1. gambuḥ
2. laḥ ta sawaṅĕn iku, patiŋ glimpuŋ anakmu lé turu, tĕka dadi aṅgagas siŋ kuwi kuwi, pak glompoŋ mèsĕm sumahur, iyaḥ padumu byaŋ glompoŋ.
3. ora gĕḷĕm diwayuḥ, balañjaku muṇḍak ora wutuḥ, bokné glompoŋ sumĕṅit goné ñahuri, ya wis rabiya ka tĕlu, mlaratmu bèn saya moṇḍok.
4. bok koétuŋ blañjamu, sasasiné siŋ kowèhké aku, géné ora tahu ganĕp sabĕn sasi, mĕṣṭi kaloŋ digo ñahur, utaŋ ñaŋ goné baḥ blotoŋ.
5. blañja muŋ tĕluŋ puluḥ, digo nicil utaŋ siŋ sĕpuluḥ, bayarané sĕkolaḥ ṭolé sĕriṅgit, kari pituŋ riṅgit iku, aṛĕp kogo bojo loro.
6. gèk iki batiḥ pitu, sadinané bĕrasé siŋ tĕmtu, karo tĕṅaḥ bĕruk malaḥ puñjul siṭik, sahiki bĕras sabĕruk, uwis sĕtali sĕbéṅgol.
7. dipiṅké tĕluŋ puluḥ, dak gawéné woluŋ gélo wutuḥ, gèk jaṅané dak ĕṅgo ṅirit sakĕṭip, uwis tĕluŋ gélo iku, séjé gula ĕtèḥ rokok.
8. ḷĕṅané bok koétuŋ, sabĕn soré ĕntèk tĕluŋ ciṇṭuŋ, saciṇṭuṅé sahiki wis tĕluŋ ḍuwit, dadi piraŋ ḍuwit iku, rak ya uwis tĕluŋ béṅgol.
9. sasasi nèk diétuŋ, roŋ rupiyaḥ sĕtali diguṅguŋ, kari pira blañjamu siŋ dak tampani, séjé jajané anakmu, siji śjiné sĕbéṅgol.
10. anakmu lima iku, rak wis dadi karotèŋ ta iku, sasasi wis pataŋ gélo tĕluŋ tali, maṅka yèn si glompoŋ iku, wĕruḥ uwoŋ ñuṅgi tébok.
11. aṅgujĕg goné jaluk, bañjur ṅĕṇḍĕg siŋ dodol dicĕluk, saḍoḍokan bahé ĕntèk woluŋ ḍuwit, aḍiné ya mèlu mèlu, kumroyok ṅrubuŋ siŋ dodol.
12. kari pira blañjamu, laḥ ricikĕn tañjané kayamu, lan manèhé klambiné anakmu kuwi, kabèḥ uwis paḍa bawuk, malaḥ ana siŋ wis amoḥ.
13. maṅka anakmu iku, yèn klambiné suwèk siṭik nĕsu, apadéné kowé ḍéwé kuwi mĕṣṭi, yèn maṅaṅgo isiḥ jaluk, siŋ añar añar siŋ mompyor.
14. laḥ gèk olèhé éntuk, wahé saka ṅĕndi apa jaluk, nèk caturan kuwi bok siŋ ṅati ati, aja muŋ aṅgĕré mĕtu, hara piyé pakné glompoŋ.
15. pak glompoŋ maṇṭuk maṇṭuk, karo mèsĕm liṅgihé añiṅkruk, mikir mikir aṅgoné aṛĕp maṅsuli, rada kacipuhan ṛĕmbug, wĕkasan ñahuri soṅol.
16. aḥ kowé bokné gĕṇḍuk, dadak ṅrĕmbug butuḥ sabĕn ésuk, jañji isiḥ urip rak ya dipariṅi, paṅan hyaŋ kaŋ maha aguŋ, dak kaṇḍani ya byaŋ glompoŋ.
17. olèhku aṛĕp wayuḥ, nèk cicilan wis bot siŋ ñĕpuluḥ, iya kuwi siŋ aṛĕp dak ĕṅgo rabi, go blañja calon marumu, rak ya wis ñamlĕŋ ta ṅono.
18. aja bañjur maṛĕṅut, duruŋ duruŋ ulatmu wis jabrut, aṛĕp rabi dadak dikon ṅricik ḍuwit, tak kaṇḍani bokné gĕṇḍuk, aja pijĕr plérak plérok.
19. biyaŋ glompoŋ maḷĕruk, karo ṅucap iya pakné gĕṇḍuk, ora susaḥ ṅaṇḍan ṅèṇḍèni wis ṅrĕti, ya kuwi woŋ ora ñĕbut, ora noliḥ siŋ tiŋ ṭroṅol.
20. bok kopikir woŋ bagus, aḍiné si glompoŋ kuwi uwus, sasi ṅaṛĕp iki iya wis ṅragadi, ṅĕcĕk olèhé añjaluk, mèlu sĕkolaḥ si glompoŋ.
21. apa ora koṛĕmbug, gèk go bayar apa hèḥ woŋ blĕgug, ora wayuḥ wahé uwis sroṭal sraṭil, tĕka dadak aṛĕp wayuḥ, sapa sudi ñaŋ woŋ blĕmboŋ.
22. pakné glompoŋ sumahur, duruŋ kinar géné kèḥ siŋ ṅaṅgur, timbaŋ dadi ḷĕgan luwuŋ ĕndaŋ laki, diwayuḥ wayuḥ ya lowuŋ, ora dadi pocapan woŋ.
23. timbaŋ kahé pak bawuk, tanpa blañja géné iya éntuk, bojo loro malaḥ ayuné ṅluwihi, ṅalahké woŋ kaya aku, tur bojoné kabèḥ ĕnom.
