1. kinaṇṭi
1. ḍuḥ gèr putri putraniṅsun, nadyan wus kaṇṭi pinaṣṭi, maraŋ hyaŋ kaŋ murbèŋ titaḥ, grahitaniŋ para putri, sapra aṣṭaniŋ pra putra, tarantananiŋ pamikir.
2. marmaṅgèr aywa sirèku, pasaŋ sumèḥ jroniŋ ati, katitik tyas tan sambada, maraŋ apṅaliŋ hyaŋ widdhi, kaŋ widagda tuhu wigña, añolahkĕn bawa mariŋ.
3. iya iŋ manuṅsa saguŋ, luwiḥ maniŋ déra kardi, solahbawaniŋ naréndra, kaŋ datan sĕpi pambudi, gyanya aṅampil agama, kasuciyaniŋ dumadi.
4. tinindakkĕn lawan patut, pinantĕs pantĕs tiniti, tinimbaŋ lan isinira, nagara surakartadi, tan kĕnagé kinukuhan, aṅkuḥ iŋ tyas aṅlakoni.
5. nini putri putraniṅsun, marmanira sira sami, krĕjĕtiŋ duga watara, rasakna dipunsatiti, tata titinĕn kaŋ tĕraŋ, paṅroñcènirèŋ pamikir.
6. kĕkĕṛĕn aywa kasusu, sukuriŋ ati sinĕpi, piritanira kaŋ kuraŋ, mriŋ lalakoniŋ dumadi, dumadiné kadi saraḥ, anut ombakiŋ jaladri.
7. yèn dinadak tanpa usul, asaliŋ nalar naluri, naluriniŋ kaŋ lalakyan, yèn linalar datan luwiḥ, winahya purbaniŋ sukṣma, sukṣmanĕn dipunkatitik.
8. yèn kasusu tan kĕtĕmu, muŋ nĕmu tyas datan titi, makĕtĕr katiban kata, tataniŋ sakaŋ tumitiḥ, o ya talaḥ awak iṅwaŋ, dadi gandruŋ awèḥ waṅsit.
9. wasita mriŋ putraniṅsun, gandruṅa sira niṅali, lalakon kaŋ molaḥ saka, kakikinira hyaŋ widdhi, muga putriniŋ naréndra, drawaya naloṅsèŋ widdhi.
10. supaya was sipta ayu, yuwanèŋ manuṅku manis, ywa ṅĕnĕs dulu kaanan, lalakon duña puniki, muŋ kudu sumaṅgèŋ karṣa, karṣa karṣaniŋ hyaŋ widdhi.
11. dadi tyasirèku bañjur, jĕmbar nora ṅijir ijir, jarijwa aṅétaŋ étaŋ, muŋ dèn étuŋ budi laṅip, ṅipatkĕn karṣèŋ hyaŋ sukṣma, sukṣmanĕn ywa agé daliḥ.
12. laladan karṣaniŋ napsu, suṅkawa kasédan swami, nora ṅaṅgo miyak maya, maya mayaniŋ tyas ĕniŋ, o gèr ywa maṅkono sira, lalakon iṅsun puniki.
13. satuhuné sira duruŋ, tĕraŋ lir hyaŋ murbèŋ paṣṭi, marmaṅgèr putra wanudya, samya sĕdyaa iŋ ati, tata titiniŋ cumaḍaŋ, aṅaḍaŋ takdiriŋ widdhi.
14. di adiniŋ putri prabhu, utamèŋ tyas kaŋ pinuṣṭi, tĕgĕsé utama sabar, mriŋ pañcabayaniŋ ati, tinampan sukur lan lila, ḷĕgawèŋ tyas nrusiŋ budi.
15. budimaniŋ tyas pinaṅgul, kasmaran kinĕmpit kĕmpit, pinupu pupu tan pisaḥ, sakṣat gon iṅsun moŋ branti, iya maraŋ ibunira, kaŋ téga niṅgal wak mami.
16. piraṅbara putraniṅsun, gonira darbé sudarmi, kaŋ lagi gandruŋ asmara, pujinĕn bisa tumuli, ana sihiŋ takdirollaḥ, pariŋ brĕkaḥ wanitadi.
