sĕrat jiwandana

añariyosakĕn babariŋ ṅèlmi kasampurṇan , pipiridan sakiŋ sĕrat warṇi warṇi , yĕyasanipun para pujaṅga iŋ jaman kina , kacuṇḍukakĕn akaliyan wisikanipun para sujana iŋ jaman sapunika , lajĕŋ kagubaḥ kaḍapur lampahaniŋ jawata aṅéjawantaḥ lajĕŋ añipta kaḍaton tigaŋ paṅgénan. mawi sinawuŋ iŋ sĕkar macapat.

1. ḍaṇḍaŋgula

1. sèwu ḍomas catur dasartati (= 1840), kapiŋ saṅa mukaram kasapta, iŋ warṣa bé rikalané, birahi babar kiduŋ, muḍadama apakṣa kawi, ambaṅun karawitan, mawi rinèḥ kiduŋ, amuŋ ṅéja iṅéwanan, jĕr nir déya kadĕṛĕŋ kudu mamardi, amurwa pralampita.

2. dé kaŋ dadya parasdyaniŋ kapti, dènnya marṇa manawuŋ gitaya, tan katĕnta iŋ tyas dimèn, kataman iŋ paṅguṅguŋ, sariratri iṅaḷĕm baṅkit, ṅikĕt iŋ paṅawikan, ambabar tyas namuŋ, mèt wirayat yuniŋ gĕsaŋ, myaŋ sabisa bisa arṣa mardisiwi, sakulawarga iṅkaŋ.

3. kiraŋ kawruḥ tuna iŋ pambudi, dimèn dadya pambukaniŋ sĕdya, mriḥ widada dumadiné, dadi nora kasĕbut, tuwa tiwas tanpa nuwasi, karana iŋ agĕsaŋ, aṇḍap miwaḥ ruhur, sayĕkti paḍa kéwala, kaŋ kaprĕnaḥ tuwa wajib mituturi, riŋ suta sakwasanya.

4. dé kaŋ maṅka pindaniŋ pamardi, doṅèŋ duk iŋ jaman kuna ana, jawata lwiḥ kadibyané, hyaŋ jiwandana juluk, ṅéjawantaḥ sakiŋ swargadi, jujug iŋ arga sunya, mahasèŋ asamun, dyan mumuja mĕsu budya, ñipta putra lan praja myaŋ karaton tri, datan antara lama.

5. tri candrama wus dadya prajadi, saṅkĕp sarwa araras kawuryan, swamipèŋ radya binètèŋ, raṅkĕp pat luwiḥ pĕṅkuḥ, ḍiṅin bètèŋ tĕmbaga nuli, bètèŋ paruṅgu nulya, salaka katĕlu, pat bètèŋ kĕñcana mulya, ginapura tĕrusan saṅa miranti, maṅka wiwarèŋ praja.

6. kèḥ kaŋ marga prapatan waradin, ṛĕṣik wéra tĕpi linut iṅkaŋ, udaka mili kinalèn, luhuriŋ marga sinuŋ, pañjutadi kinuruŋ muṅgwiŋ, sĕlaniŋ wrĕkṣa kanaŋ, tarapiŋ tataṅgul, yèn dalu paḍaŋ lir rina, kèḥ janma kaŋ wis méndaḥ tĕpiniŋ margi, tulyasri tiniṅalan.

7. myaŋ kaḍaton katĕlu wus dadi, saṅkĕp iŋ sahisinya sarwéndaḥ, tuhu dahat tanpa toṇḍé, ḍĕṇḍĕŋ kumĕṇḍuŋ kĕṇḍuŋ, piṇḍa swarga gurulokadi, gĕḍoŋ gĕḍoŋ ginĕḍaḥ, kĕbak barana guŋ, sotya mas manéka warṇa, kèḥ yaséndaḥ sananiŋ paṛĕkan cèṭi, kaŋ samya listyèŋ warṇa.

8. myaŋ papatiḥ sapanĕkar sami, wus suméwa madyèŋ panaṅkilan, pĕnuḥ ambalabar aṇḍèr, samya bhuṣaṇa luhuŋ, naṅiŋ makṣiḥ mĕnĕŋ tan osik, déné hyaŋ jiwandana, duk samana sampun, sĕnĕdan nèŋ jroniŋ saṅgar, kaŋ iṅaran nĕṅgiḥ gupit mandakini, ya madé sandyasana.

9. ṅiŋ hyaŋ jiwandana tan kahèkṣi, lir manuṅsa wit kinuruŋ cahya, kaŋ umañcur kadyaṅgané, jwalèŋ surya sitaṅsu, anartani jro mandakini, tĕkyan kaŋ tri puraya, katraṅan sadarum, dirèŋ sunariŋ ujwala, nadyan jroniŋ paraja kajajaḥ déniŋ, jwalèŋ hyaŋ jiwandana.

10. prabawanya saṅĕt wiṅit siṅit, pĕkṣi mĕsat iŋ luhur kasaṅlat, tibèŋ kisma murcatmané, kĕnèŋ prabawanipun, risaŋ nuṅku pudya sĕmadi, siḍĕm sajroniŋ praja, tanpa sabawa muŋ, mĕnĕŋ kabèḥ nora obaḥ, muŋ kĕñariŋ sosotya ṛĕṅganiŋ puri, sumirat ṛĕbut praba.

11. muñcar muñcrat tiŋ pañcurat kadi, kilat ṭaṭit iŋ wiyat tan kĕṇḍat, sisiratan wor calèrèt, ṅĕṅuwuŋ anarawuŋ, sakiŋ kwèhniŋ kaŋ kĕñcanadi, sinotya mañcawarṇa, marma sru sumunu, patamanan puspita mas, sawuriniŋ saṅgar nĕḍĕŋ babar sari, tinon tuméjaṅkara.

12. kanaŋ ron ron kamarutan muni, lir pradaṅga aṅrĕraṅin raras, wor gandarum marbuk mawèḥ, sĕmiŋ driya maladkuŋ, maratani jro pura miṅiŋ, tĕṅaḥ taman talaga, botrawi mas murub, pĕnuḥ punaŋ tirtamaya, tinalaṅan praptèŋ kalèn kalèn mili, ṅubĕṅi jroniŋ pura.

13. malaḥ praptèŋ jro praja waradin, samya antuk toyaniŋ talaga, dadya paṅuripan gĕḍé, yayaḥ wé kamaṇḍalu, kaŋ midrawèŋ sajroniŋ ḍiri, maṅsuli jroniŋ saṅgar, iŋ sandyasananuŋ, sinuŋ laṅsé éndaḥ pélag, suṅsun sapta sutradi amañcawarṇi, winiru sĕkaran mas.

14. saŋ hyaŋ jiwandana nèŋ sajroniŋ, laṅsé ḷĕṅgaḥ muṅgwiŋ balé ṛĕtna, sarya iṅaḍĕp putrané, kakuŋ jujulukipun, saŋ jiwanda laṅkuŋ pinĕkik, cahya tuméja piṇḍa, hyaŋ asmara nurun, dyatmikambĕk paramarta, nétya wĕnĕs ṅĕṅuwuŋ pamulu wiṅit, luṅgwiŋ sor maligéndaḥ.

15. ṅapurañcaŋ nora mobaḥ mosik, marikĕlu tumuṅkul iŋ kisma, koñjĕm wit sakiŋ ajrihé, riŋ cahya kaŋ narawuŋ, kaṛĕnan tyas saŋ maha muni, mulat dyatmikèŋ putra, ṅunandikèŋ kalbu, dé ta sutèṅsun jiwanda, tĕka maṅkya wus diwasa tur pinĕkik, pantĕs amĕṅku praja.

16. dyan amuḍar brata ṅandika ris, ṛĕṅĕn ta gèr sutèṅsun jiwanda, wruhanira iṅsun kiyé, iya woŋ atuwamu, kaŋ ṅanakkĕn ananta kaki, naṅiŋ kadadyanira, tan sarana ibu, muŋ mijil sakiŋ pamuja, prabawèṅsun sun cipta dadi sirèki, kalawan kodrat iṅwaŋ.

17. baṛĕŋ lawan ananiŋ nagari, sun arani iŋ garbasumaṇḍa, saṅkĕp lawan sahisiné, kanaŋ karaton tĕlu, juga aran nayanapuri, katri pranajapura, myaŋ katĕlunipun, karaton suraswapura, sahisiné saṅkĕp tan kuraŋ sawiji, mĕṅko karṣa manira.

18. sira nuli madĕga narpati, amĕṅkua iŋ garbasumaṇḍa, sun muŋ darma ṅanakaké, saana ananipun, iṅsun pasraḥ iŋ sira kaki, sahulaḥ kriḍaniŋ rat, karya ala ayu, dadi lawan karṣanira, wĕnaŋ murba misésa sahobaḥ osik, iṅsun tan munasika.

19. dé kaŋ dadya waraṅkanta kaki, si sucipta sapanĕkarira, iŋ ṅuni iku asalé, sakiŋ swanitaniṅsun, dadi baṛĕŋ lan sira kaki, saṅkĕp sanayakanya, iŋ samĕṅko kulup, iya wus paḍa suméwa, sakañcané pĕpak anèŋ pañcaniti, aṅanti wiyosira.

20. mĕṅko sira wajib aṅawruhi, trapiŋ ratu lan papatihira, lir wraṅka lan curigané, kudu srĕg maṭis maṭuk, nora kĕna ṛĕṅgaŋ sawèni, yèn koṅsi logro sĕsak, sĕṛĕt tinon saru, iṅaran tanpa pikiran, tan prayoga dadi bhuṣaṇaniŋ ḍiri, rinasan tanpa ṅrasa.

21. lan upama punaŋ kalpikadi, patiḥ iṅkaŋ minaṅka ĕmbanan, ratu iku sosotyané, yèn trapé nora kukuḥ, rarakĕtan lir kulit dagiŋ, giṅgaŋ dadi sulaya, coplok tĕmahipun, suṛĕm sunariŋ sosotya, wuruŋ nora dadi ṛĕṛĕṅgan sarwèdi, sida dadi rosokan.

22. lan upama woŋ apalakrami, ratu iṅkaŋ maṅka kakuṅira, patiḥ dadi wanitané, sayĕkti kudu rukun, saniṣkara iṅkaŋ kinapti, yogya mawa tariṅan, sakaroṅronipun, muriḥ kotamaniŋ karṣa, ginuṣṭia ywa koṅsi kasluru wuri, yèn salaḥ sijinira.

23. ana iṅkaŋ nora nayogyani, kudu mĕnĕŋ kariyin ṅupaya, upadaya kaŋ pakolèḥ, yèn kaliḥ kalihipun, nora iyĕk sahékakapti, wĕkasan tutukaran, yĕkti karya kuwur, iŋ sakulawarganira, kisruḥ tyasé sirṇa kĕkuwuŋ iŋ panti, piṇḍa kaŋ taru lata.

24. kaŋ aṅaraŋ iŋ maṅsa maṅgasri, ronirakiŋ puṛĕt kaŋ pradapa, paran tuwuḥ puspitané, tuna dènnya maṅayun, wahyaniŋ kaŋ pala mawĕrdi, sida gariŋ galiṅgaŋ, wuruŋ aṅrĕmbuyuŋ, béda yèn sahékapraya, atut runtut sariratri karoṅron siḥ, moŋ raras karasikan.

25. sabaraŋ rèḥ nora bèñcèŋ pikir, tan antara nuli apuputra, sayĕkti sru sukèŋ tyasé, pama kaŋ kalpataru, maṅsa kapat kataman wrĕsti, yĕkti tantara lama, mardapa maṛĕmbun, royo royo rumambaka, babar sĕkar koṅas kaŋ suganda sumrik, umyuŋ kaŋ bramararṣa.

26. ṅuswèŋ sari swararum maṅrĕmiḥ, ambrĕṅĕṅĕŋ mriḥ wuryèŋ srĕṅkara, kaṛĕnan kaŋ wus samyolèḥ, karana rumasantuk, usadadi roganiŋ ḍiri, tĕmaḥ samya mawijaḥ, nèŋ paṅku marumpyuŋ, saṅsaya asri kawuryan, tan antara tuwuḥ kaŋ pala mawĕrdi, siṅa mulat kaṛĕnan.

27. yèn upama woŋ aṅulaḥ ṅèlmi, ratu iṅkaŋ maṅka kawruhira, patiḥ minaṅka lakuné, nadyan ṅèlmuné luhuŋ, yèn tan kaṇṭi laku basuki, lan ñuda napsu hawa, yĕkti kawruhé wuk, nora bisa nĕŋ pranawa, tĕmaḥ kuwur kéwran praptanirèŋ pati, tan tĕkèŋ saṅkan paran.

28. béda ḍasar kawruhé linuwiḥ, lakunira tansaḥ linakṣaṇan, awas éliŋ tan kalalèn, kaṛĕm mĕnĕŋ manuṅku, mamriḥ pati sajroniŋ urip, yĕkti dadi waspada, sasĕdyané gadug, sasat kaŋ wrĕkṣa cĕṇḍana, jaba jĕro aṅambar gandanira mrik, mrak ati sinatmata.

29. praptanira iŋ pati patitis, tan tumpaŋ suḥ pamuntuniŋ cipta, wit wus wĕruḥ antarané, nèŋ pantogiŋ pandulu, ḷĕpasiŋ kaŋ warastra luṅit, lumarap baṛĕŋ lawan, wuryèŋ waranaguŋ, iŋ kono panuṅgalira, warṇa rupa ya woriŋ kawula gusti, tantara paripurṇa.

30. wus samono kéwala ta kaki, kaya cukup maṅka pralampita, trapiŋ ratu lan patihé, déné nayaka wolu, lamun wĕruḥ ratuné tuwin, lan patiḥ nuṅgal karṣa, sayuk tyas martayu, sayĕkti nurut kéwala, éwadéné ya kudu tinari tari, nora kĕna tinilar.

31. marga iku kaŋ bakal nampani, paréntahiŋ papatiḥ kaŋ atas, agñaniŋ naréndra kabèḥ, praptèŋ panĕkaripun, pra nayaka iṅkaŋ anudiŋ, dadi tan tiḍa tiḍa, dènira nunuduḥ, marga wus wruḥ wosiŋ karṣa, dé kaŋ arṣa dadi nayakanta kaki, yèku arya pranawa.

32. loro arya pramana lan maniŋ, saŋ waspada myaŋ arya kumara, lima arya sugandané, nĕm arya uswasèku, pitu arya wacana tuwin, wolu arya nayana, sapanĕkaripun, kudu iyĕk abipraya, lamun ana kaŋ ḷĕléda salaḥ siji, sakarṣanta tan dadya.

33. marma sira ya dèn bisa kaki, amiluta mèt tyasiŋ pra wadya, kaṇṭi wiwéka tĕrapé, liré lamun ḍĕḍawuḥ, dèn asarèḥ wor nétya manis, anaṅiŋ dèn sĕntosa, lan wiṅit iŋ sĕmu, supaya aywa garagap, tumaṅgapiŋ sabda dadi wĕdi asiḥ, susĕtya sraḥ jiwaṅga.

34. gagarané mriḥ arjaniŋ nagri, dèn ajĕjĕg ajĕg adilira, pat prakara saranané, ĕmpakna aywa wor suḥ, siji sama dwi béda piŋ tri, dana ḍĕṇḍa kapiŋ pat, ywa koṅsi kalimput, kaṭaḥ wasitanira hyaŋ, jiwandana mriŋ putra mriḥ kotamèŋ sri, tinĕtĕg aṣṭabrata.

35. sadaṅunya saŋ jiwanda myarṣi, sabdèŋ rama ṅunandikèŋ driya, sarya dahat paṅuṅuné, anané aṅganipun, katambĕtan purwaniŋ ṅuni, paran dadiné ana, ṅĕndi saṅkanipun, lan sapa iṅkaŋ ṅandika, déné tĕka tanpa kaṇṭa nora warṇi, muŋ gatra cahya maya.

36. miwaḥ ṅaku sudarma kaŋ ṅukir, amĕmuruk iŋ rèḥ mĕṅku praja, kuwuriŋ driya kawĕkèn, lamun rinasèŋ kalbu, lir supĕna sajroniŋ guliŋ, wimbuḥ mulat wisma mas, sinasotya murub, ya tan wruḥ purwaniŋ dadya, saŋ hyaŋ jiwandana tan samar umèkṣi, mriŋ locitaniŋ putra.

37. gya manabda babo suta mami, layak sira ya nora pracaya, maraŋ kawasèṅsun aṅgèr, lir tutur iṅsun ṅayun, awit sira duruŋ udani, anané jĕnĕŋ iṅwaŋ, lan yèn sun satuhu, kawasa aṅanakĕna, kaŋ tan ana lan kwasa nirṇakkĕn mariŋ, sabaraŋ kaŋ wus ana.

38. wruhanira kamulané ṅuni, saduruṅé praja iki ana, sahisiné lan siraṅgèr, kabèḥ duruŋ tumuwuḥ, amuŋ iṅsun kaŋ ana ḍiṅin, ijèn tan mawa rowaŋ, nulyèŋ sun manuṅku, nèŋ sajroniŋ arga sunya, ñipta praja lan karaton tri tanapi, añipta ananira.

39. tri candrama sampurṇa dumadi, sakarṣèṅsun nora kĕkuraṅan, kaya kaŋ sun tuturaké, mriŋ sira kabèḥ mahu, mulané ta sira samaṅkin, ywa sira katambuhan, maraŋ ananiṅsun, nadyan sun tan kasatmata, naṅiŋ ana taṇḍané bisa akardi, mriŋ sira sakaṇṭinya.

40. déné lamun sira arṣa uniŋ, ananiṅwaŋ sira tiṅalana, jroniŋ anananira ḍéwé, lamun sira wus wĕruḥ, ananira yĕkti wus uniŋ, jatiné ananiṅwaŋ, aywa was iŋ kalbu, mulané iki nagara, sahisiné nadyan iṅsun iṅkaŋ kardi, ṅiŋ dadi darbèkira.

41. saŋ jiwanda dupi amiyarṣi, sabdèŋ rama saklaṅkuŋ jrihira, sarya dahat paṅuṅuné, dé kaŋ rama saklaṅkuŋ, waṣkiṭa wruḥ karkatiŋ ati, puwara matur sarya, nĕmbaḥ marikĕlu, ḍuḥ ḍuḥ saŋ maha baṭara, ila ila punapa lamun pun patik, iṅgiḥ amahibĕna.

42. iŋ paṅwasa paduka saŋ yogi, wit kawula maṅkya sampun wikan, yèn kaanan sadayané, sakiŋ karṣa pukulun, marma amba muŋ maṅastuti, sapaṅrèḥ tan sumiṅgaḥ, aṅèstokkĕn ḍawuḥ, amuŋ maṅkya kalilana, pun patikbra umatur minta udani, paran wigatinira.

43. dé paduka anitahkĕn mami, miwaḥ praja sahisinya samya, pédaḥ punapa iŋ tĕmbé, sayĕkti sahé suwuŋ, laṅgĕŋ mĕnĕŋ tan muna muni, tinimbaŋ karonéhan, karya salaŋ surup, lan maliḥ iŋ maṅkya amba, wontĕn pundi déné ta nikmat kĕpati, tan ṅrasa luwé lupa.

44. saŋ minulya dupi amiyarṣi, turiŋ putra mèsĕm aṅandika, babo sutaniṅsun aṅgèr, tan ñana yèn sirèku, tĕka uwus widagdèŋ kapti, riŋ ulaḥ kriḍaniṅrat, wruhiŋ agal ḷĕmbut, kataṇḍa pitakonira, aran uwus sarwa mĕṭit wĕrit luṅid, mriŋ ghaibiŋ kaanan.

45. wruhanira gon iṅsun akardi, wujudira sakraton ta samya, amuŋ maṅka prataṇḍané, yèn kabèḥ kaŋ kadulu, atas sakiŋ paṅwasa mami, iŋ ṅuni nora ana, apa apa kulup, mĕṅko dadi sarwa ana, ya minaṅka titimbaṅaniŋ kajatin, tĕtĕpé amisésa.

46. yĕkti bisa karya agal alit, ṅuni sunya bisa dadi ana, mĕnĕŋ bisa dadi ramé, kaŋ agal sakiŋ ḷĕmbut, nora kéwran sakalir kalir, béñjaŋ kabèḥ waluya, bali purwanipun, iṅkaŋ ana dadi sunya, kaŋ aramé bali maraŋ ĕnĕŋ maniŋ, kaŋ agal muliḥ ḷĕmbat.

47. déné iṅkaŋ suwuŋ suñaruri, kaŋ amĕnĕŋ kalawan kaŋ ḷĕmbat, iku kulup sajatiné, amuŋ sawiji kulup, iṅaranan nukat ghinaib, liré wiji kaŋ samar, ya kaanan iṅsun, lan kaananta samuha, ya iṅaran warṇa rupa bañu urip, urip kaŋ tanpa jiwa.

48. lamun nora mĕṅkonowa kaki, nora tĕtĕp sinĕbut kawasa, yèn nora ana ñatané, tĕtĕpé kaŋ sinĕbut, iya lawan kaŋ nĕbut kaki, iku maṅka tĕrusan, timbaṅaniŋ tĕmbuŋ, gusti kalawan kawula, lamun suwuŋ iku timbaṅané isi, ḷĕmbut timbaṅan agal.

49. mĕnĕŋ ramé timbaṅané kaki, surya wulan pĕtĕŋ lawan paḍaŋ, bhumi kalawan laṅité, ala kalawan ayu, kakuŋ iya lawan pawèstri, mati kalawan gĕsaŋ, lan sasaminipun, marmanta aywa sumĕlaŋ, sira arṣa sun wulaŋ sulaṅiŋ ghaib, wruha sakaṇṭinira.

2. kinaṇṭi

1. wondéné ta pitakonmu, paṅgonan iŋ kéné iki, aran gupit sandyasana, ya papan antara kaki, antarèŋ patĕmonira, sira lawan jĕnĕŋ mami.

2. ya ran papan pamoripun, kawula kalawan gusti, lagi roroniŋ atuṅgal, duruŋ awor dadi siji, maṅkéné wiwijaṅannya, rasakĕna kaŋ patitis.

3. ana aran tĕluŋ tĕmbuŋ, ḍiṅin panuṅgaliŋ gusti, kapiṇḍoné pamoriŋ hyaŋ, tri paworiŋ kwula gusti, liré anuṅgal iyéka, uripé iŋ duñå iki.

4. kaŋ sapa rumasa wĕruḥ, lamun ana kaŋ mĕṅkoni, iya uwis kawĕṅkonan, naṅiŋ tan wruḥ jatinèki, iku lagi iṅaranan, wĕruḥ tuṅgaliŋ kĕkaliḥ.

5. duruŋ tamtu lamun wĕruḥ, maraŋ kaananiŋ ghaib, liré muŋ lagi rumasa, obahé ana kaŋ kardi, misiḥ kéwran pamorira, dadi kĕna dèn arani.

6. woŋ ṅaku aku puniku, tan wikan makikinèki, déné ta kaŋ wus rumasa, bisa sapatĕmon mariŋ, kaanané gusti ika, iku lagi dèn arani.