2. sinom
1. siŋ siji kaya sĕmbadra, iṛĕŋ manis mĕrak ati, luruḥ sĕmuné jatmika, sijiné ambanowati, gonas ganès mantĕsi, sripit sripit yèn lumaku, sĕmuné sĕblak laṅak, kuniṅé anĕmu giriŋ, ḍasar ayu wiraga sugiḥ léléwa.
2. kuwi bokné siŋ dak tulad, iŋ maṅka pak bawuk kuwi, umur wis sĕtĕṅaḥ kliwat, rupané ora bĕjaji, tur duwé lara mĕṅi, géné kok ya kuwat wayuḥ, ora tahu kĕrahan, malaḥ rukuné kĕpati, runtuŋ runtuŋ bok ĕnom karo bok tuwa.
3. byaŋ glompoŋ ñahuri sugal, laḥ apa kowé kĕpéṅin, woŋ lanaŋ go cak icakan, kaya pakné bawuk kuwi, wĕruha ya mas bèi, kahé bapakné si bawuk, aṅgĕr ḍèwèké mara, ñaŋ goné bok tuwa mĕṣṭi, disosotké ṅanti ora uman papan.
4. siŋ lanaŋ diuman uman, diuṇḍat uṇḍat mèḥ naṅis, pak bawuk bali kĕlépat, ñaŋ goné bok ĕnom gĕnti, lagi kétok wis mĕṣṭi, ditudiṅi diwus uwus, rupané ora pakra, uwis gĕraŋ ṅaṅgo mĕṅi, ora guna ora kaya ora rupa.
5. woŋ lanaŋ disambĕr gĕlap, miṅgata baliya gĕlis, ora susaḥ kowé mara, apa dadak awèḥ ḍuwit, aku wis ora sudi, añawaŋ maraŋ wujudmu, kowé aṅgĕré mara, ñaŋ goné bok tuwa mĕṣṭi, ṅala ala aku pèḥ ladènku kuraŋ.
6. gèk kowé bisamu maṅan, kuwi sĕga saka ṅĕndi, bisa tĕmĕn ṅala ala, ora kélaṅan sabribil, bisa bisamu muni, uwis gĕraŋ ora ñĕbut, pak bawuk pariṅisan, ṅalor ṅidul diṅis ĕṅis, apa kuwi pakné gĕṇḍuk siŋ kotulad.
7. disosotké sambĕr gĕlap, kuwi siŋ kokĕpéṅini, pakné glompoŋ mèsĕm ṅucap, ṅĕndi ana diunèni, ora wani maṅsuli, wĕruha woŋ lanaŋ iku, kuwasa bañjur mĕgat, muṅguḥ aku diunèni, dak taboki dak iṅĕl iṅĕl dak pĕgat.
8. golèk manèḥ ora kuraŋ, siŋ ayu ayu siŋ manis, ḍasar aku duwé blañja, priyé olèḥmu maṅsuli, bokné glompoŋ ñahuri, o o dadi kaya iku, éman tĕmĕn woŋ lanaŋ, budimu amuŋ sadulit, bĕnĕr wahé nèk trima woŋ sĕmbaraṅan.
9. dalan kuwi ora kuraŋ, lèḥmu golèk piraŋ ḍosin, wĕruha ya dara luraḥ, ruṅokna tak omoŋ ḍisik, pak glompoŋ añahuri, iya kĕpriyé omoŋmu, wis liṅgihku dak mapan, omoṅa gĕlis byaŋ caṅik, amalérok siŋ wadon atiné panas.
10. ora mahido siŋ brĕgas, ṅaran arani byaŋ caṅik, pak glompoŋ mèsĕm aṅucap, ya wis ora ta gèk gĕlis, siŋ wadon bañjur muni, ruṅokĕna ya woŋ bagus, woŋ wadon siŋ pĕṭiṅan, kuwi dudu woŋ siŋ manis, puluḥ ayu naṅiŋ yèn atiné salaḥ.
11. kuwi tumrapé woŋ lanaŋ, siŋ bĕcik amĕṣṭi suṭik, ayuwa kahé muŋ rupa, atiné patiŋ brĕgiḍil, apadéné woŋ sugiḥ, niŋ yèn atiné ṅĕṭiwul, ora wĕruḥ woŋ tuwa, mĕñaŋ maratuwa wani, ñaŋ woŋ lanaŋ aṅuyap wis ora mamaŋ.
12. kuwi woŋ lanaŋ siŋ brĕgas, maṅsa gĕḷĕma ṅrabèni, dadi rupa karo baṇḍa, kuwi ora mahédahi, déné siŋ nomĕr siji, woŋ wadon siŋ ati tulus, sanadyan ora rupa, ora baṇḍa ora asli, niŋ yèn sĕtya tur bĕkti maraŋ siŋ lanaŋ.
13. wĕdi maraŋ maratuwa, mĕñaŋ sanaké ṅajèni, sakaṛĕpé uwoŋ lanaŋ, ora gĕḷĕm ñulayani, amuŋ sarwa ṅrujuki, mĕñaŋ siŋ lanaŋ anurut, dikon ṅétan ya ṅétan, dikon ṅulon ya ṅlakoni, iya kuwi uwoŋ wadon siŋ pĕṭiṅan.
14. pak glompoŋ ñahut aṅucap, iyaḥ aku uwis ṅrĕti, paduné rupamu ala, rékané bañjur nuturi, apa aku ra ṅrĕti, aṛĕp aṅapusi aku, woŋ lanaŋ kok diwulaŋ, ṅaṅgo baṇḍa rupa asli, bok wis ora éntuk ṅono wahé gĕnaḥ.
15. karuwan olèhku gagas, siŋ wadon bañjur maṅsuli, mĕṅko ḍisik ta dak kaṇḍa, duruŋ tutug lèhku muni, ruṅokna ya mas bèi, kajaba siŋ ḍisik mahu, rasakna siŋ tĕmĕnan, aja kĕsusu maṅsuli, tak lahirṇé atiku kowé bèn ḷĕga.
