aṅgitanipun radèn pañji natarata, iṅkaŋ lajĕŋ santun nama radèn sasrawijaya, iŋ ṅayugyakarta.
1. ḍaṇḍaŋgula
2. utamaniŋ manuswa puniki, kudu budia maraŋ lukita, kaŋ maḍĕp traŋ wèlèḥ wèlèḥ, liŋ liṅĕn lidiŋ sĕmu, sĕmu ñata karoban sakṣi, sakṣi kaŋ tuṅgal karṣa, karṣané ki guru, guru pugĕraniŋ jiwa, jiwa raganira sumaraḥ iŋ kapti, kapti kĕrdyatiŋ sukṣma.
3. woŋ tamarja arjaniŋ dumadi, sakanparan myaŋ antaranira, wus kinawruhan saliré, sĕdéné iṅkaŋ duruŋ, tĕmĕn muṣṭi antĕpiŋ pati, wit kaananiŋ gĕsaŋ, janma sadayèku, sakiŋ adam purwanira, liriŋ adam tanpa kaṇṭa tanpa kaṇṭi, tan gatra tan satmata.
4. datan ĕmbuḥ tur datan amuji, iya iku aran tawaŋ towaŋ, suwuŋ waṅwuŋ sajatiné, allaḥ malékat duruŋ, duruŋ ana kawula gusti, jatiné jaman ora, kidam tĕgĕsipun, ḍiṅin nora kaḍiṅinan, witiŋ jaman manuswa sakaniŋ sĕpi, iŋ kono rasakĕna.
5. supaya wruḥ sakaniŋ ahurip, kaŋ sawĕnèḥ guru amumulaŋ, asalé janma ginawé, nĕmbĕlas wijènipun, mapat mapat piŋ pat sakawit, iku sayĕkti dora, tan pisan tinĕmu, taṇḍa sakṣi nora ana, ana manèḥ saka wadi madi mani, maniṅkĕm yèn maṅkana.
6. yĕkti dudu ṅadam kaŋ miwiti, kalé para manuswa wus ñata, saka ṅadam pinaṅkané, marma saguŋ nak putu, parṣudinĕn asalirèki, dadiniŋ kasuñatan, iṅkaŋ tanpa tutur, sakṣi kodratiŋ paṅéran, luwiḥ bĕnĕr brĕsiḥ titi tur ḷĕstari, campuriŋ kahutaman.
7. maṅké paraniŋ saṅkaniŋ urip, upayanĕn hya ṅanti sumĕlaŋ, aja tumpaṅsuḥ pikiré, luṅané woŋ tumuwuḥ, luwiḥ éwuḥ tur ḍĕmit ruṅsit, gléṭakan sinamparan, sakiŋ gampaṅipun, kaŋ sawĕnèḥ pra ṅulama, rina wĕṅi sawarga pinuṣṭi puṣṭi, iku woŋ kabégalan.
8. kaŋ sawĕnèḥ para paṇḍita di, ahli sorog gĕḍéné samrica, kumilat ṭaṭit warṇané, mijil siŋ nétranipun, iku iṅkaŋ pinriḥ ṅlĕboni, nĕmu ṅalam gumĕlar, woŋ maṅkono tamtu, ciptané sasar katriwal, ana manèḥ oliya ciptèŋ tyas miliḥ, johar kaṇṭaniŋ warṇa.
9. kaŋ gumĕbyar gĕbyar aṅébati, linĕbonan dèn aṅgĕp sawarga, nèŋ kono gusti pamoré, laḥ iku woŋ kalèru, wus kaḍaḍuŋ ginawèŋ jajil, sawĕnèḥ malaḥ ana, wruḥ cahya umañcur, dinaliḥ sipatiŋ allaḥ, iya iku kumpuliŋ kawula gusti, tĕtĕp woŋ kabégalan.
10. ana iṅkaŋ pinañjiṅkĕn mariŋ, sipat kodrat hu utĕg tĕtĕsnya, iku goroḥ satĕmĕné, wit masiḥ bisa ḷĕbur, ajur mumur awor lan siti, pinĕṇḍĕm pajaratan, dinaliḥ nèŋ ṅriku, ana ṅalam jagad jĕmbar, linĕbonan laṅgĕŋ nora owaḥ giṅsir, iku ciptaniŋ sétan.
11. kaŋ sawĕnèḥ sarjana mumpuni, iŋ sasmita ṅèlmu kasampurṇan, allaḥ tuṅgal iŋ jisimé, aṅĕn aṅĕn rinĕṅkuḥ, cinipta hyaŋ kaŋ murbèŋ bhumi, yèn kinĕcapkĕn lésan, uluk salallahu, iku tuṅgal cipta sasar, awit makṣiḥ kasipatan owaḥ giṅsir, tur makṣiḥ kĕnèŋ édan.
12. karṣa murka dayaniŋ paṅgaliḥ, galiḥ éliŋ iku tuṅgal makna, nèŋ aṅĕn aṅĕn ĕṅgoné, marmané iku dudu, sañatané amuŋ ṅratoni, sabaraŋ tiṅkaḥ polaḥ, wit dayaniŋ kalbu, naṅiŋ yèn dèn aṅgĕp allaḥ, tan pakantuk dadi bégalaniŋ urip, iŋ kono rasakĕna.
13. prayogané kawruhana bĕcik, kadayané aṅĕn aṅĕnira, mukhamad darma sapaṅrèḥ, rasul rasaniŋ manus, kabèḥ saka pratigñèŋ pikir, naṅiŋ dudu paṅéran, iŋ sajatinipun, kaŋ sawĕnèḥ pra pukaha, aṅarani tanpa kaṇṭa tanpa kaṇṭi, tan gatra tan satmata.
14. datan kakuŋ tan wanodya yĕkti, napas miwaḥ kaŋ ṅĕbĕki jagad, dèn aṅgĕp allaḥ kaṇṭané, wit datan lara ṅĕlu, tanpa owaḥ tan darbé karṣi, iku dudu paṅéran, kaŋ kasbut pituduḥ, khayun bilarahokinya, pardikané urip tanpa roḥ sayĕkti, napas taliniŋ gĕsaŋ.
15. ana manèḥ manuswa ṅukuhi, ṅalam insan kamil tĕgĕsira, insan manuswa jatiné, kamil sampurṇanipun, sawantahé tĕmbuŋ puniki, manuswa kaŋ sampurṇa, iku makṣiḥ luput, sawĕnèḥ guru mumulaŋ, roḥ ilapi nur mukhamad dèn ḷĕboni, tuṅgaliŋ karusakan.
16. woŋ kalantur cipta tan pamaṅgiḥ, kaḍaḍuŋ ginawèŋ jajalanat, pinuja puji pañjiṅé, lan maliḥ para guru, amumulaŋ patrapiŋ pati, pati titis aṅgĕpnya, samrica binubut, mijil sakiŋ giṭokira, mañjiŋ bayi putra putraniŋ narpati, iku klèru iŋ tékat.
17. iya panitisan jaman maṅkin, para buddha arané manukṣma, dadi piŋ piṇḍo uripé, lan ana mañjiŋ suwuŋ, sajatiné duruŋ ṅlakoni, yèn woŋ kaŋ wicakṣana, sabaraŋ rèḥ putus, tatas paṅawikanira, urip iki sajatiné aran pati, pati iṅaran nora.
18. jumĕnĕṅé kawula lan gusti, allaḥ mukhamad lan rasulullaḥ, wus dumunuŋ sira kabèḥ, iŋ bhumi laṅit pitu, saka ananira pribadi, mukhamad rasulullaḥ, sajĕroniŋ iḍup, wijaṅé laḥ rasakĕna, lirṇya rasul rasanira kaŋ sajati, tuṅgal rasaniŋ sukṣma.
19. iku salaḥ tampa iŋ paṅaṅgit, lamun rasa rasaniŋ paṅéran, nora maṅkono patrapé, paṅéran rasanipun, nora awor lan sira kaki, pamrikṣa paṅandika, myaŋ pamyarṣanipun, nora tuṅgal lawan sira, kuwasané karṣanira hyaŋ kaŋ luwiḥ, sayĕkti tan momoran.
20. laḥ pisahĕn aywa tuṅgal budi, iku ñata paṅaṅgĕpmu riŋ hyaŋ, naṅiŋ allahira ḍéwé, aywa salaḥ paṅawruḥ, dudu paṅraniŋ bhumi laṅit, lan maliḥ wĕkas iṅwaŋ, manuswa kalamun, ḍaku kukuḥ kuwatiŋ tyas, aṅĕn aṅĕn dinaliḥ wujudiŋ gusti, patrapé takokĕna.
21. gusti iku miṛĕŋ tanpa kupiŋ, aniṅali datan mawi nétra, tanpa prabot kuwasané, ṅandika tanpa tutuk, lamun makṣiḥ ṅago piranti, tĕtĕp dudu paṅéran, jroniŋ kuran nutur, kuwasanira paṅéran, marma akèḥ pra ṅulama klèru tampi, pikir cinipta sukṣma.
22. dalil kuran wus amamañcahi, pan maṅkana olamurtasiman, pikialihi tĕgĕsé, tan kacakra hyaŋ aguŋ, muṅgèŋ aṅĕn aṅĕniŋ janmi, sayĕkti dadi batal, paṅawulanipun, walanupus gusti allaḥ, tanpa napas marma yèn dèn aṅgĕp paṣṭi, napas iṅaran allaḥ.
23. iku aja tĕmaḥ kupur kapir, barat dèn aṅgĕp hyaŋ kaŋ murwèṅrat, tĕmaḥ kapiran uripé, kalamun makṣiḥ kukuḥ, aṅukuhi kaŋ wus tinulis, prayoga sumiṅkira, taṇḍa séjé kawruḥ, kawruhiŋ buddha katriwal, awawaton ṅèlmu saka déwaruci, dudu wit sakiŋ ṅarab.
24. mamèt buddha iṅarabkĕn dadi, kawruḥ nasar nuñjaŋ kitap kuran, ginaliḥ suwuŋ rasané, kitap kacakra suwuŋ, nora wĕruḥ ragané sĕpi, cupĕt ciṅkraṅiŋ nalar, priŋ suwuŋ kumĕṇṭuŋ, kĕṇṭuŋ kĕṇṭuŋ muŋ wawaḍaḥ, tanpa isi dèn isèni napas aṅin, pinuji tur sinĕmbaḥ.
25. mantĕp tĕtĕp tur dèn aku gusti, allaḥ iṅkaŋ murba masésèŋ rat, poma ywa maṅkono aṅgèr, wajibé gusti iku, samak basar kadirun ṅèlmi, roṅpuluḥ sipatira, jinèrèŋ ginĕluŋ, yèn tĕtĕp sarjananiṅrat, nora kéwran lahir batin wus kapuṣṭi, patitis duña kérat.
26. wus karasa narambahi budi, adi daya sakanparanira, kinawruhan saduruṅé, lamun micara iḍup, ṅaḍĕpakĕn sakaniŋ urip, urip maṅaṛĕp arja, arjaniŋ tumuwuḥ, wuwuhiŋ kawruḥ kaŋ ñata, kasuñatan saka taṇḍa lawan sakṣi, sakṣi kaŋ wus pratignya.
27. pratigñané narambahi urip, nadyan pati sajĕroniŋ gĕsaŋ, wus kaḍaḍa sakabèhé, myaŋ gampaṅé kĕcakup, cakĕp cukup rasaniŋ ati, gĕgĕtun saka ñata, puṅun puṅun jĕtuŋ, tuŋ tuṅiŋ driya pratéla, salulut siḥ gusti kula lawan dasiḥ, jumĕnĕŋ tanpantara.
28. ḍasar ñata wus tahu ṅlakoni, sakiŋ tĕmĕn yĕkti tinĕmĕnan, ana iŋ kono rasané, woriŋ tyas tanpa catur, datan jalu datan pawèstri, ĕnĕṅiŋ tyas kaŋ wus traŋ, juḍĕg mĕmĕt ñamut, lamat lamat tan katara, rasaniŋ dat wajibul wujud nĕmahi, lir kaŋ wus kasuñatan.
29. kaŋ sawĕnèḥ para sujana di, jroniŋ supĕna dèn aṅgĕp ṅalam, baraŋ apa ana kabèḥ, sĕdéné bhuwana guŋ, jagad cilik sajroniŋ ṅimpi, marmané datan siwaḥ, jroṅiŋ kalbu pĕnuḥ, ṅĕndi bahé jĕro ana, papahésan iŋ duña jro badan maṅgiḥ, cinipta ĕṅgon béñjaŋ.
30. iku salaḥ kĕlantur katarik, cipta nasar balasar kajuraŋ, iku dudu sayĕktiné, déné impèn puniku, sajatiné iṅsun tuturi, kuwasaniŋ paṅrasa, mañjiŋ nétranipun, dayaniŋ kuripanira, mukhamad mukadim mañjiŋ maraŋ ṅèlmi, ṅèlmu iṅkaŋ gumĕbyar.
31. sun jarwani maliḥ woŋ aṅimpi, sayĕktiné jroniŋ nétranira, mamanik iku paminé, kaca bĕṅgala aguŋ, sinèṇḍèkkĕn nèŋ gon sawiji, jaban kaca sañata, kadulu sadarum, baraŋ apa mañjiŋ kaca, yèn jinupuk jroniŋ paṅilon tan kĕni, iku dayaniŋ nétra.
2. kinaṇṭi
1. lawan maliḥ ana guru, mumulaŋ mriŋ anak murid, ana rupa catur warṇa, iṛĕŋ abaŋ kuniŋ putiḥ, béñjaŋ praptaniŋ sakarat, kinèn miliḥ salaḥ siji.
2. lamun putiḥ wijilipun, sakiŋ nétra grana paṣṭi, iku kaŋ dèn aṅgĕp ñata, samya kinèn atut wuri, tamtu mañjiŋ mariŋ wisma, nira laṅgĕŋ tanpa wilis.
3. iku woŋ ṅèlmuné kuṭuŋ, darbé kawruḥ muŋ sacuwil, wus ṅaku dadi sarjana, jumĕnĕŋ guru mamarid, maraŋ para puṅguŋ muḍa, ṅrasa wus putus patitis.
4. sajatiné duruŋ wĕruḥ, ṅawur kawoworan éblis, lawan maliḥ asriŋ ana, pra ṅulama ṅaku wasis, rokyatullahi yèn néndra, wruḥ iŋ rupanya pribadi.
5. mawa prabasmu umañcur, lir wulan purṇamasidi, iku iṅaṅgĕp paṅéran, kaŋ murba masésèŋ bhumi, iku woŋ katunaniŋ tyas, luput panampaniŋ dalil.
6. awit ciptané woŋ iku, allaḥ maṅgon jroniŋ pikir, sipaté lir rupanira, tan siwaḥ lawan kaŋ muji, laḥ iku saṅsaya ṅlampra, déné allaḥ darbé warṇi.
7. lawan maliḥ ana guru, yèn béñjaŋ tumĕkèŋ jaṅji, ana rupa kaŋ sañata, ya rupanira pribadi, sarta gawa panĕṅĕran, alip mutaklimun wakit.
8. sawénèḥ ana woŋ putus, aṅukuhi ṅèlmu jati, sahadat kaŋ sadu tanpa, wĕtuniŋ napas sakalir, iku dèn arani salat, kaŋ maṅkono datan yukti.
9. ṅaku aku tanpa kusur, salusuran cipta silib, ñilib kaléban babasan, basa kaŋ nora patitis, yèn wicakṣanèŋ pamawas, nora aṛĕp nora mélik.
