, miliḥ ri jumṅaḥ lan maniŋ, nĕndya pasa wusnya ari nispu sakban.
18. luwiḥ luwiḥ yèn nuju ari syak iku, saṅalikur sakban, iku kharam kaŋ sinirik, nora kĕna dèn aṅgo ṅlakoni pasa.
19. manèḥ uga kharam puwasa anuju, ariaya pitraḥ, lan ari riaya kaji, lan ri tasrik tri wusnya riaya kurban.
20. yèku taṅgal sawĕlas lan rolasipun, myaŋ tĕlulas bĕsar, iku samya nora kĕni, pinasanan iŋ saḍéṅaḥ umat islam.
21. dé sababé goné iṅaramkĕn iku, wit karṣaniŋ allaḥ, ri ari mahu pinaṣṭi, kinaryaa suka suka maṅan éca.
22. lan maṅsané sadakaḥ tanapinipun, amaragat kurban, dadya sahupamanèki, apuwasa lir nampik kamurahan hyaŋ.
23. dé kaŋ aran lahilatul kadar iku, ratri kaŋ minulya, nèŋ jroniŋ ramĕlan sasi, yèku maṅsa turuniŋ wahyu al kuran.
24. taṅgalira tan gumaṭok kaŋ tinutur, añcĕr añcĕrira, satĕṅaḥ sasi kaŋ akir, kaŋ wilaṅan gañjil tuduhé ṅulama.
25. muŋ kéwala lahilatul kadar iku, sinĕbut nèŋ kuran, iku sawijiniŋ wĕṅi, utamané luwiḥ saka sèwu candra.
26. dadya lamun sira ṅamal riŋ hyaŋ aguŋ, salat lan iktikap, nuju lahilatul kadri, gañjarané lir ṅibadaḥ sèwu candra.
27. kaŋ maṅkono iku muṅguhiŋ hyaŋ aguŋ, sakiŋ dènnya arṣa, ṅĕkèhkĕn gañjarannèki, pra kawula kaŋ tumimbul taṅatira.
10. maṣkumambaŋ
1. kaya uwus ñukupi iki wawaṅsit, kaŋ nutur bab pasa, maṅka bĕktiniŋ woŋ mukmin, riŋ hyaŋ kaŋ asipat ĕsa.
2. poma sira para anak putu sami, dèn paḍa ṅèstokna, iki syarakiŋ hyaŋ widdhi, kaŋ dosa guŋ lamun niṅgal.
3. o gèr sira pracayaa kaŋ sayĕkti, yèn mèstuti syarak, yĕkti iŋ dĕlahan béñjiŋ, béda lan kaŋ muraŋ syarak.
4. akèḥ uwoŋ kaŋ jro urip tan mraduli, mriŋ ḍawuhiŋ syarak, rumasané wus ñukupi, yèn wus nora ñĕrikkĕn lyan.
5. kaŋ maṅkono iku luput kaŋ sayĕkti, déné kok muŋ nrima, aṅgĕr tan ñĕrikkĕn janmi, wus nora parlu ṅibadaḥ.
6. o, o, sahupama nora gawé sĕrik, ṅiŋ uga ṅibadaḥ, harak malaḥ saya bĕcik, bok coba ta ginagasa.
7. lamun pañcèn tĕmĕn tĕmĕn sĕnĕŋ bĕcik, bok iya aṅaraḥ, bĕcik kaŋ muṅguḥ hyaŋ widdhi, ywa muŋ bĕciké priyaṅga.
8. mula waraḥ iṅsun mriŋ nak putu sami, sira aywa ṅantya, kabujuk hawanirèki, kaŋ watĕké baṅkaŋ syarak.
9. syahdat salat jakat pasa lawan kaji, iku rukun islam, lilima baṅĕt wigati, èstokna lan sabĕnĕrṇya.
10. déné kaji iku aṅgoné ṅlakoni, yèn wus saratira, ñukupi tan ṅuciwani, kaṅgo saṅu lan tiṅgalan.
11. apadéné tan ana babayèŋ margi, lir bégal lan pĕraŋ, iṅkaŋ baṅkit aṅalaṅi, lakuniŋ kaji lan ṅumraḥ.