16. wĕruha iya woŋ lanaŋ, atiné woŋ wadon kuwi, nèk siŋ lanaŋ gogombyakan, gĕḍéné wayuḥ añĕlir, ñaŋ ati bañjur sĕḍiḥ, sĕḍiḥ olèhé diwayuḥ, dina dina muŋ susaḥ, sasat añcik añcik ĕri, tansaḥ ĕmar sumĕlaṅé nèk dipĕgat.
17. marga siŋ mĕṣṭi woŋ lanaŋ, bojoné bañjur ditaṇḍiŋ, é iki ṅéné bok tuwa, nèk ṅladèni kaya iki, dak taṇḍiŋ apik ĕndi, olèhé ṅladèni aku, coba aku tak mara, ñaŋ goné bok ĕnom gĕnti, égaḥ égaḥ ladèné bok nom diprikṣa.
18. baṛĕŋ tĕka bañjur nimbaŋ, é ladèné kaya iki, iya ṅono apa ora, woŋ lanaŋ wis mĕṣṭi naṇḍiŋ, tur nèk bok nom digilir, aṅgañik olèhé ñatur, ṅala ala bok tuwa, prĕluné bèn dikasihi, mulakĕna ladèné ya ṅaya aya.
19. ora kétaŋ adol ĕṇḍas, méliké bèn kaṅgo ṅlaki, nèk gilir mĕñaŋ bok tuwa, siŋ lanaŋ ya diṛĕmbugi, siŋ ora apik apik, ñatur ñaŋ bok ĕnom gupruk, akèḥ akèḥ lé nacad, ĕndi sèḍèŋ ĕndi iṭil, uwoŋ gĕṭiŋ maṅsa kuraṅa panacad.
20. dadi bok ĕnom bok tuwa, paḍa ṛĕbutan disihi, siŋ lanaŋ atiné buṅaḥ, ṅalor ṅidul disĕsuṅgi, kuwi nèk paḍa asiḥ, woŋ lanaŋ ya énak énuk, mĕñaŋ goné bok tuwa, disuhun suhun dipuṇḍi, mĕñaŋ goné bok ĕnom disuba suba.
21. ḍasar maruné ya ora, tahu padu ṅrĕrasani, nèk pinuju sarimbitan, bok nom bok tuwa nèŋ buri, rupané manis manis, iki ayu kuwi ayu, saṇḍaṅané di kĕmbar, tapiḥ paraṅrusak kliṭik, klambi jambon suwĕṅé kabèḥ barléyan.
22. siŋ lanaŋ lakuné gagaḥ, karo wironé dicaṅkiŋ, kuwi rak nèk woŋ sĕmbada, kĕcèḥ amal kĕcèḥ ḍuwit, naṅiŋ siŋ wadon mĕṣṭi, ora mantĕp sĕtya tuhu, marga sihé woŋ lanaŋ, ora wutuḥ ñaŋ woŋ siji, ñaŋ bok ĕnom asiḥ ñaŋ bok tuwa trĕṣṇa.
23. asiḥ muŋ siji disigar, mrana sisiḥ mréné sisiḥ, kaḍaŋ ora sĕparo byak, olèhé amaro asiḥ, siḥ iki apa iki, walak walak di siŋ bahud, ṅĕmpèk ĕmpèk woŋ lanaŋ, iya mĕṣṭi diluwihi, mĕṣṭi ṅono uwis ora kĕna ora.
24. siŋ wadon mĕṣṭiné iya, ora wutuḥ mantĕp asiḥ, trĕṣṇa suṅkĕm myaŋ siŋ lanaŋ, dina dina kĕtir kĕtir, tiwas diṛĕréwaṅi, kuraŋ maṅan kuraŋ turu, mrihatinké siŋ lanaŋ, dadiya woŋ sugiḥ siṅgiḥ, jĕbul ora kaṅgo ĕṅgoné suwita,.
25. dadi wĕruha woŋ lanaŋ, woŋ wadon diwayuḥ kuwi, wis mĕṣṭi ya kuraŋ trĕṣṇa, trĕṣṇaa ya muŋ saṭiṭik, béda yèn bojo siji, ora kétaŋ géṇḍoŋ wakul, abot abot disaṅga, bĕtèké lé bĕkti ṅlaki, apa manèḥ wulaṅé woŋ tuwa tuwa.
26. tak tirokné ruṅokĕna, aja kĕsusu maṅsuli, yèn kowé kĕpéṅin mlarat, kĕṛĕpa ṅaliḥ lan rabi, laḥ ta rasakna iki, iya bĕnĕr apa luput, woŋ kĕṛĕp liḥ alihan, wis mĕṣṭi mlarat kĕpati, jalarané mrana mréné ṅaṅgo ragat.
27. woŋ kĕṛĕp rabi ya paḍa, ora kétaŋ muŋ sabribil, harak iya ṅaṅgo wragad, coba pikiṛĕn siŋ bĕniŋ, aja kĕsusu muriŋ, aṛĕp anaboki aku, aku iki caturan, ora bisa nèk kon gañik, muŋ salugu tur uwis kaṇṭi ṛĕkasa.
3. kinaṇṭi
1. pak glompoŋ sĕmuné ṅuṅun, batin pañcèné ṅrujuki, é boké glompoŋ tĕmĕnan, waṅuné lèhé goṇḍèli, bañjur alon lèhé kaṇḍa, kowé bokné dak tuturi.
2. lèhku aṛĕp wayuḥ iku, bokmanawa añjalari, bisa cukup siŋ dipaṅan, piraṅbara bisa sugiḥ, iki jĕnĕṅé sĕtiyar, wiwit biyèn kok muŋ miṣkin.
3. bok iki marahi cukup, sapa wĕruḥ tĕmbé buri, bokné glompoŋ sĕlak panas, kĕsusu goné ñahuri, marakaké sugiḥ apa, sugiḥ ḍuwit duruŋ mĕṣṭi.
