kramanipun kiyayi agĕŋ pĕṅgiŋ, punapadéné wĕwĕjaṅanipun nalika madĕg paguron.
kiyayi agĕŋ pĕṅgiŋ krama.
kiyayi agĕŋ pĕṅgiŋ gĕntur tapabratanipun, sumĕdya wadat botĕn mĕṅku wanudya. iŋ satuṅgaliŋ dintĕn iŋ wañci ndalu, kiyayi agĕŋ nampi sasmita, botĕn rinilan iŋ paṅéran biliḥ aṅlampahana wadat botĕn mĕṅku wanudya. kiyayi agĕŋ tumuntĕna krama ḍahup kalihan rara alit anakipun kiyayi aguŋ gugur. rara alit wahu sĕdyanipun ugi baḍé wadat, botĕn purun kawĕṅku iŋ priya. kiyayi agĕŋ pĕṅgiŋ kĕdaḥ aṅlampahi mĕṇḍĕt bojo rara alit wahu, sabab sampun pinaṣṭi baḍé kaṅgé lantaran anurunakĕn wijiniŋ ratu binaṭara iṅkaŋ linaṅkuŋ, amĕṅku iŋ tanaḥ jawi tĕraḥ tumĕraḥ.
kiyayi agĕŋ pĕṅgiŋ maṅgihi kadaṅipun sĕpuḥ nuṅgil guru, nama kiyayi agĕŋ tiṅkir, ṛĕṛĕmbagan kadospundi prayoginipun iṅkaŋ kĕdaḥ linampahan. gĕḷĕṅiŋ ṛĕmbag lajĕŋ baḍé paṅkat ḍatĕŋ gugur madosi rara alit iṅkaŋ kacĕṭa iŋ waṅsit. naṅiŋ lampahipun wahu baḍé mampir rumiyin ḍatĕŋ butuḥ tuwin ṅĕraŋ, maṅgihi kiyayi agĕŋ.
saṛĕŋ lampahipun kiyayi agĕŋ tiṅkir tuwin kiyayi agĕŋ pĕṅgiŋ dumugi iŋ butuḥ, kaḷĕṛĕsan déné kiyayi agĕŋ ṅĕraŋ pinuju wontĕn iŋ butuḥ ṅriku. kiyayi agĕŋ pĕṅgiŋ lajĕŋ sajarwa ḍatĕŋ kiyayi agĕŋ butuḥ lan kiyayi agĕŋ ṅĕraŋ, aṅgènipun baḍé anĕtĕpi ḍawuḥ wasitaniŋ paṅéran. para kiyayi agĕŋ wahu sami jumuruŋ lan saṅĕt suka sukuriŋ paṅéran.
kiyayi agĕŋ sakawan pisan sami nuṅgil karṣa, sarta tumuntĕn sami baḍé paṅkat ḍatĕŋ iŋ paḍukuhan gugur. saṛĕŋ lampahipun dumugi iŋ wana jatisari, dumadakan kapĕṭuk kalihan tiyaŋ lalampaḥ, iṅgiḥ punika kiyayi agĕŋ gugur lan anakipun èstri rara alit iṅkaŋ kaḷĕbĕt iŋ wĕca. ki agĕŋ tiṅkir botĕn kasamaran lajĕŋ pitakèn ḍatĕŋ iṅkaŋ lalampaḥ wahu, pundi iṅkaŋ pinaṅka lan iṅkaŋ sinĕdya, punapadéné sintĕn namanipun. iṅkaŋ tinakénan sajarwa, biliḥ nama kiyayi agĕŋ gugur, prĕlu ṅupadosi kiyayi agĕŋ pĕṅgiŋ, iṅkaŋ sampun kacĕṭa iŋ waṅsit, biliḥ kiyayi agĕŋ pĕṅgiŋ wahu iṅkaŋ baḍé dados jatukramaniŋ anakipun èstri nama rara alit, ujariŋ waṅsit wahu yèn kalampahan, iŋ tĕmbé baḍé anĕrahakĕn ratu aguŋ añakrawati ambĕg paramarta sarta sĕkti mandraguna. kiyayi agĕŋ sakawan saṛĕŋ miṛĕŋ waṅsulanipun kiyayi agĕŋ gugur sami suka iŋ ṅgaliḥ, déné andaradasihi. kiyayi agĕŋ tiṅkir ugi mrasajakakĕn biliḥ aṅgènipun tiyaŋ sakawan sami lalampaḥ sasaṛĕṅan punika ḍapur kaḷĕṛĕsan, margi lampahipun wahu ugi botĕn béda kalihan ki agĕŋ gugur aṅgènipun sami nuṅgil prĕlu anuhoni ḍawuhiŋ paṅéran, ṅupadosi rara alit iṅkaŋ tétéla cinaḍaŋ baḍé dados garwanipun kiyayi agĕŋ pĕṅgiŋ.