10. yèn jatiné sadat iku, lahillaha illallahi, laḥ kapriyé jarwanana, iku sadat kaŋ sajati, yèn lumrahé jaman maṅkya, sadat maṅkono tinampik.
11. iya iku woŋ kĕpahuŋ, sahadat kalimaḥ kaliḥ, tinampik sinampar sampar, nora pisan dèn kawruhi, sakiŋ aṅèlé jarwanya, cocogé kalawan sakṣi.
12. santri iṅkaŋ mĕndĕm kulhu, rina wĕṅi muji dikir, ya lahillaha illollaḥ, cinipta sajroniŋ ati, ṅoṅgroŋ oṅgroŋ pupujian, mriḥ kinasihan hyaŋ widdhi.
13. widdhi adiniŋ tumuwuḥ, tan muwuhi mriŋ woŋ muji, añuda mriŋ woŋ kaŋ siya, laḥ rasakna kaŋ patitis, ywa lir santri panaraga, napi isbat kaŋ pinuṣṭi.
14. yèn napi allaḥ liniru, wujudnya santri pribadi, lamun isbat wujudira, iŋ jĕro iṅkaŋ hyaŋ widdhi, iku lakuniŋ dubilaḥ, lanat kawoworan pĕri.
15. lawan maliḥ ana guru, amaṅéran maraŋ paṣṭi, suwuŋ waṅwuŋ nora ana, tur duruŋ putus iŋ wèṣṭi, iku woŋ pituŋ bĕdahab, kupur kapir ṅrĕribĕdi.
16. ḷĕḷĕṭĕg ḍuṣkartèŋ iḍup, tan pantĕs dipun luluri, marma saguŋ pra sujana, yèn puruhita mèt ṅèlmi, layaŋ iki takokĕna, jawané apa nimbaṅi.
17. salaḥ siji paṣṭi cuṇḍuk, lamun makṣiḥ paḍa iki, laḥ agé sira mundura, muŋ aja ñĕrikkĕn ati, marma jaman sapunika, guru pira pira ṅèlmi.
18. lagi wruḥ mukhamad rasul, allaḥ aṅĕn aṅĕn dadi, guru wus sinĕmbaḥ sĕmbaḥ, apĕsé dèn aji aji, kĕkĕṭokan gulu ayam, sĕga wuduk mori muslin.
19. sajatiné duruŋ wĕruḥ, iŋ ṅèlmu kaŋ ghaib ghaib, muŋ èlu èlu kéwala, jroniŋ pati duruŋ uniŋ, bocaḥ cilik bahé ana, bisa dadi guru jati.
20. aṅgĕré tan dèn du tĕlu, tinilikan dina béñjiŋ, yèn trima amuŋ carita, nasar ṅawur tanpa sakṣi, iṅsun saguḥ ajajarwa, tampa lawon waṛĕg pitik.
21. naṅiŋ yèn tinanya iṅsun, kapriyé rasaniŋ pati, yèn awèḥ sĕmaya béñjaŋ, laḥ poma golèka kaki, guru kaŋ bisaṅsuŋ pĕjaḥ, tinupikṣa jroniŋ urip.
22. naṅiŋ maṅkya para guru, araŋ iṅkaŋ ṅaṅgo sakṣi, tansaḥ crita ṅayawara, warahé aṅupa pamriḥ, nora wĕruḥ sajatinya, trapsila larapiŋ pati.
23. aja sira dadi guru, larapiŋ ṅèlmu sajati, tĕgĕsé guru punika, pahugĕraniŋ ahurip, maṅaṛĕp aṛĕp iŋ pĕjaḥ, kaŋ jajaḥ kawruḥnya ṅĕntiŋ.
24. tinakonan anak putu, bisa maṅsuli patitis, kaŋ kalawan kasuñatan, ñataniŋ rèḥ baṅsa pati, lamun woŋ sarjanèŋ jagad, nora kéwran amaṅsuli.
25. lan maliḥ sun wus kapraṅgul, para santri ahli ṅèlmi, baraŋ baraŋ wujud allaḥ, bhumi laṅit dadi gusti, laḥ iku kumpruṅiŋ tékat, gandarwo momor lan janmi.
26. satĕṅaḥ ana woŋ muwus, ratu dèn aṅgĕp hyaŋ widdhi, gusti allaḥ nora ana, wujudnya śri narapati, yahiku woŋ salaḥ ucap, gasruḥ kawoworan pĕri.
27. yèka woŋ cĕguk truwilun, loño ucapiŋ picaci, supaya pinadonana, kaya maduniŋ pulisi, kacara trapiŋ prakara, wus paṣṭi nora pinaṅgiḥ.
28. kaŋ sawĕnèḥ ana jamhur, tutur mubĕŋ maraŋ murid, lamun tinakonan patrap, siŋ pati datan patitis, ṅawur ṅawak ruwag ruwag, sakṣiné lamun wus mati.
29. ĕmbuḥ ĕmbuḥ yèn binuru, ĕmbuḥ yèn wus praptèŋ ṅakir, bisa muliḥ maraŋ ora, tur amĕṅku ṅalam sahir, dudu swarga lan naraka, ṅaku wruḥ kaṇṭaniŋ pati.
30. sawĕnèḥ ana woŋ putus, lapaliŋ kitab binudi, tapsir awal akir wignya, ṅakahid naholatasrib, kitab bajuri jurmiyaḥ, yayaḥ putus liriŋ dalil.
3. asmaradana
1. wontĕn sarjananiŋ kyayi, guru putus nalarṇya traŋ, ambĕgé kaya guprĕmèn, mumpuni susilarjèŋ rat, rad jagad tanpa sama, ṅèlmuné winoran palsu, mulaŋ anak muridira.
2. napsu pataŋ prakara wit, linuṅguhakĕn sarira, iŋ pañcadriya rasané, malaḥ mujudaké rupa, iṛĕŋ baŋ kuniŋ séta, kaṇṭi duña ṅakiripun, winorkĕn iŋ malahékat.
3. iku kaŋ bisa nuluṅi, nuntun mañjiṅkĕn riŋ johar, anèŋ wudĕl paṅgonané, trakaḍaŋ pañcĕriŋ nétra, iku kaŋ linĕbonan, ginaliḥ sawarga aguŋ, iku guru siya siya.
4. cupĕt nalaré sacuwil, kumpruŋ pĕṅuŋ guru désa, pantĕsé jagoŋ nèŋ ṅambèn, ṅĕḍaṅkraŋ maṛĕp maṅétan, sinébèŋ putra wayaḥ, grudag grudug sabĕn dalu, aṅgĕpé kaya paṇḍita.
5. sĕṅguhé kaya pulisi, gĕḍag gĕḍig pandiraṅan, kumawasis wicarané, cara carané cinakra, padésan tanpa krama, ṅèlmu dèn go agul agul, gugulaŋ kaŋ tanpa taṇḍa.
6. kaŋ dèn upaya kĕṇḍuri, pitik putiḥ ḍara ḍara, lawon lan ḍuwit pamrihé, marma maṅké wus tétéla, karṣané jĕŋ paréntaḥ, guprĕmèn kaŋ wus kasĕbut, pinacak iŋ sĕtatsĕblat.
7. pinacuhan dèn gantuṅi, pahukuman sikṣa pakṣa, awit pra guru bujuké, mriŋ woŋ tani désa désa, kaŋ tan wruḥ iŋ duduga, prayogané muŋ sadumuk, ciṅkraŋ nalaré katunan.
8. truwilun kĕpara sugiḥ, ki guru sukaniŋ driya, muruk tani pamijaṅé, doṅa japamantra buddha, ambĕgé lir sujana, kaŋ wĕruḥ maraŋ pakéwuḥ, sajatiné puṅguŋ muḍa.
9. woŋ sasar kagawèŋ jajil, bĕlis kaŋ sipat manuswa, katara iŋ pamijaṅé, sumĕṅguḥ sumaguḥ tĕraŋ, limpadiŋ kasusastran, sastra rajaḥ ṅarab ḍusun, dinum dadi kaslamĕtan.
10. arjaniŋ urip basuki, saka sarat jimat jimat, iku traŋ mrataṇḍakaké, kumpruŋ pĕṅuŋ woŋ katriwal, tékat samar gluyuran, warṇa maṅsi ciptèŋ kalbu, bisa taṅguŋ kaslamĕtan.
11. laḥ iku tékatiŋ kuṭip, kéwan kaŋ tanpa paṅéran, sajatiné ran woŋ ṅlamoŋ, mamaganiŋ dora cara, duduga cakrabawa, bawané lalantiḥ ḍusun, marma saguŋ pra satriya.
12. lamun guguru sujanmi, ṅupayaa kaŋ wus pana, pana pramanĕm taṇḍané, kawĕca anèŋ wicara, paṅracutiŋ sasmita, jawa ṅarab kaŋ wus kagluŋ, duga prayoga wéwéka.
13. lamun tyasira maṅarti, nitèni janma danurja, paṣṭi wĕruḥ sañatané, aja sira aṅgĕgulaŋ, yèn duruŋ wruḥ iŋ tama, tama tamaniŋ pituduḥ, duhkita tañcĕpiŋ nala.
14. aṅèl woŋ nĕdya mumurid, ṅupaya paṭiniŋ rasa, rasaniŋ hyaŋ kawulané, bédaniŋ allaḥ manuswa, kumpul pisahiŋ rupa, rupa kèḥ kaŋ momor sambu, iku jaman sapunika.
15. pintĕré amuŋ sacuwil, lagi allaḥ lan mukhamad, rasul kaŋ anèŋ jisimé, paṅrasané wus sampéka, nir déya cipta rasa, rasaniŋ hyaŋ kaŋ maha guŋ, paṅakuné pudyotama.
16. ambĕg paṅulaḥ yodantiŋ, kawruḥnya kaṇṭi dèn prada, paṅaḷĕmbana luhuré, linaraṅan winaḷĕran, mriḥ kawĕntar kajwara, yahiku lakuniŋ wĕḍus, bluḍus tan wĕruḥ wéwéka.
17. ana manèḥ para wĕgig, kukuḥ kyat pamrĕsiŋ tékat, ṅukuhi lapal uniné, waman ṅarapa napsaha, pakak ṅarapalaha, laḥ iku pardikanipun, siŋ sapa wruḥ iŋ sarira.
18. tĕmĕn tĕmĕn wruḥ hyaŋ widdhi, dadi badané rumaṅsa, ṅaku allaḥ sajatiné, yèn binurua traṅginas, aṅĕn aṅĕn pinuja, ḍinaku dadya hyaŋ aguŋ, wus prasasat palgunada.
19. yahiku patrapiŋ kuciŋ, miṇḍik miṇḍik aṅon ulat, aṅgolèki woŋ kaŋ boḍo, sinajarwa pinapajar, ujaré ṅèlmu sasar, sarwa saru sasar susur, slusuran lir rajakaya.
20. cacat woŋ tumitaḥ urip, kuraŋ pamrĕsiŋ tyas ñata, ṅèlmu paṅolaḥ yodané, manraṅiŋ kartisampéka, susila parikrama, mumpuni mahambĕg sadu, danurjaniŋ kawruḥ mulya.
21. mulya sakaniŋ maṅarti, wus gumĕlar riŋ kaanan, pañcĕriŋ urip jatiné, prasasat samodrasmara, baraŋ apa tumĕka, umañjiŋ dayaniŋ kalbu, iku trapiŋ paṅawikan.
22. woŋ nĕmbaḥ maraŋ hyaŋ widdhi, nora sipat nora kaṇṭa, nora warṇa nora ĕṅgon, nora suwuŋ nora mamaŋ, dudu pikir myaŋ napas, dudu ĕroḥ dudu wujud, nora suwuŋ paṣṭi ana.
23. anané saka kaŋ abdi, dudu rasané manuswa, laḥ kapriyé iŋ patrapé, woŋ nĕmbaḥ maraŋ hyaŋ sukṣma, sĕdéné malahékat, nora béda wujudipun, aṅèlé yèn wus pratéla.
24. gampaṅé yèn duruŋ uniŋ, ĕniŋ pamawas tanpa was, wus waṣpada wasésané, hèḥ sahisiné rad raya, saguŋ para sarjana, ywa gumampaŋ dadi guru, yèn duruŋ wruḥ sandiniŋ hyaŋ.
25. sandiniŋ hyaŋ nukṣmèŋ wadi, kasuñataniŋ sasmita, mĕmĕt ñamut ñamut kamot, winot sahir kabir sirṇa, kabir sahirṇya musna, kosok bali liru sambut, iku trapiŋ paṅawikan.
26. manuswa iṅkaŋ sayĕkti, dadi liŋ aliṅiŋ jagad, laḥ iku kaŋ wus prasajèŋ, sakṣi manakṣèni kaŋ dat, datiŋ manuswa ñata, sampurṇa ananiŋ makluk, sakanparané pratignya.
27. kacakup jumbuḥ kapuṣṭi, trapiŋ pati nora samar, wit sakiŋ kasuñatané, tan sumĕlaŋ ghaibiŋ tyas, rumĕṅgĕp iŋ pamuja, mujyastutiniŋ pakéwuḥ, nora éwuḥ tur waṣkiṭa.
28. lamun wus tĕraŋ pambudi, nora kéwran kĕkumpulan, lawan para gĕḍé gĕḍé, wus maṅkono tyas tétéla, traŋ budi kanugrahan, iŋ ṅèlmu kaŋ alus lurus, nukṣma tan kacakrabawa.
29. bawaniŋ tyas wus maḷĕtik, sasat mabur tanpa ĕlar, wit wicakṣana driyané, nur kalbi kaŋ anarambaḥ, pañcadriya sabadan, pañjiŋ wĕtuné tan kéguḥ, susilarja manraŋ cipta.
30. yèn guguru sira béñjiŋ, sawisé sira winijaŋ, wijaŋ wijaṅané kabèḥ, kaŋ kaḍaḍa iŋ tyas paḍaŋ, allaḥ mukhamad rasa, myaŋ badan sakaliripun, tumulya sira takona.
31. kapriyé kaṇṭaniŋ pati, paran rasaniŋ agĕsaŋ, urip kapriyé patrapé, laḥ ṭolé ginawé apa, woŋ urip anèŋ duña, pati iŋ akhérat bésuk, akhérat ginawé apa.
32. priyé prĕluné kaŋ paṣṭi, lawan maliḥ tatakona, mriŋ gurumu kaŋ wus walèḥ, asuŋ ṅèlmu maraŋ sira, apa sababé baya, piwulaŋ kaŋ wus kacakup, yèn néndra sirṇa sadaya.
33. iku dayaniŋ punapi, apa muḍun apa muṅgaḥ, yèn muḍun priyé kaṇṭané, yèn muṅgaḥ priyé trapira, kaŋ muṅgaḥ kaŋ tumĕḍak, dèn arani apa iku, déné dahat saka mokal.
34. nora susaḥ sira kaki, takon jumĕnĕṅiŋ allaḥ, muŋ wĕruha kuwasané, kaŋ kagaḍuḥ maraŋ sira, gĕḍéné tanpa sama, ḷĕmbut tan kĕna jinumput, sakiŋ ruṅsitiŋ sasmita.
35. lan maliḥ yèn sira ṅimpi, wruḥ iŋ baraŋ kahélokan, iŋ jro badan ana kabèḥ, iku mrataṇḍani apa, dèn asmani rèḥ paran, dayaniŋ punapa iku, kabèḥ paḍa takokĕna.
