sakiŋ pamaṅgiḥ kula sĕrat jiljalaha punika makṣudipun ḍatĕŋ piwulaŋ sahé, sarta namuŋ sawantahipun, naṅiŋ surahosipun kaaṅgé walikan, tĕgĕsipun sadaya iṅkaŋ kacariyos iŋ sĕrat wahu aṅgĕpipun sahé, naṅiŋ sayĕktosipun awon, mila kĕdaḥ kinosokwaṅsul. turut kalihan namaniŋ sĕrat : jiljalaha, biliḥ dipun walik, jilja, jajil, laha, ala = jajil ala. lo rak namuŋ sawantaḥ kémawon.
1. ḍaṇḍaŋgula
1. kaŋ sarkara pinurwèŋ sastra di, awit iṅkaŋ asma saŋ paṇḍita, jajalanat saŋ kinahot, kaŋ maṅgyan anèŋ gunuŋ, caṇḍi sèwu saha ṅratoni, sakèhiŋ para sétan, tanapi ḷĕḷĕmbut, samya ulaḥ paṅawikan, nadyan janma kaŋ nĕdya tanajul ṅèlmi, samya sowan saŋ tapa.
2. ṅiŋ wus lami wulaṅé jĕŋ kyayi, datan wontĕn purun iṅkaŋ buka, dadya muŋ sinimpĕn bahé, sabab buku pinuṇḍut, duk iŋ kuna mriŋ hyaŋ ijajil, dadya kaŋ putra wayaḥ, awis iṅkaŋ émut, naṅiŋ ta jaman iŋ maṅkya, putra wayaḥ kaṭaḥ iṅkaŋ samya éliŋ, manut mriŋ kaṅjĕŋ éyaŋ.
3. maṅkya wontĕn wayaḥ kaŋ maḷĕtik, maṅun surat buku duk iŋ kuna, ṅiŋ sastra jinarwakaké, buku iṅkaŋ rumuhun, sastra durga basa ijajil, anaṅiŋ yèn manuta, pra wayaḥ sadarum, sun duga tan ana bisa, mila maṅké tinĕmbuṅkĕn basa jawi, supadya wigya tĕraŋ.
4. kutika bĕrmulahi tĕrtulis, paḍa ari slasa taṅgal piŋ pat, bulan dulkijaḥ tahun jé, sĕṅkalanya yaŋ tahun, misiḥ paké basa ijajil, séṅkok nèt kĕṇṭi waraŋ, itu jugak turut, misiḥ paké lètĕr durga, cuba liat rupanya ḍibawaḥ ini, bukan tĕrlalu éram.
5. awit paṅandika jĕŋ kiyayi, jajalanat mriŋ kaŋ putra wayaḥ, aḍuḥ anak putuniṅoŋ, kaŋ èstri miwaḥ jalu, paḍa sira pyarṣakna kaki, wulaṅé éyaṅira, poma dèn kĕcakup, naṅiŋ kaŋ ḍiṅin sun wulaŋ, iṅkaŋ priya sarta kaŋ wus antuk siṅgiḥ, tatané woŋ nèŋ praja.
6. yèn ta nuju sira tampa ḍuwit, saka landa bañjur lakokĕna, potaŋ potaṅĕna kabèḥ, mriŋ sakèhiŋ kañcamu, naṅiŋ aja sabĕn priyayi, muŋ kaŋ tuṅgal wĕdana, iku bahé cukup, paḍa tĕbasĕn kaŋ bayar, lakokĕna nĕmbĕlasan wis prayogi, sukur yèn olèḥ dinan.
7. sarupiyaḥ manak tĕluŋ ḍuwit, sadinané iku kaŋ utama, naṅiŋ aja léna aṅgèr, jaluka layaŋ pĕṭuk, prataṇḍané kaŋ utaŋ sami, lan bañjur sĕkṣèkĕna, mĕñaŋ wĕdanamu, lan tĕpuṅa karo préntaḥ, iṅkaŋ pañcèn ñaḍoŋ bayar mĕñaŋ ṅloji, akunĕn sahudara.
8. gula ĕtèḥ iku aja lali, pĕṇḍak bayar bĕcik aṅgawaa, yèn préntahé pañcèn ñĕrèt, buṅaḥ tukokna candu, bobot sigar rèk ora rugi, yèn sira tan maṅkana, mĕṣṭi nora wuruŋ, iŋ buri kakéhan nalar, pĕs apĕsé tarikamu diwĕlani, mriŋ priyayi kaŋ utaŋ.
9. lan aja sok ṅĕcèḥ ĕcèḥ ḍuwit, iṅkaŋ pañcèn tan ana pamriḥnya, kaya ta nèk ana ḍayoḥ, sabĕn pyayi disuguḥ, papaṅanan wédaṅé kopi, iku kaṛĕbèn apa, sĕtun ñuguḥ udut, iku yèn wis pañcèn kamrat, kĕjabané ḍayoḥ aṅĕtĕri ḍuwit, iku patut ñuguha.
10. lawan aja sok ṅĕnèhi ḍuwit, ñaŋ woŋ mlarat muṇḍak kĕtularan, nadyan ta taṅgamu aṅgèr, kalamun añjĕjaluk, ḷĕṅa tuwin sĕga saṭiṭik, ginawé dulaŋ bocaḥ, poma sira putu, wis aja korèwès pisan, iku iṅkaŋ dadi jalaran bilahi, gombalé anunular.
11. lan yèn ana kañcamu ñiñiliḥ, iṅkaŋ jĕnĕŋ rupa sasaṇḍaṅan, jarit sapanuṅgalané, iku poma dèn émut, aja ṅanti sira wènèhi, iku laraṅan iṅwaŋ, aṅgĕr éblis iku, gèk maṅsa diulihĕna, tĕrkaḍaṅan wis ana goné gowankin, yaḥ mara baḍèk iya.
12. lamun sira arṣa buwaŋ ḍuwit, bĕcik sira mĕñaṅa kamulyan, saṅua ḍuwit siŋ akèḥ, sébaa saŋ hyaŋ guru, añuwuna kaŋ widadari, siŋ bĕcik warṇanira, yèn sira duruŋ wruḥ, sĕjatiné iŋ kamulyan, prĕnahira kulon bèntèŋ cakĕt kaki, déné guru baṭara.
13. lan narada kaŋ ṅrèḥ widadari, sayĕktiné mak cilik pralata, mak citralata nradané, yèn sira wus kĕpaṅguḥ, lan hyaŋ guru nrada dèn aglis, ñahosana bubuṅaḥ, ḍuwit limaŋ taṅsul, supaya sira jinaga, nuli sira éṅgal ñuwuna prĕmisi, maṅgon anèŋ suwarga.
14. kahyaṅané iṅkaŋ widadari, sakaṛĕpmu kaki pilihana, ĕndi siŋ kok duga cècèg, ṅinĕpa sakaṛĕpmu, aja ṅaṅgo sumĕlaŋ ati, muŋ saṅumu wènĕḥna, mĕñaŋ sobatamu, sèkĕt satus aja éman, sabab prĕlunira iku buwaŋ ḍuwit, wuda ya lakonana.