pinaṅgihiŋ ṛĕmbag sarèhniŋ sampun sami pinaṅgiḥ, kiyayi agĕŋ gugur, lan rara alit lajĕŋ mantuk ḍatĕŋ griyanipun iŋ gugur, kaĕtut wuri sasaṛĕṅan kalihan kiyayi agĕŋ pĕṅgiŋ, kiyayi agĕŋ tiṅkir, kiyayi agĕŋ butuḥ tuwin kiyayi agĕŋ ṅĕraŋ.
sadumuginipun iŋ gugur, gañcariŋ cariyos kiyayi agĕŋ pĕṅgiŋ kaḍahupakĕn kalihan rara alit. dumuginiŋ masa puputra kakuŋ satuṅgal, paparab mas karèbèt, katĕlaḥ nama radèn jaka tiṅkir, margi mas karèbèt wahu kapĕṇḍĕt putra ḍatĕŋ kiyayi agĕŋ tiṅkir. iŋ pawiṅkiṅipun lajĕŋ jumĕnĕŋ ratu binaṭara iŋ nagari pajaŋ, jujuluk prabhu hadiwijaya, jumĕnĕṅipun nata iŋ nagari pajaŋ iṅèstrènan sunan kudus. sajumĕnĕṅipun saŋ prabhu hadiwijaya wontĕn iŋ pajaŋ, tanaḥ jawi maṅgiḥ tata tĕntrĕm, harja kĕrta loḥ jinawi, miraḥ saṇḍaŋ miraḥ boga wastra, titiyaŋ satanaḥ jawi agĕŋ alit sami jibar jibur amĕnuhi, sarta sami guyub rukun sahéka kapti.
maṅsuli cariyos, ki agĕŋ pĕṅgiŋ tĕtĕp dadaḷĕm iŋ pĕṅgiŋ, dados gugunuṅan pitakénanipun titiyaŋ iŋ satanaḥ pĕṅgiŋ, misuwur asmanipun, lajĕŋ madĕg paguron. wontĕn satuṅgaliŋ wali murṣid nama sèḥ sitijĕnar, miṛĕŋ suwuriŋ asmanipun kiyayi agĕŋ pĕṅgiŋ, aṅgènipun ambĕg paramarta, suka tutuluŋ lan lumintu dadananipun iŋ sasami, sèḥ sitijĕnar sumĕdya pinaṅgiḥ, ugi sampun kalampahan papaṅgihan. cĕkakiŋ cariyos sèḥ sitijĕnar lajĕŋ puruhita. sasampunipun sèḥ sitijĕnar tinétésan ilmu sĕjati, lajĕŋ iṅakĕn saḍèrèk sinarawèdi. déné wĕjaṅanipun ki agĕŋ pĕṅgiŋ, sawatawis kados iŋ ṅaṇḍap punika.
wéjaṅan 1
muṅguhiŋ woŋ makripat, antarané kaŋ ndĕḷĕŋ karo kaŋ dinĕḷĕŋ kalawan mata karo, iku tĕtĕp dadi aliŋ aliŋ. sirṇakna tiṅalé mariŋ kaŋ dèn tiṅali, aniṅgalana sira iŋ gusti kalawan gusti lan kumpulé tuṅgal. kaŋ ndĕḷĕŋ iya kaŋ dinĕḷĕŋ, iya jumbuhé kawula, iŋ batin sira iku sañata gusti.
paḍa sirṇakna tutulisan iŋ ndaḷĕm sakèhiŋ kitab kitab, kitab kaŋ paḍa ṅucapaké kĕkojahiŋ ṅèlmu, marga iku uga aliŋ aliŋ. yèn ora maṅkono dadi sira muŋ tĕtĕp ṅandĕl bahé, ora ṅaṅgo dirasakaké surasané, wus tĕmtu ora bakal ṅgĕpok surasané kaŋ sĕjati.