12. datan kĕna kajiné sarya ṅĕdoli, baraŋ darbèkira, yèn kéwan lir kĕbo sapi, kinarya saṅu payonña.
13. kèḥ kéwala baṅsa kita iṅkaŋ kaji, ṅĕdoli kéwanña, saṅuné kuraŋ ñukupi, anèŋ mĕkahé kĕnlékan.
14. arṣa muliḥ wus tan anduwèni picis, apĕsé kĕsrakat, uripé nèŋ tanaḥ suci, dadi gawéniŋ nagara.
15. ulihira nĕmahi dadi woŋ miṣkin, tĕmaḥ papariman, ṅusutkĕn agama suci, niṣṭané ñaṅkiŋ agama.
16. kamulané ḍuḥ ḍuḥ baṅsa kita jawi, lamun aṅibadaḥ, kaji mariŋ tanaḥ suci, cukupna sasaṅunira.
17. lan tumrapé iŋ jaman samaṅko iki, yèn sira yun luṅa, kaji maraŋ tanaḥ suci, anuṅgaṅa kapal islam.
18. kaŋ bakal dèn anakkĕn kita woŋ muslim, kaŋ tansaḥ aṅréka, muriḥ duwé kapal kaji, srana aṇḍil babaṭonan.
19. iku aran n v ṣkipart maṣkapèhi, iṇḍonésiyaḥ jokya (n.v. schéépsvaart maatschappy indonésiya, djokja), kaŋ samĕṅko lagyambudi, ṅĕdol aṇḍil propagaṇḍaḥ.
20. saaṇḍilé iku amuŋ dèn ṛĕgani, tri bĕlaḥ rupiyaḥ, para woŋ kaŋ tuku aṇḍil, yèn kaji kapalé lahan.
21. dé yèn nora kĕna liniyakkĕn mariŋ, sanak karuhira, klawan nuku tikètnèki, kuraṅé saka tri bĕlaḥ.
22. lamun ana baṭiné iŋ tĕmbé wuri, bisantuk panduman, tur wus jĕnĕŋ bantu yĕkti, pambudi mriŋ kapal islam.
23. kaŋ khukumé ananira iku wajib, jĕr lamun woŋ islam, tan darbé kapal pribadi, tĕtĕp kasaṇḍaṅan dosa.
24. mula sapa kaŋ wus saraté ñukupi, dèn agé tukua, iku aṇḍil kapal kaji, srantèkna sakasilira.
25. yèn wus cukup pra muslimin kaŋ nukoni, lamun kasĕmbadan, yun tuku kapal pribadi, yèn nora muŋ nĕdya ñéwa.
26. lan yèn ṅanti klakon ṅadani pribadi, lakuniŋ ṅibadaḥ, uga bakal dèn tuntuni, nalika kaji lan ṅumraḥ.
27. tur nèŋ jroniŋ kapal bakal dèn ajari, kawruḥ bab agama, lan yèn salat sabĕn wañci, tansaḥ pinardi jamaṅaḥ.
28. lan sajroniŋ kalap uga dèn wènèhi, réstoran mirasa, cukup woŋ kaŋ samya kaji, muŋ saṅu picis kéwala.
29. nora susaḥ rèbyèg saṅu kaŋ mawarṇi, kabutuhan luṅan, wus samya dèn saḍiyani, nora bakal kĕkuraṅan.
30. tur sakèhiŋ jamaṅaḥ samya jinagi, kasarasanira, déniŋ ḍoktĕré pribadi, tumĕkèŋ sahulihira.
31. lan manèhé anané iŋ tanaḥ suci, iku pra jamaṅaḥ, yĕkti bakal dèn ajèni, déniŋ woŋ lan sultan héjaj.
32. syèḥ syèḥ kana uga ṅajèni sayĕkti, tan siniya siya, lan iṅĕṅkos lir siŋ uwis, bĕtèké guṅé jamaṅaḥ.
33. sumarmané hèḥ ta baṅsa kita jawi, dèn éṅgal cawisa, yèn wus saṅuné ñukupi, ywa ṅanti mundur sajaṅkaḥ.
11. durma
1. naṅiŋ poma kajinira sarantèkna, bisané sira sami, nuṅgaŋ kapal kita, kaŋ yun akarya ṛĕja, tumrapé ṅibadaḥ kaji, kaŋ tuhu arṣa, mulyakkĕn pra muslimin.