4. sugiḥ utaŋ kuwi tĕmtu, karo sugiḥ anak cilik, saka aku uwis lima, iŋ maṅka nèk sida rabi, mĕṣṭi bañjur duwé anak, gumrayaḥ patiŋ kariyik.
5. mlaratmu saya aṅuṇḍuŋ, anak isiḥ cilik cilik, kowé uwis rada tuwa, baṛĕŋ wis wiwit ṅragadi, kowé wis mĕñaŋ akérat, bañjur kapriyé siŋ kèri.
6. rak iya mĕmĕlas iku, mula gumun aku iki, ñaŋ woŋ siŋ ora gagasan, muŋ sĕnĕŋ nuruti ati, aṅgĕr kaṛĕpé kĕtĕkan, ora aṅèliṅi buri.
7. wĕkasané baṛĕŋ ṭiklu, anak isiḥ cilik cilik, bapakné wis nèŋ jaratan, anak muṇḍak gĕḍé siṭik, anaṅiŋ bañjur kapiran, muŋ biyuṅé siŋ ṅiṅoni.
8. sapira kayané biyuŋ, mĕṣṭi ora añukupi, anaké bañjur diatag, akal akal golèk ḍuwit, rèhniŋ kuraŋ siŋ dipaṅan, lowuŋ najan muŋ sabribil.
9. rèhniŋ isiḥ paḍa kuñcuŋ, lèhé golèk mĕñaŋ ṅĕndi, aṛĕp ñambut gawé apa, sabisa bisané nuli, ajar ajar golèk paṅan, ĕndi ana gogo krikil.
10. adol sukĕt adol kayu, kuwi nèk bocaḥ siŋ bĕcik, balik yèn kĕtaṅgor bocaḥ, siŋ ala watĕké mĕṣṭi, aḍakané mĕñaŋ pasar, ajar ñĕḷĕr ajar ṅutil.
11. kuwi isiḥ rada bagus, ana manèḥ luwiḥ niṣṭip, bañjur aṅaṭuṅké taṅan, karo muni pariŋ pariŋ, ṅĕmis sasèn mawon dara, kula pujèkaké sugiḥ.
12. hara piyé pakné gĕṇḍuk, laḥ sapa siŋ luput kuwi, apa luputé si bocaḥ, apa woŋ tuwané kuwi, aranana ḍéwé éṅgal, pak glompoŋ mèsĕm ñahuri.
13. iku yèn muṅguha aku, nèk siŋ lanaŋ uwis mati, maṅka anaké gumrayaḥ, iya bañjur laki maniŋ, golèk woŋ lanaŋ siŋ bisa, aṅréwaṅi aṅopèni.
14. biyaŋ glompoŋ nuli ñĕṇḍu, o dudu woŋ wadon kuwi, wis anak anak gumrayaḥ, malaḥ isiḥ aṛĕp laki, kuwi jĕnĕŋ siya siya, anak ora diéliṅi.
15. tiwas laki kapiŋ pitu, maṅsa anak dadi bĕcik, malaḥ saya klara lara, kuwi pakné siŋ wis mĕṣṭi, marga yèn wis omaḥ omaḥ, ora kobĕr aṅopèni.
16. mĕñaŋ anak siŋ kumruyuk, awit kĕpĕkṣa ṅladèni, mĕñaŋ bojoné siŋ añar, trĕkaḍaŋ bañjur andlidir, ya anak anak gumrayaḥ, anaké gawan wis mĕṣṭi.
17. saṅsarané saya muput, cilakané saya mĕñcit, wĕkasan paḍa klarahan, sabab olèhé ṅopèni, mĕṣṭiné ya ora kaya, anaké siŋ mĕtu kèri.
18. mara piyé pakné gĕṇḍuk, yèn kowé sidaa rabi, akèḥ sabab siŋ kosaṇḍaŋ, sapisan ṛĕkasa ati, kudu bisa maro trĕṣṇa, kuwi nèk kosĕmbadani.
19. liré kabèḥ siŋ dijaluk, sarwa bisa anuruti, upama ṅéné woŋ lanaŋ, ĕmbok tuwa kosuwĕṅi, sĕliŋ miraḥ ṛĕga swidak, bok ĕnom wis mĕṣṭi mèri.
20. iya mĕṣṭi bañjur jaluk, di paḍa lèhé ñuwĕṅi, rèhniŋ jĕnĕŋ paḍa paḍa, upama bisa nuruti, nukokké ṛĕga sawidak, bok tuwa gĕnti anaṅis.
21. jaluk suwĕŋ ṛĕga satus, awit paṅrasané mĕṣṭi, alaḥ déné dadi tuwa, muŋ dipaḍa lé ñaṇḍaṅi, priyé gonmu aṛĕp nata, supaya karoné liliḥ.
22. ora pijĕr kobrak kabruk, dibéda goné ñaṇḍaṅi, kuwi yèn kowé sĕmbada, ṛĕkasamu ora pati, balik sarwa kacompréṅan, dina dina gaḍo ati.
23. apa koréwaṅi sliṅkuḥ, kana kéné ṅuriŋ uriŋ, mara ñaŋ goné bok tuwa, lagi tĕka dipléroki, ñaŋ goné bok ĕnom kana, lagi wĕruḥ wis mrĕṅuti.
24. mrana mlérok mréné mlĕruk, mréné gĕṭiŋ mrono sĕṅit, mrana mèñjĕp mréné éwa, labĕt ora ñĕmbadani, kuwi yèn siŋ wadon brĕgas, kaḍaŋ malaḥ diunèni.
25. suk ésuk sarapan kĕpruk, awan diladèni tañjir, aṛĕp turu sosoḥ ṅujar, taṅi turu dicĕpaki, sosot karo sambĕr gĕlap, hara priyé mĕñaŋ ati.