iŋ satĕmĕn tĕmĕné paṅucapira, iku iya paṅandikaniŋ allaḥ, raganira iku muŋ kaṅgo pikukuḥ anĕkṣèni ananiŋ allaḥ. lamun arṣa wĕruḥ iya tiṅgalana sakiŋ sira pribadi, pan sira iku satĕmĕné kasuñatan iṅsun, iya sira iya iṅsun. mulané aja pisan ṅulati allaḥ, allaḥ wis ana sira ḍéwé.
paṅandikaniŋ allaḥ, lamun iṅsun kapaṅgiḥ lan kakasiḥ iṅsun, ya iku mohamad, iṅsun tĕtĕp kawula, tĕgĕsé kaŋ nĕkṣèni ananiṅsun. lamun ora katĕmu lan kakasiḥ iṅsun, ya iku mohamad, tĕtĕp iṅsun gusti (allaḥ).
sĕjatiné allaḥ iku ora tĕtĕlu, naṅiŋ muŋ siji, iya siji nuṅgal lan sira manuṅsa kawulaniṅsun kabèḥ. déné pambabaré kasuñatan kaŋ ḍihin wit siŋ nukat ghaib, sawisé tumiba ambabaraké ghaibé, bañjur aran jisim latip, bañjur ana sira, ananira iṅaran gĕtiḥ kaŋ urip, gĕtiḥ urip iṅaranan rasulollaḥ ṅalahihi wasalam, iya abadan mohamad, iya patĕmoniŋ rasa jati. gĕtiḥ = raḥ = roḥ, iya iṅaran sadat utawa rasa jati, iya rahsaniŋ dat kaŋ awujud mohamad, iya wujud badanira iku, iŋ kono wis wujud tuṅgal. allaḥ wus katému lan kakasihé, ya iku mohamad, iya sira iku anané manuṅsa kabèḥ, iya kaŋ nĕkṣèni, anĕbut añjumĕnĕṅaké ananiŋ gusti (allaḥ).
allaḥ aṅandika : lamun ora ana sira mohamad (kaṛĕpé aṅarani manuṅsa), iṅsun iya ora ana kaŋ nĕbut, allaḥ iya sira, iya sajatiniṅsun, iya sira kaŋ sawujud lan iṅsun, papaḍané wawayaṅan kaŋ ana sajroniŋ paṅilon, iku sañata wawayaṅané kaŋ ṅilo, wawayaṅan paḍa karo wujudé kaŋ ṅilo, ora pisan ana gèsèhé. rarasan iki rasakna kaŋ kaṇḍas ana iŋ atinira.
laḥ ĕndi dunuṅiŋ allaḥ lan kawula, déné kasĕbut allaḥ wus ana iŋ manuṅsa, sarta ora pisaḥ iŋ anané, atĕgĕs anané kawula (manuṅsa), iya anané allaḥ, anané allaḥ iya anané manuṅsa. lamun kawula ṅaku allaḥ, déné anané ora laṅgĕŋ sarta apĕs. muṅguḥ apĕs lan ora laṅgĕṅé iku minaṅka prataṇḍané yèn sira kawula tulèn, kasaṇḍaṅan apĕs lan ora laṅgĕŋ, ya iku antarané allaḥ. allaḥ ṅibaraté ratu, déné kawula (manuṅsa), minaṅka susulihé. apĕs lan owaḥ giṅsiré rumaṅsaa kawula, naṅiŋ uga rumaṅsaa gusti, awit kaanané ñata tuṅgal. solaḥ tiṅkahé kawula iku saka allaḥ, atĕgĕs iya solaḥ tiṅkahé allaḥ, papaḍané kayadéné woŋ ṅilo, kaŋ ṅilo iku allaḥ, wawayaṅané iku kawula, sayĕkti nuṅgal warṇa, rupa lan sasolaḥ tiṅkahé. dadi ñataniŋ allaḥ iku aran, kaŋ nĕbut kawula. yèn kawula ora ana, allaḥ iya ora ana, maṅrĕtiné ora ana kaŋ ṅucap.