17. katitisan jiwanipun, ibunta iṅkaŋ wus lalis, lilaa yèn wus prañata, katiban wahyuniŋ sori, sira para putraniṅwaŋ, wanudya putra narpati.
18. nitika saka tyas putus, iṅkaŋ pantĕs dadi sori, sori swaminé si bapa, kaŋ lagya papa moŋ branti, brantanana tapa brata, gonira milu maṅèṣṭi.
19. mriḥ pinaṣṭiya rahayu, yèn rahayu sapa maṅgiḥ, gumuyu dènnya kasrambaḥ, basuki sajroniŋ puri, puraya bisa aṅambar, ṅlimputi maraŋ nagari.
20. gara gara kadi tĕḍuḥ, ṅawiyat ima nawĕṅi, sakabèhé pandamiŋ rat, suṛĕm kawaranan riris, nadyan kalamun dèn nalar, miṅsĕtiŋ maṅsa sayĕkti.
21. ṅiŋ sira pra putraniṅsun, sumurupa sira sami, kabèḥ kaananiŋ jagad, iŋ dalil kaŋ dèn arani, sakaṭahiŋ asya maṅka, dudu paṅéranirèki.
22. naṅiŋ wĕnaŋ iku lamun, tinampan waṅsitiŋ widdhi, utawa dadi cundaka, cundakanira hyaŋ widdhi, dipunawas iŋ sasmita, jroniŋ jagad dèn katitik.
23. titi paḷĕṣṭaniŋ wuruk, mriŋ putraniṅsun pra putri, ri soma taṅgal sapisan, ruwaḥ bé dipuntĕṅĕri, osikiŋ rat èṣṭi nata, nata nitik dyaḥ utami.
2. maṣkumambaŋ
1. tumimbula riniṅsun garwa padĕmi, téga tĕmĕn sira, aniṅgal rakaniraji, tujuné manira bisa.
2. amanamur ñaṇḍak kalam gandruŋ ṅaṅgit, kata waṅsit kama, tumrap mriŋ putrèṅsun putri, ḍuḥ gèr para putriniṅwaŋ.
3. sumurupa iŋ laku kawan prakawis, ḍihin yèn kataman, iŋ coba kudu maṅèṣṭi, budi tĕmĕn lan tarima.
4. kaŋ kapiṇḍo ḍuḥ aṅgèr lakuniŋ ati, yèn kataman rundaḥ, ḷĕgawa lila dèn kèṣṭi, kapiŋ tri lakuniŋ jiwa.
5. iŋ sarèhniŋ dumadiné jiwa nini, wus alus kalawan, sukci sira kudu muṣṭi, kandĕl kumandĕliŋ sukṣma.
6. kaŋ kapiŋ pat lakuniŋ rahsa sarèhniŋ, rahsèku wus mulya, kudu muṣṭi awas éliŋ, mariŋ kodratiŋ hyaŋ sukṣma.
7. lawan maniŋ sumurupa putra mami, lakuniŋ agĕsaŋ, iku satuhuné mĕṣṭi, katamana suka suṅkawa.
8. apadéné bĕgja cilaka wus mĕṣṭi, marmanya iŋ maṅkya, sun gĕlar iŋ ṅisor iki, yéka iṅkaŋ iṅaranan.
9. guŋ aguṅé iŋ bĕgja puniku nini, muŋ kawan prakara, gunawan iṅkaŋ sawiji, kasantikan tĕgĕsira.
10. dwi wiryawan kaluhuran liré nini, kapiŋ tri artawan, sira dèn samya maṅrĕti, tĕgĕsé pan kasugihan.
11. kaŋ kapiŋ pat bérawan makṣudé nini, mapan sugiḥ anak, muguḥ laku pat prakawis, sayĕkti uwus tétéla.
12. dadi paṅgayuḥ géyéṅaniŋ ahurip, sĕdyané manuṅsa, kaṅgonana pat prakawis, orané iya sajuga.