26. mĕṣṭi ya mak prĕmpĕŋ nĕsu, anaṅiŋ bañjur dipikir, upama dak nĕsonana, atiku rada kuwatir, mĕṅko gèk añjaluk pĕgat, éman olèhku wis asiḥ.
27. sapisan sababé iku, sabab manèḥ saya luwiḥ, yahiku ṅèliṅi anak, laḥ wĕruha bocaḥ kuwi, yèn biyuŋ atiné bubraḥ, mĕñaŋ anak anumusi.
28. mèlu bubraḥ kuwi tĕmtu, aku gĕḷĕm koṭoṭoki, yèn luputa lèhku kaṇḍa, samono yèn kowé isiḥ, aṅgagas bĕcikiŋ anak, susahiŋ anak kopikir.
4. asmaradana
1. rasakna taṇḍĕsiŋ ati, aja muŋ kopikir lamba, abot aṛĕp wayuḥ kuwé, ora kĕna sĕsĕmbranan, kudu dipikir tĕnan, pak glompoŋ alon sumahur, ĕmbokné ṭolé wĕruha.
2. saduruṅé dak lakoni, iku wis dak pikir dawa, bakal iŋ kadadéyané, biyaŋ glompoŋ bañjur ñaṇḍak, padatané siŋ lanaŋ, kasusu goné sumahur, aku wis ṅrĕti woŋ lanaŋ.
3. bĕnĕr yèn uwis kopikir, naṅiŋ béda siŋ kogagas, ora kogagas aboté, muŋ sĕnĕṅé siŋ kowanam, siŋ suṅil suṅil ora, lèḥmu aṛĕp wayuḥ iku, muŋ sĕnĕŋmu siŋ kotata.
4. pakné glompoŋ cuṅar cuṅir, malaḥ rada pariṅisan, kabĕḍèk jroniŋ atiné, bokné glompoŋ manèḥ ṅucap, pakné ora ṅonowa, olèḥmu aṛĕp awayuḥ, apa wis duwé ḍéḍékan.
5. siŋ lanaŋ mèsĕm ñahuri, prĕlu apa takon baraŋ, bok wis mĕnĕŋ bahé kowé, woŋ wadon wĕruḥmu apa, ṅrĕtimu rak muŋ adaŋ, karo aṅĕmoŋ anakmu, aṅgĕr mĕnĕŋ aku trima.
6. ora prĕlu dak tuduhi, mĕṅko muṇḍakan kolarag, dadi maru duruŋ klakon, bahé uwis gĕgĕmpuran, saru kruṅu iŋ taṅga, biyaŋ glompoŋ bañjur ñahut, ora saru ora baraŋ.
7. laḥ pilihĕn saru ĕndi, aku padu sagrabyagan, karo sarumu sajĕgé, ṅalor ṅidul sosoḥ mujar, mrana ora bĕnĕran, mréné diunèkké kĕpruk, mulané kowé blakaa.
8. sapa ta siŋ aṛĕp kosir, apa kahé mas jĕŋ sablaḥ, siŋ sok liwat mèṇṭèk mèṇṭèk, nèk kowé ana ṅaṛĕpan, bañjur ataruŋ ulat, pak glompoŋ mèsĕm gumuyu, ihik sapa ta siŋ kaṇḍa.
9. hla kok dadi kowé ṅrĕti, siŋ wadon ñahuri sugal, uwis mĕṣṭi ṅrĕti wahé, najan aku ora luṅa, naṅiŋ kabèḥ wis cĕṭa, tak iñcĕŋ sinambi turu, sapolaḥmu wis kĕtara.
10. o o kowé tak kaṇḍani, wĕruha iya woŋ lanaŋ, kaṛĕpmu wuruŋna bahé, aja sok aduwé tindak, nuruti ati murka, ṅèliṅana kaŋ wus uwus, critané woŋ kuna kuna.
11. sapa sapa siŋ nuruti, digoḍa woŋ wadon kĕna, mĕṣṭi wuruŋ woŋ dadiné, kaya ta jĕŋ nabi adam, aṅgugu ibu kawa, woḥ kuldi dikon aṅuṇḍuḥ, sĕṅkĕrané gusti allaḥ.
12. nabi adam anuruti, ya iku kĕna iŋ goḍa, kahé kapriyé dadiné, diḍunké saka iŋ swarga, didukani paṅéran, maṅka ḍèk nèŋ swarga iku, jaréné muŋ sarwa nikmat.
13. ora maṅan ora ṅĕliḥ, ora ṅombé ora ṅĕlak, amuŋ sarwa sĕnĕŋ bahé, baṛĕŋ mĕḍun saka swarga, nabi adam lan kawa, wĕtĕṅé kapĕkṣa kluruk, jaluk diisèni sĕga,.
14. yèn ora maṅan ya ṅĕliḥ, yèn ora ṅombé ya ṅĕlak, dadi kudu ñambut gawé, ana manèḥ tutuladan, dasamuka ṅaḷĕṅka, baṅĕt ĕṅgoné kĕpéñcut, kasmaran ñaŋ dèwi sinta.
15. ora klakon tiwas mati, kuwi iya jĕnĕŋ goḍa, bagawan wisrawa kahé, iya uga kĕnèŋ goḍa, ḍèk dikoṅkon iŋ putra, danaraja saŋ aprabhu, nagarané lokapala.
16. wisrawa karo sukèsi, karoné kĕna iŋ goḍa, pañcèné dadi mantuné, jĕbulané ora sida, aṛĕp ḍéwé wisrawa, wĕkasané baṛĕŋ lampus, wisrawa ora ñaŋ swarga.
17. satriya iŋ plaṅkawati, baṅĕt ĕṅgoné kédanan, ñaŋ dèwi utari kahé, bimañu aṅaku jaka, diréwaṅi sĕpata, bok dikrocok gaman sèwu, rak isiḥ jaka tĕmĕnan.