7. bisa pamoriŋ sawujud, wujudiŋ kawula gusti, duruŋ tĕkèŋ kasampurṇan, wit misiḥ rumasa kaliḥ, piṇḍa pamoriŋ curiga, ya tuṅgal naṅiŋ kĕkaliḥ.

8. liré tuṅgal déné kumpul, tan kĕna pinisaḥ kaki, naṅiŋ makṣiḥ katiṅalan, pamoré ṅaléla putiḥ, wĕsiné iṛĕŋ kawuryan, dadi duruŋ dadi siji.

9. iya iku kaananmu, lan kaanan iṅsun iki, ana iŋ kéné yaktinya, misiḥ awujud kĕkaliḥ, laḥ coba sira awora, lawan ananiṅsun kaki.

10. sayĕkti tan bisa jumbuḥ, wit sira duruŋ udani, patrap tĕrapiŋ panuṅgal, kaŋ tuṅgal dadi sawiji, tuṅgal jatiné kaanan, lir alun wor iŋ jaladri.

11. yèn baṅkit mĕṅkono kulup, wus sirṇa kawula gusti, muliḥ mula mulanira, tan ana wujud kĕkaliḥ, kĕna iṅaranan mulya, wibawa sampurṇa jati.

12. tĕgĕsé kaŋ mulya kulup, iya muliḥ muliḥ puliḥ, puliḥ kaya duk iŋ kuna, nora ana ika iki, liré kaŋ tĕmbuŋ wibawa, iya iku wus mĕṅkoni.

13. kluwihaniŋ rasa kulup, marmanira dèn wastani, mĕṅku kluwihaniŋ rasa, déné tan karasa kaki, ṅĕṛĕs linu luwé lupa, lan tan ṅrasa jalu èstri.

14. marma ran sampurṇa kulup, liré babar pisan kaki, babar pisan wañcahira, ambabar sapisan dadi, rampuŋ nora miṇḍo karya, jumĕnĕŋ nukat ghinaib.

15. nukat ghaib tĕgĕsipun, iya wiji kaŋ piniṅit, dadi kĕna iṅaranan, uwis bali dadi wiji, wiji wijiné dumadya, liré wiji iya siji.

16. dadi ṅuni jatinipun, kabèḥ iki muŋ sawiji, babar aṅĕbaki jagad, naṅiŋ isiḥ wutuḥ siji, tan kaloŋ salaminira, ulatana iṅkaŋ ĕndi.

17. sayĕkti aṅèl ginayuḥ, éwadéné rèḥ sujanmi, sinuŋ budi lwiḥ waspada, tinimbaŋ lyaniŋ dumadi, marma lamun tinĕmĕnan, yĕkti tinĕmu kaŋ pinriḥ.

18. yèn kapaṅgya kaŋ ginayuḥ, iṅaran muṅgaḥ swargadi, liré sawarga sabadan, ya ran kasarira kaki, kasarira anèŋ sira, saparané nora kèri.

19. karana wus tuṅgal wujud, jumĕnĕŋ dadi sawiji, aran wĕruḥ winĕruhan, woriŋ ro rinakĕt iŋ siḥ, wus wruḥ mriŋ kaŋ winĕṅkonan, yĕkti kĕna aṅakoni.

20. ṅakoni jiwaṅganipun, dadi aṅgani swargadi, ya gon kaŋ laṅgĕŋ salama, samaṅkya wus dèn ĕṅgoni, uga aran wus kaṅgonan, ĕṅgon kaŋ laṅgĕŋ maligi.

21. rasakĕna kaŋ rumasuk, surasané rasa iki, dèn krasa iŋ daḷĕm rahsa, uwosé rarasan kaki, yèn wus karasa iŋ rahsa, yĕkti ṅrasa yèn susuliḥ.

22. déné kaŋ nora kĕtĕmu, iṅaran kaḷĕbu mariŋ, naraka sru kasaṅsaya, tĕgĕsé naraka kaki, iya anor anor ika, liré asor iŋ dumadi.

23. dé kaŋ ran asor satuhu, yahiku asoriŋ ṅèlmi, asoriŋ ṅèlmi yahika, kaŋ tan wruḥ iṅkaŋ mĕṅkoni, lan tan baṅkit iŋ panuṅgal, dadi tan muṅgaḥ swargadi.

24. tĕmaḥ kĕsasar iŋ purug, tan muliḥ alamé lami, ya alam kaŋ amor sira, saparipolaḥ tan kari, kaya kaŋ kawahyèŋ ṅarṣa, rasakĕna kaŋ sayĕkti.

25. déné kaŋ duruŋ sumurup, kaŋ iṅaran sawargadi, dinaliḥ pura mas éndaḥ, kinariṛĕṅga sarwèdi, pinatikiŋ nawaṛĕtna, gumantuŋ madyèŋ wiyati.

26. lawan naraka sinĕṅguḥ, kuñjaran guŋ sĕgaragni, myaŋ wé umob mawalikan, dé jati jatiniŋ jati, sawarga uwosiŋ gĕsaŋ, naraka warananèki.

27. riṅkĕsé iku sinĕbut, iya warṇa rupa kaki, warṇa warana artinya, rupa urub iya urip, marma kaŋ duruŋ waspada, éwuḥ aṅgayuḥ swargadi.

28. karana kaananipun, kawaranan warṇanèki, marma yèn arṣa sampurṇa, dumunuŋ jroniŋ swargadi, kudu ambuka warana, iya warṇanta pribadi.

29. déné ta pambukanipun, gampaŋ aṅèl kaŋ piranti, luput pisan kĕna pisan, yèn luput ambilahèni, yĕkti kaḷĕbèŋ naraka, yèku muŋ nèŋ wrana kaki.

30. kĕduwuŋ nukṣmèŋ waŋ uwuŋ, lir kiñjĕŋ tanpa paṅèkṣi, aṅalaya midrawèṅrat, kasrakat kasrĕkiŋ sakit, sru ṛĕkasa tanpa wĕkas, kuwur luwiḥ kawlas asiḥ.

31. saŋ jiwanda lon umatur, ḍuḥ pukulun saŋ ayogi, yèn makatĕn tĕka dahat, èwĕd amĕṅku nagari, mawi mikir kabatinan, yèn ḷĕpat mañjiŋ yumani.

32. mĕnawi makatĕn ulun, tan kadugi aṅlampahi, luhuŋ nèŋ ṅriki kéwala, botĕn mikir duñå ṅakir, éca sumiwi paduka, tan susaḥ mriḥ mulyèŋ pati.

33. saŋ minulya mèsĕm muwus, kulup iku nora kĕni, wit maṅkya sira wus dadya, wahananiŋ nukat ghaib, sinĕḍahan amisésa, saananiŋ lahir batin.

34. liré batin iku alus, lahir waḍagira kaki, tan kĕna miṅkuḥ iŋ karṣa, yĕkti kudu aṅlakoni, aywa sandéya iŋ driya, yèn arṣa kalbèŋ yumani.

35. wit kalamun sira uwus, amĕṅku karaton katri, yĕkti sun suṅi sarana, baṅkitirawor riŋ ghaib, isarat ran satmayana, maṅkya tampanana kaki.

36. siji sarèḥ kadwinipun, saranta sĕntosa katri, pat tĕmĕn kalima lila, ganépé nĕm yatna kaki, sarèḥ alon jarwanira, saranta sabariŋ ati.

37. sĕntosèku tĕtĕg tĕguḥ, tĕmĕn jĕjĕg tan gumiṅsir, rila éklas nora uwas, éliŋ tan oñcat iŋ kapti, iku kaki lakokĕna, dadi sarat mriŋ kajatin.

38. naṅiŋ nĕm prakara iku, ana titimbaṅannèki, kaŋ maṅka dirgamaniŋ tyas, amĕmuruŋ mriŋ kajatin, iya dadi wajibira, marma tan kĕni tinampik.

39. ran sad winda tĕgĕsipun, pĕpĕtĕŋ nĕnĕm prakawis, ḍiṅin kĕsusu iŋ karṣa, dwi napsu goyaŋ kapiŋ tri, piŋ pat mèṅlèŋ kalimanya, lali kapiŋ nĕnĕm kaki.

40. yèn iku kaŋ sira turut, kalbèŋ naraka iŋ wuri, karoné kĕna iṅaran, dadalan ala basuki, iku ĕndi kaŋ sirambaḥ, yĕkti iŋ tĕmbé pinaṅgiḥ.

41. iŋ mĕṅko rèḥ sira wus wruḥ, marganiŋ ayu basuki, boṅgan yèn sira aṅambaḥ, marga kaŋ praptèŋ yumani, nora kĕna asasambat, sun tan arṣa mituluṅi.

42. ana maniŋ srananipun, kotamaniŋ narapati, muriḥ kériṅaniŋ mĕṅsaḥ, myaŋ sinihan mriŋ pra dasiḥ, kèḍĕp saguŋ kaŋ tumitaḥ, sato walaṅtaga ajriḥ.

43. trusiŋ driya sudibyanuŋ, wruḥ saṅkan paraniŋ dadi, waṣkiṭa wruḥ iŋ panuṅgal, panuṅgaliŋ kwula gusti, wĕkasan tan kasamaran, tumarunèŋ lahir batin.

3. sinom

1. tĕtĕp tampa nugrahèŋ hyaŋ, aṅgon aṅgoniŋ narpati, iṅaran pañcapurwanda, pinéraŋ tĕluŋ pakarti, iṅkaŋ sapraṅkat kaki, ambĕkiŋ surya kasĕbut, dwi ambĕkiŋ bhantala, ambĕk samodrambĕg aṅin, lan ambĕkiŋ akasa pradikanira.

2. ambĕkiŋ surya amoṅat, liré amoŋ iku kaki, wit ananiŋ bagaṣkara, tansaḥ aṅon ṅuniṅani, maraŋ saguŋ dumadi, tumrapiŋ manuṅsa kulup, dadi éliŋ waṣkiṭa, muṅguḥ iŋ pramana wĕniŋ, dé ambĕkiŋ bhantala iṅaran amrat.

3. iya amot pradikanya, amarga ananiŋ bhumi, tansaḥ ambobot aṅĕmbat, mariŋ saguṅiŋ dumadi, tumrap pambĕkan dadi, amantĕp tĕtĕp dumunuŋ, mriŋ kadyatmikaniŋ tyas, tumrap iŋ sarira dadi, antĕŋ ruruḥ tan roṅèḥ tan karonéhan.

4. tĕlu ambĕkiŋ maruta, iṅaranan kamrat kaki, iya kamot tĕgĕsira, marga ananiŋ maruti, guŋ kamot iŋ dumadi, agal alit aṇḍap ruhur, tan ana kaliwatan, kabèḥ kahèbĕkan aṅin, sabĕn dina mubĕŋ ṅĕbaki bhuwana.

5. tumrapiŋ maraŋ pambĕkan, tĕmĕn tumĕmĕniŋ kapti, dumunuŋ ariṅiŋ napas, dadi tan daléya kaki, dé ambĕkiŋ jaladri, mawrat iku aranipun, tĕgĕsé momot ika, marga ananiŋ jaladri, guŋ tumaḍaḥ tumaṇḍo kwèhniŋ sasaraḥ.

6. tumrapé maraŋ pambĕkan, sabar saranta iŋ kapti, dumunuŋ ṛĕṛĕmiŋ rahsa, dadi tan pradulèn déniŋ, ambĕkiŋ kaŋ wiyati, aran makyat liré mĕṅku, wit ananiŋ akasa, tansaḥ ṅahubi dumadi, tumĕrapé mariŋ pambĕkan sĕntosa.

7. dunuṅé sarèhiŋ karṣa, dadi tan gimiṛĕn kaki, kumpulé pambĕkan lima, amoŋ momot kamot tuwin, momot mĕṅku mĕnawi, tumrapiŋ manuṅsa kulup, éliŋ tĕmĕn lan sabar, sĕntosa dumunuṅnèki, ya pramana jatmika ariṅiŋ napas.

8. kalawan ṛĕṛĕmiŋ rasa, myaŋ sarèhiŋ karṣa dadi, tan samar nora dahwènan, miwaḥ tan sĕmbrana tuwin, tan kapanasan kapti, nora gimiṛĕn iŋ kalbu, déné iṅkaŋ sapraṅkat, uga aṅgoniŋ narpati, iṅaranan pambĕkan pañca dumadya.

9. ya dadi kaananira, tumaṅkar limaŋ pakarti, siji babariŋ antiga, loro ḷĕṛĕṣiŋ astradi, déné kaŋ kapiŋ katri, iku tumamaniŋ puṅlu, kapat larapiŋ pĕḍaŋ, kalima ṛĕmbĕsiŋ wariḥ, kawruhana kaṛĕpé sajuga juga.

10. babariŋ tigan talika, pradikané tĕtĕs kaki, tĕtĕs déné wus tĕtéla, jumĕnĕŋ dadiniŋ urip, urip kaŋ mobaḥ mosik, ñatané nèŋ paṅrasèku, déné ḷĕṛĕṣiŋ panaḥ, ya ramatas dèn wastani, pradikané tatas iya iku tĕḍas.

11. nĕtĕpi saṅkan parannya, prataṇḍané suñaruri, ñatané anèŋ pamyarṣa, déné tumamaniŋ mimis, tumĕḷĕŋ iya titis, aṅéñcoki kaṛĕpipun, nĕtĕpi dunuṅira, iṅran tumanĕm iŋ ati, ñatanira kĕlapiŋ liḍaḥ iŋ lésan.

12. larapiŋ pĕḍaŋ marabas, pradikané putus kaki, iya iṅaranan pĕgat, tĕtĕp ambabarpisani, babar amrataṇḍani, kasampurṇaniŋ ṅahiḍup, ñatané anèŋ ganda, déné ta ṛĕmbĕsiŋ wariḥ, iya iku kaki iṅaran tumahas.

13. kaṛĕpé rumĕmbĕs iya, iṅaranan tumus kaki, taṇḍané liṅga baṭara, ñatané anèŋ paṅèkṣi, déné ta kumpulnèki, kadadian lima iku, artinira ya tatas, titis putus tumus kaki, ya tĕtéla tĕḍas aṅéñcoki pĕgat.

14. tĕrus kañataanira, kawahana suñaruri, tuwin tumanĕm sampurṇa, tĕtĕp aliṅga baṭari, ñatané mahanani, paṅrasa iŋ karṇa kulup, iŋ lésan myaŋ iŋ grana, atanapi iŋ paṅèkṣi, déné iṅkaŋ sapraṅkat manèḥ iṅaran.

15. pambĕkan pañca pranawa, ya dadi prabawanèki, tumaṅkar limaŋ prakara, aran laṇḍĕp kaŋ sawiji, aṅkĕr kaŋ kapiŋ kaliḥ, piŋ tĕlu iku sumunu, kapiŋ catur sumulap, piŋ lima mararap kaki, kaṛĕpira iku uga kawruhana.

16. liré laṇḍĕp ḷĕṅin ika, ḷĕṅin artinira luṅit, luṅit alus jarwanira, déné wus srira baṭari, wit kaprabawan sakiŋ, kawaṣkiṭanirèŋ kalbu, aṅkĕr ḷĕṅit artinya, iya iṅaranan siṅit, siṅit iku aṅajrihi jarwanira.

17. dé wus sawujud baṭara, awit kaprabawan sakiŋ, iŋ rasa paṅrasanira, sumunu pradikanèki, ḷĕñĕp kaṛĕpé wiṅit, wiṅit iku jarwanipun, antĕŋ mĕnĕŋ sumunar, iya antĕŋ añĕnĕni, wité sakiŋ ya wus nugraha baṭara.

18. kaprabawan siŋ dyatmika, déné ta sumulap kaki, iku lumĕṛĕp artinya, iya iku aṅulapi, tĕgĕsé baḷĕṛĕṅi, dé wus nétra baṭaraguŋ, kaprabawan pramana, déné mamarap lirṇèki, amĕmahab maladi pradikanira.

19. iya aṅurupi ika, déné wus jiwa baṭari, kaprabawan siŋ prabawa, kumpulé kalima kaki, luṅit siṅit lan wiṅit, ṅulapi maladi kulup, artinya alus iya, mĕdèni lawan ñĕnĕni, baḷĕṛĕṅi myaŋ ñaladi pradikanya.

20. sakiŋ prabawèŋ waṣkiṭa, dyatmika pramana tuwin, pranawa lawan wibawa, mĕṅkéné gĕnahé kaki, pañca purwanda sakiŋ, gĕni bhumi aṅin bañu, dadi jasatiŋ janma, dé kaŋ suwuŋ suñaruri, iku laṅit kaŋ mĕṅku alam gumĕlar.

21. ya iku maṅka timbaṅan, batin amĕṅkoni lahir, lahir paḍa kaŋ gumĕlar, suwuŋ papaḍané batin, dadi winolak walik, naṅiŋ kuwasaniŋ suwuŋ, nadyan nèŋ jĕro jaba, iya makṣiḥ amĕṅkoni, tĕtĕp aran waraṅka mañjiŋ curiga.

22. lwiré suwuŋ kaŋ iŋ jaba, iku waraṅkaniŋ jisim, suwuŋ kaŋ nèŋ jroniŋ raga, iṅaran curiga kaki, marma ywa salaḥ tampi, waraṅka mañjiŋ iŋ ḍuwuŋ, dudu pralampitanya, pamoriŋ kawula gusti, dé pralambaŋ pamoriŋ gusti kawula.

23. urip iŋ akir winastan, lèŋ ṅĕmuli koḍoknèki, uripira anèŋ duñå, lèŋ kaŋ kinĕmulan prĕcil, déné wajibiŋ urip, waluya purwaniŋ daṅu, baṅkita lir iŋ kuna, lèŋ ṅĕmuli koḍok maliḥ, dadi muliḥ waluya alamé lama.

24. saŋ jiwanda matur nĕmbaḥ, sadaya ḍawuḥ saŋ yogi, sampun kacaṭĕt iŋ driya, amuŋ iṅgiḥ mugi mugi, aṅsal barkaḥ saŋ yogi, émut iŋ salaminipun, amuŋ sabda saŋ dwija, jatiniŋ tékad sajati, kaŋ mriḥ mulya waluya alamé lama.

25. kaŋ makatĕn kadiparan, kawula dèrèŋ andugi, hyaŋ jiwandana ṅandika, babo sutaniṅsun kaki, aywa sandéyèŋ kapti, yĕkti sun kaŋ suŋ pituduḥ, tan antara kapyarṣa, ana swararum dumĕliŋ, akarasa sajroniŋ rasa paṅrasa .

26. nira sira saŋ jiwanda, misik jatiniŋ dumadi, purwa madya wusananya, atatas turut taṛĕtip, paṅglar guluṅannèki, tan ana kuraŋ salugut, sĕṅkan turunanira, rakitiŋ tanajultarki, myaŋ kukudan tumĕkaniŋ saṅkan paran.

27. puwara wasitèŋ swara, wus kulup mĕtua nuli, sakiŋ jroniŋ palaṅgatan, gya sinéwakaa kaki, wus suwé dèn anti mriŋ, sucipta sakañcanipun, lan wĕnaŋ jujuluka, prabhu jiwanda sirèki, lan aywa was iṅsun uwus anèŋ sira.

28. tĕtĕp dadi ananira, lan sira kaanan mami, iya wĕnaŋ iṅaranan, iṅsun rupanira kaki, lan sira warṇa mami, aywa sumĕlaŋ iŋ kayun, uwis kulup mĕtua, cĕp swara mĕnĕŋ tan muni, wor sajiwa jiwanda ya jiwandana.

29. maṅkana saŋ sri jiwanda, dupi swara wus tan muni, rumasa yèn wus waṣkiṭa, tan samar pamoriŋ ghahib, waspada sakriḍaniŋ, bhuwana kaŋ agal ḷĕmbut, kamot kinĕmatiŋ tyas, wruḥ wosiŋ sawiji wiji, dyan umahya sakiŋ gupit danasmara.

4. asmaradana

1. byar salin iṅkaŋ paṅèkṣi, kèkṣi sahisiniŋ praja, saṅkĕp tan kuciwa kabèḥ, myaŋ kaḍaton sri kawuryan, araras mawa praba, wĕniŋ amañcoroŋ mañcur, lir sunariŋ surya candra.

2. dyan saŋ prabhu mañjiŋ puri, katiga pisan jinajaḥ, mèkṣi saṅkĕpiŋ sèn isèn, wus sarwa raras mirantya, praptèŋ pranawapura, myat ana jantra tĕtĕlu, maṅka pusakaniŋ praja.

3. saŋ sri tan samariŋ kapti, dayaniŋ jantra titiga, dyan sami sinuŋ namané, kaŋ sajuga winastanan, bahniyantra kadwinya, iṅaranan jantrabayu, bèrijantra kaŋ katiga.

4. dyan jantra katri winaṅsit, sinasmitan sakiŋ cipta, supadya lumaku kabèḥ, tan antara kaŋ tri jantra, dupi antuk sasmita, dyan samya mubĕŋ gumuluŋ, lulus ñakramaṅgiliṅan.

5. dadi taṇḍaniŋ dumadi, lamun jinantra titiga, umĕnĕŋ salaḥ sijiné, ṅalamat rusak kaŋ praja, ratuné kamoitan, tantara saŋ nata laju, ḷĕṅgaḥ mèru madyapura.

6. biṅar saguŋ para cèṭi, pawoṅan srimpi baḍaya, kabèḥ samyayu warṇané, kaŋ saḍia jroniŋ pura, wus daṅu dènnya ṅantya, wiyosira saŋ aprabhu, sakiŋ gupit sandyasana.

7. suka sri nata maṅèkṣi, mriŋ pra sarimpi paṛĕkan, samyayu ṛĕspati mawèḥ, arṣayaniŋ driyasmara, myaŋ wèḥ ṛĕsminiŋ pura, tantara saŋ nata laju, miyos muṅgwiŋ sitibĕntar.

8. iṅayap pawoṅan cèṭi, baḍaya sarimpi ciptan, saṅkĕp sahupacarané, obaḥ kaŋ samya suméwa, patiḥ myaŋ pra nararya, sapanĕkarira wus wruḥ, yèn saŋ nata sinéwaka.

9. samya sukèŋ tyas tan sipi, naṅiŋ tan wontĕn sabawa, wiwrin siŋ prabawèŋ katoŋ, katoṅton sunariŋ cahya, sor ṛĕsminiŋ sasaṅka, paséwakan anarawuŋ, kawĕṅan wĕniṅiŋ cahya.

10. yayaḥ hyaŋ prataṅgapati, mamayat antaraniŋ wyat, sumirat ambabar sorot, wrata sacakraniŋ jagad, kapraban dipaniṅrat, dalasan kaŋ siluk siluk, kalaban jwalèŋ baṣkara.

11. tinonton tan pahé kadi, duk saŋ hyaŋ jagad pratiṅkaḥ, miyos iŋ paséwakané, luṅgwèŋ balé martyukuṇḍa, sinéwa pra jawata, tarap riŋ byantara turut, tatarané papaṅkatan.

12. tanapi kaŋ pra apsari, umarak riŋ wurinira, samyayu raras rum mawèḥ, wawaḥ iṅkaŋ kawibawan, bawaniŋ prabhu dibya, ambawani bhuwanaguŋ, kabèḥ kèbĕkan prabawa.