15. apa ana énaké ta kaki, wayaḥ bĕṅi ḍasar ṅaṅgo udan, aḍĕm aḍĕm ñaṇḍiŋ tlèḍèk, tlèḍèké ḍasar ayu, macak barès aṅayaŋ batin, tapihé lurik abaŋ, kĕmbĕnira gaḍuŋ, aṅluṅjiwa cara sala, muŋ suwĕṅé pĕnuṅgulé lagi siji, anaṅiŋ wis barléyan. 16. aṅladèni ṅiris iris roti, roti gandum tur ṅaṅgo mĕrtéga, wédaṅé bubuk karo tèḥ, gulané gula batu, lan tukua candu sĕtahil, diyané oṅtiŋ gĕlas, bĕdudan sinĕlut, bañjur macak ṅombé wédaŋ, pacitané nèk ñĕrèt aṅambuŋ pipi, wis kaya raja cina.
17. iku kaki bĕcik sabĕn bĕṅi, lakonana dadi woŋ utama, tan kuciwa gonmu mèrèt, lan aja ḍĕmĕn mlaku, añéwaa kréta siŋ bĕcik, lan ṅiṅua jayéṅan, anaa katĕlu, paḍa jakĕn nuṅgaŋ kréta, lan aḍèkmu ajakĕn aplĕsir plĕsir, kaṛĕbèn paḍa buṅaḥ.
18. lan yèn nuju ḍĕmĕnamu kaki, luṅa ditayub mĕñaŋ pacinan, bañjur susuḷĕn dèn agé, kĕlamun wis kĕpaṅguḥ, bĕrṇantia ṅiras niṅali, naṅiŋ dèn rada cĕḍak, bèk aḍèkmu wĕruḥ, poma aja luṅa luṅa, antènana mĕṅko nèk aḍèkmu naṅis, nèk udan ya ṅéyupa.
19. aja mikir sayaḥ aḍĕm arip, iya iku mañjiŋ tapanira, mĕṅko gañjarané kĕñcèŋ, tan ṅaṅgo bésak bésuk, paḍa uḍu bañjur sawĕṅi, laḥ mĕṅko titènana, sabubariŋ tayub, aḍèkmu rak bañjur mĕdal, ṅajak muliḥ nuṅgaŋ kréta woŋ kakaliḥ, wayaḥ kaya paṅantyan.
20. yèn wis prapta wismanira kaki, poma bañjur saréya nèŋ kamar, woŋ loro kĕmula ciṇḍé, siŋ digo soṇḍèr mahu, ciṇḍé kĕmbaŋ ambuné waṅi, iŋ kono bañjuṛĕna, ḍaṅsaḥ sasukakmu, mara kaki rasakĕna, wulaŋ iṅsun apa bĕnĕr apa sisip, ayak ñamlĕŋ kéwala.
21. sapa woṅé kaŋ nora kĕpéṅin, iya iku woŋ muṅgaḥ suwarga, nora na suwarga manèḥ, kĕjabané ta bésuk, lamun sira tumĕkèŋ pati, tamtu ginañjar swarga, anèŋ watu lumbuŋ, ika rak katon suwarga, yèn wus antuk pituluṅé hyaŋ ijajil, byar jlĕg katon suwarga.
22. muŋ aṅgĕré iki kok lakoni, pĕṣṭèkĕna suwargamu béñjaŋ, tĕmpuḥna yèn koṅsi gĕcèt, aku kĕduga naṅguŋ, mĕnèk sira misiḥ kuwatir, sĕkṣèkna ñaŋ pradatan, ṅaṅgo prataṇḍaku, laḥ kaki mara golèka, sakèḥ guru paṇḍita utawa santri, kaŋ wani naṅguŋ swarga.
23. añjajaha ñaŋ pĕsantrèn kaki, lan bablasa mĕñaŋ panaraga, wis ora yèn kaya iṅoŋ, mulané sira kulup, aja taṅguŋ gonmu ṅlakoni, sanadyan ta gombala, aja sira kéguḥ, sabab duña mono apa, ṅakératé kaŋ kok pĕḷĕŋ iku kaki, mukti maṅsa akua.
24. lawan manèḥ wulaŋ iṅsun kaki, pĕṇḍak pasar bĕcik anayuba, ana ṅomahira ḍéwé, tlèḍèké ḍĕmĕnamu, lan ṅundaṅa para priyayi, ajakĕn ḍahar pista, kaṛĕbèné guyub, lan cahosana bubuṅaḥ, myaŋ janèwĕr inuman miwaḥ braṇḍuwin, bañjur sira jogèda.
25. siŋ ginahu ramèn ramèn kaki, cikbèn akèḥ pyayi kĕtularan, ḍĕmĕn roṅgèŋ kaya kowé, iba gañjaranipun, hyaŋ ijajil mriŋ sira kaki, trakaḍaŋ swarganira, anèŋ gunuŋ lawu, bokmanawa lawas lawas, katarima gonira ñĕkĕl pulisi, ṅandikan mriŋ mañciṅan.
26. tĕrkaḍaṅan sira bañjur lali, sirku bahé mara baḍèk iya, ora éliŋ wiwitané, sun kĕmpit kaya manuk, iṅsun juju lir wadé yĕkti, baṛĕŋ wis nĕmu mulya, gèk bañjur tan émut, baṛĕŋ ḷĕkas éliŋ sira, ṅundaŋ undaŋ baṛĕŋ tĕka ditambuhi, pijĕr ñawaŋ bĕḍaya.
27. hèḥ ta aja maṅkono sirèki, iku lagi guguyon kéwala, muŋ wulaṅku mahu aṅgèr, poma dipun mituhu, aja ṅaṅgo éliŋ nak rabi, malaḥ yèn sira mlarat, pĕgatĕn bojomu, dadi woŋ mantĕp iŋ tékad, muŋ aḍèkmu kawinĕn sama sĕkali, yak ora kĕtaṅguṅan.
28. lamun sira éliŋ anak rabi, dadi duruŋ mantĕp tékadira, miŋ kaya si naya bahé, éman tĕmĕn bagusmu, duwé watak patiŋ saṛĕṇḍil, ana kaŋ wĕdi bĕṅaŋ, bokmĕnawa buntuŋ, laḥ ta iku udur apa, kaya dudu satriya traḥ majapahit, dadak wĕdia bĕṅaŋ.
29. ana manèḥ pyayi aṅarani, jaré saru pyayi ñaŋ tléḍékan, ya kuwé saṅsaya gèsèḥ, sĕtun nèk mĕñaŋ paṭuk, iku rada saru sĕṭiṭik, naṅiŋ yèn aku ora, malaḥ saya luhur, sabab bisa sobat landa, saraḍaḍu wuwuḥ cina karo ĕñcik, gèk maṅsa jaré ala.