allaḥ laṅgĕŋ iŋ ḍèwèké ora loro tĕlu, naṅiŋ muŋ siji, tĕgĕsé siji iku kĕbak utawa kĕmput, maṅrĕtiné : iŋ ṅĕndi bahé iya ananiŋ allaḥ, rupaniŋ allaḥ, wujudiŋ allaḥ lan kaanan kabèḥ bahé wus ana iŋ ḍèwèké, iya kaŋ ṅandika, kaŋ miyarṣa, kaŋ niṅali, kaŋ muji, kaŋ nĕmbaḥ, kaŋ murba misésa laṅgĕŋ tan wiwitan tanpa wĕkasan. dumadiné kaanan lan lalakoné martabaté kanugrahané. muṅguḥ martabaté ya iku :
1. sarira, mĕṅku lahir batin, lahiré kawula batiné allaḥ, dadi wis luluḥ lan anané allaḥ, panĕdyané paḍa sĕdyané, kawula iya karṣané allaḥ.
2. paṅrĕti, krasa rasa rumaṅsa, ora sĕmaŋ sĕmaŋ, tĕgĕsé wus ora aṅgolèki allaḥ, allaḥ wus ana awak ḍéwé.
3. bhumi, roḥ ilapi, roḥ jasat, tanpa tuduhan.
4. ñawa, anané roḥ ilapi, tĕgĕsé urip iku sawiji, artiné sakabèhiŋ kaanan iku tuṅgal.
5. kanugrahan, kĕñcĕṅiŋ iman, tĕguhiŋ tékad, santosaniŋ tandaŋ.
muṅguḥ kanugrahané :
1. salat, ṅĕrèḥ karṣa, cipta lan maḍĕp sawiji.
2. takbir, kawruḥ, wĕruḥ jatiniŋ wĕruḥ, ya iku wus nuṅgal.
3. budi, cipta paṅgrahita, kaŋ ñipta. 4. roḥ, urip tanpa ñawa, anané ora dèn anakaké, tĕgĕsé anané pribadi, ora ana kaŋ momori kajaba awaké ḍéwé.
5. sakarat, maḍĕp, iḍĕp, mantĕp.
6. iman, sukur, tawĕkal, sabar.
7. tokid, luluḥ tĕtĕp ṅèstokaké.
8. makripat, karṣa, rahsa, wisésa pribadi.
laḥ ĕndi wujudiŋ allaḥ, sapa kaŋ ṅucap iku, aja ṅira yèn sira dudu allaḥ, mula dèn awas, waṣpadakna iŋ paṅarṣa, tĕtĕp rasa paṅrasané tĕtĕp awas tiṅalé, ora owaḥ, dulu dinulu ḍéwé, ucap iṅucap ḍéwé. yèn maṅkono ñata sampurṇa salaté, wĕruḥ paraniŋ sĕmbahyaŋ, paraniŋ asiḥ, paraniŋ ĕnĕŋ, paraniŋ paṅucap, paṅruṅu, paṅambu, paraniŋ luṅguḥ, ṅadĕg, turu, taṅi, lumaku, paraniŋ maṅan, ṅinum, ṅuyuḥ, ṅisiŋ, paraniŋ suka prihatin, paraniŋ kéblat, paraniŋ urip, pati, paraniŋ kabèḥ kaŋ gumĕlar, kaŋ kumĕlip, gumrĕmĕt, wus ora samar parané kabèḥ.
laḥ rasukĕn anané rarasan iki, yèn wus wĕruḥ lan krasa iŋ ndaḷĕm ati, simpĕnĕn kaŋ primpĕn, tĕgĕsé aja kawĕḍaraké mariŋ liyan kaŋ duruŋ mĕruhi iŋ rasa ghaibiŋ allaḥ.
wéjaṅan 2
sinom
1. lahir batin dèn pracaya, kaṛĕpé surasa nĕṅgiḥ, antĕpira kaŋ santosa, baraŋ paréntaḥ hyaŋ widdhi, kaŋ dadi lawan tapsir, aja gumiṅsir iŋ kalbu, samobaḥ mosikira, pasraḥna karṣaniŋ widdhi, mobaḥ molaḥ tan liya karṣaniŋ sukṣma.