13. yèn winulat saŋ sri kadi, hyaŋ hyaŋ iṅkaŋ wawayaṅan, kinuruŋ cahya mañcoroŋ, cĕṅĕŋ kaŋ samya tumiṅal, lwir nuṅku ṅĕniṅkĕn tyas, mulat alam tumalawuŋ, ṅawĕṅi warṇa priyaṅga.

14. dyan saŋ sri suŋ sasmita mriŋ, kya patiḥ sucipta taṅgap, maṛĕk ṅarṣèŋ saŋ pamasé, sila soriŋ siṅaṅsana, nétyasmu sraḥ jiwaṅga, tinon kadyantuk sisiku, muka sumuṅkĕm iŋ kisma.

15. ḍasar saŋ anindyamantri, ṛĕspati sulistyèŋ warṇa, kĕmbar lan citrèŋ saŋ katoŋ, lir rarya ro risaŋ parta, datan kĕna binéda, karya kuwuriŋ pandulu, lamun tan kaṇṭi waspada.

16. naṅiŋ kaŋ waṣkiṭèŋ kapti, sayĕkti tan kasamaran, pamoriŋ kaŋ warṇa roro, karana karoné samya, mawa siwaḥ iŋ cahya, lwir krĕṣṇa kalawan wiṣṇu, kadya sandiniŋ dwi aṣṭa.

17. sandyèku samar kaŋ wardi, aṣṭa iku paḍa iṣṭa, iṣṭa wujud pradikané, dwi roro jarwanya dadya, bab sandiniŋ dwi aṣṭa, tĕgĕsé samar iŋ wujud, wujud roro kaŋ atuṅgal.

18. tuṅgaliŋ sasana naṅiŋ, sasat nora sasaṇḍiṅan, tan antara saŋ pamasé, ṅandika lir guladrawa, ṛĕṅĕnta hèḥ sucipta, wruhanira iya iṅsun, ratuniŋ garbasumaṇḍa.

19. sirèku papatiḥ mami, aywa was sandéyèŋ driya, dèn atĕguḥ taṅgap taṅgon, gonirarṣa mĕṅku praja, prajañjiné hyaŋ sukṣma, samaṅsa sira was miyur, léna tan santosèŋ driya.

20. dadi kadrawasan yĕkti, marga adĕgiŋ nagara, sirèku ugĕr ugĕré, dadi garan ginuronan, riŋ saguŋ narapraja, pinuja puja jinuñjuŋ, dadi tarajuniŋ sĕdya.

21. jinujur pinuji puji, jĕjĕga sakajatira, dimèn ajĕg darajadé, jatiné ratu muŋ maṅka, wĕṅkuniŋ maṅkupraja, patiḥ kaŋ maṅka papaku, pikukuḥ mĕṅku nagara.

22. pama adĕgiŋ paḍati, ratu kaŋ nitihi rata, patiḥ minaṅka wuruké, turaṅga paṅiridira, iku pra brĕtyapatya, pĕpĕcuté aṅgĕr ukum, apusé paṅulu jakṣa.

23. lwiré kaŋ nitiḥ muŋ dadi, pandoman pandukiŋ sĕdya, déné ta iŋ panindaké, mardi widadaniŋ dalan, maṅrèḥ lakṣanèŋ kuda, kaŋ nitiḥ pasraḥ mriŋ wuruk, apus pĕcut pikuwatnya.

24. marma yèn salaḥ sawiji, cidra tan sahékapraya, yĕkti tan prapta iŋ ĕṅgon, tĕgĕsé lamun kaŋ nuṅgaŋ, miṅgu tan darbé karṣa, kusiré kuwur baliwur, tan karuan paranira.

25. nadyan kaŋ nitiḥ wus maṅsit, dunuṅé kaŋ pinaranan, yèn kusiré nora éñjoḥ, aṅlakokaké turaṅga, ñĕkĕl apus tan bisa, amolahké sambuk kiḍuŋ, taṅèḥ prapta kaŋ sinĕdya.

26. mĕṅkono uga upami, nadyan kusiré wus ḷĕbda, lamun turaṅgané bĕṅkraḥ, utawa kuru tan rosa, apus bĕḍĕl wus lama, pĕcut jubĕl roḍa gapuk, iya tan praptèŋ paṅgonan.

27. yèn muṅguḥ ananiŋ urip, lamun sira wicakṣaṇa, karaton iki yĕktiné, ya wus dadya pralampita, tulaḍa wosiŋ gĕsaŋ, purwa madya wusana wus, kamot iŋ garbasumaṇḍa.

28. iŋ satĕmĕné papatiḥ, kudu wruḥ jatiniŋ gĕsaŋ, ya wruha witiŋ dumados, marga ananiŋ klahiran, yĕkti siŋ kabatinan, paran margané kacukup, aṅolaḥ kriḍaniŋ praja.

29. yèn tan wruḥ ruṅsitiŋ batin, ya liyan ari kéwala, sira parlu sun wruhaké, jumbuhé jĕro lan jaba, balik mĕṅko sucipta, karaton iki tĕtĕlu, siji ran nanayapura.

30. loro ran pranajapuri, tĕlu iŋ suraswapura, marma kapéraŋ tĕluŋ gon, muŋ supaya bisa pilaḥ, ywan sun ṅrĕmbug pakaryan, lan sira ywa koṅsi worṣuḥ, maṅkya sira sumurupa.

31. yèn iṅsun arṣa aniti, saniṣkaraniŋ prakara, luṅgwiŋ nayanapurané, lamun sun arṣa mranata, papréntahaniŋ praja, muṅgwiŋ pranajapurèku, yèn iṅsun arṣa ṅrĕraras.

32. mamriḥ ṛĕsminiŋ nagari, aṅrakit busanèŋ praja, luṅgwiŋ suraswapurané, marmanta iŋ mĕṅko kakaŋ, sira amĕmataha, para nayaka kaŋ patut, kinaṇṭi ṅraras pakaryan.

33. pintanĕn kaŋ mikantuki, tumrapé pura katrinya, ywa ṅanti kuciwèŋ tĕmbé, patiḥ sucipta tur sĕmbaḥ, gusti paṅèstu tuwan, sadaya wadyéndra sampun, suméwa anduduk karṣa.

5. mĕgatruḥ

1. iŋ samaṅkya yèn paṛĕŋ karṣa saŋ mulku, iṅkaŋ sayogi sumiwi, wontĕn nayanapura nuŋ, arya nétyana akaṇṭi, arya waspada pitados.

2. tuwin arya paṅèkṣi arya pandulu, myaŋ arya kumara tuwin, arya yogyasuwarèku, arya wacana tanapi, arya sarasa saŋ katoŋ.

3. lawan arya sugandarya paṅuswèku, déné kaŋ suméwa mariŋ, pranajapura sinuhun, arya pranawa akaṇṭi, arya cakrabawa kahot.

4. miwaḥ arya locita arya panuju, arya budaya lan maliḥ, saŋ unandika sinuhun, myaŋ arya paṅaṅka tuwin, arya paṅrantam saŋ katoŋ.

5. déné iṅkaŋ pantĕs sumiwèŋ kaḍatun, iŋ suraswapura gusti, saŋ turidasmara muṅguḥ, myaŋ saŋ tantrasmara kaṇṭi, pun pulaṅjiwa saŋ katoŋ.

6. tuwin arya pulaṅraras malihipun, iṅgiḥ pun arya pulaṅsiḥ, miwaḥ arya pulaṅlulut, tuwin arya pulaṅrĕsmi, sapanĕkar wus mirantos.

7. pirantiniŋ karaton tri jĕŋ sinuhun, kados sampun saṅkĕp gusti, éwa samantĕn pukulun, cumaḍoŋ ḍawuḥ pun patiḥ, sumaṅgèŋ karṣa saŋ katoŋ.

8. sri naréndra ṅandikalon manis arum, kakaŋ sucipta sirèki, tĕka wus widagdèŋ sĕmu, wicakṣanèŋ sambaŋ liriŋ, kabèḥ turira mariṅoŋ.

9. iya uwus cumoṇḍoŋ lan karṣaniṅsun, gya ḍawuhĕna samaṅkin, lan trapna pakartinipun, kabèḥ tĕtĕpna sawajib, patiḥ sandika wotsinom.

10. gya anoliḥ ṅanan ṅériŋ sarya muwus, nĕḍa kañca brĕtyapati, punapi andika sampun, sami amyarṣakkĕn mariŋ, sadaya sabda saŋ katoŋ.

11. pra nararya sapanĕkar taṅgap matur, ḍuḥ saŋ mantrimuka iṅgiḥ, kawula sakañca sampun, myarṣakkĕn ḍawuḥ saŋ aji, lan arṣa mèstutyèŋ katoŋ.

12. samantara saŋ sri asasmitèŋ wadu, gya jĕṅkar aṅĕñapuri, ginarbĕg iŋ pra rum arum, wus tumamèŋ pura saŋ sri, tandya saŋ waraṅka katoŋ.

13. sakoswéndra sowaṅan mriŋ wismanipun, myaŋ samya samaptèŋ kardi, wajibé sajuru juru, rumojoŋ ṅèstokkĕn jañji, mriḥ raharjèŋ praja katoŋ.

14. samya iyĕg abipraya sabiyantu, tan wontĕn sulayèŋ kapti, runtut atut rakĕt rukun, sakañca cañcut tariñciŋ, cañciŋ atraṅginas taṅgon.

15. rigĕn mugĕn tĕgĕn ḷĕgawèŋ tyas lugu, aṅguŋ aṅgupitèŋ tamsil, salsilaḥ solèŋ prajaguŋ, añjaga jĕjĕgiŋ nagri, mriḥ ṛĕgĕŋ tanpa ṛĕrégon.

16. prawabawané saŋ aprabhu wus ajumbuḥ, myaŋ ambĕkiŋ waraṅka ji, dènnya mriḥ arjèŋ prajaguŋ, jinaṅkuŋ puja sĕmadi, mindĕŋ pinandĕŋ tan aṅgop.

17. sumarmanta wadyéndra sayuk sumuṅku, sumuṅkĕm samya ṅastuti, tĕkèŋ kawula lit rukun, samya siḥ sinihan sarwi, mèt karya mriḥ karahayon.

18. tĕmaḥ samya ayĕm tĕntrĕm tyas rahayu, tan ana durṣila juti, malaḥ kèḥ kaŋ mardyèŋ kayun, kayuṅyun mriḥ pudyastuti, miminta sihiŋ hyaŋ manon.

19. tan alama kaswarèŋ lyan praja lamun, gunuŋ arga sunya maṅkin, dadya praja pañjaŋ puñjuŋ, bañjĕŋ babañjaran asri, ran garbasumaṇḍa kahot.

20. kaŋ umadĕg nata jawata piturun, sakiŋ swargaloka ṅuni, saŋ sri jiwanda jujuluk, marma sudibyanta luwiḥ, tyas paramarta kinahot.

21. tĕmaḥ akèḥ para nata makiḍupuḥ, siŋ liyan praja sumiwi, sraḥ jiwa raga ṅumulun, minta prawatya ñañantrik, pruhita kawruḥ karaton.

22. mriḥ widada raharja iŋ prajanipun, aṅgĕpé para narpati, sinĕṅguḥ baṭara guru, ṅéjawantaḥ wèḥ martasiḥ, mamriḥ kotamèŋ tumuwoḥ.

23. marma tansaḥ pra nata prapta tumruntun, suméwa tur bulu bĕkti, warṇa mas sosotya murub, ana ṅaturkĕn putrèstri, kaŋ maṅka sĕkar kaḍaton.

24. suka pinèt cèṭi panĕbaḥ jinĕmrum, naṅiŋ saŋ jiwanda aji, dèrèŋ panuju iŋ kayun, ṅraras rasikèŋ jinĕm mrik, makṣiḥ kasĕṅsĕm murwèŋ om.

25. myaŋ marṣita mriŋ para narpati tamu, tuman tumanĕm martani, mamardawa rèḥ darmayu, mamayu ayuniŋ kapti, mriḥ kontap kotamèŋ katoŋ.

26. tinétésan iŋ wé maya martanayu, marmanta para narpati, sotaniŋ sita sahèstu, sĕtya tan malaŋ tumoliḥ, tampi wasita kinahot.

27. paṅulahiŋ bisanèŋ tyas agal ḷĕmbut, mriḥ ḷĕbdaniŋ lahir batin, wus samya ṅrasa pinutus, tatas praptaniŋ kajatin, waṣkiṭa tan was iŋ batos.

28. kasokiŋ tyas pra narpa paṅrasanipun, mariŋ saŋ jiwanda aji, samya sajarwa tuwajuḥ, sinĕṅguḥ hyaŋ otipati, patut sinĕmbaḥ pra katoŋ.

29. tan pantara arṣayèŋ tyas para ratu, siyaŋ atanapi ratri, samya moŋ raras mriḥ rum rum, ṅrĕrantam wasitèŋ saŋ sri, rèḥ rasikèŋ lahir batos.

30. sotaniŋ tyas kadyaṅganiŋ kalpataru, ṅaraŋ iŋ maṅsa maṅgasri, katurunan warṣayarum, rumasuk sakala dadi, amardapa murwèŋ ron ron.

31. royo royo rumambaka babar santun, mandanarda suganda mriḥ, marbuk wratèŋ rat kalimput, rumiŋ puspita mĕnuhi, wèḥ yĕmiŋ tyas kaŋ maṅayom.

32. ya ta maṅkya pra nata wus ṅrasa tuwuk, wahyaniŋ kaŋ wahyu jati, tantara pra nata matur, mriŋ saŋ piṇḍa jawatadi, iŋ rèḥ wus maṛĕm iŋ batos.

33. minta amit umantuk mriŋ prajanipun, wit sampun lama sumiwi, iŋ ṅabyantarèŋ saŋ mulku, bok iŋ ṅarṣa arṣèŋ dasiḥ, saŋ jiwanda manabdalon.

34. ḍuḥ sumitra rèḥ sampun sampatiŋ parlu, kula tan baṅkit mambĕṅi, dènnya sudararṣa kondur, iŋ rèḥ samya mĕṅku wajib, ṅrèḥ praja mriḥ karahayon.

35. tarlèn kula amuŋ suŋ pudya rahayu, myaŋ dahat panuwun mami, widadaa ambĕk sadu, kĕkadaŋ sinarawèdi, dimèn raharja praptèŋ don.

36. pra naréndra sadaya umatur sèwu, kapuṇḍi ḍawuḥ saŋ aji, dahat kaliṅga iṅĕmbun, antuka barkaḥ narpati, mawèt sumawitèŋ katoŋ.

37. samantara pra nata kalilan sampun, wotsari bibaran sami, mantuk mariŋ prajanipun, saŋ jiwanda ṅĕñapuri, puwara kaŋ kacariyos.

38. sapĕṅkĕriŋ para narapati tamu, iŋ garbasumaṇḍa nagri, saṅsaya wimbuḥ kasumbuŋ, kasumbagèŋ rat ṅèbĕki, prabawaniŋ prabhu kahot.

39. dupyantara antuk sawarṣa saŋ prabhu, jiwanda jumĕnĕŋ aji, prajanya lulus rahayu, kayuman yuwanèŋ saŋ sri, maṅkya iṅkaŋ kacariyos.

40. duk iŋ ari ṛĕspati samana nuju, saŋ nata miyos tinaṅkil, pĕpak kaŋ sumiwèŋ ṅayun, patiḥ sucipta nèŋ ṅarṣi, sri naréndra ṅandikalon.

41. mariŋ patiḥ sucipta tinujwiŋ wuwus, ṛĕṅĕnta hèḥ kakaŋ patiḥ, wruhanta ri iki iṅsun, rada kataman rudatin, ruwĕd rasaniŋ tyas iṅoŋ.

42. darunané duk ari aṅgara dalu, sun nuṅku pudya sĕmadi, jroniŋ nĕŋ ana karuṅu, swara dumĕliŋ suŋ waṅsit, karasa sajroniŋ rahos.

43. wuryaniŋ kaŋ swararum kaŋ mawèḥ wuyuŋ, hèḥ titaḥ ulun ki aji, jiwanda kaŋ mriḥ darmayu, wruhanta yèn kita apti, karaton ta karahayon.

44. tur widada dadi sasĕdyanta kulup, kita mèta saranadi, maṅka saratiŋ rahayu, wanodya ayu linuwiḥ, kakasihiŋ déwa kahot.

45. nama éṇḍaŋ manindra sutaniŋ wiku, surasa iṅkaŋ martapi, graniŋ rasamulya gunuŋ, iku lakonana nuli, mĕnĕŋ swara tan karahos.

46. iku kakaŋ rasakĕna kaŋ satuhu, paran wusananiŋ waṅsit, patiḥ sucipta umatur, rahosiŋ tyas amba gusti, punika wasita jatos.

47. mila maṅkya yèn paṛĕŋ lan karṣa prabhu, lajĕŋ utusan prayogi, iŋ ḍépokira saŋ wiku, amuṇḍut sĕkariŋ wukir, maṅka saratiŋ karaton.

48. sri naréndra kapanujwèŋ tyas gya ḍawuḥ, yèn mĕṅkono kakaŋ patiḥ, amataha kaŋ sun utus, pantĕsĕn iṅkaŋ patitis, amuṇḍi nawalaniṅoŋ.

49. saŋ sucipta manĕmbaḥ sarwi umatur, iṅkaŋ sayogya tinudiŋ, muṇḍi nawala sinuhun, arya tantrasmara gusti, nata maṅgut ṅandikalon.

50. mĕṅko nuli akaryaa surat iṅsun, arahĕn kaŋ mamalad siḥ, kaŋ rumĕsĕp iṅkaŋ alus, sarta kaŋ kapara taklim, naṅiŋ iṅkaŋ cĕkak ahos.

51. kyana patiḥ manĕmbaḥ gya noliḥ puṅkur, ṅawé wadya juru tulis, citramaya kaŋ tinuju, wus maṛĕk ṅarṣa wotsari, mantrimuka manabdalon.

52. citramaya sira anurata gupuḥ, nawaléndra mriŋ saŋ ṛĕṣi, surasa kaŋ tapèŋ gunuŋ, iŋ rasamulya tumuli, winulaŋ wosiŋ surahos.

53. tan antara punaŋ pustaka wus rampuŋ, katur tinupikṣèŋ saŋ sri, kapaṛĕŋ jĕŋ saŋ sinuhun, sampun dèn tapak astani, tinampèn patiḥ wotsinom.

54. dyan kya patiḥ asasmita pasaŋ sĕmu, mriŋ saŋ tantrasmara tampi, maṛĕk iŋ ṅarṣa wotsantun, nampèni nawala sarwi, winaṅsit wosiŋ wigatos.

55. arya tantrasmara sandika turipun, manĕmbaḥ gya minta amit, linilan lumèṅsèr sampun, mĕdal sampun praptèŋ jawi, tantara sri nara katoŋ.

56. suŋ sasmita gya jĕṅkar mañjiŋ kaḍatun, iṅayap baḍaya srimpi, patiḥ sawadyanira wus, bibar sosowaṅan sami, wahu ta duta saŋ katoŋ.

57. biḍal sampun akaṇṭi panĕkaripun, lañcaran nitiḥ turaṅgi, datan kawarṇa iŋ ĕnu, praptèŋ samipaniŋ wukir, rasamulya samya ṅaso.

58. kacarita iŋ pratapan saŋ awiku, kadi sampun aṅsal waṅsit, iŋ wañci éñjiŋ ḍĕḍawuḥ, mariŋ para cèkèl cantrik, kinèn ṛĕṛĕṣik mirantos.

59. lan cacawis maṅka pakurmatiŋ tamu, tantara dutèŋ sri prapti, saŋ paṇḍita mĕṭuk gupuḥ, praptèŋ natariŋ pipidik, tuṇḍuk sampun mañjiŋ ḍépok.

60. dyan aḷĕṅgaḥ satata saŋ wiku muwus, ḍuḥ radèn dutèŋ narpati, punapa sami rahayu, rawuḥ paduka iŋ wukir, tantrasmara matur alon.

61. sakiŋ barkaḥ paduka saŋ maha wiku, sagotra sami basuki, dé prapta kula saŋ wiku, iṅutus sri narapati, mariṅkĕn taklim saŋ katoŋ.

62. lan mariṅkĕn nuwaléndra iŋ saŋ wiku, sĕrat wus tinampèn mariŋ, saŋ tapa sinukṣmèŋ kalbu, bubukaniŋ kaŋ kintèki, sasampuniŋ kurmat iṅoŋ.

63. sakiŋ kula putranta iṅkaŋ sinĕbut, prabhu jiwanda bibisik, iṅkaŋ maharjèŋ prajaguŋ, iŋ garbasumaṇḍa sakiŋ, karṣaniŋ kaŋ murwèŋ pandon.

64. katur paman surasa iṅkaŋ mawiku, graniŋ rasa mulya wukir, kaŋ kaswarambĕg martayu, satata mriḥ silastuti, trusiŋ karasikan kahot.

65. wiyosipun wosiŋ gati paman wiku, mĕnawi paman maṛĕṅi, lawan kapanujwèŋ kayun, putranta dyaḥ manindradi, ṅoŋ pinta supadya dados.

66. usadaniŋ rudaḥ ruditèŋ tyas ulun, lan kabubuḥ aṅahubi, sakukubaniŋ kaḍatun, ṅoŋ srahkĕn iŋ yayi dèwi, tĕtĕp sĕkariŋ kaḍaton.

67. tarlèn rèhniŋ kula makṣiḥ muḍa puṅguŋ, gumuṅguŋ tan wrin iŋ krami, muhuŋ paman saŋ awiku, karṣa amidana midiḥ, mamardyiŋ rèḥ karahayon.

68. titi tékaŋ kintaka pinuṇḍyèŋ ṅĕmbun, saŋ wiku wasana ririḥ, ḍuḥ déwa ḍuḥ jawataguŋ, kaliṅané ya wak mami, tĕka pinilalèŋ katoŋ.

69. salugutiŋ kolaŋ kaliŋ tan ṅrĕmpĕlu, pinilutèŋ narapati, iṅakĕn sĕntana tuhu, baya wus karṣèŋ déwadi, si manindra sutaniṅoŋ.

70. bokmĕnawa dadi marganiŋ rahayu, wĕkasan wacana aris, ḍuḥ aṅgèr dutèŋ sinuhun, ḍawuhiŋ sri narapati, kaŋ kawrat kintaka kahot.

71. linutiŋ kaŋ la ĕla mamalad kayun, karya kayuṅyun sayĕkti, rahosiŋ tyas kula sèstu, sor maṅgiḥ rukmi sawukir, botĕn añana sayĕktos.

72. lamun makṣiḥ iṅakĕn sĕntanèŋ prabhu, paman kramaniŋ narpati, lan maliḥ ḍawuḥ saŋ mulku, amuṇḍut sutèṅoŋ èstri, maṅka sĕkariŋ kaḍaton.

73. pun manindra raré wukir kahu kiḍuŋ, uguṅané woŋ iŋ dèsi, babasané koguŋ taṅguŋ, cara ḍusun nora baṅkit, nutu ñapu méṅkak méṅkok.