4. sinom
1. lan maliḥ pitutur iṅwaŋ, lamun sira dadi murid, kaŋ bisa pratamèŋ wéka, wéwékaniŋ kawruḥ ghaib, patakon kaṇṭi titi, surti ṅati ati tyasmu, tumañcĕpiŋ papaḍaŋ, iṅkaŋ naṇḍani tyas wĕniŋ, ṅiŋ tan wĕnaŋ kalamun duruŋ kakĕnan.
2. kĕnanya sakiŋ pracaya, pinarcayèŋ déniŋ sakṣi, sakṣi iṅkaŋ nuṅgal karṣa, baṅkit ñañampahi silib, nora kilap kaḷĕmpit, kanaŋ karṣané ki guru, guru kaŋ nuṅgal misaḥ, tuṅgalnya kaŋ séjé jinis, niṣkarèŋ rat ḍalaŋ sajati wĕruha.
3. iku pikir kaŋ tan samar, waṣkiṭa kĕcapiŋ wadi, naṅiŋ wĕruḥnya ki ḍalaŋ, wit akil balègiŋ pikir, kira kira maṅĕntiŋ, pintĕr sakaniŋ sinahu, marma dudu paṅéran, ywa dèn aṅgĕp jĕnĕŋ gusti, sajatiné kaŋ winastan johar awal.
4. marma saguŋ pra sarjana, kaŋ mantĕp tĕtĕp nastiti, titisiŋ rèḥ pĕjaḥ gĕsaŋ, kasaṅsaŋ madyaniŋ bhumi, rad jagad kaguluŋ ṅliŋ, tumruniŋ manuswa sadu, lan maliḥ sun wawarta, yèn ana guru kaŋ luwiḥ, suŋ wasita jisimé ginawa luṅa.
5. luṅa ṅaliḥ iŋ ṅalam rat, rad jagad kawĕṅku siji, mañjiŋ jiwané sadaya, paṅrasa sampurṇèŋ pati, laḥ iku tutur kidip, goroḥ growaḥ woŋ kĕtawur, ṅawur kuwur tyas samar, duruŋ wruḥ larapiŋ pati, kaŋ patitis tan maṅkono aṅgĕpiŋ tyas.
6. kalamun guru sañata, manraṅiŋ cipta nastiti, nĕtĕpi daliliŋ kuran, mutu bab la muta paṣṭi, lapal wus dèn wĕrdèni, mati sajĕroniŋ iḍup, urip sajroniŋ pĕjaḥ, rasakna prakara iki, patrapiŋ rèḥ papaḍaŋ kaliṅan paḍaŋ.
7. yèn woŋ danurja waṣkiṭa, awèḥ saṇḍaŋ woŋ kaŋ sugiḥ, awèḥ payuŋ woŋ payuṅan, aṅgéṇḍoŋ woŋ nuṅgaŋ joli, suŋ tĕkĕn dalan wradin, woŋ mĕlèk tinuntun tuntun, sinuŋ dalan kaŋ paḍaŋ, woŋ miṅgir tinarik miṅgir, laḥ kapriyé tutur iki rasakĕna.
8. nadyan sudra dama papa, janma kaŋ wĕruḥ iŋ wadi, wadi wadiniŋ widyaṣṭa, sayĕkti janma sajati, ywa sumlaŋ iŋ paṅèṣṭi, aṅgĕpĕn lantaran kawruḥ, muwuhi antĕpira, tĕpa tĕpaniŋ tyas sami, amijèni jumĕnĕṅiŋ gurunira.
9. sasat sudaranta tuṅgal, tuṅgil wor budi sawiji, wajib iku kinurmatan, jinuñjuŋ iŋ sawatawis, naṅiŋ yèn duruŋ sami, ywa loño sabaraŋ wuwus, tĕmahan kabégalan, kaloŋ linoṅan iŋ kupiŋ, iya iku tinĕmu dadi kagunan.
10. sapira yèn woŋ sarjana, kawruḥ kaŋ wus dèn tampani, nora muṅkir asalira, séjé woŋ kaŋ tunèŋ budi, pintĕr sakaniŋ aji, dèn aku nora guguru, umuk sakiŋ supĕna, papariṅé sunan kali, iya iku cipta kawoworan wisa.
11. ambĕgé waṣkiṭèŋ ḷĕmbat, sakiŋ kawruḥ tanpa pardi, sinihan iŋ hyaŋ kaŋ murba, supaya woŋ sami uniŋ, onĕŋ tĕmahan asiḥ, siḥ lulut dumadi pulut, muluti woŋ katriwal, sasar tyasnya sami wĕdi, pamrihiŋ tyas wĕktuniŋ arta bakṣana.
12. pan kinarya kasugihan, ṅèlmuné ginawé pokil, ṅakal akal ṅrékadaya, yayaḥ durṣilèŋ pambudi, batiné duruŋ uniŋ, yahiku rupaniŋ puṅguŋ, kaguṅguŋ woŋ cakṣana, sajatiné sĕpa sĕpi, sasat sapi tan wruḥ iṅkaŋ murwèŋ titaḥ.
13. purwa wiwitiŋ agĕsaŋ, nora pisan dèn kawruhi, tansaḥ muŋ dina akhérat, pinuṇḍi pinuṣṭi puṣṭi, paṣṭi bakal nĕmahi, sabaraŋ pituduhipun, ṅakhérat bakal mulya, wit sakiŋ wus dèn kawruhi, anèŋ duña tinĕbus sabar darana.
14. naṅiŋ kaŋ tyas smu pramana, makna myaŋ kĕcapiŋ laṭi, katara iŋ solahbawa, bawaniŋ paṅucap wĕniŋ, pra ṅulama iṅkaŋ wis, tanaḥ jawa ṅalor ṅidul, ṅétan ṅulon wus paḍa, kaŋ kasup kalokèŋ bhumi, ṅétan toyawaṅi ṅulon tanaḥ séraŋ.
15. warata sun muruhita, akèḥ kaŋ kaliru tampi, kitab kuran tan pratéla, ṅulama kaŋ bisa ṅaji, ṅawag kaworan kuciŋ, kaŋ dèn aṅgo ṅèlmu kuwuk, gaṇḍuli kawruḥ buddha, dèn liḥ tĕmbuṅiŋ ṅarabi, iya iku patrapé wig tanaḥ jawa.
16. warṇa warṇa piwulaŋnya, lir caritaniṅsun iṅkaŋ wis, sawĕnèḥ ana kaŋ soraḥ, sakiŋ parimbon sĕmahil, paṅakuné siŋ ṅiṅgil, tiban sakiŋ hyaŋ maha guŋ, trakaḍaŋ maliḥ ana, wité dadi guru jati, ṅimpi muṅgaḥ mriŋ laṅit biru sap sapta.
17. ambĕḍaḥ mumbul iŋ wiyat, nèŋ ḍuwur nampani waṅsit, wusnya traŋ nulya mimijaŋ, wijaṅané ṅèlmu ghaib, supaya antuk pokil, iku trapiŋ tikus clurut, tan pisan magĕpokan, patrapiŋ kawruḥ kaŋ yukti, suprandéné kanan kériŋ kèḥ woŋ prapta.
18. dadya pakumpulaniŋ wran, tani tani dèn jarwani, kaŋ tan wruḥ duga prayoga, iku iṅkaŋ dèn sĕnĕṅi, guru maṅkono kaki, mèmpĕr wawa iŋ wana guŋ, sipaté kaya janma, naṅiŋ tan wruḥ kaŋ patitis, aja sira pracaya ṅèlmu maṅkana.
5. mĕgatruḥ
1. kaŋ sawĕnèḥ ana mukmin suŋ pituduḥ, iŋ ṅèlmu sampurṇèŋ pati, kaŋ patitis paranipun, niṅiŋ pralaya umañjiŋ, sadat sĕkaratiŋ mahot.
2. miwaḥ puji tatkalañarṣa rinacut, nèŋ lawaŋ sawiji wiji, anadéné pujinipun, laḥ iku mukmin niwasi, tan yogya dipun pitados.
3. iya iku woŋ pracaya maraŋ wuwus, wuwus iṅkaŋ dakik dakik, rèhniŋ sinalinan tĕmbuŋ, woŋ jawa kaŋ duruŋ uniŋ, basa ṅarab dadi élok.
4. mélok mélik ĕmèliŋ caṅkĕm sinĕṅguḥ, ñataniŋ kawruḥ kaŋ luwiḥ, sakiŋ cupĕtiŋ paṅgayuḥ, yayaḥ kabĕntur riŋ waṅsit, wasita kawruḥ kaŋ ṅlamoŋ.
5. omoŋ omoŋ tutur iṅkaŋ wus kalantur, tur tuturunan jaman wis, wiwisikaniŋ pra guru, alam buddha tanpa sakṣi, tĕmaḥ ṅaliṅi lalakon.
6. kahélokaniŋ agĕsaŋ kaŋ kalantur, ana manèḥ ṅulama di, ambaboni muruk kawruḥ, mruhkĕn trap pati patitis, sorogiŋ wayaṅan tinon.
7. mahyèŋ wujud putiḥ mawĕnĕs tur mulus, sarupa iṅkaŋ darbèni, gumawaŋ cahya ṅuṅuwuŋ, nèŋ awaŋ awaŋ kahèkṣi, ginuluŋ paṛĕk wigñañjog.
8. jajar liṅgiḥ iku dèn aṅgĕp panuntun, mriŋ kamukṣan kaŋ patitis, titisiŋ tyas linalarut, kinarya gaṇḍulan pati, mañjiṅkĕn swarga kinahot.
9. iya iku guru kaŋ maguru luput, paḍa bahé salaḥ tampi, suprandéné woŋ kaŋ kumpruŋ, maṭĕm tyas tinohan pati, tĕtĕp sumugun pitados.
10. nora wĕruḥ dayaniŋ nétra kaŋ dulu, ñipta apa bahé kèkṣi, rurupan kaŋ gumun gumun, kagĕḷĕŋ nirmayèŋ batin, nèŋ kono sayĕkti katon.
11. nadyan mĕkaḥ madinaḥ cinipta wujud, paṣṭi nèŋ kono kahèkṣi, sakiŋ dayaniŋ pandulu, ripta ciptaniŋ paṅaṅgit, aṅgitiŋ guru sajatos.
12. dupi wĕruḥ guru sajati sru gumun, ṛĕsĕp sĕnĕŋ ĕnĕŋ ĕniŋ, aṅĕn aṅĕné aṅgugu, pracaya kaŋ dèn tiṅali, kukuḥ kuwat wit tyas kamot.
13. iya iku taṇḍa woŋ ciptané kuṭuŋ, rurupan iṅkaŋ kahèṣṭi, yèn guru kaŋ ambĕg sadu, moñcol cipta wig maḷĕtik, cakĕp cukup amahido.
14. nora kéguḥ sarambut pinara sèwu, dudu yèn makṣiḥ kahèkṣi, dudu lamun makṣiḥ suwuŋ, déné kaŋ katon mawarṇi, dayané paṅrasaniŋ woŋ.
15. cipta ripta sakiŋ nétra dayanipun, tĕp tinĕtĕpan kaŋ uniŋ, duruŋ niŋ jĕnĕṅiŋ guru, guru pugĕraniŋ jisim, duruŋ jajaḥ duruŋ taṅgon.
16. marmanira dayaniŋ sorog puniku, kadarbé woŋ kaŋ miranti, yèn woŋ wuta nora wĕruḥ, laḥ iku pikiṛĕn kaki, ywa pracaya wujud katon.
17. ywa pracaya maraŋ wujud iṅkaŋ suwuŋ, lamun sira duruŋ uniŋ, ṅlakoni wĕruḥ iŋ suwuŋ, myaŋ ṅlakoni wruḥ iŋ isi, isèn isèniŋ tyas taṅgon.
18. ĕṅgon duruŋ ĕṅgon uwis wus kacakup, balik paṅgonan sahiki, golèkana kaŋ katĕmu, muwuhi patrapiŋ pati, urip ṅaṛĕp aṛĕp kahot.
19. yèn sujanma nir déya manraŋ pakéwuḥ, guruniŋ pati woŋ mati, guruniŋ urip woŋ iḍup, aḍĕpiŋ kaanan jati, anané mĕṅku sapakon.
20. séjé lawan janma rucaḥ ṅroñcé ṅèlmu, pintĕr guluŋ guluŋ gilig, sipat roṅpuluḥ ginĕluŋ, bisa dadèkakĕn siji, iku pintĕriŋ gandarwo.
21. kaŋ sampéka añjèrèŋ sipat roṅpuluḥ, lakuné sawiji wiji, kosok baliné kadulu, kacakup cakĕp ñukupi, prabotiŋ urip wus mélok.
22. dé woŋ cubluk patrapiŋ ṅèlmu kalimput, siḍakĕp suku tuṅgal niŋ, babahan nawa tinutup, pañcadriyané pinatin, tikṣwaniŋ grana dèn ilo.
23. itu justak tiḍak sĕkali bĕrtĕmu, woŋ buddha ṅèlmuniŋ riṅgit, ṅèlmu buddha kaŋ wus bawuk, dudu agamaniŋ nabi, salallahu urip maṅgon.
24. yèn jĕŋ nabi mukhamad mustapalahu, manurat kuran jarwani, manuswa sipat roṅpuluḥ, ginĕlar ṅupaya pamriḥ, mriḥ sampurṇa tur waṣpahos.
25. yèn tinutup batalkĕn islamiŋ manus, ṅowahkĕn napas tan kéṅiŋ, pamyarṣa pandulunipun, karṣa paṅandika sami, kinèn mamriḥ traŋ mañcoroŋ.
26. pira pira kitab kitab kuran nutur, mriŋ woŋ kaŋ tuna iŋ budi, yèn tan mudyayu tan wĕruḥ, kaliṅan sasariŋ pikir, kira kirané woŋ jomblo.
27. jomblo suwuŋ malompoŋ lir péndaḥ cumpluŋ, rinubuŋ iŋ laḷĕr wilis, jĕr paṅananiŋ kuwaṅwuŋ, kĕkuwuṅé tan pinikir, kira kirané kajlomproŋ.
28. nétrañandik maṇṭĕḷĕŋ socèŋ priŋ pĕtuŋ, pĕtĕŋ patiné mĕtĕṅi, iŋ urip kaŋ nora wĕruḥ, nora ṅruṅu wosiŋ pati, uripé bahé tan éñjoḥ.
29. aja manèḥ pati duruŋ tahu wĕruḥ, prandéné ṅaruḥ aruhi, woŋ boḍo nora wruḥ ṅèlmu, paṅrasané sasar sisip, kaŋ akèḥ janma momoyok.
30. iŋ ṅayogya surakarta myaŋ madiun, sapaṅétan atas sami, kawruhiŋ ṅèlmu mèḥ jumbuḥ, para jamhur sriŋ nanampik, ananacad woŋ kaŋ boḍo.
31. kèḥ padudon babantahan udur ṅèlmu, supaya woŋ kaŋ prihatin, nuli éṅgala maguru, ḍèwèké nampani pokil, sĕga wuduk ayam babon.
32. ana manèḥ sarjanambĕg putus ṅèlmu, mulaŋ muruk maraŋ murid, luṅguḥ iŋ sagara gunuŋ, mĕkaḥ madinaḥ nèŋ jisim, ati pitu jantuṅiŋ woŋ.
33. lamun mulaŋ tarékat dalaniŋ kawruḥ, klimaḥ tayibaḥ pinuṣṭi, lahillaha illollahu, dèn ubĕtkĕn ḍaḍanèki, ḷĕbu wĕtuné kabatos.
34. puji napas tan kĕna pĕgat sahiḍup, wĕtuné muni allahi, ḷĕbuniŋ napas muni hu, iku iṅkaŋ dèn kĕñcĕṅi, dadi sampurṇaniŋ mahot.