2. racutĕn iŋ panarima, iku tataliniŋ éliŋ, liré pambukaniŋ driya, wus tan ana aṅlabĕti, iŋ mĕṅko sun jarwani, lakuné éklas iŋ kalbu, napi pataŋ prakara, lawan isbat iṅkaŋ tapsir, wujud ṅèlmu nurṣuhud napi lan isbat.
3. déné wujud tĕgĕsira, ya ana ananiŋ widdhi, ṅèlmu kawruḥ tĕgĕsira, iṅkaŋ kawruhiŋ hyaŋ widdhi, nur cahya kaŋ sĕjati, iya cahyaniŋ hyaŋ aguŋ, suhud moklis tĕgĕsnya, ya moklisira hyaŋ widdhi, yèku isbat anané kaanan tuṅgal.
4. tuṅgalé kaananiŋ hyaŋ, iya ananira iki, kawruhiŋ hyaŋ kawruhira, cahyaniŋ hyaŋ maha suci, iya cahyanirèki, muklisiŋ hyaŋ kaŋ ṅaluhur, tan ana prabédanya, wruha bédaniŋ atuṅgil, dadi tĕtĕp ananiŋ gusti kawula.
5. maṅkono prabédanira, iya ananira iki, winĕṅku iŋ kodratiŋ hyaŋ, sinandi kaduman takdir, sayĕktiné hyaŋ widdhi, anèŋ kodraté hyaŋ aguŋ, pan kodratiŋ kawula, kumandĕl mariŋ iŋ takdir, éklasĕna yèn wus takdiré tumĕka.
6. aworiŋ gusti kawula, jiwanta lawan hyaŋ widdhi, yèn muṅkir iŋ takdirira, muṅkir titahiŋ hyaŋ widdhi, punika kapir musrik, liré kaṛĕp añĕkuṭu, titinĕn kaŋ sañata, dadi antĕŋ tur pratitis, titisĕna suhud wruhiŋ kodratollaḥ.
7. jaba jro loroniŋ tuṅgal, yèku isbat lawan napi, anadéné kawruḥ lirṇya, kawruhiŋ hyaŋ kaŋ linuwiḥ, yèku datan kaḷĕmpit, waṣkiṭa iŋ uwis duruŋ, tan kilap datan samar, mariŋ wujud kaŋ sayĕkti, dadi tuṅgal pamoriŋ gusti kawula.
8. pan iŋ kono patrapira, séjéné kawruhirèki, sinaṇḍaŋ iradatiŋ hyaŋ, sinĕruŋ aralirèki, tĕgĕsé aṅaḍaṅi, iŋ driyanira kaŋ wanuḥ, lan pañcadriyanira, wèḥ pantog pĕtĕṅiŋ ati, anunulak mariŋ kawaṣpadanira.
9. sarèhné tyas kaŋ santosa, rèhniŋ ṅaral kaŋ ṅrawuhi, ṅaralé jĕnĕŋ manuṅsa, trimanĕn gañjaran widdhi, pan iku wus wajibiŋ, iradatira hyaŋ aguŋ, iŋ kono yèn wus ñata, tĕtĕpé yèn tuṅgal karṣi, yèku maṅka loro loroniŋ ṅatuṅgal.
10. sabaraŋ rèḥ karṣa allaḥ, kudu éklas lahir batin, mobaḥ mosikiŋ kawula, mĕnĕŋ muni muŋ sadĕrmi, anĕmbaḥ lan amuji, tan ana jujug jinujug, kaŋ ñĕmbaḥ kaŋ dèn sĕmbaḥ, wus awor dadi sawiji, iya allaḥ ya kawula jatinira.
wéjaṅan 3
kinaṇṭi
1. déné lakuné iŋ suhud, suhud tĕgĕsé wus moklis, moklis wus tan kaṛĕm doña, tan ana rarasan maliḥ, nora lara lan nora sak, tan suka datan prihatin.
2. kaananiŋ hyaŋ maha guŋ, purba wasésaniŋ moklis, hyaŋ sukṣma ṇḍatĕṅkĕn alam, mayaŋ karya bhumi laṅit, isèn isèniŋ bhawana, manuṅsa tinitaḥ luwiḥ.
3. tan na uni tanpa wujud, kaŋ awujud tanpa uni, tanpa rupa tanpa ganda, ana ganda tanpa nami, kaŋ wujud datanpa ñawa, kaŋ ñawa datanpa osik.