30. malaḥ kaya klana saŋ narpati, duk kalané kasmaras kumuda, balané baciṅaḥ rèṅèp, mara rak saya mrabu, laḥ ta ĕndi siŋ ora bĕcik, mulané aku rada, sĕṭiṭik sok gumun, siŋ ṅarani jaré niṣṭa, kuwi priyé pĕṅrasané siŋ ṅarani, aku kok ora duga.
31. ayaké siŋ wĕdi buwaŋ ḍuwit, bañjur dadi nanacad sawiyaḥ, ṅarani saru si ṭolé, rak iku woŋ duruŋ wruḥ, dalil éblis dadak mahoni, bok aja sumaṅkéhan, siŋ ditaṅguŋ kahum, wis kaki aja kok rasa, uniniŋ woŋ kaya ĕmbuḥ ĕmbuḥ kuwi, maṅsa ñuwargakĕna.
2. asmaradana
1. braṅtanana kaŋ sayĕkti, kabèḥ wulaṅé si éyaŋ, mĕraka tak wulaŋ manèḥ, laku siŋ rada pĕŋ pĕṅan, kaki sira aṅgowa, tamtu gañjarané ṅumbuk, naṅiŋ poma ja kawĕntar.
2. yèn ṅanti kapyarṣèŋ janmi, dadya baḍar lakunira, mulané siŋ rada mréné, yèn sira arṣa wĕruha, sajatiniŋ sidĕkaḥ, dana rasa tĕgĕsipun, ḍĕmĕna bojoniŋ taṅga.
3. rékané maṅkéné kaki, yèn taṅgamu lagi luṅa, trakaḍaṅan lagèk cahos, ya kuwi siŋ kĕbĕnĕran, bañjur sira sañjaa, api apia duruŋ wruḥ, nèk siŋ lanaŋ ora ana.
4. bañjur takona siŋ ririḥ, kakaŋ napa wontĕn griya, sabab ḍèk wiṅi pun kaṅsèn, ṅiŋ wĕliṅé kaliḥ kula, nèk aku ora ana, ḍuwit wènèḥna bakyumu, mĕkatĕn raka jandika.
5. mĕṅko nèk gĕḷĕm nampani, laḥ kuwi siŋ kĕbĕnĕran, gampaŋ cĕkĕḷĕn taṅané, naṅiŋ aja miliḥ papan, maṅsa ṅaraḥ bédaa, maṭok aṅgĕr prĕlu cukup, wis kaḷĕbu woŋ utama.
6. naṅiŋ ana siŋ ṅuṅkuli, yèn sira nuju ṅawula, kinasihan mriŋ woŋ gĕḍé, bĕcik kaṭik saratana, kaṛĕbèn wuwuḥ trĕsna, béḍaṅĕn klaṅĕnanipun, pilihĕn siŋ kinasihan.
7. wis tamtu yèn wuwuḥ asiḥ, sababé wis tuṅgal rasa, rasa mulya sĕjatiné, iku sarat kaŋ utama, naṅiŋ dipun prayitna, sukĕt goḍoŋ aja kruṅu, muṇḍak baḍar lakunira.
8. sasabana laku santri, naṅiŋ aja tĕmĕnanan, muŋ éṭok éṭoka bahé, sabab yèn ṅanti konaṅan, gonira bébéḍaṅan, tan wuruŋ pabas gulumu, bĕjané sira binanda.
9. mĕṣṭi sira ditakoki, tan wuruŋ bañjur ginlaṇḍaŋ, ñaŋ pajĕkṣan masuk mriŋ rol, tamtu yèn olèḥ gañjaran, dèn ukum anèŋ pasar, disapu kapiŋ roṅpuluḥ, jur dibuwi woluŋ dina.
10. saluwarmu saka buwi, bañjur sira diḍĕḍabyaŋ, digawa ñaŋ masjid gĕḍé, kono gonmu sida macak, didusi anèŋ blumbaŋ, kuṅkuma bahé sabĕḍug, mĕṅko nèk sira wis mĕntas.
11. rak bañjur dibusanani, rambutmu dicukur mrapat, rahimu sinuṅgiŋ anèḥ, aṛĕŋ ĕñjĕt karo atal, bañjur kon nuṅgaŋ jaran, jaran képaŋ ṅaṅgo lawuŋ, digamĕli kramaléya.
12. nadyan maṅkonowa kaki, iya bĕcik antĕpana, kuwi rak miŋ coba bahé, lara wiraŋ lakonana, wis jamakiŋ agĕsaŋ, yèn bakal ginañjar luhur, tamtu gĕḍé cobanira.
13. malaḥ yèn satriya luwiḥ, nèk wis mantĕp tékadira, buṅaḥ tumĕkaniŋ layon, bisaa mati babahan, goniŋ béḍaŋ wanudya, dadya sabil patinipun, iya iku woŋ jlĕgĕḍag.
14. ya iku tirunĕn bĕcik, kĕndĕlé wis kaya landa, saraḍaḍu ṅloji gĕḍé, nèk ṅrĕbut bojoniŋ taṅga, tan ṅaṅgo ṅaraḥ araḥ, bañjur ñoṅkol bahé kĕpluk, kowé rak maṅsa kalaha.
15. yak abot tĕmĕn woŋ urip, nèk nĕdya ṅlakoni sréṅat, kudu kĕndĕl pahitané, naṅiŋ yèn tan ṅlakonana, bakal tan antuk swarga, sinikṣa drubikṣa bésuk, mara kaki titènana.
16. woŋ kaŋ ḍĕmĕn laku santri, dina dina nĕmbaḥ mriŋ hyaŋ, kahé rak gaḍaṅan ḍéyos, mulané aja sok cĕrak, yèn kruṅu siŋ sok doṅa, ĕṇḍasmu rak bañjur ṅĕlu, tĕrkaḍaŋ sira kantaka.
17. yak wis aja dirasani, muṇḍak kruṅu siŋ sok doṅa, nèk misuḥ ḍak dadi gawé, iya nèk misuḥ kéwala, tĕrkaḍaŋ doṅa srabat, iya rak kaya dipĕṇṭuŋ, ñaŋ siraḥ olèḥ kumĕmplaŋ.
18. ya mulané aṅèl kaki, woŋ urip nèŋ dina duña, gampaŋ aṅèl pratikĕlé, mara kaki rasakĕna, woŋ kaŋ ḍĕmĕn sĕmbahyaŋ, énak ĕndi karo tayub, nèk aku énak jaṭilan.
19. tur ta ṅaṅgo tombok ḍuwit, naṅiŋ kok ñaŋ ati sukak, woŋ nĕtĕpi saréṅaté, ḍuwit rak minaṅka slawat, buja dadi sidĕkaḥ, jakaté olèḥmu tayub, kabèḥ pyayi paḍa ṛĕna.
20. dalaḥ kabèḥ kaŋ niṅali, lanaŋ wadon paḍa bérag, malaḥ nunut paḍa jogèd, tayub anèŋ ṅisor gĕḍaŋ, loṇṭéné dikon nĕmbaŋ, sakiŋ kĕpéṅiné tayub, tuku caho digo arak.