35. ana manèḥ kawruḥ buddha makṣiḥ klaku, sastrajéndrayuniŋ budi, dadi paṅruwatiŋ diyu, jaré manuswa wruḥ paṣṭi, patiné sirṇa krahayon.
36. sastrajéndrayuniṅrat sastra ha suku, hu utĕk pañjiṅiŋ ghaib, suprandéné kèḥ woŋ nuṅsuŋ, yèn wus winĕjaŋ pinuṇḍi, sasat woŋ nĕmbaḥ tĕpékoŋ.
37. laḥ prayoga kucirana bahé bagus, kloṇṭoṅan adol sĕmbagi, tèḥ taŋ kuwèḥ gula batu, iŋ maṅsa cèmbèŋ mumuji, mriŋ klĕṇṭèŋ goné ṅèlmu wos.
38. ana manèḥ guru muwus tiru tiru, waraṅka mañjiŋ iŋ kĕris, kĕris mañjiŋ wraṅkanipun, naṅiŋ tan bisa nakṣèni, iku tĕmahané goroḥ.
39. baraŋ wuwus baraŋ ṅèlmu baraŋ laku, yèn woŋ putus ṅaṅgo sakṣi, ñatané iṅkaŋ kawuwus, wiraŋ dèn éraŋ éraṅi, dènnya dandani mariŋ woŋ.
6. asmaradana
1. hèḥ saguŋ kaŋ samya myarṣi, surasaniŋ srat punika, putra wayaḥ iṅsun ḍéwé, aywa ṅanti kawatdaka, binabar iŋ woŋ liya, rèḥ iki dadalan kawruḥ, loṭuŋ kinarya ṅupaya.
2. iŋ ṅèlmu ginawa mati, kaŋ patitis tanpa samar, aywa aṅantĕpi kiyé, lan maliḥ sira wĕlasa, mriŋ mukmin sala yoja, ṅèlmuné akèḥ kasĕbut, anèŋ kéné wijaṅira.
3. lamun koṅsi kruṅu kaki, sayĕkti dumadi kĕmba, trakaḍaŋ sĕṅit mriŋ kowé, sakiŋ ciṅkraṅiŋ kawruḥnya, wiraŋ lamun takona, arṣa madoni tan gayuḥ, wit wus ĕntèk kawruhira.
4. watakiŋ mukmin samaṅkin, lamun kasoriŋ wicara, iŋ guna myaŋ kasaktèné, dadi miṅgu tan micara, sumambuŋ nora bisa, nĕdya urun luwiḥ éwuḥ, rèḥ gĕpok laraṅanira.
5. taṇḍa nalaré sacuwil, wĕruhé kaliṅan nétra, muwus kaliṅan caṅkĕmé, miṛĕŋ kaliṅan iŋ karṇa, mambu kaliṅan grana, kĕlantur tyasé wus kasub, ṛĕjasèŋ kawruḥ kaŋ samar.
6. samaré kaliṅan budi, budi tuna liwat salaḥ, ṅukuhi bĕnĕré ḍéwé, paṅrasané tanpa sama, yèn tinakon muridnya, ṅèlmu iṅkaŋ éwuḥ éwuḥ, cinakra nora pracaya.
7. sĕmu soṅol amaṅsuli, yahiku woŋ mukmin mamak, muk mukan pĕtĕŋ tyas èpèḥ, lawan maliḥ asriŋ ana, mukmin darbé papacak, maraŋ putra wayahipun, tan paṛĕŋ guguru liya.
8. wus tĕraŋ tan ana ṅèlmi, kaŋ ṅuṅkuli kawruhira, woŋ liya liyané goroḥ, kaḍaŋ winastan kĕlaṅkaḥ, mukmin iṅkaŋ maṅkana, aṅrasuk budiniŋ muñuk, samar lamun kahuṅkulan.
9. kuwatir yèn tan pinuṇḍi, taṇḍa yèn ṅèlmuné tuna, déné mukmin kaŋ cakṣanèŋ, kawruḥ danurja mulyarja, tan sumĕlaŋ kasoran, lamun ñata ṅèlmu putus, lir lisaḥ kalawan toya.
10. kawruḥ iku pami rukmi, pinĕṇḍĕma iŋ pawuhan, maṣṭi tétéla mañcoroŋ, yèku atiniŋ sujanma, kaŋ putus sandiniŋ hyaŋ, sabaraŋ nora kalimput, paḍaŋ ṅuṅkuli baṣkara.
11. clorot gĕbyariŋ paṅaṅgit, kadya baṅuniŋ kartika, tumibèŋ kisma paminé, wruhé sinasaban wuta, labĕtiŋ kasucian, pintĕré kaliṅan puṅguŋ, tan katara sarjanèŋ rat.
12. rat jagad kawĕṅku siji, pañjèrèŋ sasmitaniṅrat, ṅĕbĕki bhumi laṅité, paṅguluṅé tan katara, wruḥ iŋ gusti kawula, wruḥ rusakiŋ baraŋ wujud, wĕruḥ dadiniŋ kaanan.
13. wruḥ jumĕnĕṅiŋ hyaŋ luwiḥ, wĕruḥ dadiné kawula, pisaḥ pisaḥ ñatuṅgal wor, kabéṅkas nir déyanira, wus tan kacakrabawa, gugulaŋ ginuluŋ guluŋ, gĕḷĕṅaniŋ tyas sampéka.
14. kaŋ sawĕnèḥ mutaṅalim, soraḥ maraŋ muridira, nora awèḥ atatakon, kinèn ṅukuhi kitabnya, puji dikiriŋ puja, asĕmbahyaŋ limaŋ waktu, kéwala iṅkaŋ cinipta.
15. rina wĕṅi puji ḍikir, sahadat salat lan jakat, puasa khaji taṇḍané, yèku pikukuhiŋ islam, sayĕktyantuk gañjaran, nora awèḥ aṅgĕguru, takon maraŋ woŋ sarjana.
16. tansaḥ ṅukuhi pamuji, puji kaŋ katur hyaŋ sukṣma, sadat salat sadinané, bakal taṅguŋ karusakan, iŋ duña trus ṅakhérat, yèku woŋ kĕpahuŋ wuwus, dadi wis nora waṣpada.
17. sadarpa éwuḥ woŋ muji, pujiné katur mriŋ sapa, priyé dènnya ṅaturaké, lamun woŋ kaŋ wicakṣana, tan maṅran basa swara, swaraniŋ allaḥ puniku, sayĕkti nora pracaya.
18. sandiniŋ hyaŋ nukṣmèŋ wadi, lamun duruŋ kasuñatan, taṇḍaniŋ asma kapriyé, sahèstu baṅĕt tan gaga, yèn duruŋ tétéla traŋ, traṅé kaŋ sinĕmbaḥ iku, binatalakĕn kéwala.
19. ana manèḥ santri niṣṭip, wawaraḥ mriŋ muridira, sadat salat datan awèḥ, rèḥ wus salat saduruŋnya, wus pasa saduruŋnya, yahiku santri kĕpahuŋ, salaḥ ucapé kiyanat.
20. iku woŋ ṅukuhi pikir, osikiŋ aṅĕn aṅĕnnya, awit ḍisiki taṇḍané, kaŋ sĕmbahyaŋ iku allaḥ, kaŋ akon iku allaḥ, janma kaŋ maṅkono gĕmbluŋ, muyab atiné kĕtriwal.
21. hèḥ ta saguŋ para murid, wĕkas iṅsun poma poma, ywa sira ṅucap maṅkono, iku sétan sipat janma, mamak tan wruḥ iŋ tata, nadyan sira nora sujud, tan puasa ywa maṅkana.
22. woŋ ṅrusak saréṅat nabi, aṅlĕbur tataniŋ praja, kaŋ wus kaṅgo salawasé, ywa darbé tékat maṅkana, iŋ lésan lan wardaya, woŋ nalaré muŋ sadumuk, iku aṅgèr dèn waṣpada.
23. lan maliḥ sun sriŋ udani, ujariŋ woŋ jaman kuna, makṣiḥ dèn aṅgit sapréné, kaya ta woŋ kaŋ pracaya, iŋ baraŋ kahélokan, pracaya iŋ kayu watu, patilasan jaman kuna.
24. akèḥ bahé woŋ samyaṅliŋ, kaya ta jĕŋ nabi duta, mukhamad iṅkaŋ kinahot, maṅkya makṣiḥ nèŋ sawarga, ṅĕntèni kawulanya, yèku ujar woŋ kĕpahuŋ, sasat bahuŋ iŋ wanarga.
25. ana manèḥ jaman iki, kaṅjĕŋ sunan kalijaga, makṣiḥ mriyaṅhyaŋ uripé, akèḥ kaŋ ṅaku kĕpaṅgya, gaḍuŋ srĕban jubaḥnya, kaŋ sawĕnèḥ ṅagĕm wuluŋ, jaman makam tan pratéla.
26. trakaḍaŋ ana woŋ mukmin, ujar pinuṣṭi pratignya, luwiḥ kĕñcĕŋ paṅaṅgĕpé, ratu kidul makṣiḥ ana, jin pri prayaṅan sétan, gandarwa santéronipun, iku ujaré woŋ samar.
27. yèn woŋ waṣkiṭa iŋ wèṣṭi, nora samar kahélokan, maṣṭèkkĕn déniŋ kawruhé, yèn dinulu nora ana, jin pri prayaṅan sétan, gunuŋ gunuŋ guwa samun, tan ana sawiji apa.
28. woŋ ahli rasa sĕjati, tan ñakrabawa kaŋ sonya, wit pañcadriya jinèrèŋ, wruḥ iŋ ganal ganal ḷĕmbat, cakraniŋ tyas klantipan, iŋ maṅké ratuniŋ tamtu, jin sétan pĕri tan ana.
29. muŋ kaṇḍĕg babasan kidib, goroḥ tyasé woŋ kasasar, kĕlantur kuna kunané, koṅsi praptèŋ jaman maṅkya, makṣiḥ akèḥ woŋ buddha, sipatiŋ manuswa cukup, anaṅiŋ sasat gupala.
30. caṇḍi sèwu ṅapit margi, muŋ bédané darbé krĕkat, yèn maṅkono tuṅgak grawoŋ, iŋ jĕro isi caṇṭuka, tan pisan ñipta paḍaŋ, pĕtĕŋ tyasé ñamut limut, dudu patrapiŋ manuswa.
31. déné kaŋ paṅgaliḥ wĕniŋ, jin sétan sipat manuswa, kuna praptané samaṅké, kaŋ mitĕnaḥ mriŋ sasama, tan liya paḍa baṅsa, sĕṅit trĕsna witiŋ laku, iŋ kono laḥ rasakĕna.
32. yèn makṣiḥ pracayèŋ kidip, baraŋ cukup iṅkaŋ mokal, dèn aṅgĕp lir wĕruḥ ḍéwé, iku woŋ atiné sasar, klantur lantur katriwal, mumuk pĕtĕŋnya tinutup, pañcadriyané priyaṅga.
33. sajatiné pikir silip, aṅĕn aṅĕn kaŋ balasar, klèru tampa panampané, wus maṅkono yèn woŋ buddha, sanadyan dèn jujua, iŋ ṅèlmu kaŋ mĕmĕt ñamut, yĕkti anasar kéwala.
34. lamun woŋ tuna iŋ budi, malaḥ ñimpaŋ sakiŋ paḍaŋ, mriŋ pĕpĕtĕŋ paṅañcamé, gugu crita ṅayawara, kaŋ dèn aṅgĕp sañata, naṅiŋ ñatané nora wruḥ, iku woŋ pikiré tuna.
35. yèn maṅkono tanpa kardi, ṅèlmu ṅarab praptèŋ jawa, kitab kuran sasaminé, winĕḍar iŋ wali saṅa, dalil asuŋ pratéla, jarwa jarwa mriḥ nununtun, mriŋ manuswa puṅguŋ muḍa.
36. naṅiŋ kèḥ kaliru uniŋ, tékaté dudu manuswa, klahut iŋ jaman samaṅké, kapuḷĕt muḷĕt iŋ jajal, jin sétan nora uwal, iyèku atiniŋ manus, kaŋ duruŋ pratamèŋ sastra.
37. akèḥ woŋ kaŋ bisa nulis, ṅaji sastra jawa ṅarab, araŋ kaŋ bisa cumaṇṭèl, awit katarik iŋ tékat, mriŋ baṅsa kahélokan, laḥ iku margané klèru, saka kawruhé priyaṅga.
7. mijil
1. iṅsun uwis mlaya jajaḥ bhumi, ṅalor ṅidul ṅulon, ṅétan tĕpuŋ tanaḥ jawa kiyé, muruhita para wĕgig wĕgig, lir critèṅsun kaŋ wis, para guru guru.
2. amimijaŋ lir patrapiŋ jajil, kĕkutug kaŋ élok, asasaji baraŋ rupa sajèn, pambéṅatiŋ ṅèlmu tanpa sakṣi, sinakṣèn iŋ ati, ati kaŋ kalantur.
3. lamun guru tanaḥ panaragi, kaŋ pinuṣṭèŋ batos, manĕmbaḥ riŋ hyaŋ sukṣma patrapé, dèn taṅisi rina lawan wĕṅi, mriŋ sawarga adi, akiriŋ tumuwuḥ.
4. amuwuhi riribĕdiŋ pikir, kaŋ tansaḥ sumĕḍot, rina wĕṅi klèru maṅañcamé, mamagani sir iṅkaŋ nalisir, nora ana dèn sir, sucipta kajumbuḥ.
5. nèŋ pacitan sun wus amumurid, winĕjaŋ trap layon, ṅèlmu nakis bandiyaḥ arané, pamawasé saka puji dikir, pinañjiṅkĕn mariŋ, sajroniŋ sastra hu.
6. iṅkaŋ koṅsi wuru ciptèŋ batin, batiné mañcoroŋ, swarga nraka yĕkti katon kabèḥ, nadyan para luluhur iṅkaŋ wis, katon lir woŋ ṅimpi, ṅakhérat nèŋ ṅriku.
7. marma woŋ kaŋ paṅaṅgitnya tipis, yèn mĕntas wruḥ jontoŋ, jĕtuŋ ṅuṅun iŋ kasuñatané, akèḥ para udrasa luḥ mijil, sikṣaniŋ hyaŋ widdhi, kaŋ katon nèŋ ṅriku.
8. dadya kĕñcĕŋ pamusĕŋ pambudi, ṅadèkkĕn lalakon, sĕtya wardayasmu paṅaṅgité, patrap iṅkaŋ maṅkonèku kaki, lanatiŋ hyaŋ widdhi, dalil nora nutur.
9. kasasariŋ cipta riptèŋ pikir, pikiré woŋ jomblo, duga prayogané muŋ sapélé, dadi maṭĕm mantĕpé iŋ ati, tan wruḥ ati titis, pracayèŋ paṅriḍu.
10. riḍuniŋ woŋ tumitaḥ nèŋ bhumi, iṅkaŋ élok élok, mokal mokal dayaniŋ ciptané, cipta culika ṅĕculkĕn wadi, dadi wit piniṅit, sinĕṅguḥ nèŋ ṅriku.
11. baraŋ apa iṅkaŋ élok prapti, gya pinuṣṭi katon, laḥ iŋ kono pikiṛĕn dayané, yèn wus wĕruḥ pikiṛĕn kaŋ brĕsiḥ, tintiṅĕn kaŋ ĕntiŋ, woŋ sinahu putus.