74. dĕṛĕp tandur aṅgĕgéṇḍoŋ botĕn purun, cara praja tan udani, tata krama ñamut ñamut, daya yèn ayu kaŋ warṇi, cĕmĕŋ maṅkak ambĕṅkĕrok.

75. parandéné lagéhané ḷĕṅguk ḷĕṅguk, kadi ṅaḷĕmé kapati, ṅiŋ wontĕn pĕṭikanipun, upami kaŋ puspitadi, dèrèŋ kiṅsĕp sadpadandon.

76. awit sakiŋ rinĕkṣa iŋ biyaṅipun, tan kéṅiŋ pisaḥ sañari, trĕṣṇané kalaṅkuŋ laṅkuŋ, yayaḥ myat pratima rukmi, aṅguŋ kinudaŋ ginéṇḍoŋ.

77. labĕt sakiŋ botĕn wontĕn tuṅgilipun, iṅgiḥ muŋ satuṅgal glintir, tan kakaŋ aḍi puniku, éwadéné rèḥ samaṅkin, wontĕn kapaṛĕŋ saŋ katoŋ.

78. muṇḍut cèṭi atur kula sakalaṅkuŋ, kapuṇḍi ḍawuḥ narpati, muŋ sumaṅgèŋ karṣa prabhu, kula tan ṅrahos darbèni, muŋ gaḍuḥ kagĕṅan katoŋ.

79. arya tantrasmara amaluyèŋ wuwus, sarya mèsĕm mèt malad siḥ, ḍuḥ saŋ paṇḍita saklaṅkuŋ, suka kawula miyarṣi, sabda saŋ ṛĕṣi cumoṇḍoŋ.

80. baya sampun atas karṣèŋ jawataguŋ, putranta saŋ ṛĕtna dèwi, dados ratuniŋ pararum, kawula dahat mumuji, widadaniŋ praptèŋ ṅĕndon.

81. saŋ paṇḍita nabda ḍuḥ aṅgèr saŋ bagus, iṅgiḥ sukur bokmĕnawi, ḷĕstantun ñèṭi saŋ prabhu, dados panĕbaḥ jinĕm mrik, sahiba biṅahiŋ batos.

82. tan antara sugata mĕtu winantu, parikrama mirakĕt siḥ, suwawi aṅgèr saŋ bagus, sugatané iṅkaŋ bibi, baya tan wontĕn mirahos.

83. iṅgiḥ déniŋ sadaya wĕdalan ḍusun, saṅĕt kuciwa sayĕkti, amuŋ dĕlap dĕlapipun, sukur sagĕd dados jampi, paṅrapiḥ lampaḥ kaḷĕson.

84. saŋ nararya gya ḍahar saṛĕŋ saŋ wiku, rampuŋ linorodkĕn mariŋ, pra panĕkar samya tuwuk, wĕkasan saŋ arya nuli, matur rèḥ wosiŋ wigatos.

85. sampun sampat aminta surat sul aṅsul, kaŋ katur sri narapati, saŋ paṇḍita mèsĕm muwus, laḥ aṅgèr iṅgiḥ prayogi, maṅké rumiyin saŋ anom.

86. kula manaḥ rahosiŋ pustaka prabhu, kajawi amuṇḍut cèṭi, tĕka iṅgiḥ mawi parlu, wicakṣèŋ saŋ sri kahèkṣi, riṅkĕs wiṅit gawat uwos.

87. sasadoniŋ sinandi iŋ pasaŋ sĕmu, siŋ saŋ sri sampun mumpuni, ulaḥ kriḍaniŋ ṅahiḍup, kĕḍap kilapiŋ dumadi, makatĕn wosiŋ pasĕmon.

88. dènnya saŋ sri krama paman nĕbut wiku, mriŋ kula woŋ tani wukir, yèn sinrapat trapiŋ pasmun, pantĕs kéwala wit sakiŋ, mirakĕt mèt prana mriŋ ṅoŋ.

89. ñatanipun sayĕkti botĕn kalintu, makatĕn caritèŋ ṅuni, hyaŋ jiwandana iŋ daṅu, ramanta sri narapati, duk dèrèŋ putra saŋ katoŋ.

90. kaṛĕmĕné siluman nèŋ ṅawaŋ uwuŋ, amuŋ lawan rama mami, maṅka ĕmban wulucumbu, dé pun bupa parabnèki, saŋ trimurtaya : kacriyos.

91. salaminya tan naté pisaḥ sarambut, manukṣma mriŋ pundi pundi, rama tumutur tan kantun, ruruntuṅan rinakĕt siḥ, sasat wayaṅan tinonton.

92. duk hyaŋ jiwandana sampun asusunu, miyosi sri narapati, rama gya susuta ulun, lajĕŋ sami mukṣa mariŋ, iŋ kaswargan sakaroṅron.

93. praptèŋ maṅkya saŋ jiwanda saŋ aprabhu, kawuryan makṣiḥ ṅlĕluri, makṣiḥ maman kramanipun, wawaḥ muṇḍut cèṭi mariŋ, anak kawula pun ḍénok.

94. tarlèn sakiŋ waṣkiṭané saŋ sinuhun, kèndĕl wacanèŋ saŋ ṛĕṣi, arya tantrasmara ṅuṅun, puwara aminta maliḥ, sĕrat kaŋ katur saŋ katoŋ.

95. saŋ paṇḍita gya ṅaturkĕn suratipun, sarya awacana manis, radèn wahosĕn rumuhun, punapa sampun prayogi, katur iŋ jĕŋ saŋ akatoŋ.

96. rèḥ pun bapa kiraŋ sampurṇa iŋ tĕmbuŋ, mĕnawi botĕn patitis, kuciwa katur saŋ prabhu, kapaṛĕṅa amahoni, mriḥ karya ṛĕnaniŋ katoŋ.

97. dyan binuka supatra sinukṣmèŋ kalbu, surasaniŋ kaŋ kintèki, noraga raras sinawuŋ, iŋ ukara arum manis, mĕmĕs mèt prana wor pasmon.

98. sĕrat saha pudya kastawa jinaṅkuŋ, sakiŋ pun bapa iŋ wukir, dĕlapipun kaŋ anĕbut, ajar surasa pun patik, koñjuk iŋ jĕŋ saŋ akatoŋ.

99. maha prabhu jiwanda kaŋ sudibyanuŋ, manubawa ambawani, iŋ bhuwana sru kasumbuŋ, kaprabawan wibawèŋ sri, nadyan jroniŋ guwa sigroŋ.

100. myaŋ ograniŋ arga guŋ saṅgya ginĕluŋ, goloṅaniŋ agal alit, ugĕt ugĕt kaŋ salugut, gĕsaṅipun tarlèn sakiŋ, paduka sri narakatoŋ.

101. kula nuwun pun dasiḥ paduka sampun, amuṇḍi nawala aji, surahosiŋ karṣa prabhu, patikbra sampun atampi, saklaṅkuŋ suka tanpandon.

102. yayaḥ iṅkaŋ cintaka kasatan ranu, duk nuju maṅsa maṅgasri, mĕsatiŋ akasa silum, aṅulati tirta wĕniŋ, dyan prapta kaŋ riris mawor.

103. gandaniŋ kaŋ puspitadi arum arum, rumĕsĕp iŋ srira kadi, rogardantuk usadanuŋ, puwara waluya jati, yĕkti sru sukaniŋ batos.

104. pan makatĕn rahosiŋ manaḥ pukulun, myaŋ manuṅku pudyastuti, iŋ déwa mawantu wantu, miminta arjaniŋ aji, lulusa murwèŋ karaton.

105. tarlèn maṅkya sadaya iŋ atur ulun, muwaḥ wontĕnirèŋ wukir, cĕkap paduka andaṅu, arya tantrasmara yĕkti, matur sarèhiŋ lalakon.

106. titi sampun tiniṅkĕm saŋ arya muwus, sampun prayogi saŋ ṛĕṣi, wosiŋ surasa saklaṅkuŋ, la ĕla mamaladiŋ siḥ, yĕkti karya sukèŋ katoŋ.

107. gya saŋ arya tantrasmara pamit sampun, biḍal tan kawarṇèŋ margi, sampun prapta iŋ prajaguŋ, saŋ prabhu nuju tinaṅkil, pĕpak kaŋ sumiwèŋ katoŋ.

108. arya tantrasmara wus maṛĕk iŋ ṅayun, aṅaturkĕn kaŋ kintèki, tinampèn patiḥ gya katur, risaŋ sri punaŋ kintèki, binuka sinukṣmèŋ batos.

109. sri naréndra mèsĕm iŋ tyas manabdarum, kakaŋ patiḥ saŋ maharṣi, wus waṣkiṭa wruhiŋ sĕmu, lan mariṅakĕn kintèki, patiḥ nampèni wotsinom.

110. saŋ nararya tantrasmara gya dinaṅu, wontĕn iŋ pratapan tuwin, sambitaniŋ ginĕm wuwus, saŋ arya matur patitis, tan wontĕn kiraŋ sawiyos.

111. sri naréndra maliḥ aṅandika arum, bésuk purṇamaniŋ sasi, yayi dèwi iṅsun pĕṭuk, kakaŋ samĕktaa nuli, jĕmpana kaŋ amirantos.

112. tan antara saŋ prabhu jĕṅkar ṅaḍatun, kya patiḥ mamataḥ nuli, mariŋ kaŋ arṣa dèn utus, lir agñanira saŋ aji, sandika kaŋ tampi pakon.

113. sasampuniŋ sampat panataniŋ wadu, anulya bibaran sami, kawarṇaa saŋ awiku, kalaṅkuŋ sukaniŋ kapti, sapuṅkuriŋ duta katoŋ.

6. paṅkur

1. saŋ wiku luṅguḥ lan garwa, éṇḍaŋ manitaya iṅkaŋ wawaṅi, myaŋ kèn manindra aluṅguḥ, anèŋ ṅarṣaniŋ réna, saŋ paṇḍita anulya ṅandika arum, hèḥ yayi kèn manitaya, iṅsun tan ñana tan ṅimpi.

2. yèn nugrahèŋ hyaŋ ḍumawaḥ, sutanira ni éṇḍaŋ tĕka dadi, kapaṛĕṅiŋ saŋ sinuhun, arṣa pinuṇḍut garwa, sawatara ri nata utusan mĕṭuk, baya wus karṣaniŋ sukṣma, sutanta iŋ tĕmbé dadi.

3. paṅayoman kulawarga, añwargakkĕn mariŋ woŋ tuwa yayi, tarlèn rèḥ samĕṅko uwus, marpĕk parluniŋ karya, nuli sira mirantia wosiŋ prĕlu, lan sutanira ni éṇḍaŋ, upakaranĕn kaŋ bĕcik.

4. gya jumĕnĕŋ saŋ paṇḍita, mĕṅkul jaṅganira kaŋ putra sarwi, ṅĕlus késwa lan nabdarum, ḍuḥ ñawa sutaniṅwaŋ, kamayaṅan tĕmĕn gèr sira nak iṅsun, arṣa dadi garwa nata, makṣiḥ taruna pinĕkik.

5. turasiŋ jawata mulya, kinasihan iŋ saŋ hyaŋ otipati, sakiŋ tyas ambĕk santayu, bèrbudya paramarta, aṅĕsorkĕn tyasiŋ pra paṇḍita putus, tan liwat sira sutèṅwaŋ, dèn bisa suwita nini.

6. laḥ yayi maṅsa boḍowa, dènnya mulaŋ muruk mriŋ sutanèki, mriḥ susilaniŋ kramayu, sun arṣa mañjiŋ saṅgar, amĕmuja muji raharjaniŋ parlu, lulusa doḥ sambékala, kalakona karṣèŋ saŋ sri.

7. sapĕṅkĕrira kaŋ rama, kèn manindra waspanira drĕs mijilya, ṅaṅsĕg aṅsĕg sĕṅgruk sĕṅgruk, kétaŋ rujitiŋ driya, déniŋ dèrèŋ diwasarṣa switèŋ kakuŋ, tur nataguŋ binaṭara, bahuḍĕṇḍa ñakrawati.

8. paran puwarané baya, lamun iṅsun umarak aṅladèni, iṅsun duruŋ tahu tahu, wĕruḥ tataniŋ pura, paran lamun ginuyu pawoṅanipun, yĕkti kaliṅsĕmaniṅwaŋ, priyé bésuk awak mami.

9. nulya ṅalosotiŋ kisma, miṅsĕg miṅsĕg sĕmaṅiŋ tyas kĕpati, tètèsiŋ luḥ tiŋ paṛĕntul, sakiŋ nétra kawuryan, lir gĕbyariŋ sosotya iṅkaŋ sumawur, mawuriŋ sisinom iṅkaŋ, manawĕŋ wadana kadi.

10. luŋ luŋ maṅluŋ séla gilaŋ, aṅaléla mĕlok amilaṅĕni, kaŋ ibu mulat kapiluḥ, béla karunèŋ putra, pinarpĕkan luṅayaniŋ dyaḥ rinaṅkul, lalu sumuṅkĕm iŋ paṅkyan, makṣiḥ mĕsĕsĕkkĕn naṅis.

11. kaŋ ibu muwus mawarta, wuryèŋ gita maṅimur ṅariḥ ariḥ, winoriŋ wulaŋ wuwuruk, ḍuḥ ñawa wodiŋ driya, wis mĕnĕṅa aywa karuna woŋ ayu, sapa iṅkaŋ kaya sira, duruŋ diwasa iŋ wañci.

12. wus cĕlak kaŋ jatukrama, ḍasar nata misiḥ jajaka pĕkik, tur milala mriŋ sirèku, tarlèn sakiŋ sihiŋ hyaŋ, paran tĕka sira malaḥ sru kapiluḥ, nora katon suka buṅaḥ, sapa kaya sira nini.

13. baya yèn uwus kalakyan, yĕkti dadi pĕpéṅinan lyan janmi, déné sira rara gunuŋ, sinuṅsuŋ iŋ saŋ nata, piniluta jinuñjuŋ jumĕnĕŋ ratu, aṅratoni pra wanita, mranata sajroniŋ puri.

14. marmanta gèr sutaniṅwaŋ, narimaa sihiŋ jawata luwiḥ, rumasaa nugraha guŋ, aywa aṅguŋ karuna, muṇḍak karya kuwuriŋ wardayaniṅsun, baya bĕcik nuli sira, aṅraras ayuniŋ warṇi.

15. sapa iṅkaŋ kaya sira, ayu kuniŋ wiṅwiŋ rampiŋ jĕkiniŋ, réma mamak ṅĕmbaŋ bakuŋ, watĕké nora waṅkal, wĕdi maraŋ woŋ tuwa ambaṅun turut, alis iṛĕŋ ṅroniŋ imba, watĕké ḷĕgawèŋ budi.

16. nétra lindri lindri piṇḍa, kumĕñariŋ wintaŋ iŋ baṅun éñjiŋ, marakké sinihan kakuŋ, laṭi maṅgis kaṛĕṅat, mèṅèr mèṅèr yèn sinawaŋ mawèḥ wuyuŋ, untu ṛĕntĕt amradipta, watĕk rahayu iŋ budi.

17. agé aṅgèr asirama, mariŋ taman payo iṅsun jamasi, sarwi késwanya iṅĕjum, kaŋ ruwĕt sinĕratan, sarya muwus wis wuwuḥ dawa rambutmu, ḍasar iṛĕŋ ṅaṇḍan aṇḍan, bésuk yèn dèn bhuṣaṇani.

18. ginĕluŋ gĕḍé taṅgalan, baya nora dadak añĕmarani, kari sinĕkaran arum, jamaŋ mas karṇantéra, kaluŋ suṅsun sutèṅson sosotya murub, gĕgĕlaŋ kĕlat bahu mas, tinarètès iŋ mamanik.

19. saya ayu sutaniṅwaŋ, ḍasar manis wĕnĕs dèn bhuṣaṇani, yĕkti lir apsari nurun, pantĕs ginarwèŋ nata, kèn manindra karoban panĕmbramarum, iŋ réna tyas kapiṛĕnan, sumèhiŋ nétya kahèkṣi.

20. kaŋ ibu kalaṅkuŋ suka, myat iŋ putra sampun nampèni waṅsit, wasitèŋ réna tinurut, mĕñat wisatèŋ taman, siram sampun nulya mĕntas amĕmatut, pasatan wastradi mulya, cinitra sĕkaran wilis.

21. kasmĕkan sutradiwaṅga, tĕṅaḥ ṛĕkta tĕpi tinata mawi, paniti iṅiṣṭa kupu, ĕmas pinatik ṛĕtna, nora mawi rasukan muŋ rimoŋ wuṅu, ṅaṅraṅan tinon rumamyaŋ, ṅĕmuli sarira kuniŋ.

22. piṇḍa ima layèŋ wiyat, aṅawĕṅi wuryaniŋ sitaṛĕsmi, maya maya mawèḥ wuyuŋ, késwa aṅéndrawila, wilis maya iṅukĕl kĕliŋ maladkuŋ, nulya mèt puspitèŋ taman, taluki séta piniliḥ.

23. winor lan roniŋ cĕmara, muŋ samatra pinati iŋ tatali, anulya iṅagĕm cuṇḍuk, iŋ kériŋ ukĕlira, kawistara saya raras wuwuḥ ayu, lir hyaŋ hyaṅiŋ suralaya, ṛĕtna dèwi irim irim.

24. tumurun arṣa ṅrĕñcana, ṛĕṣi tapa ograniŋ arga wiṅit, araṅu raṅu lumaku, masmu ĕmariŋ driya, bokmĕnawa iṅupadrawèŋ saŋ wiku, tan wun wuri kadrawasan, satĕmaḥ asalaḥ warṇi.

25. saŋ ṛĕtna wus mulyèŋ wisma, kaŋ udyana suṛĕm sirṇa tanpa sri, kadyaṅganiŋ aṅga rapuḥ, alum lom tan ṅujwala, samaṅkana éṇḍaŋ manitaya sampun, ṅèstokkĕn ḍawuḥ saŋ tapa, atata tata miranti.

26. nĕŋna gantya kaŋ winarṇa, iŋ ograniŋ wukir sikara maṅkin, wontĕn ratuniŋ ḷĕḷĕmbut, warṇa ditya birawa, ajujuluk sri kaladruhaka prabhu, rajané makṣiḥ siluman, tan ana janma udani.

27. aṅkĕré kagila gila, siṅa mara siṅa prapta ṅĕmasi, tan ana janma jumamut, ajriḥ sinikṣèŋ sétan, ĕmar lamun rinĕñcana iŋ ḷĕḷĕmbut, tuwin karantiŋ siluman, dé saŋ kaladruhakaji.

28. sariragĕŋ lir hyaŋ kala, nétra piṇḍa baṣkara anĕlahi, tutuké aṅguwa siruŋ, waja aṅapurañcaŋ, rambut gimbal gumbalagĕŋ imba jĕmbruŋ, goḍèk wok bris simbar jaja, ulat jĕṅguṛĕŋ ṅajrihi.

29. dibya sakti mandraguna, datan kéwran manukṣmèŋ agal alit, iŋ ṅalaga luwiḥ tĕguḥ, sugiḥ bala gagalan, galak galak galaṭak sok nĕkak gulu, gul agul maṅgalèŋ laga, kèḥ guŋ luhur gigilani.

30. kaŋ maṅka pramukèŋ praja, patiḥ nama kalagragoḍa tuwin, sénapatinira juluk, ditya kalaṛĕñcana, kaliḥ samya piliḥ taṇḍiŋ iŋ apupuḥ, sriragĕŋ bérawa bérag, sugiḥ gĕlariŋ ajurit.

31. digdaya sugiḥ kagunan, tan kèwĕran manukṣma iŋ aṛĕmit, kĕmat kamayané putus, para nayaka nracak, widagda riŋ sandiniŋ rèḥ mara sadu, bala rucaḥ brakasakan, drubikṣa gĕŋ gigirisi.

32. karya mirisiŋ lyan praja, kĕkĕs mirut iŋ tyas samar mar wiṅwrin, iŋ ari sajuga nuju, saŋ sri kaladruhaka, sinéwaka luṅgwèŋ witana mas murub, iṅayap pri parayaṅan, ṅampil upacara sami.

33. ĕmban wisarda suméwa, cĕlak luṅgwèŋ wurinira saŋ aji, ṅĕpĕti srira saŋ prabhu, lawan lariŋ mañura, ginaran mas pinatik sosotya mañcur, kya patiḥ sawadyakuswa, pĕpak wus sumiwèŋ ṅarṣi.

34. wadya ditya muṅgwiŋ ṅarṣa, pra nayaka cĕlak wuriniŋ patiḥ, wolu gagala gul agul, juga ran kaladirga, kalapakṣa kalaarda kalariḍu, myaŋ ditya kalagoraya, kalahina kalawèṣṭi.

35. kalaruhara kalawan, ditya kalamisaya jajarṇèki, raja gandarwa jujuluk, saŋ rodapakṣa lawan, saŋ niaya nata tĕlukan ṅalumpuk, anèŋ wuri iṅampiṅan, pra wéwé gandarwa tuwin.

36. jaraṅkoŋ jajar lan égraŋ, jajaṅgitan kĕblak ṭéṭékan tĕṅis, iḷĕr iḷĕr ilu ilu, ḷĕḷĕṭĕk anèŋ wuntat, tiŋ pariṅis tiŋ cĕṅèṅès marikĕlu, aṅrĕkĕkĕl jriḥ iŋ nata, siḍĕm tan wani cumawit.

37. ḍèhèm saŋ nata ṅandika, gumaḷĕgĕr piṇḍa galuḍug muni, patiḥ gragoḍa tinuju, hèḥ paran bapa patya, pawartané dèn ta rumĕkṣa prajaguŋ, apa sira wus rumasa, tan ana kaŋ makéwuhi.

38. lamun makṣiḥ ana iṅkaŋ, dadi wagĕl karya gĕlaniŋ galiḥ, ywa tlaṅké nuli pinukul, ĕjuṛĕn prajanira, ratunira talikuṅĕn tinaruṅku, baranané jarahana, putriné boyoṅĕn nuli.

39. patiḥ gragoḍa tur sĕmbaḥ, ḍuḥ déwaji sakiŋ barkaḥ narpati, sadaya ratu ḷĕḷĕmbut, iṅkaŋ sipat ṛĕkṣasa, myaŋ kaŋ sipat gandarwa myaŋ sanèsipun, sampun sumiwi sadaya, iŋ ṅabyantarèŋ narpati.

40. ḍuḥ gusti paṅrahos amba, soriŋ wiyat myaŋ salumahiŋ bhumi, sintĕn kaŋ kadya saŋ prabhu, dènnya winoṅwoŋ déwa, tinurutan sakarṣa karṣa jinuruŋ, sakiŋ pra déwa sumĕlaŋ, malaṅi karṣèŋ narpati.

41. kantun kaŋ sipat manuṅsa, iṅkaŋ dèrèŋ sumiwèŋ ṅarṣèŋ aji, papacuhiŋ saŋ hyaŋ guru, paduka tan kalilan, aṅrañcana manuṅsa kaŋ ambĕk sadu, kaŋ sudirèŋ tapabrata, mindĕŋ iŋ pudya sĕmadi.