21. iku prataṇḍané kaki, nèk mula laku utama, ñĕnĕṅaké atiniŋ woŋ, nora kaya woŋ slawatan, santriné piraŋ piraŋ, ḍèk ora ana siŋ ṅiṅus, anaa ya paḍa gĕla.
22. kĕjabané kañca santri, laḥ iku maṅsa boḍowa, yak wis mĕṣṭi ora cècèg, mulané aja sĕmanta, ñaŋ santri digo apa, muṇḍak sira digĕguyu, diarani rada édan.
23. naṅiŋ aja sĕrak sĕrik, diwahoni mriŋ woŋ kaṭaḥ, nèk wani tabokĕn kĕplog, yèn dikroyog ya ṅamuka, maṅkono woŋ jlĕgĕḍag, aja ḍĕmĕn clurat clurut, kaya dudu traḥ pĕṇḍawa.
24. lan yèn nuju sira kaki, jajagoṅan lan woŋ kaṭaḥ, yèn ana siŋ wani ñĕṅès, ṅajak guguyon mriŋ sira, ya bañjur pisuhana, mĕnèk wani maḷĕs misuḥ, jur sudukĕn babar pisan.
25. karo bok rada siŋ ḍiri, yèn lumaku nèŋ dadalan, aja sok ñimpaṅi uwoŋ, nèk ana siŋ wani nuñjaŋ, tabokĕn bahé kĕplag, pĕṣṭi yèn kajèn awakmu, poma kaki lakonana.
3. sinom
1. sahiki wis salin tĕmbaŋ, maṅkéné bahé ya uwis, ora susaḥ ṅaṅgo taṇḍa, baḍénĕn nèk ñata wasis, lan wulaṅku sahiki, rak ñamlĕŋ tur ṅaṅgo éclum, naṅiŋ rada kuciwa, pun kaki duruŋ ṅlakoni, niŋ ḍèk biyèn gajĕgé wis rada bisa.
2. hèḥ kaki siŋ rada cĕḍak, nèk ana woŋ siŋ miyarṣi, aja siŋ janma manusa, caciŋ kruṅu dadi janmi, bok dimréné saṭiṭik, aja ṅaṅgo rikaḥ rikuḥ, rikuḥ rikuḥ bèk apa, woŋ aṛĕp nampani waṅsit, waṅsit ruṅsit kĕsit tur aṅaṅgo kĕsat.
3. tĕrkaḍaŋ sira wis bisa, déné wis lawas nèŋ puri, naṅiŋ duruŋ antuk waraḥ, nèk iku jatiniŋ ṅĕsit, yèn sira wis ṅawruhi, kasĕbut janma linuhuŋ, mĕṅko aku dak blaka, siŋ tĕmĕnanan ta kaki, satĕmĕné sira ḍĕmĕna bĕḍaya.
4. naṅiŋ aja sok lanaṅa, miliha siŋ sigit sigit, satriya kaŋ misiḥ jaka, golèka gogrogan srimpi, tamtu nèk bisa ḍiṭiŋ, tur rupané raba dagus, woŋ wis dadi bĕḍaya, apĕsé duwé prak ati, naṅiŋ aja kaŋ misiḥ dadi bĕḍaya.
5. yèn kĕtaṅgor siŋ bĕḍaya, pĕṭiṅané para dĕlir, maṅsa dadak pradulia, ñaŋ kowé malaḥ ṅĕmprèti, yèn konaṅan guprĕmin, tan wuruŋ pagas gulumu, mulané siŋ prayitna, satindakmu ṅati ati, sabab iku rak prakara tĕmĕnanan.
6. karo poma wĕkas iṅwaŋ, yèn wis antuk gonmu miliḥ, poma siŋ bisa ṅawula, ṅladèni priyayi sigit, siŋ mantĕp trusiŋ batin, lan siŋ sarèḥ aja kahu, sira woŋ lagi magaŋ, mujia aglis antuk siḥ, siŋ tumĕmĕn naṅiŋ aja trañak trañak.
7. woŋ aṅèlé ṅudubilaḥ, yèn duruŋ olèḥ ṭĕk kaki, kudu cumaḍoŋ sakarṣa, ladènana rina wĕṅi, karo siŋ ṅati ati, nèk bisa siŋ rada lucu, supaya nisihana, mĕñaŋ daramu woŋ sigit, naṅiŋ aja kok cara ḍĕmĕn si gĕbyar.
8. ora kĕna kasar kasar, mĕnèk mĕnèk ditĕmpiliŋ, tur iya tan dadi apa, malaḥ ṅĕñcĕṅaké pikir, naṅiŋ kok rada watir, nèk kĕbañjur ḷĕṅguk ḷĕṅguk, kĕpriyé polahira, nèk kowé bañjur mayaṅi, golèk guna digo ṅlĕjaraké karṣa.
9. bĕciké bañjur séwakna, kréta aturana aglis, ñaŋ toko tuwin pacinan, rak daramu bañjur liliḥ, lan ĕndi siŋ dilirik, baraŋ baraŋ toko mahu, yak wis aja kok añaŋ, jur tukunĕn bahé ya wis, muṇḍak rèwèl iya bañjur ḍuwitana.
10. aja mikir ṅaṅgo ṛĕga, nadyan muṇḍuta èrloji, siŋ ṛĕga roṅatus sĕmat, laḥ ya tukokĕna kaki, aṅgĕr ṅomaḥ jèḥ sugiḥ, aja ṅaṅgo étaŋ étuŋ, maṅsa ṅaraḥ gombala, aṅgĕré daramu asiḥ, nadyan gombal nèk ana kératé mulya.
11. hé maṅsa duwéya sira, umur satus tahun kaki, rak gèk muliḥ maraŋ swarga, mumpuŋ sira misiḥ urip, ṅlakonana tabĕri, ṅawula woŋ bagus bagus, siŋ bĕcik patrapira, dikapak kapakna kaki, anuruta aja koṅsi gawé cuwa.
12. karo bĕcik saradana, guna paṅasihan kaki, wis tamtu yèn bañjur bablas, gĕlis tampa layaŋ buslit, lakuné amuŋ mutiḥ, pituŋ dina bahé rampuŋ, ṅèlmuné tampanana, mara kaki tak wuruki, sun amatak ajiku si jaran guyaŋ.
13. tĕtĕgar tĕṅahiŋ pasar, gagamanira cĕmĕṭi, sada lanaŋ sakiŋ swarga, apa kwasaniŋ cĕmĕṭi, sun sabĕtakĕn bhumi, sigar trus bhumi sap pitu, sun sabĕtkĕn sagara, dadya asat ponaŋ wariḥ, sun sabĕtkĕn iŋ gunuŋ pan iya sigar.