2. sajatiné bab anané kapal kita, iku dahat agampil, yèn kita wus insyap, gĕḷĕm rukun sañata, lan gĕḷĕm tinata sami, tan kaṛĕp nuṅgaŋ, kapalé lyan woŋ muslim.
3. jĕr kaŋ uwis béyané anuṅgaŋ kapal, yèku tukoniŋ tikit, maraŋ koṅsi kapal, tĕlu bĕlaḥ rupiyaḥ, iku baṭiné tan kĕḍik, luwiḥ dwi bĕlaḥ, saka woŋ kaji siji.
4. mirid soraḥ saka kyahi kaji sujak, kaŋ dadi pramugari, iku én pé ṣkipart, mèhi iṇḍonésyaḥ jokya (n.v. schéépsvaart my. indonésiya, djokja), kaji kaŋ samya wis uwis, pépétuṅanña, yèn nèŋ kapal koṅsi tri.
5. muŋ dèn aṅgĕp kadya baraŋ iṅkaŋ pĕjaḥ, kaŋ gĕḍéné tan luwiḥ, wolulas pradasan, mètĕr kubuk pétuṅña, béyané mriŋ nagri wlandi, muŋ limaŋ rupyaḥ, yèn mriŋ jédaḥ muŋ sriṅgit.
6. dadi mĕñaŋ muliḥ mriŋ jédaḥ béyaña, limaŋ rupyaḥ tan luwiḥ, lawan siŋ layaran, roṅpuluḥ ri sak ñaṅan, muliḥ roṅpuluḥ ri ugi, raṅsumé maṅan, karotĕṅaḥ saari.
7. dadi guṅuŋ raṅsum maṅan swidak rupyaḥ, wragad administrasi, lan kasarasanña, myaŋ ḍoktĕr kaŋ añjaga, limaŋ rupiyaḥ tan luwiḥ, guṅguṅiŋ béya, muŋ pituŋ puluḥ rispis.
8. kaṅgo prĕsèn maraŋ sèḥ agèniŋ kapal, kaŋ golèkkĕn woŋ kaji, muŋ sapuluḥ rupyaḥ, dadi guṅguŋ kumpulña, koṅsiné kapal abaṭi, pitulas dinar, saka woŋ kaji siji.
9. iku duruŋ baṭiné saka bécéran, raṅsum kaŋ tan majaji, sak ri karotĕṅaḥ, muŋ majaji satĕṅaḥ, kaḷĕbu wédaŋ lan wariḥ, dadi baṭiña, makṣiḥ tridasa maniŋ.
10. dadi jané baṭi roṅatusan rupyaḥ, saka woŋ kaji siji, maṅka yèn sakapal, ṅĕmot uwoŋ sèwonan, dadi sabĕn kapal swiji, baṭiné ana, roṅatus éwu rispis.
11. pan babaṭèn samono iku wus kĕna, dèn go tuku pribadi, kapal gĕḍé brĕgas, kapal pasakirṣ ranña, klĕbu sĕtirman lan masnis, dalaḥ matrusña, kaṅgo blañja sawarṣi.
12. dadi jané maṅkono yèn umat islam, kaŋ kaji sabĕn warṣi, kĕna dipuntata, lan maṅrĕti tĕmĕnan, gĕḷĕm rukun lan tan sudi, binujuk maraŋ, agèn kapal kaŋ julig.
13. yèku lamun kaji gya tuku aṇḍilña, n v ṣkipart maṣkapèhi, iṇḍonésiyaḥ jogya, yĕkti tan daṅu nulya, woŋ islam iŋ tanaḥ jawi, wus duwé kapal, pasakirṣ kaŋ abĕcik.
14. sabĕn uwoŋ kaji sèwu cacahira, bisantuk kapal siji, yèn kaŋ kaji ana, sapuluḥ èwu jiwa, bisa duwé kapal kaji, sapuluḥ kèhña, kapalé kari miliḥ.
15. apa tuku maraŋ pabrik tanaḥ ḍitslan, jĕpan tanapi iṅgris, wus maṣṭi abuṅaḥ, igĕnar pabrik kapal, déné kĕṛĕp dèn tukoni, kapal kaŋ brĕgas, déniŋ kita woŋ jawi.