4. ana wĕniŋ tanpa ndulu, panduluné tan mĕruhi, kaŋ mahujud tanpa rupa, ana swara tan kapyarṣi, kaŋ wujud datanpa rupa, kaŋ rupa datan kahèkṣi.
5. kaŋ luṅan datanpa mantuk, kaŋ muliḥ tan luṅa ṅuni, warṇa warṇa titahiŋ hyaŋ, sinaṇḍaŋ titahiŋ widdhi, sami sinuŋ kanikmatan, mupaṅat murahiŋ widdhi.
6. sajati jatiné iku, kaŋ murba misisèŋ dasiḥ, tuṅgal lawan moklisira, tan ana sipat kakaliḥ, wruha bédaniŋ ṅatuṅgal, lahir batin ñatanèki.
7. aḍĕpna iḍĕpirèku, dunuṅiŋ hyaŋ maha luwiḥ, tĕtĕp iḍĕp wus nèŋ sira, aja was sumĕlaŋ maliḥ, lahir kwula batin allaḥ, poma dèn santosèŋ ṅèlmi.
wéjaṅan 4
gambuḥ
1. ki agĕŋ pĕṅgiŋ muwus, sajatiné kaŋ aran allahu, sañatané anané badan pribadi, aja mamaŋ jroniŋ kalbu, tañcĕbna iṅkaŋ akukoḥ.
2. anaṅiŋ kudu kudu, dèn aliṅi ywa katarèŋ sĕmu, kawruhana anané kaŋ nukat ghaib, ghaibiŋ allaḥ puniku, lan rasul kalaṅkuŋ élok.
3. kumpul lan pisahipun, anĕŋ karṣa wisésa puniku, nukat ghaib dadi kasuñatan yĕkti, ananiŋ sira puniku, paḍa kakĕnan iŋ kono.
4. allaḥ mohamad iku, déné tĕgĕsé iṅkaŋ karuhun, allaḥ iku jatiniŋ aran sayĕkti, wujud mokal tĕgĕsipun, jatiniŋ paṅéran kono.
5. déné ta tĕgĕsipun, iṅkaŋ akyan kajariyaḥ iku, sajatiniŋ wawayaṅan ana déniŋ, allaḥ mohamad liripun, sajatiniŋ allaḥ kono. 6. ya sajatiné rasul, anapun kaŋ aran allaḥ iku, pan sarira dé kaŋ aran sarirèki, nĕṅgiḥ rahsa ya rahsèku, datollaḥ iṅkaŋ kinahot.
7. iŋ datolaḥ puniku, ya dat rasul tĕgĕsé ya iṅsun, iṅkaŋ purba jati laṅgĕŋ wisésèki, ya iku sajatinipun, nukat ghaib pan maṅkono.
8. déné dunuṅanipun, iya ana iŋ asma pipitu, kawruhana pan puniku sajatiniŋ, iŋ rupa mohamad rasul, nĕṅgiḥ lamlam kaŋ sawiyos.
9. mata piŋ kalihipun, piŋ tri wajaḥ niyat piŋ patipun, kapiŋ lima iman kapiŋ nĕmé tokid, saréṅat kaŋ kapiŋ pitu, tĕgĕsipun winirahos.
10. lamlam tuṅgal jujuluk, tĕgĕsé mata tuṅgal pandulu, iṅkaŋ wajaḥ tuṅgal kaanan lirṇèki, tĕgĕsé niyat puniku, jĕnĕniŋ kaanan awor.
11. tĕgĕsĕ iman iku, tuṅgal rahsa tokid tuṅgal wujud, tĕgĕsé kaŋ saréṅat pan samĕktaniŋ, kaanan tuṅgal jatiku, ya jatiniŋ salat kono.
12. salat kaŋ limaŋ wĕktu, ṅadĕg jĕnĕṅiŋ kaananipun, déné rukuk tuṅgalé kaanan tuwin, asujud pan mulyanipun, nĕṅgiḥ iŋ kaanan kono.
13. kaanan jatinipun, jati karṣa purba wisésèku, déniŋ luṅguḥ sampurṇa kaanan jati, nĕṅgiḥ tuṅgal rahsanipun, tuṅgaliŋ kaanan iṅoŋ.
14. rahsa jati karṣèku, karṣa wisésa priyaṅganipun, tĕgĕsipun ñata yèn iŋ jasat iku, aṅgoniŋ chak subkhanahu, wataṅala kaŋ kinahot.