14. gunuŋ manèḥ tan sigara, bok atiné jabaŋ bayi, iṅsun sabĕt sada lanaŋ, wis tamtu nèk bañjur mati, nèk ora sida mati, sida édan turut luruŋ, nèk ora sida édan, awĕkasan dadi asiḥ, wĕlas asiḥ bĕndara mriŋ awak iṅwaŋ.
15. iku kaki lakonana, sajĕroné sira mutiḥ, lan ṅaṅgowa udut mĕñan, naṅiŋ nèk wis siṛĕp janmi, amalna aja lali, liṅgiha bari pitĕkur, nèk ṅanti ora kĕna, tĕmpuḥna maraŋ kaŋ nulis, pĕṣṭèkĕna bèk maṅsa ṅaraḥ gagala.
16. kowé rak bañjur jlĕgĕḍag, malaḥ daramu kaŋ wĕdi, sakaṛĕp kaṛĕpmu ṅuja, ajakĕn ñaŋ ṅĕndi ĕndi, paṅrasa jakĕn mati, bĕndaramu rak ya manut, naṅiŋ kowé siŋ bisa, aja dumèḥ diwĕdèni, sakarṣané nèk mumuṇḍut tukokĕna.
17. laḥ yèn bĕndaramu karṣa, aturana ṛĕmĕn riṅgit, ya kuwi siŋ kĕbĕnĕran, ḍèrèkĕna dipun aglis, lan saṅua siŋ akiḥ, kaṛĕbèn buṅaḥ daramu, naṅiŋ dipun prayitna, nèk ana bujaŋ siŋ wani, tabokana yèn lawan ya patènana.
18. naṅiŋ tak kira wis ora, yèn wania tak kilani, aṅgĕré sira jlĕgĕḍag, aja ṅanti kalaḥ ḍuwit, lan aja wĕdi wĕdi, aṅgrasĕn bahé ya katut, nadyan anaa landa, aja kowé miṅgraŋ miṅgriŋ, jakĕn tabé lan bañjur jakĕn caturan.
19. landané rak bañjur tata, ora gĕḷĕm brigaḥ brigiḥ, sabab kaḍisikan cara, wis kaki siŋ ṅati ati, yèn ana woŋ mahoni, yak wis bok aja kok ṛĕmbug, yèn kabèḥ wus linakyan, wulaṅku siŋ kiñcliŋ kiñcliŋ, mĕṅko iṅsun wulaŋ ṅèlmu cara tuwa.
4. mĕgatruḥ
1. karuhané yèn sira sukak ṅèlmuku, bañjur ḍĕmĕna madati, nèk bisa ñĕrèta candu, aja akèḥ bok saḍuwit, sabĕn dina aja towoŋ.
2. lan gawéya bĕdudan gaḍiŋ siŋ bagus, wĕton nagara émuḍi, cupak tukua siŋ bagus, sĕlutĕn salaka putiḥ, rupané ḷĕjĕt mĕñcoroŋ.
3. miŋ ciyamé tukua maraŋ ciyuhu, sabos ṛĕga slawé rispis, sacĕpuké akik wuṅu, muŋ ṛĕga roṅatus rispis, apyun tukua sagloṇḍoŋ.
4. laḥ jajaḷĕn ñĕrèta nèŋ tĕmpat tiḍur, sĕlirmu kon ṅĕladèni, sambi ṅiris roti gandum, mĕrtégané aja lali, bañjur paṅgaṅĕn nèŋ aṅlo.
5. apa ana siŋ ṅuṅkuli ñĕrèt candu, ḍasar bĕṅi ṅaṅgo grimis, diyané oṅtiŋ wis murup, tèhé pun punan sumaṇḍiŋ, cèrèté kumrĕṅsĕŋ umob.
6. ñamlĕŋ baṅĕt pacitané sĕmat satus, ukon talèn sèkĕt rispis, sakaṛĕp kaṛĕpmu tutug, gonĕn ñĕrèt rina wĕṅi, ayaḥ rak kaya twapékoŋ.
7. hèḥ bĕciké ṅaṅgowa ṅundaŋ kañcamu, woŋ tĕlu utawa kaliḥ, siŋ sok paḍa ñĕrèt candu, jakĕn ñĕrèt dadi siji, sabĕn bĕṅi aja towoŋ.
8. nèk wis mĕndĕm mĕṅko rak gatĕl awakmu, lan ṛĕmbugmu bañjur mintir, apa siŋ paḍa kok ṛĕmbug, wis tamtu yèn bañjur gĕlis, iŋ kono rak kaya kantor.
9. mikir jagad ḍaḍaratan tuwin lahut, ṅisor bhumi ḍuwur laṅit, paḍa kaṇḍas samya guyub, lan lakuniŋ saŋ hyaŋ rawi, poma aja koṅsi cobloŋ.
5. paṅkur
1. kapuṅkur woŋ sĕsĕrétan, lan mikira rusaké bèntèŋ ṅloji, tuwin obahiŋ kĕprabhun, ḍawuhé śri naréndra, apa uwis kĕbĕnĕran apa duruŋ, yèn duruŋ ya wahonana, ṛĕmbugĕn siŋ bĕcik bĕcik.
2. lawan pranataniŋ jéndral, iku iya apa wis kok rujuki, nèk woŋ tĕlu duruŋ rujuk, bĕcik bañjur ṅoṭoka, nèk wis ĕntèk apyunmu tukua candu, sĕtahil mĕñaŋ ṅĕpakan, woŋ tĕlu rak bañjur gilig.
3. naṅiŋ poma wĕkas iṅwaŋ, miŋ aja sok ñatur sréṅatiŋ nabi, iku aku ora ṛĕmbug, karo kaṛĕbèn apa, aṅur baya mikira énakiŋ candu, muraḥ laraṅiŋ ṅĕpakan, iku aku aṅrujuki.
4. lan sambinĕn mulaŋ jakṣa, owahana goné mutus prakawis, iku kabèḥ bubuhamu, miŋ prakara kahuman, iku kowé nora kĕna milu milu, nèk gĕḷĕm miŋ wahonana, goné andum goné miliḥ.
5. déné yèn para nayaka, iku patut kowé iṅkaŋ mahoni, sabab kuwajibanamu, siŋ duwé moyok nacad, yèn liyané iṅsun duga duruŋ cukup, yèn kowé aku pitaya, karo ḍiḍis bahé ya wis.
6. mulané woŋ maṅan madat, ora ana wasisé woŋ nimbaṅi, sabab bisa jariŋ kukus, lan wruḥ surupiŋ diyan, bakal kasar bakal alus kabèḥ wĕruḥ, tur tékadé mutĕr jagad, rina wĕṅi tansaḥ mintir.
7. mara ta kaki rak iya, padèk puna akèḥ siŋ woŋ mahoni, ana siŋ ṅarani saru, ana siŋ jaré ala, ana manèḥ siŋ rada tipisiŋ ṛĕmbug, wĕdi mĕnèk bañjur gombal, ana siŋ jaré bĕñciriḥ.