42. naṅiŋ kaŋ aṅkara murka, muṅkur mariŋ pakartyèŋ silastuti, wĕnaŋ iṅarat tinuntun, ḍatĕŋ arga sikara, sampun kéṅiŋ rinèḥ sakarṣa saŋ prabhu, kinarya paṅéwan éwan, winisésa pinisakit.

43. jawata tan munasika, sampun dados ḷĕpatipun pribadi, naṅiŋ kaŋ ambĕk rahayu, tan kĕni rinañcana, jĕr puniku kakasihiŋ jawata guŋ, yèn paduka gora goḍa, kĕnèŋ sikuniŋ déwadi.

44. saŋ nata suka ṅandika, iya bĕnĕr kaya turira patiḥ, naṅiŋ yèn sun nĕdya wanuḥ, maraŋ janma manuṅsa, kaŋ supaya dadya mitra darma tuhu, kaya tan kalbu laraṅan, maṅkéné lirira patiḥ.

45. graniŋ wukir rasamulya, ana wiku tatapa awawaṅi, ṛĕṣi surasa jujuluk, darbé putrèstri aran, dyaḥ manindra warṇanira luwiḥ ayu, sor ṛĕsminiŋ suralaya, maṅkya mĕnawa saŋ ṛĕṣi.

46. rila tan makéwuhaya, sutanira ṛĕtna manindra dèwi, jalukĕn karana ayu, arṣa sun puṇḍut garwa, wit manira kaliwat kataman wuyuŋ, guŋ katon kacakrabawa, karoṅron sajroniŋ guliŋ.

47. sun lilipur saya braṅta, linalali malaḥ ṅaléla kèkṣi, cumaṇṭèl iŋ nétraniṅsun, tan kĕna sinayutan, mula lamun ṛĕṣi surasa tan asuŋ, tĕgĕsé saŋ ṛĕṣi boṅgan, tan kĕna ginawé bĕcik.

48. ya nuli rinuda pakṣa, uwis bapa utusana sahiki, aja koṅsi bali ṅlĕṇṭuŋ, mĕṣṭi éṇḍaŋ manindra, dina iki tĕka iŋ karaton iṅsun, patiḥ sandika turira, saŋ prabhu wus mañjiŋ puri.

49. kya patiḥ ḷĕgĕg iŋ driya, daṅu gagas karṣèŋ saŋ yakṣapati, dérarṣa nĕrak papacuḥ , ira hyaŋ jagadnata, wiku tapa arṣa sinaṅsayèŋ laku, tan was wisésaniŋ déwa, baya wus karṣaniŋ widhi.

50. arṣa nĕmu karusakan, puluḥ puluḥ paran dènnya sumiṅkir, wus dadya karṣaniŋ ratu, muŋ kudu linakṣaṇan, dyan aṅawé puṅgawa kaŋ gantuŋ laku, ran ditya kalarodakṣa, kalawan kalapañcuri.

51. maṛĕk sampun ḍinawuhan, lumakṣaṇa kadya karṣa saŋ aji, sandika kaŋ tampi ḍawuḥ, winĕliŋ aywa ṅantya, miṇḍo karya pamit kaŋ caraka sampun, kaṇṭi wadya pataŋ ḷĕkṣa, mĕsat manapak wiyati.

52. patiḥ bibaran sawadya, nĕŋna gantya iṅkaŋ winarṇèŋ kawi, iŋ garbasumaṇḍa kasbut, saŋ aprabhu jiwanda, iṅkaŋ lagya amĕsu pudya manuṅku, ṅĕniṅakĕn ciptanira, sajroniŋ layap kahèkṣi.

53. wontĕn wanodyayu éndaḥ, ṅadi warṇa luṅgwèŋ ṅarṣa saŋ aji, saŋ nata saklaṅkuŋ ṅuṅun, mulat listyaniŋ warṇa, cahya mañcur piṇḍa purṇamèŋ sitaṅsu, dupi pinandukiŋ tiṅal, saŋ dyaḥ maḷĕs balaŋ liriŋ.

54. lir pasopati lumarap, aṅĕnani tĕḷĕṅiŋ tyas saŋ aji, sakala kataman wuyuŋ, cipta pulaŋ asmara, supé lamun tontonan jroniŋ panĕkuŋ, sigra saŋ dyaḥ pinarpĕkan, arṣa rinuṅrum rinĕmiḥ.

55. duk sampun cĕlak tantara, saŋ dyaḥ oñcat muṣṇa datan kahèkṣi, byar waṅsul punaŋ pandulu, anèŋ sajroniŋ saṅgar, sri naréndra ḷĕgĕg tyas kadadak gandruŋ, adrĕṅiŋ driya saŋ nata, arṣa ṅraras aṅulati.

7. mijil

1. sigra miyos sri naréndra sakiŋ, jro saṅgar wiraṅroŋ, kaṅuṅruṅan iŋ driya wiragé, mèṅĕt iṅkaŋ katon jro sĕmadi, dadya sru rudatin, kadurus gĕŋ gandruŋ.

2. tindak midĕr riŋ taman saŋ aji, jro tyas rujit kajog, kajaraḥ iŋ juwita kaŋ kèñjèr, jroniŋ jaman pamujan karṣa ji, yèn laju tan paṅgiḥ, lan kaŋ karya gandruŋ.

3. luhuŋ nuli maluyèŋ asĕpi, paṅrantamiŋ batos, babo sintĕn sariranta aṅgèr, baya sira ratuniŋ apsari, rawuḥ amartuwi, riŋ pun muḍa puṅguŋ.

4. dupi daṅu sun datan sumiwi, mutuŋ saŋ lir sinom, muṣṇa kantun liriṅira aṅgèr, kaŋ tinilar sumĕlèt ṅĕnani, tĕtĕḷĕṅiŋ ati, aṅrĕrontog jantuŋ.

5. èsĕmira iṅkaŋ pahit gĕṇḍis, kaṇḍas rosiŋ batos, nétranira kaŋ piṇḍa srĕṅéṅé, aṅrĕñcana wèḥ trĕñuhiŋ ati, wadana kaŋ kadi, purṇamèŋ sitèṅsu.

6. aṅrusuhi suciniŋ tyas koṅsi, sru kisruḥ kaḷĕson, kasok sasat winĕwĕs rasané, ruwĕd sumyur rantas lir rinawis, baya trus ṅĕmasi, lamun sira maṣku.

7. datan waṅsul apariŋ usadi, ruditaniŋ batos, babo sintĕn kaŋ sun sambat aṅgèr, lyan andika wodiŋ tyas pun dasiḥ, abdinta punagi, nadyan tĕmaḥ guguḥ.

8. botĕn nĕdya amisik pawèstri, lyan sira saŋ sinom, samaṅkana nata paṅaméné, kagyat wontĕn mañura kĕkaliḥ, kirap lar kĕkariŋ, raras runtuŋ runtuŋ.

9. saya trĕñuḥ kaṛĕranta koṅsi, sumiṅĕp kaŋ panon, mèṅĕt nulya mriŋ pasiramané, wusiŋ suryan gya aḷĕṅgaḥ muṅgwiŋ, tĕpiniŋ botrawi, sarwi ṅraṅkul jĕṅku.

10. aṅrĕrantam tañcĕpiŋ kaŋ kapti, kaŋ arṣa linakon, paran tĕka raganiṅsun kiyé, déné dadak kadurus rudatin, yèn iṅsun ṅrasani, mriŋ dyaḥ kaŋ kadulu.

11. jroniŋ layap liyĕpiŋ sĕmadi, yĕkti dadi guyon, apa sasat amaṅéran ipèn, anaṅiŋ ta paṅrasèṅsun yĕkti, kaya nora ṅipi, éwuḥ pamikirku.

12. lamun mĕnĕŋ nora iṅsun pikir, saŋ dyaḥ pijĕr katon, sun lilipur malaḥ saya wèntèḥ, prak atiné aṅrĕrontog ati, nadyan pra maharṣi, yĕkti tyasé kuwur.

13. naṅiŋ paran yèn maṅkono yĕkti, kinira salaḥ ton, bĕcik apa woŋ iṅaran ḍèglèŋ, puluḥ iṅsun jumĕnĕŋ narpati, yèn iṅaran bariŋ, luhuŋ mati iṅsun.

14. pupuntoné iŋ tékad saŋ aji, amuŋ arṣa lolos, aṅulati kaŋ asuŋ wiragé, supé lamun arṣa maṅun krami, muŋ kétaŋ saŋ putri, kaŋ ṅrĕñcanèŋ dalu.

15. dyan jumĕnĕŋ siŋ tĕpiniŋ bèji, asarwi wiraṅroŋ, ṅĕnĕr kori bubutulan kaŋ lèr, mlipir turut tĕpiniŋ capuri, anilapkĕn dasiḥ, iṅkaŋ sami tuṅguk.

16. sampun prapta iŋ kori kaŋ sĕpi, trus miyos saŋ katoŋ, liṅsir dalu samana wañciné, amaṛĕṅi lèkiŋ sitaṛĕsmi, piŋ sawlas sumarmi, sunariŋ sitaṅsu.

17. siṛĕm siṛĕm samar kaŋ paṅakṣi, srira srĕp karahos, saya mirut tyaṣṇya saŋ pamasé, wus kĕpĕṅkĕr laṅĕniŋ prajadi, ḷĕpas lampahnèki, prapta iŋ wanaguŋ.

18. tan ginagas priṅgabayèŋ margi, nrĕjaŋ juraŋ sigroŋ, ri ori grĕŋ tĕpiniŋ pĕpèrèŋ, wus sinĕraŋ tan kétaŋ kĕnèŋ ri, ñampiŋ rontaŋ rantiŋ, kĕrèṇḍèt kĕmaruŋ.

19. karékélan kĕplèsèt karikil, kĕruṅkĕb saŋ katoŋ, wuṅu ṅasta lata kaŋ kumlèwèr, pĕḍot ḍawaḥ maliḥ saŋ narpati, wuṅu ṅĕsaḥ sarwi, ṅĕlus ĕlus suku.

20. kaŋ kĕbĕntus iŋ séla tumawiŋ, wadéné saŋ katoŋ, tan garantĕs gya laju tindaké, wañcinira sampun gagat éñjiŋ, muni ciŋ ciŋ goliŋ, kapyarṣa suŋ wuyuŋ.

21. sata wana sabawa kalurik, mañura ñaṅuṅoŋ, kĕkirap lar aruna sumĕṅèr, giwar myarṣa sabawaniŋ janmi, barañjaṅan sami, kĕkĕjĕr dyan mabur.

22. ula ula kaŋ amuḷĕt iŋ wit, nagapuspa katon, nurut iŋ paŋ gya muḍun nalèlèr, dupi wĕruḥ saŋ nata lumaris, maṅu mahèsmu jriḥ, gya bali amucuk.

23. swaraniŋ kaŋ wanara mré atri, kapyarṣa saŋ katoŋ, kagyat iŋ tyas tantara wus sarèḥ, nulya raryan nèŋ soriŋ kusambi, asasambat mariŋ, sira saŋ wèḥ gandruŋ.

24. babo miraḥ tiṅalana mami, kataman tyas miroŋ, tilar pura méraŋ riŋ kamuktèn, lalu anis maraŋ iŋ wanadri, muŋ kétaŋ ṅulati, sariranta maṣku.

25. paran lamun sira tan wlas mariŋ, manira riniṅoŋ, paran parlunira sira aṅgèr, aṅrĕñcana woŋ nuṅku sĕmadi, muŋ pinuriḥ dadi, édan lara gandruŋ.

26. mariŋ ṅĕndi paranira gusti, tĕka pĕt tan katon, ṅatiṅala gèr sapaṅu bahé, yĕkti dadi pamuruṅiŋ pati, nĕṅĕna kaŋ lagi, aṅgĕgagas gandruŋ.

27. ditya wukir sikara kaŋ pinriḥ, ratuné wus añjog, wana iṅkaŋ paṛĕk asramané, saŋ paṇḍita surasa anaṅiŋ, dilalaḥ para wil, kabèḥ paḍa biṅuŋ.

28. ditya kalarodakṣa gya aṅliŋ, hèḥ pra kañca mĕṅko, priyé iṅkaŋ dadi piṛĕmbugé, déné tansaḥ biluluṅan sami, kĕñcĕṅaniŋ ati, bali apa bacut.

29. yèn bañjura woŋ tan wruḥ iŋ margi, apa tĕkan iŋ gon, lamun bali kayapa ḍapuré, woŋ dinuta tĕka tanpa warti, bĕkja bĕkjanèki, paḍa tinaruṅku.

30. ditya kalapañcuri nahuri, ki raka yèn iṅoŋ, ĕṅgiḥ amuŋ añarantèkaké, sawontĕné manuṅsa mĕnawi, kĕpaṅgiḥ iŋ ṅriki, pinriḥ suŋ pituduḥ.

31. samantara kalapakṣa uniŋ, téja maṇṭĕr katon, kagyat kalapakṣa gya pitakèn, aḍi ika téja apa kèkṣi, baya téjanèki, woŋ tapa puniku.

32. sitya kalapañcari niṅali, aṅuṅun iŋ batos, kakaŋ kados punika téjané, satriya guŋ anaṇḍaŋ prihatin, warṇané katawis, kuniŋ sĕmu biru.

33. yèn téjané paṇḍita martapi, kuniŋ sĕmu ijo, aḍi layak iya bĕnĕr kowé, coba payo paḍa dèn parpĕki, bokmĕnawa baṅkit, andurmakké laku.

8. durma

1. ditya kalarudakṣa sakañca buḍal, nuju téja kaŋ kèkṣi, tan antara prapta, iŋ gon prĕnahiŋ téja, téja sirṇa tan kahèkṣi, ana satriya, luṅguḥ soriŋ kusambi.

2. wus aṅira yèn iku kaŋ mawa téja, sigra dèn paṛĕpĕki, saŋ prabhu jiwanda, duk myat ana rasĕkṣa, jumĕnĕŋ sami niṅali, lampahiŋ ditya, sampun prapta iŋ ṅarṣi.

3. yun ayunan kalapañcuri tatanya, hèḥ hèḥ satriya pĕkik, iṅsun arṣa tanya, iŋ ṅĕndi marganira, kaŋ mriŋ rasamulya wukir, pratapanira, sa surasa maharṣi.

4. kaŋ adarbé suta wanodyayu éndaḥ, dyaḥ manindra wawaṅi, sumĕḍot saŋ nata, mèṅĕt patĕmbayanya, sampun mèḥ praptèŋ ubaṅgi, pamĕṭukira, naṅiŋ wus tan ginaliḥ.

5. amuŋ kétaŋ kaŋ katon jroniŋ pamuja, ditya tatanya maliḥ, babo sinatriya, tinakon tan maluya, pijĕr mĕnĕŋ tanpa aṅliŋ, mokal yèn sira, lara bisu lan tuli.

6. payo agé iṅsun nuli tuduhĕna, mĕṣṭi sira udani, marga iṅkaŋ maraŋ, iŋ gunuŋ rasamulya, ĕṅgoné manindra dèwi, agé tuduḥna, tuduhĕna tumuli.

7. tuduhĕna mupuŋ duruŋ kĕtandaṅan, ja nékad mutatuli, payo tuduhĕna, saŋ nata tan ṅandika, ditya tinapuk kaŋ rahi, agundam gundam, ladak satriya iki.

8. tinakonan duruŋ maṅsuli wacana, tĕka anapuk rahi, saŋ rodakṣa nabda, laḥ aḍi sumiṅkira, duruŋ kabĕnĕran aḍi, pitakonira, mĕṅko sun kaŋ nakoni.

9. téja téja sulakṣa tigas kawuryan, sapa sinambat iŋ siḥ, ṅĕndi kaŋ pinaṅka, paran iṅkaŋ sinĕdya, saŋ nata maluya ririḥ, buta wruhanta, prabhu jiwanda mami.

10. kaŋ ṅaḍaton iŋ praja garbasumaṇḍa, pacaṅannya saŋ dèwi, manindra sutanya, ṛĕṣi surasa iṅkaŋ, ḍépok rasamulya wukir, mĕṅko manira, iya arṣa ṅéṇḍaṅi.

11. balik sira rakṣasa saparanira, pinaṅkanta iŋ ṅĕndi, paran wigatinya, tanya marga kaŋ prapta, ḍépok rasamulya wukir, kalarodakṣa, suka gumuyu aṅliŋ.

12. iṅsun nama tuméṅguŋ kalarodakṣa, sakiŋ sikara wukir, dinuta saŋ nata, prabhu kaladruhaka, aṅlamar maraŋ saŋ dèwi, ṛĕtna manindra, sutèŋ surasa ṛĕṣi.

13. yèn tan suka kinèn ṅroda paripakṣa, jĕbul samĕṅko paṅgiḥ, lawan pacaṅannya, iya kapasaŋ yogya, iṅsun nunut amartuwi, mriŋ rasamulya, payo baṛĕŋ lumaris.

14. lan barèsé yèn sira arṣa widada, mulya wibawa mukti, sira aṅalaha, dyaḥ manindra sun gawa, katur iŋ saŋ druhakaji, iba sukanya, tĕluṅané sirèki.

15. sri naréndra jiwanda wĕṅis ṅandika, mĕṅko yèn sun wus mati, sira abañjura, mriŋ wukir rasamulya, lamun iṅsun makṣiḥ urip, kaya tan bisa, kalakon sĕdyanèki.

16. ditya kalarodakṣa dupi miyarṣa, sabdanira saŋ aji, dyan maṅkrak nabda kras, babo prabhu jiwanda, sira tĕka sru kumaki, wani anantaŋ, lañcaŋ aṅajak jurit.

17. apa iṅkaŋ arṣa kondĕlaké baya, sira uwoŋ sawiji, tur dĕdĕgmu cĕṇḍak, gĕḍému muŋ sagĕmak, buṅkik cilik mĕṅkik mĕṅkik, pakṣa lumawan, ditya luwiḥ sakĕṭi.

18. luhuŋ nuli sira tuduhĕna iṅwaŋ, goné manindra dèwi, laḥ sira ṅalaha, pacaṅanta sun pinta, atuṛĕna gusti mami, sayĕkti sira, lulus amĕṅku nagri.

19. lamun sira lumawan yĕkti palastra, prabhu jiwanda aṅliŋ, hèḥ kalarodakṣa, aja kakéhan sabda, payo nuli taṇḍiŋ jurit, ṛĕbutĕn iṅwaŋ, ditya kalapañcuri.

20. maṛĕk ṅucap ki raka kula tan sabar, myarṣa susumbarṇèki, suwawi rinujag, sapintĕn baṅganira, woŋ siji pakṣa kumini, otota kawat, lawan baluṅa wĕsi.

21. maṅsa dadak gandra sapintĕn ki raka, kalarodakṣa aṅliŋ, payo ḍi dèn kĕbat, cĕkĕḷĕn si kaparat, woŋ lumuḥ ginawé bĕcik, kudu palastra, sigra kalapañcuri.

22. nubruk maraŋ saŋ prabhu jiwanda oñcat, ṅiwa sarwi nampiliŋ, pañcuri kaḷĕṅgak, kroḍa kalarudakṣa, saŋ prabhu sinahut nuli, malumpat ṅanan, sarwi anĕpak rahi.

23. tiba koṅsĕp sumaput kalarudakṣa, kalapañcuri taṅi, kruraṅgro goraya, ṅraṅsaŋ arṣa mrawasa, saŋ sri miṅĕr praptèŋ wuri, aṇḍupak ĕṇḍas, kruṅkĕp kalapañcuri.

24. muka koṅsĕp iŋ kisma ababak buṇḍas, kalarodakṣa taṅi, warirutĕn ṅañcap, arṣa ñikĕp siŋ wuntat, saŋ pañcuri dèn kĕjèpi, kinon amapan, nubruk sakiŋ iŋ ṅarṣi.

25. kaliḥ sampun saṛĕṅan sami tumandaŋ, nata awas niṅali, dupi paṛĕŋ ṅraṅsaŋ, saŋ sri rikat malumpat, gapyuk tĕmpuk ditya kaliḥ, kuwĕl guluṅan, guluŋ gumuliŋ siti.

26. saŋ pañcuri rinaṅkul ḍawaḥ iŋ ṅaṇḍap, jĕrit asambat mati, laḥ pripun ki raka, tĕka kula tinĕkak, rodakṣa makṣiḥ ṅakahi, sarwi susumbar, mati sira pañakit.

27. muŋ saméné kéwala kabudayanta, mibĕra lir ḍaḍali, laḥ ṅilaṅa pisan, ḷĕganiŋ atiniṅwaŋ, nora kajamak si buṅkik, payo budia, karasa taṅan mami.

28. saŋ pañcuri macicil amĕgap mĕgap, nata suka niṅali, sakiŋ katĕbihan, sarwi ampiŋ ampiṅan, witiŋ wrĕkṣa tan kahèkṣi, kalarodakṣa, daṅu daṅu udani.

29. lamun iṅkaŋ kinakahan rowaṅira, dudu sri narapati, dèn ĕculkĕn sigra, dahad ṅuṅun iŋ driya, déné mĕṅsahnya sinĕkti, baṅkit akarya, sulapirèŋ paṅèkṣi.

30. saŋ pañcuri gĕṛĕŋ gĕṛĕŋ asasambat, pĕjaḥ ki raka mami, gĕglĕg saŋ rodakṣa, samantara wacana, aḍi nora ñana mami, kalamun sira, iṅkaŋ sun pinisakit.

31. duk iŋ mahu paṅrasaku muṅsuhira, marma sun pinisakit, tuhu yèn widagda, ratu garbasumaṇḍa, salawasé sun ajurit, duruŋ tumiṅal, kaya jiwanda aji.

32. kinrubut iŋ woŋ loro paḍa birawa, parandéné tan gigrig, sarèḥ taṅkĕpiŋ glar, ayĕm nora ṛĕkasa, katon tutut nora kĕsit, lamun malumpat, rikat sahéṅga ṭaṭit.

33. sinraŋ sakiŋ kanan amiṅĕr maṅiwa, ṅoŋ tubruk sakiŋ wuri, malaḥ wus nèŋ wuntat, sinikĕp sakiŋ ṅarṣa, plas oñcat kaya tan kèkṣi, dudu mĕnusa, sasat mrawasa aṅin.

34. laḥ samĕṅko priyé wĕkasané baya, muṅsuhira sinĕkti, wis aḍi taṅia, payo aṛĕṛĕmbugan, muṅsuhira anèŋ ṅĕndi, apa aṅilaŋ, payo ḍi dèn ulati.

35. ditya kalapañcuri taṅi priṅisan, sru ṛĕṅkĕŋ ṛĕṅkĕŋ sakit, saŋ nata ṅatiṅal, sarwi amĕṇṭaŋ laras, ditya kaliḥ wus udani, saṛĕŋ gro sigra, maṅkrak krura mawĕrdi.

36. hèḥ satriya payo dèn kaparèŋ ṅarṣa, aja sira ṅoñcati, sun duruŋ palastra, saŋ sri jiwanda nabda, buta tiṅalana iki, sopanantaka, paṅuntap mriŋ yumani.