15. déniŋ kalipahipun, iŋ ṅĕkak nĕṅgiḥ allaḥ puniku, kalipahiŋ allaḥ pan mohamad tuwin, mohamad kalipahipun, pan adam adam gumantos.
16. mukmin kalipahipun, kalipahiŋ mukmin chak satuhu, kalipahé chak iya chak sayĕkti, aja mamaŋ dèn tuwajuḥ, antĕp kaŋ wus winirahos.
17. déné paḍa lumaku, tĕka kĕḍampalan layu layu, kudu adrĕŋ luṅa mĕkaḥ muṅgaḥ kaji, laḥ apa kaŋ dipun luru, tan liya yĕkti maṅkono.
18. mĕkaḥ madinaḥ iku, kakbatolaḥ wus anèŋ sirèku, yèn wus wĕruḥ ĕrosé kaŋ sĕmbaḥ puji, apamanèḥ pinahèlu, kana kéné ya iŋ kono.
19. kono kéné liripun, apan sampun anèŋ iŋ awakmu, ṅèliṅana kunpayakun kaŋ wus pĕṣṭi, nukat ghaib ghaibipun, laṅkuŋ élok dèn waṣpahos.
20. cĕkaké manuṅsèku, urip anèŋ iŋ doña puniku, iku dadi kajatènira hyaŋ widdhi, sira lan mohamad rasul, iku jatiniŋ hyaŋ manon.
wéjaṅan 5
sinom
1. woŋ anom amĕruhana, dunuṅé kaŋ nukat ghaib, iku putiḥ warṇanira, pan gĕḍéné tanpa sami, tinaṇḍiŋ jagad iki, sanajana piraŋ èwu, kĕṭi jagad druŋ timbaŋ, tĕgĕsé kaŋ nukat ghaib, iku sakiŋ ghaibé kaŋ kasuñatan.
2. istiṅaraḥ tan kajaba, utawa ora umañjiŋ, apadéné tan kawĕdal, nora iŋ jro tan upami, sayĕkti luwiḥ ghaib, ora owaḥ giṅsir iku, laṅgĕŋ tanpa karana, iṅkaŋ jumĕnĕŋ rohani, apa rupanira duk nalikèŋ doña.
3. nora owaḥ sĕbutira, cahya mañcoroŋ nĕlahi, lir ĕmas binakar añar, déné ta iṅkaŋ rohani, iku mohamad yĕkti, caṭĕtĕn jroniŋ kalbumu, anaṅiŋ kawruhana, sahé tékad kaŋ pĕrmati, limaŋ prakara kudu dèn waṣpadakna.
4. sapisan akaton pisaḥ, kapiŋ kaliḥ katon tuṅgil, piŋ tĕlu katon tan pisaḥ, piŋ pat mĕtu katon yĕkti, kapiŋ limané maliḥ, katon mĕtokakĕn iku, laḥ iku dèn rasakna, kaŋ ñjlimĕt mĕmĕt patitis, aja pĕgat rina wĕṅi dèn rasakna.
5. ṅèlmu iku luwiḥ gawat, ora kĕna dèn gagampil, laḥ ta manèḥ kawruhana, asma pipitu puniki, allaḥ iṅkaŋ rumiyin, piŋ ro wujud mokal iku, tlu wujud ilapinya, kapiŋ paté roḥ ilapi, kapiŋ lima pan iya akyan sabitaḥ.
6. piŋ nĕm akyan karijiyaḥ, kapiŋ pituné winarṇi, pan allaḥ lawan mohamad, iku dèn krasa iŋ ati, muṅguḥ artiné yĕkti, allaḥ aran jatinipun, liré kaŋ wujud mokal, paṅéran iṅkaŋ sajati, wujud ilapi jatiniŋ warṇa rupa.
7. kaŋ aran roḥ ilapinya, ya urip kita pribadi, déné ta akyan sabitaḥ, sajatiniŋ ana yĕkti, akyan sarijiyaḥ ki, wayaṅan kaŋ paṣṭi iku, allaḥ mohamad ika, ya allaḥ rasullolahi, allaḥ iku jatiné sarira kita.