8. lan kĕsèt tan doyan karya, ana manèḥ jaréné gĕlis mati, sabab dipaṅan iŋ kukus, ana manèḥ siŋ nacad, awak kuru lambéné tur ṅaṅgo biru, iku isiḥ kĕkuraṅan, panacadé woŋ kaŋ sĕṅit.
9. iku kaki poma poma, iya aja mikir woŋ mamahoni, iku rak woŋ duruŋ wĕruḥ, mĕñaŋ lukit lukitan, yèn aṇḍéné wis wasis kaya awakku, maṅsa gèk bañjur nacada, sĕtun sĕtun ṅaḷĕm awig.
10. mara siŋ darani ala, jaré saru iku baya siŋ ĕndi, mulané sok aku gumun, kok bisa timĕn nacad, klèru baṅĕt woŋ jĕglĕḍag jaré saru, woŋ wis ora kĕna lara, prandéné jaré bĕñciriḥ.
11. malaḥ nèk ḍèwèké lara, jaluk tamba mriŋ woŋ kaŋ amadati, bañjur diwènèhi candu, kon ṅombé karo wédaŋ, yèn wis ṅombé sakal bahé bisa guyu, tuwin yèn ana woŋ sayaḥ, ditambani iya mari.
12. basa anu nacad gombal, ḍasar gombal naṅiŋ prasasat sugiḥ, sabab baṇḍa wis dipusus, anulya winaḍahan, anèŋ cupu manik aṣṭagina kumpul, sadina dina binakar, tĕmaḥ dadi méga putiḥ.
13. bésuk nèk anèŋ ṅakérat, méga putiḥ iku rak mamayuṅi, bĕdudané iku bésuk, bakal dadi tuṅgaṅan, déné urik dadi cĕmĕṭi ki pamuk, gèk kuwi jaréné gombal, pañcèn woŋ ḍĕmĕn mahoni.
14. olèhé tan doyan karya, mula ñata woŋ ora tahu gliḍig, awit nalaré wis cukup, tra usaḥ ṅaṅgo glawat, caṅkĕm bahé bisa muṅgaḥ gunuŋ ḍuwur, woŋ ilaté pintĕr ḍaṅsaḥ, rak maṅkono woŋ wis wasis.
15. laḥ mara cacadĕn apa, awak kuru malaḥ kaya janawi, maṅsa gèk janaka ḷĕmu, mara rak iya ñata, lambé biru sinawaŋ rak malaḥ sĕmu, laḥ cacadĕn manèḥ apa, nèk bab pati iku paṣṭi.
16. nora miŋ woŋ ñĕrèt modar, nadyan nora ñĕrèt généya mati, anom tuwa déné ya ḍut, yak mara dadak ora, gèk moyoki miŋ woŋ ñĕrèt bahé lampus, wis kaki aja korasa, muṇḍak bubrahaké pikir.
17. naṅiŋ kaki aja éram, nèk dicacad utawa diwahoni, mĕñaŋ sanak sadulurmu, apa manèḥ woŋ tuwa, anuturi mriŋ gonmu añĕrèt candu, wis aja kok rèwès pisan, iku siŋ sok bilahèni.
18. goḍa kaŋ katon woŋ tuwa, ana katon sadulur anak rabi, ana katon ḍĕmĕnamu, kabèḥ paḍa gogoḍa, akon mĕḍot gonira añĕrèt candu, iku kaki siŋ prayitna, siŋ paṅgaḥ aja gumiṅsir.
19. woŋ ahli mĕñaŋ iŋ tékad, ora kĕna éliŋ mriŋ anak rabi, utawa manut woŋ sĕpuḥ, iku baṅĕt laraṅan, mĕnèk kowé ṅanti gugu woŋ tuwamu, yak mara baḍé kĕdukan, mriŋ éyaŋmu saŋ ijajil.
20. tĕṅĕré mĕnèk kĕdukan, rasakĕna kowé rak bañjur dlindiŋ, ṅisiŋ gĕtiḥ maṅsur maṅsur, maṅsa mari maria, kĕjabané kowé lantas mitak apyun, tukua candu bot sigar, sĕrètĕn wis tamtu mari.
21. nèk kok rasa sĕlak lara, iya bañjur uyupĕn bahé gèk wis, sabab jur ḷĕga wĕtĕŋmu, sakal rak bañjur bablas, nèk wis mĕndĕm kowé sasat bisa mabur, wis tan ana kaŋ karasa, ḷĕsu lupa sirṇa gusis.
22. kèri sĕgĕr kuwarasan, laḥ kĕpriyé rasakĕna ta kaki, apa ḍĕmĕn maṅsur maṅsur, apa ḍĕmĕn siŋ ora, mĕnèk kowé ḍĕmĕn lara maṅsur maṅsur, ya nuruta ñaŋ woŋ tuwa, kaṛĕbèné gĕlis mati.
23. yèn kowé tan gĕḷĕm lara, laḥ manuta sréṅaté hyaŋ ijajil, aja ṅaṅgo rikuḥ rikuḥ, rikuḥmu buwaṅana, lan aja sok ṅaṅgo wĕdi mriŋ ramakmu, karo aja wĕdi gombal, kok kaya woŋ adol blĕñik.
24. sok aṅgĕré ana dina, tamtu ana sĕga utawa ḍuwit, aṅgĕr isiḥ ana dalu, canduné iya ana, bok maṅkono woŋ urip urip puniku, yak ora kakéhan nalar, kok siŋ nalar tiŋ juwiwig.
25. déné nora kaṭok ĕmas, lan tan ṅaṅgo ikĕt mariyĕm ṅloji, maṅkono bahé nèk aku, anaṅiŋ woŋ wis lumraḥ, yèn woŋ urip aṅlakoni budi luhur, akèḥ tĕmĕn woŋ siŋ nacad, moyoki tur ṅaṅgo sĕṅit.
26. mara pama kowé salat, baḍèk akèḥ sanakmu siŋ ṅamini, naṅiŋ ora gĕḷĕm mèlu, laḥ iku ṅaḷĕm apa, baṛĕŋ tayub dipoyoki naṅiŋ mèlu, suraké ya nora béda, malaḥ ṅlètèr aṅuṅkuli.
27. saduruṅé jogèd ñata, dikon ṅibiŋ kipa kipa kĕpati, basané karam lan mĕkruḥ, baṛĕŋ saya dipĕkṣa, klélat klèlèt karo ṅuwĕg uwĕg sabuk, jikuk kĕṭip klèru gobaŋ, jikuk gélo klèru bribil.
28. bañjur miliḥ ḍuwit pĕcaḥ, olèḥ nĕm waŋ digo tombok sĕtali, bañjur ṅibiŋ guya guyu, gĕṇḍiṅé kramaléya, jéṅklak jéṅklak aṛĕp lucu nora patut, aṛĕp macak nora bisa, naṅiŋ ora uwis uwis. 29. laḥ kuwi woŋ tuwa apa, bok éliṅa goné ñrĕṅĕni wiṅi, jaréné karam lan mĕkruḥ, géné kuwi kok giraŋ, ya mulané bĕcik gugua ñaŋ aku, gèk maṅkono kuwi susaḥ, moyoki ḍèknèn ṅlakoni.