18. maṅka luguné wis rabi, mandi olèhé sĕpata, aṅkawijaya patiné, dikarocok woŋ ṅastina, ḍèk pĕraŋ bratayuda, tuṅgalé isiḥ aṅumbruk, kaya ta ratu mamĕnaŋ.
19. ḍèk bratayuda diaṅgit, pujaṅgané ĕmpu sĕḍaḥ, kuwi dikon ṅaṅgitaké, critané para paṇḍawa, praṅé karo ṅastina, kocapa baṛĕŋ saŋ ĕmpu, paṅaṅgité uwis tĕkan.
20. prabhu salya ṅariḥ ariḥ, aṅlĕlipur iṅkaŋ garwa, wĕktu iku paṅaṅgité, saŋ aprabhu jayabaya, kalawan iṅkaŋ garwa, ḷĕṅgaḥ mirṣani si ĕmpu, jĕbulané ĕmpu sĕḍaḥ.
21. atiné bañjur aṅgoliŋ, olèhé aṅaṅgit bubraḥ, kédanan maraŋ garwané, maha prabhu jayabaya, mula goné ṅrumpaka, ĕmpu sĕḍaḥ ṅanti ṅlaṅut, tibané siŋ dirumpaka.
22. dudu dèwi sĕtyawati, garwané śri jayabaya, diḷĕbokaké ṛĕṛĕpèn, tujuné saŋ prabhu awas, sakala ĕmpu sĕḍaḥ, dipocok sirahé gluṇḍuŋ, tur iku kĕnané goḍa.
23. sasat duruŋ ṅanti kéṅis, suprandéné dadi tiwas, ana manèḥ caritané, jaka tiṅkir ḍèk nèŋ dĕmak, iya kĕna iŋ goḍa, siŋ disamar ḍaḍuṅawuk, jaka tiṅkir dikon luṅa.
24. kahé ki agĕŋ iŋ maṅir, siŋ jĕnĕŋ ki wanabaya, siŋ misuwur digdayané, ora ana wani ṅlawan, ṅanti ratu mĕntaram, ériŋ taṇḍiŋ pĕraŋ pupuḥ, bañjur saŋ prabhu utusan.
25. putri siŋ ayuné luwiḥ, dikon goḍa wanabaya, ñalamur ambaraŋ lèḍèk, kyayi wanabaya kĕna, digoḍa saŋ lir ṛĕtna, tĕmahané dadi lampus, laḥ iku pakné éliṅa.
26. layaŋ pañji wuluŋ kuwi, siŋ maṅkono iya ana, nèk crita iŋ arab kahé, ménakjobin iku iya, patiné marga kĕna, iŋ goḍa putri mĕdayun, siŋ jĕnĕŋ dèwi muniṅgar.
27. yèn dak aranana isiḥ, ṅrĕmbĕk siŋ dadi tulaḍa, prakara woŋ lanaŋ kuwé, sababé dadi cilaka, muŋ marga kĕnèŋ goḍa, ĕmbuḥ kagoḍa iŋ ṛĕmbug, ĕmbuḥ kagoḍa iŋ rupa.
28. malaḥ ujaré iŋ kadis, bésuk yèn ana ṅakérat, ana goḍa luwiḥ gĕḍé, yèn digoḍa apa apa, ora ana siŋ pasaḥ, puṅkasané goḍa mahu, widadari saka swarga.
29. ayuné ṅudubilahi, aṅgoḍa ṅaṅgo léléwa, sapa siŋ dulu ḍèwèké, uwis mĕṣṭi yèn kédanan, sakiŋ ayuné tĕnan, iku yèn ṅanti kĕpéñcut, cilaka kĕcĕmpluŋ nraka.
30. maṅka kaṅgo tata lahir, aja widadari swarga, widadariné bok cècèk, wahé wis paḍa kédanan, ya ṅono apa ora, ora susaḥ ḍuwur ḍuwur, wétan kuwi wahé iya.
31. dicopoté dadi mantri, jalaran muŋ kĕnèŋ goḍa, kasĕṅsĕm mas jĕṅé mèndès, ṅaṅgo ḍuwitiŋ nagara, diaṅgo ṅuja uja, sahiki ḍèwèké ṅlaṇṭuŋ, paṅkaté mantri wis ilaŋ.
32. malaḥ ḍèk biyèn disĕpir, mulihé saka ukuman, ora bisa ñambut gawé, mas jĕŋ mèndès uwis éwa, marga wis ora kaya, hara priyé pakné gĕṇḍuk, sahiki dadi taṅisan.
5. mĕgatruḥ
1. pakné glompoŋ añĕṇḍu karo maṛĕṅut, aḥ kowé kuwi byaŋ caṅik, woŋ lanaŋ dadak diwuruk, ana uwoŋ aṛĕp rabi, dadak diwèhi paṅilon.
2. nabi adam dasamuka abimañu, ĕmpu sĕḍaḥ jaka tiṅkir, maṅir jobin kadis muluk, ṅaṅgo kon ṅilo dèn mantri, hla nèk pĕṣṭiné wis ṅono.
3. ditaṅkisa ṅaṅgo gunuŋ raṅkĕp sèwu, yèn pĕṣṭiné kaya kuwi, iya ora bisa miṅkuḥ, cĕkaké wahé sahiki, koḍaḍuṅa aku mĕḍot.
4. kopalaṅi iya sida mlumpat aku, adrĕŋ lèhku aṛĕp rabi, nèk kowé gĕḷĕm dak wayuḥ, bacutna lèḥmu ṅladèni, déné yèn kowé mĕkṣa moḥ.
5. ora gĕḷĕm dak wayuḥ ya sakaṛĕpmu, apa kowé jaluk muliḥ, dak tĕrké suk kapan gĕṇḍuk, ḍasar rupamu sahiki, uwis ora ṭérok ṭérok.