12. tumulyèṅsun aṅgĕguru maliḥ, ṅèlmu kaŋ sajatos, bĕṇḍaḍampit iŋ paḍukuhané, tanaḥ blitar wus kasusrèŋ warti, titiniŋ paṅèkṣi, niṣkaraniŋ ṅèlmu.
13. maḷĕm jumuṅaḥ winĕjaŋ ĕntiŋ, winruhkĕn trap goroḥ, allaḥ mukhamad nèŋ nétra karo, rasulullaḥ rasa kaŋ sajati, jatiné umañjiŋ, jroniŋ nétra nĕmu.
14. ṅalam jĕmbar kababar riŋ wiji, cukul laṅgĕŋ awor, allaḥ mukhamad laṅgĕŋ wujudé, anèŋ kono laṅgĕŋ tanpantawis, sinasaban puji, salat karya sintru.
15. nuli ṅaliḥ aṅgĕguru maliḥ, ṅèlmu trapiŋ mahot, anèŋ nagri kaḍiri winalèḥ, iŋ sasmita kaŋ bakal pinaṅgiḥ, duña praptèŋ ṅakir, gya kinèn andulu.
16. wayaṅaniŋ janma kaŋ kahèkṣi, putiḥ amañcoroŋ, nora siwaḥ iŋ salagéhané, lir kaŋ darbé wayaṅan tan slisir, sañata kahèkṣi, dèn aṅgĕp hyaŋ aguŋ.
17. yèn wus wĕruḥ kaŋ maṅkono paṣṭi, bĕnĕr sirṇañañjog, riŋ kamukṣan laṅgĕŋ salaminé, wusnya traŋ sun luru guru maliḥ, antuk sawiji wig, iŋ maglaran ḍusun.
18. gya winĕjaŋ kinèn aniṅali, rupa kaŋ mañcoroŋ, kadya wulan purṇama taṇḍané, jroniŋ guliŋ kahèkṣi lir ṅimpi, ṅimpi dudu ṅimpi, iku makṣiḥ luput.
19. awit aṅĕn aṅĕn kaŋ niṅali, warṇa kaŋ maṅkono, taṇḍa duruŋ luṅa saka kéné, sigra ṅaliḥ maliḥ gurunadi, nèŋ gĕmboŋ umaṅgiḥ, guru tamèŋ kéwuḥ.
20. tanpa tutur pamĕjaṅé ghaib, muŋ kaṇṭi pasĕmon, kadadyaniŋ manuswa akiré, tibèŋ suwuŋ mĕṅko ana jati, mratani sabhumi, iku kinèn luru.
21. iya iku barat kaŋ nrambahi, bhumi saantéro, napasiŋ woŋ iku sajatiné, asal saka aṅin dadi aṅin, kaŋ bakal pinaṅgiḥ, lirṇya mañjiŋ suwuŋ.
22. suwuŋ waṅwuŋ wuluḥ wuṅwaŋ isi, napas aṅiniŋ woŋ, ywa pracaya ṅèlmu kaŋ maṅkono, paḍa lawan agama sarani, sabĕn ṅahat mañjiŋ, gréja yésus kristus.
23. minta jĕmbar kuburé yèn mati, ḷĕpas parannya doḥ, iku désa ṅara paṅgonané, majakarta araniŋ nagari, mèḥ lumraḥ woŋ jawi, ṅisa gama luhuŋ.
24. kaŋ maṅkono iku datan yukti, wiraṅiŋ lalakon, nora wĕruḥ agamané ḍéwé, ṅèlmu apa bahé añjarwani, iṅkaŋ dakik dakik, ḷĕmbut mĕmĕt ñamut.
25. sakiŋ aṅèlé agama nabi, mukhamad kinahot, diniŋ kanaŋ paṅolaḥ yodané, jaṭa antayaniŋ kwula gusti, wit urip mriŋ pati, titi tĕmaḥ jumbuḥ.
26. anakṣèni bisa dadi sakṣi, riŋ kawruḥ kinahot, woŋ maguru dadi guru ḍéwé, kaṅjĕŋ nabi mukhamad sayidin, mustapa sinĕlir, para manuswa nuŋ.
27. nuŋ winĕnaŋ atiné awĕniŋ, jĕŋ nabi sĕtyandon, tan kacakrabawa pasĕmoné, janma maṅké kaŋ aṅaku nabi, bisaa maṅirib, kadibyan iṅkaŋ wus.
28. ñataniŋ mukhamad luwiḥ suṅil, aṅèliŋ lalakon, nora awèḥ yèn duruŋ pratamèŋ, gampaŋ woŋ kaŋ ṅaku aran nabi, lirṇya nabi wĕniŋ, wĕnaŋ jèrèŋ ĕjum.
29. mim awal siraḥ aké iŋ ḍaḍèki, mim akir wudĕl woŋ, dal sukuné kéwala tan aṅèl, sĕdéné ros rasané hyaŋ widdhi, gampaŋ bahé kaki, sabĕn bocaḥ kèḥ wruḥ.
30. laḥ kapriyé patrapiŋ paṅèṣṭi, tirta nirmayañjog, jaman mukṣa mĕñaṅdi parané, jaman urip kinarya punapi, patiné ñaŋ ṅĕndi, apa sababipun.
31. pupujanĕn kaŋ kaṇṭi prihatin, patrapiŋ lalakon, wajib wĕnaŋ sira kinèn golèk, rèhniŋ woŋ urip joḍoné pati, tan kĕna sumiṅkir, tumĕmpuḥ iŋ iḍup.
32. kaya priyé aḍĕpiŋ patitis, janma sura taṅgon, ṅĕṅgon goni iŋ sakanparané, myaŋ antara kapuṇḍi kapuṣṭi, yèn wus kroban sakṣi, sañataniŋ laku.
33. sun wus mañjiŋ guru tanaḥ pasir, ṅèlmuné kacriyos, sadat sakarat iŋ pamĕjaṅé, wijaŋ wijaṅiŋ sawiji wiji, lahilla illahi, dunuṅiŋ paluṅguḥ.
34. riniṅkĕsiŋ jumbuḥ kumpul siji, umañjiŋ mriŋ jĕro, lawan ana taṇḍa iṅkaŋ katon, nèŋ jro carmin paṅiloniŋ warṇi, binuwaŋ kaca nir, makṣiḥ lu dinulu.
35. iku makṣiḥ kuwur wor ijajil, jajalanat mélok, nuli ana woŋ pratama manèḥ, tanaḥ clacap désa jĕruklĕgi, pamaridiŋ ṅèlmi, dakik sĕṅguḥ ñamut.
36. mĕmĕt umĕtiŋ mukhamad nabi, sajatiniŋ uwoŋ, ñaŋ dat sipat asma apĕṅalé, lirṇya kaŋ dat aṅĕn aṅĕn batin, sipat wujud janmi, asma araniŋ hu.
37. apṅal paṅgawéniŋ lahir batin, batiné hyaŋ manon, napasiŋ woŋ dèn upamèkaké, kĕmlaḍéhan nunut aṅuwati, pamĕjaŋnya ṛĕmit, ṭuk ṭuk adu baṭuk.
38. laraṅané kaŋ winanti wanti, tan kĕna kacriyos, kudu uluk salam salamĕté, warṇa warṇa jroniŋ tanaḥ jawi, akèḥ kaŋ añami, iŋ papacuhipun.
8. pocuŋ
1. sun galuyur muraŋ marga luru luru, sampurṇaniŋ gĕsaŋ, miwaḥ sampurṇaniŋ pati, kaya priyé trapé kaŋ pinujyèŋ taya.
2. nuli nĕmu nèŋ pakaloṅan woŋ putus, wĕwĕjaṅanira, lahillaha ilallahi, wusnya kawin nulya ṅlunturkĕn wasita.
3. kaŋ tinutur pralambaŋ patrapiŋ ṅèlmu, maṅkana bukanya, kaŋ kinarya nomĕr siji, raṇḍualas mrambat witiŋ kĕsèmbukan.
4. iya iku raganiŋ woŋ pami raṇḍu, napasé sèmbukan, uripé manuswa iki, sakiŋ napas ḷĕbu wĕtuné pinuja.
5. malihipun nomĕr ro iṅkaŋ tinutur, cébol gayuḥ lintaŋ, lumpuḥ aṅidĕri bhumi, iya iku dayaniŋ pikir manuswa.
6. tuṅgal wujud aṅĕn aṅĕn siriŋ kalbu, prataṇḍané ana, manuswa luṅguḥ nèŋ ṅriki, pikir bisa mubĕŋ añjajaḥ nagara.
7. nomĕr tĕlu winijaŋ wijaŋ tinutur, uga linambaṅan, ugĕt ugĕt ṅuntal bhumi, iya iku babariŋ pañcĕriŋ nétra.
8. déné lamun nĕdya mañatakkĕn kawruḥ, wuwuhiŋ sampurṇa, kudu wruḥ kaṇṭaniŋ pati, nuli iṅsun binuṅkĕm dalaniŋ napas.
9. sru tinutup dadalan wĕruḥ iŋ mahut, patrapiŋ palastra, napas nora kĕna mijil, laḥ ta iku rasané luwiḥ ṛĕkasa.
10. rèhniŋ iṅsun woŋ boḍo cĕguk truwilun, baṅĕt sèwu nrima, ṅuṅuniŋ tyas trima kasiḥ, sun rumaṅsa ṛĕjasèŋ siḥ sukṣmantaya.
11. paṅrasaku dulu tan liya kaŋ dulu, kuluṅiŋ wardaya, narambahi budi mlĕtik, nora wĕruḥ ṅèlmu buddha kaŋ katriwal.
12. tan pakantuk yahiku guru kĕtawur, yèn woŋ kaŋ wus pana, nadyan aṅicipi pati, kaŋ patitis tan maṅkono patrapira.
13. kuran nutur watakṣimuka billahu, wardiné maṅkana, hèḥ janma kaŋ ṅati ati, paḍa sira ṅrĕkṣaa taliniŋ allaḥ.
14. kalé iku napas tinutup tan mĕtu, yĕkti nora kĕna, dadi tĕtĕp ran woŋ musrik, tan prayoga guruniŋ pĕri prayaṅan.
15. yèn woŋ putus sandiniŋ hyaŋ tan kalimput, sampurṇaniŋ pĕjaḥ, tan sudi mamèt puniki, yèn woŋ mati guruné janma pralaya.
16. yèn woŋ iḍup magurua janma iḍup, aḍĕpiŋ agĕsaŋ, kasaṅsaŋ madyaniŋ bhumi, amijèni mriŋ putra wayaḥ tumĕraḥ.
17. rèḥ kacakup caṅcut kyat cakĕp kaŋ cukup, pamĕḍariŋ ganal, ñamut ḷĕmbut wus kapuṣṭi, paṣṭi pĕḍot sasmita kawruḥ sampéka.
18. wéwéka guŋ kagĕḷĕŋ dadi gumuluŋ, ḷĕkaniŋ agĕsaŋ, miwaḥ manisiŋ pambudi, dadi daya tarbukaniŋ tyas kaŋ samar.
19. luwiḥ éwuḥ dadalané woŋ tumuwuḥ, mriḥ wuwuḥ iŋ rasa, rasaniŋ jagad binudi, jawa ṅarab ginuḷĕt titi tur paḍa.
20. kaŋ dadi wus wasésa sĕmuné luhur, bayan allaḥ tĕraḥ, mrataṇḍani kèhiŋ urip, urip iku dayaniŋ sasmitaniŋ rat.
21. muṣṭika guŋ iŋ duña tanna kadulu, mratani kaanan, amuŋ manuswa kaŋ luwiḥ, iya iku sèwu nugraha mawantaḥ.
22. marmanipun bagus dudu rupa waṅun, muŋ taṇḍa kaŋ ñata, paḍaṅiŋ ati nrambahi, iŋ wicara kaŋ wus caṛĕm liriŋ limpad.
23. sukur bagus rupa myaŋ wicara waṅun, ṅèlmu kasusastran, jawa ṅarab kaŋ patitis, myaŋ sandiniŋ tulis basukiniŋ basa.
24. maṅkya waṅsul maṅsuli laku galuyur, brahuŋ jajaḥ praja, aṅupaya ṅèlmu jati, jatiniŋ woŋ kabutuḥ tan mĕṅku drajad.
25. amuŋ loṭuŋ tinimbaŋ dadi woŋ gĕmbluŋ, paduné wus kalaḥ, kinarya narimèŋ paṣṭi, rèḥ papaṣṭèn dinulu nora pratéla.
26. ṅulon nurut sakiŋ pakaloṅan tĕrus, sarwi nuṅsuŋ warta, aṅupaya ṅulama wig, dupi prapta ḍusun tañjuŋ bawaḥ tĕgal.
27. sun aṅruṅu ana sajuga woŋ putus, tatas kawruḥnya traŋ, nuli sun maguru ṅabdi, amiminta lumunturiŋ kaŋ wasita.
28. anèŋ ṅriku koṅsi antuk tigaŋ tèṅsu, rèḥ tanpa prabéya, marma kalampahan ṅabdi, sakiŋ wĕlas tumulyantuk kawĕlasan.
29. kaŋ tinutur patrap pratikĕliŋ lampus, aran panĕṅĕran, kaprikṣa sajroniŋ urip, kuraŋ pataŋ puluḥ dina wus pratéla.
30. iya iku nèŋ tutuk paṅgonanipun, paḷĕṅgahan rasa, kalamun wus nora kĕri, kuraŋ pataŋ puluḥ dina praptèŋ maṅsa.
31. kuraŋ pituŋ ari kinèn andĕdulu, wus tan kaṇṭa warṇa, tĕluŋ dina kulit dagiŋ, tan kumrisik lamun wus kuraŋ sadina.
32. napas mlĕbu mĕtu asrĕp kéwala wus, cupĕtiŋ agĕsaŋ, nulyana rupa sajati, cahya ḷĕmbut sarambut kèkṣi iŋ ṅarṣa.
33. pĕcatipun ñawa sakiŋ jĕmpol suku, muṅgaḥ mriŋ gĕlaṅan, nĕmu régol dèn arani, ṅanti lawaŋ sapta trus muṅgaḥ iŋ utak.
34. nuli nĕmu rurupan kaŋ gumun gumun, iŋ kono kapaṅgya, lawan hyaŋ kaŋ murbèŋ bhumi, kaṇṭa warṇa lir rupaniṅsun priyaṅga.
35. glis lumĕbu mriŋ kaṇṭa iṅkaŋ kadulu, yèn wus nukṣmèŋ kana, nulya jumĕnĕŋ narpati, iya iku goniŋ sawarga kaŋ mulya.
36. bakin tĕrus urip nora kĕnèŋ lampus, énak tanpantara, dèn arani sipat kadim, lirṇya kadim badan alus mĕṅku sipat.
37. maṅkonèku guru liluŋ tanpa kusur, kalèru iŋ tékat, tur nora bisa nakṣèni, datan wĕruḥ iku agama saṅkrĕta.
38. tĕgĕsipun saṅkrĕta tĕmbuŋ woŋ hiṇḍu, maṅkono tékatnya, ḍasar sun wus minta waṅsit, nèŋ batawi aṅgĕguru woŋ turkistan.
39. kacèk tĕmbuŋ makṣiḥ basané woŋ hiṇḍu, mèmpĕr kawi jarwa, déné kyayi tañjuŋ ṅuni, muŋ bédané toḷĕk tĕmbuṅé woŋ ṅarab.
40. dadi luhur akèḥ woŋ iṅkaŋ sumuṅsuŋ, tur dèn aḷĕmbana, pribadi saṅsaya wiṅit, paṅakuné sakiŋ crĕbon kaṅjĕŋ sunan.