30. ñĕṅès ñaŋ woŋ ñĕrèt baṅsat, cĕlaṭuné koṅsi brĕbĕgi kupiŋ, baṛĕŋ mara kruḍuk kruḍuk, tutur wĕtĕṅé lara, baṛĕŋ nogog malaḥ ṅĕntèkaké candu, jaréné miŋ digo tamba, déné bot sigar ya ĕntiŋ.
31. ya woŋ pañcèn mula sukak, ñaŋ sréṅatku yak wis aja baribin, ana manèḥ siŋ sok ñatur, sĕṅit ñaŋ woŋ tléḍékan, cĕlaṭuné ñampahi karo guguyu, kok kaya kuraŋ wanudya, géné pyayi ḍĕmĕn riṅgit.
32. nèk aku kok nora makan, aṅur baya grumuta para ñahi, utawa bojoniŋ batur, trakaḍaŋ olèḥ sanak, sukur bagé olèḥ batur siŋ loṭurkuŋ, ipé utawa nak sanak, laḥ kuwi siŋ tĕtĕp pyayi.
33. yak uwis aja dadawa, yèn kĕbañjur muṇḍak kĕrasa ṅati, aṭuk salin siŋ dicatur, kaṛĕbèn saya mapraḥ, lawan antuk pituluṅé hyaŋ ijajul, naṅiŋ bĕcik salin tĕmbaŋ, kinaṇṭi bahé iya wis.
6. kinaṇṭi
1. kabèḥ wulaŋ iṅsun mahu, aja na kliwatan siji, saguŋ putra wayaḥ iṅwaŋ, paḍa ṅlakonana sami, lan sambinĕn ṅabotohan, ṅadu jago tuwin jaṅkrik.
2. jago tajèn jago pupuḥ, sukur yèn ḍĕmĕn kĕmiri, nomĕr siji ṅadu gĕmak, ṅladèni para priyayi, naṅiŋ siŋ kĕndĕl totohan, aja ṅaṅgo wĕdi wĕdi.
3. kaṛĕbèn paḍa diguṅguŋ, ñaŋ kañcamu para pyayi, kalaḥ mĕnaŋ mono bĕjan, aṅgĕr kĕndĕl buwaŋ ḍuwit, paṣṭi diaḷĕm jlĕgĕḍag, rak maṅkono tĕtĕp pyayi.
4. putuku nèk kowé ṅlurug, gawaa ḍuwit siŋ akiḥ, aja ṅanti kalaḥ grĕtak, ñaŋ kañcamu paḍa pyayi, yèn sira kok koṅsi kalaḥ, bok mati bahé ya uwis.
5. lan bĕciké pahitamu, gowowa sĕmat lan rispis, ukon talèn pêpakana, waḍahana pĕṭèn cilik, karo srutumu mĕnila, worṇa bahé karo ḍuwit.
6. lan aja sok koṅsi bluwus, ṅaṅgowa siŋ bĕcik bĕcik, karo krĕtĕpmu barléyan, aja koṅsi kèri kèri, lan ṅaṅgowa urloji mas, karṣèté siŋ ṅaṅgo akik.
7. kaṛĕbèn saṅsaya bagus, lan ṅaṅgowa ali ali, sĕrakit bahé barléyan, siŋ ṛĕga roṅatus rispis, naṅiŋ aja patèk macak, barès kurès bahé ya wis.
8. iku saraté woŋ ṅlurug, dadi kandĕl mĕñaŋ pikir, bokmanawa kowé kalaḥ, ṅanti kĕkuraṅan ḍuwit, krĕtĕpmu bahé saséla, sulapĕn rak dadi ḍuwit. 9. iku poma wĕkas iṅsun, sabĕn dina aja lali, iŋ ṅĕndi ana kalaṅan, bĕcik lurugana kaki, dadi woŋ ginahu jĕmbar, sugiḥ sobat para pyayi.
10. kĕjabané sira ṅlurug, ṅĕdĕgna ḍéwé ya bĕcik, dadi nora kĕtaṅguṅan, maṅkono lakuniŋ pyayi, déné yèn sira tan mĕnaŋ, gonmu ṅadu adu kaki.
11. bĕcik ṅaṅgowa guguru, ñaŋ paṇḍita siŋ wis wasis, sabab éyaŋmu kuciwa, duruŋ tahu ḍĕmĕn mahin, miŋ nonton kadi kadohan, dadi duruŋ pati wasis.
12. kĕcil mula traḍak tahu, adu adu sama mahin, ḍari salaḥ oraŋ tua, kok tiḍak diajar mahin, jaḍi oraŋ guŋ uguṅan, ḷĕbiḥ gĕtun ḍaḷĕm ati.
13. hèḥ mulané wayaḥ iṅsun, kabèḥ paḍa siŋ tĕbĕri, sébaa maraŋ kalaṅan, nadyan nora duwé ḍuwit, yak ya gaḍèk gaḍèkĕna, aṅgonĕn pahitan mahin.
14. lan manèhé wĕkas iṅsun, manawa kasukan pèhi, kĕrtu lima karo kowaḥ, léséhan tanapi bĕlit, sĕtotĕr karo slikuran, sukur bagé bisa uwis.
15. utamané bisa ḍaḍu, ĕpo gimĕr karo posiŋ, dadi bisa sobat cina, tan kuciwa gonmu mahin, kasĕbut woŋ wicakṣana, sabaraŋ karya mĕpaki.
16. lan manèḥ ṅaṅgowa ṅétuŋ, tiṅalané para pyayi, siŋ pañcèn ṅaṅgo tiṅalan, sébanana aja lali, iŋ kono bañjur mahina, sakaṛĕp kaṛĕpmu kaki.
17. iku akèḥ bĕgjanipun, gañjaran kaŋ luwiḥ luwiḥ, sapisan olèḥ tirakat, sabab mĕlèk sabĕn bĕṅi, kapiṇḍo mĕṣṭi mĕnaṅan, sanadyan kalaḥ saṭiṭik.
18. naṅiŋ rak wis sasat untuŋ, aṇḍéné kalaḥ saṭiṭik, ṅomaḥmu rak ora blañja, tur baturmu paḍa mlĕṇṭiŋ, kowé ḍéwé makan énak, mara rak ḷĕbiḥ sĕkali.
19. déné yèn korasa mlĕṇṭuŋ, bañjuṛĕna gonmu mahin, tĕluŋ dina pataŋ dina, iku iṅkaŋ luwiḥ bĕcik, bèn akèḥ olèḥmu mĕnaŋ, bañjur gonĕn rabi riṅgit.
20. mĕnèk kalaḥ aja wuḍu, utaṅa bahé ya uwis, ayaḥ maṅsa dikĕlaha, sĕtun sĕtun ditaboki, mĕñaŋ kañcamu kĕsukan, yak aṅgĕré ṅaṇḍut ḍuwit.