37. ditya karo wus wĕruḥ lamun saŋ nata, ṅĕmbat ĕmbat jĕmpariŋ, kaliḥ saṛĕŋ nabda, babo sira amĕṇṭaŋ, laṅkap arṣa añjĕmpariŋ, payo tibakna, kéné iŋ jaja mami.

38. sri naréndra sarya ṅĕmbat ĕmbat raras, ṅaraḥ araḥ supadi, kĕna karo pisan, dupi sampun kawawas, plas lumĕpas aṅĕnani, jaṅganiŋ ditya, kaliḥ pĕḍot ṅĕmasi.

39. sawa mukṣa iŋ antarikṣa sakṣaṇa, sésané kaŋ wus anis, sahasa umaṅsaḥ, ṅĕsuk arṣa mrawasa, saŋ nata awas maṅèkṣi, sigra maṅayat, sara maruta wĕrdi.

40. dyan lumĕpas wor prabawa marutarda, ditya katĕmpuḥ sami, mĕsat iŋ akasa, sirṇa tan kasat mata, satata katub iŋ aṅin, nata sru suka, myat sirṇaniŋ rasĕkṣi.

41. samantara saŋ sri sigra waṅsul arṣa, ṅaso soriŋ kusambi, dyan amambĕt ganda, arum amrik aṅambar, paṛĕŋ saŋ dyaḥ kaŋ kahèṣṭi, katon nèŋ ṅarṣa , nira srinata dupi.

9. sinom

1. non mariŋ saŋ ṛĕtnaniŋ dyaḥ, kaŋ kapati dèn ulati, prapta anèŋ ṅarṣanira, wiraga aṅoré wèni, kapitèŋ tyas tan sipi, satata marwata sunu, sotaniŋ tyas sakala, lir antaka antuk urip, dyan aririḥ marpĕki arṣa rumĕpa.

2. taṅgap saŋ ṛĕtna maṅarṣa, mèsĕm sarya masuŋ sari, sĕkar sumarṣana séta, gita saŋ nata nampèni, punaŋ sumarṣanasri, duk katampan saŋ aprabhu, sigra sĕkar ginanda, pĕt sumaput sri bupati, tyaṣṇya pĕpĕt nétra pĕtĕŋ tanpanon rat.

3. tan antara byar kawuryan, ana prajaguŋ sarwasri, sri naréndra sampun ḷĕṅgaḥ, madyèŋ bacira pribadi, ṅuṅuniŋ tyas tan sipi, daṅu ḷĕṅĕr ḷĕṅĕr jĕtuŋ, maṅunandikaniŋ tyas, laḥ iki nagara ṅĕndi, déné mahu iṅsun nèŋ madyèŋ wanarga.

4. maṅkya tĕka tĕkèŋ praja, raharja raras sarwasri, saŋ nata sampun rumasa, yèn kĕna paṅupa darwi , nira dyaḥ kaŋ prak ati, tinĕnuŋ praptèŋ prajaguŋ, lamun maṅkono baya, saŋ ṛĕtna kaŋ suŋ wiyadi, sutèŋ nata binaṭara ñakraniṅrat.

5. katara rakitiŋ praja, ṅĕsorkĕn liyan nagari, dyan saŋ nata lumakṣaṇa, amidĕr midĕr niṅali, upaṛĕṅganiŋ panti, paséwakan ṅalun alun, abyor mubyar gumĕbyar, murub maṅkara nĕlahi, saya saṅĕt paṅuṅunirèŋ wardaya.

6. myat sakaniŋ paséwakan, salaka iṅukir ukir, sinĕkar kĕñcana mulya, pinatik iŋ miraḥ abrit, sinĕliŋ siliḥ asiḥ, lan ijo ijo jumĕrut, pinuḷĕt iŋ lalata, kaŋ ron tumruna mawarṇi, kaŋ kinarya sutradi kinarawiṣṭa.

7. watĕsiŋ kaŋ paséwakan, tinon sri pinañcak suji, lir jajaron sinaroja, pinañjĕran iŋ dwajasri, winaṅun luŋ luŋ sari, myaŋ ron ron sarwamrik arum, rumĕsĕp iŋ sarira, yayaḥ amasuŋ usadi, saṅsayèŋ sri sakiŋ kasok andon yuda.

8. dumadi aparipurṇa, nirmala waluya jati, kĕkalèn mili kumala, cinawuk toyané waṅi, ṅaṛĕp panti rinakit, kĕkorèn rinéka ĕkrun, kanan kériŋ sinuṅan, tutuwuhan puyuḥ gaḍiŋ, lan paṇḍoga saṇḍiŋ gĕḍaŋ mas kinarya.

9. binuntal sutra manéka, rinéka réka ṛĕspati, patut tan kĕna cinacad, cuwirèn sarwa ṅarawit, gawé gawok sayĕkti, tan ana pipiṇḍanipun, witiŋ mandira kĕmbar, ṅrĕmbaka maṛĕmbun wilis, sinĕṅkĕran ruji mas séta minulya.

10. madyaniŋ bacira wéra, pinasir maléla wilis, winulat mawa ujwala, lwir wintaŋ mradiptèŋ siti, sinatmata sayĕkti, satata asuŋ paṅuṅun, samantarana prapta, para prawira mawarṇi, bhuṣaṇabra prasamya sikĕp sañjata.

11. mawa lalayu daludag, umbul umbul néka warṇi, pramudyaniŋ wadyatantra, atarampil ñasmitani, mapan tata taṛĕtip, iŋ papan kaŋ wus pinatut, samantara palaṣṭa, kaṇṭa iṣṭaniŋ paṅguṣṭi, paṇṭan paṇṭan naṛĕṇṭĕŋ cĕṭa ṅaléla.

12. saṛĕŋ para pratiwéndra, prapta atusan miranti, nambut karya jro bacira, ṅowahi ṛĕṅganiŋ panti, iṅkaŋ kiraŋ ṛĕspati, winahon winaṅun waṅun, sinawaŋ sawaŋ samya, marma saya milaṅĕni, wuwuḥ wuwuḥ kaŋ karya lam lamiŋ tiṅal.

13. saṅsaya ṅuṅuniŋ driya, saŋ iswara duk niṅali, laku lakuniŋ panata, maṅkana locitèŋ galiḥ, baya ratuné iki, arṣa darbé karya mantu, kawistara tĕrapnya, panata rakitiŋ puri, wontĕn maliḥ kaŋ karya éramiŋ nala.

14. sadaya kaŋ nambut karya, pra pratiwa myaŋ prajurit, éwon tan ana sabawa, muŋ lawan sasmita sami, parandéné kahèkṣi, riwut naṅiŋ nora worṣuḥ, sakiŋ wasis waṣkiṭa, parigĕl sarwa tarampil, samantara wus sampat sarwa saṅkaya.

15. ṅĕṅlĕŋ saŋ nata tumiṅal, lun alun kaŋ milaṅĕni, sakwèhniŋ kaŋ paséwakan, winaṅun waṅun tulyasri, mawèḥ lam lamiŋ ati, myaŋ pĕnuḥ kaŋ pratiwanuŋ, suméwa ṅadiwarṇa, anaracak pĕkik pĕkik, nétya wiṅit sumèḥ sĕmu wicakṣaṇa.

16. daṅu saŋ nata dènira, niṅali ṛĕṅgan sarwèdi, tan ana kaŋ munasika, kadi saŋ nata tan kèkṣi, sayaḥ ṅaso nèŋ soriŋ, punaŋ mandira kinuruŋ, samantara tumiṅal, upacara siŋ sitiṅgil, gumaṛĕdĕg lir nata miyos séwaka.

17. aṅĕnĕr nujwiŋ gwanira, ḷĕṅgaḥ saŋ jiwanda aji, naṅiŋ saŋ prabhu añjarag, tan miṅsĕr sakiŋ paliṅgiḥ, dupi paṛĕk tumuli, samya ḷĕṅgaḥ makiḍupuḥ, kadwi pramudyèŋ lampaḥ, tinon lir paṅkat bupati, listyèŋ warṇa matur riŋ saŋ sri jiwanda.

18. raras aris sarya nĕmbaḥ, ḍuḥ gusti saŋ jiwandaji, ulun iṅutus ramanta, saŋ sri dayakumaraji, iṅgiḥ iṅkaŋ ṅrĕṅgani, praja punika pukulun, wasta nagri windarda, paduka dipun timbali, mañjiŋ pura wigatiniŋ karṣa nata.

19. padukarṣa pinaṅantyan, ḍahup lan rinta saŋ putri, putréndra sĕkariŋ pura, ṛĕtna dyaḥ kumarawati, kaŋ paduka ulati, marma suwawi saŋ prabhu, lajĕŋ mañjiṅa pura, iṅanti ramanta saŋ sri, sri naréndra jiwanda ĕntyarṣèŋ driya.

20. dyan jumĕnĕŋ laju tindak, ginarbĕg dutèŋ narpati, sapraptaniŋ pagĕlaran, pinĕṭuk saŋ nindyamantri, sawadya bĕrtyapati, saŋ mantrimuka aṇḍĕku, ṅacari sri naréndra, kaŋ nétyèsmu sumèḥ manis, saŋ jiwanda maṅgut laju tindakira.

21. dyan kya patiḥ sawadyanya, umiriŋ wuri saŋ aji, dupi praptèŋ sitibĕntar, saŋ nata mulat maṅiṅgil, dahat ṅuṅun tan sipi, umyat sosotyadi murub, gĕṅnya sapuyuḥ dĕnta, ujwalanira nĕlahi, lwir baṣkara nĕḍĕŋ wañci tikbra kala.

22. soriŋ sotya sinuŋ sastra, saṅsĕkrit ĕmas kinardi, muni pudya raharjanya, saŋ piniṅantyan sarimbit, saŋ dyaḥ kumaratati, lan saŋ sri jiwanda prabhu, iṅkaŋ ginaḍaŋ gaḍaŋ, gumantya jumĕnĕŋ aji, binaṭara iŋ paraja guŋ windarda.

23. lan myarṣa swarèŋ pradaṅga, gĕṇḍiŋ srikuñcara ṅraṅin, woriŋ bawa swara raras, arum aṅaṅañut ati, naṅiŋ datan kahèkṣi, prĕnaḥ iṅkaŋ pradaṅgarum, lir munya madyèŋ tawaŋ, saŋ sri sru éramiŋ kapti, déniŋ dènnya sarwa laṅka kahélokan.

24. naṅiŋ sinamuniŋ nétya, amuŋ arṣa aṅyĕktèni, paranta puwaranira, wusiŋ lakṣita ghinaib, duk praptèŋ samadyaniŋ, baturan siti maṅuntur, wuwuḥ sriniŋ suyasa, saya suŋ sĕṅsĕm kahèkṣi, kaŋ sarasaḥ akik akik sinĕkaran.

25. wit witan samya kĕñcana, kamarutan samya muni, tiŋ caṛĕṅkliŋ kadyaṅganya, swarèŋ pradaṅga sĕṅgani, kaŋ aṅkup aṅkup muni, maṅka suliŋ wrat sari rum, samana tindakira, saŋ sri praptèŋ srimaṅanti, kapitèŋ tyas duk mulat gupalaraja.

26. kaŋ muṅgwiŋ tĕpiniŋ dwara, kĕkaliḥ kinĕmbar warṇi, kĕñcana mulya rinéka, abhuṣaṇa makuṭasri, pinatik iŋ sotyadi, myaŋ sikĕp gada mas tatur, nétra kadya baṣkara, ulat srĕŋ siruŋ ṅrajrihi, lir ciṅkarabala myaŋ balahupata.

27. duk prapta iŋ brajanala, mulat arcana kĕkaliḥ, muṅgwiŋ tĕpi kériŋ kanan, kĕnaka luru kinardi, jajamaŋ binukasri, sinuŋ ṛĕtna adi murub, sinatmata tan siwaḥ, kadya saŋ hyaŋ wiṣṇumurti, wawansabda lan raka baṭara brahma.

28. duk saŋ sri arṣa jumaṅkaḥ, iŋ dwara maṅu maṅèkṣi, pahésan guŋ rinaṛĕṅga, plaṅkan kĕnaka iṅukir, ṅrawit siniliḥ asiḥ, iŋ sotya miraḥ jumĕrut, jroniŋ kaca kawuryan, sariranta sri bupati, kaṇṭèn asta lan saŋ ṛĕtna kaŋ suŋ rimaŋ.

29. myaŋ bhuṣaṇa sarwa mulya, muṅgwiŋ madyaniŋ taman sri, iṅayap para paṛĕkan, prayaṅan pri ṅampil ampil, pacarèŋ saŋ suputri, manik manéka linuhuŋ, gĕglĕg saŋ sri jiwanda, myat warṇa sajroniŋ carmin, tĕka samya wiraga asolahbawa.

30. nora mèmpĕr wawayaṅan, sasat manuṅsa sayĕkti, saŋ nata lan saŋ lwir ṛĕtna, dènnya ruruntuṅan kèkṣi, kadya mĕntas maṅun siḥ, kasok kawistarèŋ sĕmu, tanpa rasa rumasa, tansaḥ aliriŋ liniriŋ, nétya sumèḥ wor èsĕm asuŋ asmara.

31. dalasan para pawoṅan, katon sĕmu suka sami, sakiŋ tyas sru ṅayubagya, miyat gustinya sarimbit, kasĕmbadan kaŋ dadi, sadaya parasdyèŋ kalbu, daṅu saŋ sri jiwanda, jumĕnĕŋ madyaniŋ panti, kamitĕṅgĕŋ cĕṅĕŋ myat warṇa jro kaca.

32. kacakrabawa tan kĕna, pinèt iŋ nalar nalisir, marojol sakiŋ kaanan, tinĕmuné tan pinaṅgiḥ, marma kala maṅliliŋ, kalulun kèlu kalayu, kaya arṣa manukṣma, sri nata mriŋ jroniŋ carmin, naṅiŋ mèṅĕt tĕmaḥ sru éramiŋ driya.

33. samantara saŋ anindya, matur riŋ saŋ jiwandaji, rum ririḥ sarwi ṅastawa, ḍuḥ gusti sri narapati, rèḥ sampun sawatawis, kèndĕl paduka pukulun, suwawi lumakṣaṇa, bok iṅanti ramantaji, lamun tansaḥ kapiéramĕn tumiṅal.

34. ṛĕṛĕṅganiŋ purantara, iŋ radya windarda gusti, yĕkti tĕbiḥ suṅsatira, lan nagri paduka gusti, iŋ ṅriki sarwa sarwi, sri saniṣkara dinulu, kaṭaḥ kaŋ kahélokan, akarya éramiŋ galiḥ, laṅkuŋ maliḥ lalaṅĕniŋ jroniŋ pura.

35. saŋ sri mèṅĕt gya lumakṣa, sampun aṅlaṅkuṅi carmin, prapta panataranpura, miyat sampatiŋ piranti, pasrèn asrèn sarwasri, sĕsĕkaran mĕkar arum, muṅguḥ iŋ jĕmbaṅan mas, sinaṅga arcana rukmi, ririmbitan prasamya sulistyèŋ warṇa.

36. kadya apsari apsara, ṅacarani asuŋ sari, riŋ sira saŋ añar prapta, kwèḥ pĕkṣi pĕkṣi kahèkṣi, sosomahan salisik, ṅayom soriŋ kalpataru, punaŋ lar mañcawarṇa, mubyar lir kĕñcana murṇi, nétra muñcar aṅujwala ṅumalarja.

37. ana kaŋ méñcok iŋ ĕpaŋ, aṅĕṅocèḥ ṅacarani, iŋ kañcanira mriḥ cĕlak, miyata kaŋ lagya prapti, ana kukila muni, sasanti sinawuŋ kiduŋ, kadi kadĕṛĕŋ ṅudaŋ, riŋ saŋ sri jiwanda aji, kapiyarṣa karya kumĕñutiŋ driya.

38. sakwèhniŋ kaŋ tarulata, tinata tarap ṛĕspati, sadaya amawa cahya, maṅkawa ṅĕṅuwuŋ wiṅit, puspa kawuryan kadi, wintaŋ riŋ tawaŋ nanawuŋ, katon nèŋ jobin gĕḍaḥ, tan siwaḥ iŋ ṅaṇḍap ṅiṅgil, tiŋ gaḷĕbyar lir trahiŋ sotya warṣaya.

39. sumilir maruta mawa, gandarum amarbuk miṅiŋ, maṅĕnani nala karya, mayĕmiŋ sarira kadi, kataman mahosadi, usadaniŋ aṅgarapuḥ, tĕmaḥ aparipurṇa, waluya nirmala jati, ḷĕbda jiwa datan sida pĕgat atma.

10. mĕgatruḥ

1. dupi sampun paṛĕk sanaséwaka guŋ, katon saŋ sri narapati, dayakumara saŋ prabhu, ḷĕṅgaḥ iŋ siṅaṅsanadi, linutiŋ kaŋ sosotya byor.

2. iṅayap riŋ pra pribiyada yu ayu, ṅampil upacara aji, pra paṅran sumiwèŋ ṅayun, abhuṣaṇa sarwa adi, kadi jawata tinonton.

3. nulya wontĕn paṅran kaliḥ pinisĕpuḥ, mĕṭukkĕn saŋ jiwandaji, añjawat asta saŋ rawuḥ, laju ṅaṇṭi kanan kériŋ, ṅirid riŋ byantara katoŋ.

4. samya ḷĕṅgaḥ satata saŋ nata tamu, muṅgwiŋ ṅarṣa sri bupati, wuri pra paṅran supĕnuḥ, patiḥ sapanĕkar sami, tarap séwaka iŋ ṅisor.

5. swaraniŋ kaŋ pradaṅga munya raras rum, sor laṅĕniŋ suranadi, adiniŋ pura kalaṅkuŋ, tan kĕna winratiŋ tulis, triloka tan antuk roro.

6. saŋ jiwanda sru ṅuṅun iŋ tyas sinamun, iŋ nétya déniŋ masmu jriḥ, atajĕm ḷĕṅgaḥ tumuṅkul, rumasa kasoran titiḥ, lan dayakumara katoŋ.

7. kawaṅwaŋ sru kaŋ cahya wiṅit narawuŋ, asiṅit pamulu wĕniŋ, listyaniŋ warṇa kadulu, yayaḥ saŋ hyaŋ otipati, wimbuḥ iṅkaŋ bhuṣaṇa byor.

8. samantara sri dayakumara prabhu, amanĕmbramarum manis, riŋ saŋ sri jiwanda prabhu, wuryaniŋ paṅandikèŋ sri, ḍuḥ ḍuḥ sutèṅsun saŋ katoŋ.

9. sri jiwanda dahat sukaniŋ tyas iṅsun, pakĕnira kaki aji, déné ta tumuli rawuḥ, winantu suka basuki, ĕntyarṣèŋ tyas iṅsun kasok.

10. sakiŋ uwus suwé iṅsun ayun ayun, bagya kamayaṅan mami, upama sira sutèṅsun, ya nora tumuli prapti, yĕkti sun dahat rudatos.

11. sumarmanta maṅkana ta kaki prabhu, maṅkéné liriŋ wigati, pan duruŋ antara daṅu, arinira nini putri, kumarawati sutèṅoŋ.

12. alalana ṅidĕri jagad ṅalaṅut, praptèŋ ri aṅgara ratri, arinta saŋ dyaḥ andulu, téja ṅĕṅuwuŋ nĕlahi, arinta kasmaran anon.

13. kaŋ amawa waṅkawa tantara laju, nini putri amarpĕki, dunuṅiŋ téja kadalu, sira kaŋ nuṅku sĕmadi, maladi ĕniṅiŋ batos.

14. nini putri mulat iŋ sira kayuṅyun, dyan miyak waranèŋ ḍiri, risakṣaṇa aṅadulu, nèŋ ṅarṣanta kaki aji, lan sajroniŋ tyas wawaṅson.

15. hèḥ saŋ prabhu jiwanda tuhu binagus, triloka tan antuk kaliḥ, naṅiŋ ta sulistyaniṅsun, sayĕkti datan katitiḥ, tinaṇḍiṅa lan saŋ katoŋ.

16. ana iṅkaŋ maṅka pasaṅgiriniṅsun, lamun sira wus niṅali, iya mriŋ suwarṇaniṅsun, sira tan onĕŋ mriŋ mami, yĕkti sulistyèṅsun kasor.

17. lamun sira kaŋ kasor listyaniŋ pasmun, yĕkti kasmaran mriŋ mami, maṅkana wawaṅsonipun, datan antara nulya nis, sira kataman wiraṅroŋ.

18. malaḥ koṅsi sira maṅguḥ babaya guŋ, binégal rakṣasa julig, nini putri guŋ andulu, ṅulatkĕn taṅgapiŋ jurit, suka ni putri tumonton.

19. iŋ wĕkasan sira uṅgul iŋ apupuḥ, saya kasmaran ni putri, mariŋ sira kaki prabhu, dyan arinta ṅaton maliḥ, sarwi suŋ sĕkar pirantos.

20. wruḥ iŋ alam palimunan tĕmahipun, sira praptèŋ kéné kaki, tarlèn maṅkya karṣaniṅsun, rèḥ sira wus tuṅgal kapti, lan arinta saŋ lir sinom.

21. iṅsun aṅkaḥ kalakoné nuli ḍahup, iŋ mĕṅko ṛĕṛĕma ḍiṅin, nuli salina kaprabhun, saŋ prabhu jiwanda dupi, tampi sabda arum mawor.

22. pamiluta mirakĕt mamalad kalbu, kasok susĕtyaniŋ kapti, dyan matur sarwi wotsantun, ḍuḥ rama saŋ misuḍèŋ siḥ, sadaya sabda saŋ katoŋ.

23. kaŋ rumĕntaḥ iŋ amba pun muḍa puṅguŋ, sakĕḍik botĕn nalisir, kaluhuran sabda prabhu, wit amba nuṅku sĕmadi, koṅsi praptèŋ ṅarṣa katoŋ.

24. maṅkya rèhniŋ sadaya lampahan ulun, upami kaŋ minèŋ wariḥ, ḍapur kaḷĕbĕt iŋ wuwu, punapa winuwus maliḥ, tarlèn muŋ sraḥ iŋ hyaŋ manon.

25. iŋ wusana sadaya ḍawuḥ saŋ prabhu, kawula amuŋ lumirig, sumaraḥ karṣa saŋ mulku, naṅiŋ kawula minta wrin, paran puranta saŋ katoŋ.

26. tĕka saṅĕt katiṅal élok kalaṅkuŋ, kalaṅĕnan milaṅĕni, asuŋ lam lamiŋ pandulu, akarya gawok sayĕkti, paran makatĕn saŋ katoŋ.

27. saŋ sri dayakumara mèsĕm nabdarum, babo sutèṅsun saŋ aji, baya ta sira tumambuḥ, wruhanta purèṅsun iki, sumarmanta sarwa élok.

28. wit maṅkéné kaki iŋ kamulanipun, yĕkti sira wus udani, iya iku kaŋ kasĕbut, jagad tĕtĕlu utawi, triloka winastan iŋ woŋ.