41. jamanipun wali titiṅgalan iku, makṣiḥ rupa déraḥ, binuntĕl sap pitu putiḥ, kinutugan iŋ dupa sabĕn jumuṅaḥ.
42. nĕmbaḥ jumbuḥ lir brahala sru mabuṅkuḥ, kukuḥ aḍĕpiŋ tyas, yèn siswadi ambĕg julig, nora sudi nadyan kuran tan sinĕmbaḥ.
43. wit mituhu tĕmbuṅiŋ kitab papacuḥ, tan kalilan nĕmbaḥ, rurupan liyaniŋ rabil, ṅalamina iṅkaŋ kak wujudiŋ sukṣma.
44. nulya iṅsun anèŋ batawi kapraṅgul, guruné woŋ kalap, gama kristĕn kitab iñjil, sun mruhita trap pratikĕliŋ sampurṇa.
45. tan sinuŋ wruḥ muŋ kinèn maḍĕp kaŋ sujud, nora saḥ iŋ kajat, jatiniŋ kawula gusti, manuswa guŋ kabèḥ putrané hyaŋ sukṣma.
46. kaŋ sumĕṅkut aṅĕṅgon goni kaŋ jumbuḥ, ṅaku nabi ṅisa, rohullaḥ kaŋ mĕṅku urip, iya iku aṅĕn aṅĕn lawan napas.
47. kaŋ maṅèstu iŋ béñjaŋ maṣṭi katĕmu, kaṅjĕŋ nabi ṅisa, sayĕktiné makṣiḥ ṅanti, kawulané anèŋ sawarga kasapta.
48. iya iku woŋ kabĕntur tĕmbuŋ bagus, iñjil crita mulya, kaŋ dèn prĕtal tĕmbuŋ jawi, luwĕs ḍèmĕs tuwan wintĕr surakarta.
49. iṅkaŋ bagus luwiḥ raṛĕṅganiŋ bagus, mulya di utama, kaŋ mĕmĕlas ṅasiḥ asiḥ, siṅa mulat woŋ jawa akèḥ kagiwaŋ.
50. nora wĕruḥ pĕtĕŋ atiné kalimput, mĕpĕtiŋ tyas mamak, muk mukan tan darbé pikir, kira kira lan pañanané katriwal.
51. woŋ jawa guŋ iŋ batawi samya nuṅsuŋ, salin sĕsĕmbahan, manut tataniŋ sĕrani, malbèŋ grija manĕmbaḥ aṛĕp aṛĕpan.
52. kaŋ sinĕṅguḥ nabi ṅisa makṣiḥ iḍup, iku dadi taṇḍa, liluŋ klalaṅaniŋ pikir, wiraŋ isin woŋ jawa salin agama.
53. gamanipun ṅarab pribadi tan wĕruḥ, gayuḥ gama liya, suprandéné dèn antĕpi, wus prasasat woŋ ṅara iŋ majakarta.
9. paṅkur
1. woŋ kristĕn agama ṅisa, tanaḥ jawa tékaté kèḥ ṅantĕpi, kèlu crita èdi ñamut, paṅrasané tétéla, iŋ batawi samaraŋ surabaya guŋ, pasuruan sidaarja, iŋ malaŋ tuwin kaḍiri.
2. désa gomboŋ tanaḥ ṅroma, tuwa anom lanaŋ wadon mèstuti, mriŋ iñjil pituturipun, iṅkaŋ luwiḥ sampéka, añukupi urip praptèŋ patinipun, yèn gunĕman amaciṭat, nanacad amomoyoki.
3. maraŋ agama mukhamad, kaŋ maṅkono iku datan prayogi, awit iŋ sayĕktinipun, sakabèhiŋ agama, nora ana iṅkaŋ ala iṅkaŋ bagus, dé aṅgĕpé baṅsa islam, tan ana iṅkaŋ ṅuṅkuli.
4. agama nayakaniṅrat, kaṅjĕŋ nabi mukhamad kaŋ sinĕlir, ṅaṅgit kuran kaŋ ḍumawuḥ, dadi umuliŋ kitab, pira pira kawruḥ iṅkaŋ bagus bagus, ṅĕñcĕṅakĕn maraŋ tékat, ala bĕcik dèn kukuhi.
5. paṅudiniŋ sakanparan, kahuripan kaŋ jumbuḥ tur pinardi, sinajarwa winawuruk, kadadyaniŋ tumitaḥ, aṅawruhi sabaraŋ rèḥ kaŋ gumuluŋ, gĕḷĕṅaniŋ tyas narawaŋ, goroḥ yĕkti kaṇṭi sakṣi.
6. nèŋ batawi sun marwita, mriŋ woŋ cina panĕṅran baḥ bikṣui, winruhkĕn kawruḥ kaŋ jĕntus, paṅgonané kaŋ murba, dunuṅé nèŋ ṅisor bhumi kaŋ kapitu, iyèku allahiŋ cina, ajujuluk kok hoŋ saṅti.
7. pardikané kinawasa, kaŋ masésa sèsiniŋ bhuwana di, yèn pinuju muji jumbuḥ, sayĕktyasmu pratéla, nèŋ paprĕman lir manuswa sipatipun, dé luṅguḥnya kaŋ sañata, anèŋ manik nétra kaliḥ.
8. iku iṅkaŋ jinalukan, rina wĕṅi kaŋ maṭĕṇṭĕŋ iŋ ati, yĕkti apa kaŋ kinasdu, iŋ duña trus ṅakirat, paṣṭi nĕmu sabaraŋ rèḥ tékatipun, maṅkono patrapiŋ cina, tan béda sujud riŋ widdhi.
9. akèḥ akèḥ pituturṇya, mokal mokal tan kasĕbut nèŋ ṅriki, déné ririṅkĕsanipun, woŋ ulaḥ ṅèlmu cina, kaŋ wus pana sajroniŋ limalas tahun, bisa bali maraŋ duña, tumitis maraŋ babayi.
10. sun maliḥ tĕrus ṅupaya, sampurṇaniŋ pati iṅkaŋ patitis, nèŋ cikaṇḍi raniŋ ḍusun, bawaḥ iŋ kuṭa séraŋ, yèn iŋ kono ana woŋ kacrita putus, tumulya sun muruhita, wañci ratri sinuŋ waṅsit.
11. winĕjaŋ iŋ tĕmbuŋ ṅarab, sahadat lahilaha ilallahi, waanahu mukhamadun, rasulullaḥ mustapa, linuṅguhkĕn sastrané sajuru juru, anèŋ badaniŋ manuswa, luwiḥ dakik ghaib ghaib.
12. ṅèlmu saréṅat tarékat, kakékat lan makripatiŋ paliṅgiḥ, suku wudĕl ḍaḍa tĕrus, ṛĕsik brĕsiḥ sabadan, asal asal mulabukané tinutur, miwaḥ akiriŋ tumitaḥ, mañjiŋ iŋ sawarga naṅim.
13. nuli araniŋ sagara, linuṅguhkĕn anèŋ badan sakalir, kaya ta usus puniku, uga aran sagara, winastanan sagara ranté puniku, gigir winastan sagara, agĕŋ iṅkaŋ tanpa tĕpi.
14. jantuŋ iṅaran madinaḥ, bétalmakmur iŋ mĕkaḥ kaŋ paliṅgiḥ, iyèku anèŋ sastra hu, lan maliḥ sinajarwan, surya wulan sumurupiŋ nétranipun, dé putiḥ iṛĕṅiŋ nétra, dadi rina lawan wĕṅi.
15. sakiŋ cupĕtiŋ tyas iṅwaŋ, sru narima suka sukur riŋ gusti, puṅun puṅun gĕtun ṅuṅun, ṅaṅsĕg mantĕpiŋ driya, paṅrasèṅsun ṅèlmu ḷĕmbut mĕmĕt ñamut, wruḥ umĕtnya mim mukhamad, tablègé pratiṣṭèŋ jisim.
16. rumaṅsa ṛĕjasèŋ tiṅal, salulut siḥ gusti kalawan dasiḥ, maṭĕm maṭĕṇṭĕṅiŋ kalbu, muṣṭi riŋ sukṣmantaya, maḷĕtikiŋ jaṭa tan rumaṅsa manus, ambĕg saŋ sèḥ sitijĕnar, tan wruḥ yèn agama kaŋ wis.
17. yèku agama pakuwan, hyaŋ brahma kaŋ baboni amiwiti, uga buddha jamanipun, luhurṇya praptèŋ maṅkya, sinalinan tĕmbuŋ ṅarab kaŋ kalaku, jaman agama mukhamad, mèt kitab sakaniŋ kidib.
18. supayèku ginugua, sajatiné tapsir awalnya sĕpi, suwuŋ kabèḥ nora nutur, yahiku ṅèlmu karaŋ, pardikané karaŋ aṅgitaniŋ manus, nutur ṅèlmuné woŋ buddha, dèn liḥ tĕmbuṅiŋ ṅarabi.
19. aṅélokkĕn iŋ paṅucap, supayané ñalini gama kaŋ wis, sajatiné nora santun, makṣiḥ gaṇḍulan kuna, ṅèlmu budawaka kaŋ makṣiḥ linantur, luluriné kakèk moyaŋ, dèn kĕñcĕṅi praptèŋ pati.
20. akèḥ woŋ jawa maṅkana, para guru para murid tan slisir, ambĕg cakĕp putus cukup, iŋ ṅèlmu kasampurṇan, satĕmĕné woŋ maṅkono makṣiḥ liṅluŋ, ṅĕṅlĕŋ lir woŋ kalaṅlaṅan, pikir pinĕtĕṅan pati.
21. prandéné akèḥ woŋ prapta, aṅgĕgulaŋ kalaṅgĕṅaniŋ akir, kira kirané kadahut, sulapiŋ tyas kaŋ samar, ṅawur nasar sasaran sruwa kaliru, wus maṅkono salaminya, janma kaŋ nora patitis.
22. dalan patitisiŋ cipta, wit kaliru kajuraŋ juraŋ margi, muk mukan tur ñanuk ñanuk, butĕŋ prasasat ayam, nucuk jaguŋ nèŋ coṇṭoṅan maṇṭuk maṇṭuk, ṭaraṭakan tan wruḥ marga, wutané prakara pati.
23. woŋ wuta nadyan wĕruha, tan pratéla sajatiné kaŋ ghaib, prayoga iṅkaŋ guguru, iŋ tyas kawicakṣanan, rèḥ wus ganĕp manuswa sipat roṅpuluḥ, yèn sinahu paṣṭi bisa, ṅulaḥ sasmita luluṅit.
24. jroniŋ pikirira ana, ṅèlmu apa bahé kaŋ luwiḥ luwiḥ, naṅiŋ kaŋ pratamèŋ kéwuḥ, ywa gé sira pracaya, sakṣènana iŋ panimbaŋ myaŋ paṅgayuḥ, tiṅtiṅĕn sariniŋ rasa, rasané tumitaḥ urip.
25. sasmita kawruḥ sañata, lan paṅaṅgit kaŋ titi kaŋ patitis, ywa tiṅgal sabaraŋ guru, gunĕmé pra ṅulama, jaman maṅké akèḥ kaŋ ṅlakokkĕn palsu, wit kèhiŋ ṅèlmu gumĕlar, gumrudug akèḥ mèstuti.
26. kaŋ akèḥ para ṅulama, amumulaŋ mriŋ para anak murid, yèn makṣiḥ añar ki guru, mimijaŋ tanpa sarat, muŋ rasulan lan mori sakwasanipun, yèn wus dadi jaran képaŋ, jaṭilan ṅupaya ḍuwit.
27. gya ṅaṅgo śri kawin sĕmat, wis maṅkono paguron yèn wus dadi, laris maṅlaras mumuruk, muṇḍut arta busana, aṅarani iŋ pamriḥ wĕtuniŋ bujuk, wahyaniŋ pokil pitĕnaḥ, marma saguŋ woŋ bèrbudi.
28. layaŋ iki takokĕna, aja méraŋ isin ṅèlmu dèn cupi, cinupan gaṇḍulanipun, laraṅan kaŋ pinuja, salawasé ana iŋ kéné kasĕbut, muŋ paḍa mamriha tambaḥ, saguŋ kaŋ maca miyarṣi.
29. lumémbak balabar wutaḥ, lémbak lémbak sarèhniŋ waḍaḥ cilik, rupĕk ciyut mawut mawut, prayoga dèn pasaṅa, taṅgapiŋ tyas pandulu pamyarṣanipun, muŋ loṭuŋ aywa sumĕlaŋ, gagaṇḍulaniŋ patitis.
30. binabar riŋ kéné aja, uwas watir nir niran tyasmu isin, muriḥ jĕmbariŋ paṅgayuḥ, ṅayaḥ maṅayuḥ yoda, yĕkti dadi sarjanambĕg putus ṅèlmu, kasampurṇaniŋ agĕsaŋ, sakanparaniŋ patitis.
31. titisiŋ kawruḥ narawaŋ, wawaṅunaniŋ ṅèlmu kaŋ tinintiŋ, ĕntiŋ tan ana kadulu, luluḥ ḷĕbur sinaṅga, kaŋ wus maṭĕm iŋ tékat miwaḥ iŋ laku, kukuḥ kuwatiŋ pamudya, mudyastuti iŋ pamardi.
32. wus nora kĕna kasoran, kawruḥ iki muŋ siji kaŋ ṅuṅkuli, arta kaŋ pratamèŋ ḷĕmbut, saliyané punika, nora kéguḥ sarambut pinara sèwu, muŋ tinimbaŋ karo mlarat, bĕcik iṅkaŋ sugiḥ ṅèlmi.
10. maṣkumambaŋ
1. iŋ wilapa kumambaŋ gatiniŋ tulis, tulus panĕdyanya, manuswa kaṅgonan budi, daya karṣa béda béda.
2. naṇḍiŋ miliḥ maṅayuḥ budi maḷĕtik, mamriḥ wicakṣana, kaŋ éwuḥ ḷĕmbut pinikir, kira kirané kaŋ ñata.
3. ṅakal akal cukuliŋ kagunan mijil, iŋ paṅrékadaya, kaŋ kaṇṭi sakṣi nastiti, aṅèl woŋ tumitaḥ gĕsaŋ.
4. luwiḥ gampaŋ woŋ mikir larapiŋ pati, wus paṣṭi sampurṇa, sadaya añariŋ bhumi, iŋ kono laḥ rasakĕna.
5. kaŋ tumañcĕp iŋ driya paṅgaliḥ wĕniŋ, niŋ kaŋ wus winĕnaŋ, nĕtĕpi uniŋ ananiŋ, anuné kaŋ wus pratignya.
6. lawan maliḥ pikiṛĕn kaŋ maṣṭi kéṅiŋ, jumĕnĕṅiŋ allaḥ, nora dumunuŋ iŋ laṅit, tan dumunuŋ awaŋ awaŋ.
7. tan dumunuŋ ana sajĕroniŋ jisim, tan dumunuŋ jaba, kalé kak wujudullahi, tĕmbuṅiŋ lapal maṅkana.
8. wa ama burhanu wujudulillahi, pokudulul ṅalam, tĕgĕsé taṇḍaniŋ gusti, maṅka añariŋ ṅalam bat.
9. lirṇya ṅalam sabĕn mahujud kaŋ kèkṣi, sinipatan ṅaral, tagayur kaŋ owaḥ giṅsir, muŋ allaḥ iṅkaŋ kadiman.