13. suprandéné para janma kèḥ kaŋ sami, tan bisa kĕtĕkan, paṅgayuḥ pataŋ prakawis, kaŋ wus kĕsĕbut iṅarṣa.
14. awit saka tan kuwawa naṅgulaṅi, riŋ pakartinira, kaŋ pañca wisaya nĕṅgiḥ, maṅka puniku dumadya.
15. tutuwaniŋ badan myaŋ saṅliṅiŋ budi, yèku sasambuṅña, tumamaniŋ sĕdya nini, lamun kataman saṅsara.
16. sapiraa gĕḍéniŋ saṅsara dadi, srananiŋ nugraha, saṅsarèku yèn tinampi, yĕkti muŋ dumadya coba.
17. sanadyan wus ana wulaŋ kaŋ kadyèki, prandéné misiḥ tan, wignya ṅampaḥ tumahĕniŋ, praptaniŋ pañca wisaya.
18. ḍuḥ putrèṅsun samya sumurupa nini, tĕgĕsé kaŋ pañca, wisaya mĕṅko winarṇi, iṅkaŋ kapisan ro garda.
19. makṣudira laraniŋ badan sayĕkti, kaliḥ saṅsararda, yèku ṛĕkasaniŋ ḍiri, katĕlu iṅkaŋ winarṇa.
20. wiraŋ arda tĕgĕsé laraniŋ ati, kapiŋ pat cuwarda, yèku ṛĕkasaniŋ ati, dur garda priṅganiŋ nala.
21. ḍuḥ gèr srananira kaŋ sawiji wiji, bab pañca prakara, juga yèn kataman sakit, iŋ badan éṅgal ṅèṣṭiya.
22. sĕtyaniŋ tyas lawan ḷĕgawa kapiŋ dwi, manawa kataman, ṛĕkasèŋ aṅganta nini, aṅèṣṭiya bĕtaḥ ṅaṅkaḥ.
23. lawan ḷĕmbaḥ manaḥ déné kaŋ kapiŋ tri, mĕnawa kataman, laraniŋ atinta nini, ṅèṣṭiya titi lan taha.
24. tĕtĕg tuwin ṅati atiya iŋ ati, kapiŋ pat mĕnawa, kataman ṛĕkasèŋ ati, iya éṅgal aṅèṣṭiya.
25. ĕnĕŋ ĕniŋ awas éliŋ dé kaŋ kapiŋ, lima yèn kataman, priṅganiŋ ati aṅèṣṭi, aṅandĕl kandĕl kalawan.
26. kaŋ kumandĕl nĕtĕl santosa iŋ budi, muluriŋ wasita, yèn sira arṣa dumadi, sinĕbut putri utama.
3. sinom
1. ḍuḥ gèr wanita taruna, dipuntansaḥ aṅabĕkti, maraŋ hyaŋ kaŋ murbèŋ titaḥ, tĕgĕsé kaŋ paṅabĕkti, ñirṇakkĕn pakartiniŋ, kaŋ pañca driya puniku, déné iṅkaŋ winastan, pañca driya iku nini, baṅsa napsu kaya ta cĕṅil sĕṅitan.
2. panastèn kĕmèrèn lawan, dahwèn kumiṅsun lan maliḥ, éwan cĕkak sarta rupak, sapanuṅgalané sami, kaŋ kinira tan bĕcik, yèku ywa koṅsi tumanduk, mriŋ sawijiniŋ janma, lan manèḥ sira dèn sami, jriḥ naréndra déné kaŋ aran naréndra.
3. ati atiné iŋ badan, déné dènira ṅlakoni, kudu titi tĕtĕg tata, ṅati ati gyanmu sami, katitipan tyas budi, iŋ panimbaŋ dipunputus, mamriḥ dèn dĕl iŋ kaṭaḥ, wĕkasan samèŋ dumadi, samya kèḍĕp ajriḥ iŋ prabawanira.
4. maniŋ sira aṅiḍĕpa, iŋ rama ibunta nini, tĕgĕsé sira nucèkna, iya sariranirèki, déné dènnya ṅlakoni, ĕnĕŋ ĕniṅa iŋ kalbu, awas éliŋ supaya, sirṇaa nĕpsunta nini, aṅanakna asiḥ kalawan amuraḥ.