29. iya kĕna iṅaran alam tĕtĕlu, siji alamiŋ sujanmi, iya iku karatonmu, praméyaniŋ pra jasmani, yĕkti tan ana kaŋ élok.

30. nora nana kaŋ gawé gawokiŋ kalbu, sabaraŋ iṅkaŋ kahèkṣi, muŋ sarwa waḍag tinĕmu, myaŋ apa iṅkaŋ kinapti, dadiné lawan pirantos.

31. béda alam kaŋ kapiṇḍo kaki prabhu, iya alam iṅsun iki, ĕṅgon paraméyanipun, kabèḥ kaŋ badan rohkani, ya alamiŋ jin sutèṅoŋ.

32. sumarmanta sabaraŋ iṅkaŋ kinayun, dadiné muŋ lan paṅèṣṭi, apuwara sarwa alus, ṅuṅkuli alamiŋ jalmi, mula gawé gawokiŋ woŋ.

33. luwiḥ manèḥ alam iṅkaŋ kapiŋ tĕlu, saya luwiḥ alus kaki, iku gon praméyanipun, para apsara apsari, sabaraŋ rèḥ luwiḥ élok.

34. liré apa saniṣkara kaŋ kinayun, dadi lawan karṣanèki, marma kabèḥ kaŋ kadulu, kaŋ kaganda kaŋ kahèkṣi, muŋ sarwa raras mirahos.

35. naṅiŋ alam kapisan piṇḍo piŋ tĕlu, sajatiné iku kaki, dudu alam kaŋ linuhuŋ, karana iŋ kono makṣiḥ, aṅaṅgo rahos rumahos.

36. yèn wus liwat iŋ alam kaŋ kapiŋ tĕlu, praptèŋ alam kaŋ sajati, uwus tan kĕna cinatur, tanpa papantaran yĕkti, tita tan kĕna rinahos.

37. muŋ dyatmika laṅgĕŋ ĕnĕŋ ĕniŋ anuŋ, tanpa onaŋ amĕṅkoni, saliriŋ alam tĕtĕlu, kabèḥ kalimputan déniŋ, iŋ kaananiŋ hyaŋ manon.

38. dé kaŋ maṅka upamané alam tĕlu, antĕlu kĕna pinirit, alamé manuṅsa iku, amuŋ cacṅkok iŋ jawi, yèn alam kéné sutèṅoŋ.

39. puputihé antĕlu upamanipun, déné alam kaŋ kapiŋ tri, kuniṅiŋ tigan puniku, yĕkti katrinira makṣiḥ, amawa warṇa lan rahos.

40. balik alam kacatur kaŋ tanpa ḍapur, iku sajĕroniŋ kuniŋ, laḥ sapa ta iṅkaŋ wĕruḥ, liya iṅkaŋ murbèŋ paṣṭi, lan manuṅsa kaŋ kawahyon.

41. sri jiwanda taṅgap iŋ atur aṇḍĕku, cuṇḍuk lan rahosiŋ kapti, lawan rumasa kalamun, kĕnèŋ kĕmatiŋ ḍĕḍĕmit, korup iŋ rat kalabĕndon.

42. darunané kĕdahut ardèŋ tyas dudu, duk marṇaniŋ iŋ sĕmadi, dadak kapiadrĕŋ gandruŋ, yuniŋ dyaḥ kaŋ mriḥ tan yukti, tĕmaḥ tiwas kaŋ lalakon.

43. ṅiŋ sinamun lan santa sĕntosèŋ kalbu, labané sampun ṅruṅkĕbi, iŋ pambukèŋ rat tĕtĕlu, tan kéwran kĕnèŋ piranti, muŋ tĕtĕg tinaṅgĕn taṅgon.

44. tyas tan ulap tumamèŋ alam palimun, puwara umatur aris, ḍuḥ rama saŋ maha mulku, sabda paduka kapuṇḍi, cinaṇḍi tĕḷĕṅiŋ batos.

45. saŋ sri dayakumara mèsĕm nabdarum, lan karṣèṅsun kaki aji, kalamun sira wus ḍahup, lan arinta nini putri, sun arṣa sèlèḥ kaprabon.

46. mariŋ sira sumiliha ratu aguŋ, ṅrĕṅgani windarda nagri, aṅrèḥ pra prayaṅan saguŋ, déné sun arṣa murwa nis, mriŋ alam katri sutèṅoŋ.

47. saŋ jiwanda duk myarṣa sabda saŋ prabhu, jroniŋ tyas sakṣaṇa tampi, yèn sri dayakumarèku, ratuniŋ jin prayaṅan pri, puwara umatur alon.

48. ḍuḥ pukulun sumaraḥ karṣèŋ saŋ mulku, gya saŋ nata wrĕḍa aṅliŋ, mriŋ pra paṅran pinisĕpuḥ, aṅirid saŋ jiwandaji, laju mriŋ yasa paṅason.

49. lan supadya binusanan kaŋ sarwa nuŋ, taṅgap kaŋ tampi wawaṅsit, gya saŋ sri jiwanda sampun, lèṅsèr siŋ ṅarṣèŋ narpati, duk praptèŋ panti pirantos.

50. sri jiwanda binusanan adiluhuŋ, amakuṭa binukasri, jamaŋ mas sinotya murub, abĕbiṅgĕl kalpikadi, saṅsaṅan suṅsun sutèṅson.

51. oñcèn oñcèn surèṅpati mas linuhuŋ, iṅikĕt rinéka sari, rinaṛĕṅga ṛĕtna murup, binoréhan burat miṅiŋ, ṅĕṅlĕŋ kaŋ samya tumonton.

52. sakiŋ saŋ sri sampurṇèŋ warṇa pinuñjul, iŋ jagad tanpa sisiriŋ, cunariŋ cahya narawuŋ, ṅuwuŋ milaṅĕn iŋ wiṅit, sinĕmbuḥ iŋ bhuṣaṇabyor.

53. lir murcita saṛĕŋ kĕjĕp yèn dinulu, ṅuṅun pra prayaṅan pĕri, wit warṇa wantaḥ salugu, aṅuṅkuli ciptaniŋ jin, layak lamun saŋ lir sinom.

54. ṛĕtna dèwi kumarawati wulaṅun, mulat saŋ jiwanda aji, pijĕr mujuŋ iŋ jujuṅut, yèn nora jinatukrami, muŋ arṣa mikrat murwèŋ don.

55. dyan nĕmpuḥ byat sumiwèŋ rama saŋ prabhu, ambĕbana babar wadi, sĕdyaniŋ budaya katur, iŋ rama iṅkaŋ supadi, winiwaha lan saŋ katoŋ.

56. sapa woṅé kaŋ mulat nora wulaṅun, waṅuniŋ woŋ lir saŋ prapti, sampatiŋ bhuṣaṇa laju, sumiwèŋ ṅarṣèŋ narpati, suka saŋ nata duk anom.

57. samantara sri dayakumara prabhu, asasmita mariŋ cèṭi, kinon mañjiŋ pura matur, mariŋ saŋ wara mahisi, yèn jawi sampun mirantos.

58. narpa wadu déra ṅrĕṅga saŋ ṛĕtnayu, ugi wus sampat iŋ kardi, tinon warṇanta saŋ iŋ rum, sor hyaŋ hyaṅiŋ suranadi, tuhu muṣṭikaniŋ sinom.

59. samaṅkana dupi saŋ sri dayita wus, atampi agñèŋ narpati, gya sasmita mriŋ pra rum rum, taṅgap kaŋ atampi waṅsit, usrĕg manambut saŋ sinom.

60. wus jumĕnĕŋ saṛĕŋ lan paṅantyan kakuŋ, rinampa iŋ kanan kériŋ, mariŋ pra paṅéran sĕpuḥ, paṅantèn putri iṅapit, mriŋ pra pri prayaṅan mawor.

61. swaraniŋ kaŋ pradaṅga munya raras rum, koḍokṅorèk aṅaraṅin, kapiyarṣa ṅañut añut, lwir suréndrèŋ suranadi, moṅgaŋ guŋ munya tan aṅgop.

62. lir gurṇita swarèŋ kaŋ maryĕm maguntur, kadya amanĕṅkĕr laṅit, umyuŋ kaŋ salomprèt tambur, ibĕkan jro baluwarti, duk paṅantèn sakaroṅron.

63. sampun paṅgiḥ gya ḷĕṅgaḥ iŋ ṅamparan nuŋ, amaṅapit pajaṅan sri, kaŋ rinĕṅga ṛĕṅga muṅguḥ, iŋ sosotya ṛĕtna adi, mubyar binarléyan abyor.

64. cĕṅĕŋ iṅkaŋ maṅèkṣi siŋ sru maṅuṅun, warṇèŋ saŋ paṅantyan kaliḥ, rarasiŋ liriŋ narawuŋ, wor kĕñariŋ sosotyadi, kadya wintaŋ sayutawor.

65. wĕwĕraniŋ wuwukiran kalihipun, yayaḥ kaŋ pratima rukmi, rinaras ṛĕtna linuhuŋ, luṅitiŋ wadana tuwin, pasaṅrakitkiŋ pasĕmon.

66. myaŋ wiṅitiŋ nétya mahantya ṅĕṅuwuŋ, yèn kawaṅwaŋ wus tan kaliḥ, ḷĕṅĕs ḷĕñĕpiŋ pamulu, luluṅité tiṅal sami, lwir woḥ anom pinara ro.

67. saŋ paṅantyan iŋ tyas sru ĕntyarṣanipun, tansaḥ aliriŋ liniriŋ, pra prayaṅan kèḥ kayuṅyun, suyud amaṅuyu sami, miyat mariŋ saŋ karoṅron.

68. para pĕri wurahan ṅraras rum arum, jro pura sru mamrik miṅiŋ, saṅgon gon ginanda arum, ri sampuniŋ madya ratri, saŋ paṅantyan sakaroṅron.

69. wus umañjiŋ jroniŋ juṅut tilamsantun, para pri prayaṅan makṣiḥ, satata kasukan nutug, iŋ sanaséwaka asri, pra paṅran maṅun kalaṅon.

70. kacarita saŋ piniṅantyan wus atut, nutug tansaḥ akaronsiḥ, tan kĕna pisaḥ sarambut, saŋ jiwanda sru dènñasiḥ, mriŋ ri saŋ sĕkar kaḍaton.

71. limut lamun kĕnèŋ kĕmatiŋ ḷĕḷĕmbut, wus kèrĕm katrĕm saŋ aji, nèŋ jaman kajiman sarju, tan nĕdya waṅsul iŋ nagri, rumasantuk swarga kahot.

72. sakwèhniŋ kaŋ para paṅawikan kañut, kaninditanira kontit, siŋ kalénan tyas kalulun, lali lirwèŋ paṅastuti, tĕmaḥ korup kajalomproŋ.

73. kaṛĕm kèrĕm kĕnèŋ kĕmat kasalimbur, wit ṅumbar bérawèŋ budi, bubraḥ kabudayanipun, tĕmaḥ kapĕtĕṅan kapti, kĕtarik tyas mélik mĕlok.

74. nĕŋna iṅkaŋ manukṣmèŋ ṅalam palimun, maṅkya kaŋ winarṇèŋ kawi, iŋ rasamulya winuwus, saŋ surasa mahaṛĕṣi, kaŋ lagya umahasèŋ om.

75. duk nĕḍĕṅnya kataman nĕṅiŋ panĕkuŋ, koṅkal kaŋ triloka koṅkiḥ, liṅkapiŋ wrana narawuŋ, sahiṅaniŋ rat kahèkṣi, kaŋ samar samar katoṅton.

76. samantara wruḥ ywan saŋ jiwanda prabhu, korup nukṣmèŋ suñaruri, kĕnèŋ kĕmatiŋ jim jamus, kaŋ ṅayaṅan nèŋ wanadri, winalik tiṅal saŋ katoŋ.

77. kapitèŋ tyas saŋ wiku jroniŋ panĕkuŋ, sakala muḍar sĕmadi, dahat paṅuṅuniŋ kalbu, tĕka saŋ jiwanda aji, karatiŋ sétan tanpandon.

78. dyan umĕnĕŋ amanuṅku salin lagu, mĕsu matĕk mantra sarwi, mawas lakṣitèŋ uswa wus, konus kamanuṅsannèki, kasat mata sapatĕmon.

79. sinasmitan ṅĕmota jasmaninipun, sakṣaṇa saŋ ṛĕṣi mañjiŋ, jro rokhani tan kadulu, lap manukṣmĕŋ suñaruri, wus paṅgiḥ lawan saŋ katoŋ.

80. amaṛĕṅi saŋ sri anèŋ tamansantun, kalawan dayitanèki, iṅiriŋ para rum arum, midĕr riŋ taman mèt sari, kagyat na prapta dumrojog.

81. saŋ paṇḍita surasa nèŋ ṅarṣanipun, mĕṇḍak sarya wacanaris, kaliṅané ya saŋ prabhu, paduka wontĕn iŋ ṅriki, paranta tĕka salaḥ ton.

82. nukṣmèŋ alam palimunaniŋ ḷĕḷĕmbut, suwawi kondur saŋ aji, saŋ jiwanda manabda sru, hèḥ paman surasa ṛĕṣi, paran ḷĕkas kaŋ maṅkono.

83. tĕka wiku muraŋ tataniŋ karatun, prapta mañjiŋ tamansari, tanpa pariwara iku, yĕkti kĕsiku sirèki, yèn katur jĕŋ rama katoŋ.

84. saŋ kusuma kumarawati duk ṅruṅu, sabawèŋ raka saŋ aji, kagyat iŋ tyas sru maṅuṅun, tĕka wawaṅson pribadi, baya saŋ nata salaḥ ton.

85. wit saŋ ayu tan wĕruḥ maraŋ saŋ wiku, gya matur iŋ raka nuli, ḍuḥ ḍuḥ paranta pukulun, tĕka lir gĕraḥ kagiṅsir, dadak andurma tanpandon.

11. durma

1. tan saranta saŋ wiku gya ñaṇḍak asta , nira sri narapati, kapita saŋ nata, sarwi manabda sora, hèḥ surasa saya bariŋ, ṛĕṣi kaparat, dadak digsurandadi.

2. paran tĕka astaniṅsun sira caṇḍak, payo uculna nuli, saŋ ṛĕṣi tan ṅucap, malaḥ kĕñcĕŋ tan uwal, bramantya sri narapati, budi sarosa, naṅiŋ tan bisa koṅkiḥ.

3. saya duka saŋ iswara gantya ñaṇḍak, astanira saŋ ṛĕṣi, tĕmaḥ pañcakara, dĕdrĕg ṛĕbut karosan, saŋ ṛĕtna kumara jĕrit, sampun aṅira, yèn kaŋ raka kagiṅsir.

4. pra paṛĕkan gumuruḥ béla karuna, wĕnèḥ tumamèŋ puri, matur riŋ saŋ nata, nuju apaṛĕpatan, lan nujum jin kaŋ piniji, muṅgwiŋ paniṅrat, guṣṭi dènnya saŋ aji.

5. arṣa sèlèḥ kaprabon mriŋ saŋ jiwanda, kagyat dupyana cèṭi, maṛĕk wor karuna, pĕgat pĕgat napaṣṇya, matur rèḥ saŋ jiwandaji, asantun cipta, purwa madya mĕkasi.

6. sampun katur sadaya iŋ saŋ iswara, gatgadèŋ tyas saŋ aji, sigra gurawalan, tĕḍak jujug iŋ taman, para jin nujum umiriŋ, duk praptèŋ taman, saŋ sri ṅuṅun tan sipi.

7. myat solahnya kaŋ putra saŋ sri jiwanda, ñata gĕraḥ kagiṅsir, wit saŋ nata datan, uniŋ mriŋ saŋ paṇḍita, sanadyan kaŋ pra nujum jin, samya tan mirṣa, mriŋ saŋ maharṣi sidik.

8. nata kĕña wus prapta sapaṛĕkannya, para prayaṅan pĕri, tumplak nèŋ udyana, oṛĕg ura urahan, éram myat saŋ jiwandaji, ajulalatan, lir tiṅkahiŋ ajurit.

9. sigra saŋ sri dayakumara myaŋ para, nujum jim maṛĕpĕki, sarya matĕk mantra, panulak salaḥ cipta, puwara sumaput sami, kantakèŋ kisma, kĕna prabawèŋ ṛĕṣi.

10. saŋ dayita sĕpuḥ nèm myaŋ pra prayaṅan, puyĕṅan poyaŋ payiŋ, marpĕki pĕpoyan, maripiḥ narpaputra, rinapu iṅariḥ ariḥ, pra pri aṅrampa, riŋ narpa wrĕda dupi.

11. kataman iŋ prabawa saŋ maha wipra, pra pri prayaṅan sami, ambruk kapiḍara, ḍaṛĕḍĕg aṅgagograg, sigra saŋ surasa ṛĕṣi, amĕsu karṣa, mriḥ sirṇa kawasèŋ jin.

12. sarya ṅraṅkus sariranta saŋ jiwanda, saŋ sri tan bisa osik, samantara sirṇa, purantara siluman, byar sampun puliḥ wanadri, saŋ sri jiwanda, iṅĕculakĕn nuli.

13. saŋ paṇḍita satata ḷĕṅgaḥ iŋ séla, nata jĕtuŋ tyas tistis, daṅu tan ṅandika, duk myat iŋ wanawasa, rumasa yèn kĕnèŋ sandi, ṅuṅun kalintaŋ, ṛĕntĕŋ masĕmu isin.

14. ri sakṣaṇa saŋ ṛĕṣi amanĕmbrama, mèt prana mamaladsiḥ, mriŋ saŋ mahiswara, mriḥ ruwat ruharèŋ tyas, makatĕn wuryèŋ paṅrĕmiḥ, ḍuḥ ḍuḥ saŋ nata, kaŋ binaṭarèŋ bhumi.

15. rèḥ samaṅkya padukéndra sampun luwar, sakiŋ ṛĕñcanèŋ ḍĕmit, sampun kaṛĕrantan, ṅrantam rèḥ kaŋ kawuntat, miṇḍak aṅrĕranta kapti, pan sampun limraḥ, yèn arṣa amumpuni.

16. mawi kéṅiŋ paṅuñcaṅiŋ sukṣma nata, ṅiŋ rèḥ tinitaḥ dadi, baboniŋ bhuwana, yĕkti kaŋ misésèŋ rat, tan kéwran asuŋ usadi, limutiŋ driya, marma maṅkya suwawi.

17. tindak mariŋ pratapan iŋ rasamulya, iŋ ṅrika sami guṣṭi, paḷĕṣṭaniŋ tékad, mriḥ baṅkit ambĕbirat, ḷĕkasiŋ pagupadarwi, kaŋ aṅrubéda, widadèŋ tindak sidi.

18. yèn kadaṅon wontĕn madyèŋ wanapriṅga, bok maṅkya wontĕn maliḥ, pakartyèŋ siluman, dèñarṣa maṅrĕñcana, mriḥ wukiŋ rèḥ darmastuti, tĕmaḥ iṅarat, kérid mriŋ suñaruri.

19. sri naréndra duk myarṣa turnya saŋ dwija, tyas aṅlĕs masmu wiṅwrin, wusana manabda, paman paṅandikanta, samatra tan wontĕn sisip, iŋ maṅkya kula, muhuŋ arṣa ṅastuti.

20. sakarṣanta dèñarṣa asuŋ usada, supadyèŋ tĕmbé baṅkit, béṅkas kala murka, kalénaniŋ nalarda, darpon tan kadahut kadi, kaŋ wus kadadyan, cinidrèŋ upasandi.

21. saŋ paṇḍita matur marmanta saŋ nata, sumaṅga iŋ samaṅkin, ḍatĕŋ rasamulya, sigra saŋ dwijawara, saŋ sri sinambut anuli, mĕsat lir kilat, tan antara wus prapti.

22. iŋ pratapan graniŋ arga rasamulya, saŋ sri sinèlèḥ ririḥ, madyèŋ pamidikan, nulya matur saŋ wipra, gusti maṅkya sampun prapti, iŋ paḍépokan, paduka yya gĕŋ kiṅkin.

12. asmaradana

1. aṛĕṛĕm maṅariŋ ariŋ, oṛĕmiŋ driya mriḥ iṅgar, iŋ ograniŋ arga aṅgèr, kalamun sampun antara, kéwala akondura, iŋ pura ulun tumutur, saŋ nata datan ḷĕṅgana.

2. gya saŋ ṛĕṣi mañjiŋ panti, wawaraḥ mriŋ éṇḍaṅira, yèn katamuan saŋ katoŋ, myaŋ nuturkĕn lalakyannya, sumarmanta saŋ nata, prapta iŋ pratapanipun, aṅgana tan mawa wadya.

3. purwa wusanané titi, ni éṇḍaŋ ṅuṅun iŋ driya, puwara kinèn mirantos, sugata saananira, kalawan kèn manindra, pinuriha amĕmatut, bhuṣaṇa sakadarira.

4. bok iŋ mĕṅko saŋ narpati, arṣa uniṅa saŋ rara, ayya katon réwa réwo, sandikéṇḍaŋ manitaya, tantara wus samĕkta, sahosan rinampad sampun, muṅgwiŋ iŋ jarambaḥ tĕṅaḥ.

5. nulya saŋ ṛĕṣi ṅaturi, riŋ nata tumamèŋ wisma, saŋ sri wus ḷĕṅgaḥ iŋ séroŋ, saŋ paṇḍita lan éṇḍaṅnya, maṛĕk iŋ ṅarṣa nata, tantara saŋ ṛĕṣi matur, iŋ nata mamalad prana.

6. ḍuḥ sumaṅga saŋ siniwi, punika sahosanira, abdi paduka pun ĕmbok, rénanira pun manindra, nadyan botĕn mirasa, wit sakiŋ wĕdalan ḍusun, namuŋ dĕlap dĕlapira.

7. rèhniŋ karawuhan gusti, botĕn kétaŋ muŋ sapala, kumĕdaḥ kĕdaḥ sasahos, maṅka taṇḍa paṅastawa, rawuḥ paduka nata, myaŋ atur sasanti sèstu, sukur yèn dados usada.

8. sudaniŋ rudaḥ rudatin, myaŋ marlupaniŋ sarira, rèḥ saŋ sri mĕntas kaḷĕson, aṅlĕs iŋ tyas sayĕktinya, narik ḷĕsahiŋ srira, sri naréndra taṅgap ḍĕku, ḍuḥ paman botĕn kadosa.

9. sanadyan kula narpati, rahosiŋ tyas botĕn pisan, añamèni nugrahané, lan paman kañataannya, iṅgiḥ lampahan kula, luwariŋ sakiŋ bĕbĕndu, bĕnduniŋ hyaŋ sukṣmanata.

10. yèn sampuna paman ṛĕṣi, paṛĕŋ pariŋ pituluṅan, sahèstunipun kalakon, kalap alamiŋ siluman, tĕmaḥ salami kula, winalik salaḥ pandulu, séla katiṅal kumala.

11. myaŋ wrĕkṣa wrĕkṣa kahèkṣi, puraya kinariṛĕṅga, iŋ sosotya ṛĕtna abyor, wéwé katon wanodyéndaḥ, katujuné saŋ dwija, tan kéwran rèḥ agal ḷĕmbut, nĕtĕpi kotamèŋ wipra.