16. pétuŋ iṅkaŋ maṅkono pan amuŋ grĕban, maṅka kapal pasakir, iku bisa ṅĕwrat, karotĕṅaḥ éwonan, para woŋ kaŋ paḍa kaji, dadi baṭiña, satus éwonan maniŋ.
17. tur yèn kita kaji nuṅgaŋ kapal kita, iku lwiḥ dèn ajèni, déniŋ liyan baṅsa, déné yèn iku kapal, nora kaṅgo luṅa kaji, kaṅgo layaran, sakaṛĕp kita dadi.
18. kaṅgo layar ana iŋ sagara jawa, lan lahut kaŋ ṅubĕṅi, iṇḍonésyaḥ raya, apa aṅĕmot baraŋ, apa ṅĕmot para janmi, paḍa kĕnaña, kari nariki baṭi.
19. tur maṅkono iku bakal éṅgal bisa, gawé ṛĕja sayĕkti, mriŋ laku ṅibadaḥ, kaji maraŋ iŋ mĕkaḥ, lan ṛĕjané tanaḥ jawi, myaŋ iṇḍonésyaḥ, tumĕkèŋ tanaḥ suci.
20. jĕr yèn uwus duwé kapal pupuluhan, tan parlu tuku maniŋ, ḍuwité kinarya, gawé gĕḍoŋ lan guḍaŋ, nèŋ surabaya samawis, batawi plémbaŋ, paḍaŋ méḍan lan aciḥ.
21. malaḥ lamun wus duwé kapal puluhan, waragaté woŋ kaji, kaṅgo nuṅgaŋ kapal, bisa kinarya muraḥ, upamané muŋ sapaliḥ, utawa kuraŋ, koṅsi kita wus baṭi.
22. déné lamun béñjaŋ prabéyané kapal, kalamun luṅa kaji, pan wus saya muraḥ, woŋ kaŋ samya ṅibadaḥ, kaji maraŋ tanaḥ suci, saṅsaya ṛĕja, saka iŋ tanaḥ jawi.
23. laḥ maṅkono iku wujudiŋ piguna, lamun luṅané kaji, bisa babaṛĕṅan, rukun gĕḷĕm tinata, kalawan organisasi, yĕkti agampaŋ, duwé kapal pribadi.
24. naṅiŋ lamun kajiné nora tatanan, kadi kaŋ uwis uwis, yĕkti salawasña, woŋ islam muŋ cilaka, sinawiyaḥ tanpa uwis, lir woŋ kontrakan, ginawa mĕñaŋ ḍèli.
25. anèŋ kapal tĕtĕp lir baraŋ kaŋ pĕjaḥ, awor lan gĕrèḥ trasi, gandané tan éca, maṅané sabĕn dina, muŋ sĕga lan ĕṇḍog asin, lan kala kala, winéhan iwak dagiŋ.
26. naṅiŋ lamun nuṅgaŋ kapalé pribadya, paṅané sabĕn ari, kinarya lwiḥ éca, bisa pista ajĕgan, maṅan bĕstik sabĕn ari, tur sabĕn dina, bisa asalin mĕni.
27. sakuraṅé kĕna tuku iŋ réstoran, nèŋ jro kapal pribadi, klawan bisa ṅlaras, raḍio sri nèŋ kapal, srikaton trus gambirṣawit, lan paṅkur baraŋ, sarta ladraŋ sririjki.
28. déné lamun nuju ari maḷĕm jumṅaḥ, ñĕtèl kutbaḥ iŋ masjid, sorahé ṅulama, surakarta diniṅrat, maṅkonèku tĕmbé wuri, yèn kita bisa, ṅanakkĕn kapal kaji.
29. titi uwus wasitadi kaŋ wasita, amaraḥ ṅilmu tokhid, tĕkèŋ rukun islam, dalaḥ saguŋ khikmahña, mugi bisa añjalari, kabukaniŋ tyas, riŋ saṅgya pra muslimin.
30. tinĕṅĕran anuju ari jumuṅaḥ, taṅgal lima iŋ sasi, sura jé warṣaña, aṅkaniŋ warṣanira, sayogya dèn saṅkalani, kombuliŋ pudya, aṅèṣṭi iŋ sawiji.