10. maṅka ṅalam iku kudu ṅaṅgo ṅanti, tĕtĕpiŋ añarṇya, pataŋ prakara kaŋ ḍihin, isbatu jahis tĕtĕpnya.
11. kapiŋ piṇḍo añaré kaŋ dèn kawruhi, kapiŋ tri kaŋ mokal, añariŋ ṅalam sakalir, piŋ catur tanpa wiwitan.
12. sayĕktiné duña puniki tanpa wit, bhumi laṅit lintaŋ, surya wulan kaŋ kahèkṣi, sadaya sakiŋ manuswa.
13. liré sakiŋ manuswa iṅkaŋ akardi, saguṅiŋ kaanan, kalamun manuswa sĕpi, sayĕkti tan darbé aran.
14. laḥ ta poma pikiṛĕn prakara iki, supaya tyas paḍaŋ, bisa maratani bhumi, atiniŋ siswa kaŋ tĕraŋ.
15. wus tan samar tanpa kira kiranya nir, tan kacakrabawa, nora méṭok nora miriŋ, iku sandiniŋ bhawana.
16. manuswa guŋ sadaya sakaniŋ bayi, datan darbé karṣa, tan mosik nora mumuji, nadyan allaḥ duruŋ ana.
17. baṛĕŋ praptèŋ maṅsa ran isbatul jahis, bisa nĕbut nama, niŋ allaḥ kaŋ murbèŋ bhumi, tiru tiru saka liya.
18. luwiḥ mokal luwiḥ ghaib luwiḥ suṅil, naṅiŋ sèwu gampaŋ, woŋ ulaḥ larapiŋ pati, pati sakiŋ sakanira.
19. marma saguŋ putra wayaḥ sun priḥ wĕgig, mumpuŋ makṣiḥ gĕsaŋ, sirṇakna mamaṅiŋ ati, kapriyé trapmu mumuja.
20. yèn wus mati tan bisa sira mijèni, putra wayaḥ wuntat, aywa kalantur lir kaŋ wis, balasar kajuraŋ juraŋ.
21. ṅèlmu dudu dèn antĕpi dèn pupuṇḍi, tur kaṇṭi kĕṭokan, gulu ayam babon putiḥ, kaṛĕmaniŋ rasulullaḥ.
22. bĕgja tĕmĕn woŋ kaŋ bisa aṅlakoni, apa nora wiraŋ, mumulaŋ mriŋ anak murid, yèn kawĕlèḥ iŋ sarjana.
23. woŋ kaŋ putus tan bisa suŋ patrap pati, tan bisa mumulaŋ, ṅèlmu kaŋ tan ṅaṅgo sakṣi, aguŋ katĕmpuḥ iŋ wiraŋ.
24. ywa maṅkono woŋ ulaḥ sasmita ghaib, kudu kaŋ ajajaḥ, sariniŋ kawruḥ kaŋ suci, kasabĕt iŋ kasuñatan.
25. jaman iki mulya di akèḥ janma wig, akèḥ sarjanèŋ rat, woŋ kaŋ maṅulaḥ patitis, ywa loño sabaraŋ wulaŋ.
26. nora gampaŋ amumuruk maraŋ murid, kaki bokmanawa, kataṅgor janma kaŋ luwiḥ, wusanané kaṭéṭéran.
27. calurutan guru tinon lir ṭok rani, caṅkĕm kacĕmutan, yayaḥ palwaga dèn misri, sun wus tahu kasusahan.
28. sun mimijaŋ mriŋ sarjana putus wèṣṭi, tan wruḥ yèn woŋ pana, nuli sun binudi budi, tinakonan kaŋ sañata.
29. dadi mĕnĕŋ iṅsun tan bisa maṅsuli, tĕmaḥ kawaṅuran, nora bisa suŋ patitis, sun iki nĕdya tatanya.
30. wĕkasané kĕlantur boḍoku dadi, guru garagapan, mamagan kawruḥ tan yukti, awit tan gĕḷĕm kasoran.
31. marma saguŋ putra wayaḥ kaŋ nitèni, yèn ana sujanma, sĕmu putus liriŋ ṅèlmi, aywa isin muruhita.
11. ḍaṇḍaṅgula
1. nuli iṅsun sakiŋ séraŋ bali, mriŋ batawi nĕdya muruhita, ṅèlmu kasidan patrapé, antuk warta sahèstu, kampuŋ krukut jujuluk sayid, odrus putrèŋ ajĕmam, kramat iṅkaŋ kasup, tumulyèṅsun puruhita, tan alami nunuwun lumunturiŋ siḥ, sampurṇaniŋ kasidan.
2. sidaniŋ woŋ tumitaḥ nèŋ bhumi, urip iku joḍoné palastra, sabĕn ri kaloŋ ñawané, tan wĕruḥ kantunipun, sapira yèn makṣiḥ taruni, tan pisan ñipta pĕjaḥ, wusnya praptèŋ sĕpuḥ, sabĕn dina guŋ sumĕlaŋ, awit jisim añar luwasé mrĕpĕki, aṅgégé pulaŋ kaṇḍaŋ.
3. pikir mupus mupus mĕkṣa mapit, sumpĕgiŋ driya aniṅgal duña, yèn tinaria patiné, sahèstu matur nuwun, mopo awit sĕnĕṅiŋ ati, gumĕlariŋ rat duña, lumyat wayaḥ sunu, kulawarga waṅsa waṅsa, wus maṅkono woŋ aras arasĕn mati, aja manèḥ manuswa.
4. nadyan kéwan kaŋ tan wruḥ iŋ pati, yèn katĕmpuḥ lara kasaṅsaran, sikil piñcaŋ ḍèṅklèḥ ḍèṅklèḥ, suprandéné lumayu, golèk urip aṇḍĕlik ḍĕlik, yèn maṅkono pra sipat, iṅkaŋ kayat kayun, tan gĕḷĕm katĕkan pĕjaḥ, marma saguŋ sarjana kaŋ mamrĕs budi, budinĕn trapiŋ mukṣa.
5. kaŋ supaya tan sumlaŋ iŋ pati, woŋ sumĕlaŋ duruŋ traŋ pamawas, maraŋ larapiŋ patiné, anaa iṅkaŋ wĕruḥ, mèt wawaraḥ guru kaŋ urip, iku duruŋ pratéla, pati kaŋ satuhu, tuhu tuhuniŋ pralaya, pati iku rumakĕt sajroniŋ urip, ñirṇakkĕn was sumĕlaŋ.
6. mĕlaŋ mĕlaŋ woŋ kaŋ duruŋ uniŋ, tansaḥ kacakra paṅgonan béñjaŋ, nĕmu swarga sawaṛĕgé, anaṅiŋ duruŋ tahu, aṅlakoni paṅgawé pati, lamun janma kaŋ pana, pramanĕm kaŋ duruŋ, awit sakiŋ déniŋ ñata, aṅgĕguru maraŋ janma kaŋ wus mati, dadi tan ṅayawara.
7. wusnya sun matur mriŋ tuwan sayid, gya winĕjaŋ wijaṅiŋ sasmita, kaŋ ñamut mĕmĕt umĕté, iŋ kéné tan kasĕbut, awit walèḥ mĕlèhkĕn kidip, manawa kawadaka, wiwijaṅanipun, salaḥ tampané kaŋ tampa, tan prayoga ṅuculi ṅèlmu iṅkaŋ wis, manawa kaṭéṭéran.
8. kaŋ wus klantur ṅèlmu ṅuni uni, yèn kawiyak kawruḥ kaŋ sañata, isin nampik gaṇḍulané, wus maṅkono pra guru, sĕsĕnĕṅan dupi wruhñantiŋ, tinintiŋ tèk ĕntékan, nèŋ kéné kasĕbut, dadi moṭok lir paṭokan, nora koṅkiḥ tur iŋ batin mikir mikir, aṅgayuḥ saya tuna.
9. amila woŋ guguru yun luwiḥ, kaluwihan ṅèlmu kaŋ sampurṇa, lir sayid odrus sajaré, pinapajar jinuju, purwa madya wusana ṅĕntiŋ, maṅulaḥ ṛĕjasèŋ tyas, iṅkaŋ tyas wus kasub, jumbuḥ pamuṣṭiniŋ nala, ḷĕlèjĕmiŋ kakékat makripat tuṅgil, tarékat lan saréṅat.
10. sipat sipatiŋ badan sakalir, dayaniŋ tyas kaŋ mokal kaŋ ñata, saka sakṣi sakṣi kabèḥ, kiniyas tanpa catur, yèn jinèrèŋ ṅĕbĕki bhumi, asal usulé gumlar, mĕlar malar kagluŋ, gugulaṅaniŋ prañata, ñataniŋ dat sajati pinuṇḍi puṇḍi, nora kinayaṅapa.
11. susĕtyaniŋ tyas ṅĕniṅkĕn wadi, sandiniŋ sasmita ṅèlmu rasa, sandiniŋ urip pratamèŋ, paṭinira saka gluŋ, kuluṅiŋ tyas sĕmu mantĕsi, sandiniŋ puji puja, pujiniŋ tumuwuḥ, tumuwuhiŋ budi tama, tamèŋ sandi janma tumitaḥ nèŋ bhumi, sayogya mèt budyarja.
12. arjaniŋ woŋ tumitaḥ kaŋ wĕgig, mumpuni rèḥ paṅulahiŋ gĕsaŋ, kusuŋ kusuŋ pamusĕṅé, wigiŋ sasmita kéñut, ṅañut tuwuḥ joḍoniŋ pati, pati titisiŋ cipta, taṇḍa sakṣiné trus, nrusi ṅèṅrèṅaniŋ waraḥ, ṅaraḥ araḥ anon tuhoniŋ paṅèkṣi, mèdĕmiŋ tyas narawaŋ.
13. woŋ wus caṛĕm sandiniŋ sukṣma di, myaŋ sandiniŋ rasa myaŋ mukhamad, datan pinikir ñatané, kaŋ pinikir pinikut, lakuniŋ woŋ marcapada wig, wignaniŋ pañcadriya, paṅambu paṅruṅu, paniṅal myaŋ paṅandika, tĕp tinĕtĕp tĕtĕpé paḍa ṅuwati, jumĕnĕṅiŋ sirullaḥ.
14. aṅĕn aṅĕn kaŋ munaḥ murbani, kuwasèŋ rèḥ masésa sabadan, kuwat saka pusarané, napas taliniŋ iḍup, prasasat hyaŋ kaŋ murbèŋ jisim, ṅratoni sajagad rat, caṅkramèŋ siswantuk, pati munaḥ kawulèŋ hyaŋ, muŋ upama maṅkono ywa dèn antĕpi, ḍinaku aran sukṣma.
15. allaḥ iku dudu joharmanik, dudu nur mukhamad rupa cahya, dudu roḥ saantéroné, tan jaba jĕro dudu, marma woŋ kaŋ añjala wĕniŋ, niṅiŋ cipta sarasa, tan pisan aṅluru, ruruba katur hyaŋ sukṣma, muŋ wĕruha kawasanirèŋ rat jisim, iŋ kasantikanira.
16. sèwu mokal kaananiŋ ghaib, kaŋ dumunuŋ badaniŋ manuswa, kaŋ gampaŋ myaŋ pakéwuhé, aṅèl suṅil wit ḷĕmbut, mĕmĕt ñamut pratigñèŋ pikir, awasna wawasĕn tyas, pañcadriya tyasmu, mobaḥ molaḥ paripolaḥ, mosik mĕnĕŋ antĕŋ lagéhaniŋ budi, catur wiwara warta.
17. iŋ paṅèkṣi tĕp tinĕtĕp ugi, iŋ wicara caṛĕmiŋ susĕdya, sĕdya loro ṅucap ijèn, paṅruṅu lan paṅambu, baṅkit ṅaturakĕn patitis, sampyuhé lir cañcala, tumĕmpuḥ iŋ lahut, kĕplas wujud loro tuṅgal, séjé jisim muṅguḥ woŋ buddha jarwani, badan alus lan waḍag.
18. lirṇya alus aṅĕn aṅĕn batin, waḍag jisim kaŋ katon satmata, mrataṇḍani kawulané, woriŋ pupu pinupu, iṅaranan kawula gusti, naṅiŋ ywa salaḥ tampa, dudu hyaŋ maha guŋ, dudu allahu taṅala, muŋ jumĕnĕŋ guru pikirmu pribadi, marmané kĕnèŋ édan.
19. iṅkaŋ salaḥ tampa wor ijajil, gusti allaḥ nèŋ sajroniŋ badan, marma tumpaṅsuḥ pikiré, napas pikir rinĕṅkuḥ, sanubari kratoniŋ gusti, ana mriŋ sipat kodrat, myaŋ rasa tuwin nur, daliliŋ ṅakahid tĕraŋ, suŋ pépéliŋ wujudiŋ hyaŋ maha suci, la dihni la karija.
20. tĕgĕsé hyaŋ dudu baṅsa ati, dudu jaba kaŋ sipat pratéla, wala joharrin tĕgĕsé, dudu nur mukhamadu, wala nupu gusti allahi, sayĕkti tanpa napas, nadyan napas dudu, myaŋ ahola murtasiman, pikiyali tan kacakra maha suci, aṅĕn aṅĕniŋ janma.
21. lowaḥ ṅlaṅut ñamut tan kahèkṣi, awit la jamana la makana, nora maṅsa nora ĕṅgèn, paṣṭi wujudullahu, walalidin tur walanidin, tan lawan datan timbaŋ, myaŋ layu kayapu, tan kĕna kinayaṅapa, kaŋ pramana sandiniŋ hyaŋ pikir mlĕtik, sayĕkti nora kéwran.
22. dèn aliṅana sagara gĕni, bhumi sap pitu laṅit sap sapta, nora éwuḥ pambataṅé, lagéhan lidiŋ sĕmu, lèjĕmiŋ tyas tan miraŋ miriŋ, pambabariŋ widyaṣṭa, wus nora pakéwuḥ, wit kaliŋ kaliṅan wrana, raṅkĕp sasra winiyak saya kahèkṣi, séjé kaŋ ati tuna.
23. dènnya tan wruḥ paḍaŋ kaŋ ṅaliṅi, sujanma wruḥ kaliṅaniŋ nétra, ṅucap kaliṅan caṅkĕmé, kupiŋ kaliṅan kruṅu, gugon tuhon baraŋ tan yukti, mambu kaliṅan grana, maṅkono truwilun, luwiḥ aṅèl suŋ wawaraḥ, yèn woŋ wuta tinuntun ratuniŋ gampil, yèn woŋ kaliṅan paḍaŋ.
24. luwiḥ éwuḥ pakéwuḥ sinuŋ wrin, saka paṅakuné tétéla traŋ, gaṇḍuli kakèk moyaṅé, atiné kaŋ kalimput, aṅĕn aṅĕn anarik silib, ṅapusi kasuñatan, mila kèḥ woŋ klèru, aṅĕn aṅĕn cinipta hyaŋ, yèn woŋ pana pramanĕm rasaniŋ wadi, pikiran jajalanat.
12. gambuḥ
1. ywa sira tumbak tambuḥ, aṅĕn aṅĕn jajaliŋ tumuwuḥ, sapiraa pikir yèn makṣiḥ basuki, mèḥ pantĕs dadi hyaŋ aguŋ, awit kuwasa sĕtyélok.
2. naṅiŋ yèn karṣa dudu, nora pisan pantĕs yèn ḍinaku, nĕdya ñĕbrot miwaḥ ṅècu ṅampak maliŋ, aṅĕn aṅĕn wus lumaku, apa sasĕdya rumojoŋ.