7. paṅkur
1. tog togané wĕkas iṅwaŋ, lamun sira ginañjar bañjur bliṇḍis, nuli sinahua mĕṇṭuŋ, ṅaḍaṅa nèŋ dadalan, ñĕbrot ikĕt nèk wani kĕṇṭèsĕn kĕpluk, iku kaki ḍèḍèlana, agonĕn pahitan mahin.
2. gawanĕn mĕñaŋ pacinan, gaḍèkĕna rak éṅgal olèḥ ḍuwit, nèk mĕkṣa ĕntèk ḍuwitmu, iya golèk golèka, utaŋ ṅutil kalamun iŋ wayaḥ dalu, poma kaki ya maliṅa, aja ṅaṅgo kaṇṭa kaṇṭi.
3. samaṅsané ṅaṅgo réwaŋ, muṇḍak suda gonmu olèḥ mamaliŋ, karo juwarèhi laku, marakaké konaṅan, cikbèn apa muṇḍak ñupĕtaké laku, babahamu ṅisor lawaŋ, gamanmu konaŋ ja lali.
4. lawan maliḥ wĕkas iṅwaŋ, sabĕn dina ja towoŋ gonmu maliŋ, sukur bagé wani ṅècu, ṅajaka para baṅsat, jakĕn ṅècu nèŋ patikèn gonmu ṅumpul, sambinĕn karo sĕrétan, iku mĕṣṭi paḍa gilig.
5. nèk wis matĕŋ ṛĕmbugira, lakonana anĕbak lawaŋ kori, nèk wis mĕndĕm pĕṣṭi cakut, ṅècua ñaŋ pacinan, aja taṅguŋ gonira ṅlakoni putu, nèk cinané wani lawan, patènana bahé ya wis.
6. déné nèk nonahé murwat, poma kaki aja kowé praduli, ambuṅana sakañcamu, kaṛĕbèn saya bérag, iya iku iṅkaŋ marakaké cakut, nèk siŋ lanaŋ patènana, aja kĕtaṅguṅan kaki.
7. yèn wis olèḥ baraŋ baraŋ, dipun giyak giyak ana iŋ margi, surak surak turut luruŋ, oboré gĕbyar gĕbyar, añjlĕgĕḍag kaya prajurit aṅlurug, gamané pĕṇṭuŋ lan graṅgaŋ, tiŋ capéplaŋ anèŋ margi.
8. gitir minaṅka gamĕlan, iku iṅkaŋ anĕsĕgaké pikir, aṅraṅin suwaranipun, karya gambiraniŋ tyas, nèk kĕpĕṭuk woŋ tandaŋ graṅgaṅĕn cĕprut, laḥ ta bañjur ḍèḍèlana, digo wuwuḥ wuwuḥ kuwi.
9. aṇḍéné ṅanti konaṅan, dipun cĕkĕl sira maraŋ pulisi, miŋ dibuwi lan disapu, dibuwaŋ mĕñaŋ sabraŋ, nèk miŋ ṅono bahé aku ora gumun, iku kaki ijiḥ niṣṭa, duruŋ tĕkan aṅlakoni.
8. mijil
1. poma sira ṅlakonana kaki, tindak kaŋ kinahot, sun jarwani iṅkaŋ luhur ḍéwé, iŋ pratiṅkahiŋ kamuktèn kaki, iṅkaŋ ajar wĕrit, èṣṭinĕn satuhu.
2. laḥ siŋ ĕbrèḥ aja ṅaṅgo wadi, poma putuniṅoŋ, tampanana ujar iṅsun kiyé, aja samar gonira ṅlakoni, saniṣkara dadi, laṅkuŋ gĕŋ pinuñjul. 3. yak woŋ urip nèŋ duña puniki, apa kaŋ rinuroḥ, muŋ kamulyan tumĕkaniŋ ĕṅgèn, pĕṣṭèkĕna wulaŋ iṅsun kaki, yèn datan sayĕkti, tĕmpuḥna ki kahum.
4. yak maṅkono kaŋ tĕkan ṅlakoni, matènana uwoŋ, iṅkaŋ datan ana iŋ dosané, pĕṣṭèkĕna yèn tan kolakoni, kaŋ kadya puniki, dadi tuna luput.
5. déné sira lamun ditakoni, ṅakua kémawon, ywa ṅaṅgo liŋ aliṅan siraṅgèr, muṇḍak kasuwèn goné ṅlakoni, para aguŋ sami, pêpak asiḥ lulut.
6. prataṇḍané lamun paḍa asiḥ, aḍuḥ putuniṅoŋ, tamtu sira ṅandikan résiḍèn, dèn jajari kumpni kanan kériŋ, kaŋ pra aguŋ sami, pêpakan sadarum.
7. nèk wis maṅsa wĕktu ditimbali, babo putuniṅoŋ, ṅaṅgo miliḥ dina iṅkaŋ sahé, nora kĕna sok dinaa kaki, kudu ṅaṅgo miliḥ, woŋ wis baṅsa luhur. 8. omahira ṅaṅgo dijagani, kumpĕni nak iṅoŋ, dèn ṛĕkèni sabaraŋ ḍaharé, ora yèn suwiyaḥ wiyaḥ kaki, tamtu nampik miliḥ, papaṅananipun.
9. yèn wis tutug gonira amukti, anèŋ jroniŋ gĕḍoŋ, gya ṅandikan sira riŋ risiḍèn, dèn jajari saguṅiŋ kumpĕni, pra prajurit jawi, aṇḍèr ṅalun alun.
10. laḥ iŋ kono gonira amukti, gumĕr woŋ nononton, kaŋ prajurit usar pêpak aṇḍèr, samya kurmat mriŋ sira woŋ sigit, atémbak apipit, nèŋ lor riṅin kuruŋ.
11. iya kono gonira woŋ sigit, amĕṅgĕp kaprabon, abusana sarwa séta kabèḥ, wastra klambi ḍĕstarira muslim, sumpiŋ gajaḥ ṅoliŋ, tinon ḷĕṅut ḷĕṅut.
12. apa ana kaŋ ṅuṅkuli kaki, yèn wis praptèŋ kono, sanagara amuŋ kowé ḍéwé, iṅkaŋ luhur muṅgaḥ iŋ suwargi, tanpa kira kaki, kamulyan di luhuŋ.
13. wus palaṣṭa surasèŋ sastra di, iṅsun maṅsaboroŋ, pan sumaṅga mriŋ kaŋ ṅuṅĕlaké, dé ta amba saṅĕt tunèŋ budi, amuŋ nĕḍak suṅgiŋ, awon sahénipun.
14. pan sumaṅga wulaṅiŋ ijajil, maṅrèḥ iŋ tyas awon, naṅiŋ sĕmu sinamar sĕmuné, sĕmonira iŋ pasmon mranani, ika ajar wirit, rèḥ baṅsa ḷĕḷĕmbut.
tamat