5. yèn maṅkono dyaḥ utama, tuhu pinaṣṭi sirèki, kinèḍĕpan iŋ sasama, sasamanirèŋ dumadi, lan sira kudu nini, mituhu aṅgĕriŋ guru, tĕgĕsé iku rahsa, déné dènira ṅlakoni, lumuḥ wani wuniṅa lan ṅilaṅĕna.
6. pakartiniŋ paṅrasanta, kaŋ maṅkono iku nini, ya bakal pinaṣṭi sira, pinituhu iŋ sasami, lan manèḥ nini putri, muga bisaa sirèku, momoŋ samaniŋ janma, supayanya sira nini, kinasihan iŋ gusti kaŋ maha mulya.
7. kalamun putriniŋ nata, prañata wus aṅsal iŋ siḥ, yèn buda jawatanira, iŋ mĕṅko sihé hyaŋ widdhi, sayĕkti sira nini, pinaṅkat putriniŋ prabhu, kaŋ widagda utama, déné sadayèku nini, kocap ṅarṣa linakon mawa sarana.
8. tapa brata puja mantra, déné kaŋ dipunwastani, iya nini tapa brata, limaŋ prakara sayĕkti, juga aṅiṅiraṅi, iŋ bukti sarananipun, narima nadyan ñĕgaḥ, ḍahar mĕnawa sirèki, tan narima apa iŋ saananira.
9. iku sayĕktiné gagar, piŋ kaliḥ ñĕñuda guliŋ, sanadyan añuda néndra, naṅiŋ yèn linali lali, babasan tanpa kardi, katraṅaniŋ ñuda turu, samya dipunwaspada, upamané sira nini, wus baliyut iṅkaŋ paṅgaḥ ciptanira.
10. dèn jak ṅaluyut supaya, tan koyup déniŋ pakarti, niŋ bliyut kaŋ kapiŋ tiga, aṅawisana saṅgami, srana lila iŋ ati, maṅkéné pakartinipun, añuda iŋ saṅgama, yèn kaṛĕp dipunsabari, mriḥ ywa koṅsi kabañjur kajatiŋ nala.
11. lalu buru karaharjan, kaŋ kapiŋ pat sira nini, aṅampĕta paṅandika, tĕgĕsé paṅgagas nini, catur kaŋ tanpa kardi, nini kalakoné iku, kudu paṅgaḥ santosa, sanadyana sira nini, tan ṅandika yèn mĕṅku karṣa sandéya.
12. piŋ lima sira ṅilaṅna, duka cipta srana sakiŋ, cahyaniŋ locananira, aṅrĕsĕpi iṅkaŋ sami, suméwa nadyan nini, tanpa duka cipta tuhu, naṅiŋ yèn kuraŋ marta, tan widada iku dadi, sadayèku kudu ṅaṅgo ĕmpan papan.
13. sira samya sumurupa, liriŋ ĕmpan iku nini, manawa dalu maṅsaña, tarbukanira iŋ kapti, bubuka sarat sakiŋ, sarèḥ sarékaniŋ kayun, liriŋ papan muriha, papan iṅkaŋ samun sĕpi, tĕgĕsipun ñirṇakkĕn saṅgaruṅgiña.
14. saṅgaruṅgi kahananña, kira kirané iŋ ati, iṅkaŋ datanpa wĕkasan, wĕkasan iku bawuri, moriŋ kawula gusti, sira nini dipunémut, gon sun gandruŋ wasita, wasita maraŋ sirèki, titi tamat panurat iṅkaŋ wasita.
15. isnèn pahiŋ iŋ pañca wlas, ruwaḥ bé dipuntĕṅĕri, obahiŋ para wanodya, èṣṭiniŋ driya moṅsèki, sawĕlas sampun akir, kaŋ riris makṣiḥ gumrujug, laṅkir windu kuṇṭara, di daḷĕm iṅkaŋ anulis, pujaṅgèstri kawula pun adisara.