3. hèḥ dèn awas puniku, woŋ sinahu putus iŋ paṅgayuḥ, dé yèn mukmin kaŋ ciṅkraŋ duruŋ patitis, hawa napsu cukulipun, ati pitu jantuṅiŋ woŋ.
4. pinara pitu dinum, lagéhané wawatĕkanipun, sinalinan tĕmbuŋ basaniŋ ṅarabi, ginambar rupané saru, patiŋ clorèŋ dubaŋ kĕcoḥ.
5. tiŋ cléno patiŋ trutul, pantĕs tĕmĕn sastra ṅarab kluwus, tilas tètès dinilat tan maratani, sarwa saru yèn dinulu, ukara basané crobo.
6. kiṭal kaworan ḍusun, yèku déraḥ kaŋ wus patiŋ ḍrawul, ḍoḍal ḍaḍil sarta dèn ĕṅgoni tiṅgi, biniyak bubar lumayu, piniṭĕs iṅambuŋ séṅok.
7. laḥ iku mukmin ḍusun, ṅaṭik aṭik karya kĕṭuk bujuk, ṅalam pitu klimaḥ tayibaḥ tinulis, allaḥ lan mukhamad dèn du, sastrané ginawé élok.
8. akèḥ caritanipun, jroniŋ déraḥ iṅkaŋ gumun gumun, iya iku kaŋ dadi mĕtĕṅi pikir, nanarik ati aṅgugu, guguru tulisan goroḥ.
9. goroḥ garan pambujuk, nora wĕruḥ yèn ṅèlmu kĕpahuŋ, nuli iṅsun nèṅsèŋ gapura kĕpaṅgiḥ, lan sèḥ sarjanambĕg ṅèlmu, déraḥ sun dadi guguyon.
10. wĕkasan ṅuṅun jĕtuŋ, sun nora wruḥ ṅèlmu kaŋ satuhu, ṅalor ṅidul kawruḥ tan pisaḥ sañari, marma woŋ sarjanèŋ kawruḥ, sandiniŋ bhawana ṅéglo.
11. datan wawaton tutur, muŋ pambudi dalaniŋ paṅgayuḥ, ṅayuḥ ayaḥ ayaḥ yoda mriḥ maḷĕtik, tikṣyaniŋ tyas tajĕm kagluŋ, gugulaŋ budi krahayon.
12. woŋ kaŋ pana iŋ ḷĕmbut, yèn wus wĕruḥ sakanparanipun, kaṇṭi sakṣi ñataniŋ kawruḥ kaŋ suṅil, gampaŋ aṅèlé kacakup, cakĕp cukup urip mahot.
13. yayaḥ sagara madu, paṭiniŋ rasa muṣṭikèŋ kawruḥ, nora kéguḥ wruḥ kawruḥ kaŋ dakik dakik, wit wus tinintiŋ kapusus, susĕtya di wruḥ pakéwoḥ.
14. pati iku tan éwuḥ, woŋ kaŋ wĕnaŋ wawaraḥ kaŋ wus wuk, bali muṣṭi titisé kawruḥ sajati, iṅkaŋ titi titis jumbuḥ, tambuḥ tambuḥ trapiŋ mahot.
15. wus sirṇa was pakéwuḥ, baṅsa pati kaŋ duruŋ wus kagluŋ, ginagulaŋ gĕgĕḷĕṅaniŋ dumadi, dadi kadadéyanipun, wus tan kacakrèŋ pasĕmon.
16. tan pralambaŋ tan sĕmu, datan kira kira tanpa tutur, sakanparan antara kaŋ dèn kawruhi, tan jala kaŋ duruŋ duruŋ, tan mikir kaŋ wus kalakon.
17. wit sampyuḥ iŋ paṅéñut, pandulu myaŋ pamyarṣa pamuwus, pañjèrèṅé paṅikĕté wus pinardi, adi adiniŋ tumuwuḥ, baraŋ wujud iṅkaŋ katon.
18. dadi contoniŋ laku, datan pahé lan wujud wajibu, cucukulan kaŋ gumĕlar anèŋ bhumi, mratani dadi paṅgayuḥ, mamriḥ sakṣiniŋ krahayon.
19. yuwana tékat putus, manatasi sukĕrtiniŋ ṅèlmu, jumĕnĕṅiŋ cakṣana murtiniŋ ghaib, nora kéwran iŋ aḷĕmbut, myaŋ agal kaŋ wus kabatos.
20. batiné aṅgĕguyu, mriŋ sasmita gĕtun ṅuṅun jĕtuŋ, tuṅtuṅiŋ tyas wĕniŋ mratani sabhumi, cakraniŋ bhuwana kĕmput, iku manuswa waṣpahos.
21. siliriŋ maruta nrus, maratani iŋ jagad kawĕṅku, bhumi laṅit cucukulan kaŋ kahèkṣi, tĕmpuḥ iŋ mandaya mèru, gĕbyariŋ dipèŋ rat maṅgon.
22. sasa purṇama tèṅsu, wus kagĕḷĕŋ atiné woŋ putus, dadi sakṣi karusakan lan dumadi, campuḥ iŋ tyas dadi sĕmu, kasuñataniŋ pasĕmon.
23. sandiniŋ pati sèstu, culika guŋ nasapi pandulu, marma akèḥ pra paṇḍita klèru tampi, muṣṭi pati tĕmaḥ klèru, tan wĕruḥ jatiniŋ mahot.
24. aṅĕn aṅĕn kasĕdul, lalu lulut kalayu iŋ palsu, pati iku nora mlĕbu nora mijil, nora maṅgon nora suwuŋ, iku sajatiniŋ uwoŋ.
25. sandiniŋ urip iku, wruḥ iŋ jisim roḥ iṅkaŋ lumaku, napasiŋ woŋ mlĕbu mĕtu dadi puji, apa sakrĕntĕgiŋ kalbu, cinipta kuwasèŋ manon.
26. iŋ sajatiné dudu, yèn pana dimurtinirèŋ kawruḥ, susilarja manraṅiŋ cipta sajati, tarku masi walaḥ kagluŋ, tĕgĕsiŋ lapal maṅkono.
27. tiṅgal sabaraŋ laku, dudu krananiŋ allaḥ satuhu, muŋ krananiŋ manuswa iṅkaŋ linuwiḥ, awit gusti kaŋ maha guŋ, tan ṅalap lantaraniŋ woŋ.
28. mobaḥ molaḥ satuduḥ, iŋ pribadi marma bĕnĕr luput, wus maṅkono woŋ wicakṣanèŋ pambudi, séjé lan janma kĕpahuŋ, polaḥ tiṅkahiŋ hyaŋ manon.
29. malaḥ tan ṅrasa kaguŋ, rina wĕṅi salulut hyaŋ aguŋ, pañcadriya sadaya allaḥ kaŋ darbi, iku ciptaniŋ ḷĕḷĕmbut, kaŋ maṅgon nèŋ kayu grawoŋ.
30. prasasat tĕkèk klawu, sajĕg jumlĕg nèŋ grawoṅan kayu, nora wĕruḥ maraŋ cakraniŋ budya di, tansaḥ ṅukuhi kajumbuḥ, allaḥ tuṅgal anèŋ uwoŋ.
31. marmané yèn woŋ putus, tĕtĕs tatas pantĕs kawruḥ jĕntus, tan maṅkono paṅakuné riŋ hyaŋ widdhi, kabèḥ kabudi kacakup, lèjĕm sandiniŋ hyaŋ manon.
32. naṅiŋ prakara iku, luwiḥ mĕmĕt mumĕt ñamut ñamut, lamat lamat lir ṭaṭit tĕmpuḥ jaladri, driyasmu karoban gĕtun, ṅuṅun élokiŋ lalakon.
33. hèḥ kaŋ maca kaŋ ṅruṅu, lalantihĕn rasa srasèŋ tĕmbuŋ, ywa katuṅkul mamèt rumiŋ swara manis, tĕmbaŋ tĕmbuṅiŋ pituduḥ, iki ĕṅgoniŋ ṅèlmu wos.
13. asmaradana
1. rinĕṅgèŋ sastra kinawi, macapat tĕmbuṅiŋ basa, supaya traŋ pamawasé, ñirṇakkĕn was sumlaṅiŋ tyas, mumuk mamaŋ kabéṅkas, sakiŋ surasaniŋ tĕmbuŋ, cinitrèŋ kartas sampéka.
2. lalakon kaṅgo iŋ urip, sampurṇaniŋ kahuripan, saka jajaḥ paṅawruhé, sarjana suséla tama, kataman iŋ sasmita, iŋ ṅèlmu kaŋ alus mulus, murtiniŋ rèḥ pudyèŋ taya.
3. ruruba wajibiŋ urip, kaŋ kaatur hyaŋ sudyarṣa, sanadyan wus wruḥ sandiné, salaḥ kapraḥ linakonan, nadyan blasar kajuraŋ, witiŋ wruḥ saka kaliru, ṅulaḥ swarjana krĕtarta.
4. wruḥ iŋ mokal wruḥ iŋ yĕkti, yĕkti ñataniŋ pamawas, tanpa was rèḥ wus prasajèŋ, sarjanambĕg kasusastran, titi titisiŋ cipta, pinarṣudi nora ṅawur, bédané lan woŋ kaŋ tuna.
5. wruhé kaliṅan paṅèkṣi, dalan jĕmbar ṛĕsik paḍaŋ, barobos kacaṇṭèl caṇṭèl, patiŋ ḍraḍil ḍaḍal ḍaḍal, prandéné tan uniṅa, kaŋ wruḥ muŋ janma kaŋ putus, marma iŋ mĕṅko winĕḍar.
6. tamaniŋ janma dimurti, murcita sandiniŋ baraŋ, patrapiŋ puja pujiné, ywa ṅanti aṅayawara, woŋ urip iku islam, pikukuhé iṅkaŋ kukuḥ, wus mamèt daliliŋ sarak.
7. kitab cilik aran sitin, wakawaṅèn dal islama, kamsatun lapal tĕgĕsé, tuwin pikukuhiŋ islam, iku cacaḥ lilima, sahadat iṅkaŋ rumuhun, iṅkaŋ kapiṇḍoné salat.
8. kapiŋ tri jakatul pitri, kapiŋ pat puasèŋ ramlan, piŋ lima khaji yèn darbé, kuwasa saṅuniŋ marga, hèḥ saguŋ para islam, prayoga ṅawruhi rukun, kaŋ kalawan linakonan.
9. naṅiŋ sawusé ṅawruhi, tĕgĕsiŋ limaŋ prakara, aja tunaduṅkap tyasé, wardi jarwané lilima, pardikaniŋ sahadat, sira sakṣiniŋ hyaŋ aguŋ, kasuñatan saka sira.
10. maṅkana tĕmbuṅiŋ sakṣi, ashadu anlahillaha, waanahu mukhamadé, rasulullaḥ wardinira, anakṣèni manira, tanna rupa kaŋ satuhu, aṅiŋ allaḥ maha mulya.
11. lan nakṣèni kaŋ sajati, mukhamad utusaniŋ hyaŋ, tĕgĕsé jarwané kabèḥ, manuswa sipat mukhamad, tur mĕṅku rasaniŋ dat, sipat roḥ utusanipun, yèku ĕrohiŋ manuswa.
12. jumĕnĕṅiŋ hyaŋ sukṣma di, sakiŋ manuswa kaŋ ñata, jumĕnĕṅiŋ manuswané, sakiŋ pribadi tétéla, jumĕnĕŋ tan pantara, wusnya tĕṅaluk jujuluk, mukhamad kaŋ mĕṅku rasa.
13. akèḥ carita puniki, kuwasaniŋ sukṣmantaya, ḍaku ḍinaku kwasané, ṛĕṛĕbutan sabĕn dina, yèn woŋ pratamèŋ wéka, tan kéwran iŋ agal ḷĕmbut, kamokalaniŋ sasmita.
14. pañjaŋ yèn winarṇèŋ tulis, lèjĕmé sasmitèŋ sadat, iṅkaŋ paḍa krasa bahé, ywa ṅanti aṅayawara, murtiniŋ kawruḥ ñata, saka pañiptambĕg sadu, danujaniŋ woŋ utama.
15. tan prayoga yèn tinulis, wiraŋ sinaṅga iŋ kaṭaḥ, batinĕn bahé patrapé, ywa kawĕca iŋ sasama, kaŋ paḍa salaḥ tampa, paṣṭi dèn arani gĕmbluŋ, tan wruḥ ḍèwèké kaŋ édan.
16. yab yaban pĕtĕṅiŋ pikir, kira kirané kasiṅsal, nora uwal kasasaré, sari sariniŋ kaalan, gumantuŋ kakèk moyaŋ, ṅukuhi kaŋ wus kalantur, iku tiwasiŋ agĕsaŋ.
17. kapiŋ piṇḍo kaŋ winarṇi, bab salat wajibiŋ gĕsaŋ, limaŋ wĕktu sadinané, rukuniŋ wulu myaŋ salat, prayoga kinawruhan, kaŋ nora wruḥ tan pakantuk, patrap wus gumlariŋ kitab.
18. boya kasĕbut nèŋ ṅriki, awit wus akèḥ woŋ wignya, iŋ tĕmbuŋ patrap prantiné, kalamun sira wus bisa, trapiŋ salat saréṅat, laḥ wĕruha tĕgĕsipun, iŋ salat iṅkaŋ pinuja.
19. dé pardikané salati, wus kajarwa anèŋ kitab, maṅkana lapal uniné, slatu rahmat mukaranaḥ, tĕgĕsé tĕmbuŋ salat, rahmat pinariṅkĕn sampun, basa rahmat iku nikmat.
20. lirṇya rahmat sĕnĕŋ pikir, datan ṅruṅu basa ala, tan ṅucap basa kaŋ élok, tan wruḥ rurupaniŋ jajal, tan mambu cĕcĕgahan, nikmat rintĕn lawan dalu, éliŋ baraŋ kasĕnĕṅan.
21. salatiŋ sujanma murti, tajĕmiŋ napas tan pĕgat, marga papat salawasé, mobaḥ molaḥ dadi salat, mĕnĕŋ dadi panĕmbaḥ, marma ta upaminipun, salat lir iliniŋ toya.
22. nora kaṇḍĕg rina wĕṅi, tan antara maca salat, salat saréṅat kinahot, kaŋ laṅgĕŋ praptèŋ kiyamat, maṅkana dalil kitab, wasréṅatu mukhamadun, bakin ilayomil kyamat.
23. saréṅaté kaṅjĕŋ nabi, mukhamadinil mustapa, tĕkèŋ ari kiyamaté, laḥ iku wĕtuné napas, pañcadriya sabadan, laṅgĕŋ sajĕroniŋ iḍup, nora kaṇḍĕg pujinira.
24. nora susaḥ caṅkĕm muni, kacĕmutan mamrĕs cipta, mujudakĕn riŋ hyaŋ manon, kaya salaté woŋ buddha, basarab luṅguḥ jawa, iŋ takbiratul ékramu, mriŋ hu mañjiṅiŋ suwara.
25. hu hu lir cina mumuji, mriŋ utĕg pinuja puja, ṅĕniṅkĕn rasa pujiné, hèḥ sarjana ywa maṅkana, tan ṅandĕl takokĕna, woŋ ṅarab kaŋ putus ṅèlmu, nora awèḥ hu hu muṅgaḥ.
26. sawĕnèḥ woŋ mutaṅalim, salat umiyat iŋ grana, jatiné napas dèn ilo, laḥ poma aja maṅkana, yèn sira arṣa salat, barèsa kéwala bagus, naṅiŋ salat rahsa wruha.