6. aku éwa ṅruṅokaké caturanmu, woŋ lanaŋ kok dituturi, apa rumaṅsamu aku, ora duwé kawruḥ dakik, kumini kakéhan obrol.
7. muŋ grĕgĕtĕn aku mahu baṛĕŋ kruṅu, kaṇḍamu siŋ akèḥ kuwi, ana uwoŋ aṛĕp wayuḥ, jĕbul aṛĕp dipalaṅi, priyé gagasanmu mono.
8. apa kowé siŋ ṅiṅoni maraŋ aku, hara akona naboki, tak iṅĕl iṅĕl awakmu, klakon kowé mĕṅko mati, kocapa mahu byaŋ glompoŋ.
9. baṛĕŋ wĕruḥ siŋ lanaŋ olèhé nĕpsu, diṛĕmbugi malaḥ muriŋ, byaŋ glompŋ atiné kaku, sakiŋ pĕpĕté iŋ ati, bañjur juṅkĕl nèŋ paturon.
10. ṅuṅkĕb uṅkĕb karo naṅis sĕṅgruk sĕṅgruk, o alaḥ yatalaḥ gusti, kaya maṅkéné awakku, ana uwoŋ diṛĕmbugi, pik apikan tĕka ṅono.
11. malaḥ uwoŋ disiya siya dituṇḍuŋ, uwoŋ aṛĕp ditaboki, jamak tĕmĕn dupèḥ bagus, tĕka ora aṅèliṅi, ḍèk isiḥ magaŋ nèŋ jĕro.
12. géné jarik siŋ diĕṅgo gantuŋ kĕpuḥ, klambi ora tahu salin, bañjur anakokké aku, lèhé mara wira wiri, sasat diréwaṅi késod.
13. bapak iya ora ñorohaké aku, kono ḍéwé siŋ golèki, baṛĕŋ wis kalakon aku, dadi mantèn lagi wiṅi, saṇḍaṅanku wis go tombok.
14. balañjané tĕluŋ gélo ora cukup, bapak sibu siŋ nomboki, sabĕn sasiné lumintu, kirimané bĕras krambil, sasat ora tahu towoŋ.
15. ṅanti tĕkan duwé balañja sĕpuluḥ, ya isiḥ mĕṣṭi ṅirimi, baṛĕŋ blañja wis roṅpuluḥ, iya isiḥ sok ṅirimi, naṅiŋ baṛĕŋ uwis jompo.
16. ora bisa kĕkirim ora jajaluk, blañjané rada ñukupi, uwis tĕkan tĕluŋ puluḥ, ḍèk isiḥ blañja saṭiṭik, ṅanti dak réwaṅi dodol.
17. ora kétaŋ kuraŋ maṅan kuraŋ turu, awan awan dak go bĕṅi, bĕṅi ora bisa turu, labĕt olèhku prihatin, bisaa ĕndaŋ dadi woŋ.
18. sahikiné blañja uwis tĕluŋ puluḥ, anak anak klimis klimis, kabèḥ ḷĕmu ṭipluk ṭipluk, rada ayĕm mĕñaŋ ati, jĕbulané kaya ṅono.
19. ora kĕna diantĕpi pakné gĕṇḍuk, tiwas lèhku ṅrĕréwaṅi, ṅanti mèḥ limalas tahun, wiwit blañja muŋ sakĕṭip, sahiki tĕkan sagélo.
20. kaya ṅéné rasané dadi woŋ busuk, ora bisa golèk ḍuwit, paṅan siŋ uwis kaḷĕbu, ñaŋ wĕtĕŋ diuwik uwik, ora trima ṅolok olok.
21. bokné glompoŋ anaké wadon siŋ turu, dikĕkĕp lan ditaṅisi, o alaḥ ĕṅgèr anakku, bĕja tĕmĕn kowé sumi, déné sahiki si ĕmbok.
22. apa bakal pisaḥ karo kowé gĕṇḍuk, bapakmu wĕktu sahiki, lagi aṛĕp golèk ibu, siŋ ayu pintĕr ṅladèni, biyuŋmu siŋ wis bĕkokrok.
23. diṅis ĕṅis disiṅkaŋ siṅkaŋ dituṇḍuŋ, woŋ wadon muŋ ñilakani, kowé aja mèlu pakmu, ya mèluwa aku sumi, wĕliṅku bahé ya ḍénok.
24. yèn ṅantiya kowé klakon mèlu pakmu, pituturku wanti wanti, jaluka sĕkolaḥ gĕṇḍuk, cikbèn bisa pintĕr ṭiṭik, najan tinampik iŋ bojo.
25. bisa golèk paṅan ḍéwé ora nunut, aja kaya aku iki, baṛĕŋ wis ĕntèk baṇḍaku, sabĕn dina diunèni, yèn maṅan diolok olok.
26. bok ya éliŋ biyèn ḍèk lagi kĕtĕmu, kaṇḍané maṛĕmké pikir, ora aṛĕp mĕgat mayuḥ, najan cilaka lan mukti, paḍa disaṅga woŋ loro.
27. jĕbulané muŋ digo ṅénaki ṛĕmbug, lèhé aṛĕp aṇḍèḍèli, o allaḥ gusti kaŋ aguŋ, o bapak siŋ uwis mati, kula samaŋ bĕkta mawon.
28. timbaŋ dadi raṇḍa luwuŋ mati aku, tuna tĕmĕn gonku urip, ora kaṅgo iŋ lakiku, gèr paḍa taṅiya gĕlis, ĕmbokmu aṇḍaṇḍaŋ layon.