8. sarira iku ya rahsa, jroniŋ rahsa datolahi, datolaḥ dat rasulollaḥ, karo pan dadi sawiji, artiné kaŋ sajati, kaŋ apurba laṅgĕŋ iku, purba jati wisésa, sajatiniŋ nukat ghaib, dèn pracaya tan liya yĕkti punika.
wéjaṅan 6
ḍaṇḍaŋgĕṇḍis
1. waṣpadakna ananirèŋ widdhi, panuṅgalé néŋ rasa manuṅsa, samobahé lan mosiké, kalawan wĕniṅipun, yèn wus wĕniŋ anané yĕkti, yĕktiné datan liya, muṅguḥ iŋ hyaŋ aguŋ, ya aworé karṣanira, ambawani solaḥ bawanira iki, ṅlimputi iŋ tyasira.
2. dumunuṅé ana kaŋ ṅarṣani, turu luṅguḥ ataṅi lumakya, iku ta nugraha liré, upama damar murub, urubira paḍa maḍaṅi, kaŋ paḍaŋ iku ñawa, iya kaŋ aṅlimput, sajroniŋ rupa apanas, yèku maṅka ibarat iṅkaŋ wus yĕkti, isbaté ananira.
3. paḍaṅiŋ tyas tĕtĕp isbat yĕkti, napèkna napi iṅkaŋ kisènan, pan iku pamoriŋ gawé, kuwat tumibèŋ éwuḥ, jroniŋ urip antarèŋ pati, pati patitisĕna, kaŋ wĕniŋ dumunuŋ, isbat kaanan iṅwaŋ, basanira napi tiṅgaliŋ hyaŋ widdhi, ĕnĕṅiŋ cipta maya.
4. pañcadriya ĕrèhĕn mriḥ wĕniŋ, sirṇakĕna mamalaniŋ driya, ĕrèhĕn iŋ budi sarèḥ, riris raras rum arum, adrĕŋ butĕŋ kaṛĕpiŋ ati, nasar sasariŋ nala, yèku lampaḥ dudu, pan pamuruṅiŋ kasidan, yèn tan awas éliŋ mariŋ sipat napi, sipaté awasĕna.
5. prabédané lan sawiji wiji, dat wajibul wujud bokmanawa, iŋ kono pinaṛĕṅaké, cipta iṅkaŋ tuwajuḥ, jinaténan jatiniŋ jati, jatiniŋ antĕpira, déra kaŋ maha guŋ, yèku margané kasidan, widagdaniŋ ṅandĕl kumandĕliŋ widdhi, pinandĕŋ kaŋ waṣpada. 6. kaanané sĕdyanĕn iŋ budi, ilapaté iŋ dat kaŋ sañata, pinta pinta paṅgonané, baṅsaniŋ isbat iku, napinira pan napi jinis, yèku maṅka panuṅgal, iŋ ananirèku, napinira isbatĕna, iŋ tĕgĕsé murca tutuṅgalé dadi, prataṇḍaniŋ sihira.
7. nétyanta kaŋ warṇa kaananiŋ, dat sampurṇa nur woriŋ kaŋ warṇa, awĕnĕs tanpa bédané, dat salikun rumuhun, cahya sakiŋ indriya kaki, lintaŋ pañjĕr rahina, éram arum arum, dat mutlak kadi purṇama, dat ṅalimun iŋ sapanuṅgalé kadi, sawarṇa lawan sipat.
8. ilaṅiŋ dat asma pan wahyaniŋ, dat subĕkti lir surya warṇanya, mukṣwaniŋ dat subĕktiné, iŋ cahyaniŋ dat suhud, aṅĕbaki bhuwana kadi, cahya tan ana maḍa, iŋ salaminipun, béda lan paḍaṅiŋ surya, myaŋ paḍaṅiŋ ṛĕmbulan datan amirib, iku paḍaṅiŋ paḍaŋ.
9. kaŋ muṅgèŋ jroniŋ paḍaŋ kaŋ paṣṭi, ananiŋ dat yĕkti ananira, ananira sajatiné, ya ananiŋ hyaŋ aguŋ, solaḥ tiṅkaḥ wus datan kaliḥ, iku isbat kaŋ ñata, napi wus kapuṅkur, iku antĕpiŋ tyasira, mantĕp iku papaḍaŋ maworiŋ ghaib, dèn éliŋ dèn waṣpada.