6. ḍaṇḍaŋgula
1. biyaŋ glompoŋ olèhé anaṅis, klara lara karo sambat sambat, bapa biyuŋ lan anaké, bapakné glompoŋ kruṅu, ṅrĕs atiné ṅanti mèḥ naṅis, tur ṅaṅgo ṅuṇḍat uṇḍat, baraŋ kaŋ wis klĕbu, pak glompoŋ rada klicutan, diwĕlèhké wiwit ḍèk blañja sakĕṭip, ṅanti tĕkan srupiyaḥ.
2. sèwu isin kruṅu lèhé muni, diréwaṅi karo lara lapa, baṛĕŋ wis ana bĕgjané, rada lumraḥ woŋ bañjur, aṛĕp lali ṅaṅgo ṅunèni, ĕndi siŋ aṛĕp mĕgat, ĕndi aṛĕp mayuḥ, dadi pak glompoŋ rumasa, iŋ sisipé siŋ wadon diariḥ ariḥ, dikon taṅi digugaḥ.
3. o ĕmbokné kowé aja naṅis, ra orané yèn sida dak pĕgat, muŋ digo sĕmbranan bahé, ora aṛĕp dak wayuḥ, uwis trima bojo muŋ siji, kowé ora dak pĕgat, aja naṅis guguk, yèn kowé ora pracaya, dak sĕpata laḥ éṅgal taṅiya ḍisik, byaŋ glompoŋ pĕgat pĕgat.
4. sĕpataa iya ora mandi, awit kowé wis gawému cidra, pak glompoŋ guyu jĕgègès, tĕnan kok bokné gĕṇḍuk, yèn goroha kaṇḍaku iki, laḥ bok iya modar ta, yèn kowé dak wayuḥ, gĕḍéné ṅanti dak pĕgat, uwis trima kowé wahé bojo siji, ora aṛĕp grĕñaṅan.
5. bokné glompoŋ taṅi mapan liṅgiḥ, calaṭuné alon ñaŋ siŋ lanaŋ, tak tuturi kowé pakné, kabèḥ woŋ wadon iku, paḍa wahé rasaniŋ ati, ya sanajana béda, yaké muŋ sarambut, iku yèn woŋ wadon tĕnan, mulakĕna bésuk yèn aku ḍisiki, dipuṇḍut iŋ paṅéran.
6. kaṇḍanana anakmu si sumi, pawitané aṅèṅèr woŋ lanaŋ, dudu ayuniŋ rupané, lan dudu baṇḍa iku, ati suci siŋ nomĕr siji, bĕkti maraŋ woŋ lanaŋ, ṅlakoni satuduḥ, atiné ora sléwéṅan, doña ṅakir muŋ siji si guru laki, ora amaṅro tiṅal.
7. ora lañcaŋ ora kumawani, aja dupèḥ siŋ lanaŋ wis trĕṣṇa, bañjur ṅañiḥ añiḥ bahé, kon éliŋ yèn winĕṅku, kudu ora aṅaṅkrik aṅkrik, wit ñatané woŋ lanaŋ, béda woŋ saaku, woŋ lanaŋ kuwi siŋ lumraḥ, sok ṅèṇṭèṅké ora kĕna diantĕpi, upama ana sabab.
8. muŋ sapélé go ḍaḍakan muriŋ, pĕŋ pĕṅané bañjur aṛĕp mĕgat, iya dupèḥ diwĕnaṅké, mulané pakné gĕṇḍuk, muŋ wĕliṅku siŋ ṅati ati, bésuk aja tan ora, anakmu si gĕṇḍuk, ḷĕbokna iŋ sĕkolahan, yèn wis tuwa pama moḥ ṅlakoni laki, uwis duwé pawitan.
9. kapintĕran digo golèk ḍuwit, sokur bagé bisa omaḥ omaḥ, ora kiḍuŋ iŋ uripé, jaré sĕkolaḥ iku, diwuruki cara caraniŋ, woŋ wadon omaḥ omaḥ, dimèné iŋ bésuk, yèn mĕṅkoni balé omaḥ, uwis prigĕl kabèḥ carané wis ṅrĕti, bojoné ora gĕla.
10. wruḥ siŋ wadon cag cĕg sarwa trampil, uwis mĕṣṭi yèn siŋ lanaŋ buṅaḥ, dĕḷĕŋ prigĕliŋ bojoné, kabèḥ kaṇḍaku iku, yèn diturut lan dilakoni, ra orané dipĕgat, utawa diwayuḥ, awit luguné woŋ lanaŋ, yèn siŋ wadon katoné amamalad siḥ, runtuḥ atiné trĕṣṇa.
11. kaya kahé dara bèi mantri, ḍasar dara pyayi brĕgas cakrak, garwané kaya byaŋ jablog, iṛĕŋ kusi tur wuṅkuk, burik cĕkrik rambuté ṭiṭik, suprandéné siŋ lanaŋ, trĕṣṇa asiḥ lulut, aku mrĕlokaké mrana, aṛĕp wĕruḥ sababé ĕṅgoné asiḥ, layak kaya mĕṅkana.
12. baṅĕt tĕmĕn aṅgoné ṅajèni, ñaŋ kakuṅé ora ṅuṅkak krama, ṅatasé bojo wis suwé, tatakramané tĕrus, iŋ sapaṅrèḥ amuŋ ṅlakoni, ora tahu gumampaŋ, alon yèn calaṭu, ṅiriḥ iriḥ ṅaraḥ araḥ, yèn calaṭu ora tahu sĕṅal sĕṅil, ulaté sumèḥ biṅar.
13. lagi énak énak gunĕm pikir, nèŋ nèŋ nèŋ nèŋ pak glompoŋ añjiṅkat, é é wis ésuk ĕmbokné, wis aku aṛĕp turu, muṇḍak krinan sésuk lé taṅi, pak glompoŋ bañjur glimpaŋ, saḍéla wis turu, pak glompoŋ ṅorok sĕṅgoran, biyaŋ glompoŋ isiḥ tansaḥ klisak klisik, grĕgĕtĕn ñaŋ siŋ lanaŋ.