12. wĕlasiŋ para kaswasiḥ, wèḥ arṣaya iŋ saṅsaya, asuŋ tĕkĕn iŋ kaluñon, noṅsoṅi woŋ kawarṣayan, sayĕkti kula paman, kérut karatiŋ ḷĕḷĕmbut, sida tan dadi dandanan.

13. sumarmanira samaṅkin, punapa wawaḷĕs kula, tarlèn muŋ sĕtyaniŋ batos, muŋ arṣa nĕtĕpi wĕca, sutanta kèn manindra, ṅoŋ pinta ḷĕstantunipun, tĕtĕp dadya jatukrama.

14. mĕṅkonana jroniŋ puri, pura iŋ garbasumaṇḍa, kadarbéya iŋ saŋ sinom, kula muŋ darma kéwala, maṅka jĕjĕriŋ praja, rajabrana jro kaḍatun, kasraḥ putranta saŋ rara.

15. kèndĕl paṅandikèŋ saŋ sri, saŋ wiku lon aturi, ḍuḥ ḍuḥ saŋ sri narakatoŋ, ḍawuḥ paduka sadaya, tĕka saṅĕt mĕmĕla, adamĕl trĕñuhiŋ kalbu, sahèstunipun saŋ nata.

16. pun bapa sagĕd punapi, sadaya amuŋ sadarma, aṅlampahi karṣèŋ manon, tuwin wajibiŋ kawula, rumĕkṣèŋ sri naréndra, ḷĕpat yèn amba sinuhun, tan ṅlampahi kawajiban.

17. milanya sampun ginaliḥ, miṇḍak aṅrĕranta manaḥ, ḷĕhĕŋ aṅgaliḥ kaŋ dèrèŋ, iṅaṅkaḥ aṅkaḥ supadya, dadosipun raharja, akaṇṭi tyas awas émut, mriḥ kalis iŋ sambékala.

18. kaṛĕnan nata miyarṣi, aturé saŋ dwijawara, kawistara iŋ pasĕmon, sunariŋ nétya kawuryan, wus tan ṅĕmu suṅkawa, saḷĕjariŋ tyas saŋ prabhu, lajĕŋ ḍahar kĕkĕmbulan.

19. kalawan saŋ maha ṛĕṣi, éca lan imbal wacana, éṇḍaŋ manitaya lados, sadaṅunira ḍaharan, saŋ nata ṅunandika, paran si manindra iku, tĕka nora katiṅalan.

20. tantara andaṅu mariŋ, ñahi éṇḍaŋ ṅandikanya, ḍuḥ bibi paran marmané, kula sampun sawatara, ḷĕṅgaḥ iŋ wisma tĕka, putranta datan kadulu, matur éṇḍaŋ manitaya.

21. ḍuḥ gusti marma kaŋ abdi, daṅu tan maṛĕk ṅarṣéndra, duk rawuḥ paduka katoŋ, iṅgiḥ lagya kataṅgĕlan, èwĕt adus karamas, mĕnawi marak arikuḥ, yèn dèrèŋ iṅupakara.

22. mèsĕm saŋ nata duk myarṣi, wus bibar dènira ḍahar, datan antara saŋ sinom, marak anampa pawohan, luṅgwèŋ wuriniŋ réna, saŋ nata grahitèŋ kalbu, bayèku éṇḍaŋ manindra.

23. ñata yèn ayu linuwiḥ, mèmpĕr putriniŋ siluman, amuŋ kacèk tajĕm kiyé, kana rada galak ulat, iki antĕŋ dyatmika, kasaru saŋ ṛĕṣi matur, ḍuḥ punika warṇanira.

24. abdinta manindra gusti, kiwa kuciwa kaŋ warṇa, botĕn pantĕs kagĕm pasrèn, dĕstun muŋ maṅka pawoṅan, juru tĕbaḥ jarambaḥ, punapa iṅgiḥ sahèstu, kapuṇḍut malbĕt iŋ pura.

25. nata mèsĕm ṅandikaris, ḍuḥ paman sarèhniŋ kula, amuŋ aṅlampahi pakèn, kadya kaŋ wus kasasmita, ajriḥ yèn aṅlirwakna, nadyan putranta saŋ ayu, warṇa lir wéwé wa uwa.

26. anaṅiŋ paṅrahos mami, putranta yayi manindra, datan kuciwa iŋ tĕmbé, dados sasĕkariŋ pura, siniwèŋ para kĕña, tantara saŋ ṛĕtna laju, manĕmbaḥ kalépat késaḥ.

27. kahèkṣi amasmu isin, saŋ nata cuwa iŋ driya, tinut iŋ tiṅal lampahé, sakĕḍap wus tan katiṅal, malbĕt iŋ gaṇḍok wétan, sri naréndra kari maṅu, maṅuṅun myat yuniŋ warṇa.

28. tansaḥ aṅlocitèŋ galiḥ, ayu tĕnan si manindra, sajĕg iṅsun duruŋ tumon, warṇa kaŋ kaya maṅkana, tan ṅaṅgo apa apa, ayuné aṅuṇḍuŋ uṇḍuŋ, sahiba yèn wus bhuṣaṇa.

29. baya goñjiṅaké bhumi, méndaḥ yèn wus anèŋ pura, mĕṣṭi wuwuḥ pituŋ mono, ya layak kalamun kĕna, kinaryaa sarana, saraté jumĕnĕŋ ratu, marakké arjaniŋ praja.

30. sakiŋ dènnya sugiḥ manis, prak atiné aṅayaṅan, ayuné aṅuyaṅaké, ñata ĕtukiŋ susila, ratuniŋ parotama, wus mĕṣṭi bahé kaŋ mĕṅku, awèt kuwat kawarasan.

31. pañjaŋ yuswa sugiḥ picis, kinasihan iŋ jawata, tinurut sapamintané, saŋ ṛĕṣi awas tumiṅal, yèn saŋ sri sru kakĕnan, sakṣaṇa alon umatur, ḍuḥ saŋ prabhu iŋ samaṅkya.

32. paran iŋ karṣa saŋ aji, puspita kaŋ sinĕṅkĕran, amba sumaraḥ kémawon, yèn saŋ sadpada kumĕdaḥ, ṅudi maduniŋ puspa, maṅka usadèŋ larakuŋ, sayĕkti tanpa saṅsaya.

33. naṅiŋ pamintamba saŋ sri, mawi sarat iṅéstrénan, naṅiŋ kinarya sisintrèn, paduka sampun aṅléla, sakiŋ paṅaṅkaḥ amba, muŋ pi api amba pupu, wit kapiran tanpa bapa.

34. yèn sampun rampuŋ iŋ kardi, kéwala nuntĕn utusan, amuṇḍut upacarané, saŋ nata katujwiŋ karṣa, wusana aṅandika, ḍuḥ paman saŋ maha wiku, kula sumaraḥ iŋ karṣa.

35. duk antara pataŋ ari, karṣèŋ ṛĕṣi linakṣaṇan, saŋ sri wus dèn ḍahupaké, lawan kèn ṛĕtna manindra, kadya ṛĕmbug iŋ ṅarṣa, satĕmaḥ karya paṅuṅu , nira woŋ iŋ rasamulya.

36. anèḥ iŋ karṣa saŋ ṛĕṣi, sutané èstri sajuga, tur tanpa sama ayuné, linamar iŋ pranararya, myaŋ putraniŋ paṇḍita, akèḥ kaŋ tinulak waṅsul, tĕka iŋ maṅkya maṅkana.

37. laré lola lagya prapti, tan karuhan pinaṅkanya, katiban ĕsiḥ gumrèwèl, pinèt mantu pinariṅan, muṣṭikaniŋ pratapan, ṅimpi apa woŋ puniku, tĕka bagya kamayaṅan.

38. naṅiŋ nora duga mami, nitik bagusé kaŋ warṇa, kaya darahé woŋ gĕḍé, wuwukiraniŋ sarira, lawan ṛĕtna manindra, tan siwaḥ sasat sadulur, paḍa manis wĕnĕsira.

39. rowaṅé rarasan aṅliŋ, ya maṅsa kakilapana, saŋ paṇḍita dèniramèt, mantu iŋ sawastunira, wus ginaliḥ prayoga, sayĕkti saŋ maha wiku, pan wus nora kasamaran.

40. nĕŋna kaŋ rarasan aṅliŋ, saŋ sri lan ṛĕtna manindra, ri ratri tansaḥ karoṅron, amoŋ raras karasikan, nutug sakarṣa karṣa, tan wontĕn saṅsayanipun, saŋ ṛĕṣi saṅĕt arṣaya.

41. lan saŋ sri salaminèki, siḥ sinihan lan saŋ ṛĕtna, sabĕn ari guŋ sasambèn, bawa rarasiŋ agĕsaŋ, praptaniŋ saṅkan paran, sinaṅkan siŋ purwanipun, tĕkyaniŋ madya wusana.

42. ḍasar saŋ ṛĕtna wus wasis, amawas wosiŋ rarasan, kaŋ ṅantya karasèŋ tyasé, myaŋ rasaniŋ karuṅsitan, kaŋ sumiṅit iŋ sastra, sadaya sampun kĕcakup, sakiŋ wasitèŋ saŋ dwija.

43. marma saŋ sri sru dènnya siḥ, mriŋ saŋ dyaḥ sotaniŋ driya, tuhu nugrahèŋ hyaŋ manon, samana nata ṅandika, mriŋ ari saŋ kusuma, paranta karananipun, uripé saguŋ dumadya.

44. tĕka béda béda yayi, koṅsi dadi yutan wĕndran, paran iŋ ṅuni dadiné, karṣané kaŋ sipat ĕsa, dadak karya mawarṇa, saŋ ṛĕtna alon umatur, wasitaniŋ saŋ paṇḍita.

45. saŋ ĕsa tan nĕdya kardi, iŋ ṅuni praptaniŋ maṅkya, muŋ laṅgĕŋ mĕnĕŋ kémawon, siṅidan nèŋ jroniŋ rasa, rasanira priyaṅga, kaŋ sajak atuṅgal wujud, ṅiŋ jatiné tan sajiwa.

46. déné dadosé sakalir, muŋ sakiŋ kartiniŋ rasa, wit rasa wahu jatiné, darbé daya warṇa warṇa, asrĕp kalawan panas, ḷĕgi guriḥ pahit kĕcut, lan pĕḍĕs asin saŋ nata.

47. kaŋ ugi asipat ghaib, liriŋ ghaib iṅgiḥ samar, liré samar tan katoṅton, makatĕn ta wantahira, laḥ pundi wujudira, kaŋ asrĕp panas pukulun, kaŋ pahit kĕcut punika.

48. yĕkti muŋ nèŋ rasa saŋ sri, sipaté tan kawistara, awor kalawan wujudé, liré wujudé dahana, kaŋ panas rasanira, utawi wujudiŋ madu, kaŋ amanis iṅgiḥ rasa.

49. iŋ ṅuni dados sawiji, duk dadi rasaniŋ ĕsa, wusana rasa kwasané, sagĕd ambabar warana, koṅsi awarṇa warṇa, iṅgiḥ kaŋ sami awujud, dados warananiŋ rasa.

50. rasa warananiŋ ghaib, milané babasanira, rasanira sayĕktiné, ya rasaniṅsun sañata, iṅgiḥ iṅsun punika, kaŋ sipat wajibul wujud, iṅgiḥ sipat ghaib samar.

51. wit rasa punika gusti, sanadyan ṅuni sajuga, naṅiŋ ṅĕmu warṇa akèḥ, kados tur amba iŋ ṅarṣa, panas asrĕp utawa, pĕḍĕs asin guriḥ kĕcut, gya samya daya dinaya.

52. dyan dados warṇa sakalir, milanipun béda béda, makatĕn kadadiané, daya iṅkaŋ dinayanan, botĕn ajĕg trapira, milané wahananipun, iṅgiḥ dados béda béda.

53. dados iṅkaŋ sipat ghaib, tĕtĕp botĕn darbé karṣa, karṣanya wus kasrahaké, iṅgiḥ ḍatĕŋ rasanira, naṅiŋ rasa kapurba, iŋ saŋ hyaŋ ĕsa sinuhun, kèndĕl aturnya saŋ ṛĕtna.

54. saŋ nata suka miyarṣi, wusana arum ṅandika, aḍuḥ babo ariniṅoŋ, tĕka sira wus widagda, rèḥ sandiniŋ dwi aṣṭa, paṅguṣṭinira wus maṭuk, kaṇṭi pasakṣèn palaṣṭa.

13. kinaṇṭi

1. lan kabèḥ wuwusirèku, wus ginambar anèŋ tulis, iya iku akṣara a, winastan sastra raswadi, kaŋ iŋ ṅarṣa aṅka papat, ya babariŋ rasa jati.

2. yèn tumrap manuṅsanipun, dadi pañcadriya yayi, déné ananiŋ saŋ hyaŋ : sa, ya iku sa kaŋ nèŋ wuri, iya uripiŋ manuṅsa, iṅkaŋ anartani budi.

3. iŋ bésuk paṅañcasipun, aṅka papat iku yayi, siḍikaranĕn manukṣma, mriŋ pasaṅan sa iŋ wuri, wus paripurṇa waluya, muliḥ iŋ nukat ghinaib.

4. saŋ ṛĕtna mèsĕm umatur, iṅgiḥ sampun ḷĕṛĕs saŋ sri, lamun makatĕn trapira, yĕkti wus tan miṇḍo kardi, pami sirṇaniŋ dahana, pĕt kukusipun tan kari.

5. yèn ṅantosa tilar kukus, kumĕlun awor lan aṅin, siya siya namanira, kawula tinilar gusti, yĕkti baḍé ṅulandara, saparan paran tanpa sir.

6. saŋ nata suka gumuyu, saŋ ṛĕtna rinaṅkul nuli, wus yayi aywa kadawa, akèḥ pawoṅan sumiwi, ywa koṅsi miyak warana, mĕṅko ratri yèn wus sĕpi.

7. kéwala nèŋ jro jinĕmrum, sakarṣanta yĕkti dadi, pun kakaŋ sumaraḥ karṣa, maṅun rarasiŋ raswadi, sayĕkti nora kacuwan, saŋ ṛĕtna añiwĕl wĕntis.

8. ajĕg bahé yèn saŋ prabhu, woŋ rarasan bĕcik bĕcik, caḷĕkik ñaṇḍak paprĕman, gĕṭiṅku yèn ṅono kuwi, maṅké niki astanira, kula baḍé ṅroñcé sari.

9. makatĕn salaminipun, saŋ sri laminya nèŋ wukir, amuŋ tansaḥ bawa rasa, lan saŋ ṛĕtna myaŋ saŋ ṛĕṣi, saŋ dwija kèḥ wulaṅira, mariŋ saŋ sri narapati.

10. kabèḥ paṅawikanipun, tinumplak katur saŋ aji, aji jaya kawijayan, kadibyan miwaḥ kasaktin, kagunan myaŋ kanuragan, wus katur kabèḥ mriŋ saŋ sri.

11. samana sri nara prabhu, dènira tilar nagari, pan wus mèḥ samadya candra, saŋ ṛĕṣi umatur aris, ḍuḥ saŋ sri kahuniṅana, rèhniŋ sampun sawatawis.

12. paduka tilar prajaguŋ, yèn suwawi lan karṣèŋ sri, prayogi kondur iŋ pura, wĕlasa iŋ para dasiḥ, saliṅgar paduka nata, sayĕkti susaḥ kĕpati.

13. saŋ nata trĕñuḥ iŋ kalbu, wusana ṅandika ririḥ, ḷĕṛĕs paman andikanta, gèn kula tilar nagari, kados laṅkuŋ tri candrama, wit kula nis sakiŋ puri.

14. dyan lalana jajaḥ ḍusun, koṅsi praptaniŋ wanadri, ayuda lawan dĕnawa, laminira kawan ari, wontĕn iŋ alam siluman, dumuginé paman ṛĕṣi.

15. sumusul kula rumuhun, tigaŋ wulan winitawis, wontĕn ṅriki praptèŋ maṅkya, pétaŋ sampun pituŋ ari, dados wiwit sakiŋ praja, praptèŋ maṅkya satus ari.

16. mila ḷĕṛĕs paman wiku, sahèstu woŋ jroniŋ nagri, ṅrasa wus tita antara, dènnya sami aṅulati, kula kaŋ rumahos dosa, akarya susahiŋ dasiḥ.

17. saŋ wiku alon turipun, asarya gumuywa ririḥ, ḍuḥ saŋ nata koniṅana, liṅgar paduka siŋ puri, sawĕg kaliḥ wĕlas dina, duk wontĕn iŋ suñaruri.

18. pan iṅgiḥ amuŋ sadalu, éñjiṅé amba sumiwi, laju kéwala atĕḍak, ḍatĕŋ paḍépokan ṅriki, sawĕg saptari punika, sri naréndra duk miyarṣi.

19. saṅĕt ṅuṅun puṅun puṅun, ṅĕṅlĕŋ ṅunandikèŋ galiḥ, nora kaya raganiṅwaŋ, dé tĕka apĕs kĕpati, kĕna karat iŋ séluman, winalik tiṅal tan uniŋ.

20. lalakon amuŋ sadalu, tĕka katon tĕluŋ sasi, alas akaton nagara, katujuné paman ṛĕṣi, waṣkiṭa tan kĕsamaran, puwara ṅandika aris.

21. ḍuḥ paman saŋ maha wiku, iŋ samaṅkya karṣa mami, arṣa utusan mriŋ praja, asuŋ srat iŋ kakaŋ patiḥ, amuṇḍut pĕṭukan wadya, muwaḥ kaŋ jĕmpana joli.

22. sintĕn kaŋ pantĕs iṅutus, mariṅkĕn punaŋ kintèki, saŋ wiku alon turira, iṅgiḥ saŋ prabhu agampil, iŋ ṅriki kaṭaḥ jajaṅgan, myaŋ cèkèl maṅuyu cantrik.

23. iṅkaŋ prayogi iṅutus, muṇḍi nawala narpati, sigra saŋ nata mèt rontal, laju cinitra pribadi, tan antara wus palaṣṭa, pinariṅkĕn mriŋ saŋ ṛĕṣi.

24. tinampèn sinukṣmèŋ kalbu, bubukaniŋ kaŋ kintèki, pèṅĕt iki nawalèṅwaŋ, saŋ prabhu jiwanda mami, ratu iŋ garbasumaṇḍa, kaŋ kinuñcaŋ iŋ déwadi.

25. ḍumawuha mriŋ sirèku, kakaŋ sucipta apatiḥ, liré kaŋ nawala patra, manira pariŋ udani, duk ari aṅgara mulya, titi sunya madya ratri.

26. manira nĕḍĕŋ manuṅku, mĕmĕsu pudya sĕmadi, muṅgwiŋ gupit sandyasana, sakala sumaput mami, panon pĕtĕŋ tan pantara, piṇḍa kalayapiŋ pati.

27. tan antara byar kadulu, sun wus nèŋ madyèŋ wanadri, solaḥ iṅsun anèŋ wana, kakaŋ pikiṛĕn pribadi, dyan manira lumakṣaṇa, kalulunta koṅsi prapti.

28. pratapané paman wiku, surasa iŋ kono mami, ḍinahupkĕn lan saŋ ṛĕtna, manindra prapta samaṅkin, marmanira mĕṅko kakaŋ, manira pĕṭukĕn nuli.

29. lan joli jĕmpana taṇḍu, dèn samapta amiranti, déné titihan manira, si ragajiwa abĕcik, muṅguḥ ṛĕṛĕṅganiŋ marga, rigĕnĕna kaŋ prayogi.

30. titi saŋ wiku lon matur, sampun kaluhuran saŋ sri, cĕkak wosipun kacĕkap, nulya animbali cantrik, kĕkaliḥ wus praptèŋ ṅarṣa, ḍinawuhan iŋ saŋ ṛĕṣi.

31. hèḥ rasmani lan sirèku, rasmadi sira tinudiŋ, iya mriŋ bĕndaranira, bambaŋ jiwanda samaṅkin, ṅaturké nawala patra, maraŋ saŋ anindyamantri.

32. iŋ garbasumaṇḍa gupuḥ, umaṅkata dina iki, yèn nawala wus tinampan, apa préntahé kya patiḥ, sira nuruta kéwala, sĕrat wus tinampèn cantrik.

33. kaliḥ sandika turipun, manĕmbaḥ aminta amit, kalilan laju umaṅkat, ḷĕpas lampahé ki cantrik, sigĕg gantya kaŋ winarṇa, iŋ garbasumaṇḍa nagri.

34. sadaṅunira saŋ prabhu, liṅgar sakiŋ daḷĕm puri, kya patiḥ sakañcanira, tuguran gilir gumanti, samana ṛĕkyana patya, lan pararya sawatawis.

35. nèŋ sitiṅgil gunĕm wuwus, lawan saŋ arya paṅèkṣi, kaliḥ saŋ arya suganda, kya patiḥ wacana aris, paranta yayi suganda, liṅgaré sri narapati.

36. pan uwus samadya tèṅsu, tĕka tita tanpa warti, dalasan kaŋ iṅsun pataḥ, ṅulati prapta samaṅkin, kabèḥ duruŋ ana prapta, karkatiŋ tyas iṅsun yayi.

37. yèn béñjaŋ éñjaŋ saŋ prabhu, wus tita tan antuk titik, iṅsun priyaṅga wisata, ṅulati sri narapati, lan sun tan muliḥ iŋ praja, yèn saŋ aji tan kĕpaṅgiḥ.

38. saŋ arya suganda muwus, punaginira kya patiḥ, kula iṅgiḥ ṅayubagya, sanadyan kula sayĕkti, yèn saŋ nata èstu muṣṇa, maṅsa ḷĕstantuna urip.

39. anaṅiŋ sayoginipun, suka uniṅa rumiyin, mariŋ saŋ ṛĕṣi surasa, dadya tan katutuḥ wuri, sukur yèn saŋ maha dwija, karṣa suŋ wasita jati.

40. dumunuṅipun saŋ prabhu, yĕkti saŋ ṛĕṣi udani, samana patiḥ sucipta, mèṅĕt iŋ tyas nayogyani, dèrèŋ wus dènnya rarasan, kasaru praptaniŋ cantrik.

41. kaliḥ maṛĕk kusuŋ kusuŋ, lawan amuṇḍi kintèki, lan matur ḍuḥ saŋ apatya, sowan kawula tinudiŋ, bĕndara bambaŋ jiwanda, aṅaturakĕn kintèki.

42. kya patiḥ kapitèŋ kalbu, sarwi nampèni kintèki, kaŋ sĕrat dèrèŋ binuka, andaṅu maraŋ ki cantrik, hèḥ cantrik iṅsun tatanya, kariyin mariŋ sirèki.

43. sapa ta karo aranmu, lan pinaṅkanta iŋ ṅĕndi, wit sira duruŋ wawaraḥ, muŋ awalèḥ kaŋ anudiŋ, awasta bambaŋ jiwanda, iku satriya iŋ ṅĕndi.

44. ki cantrik gugup umatur, ḍuḥ iṅgiḥ saŋ nindyamantri, amba minta apuranta, dé amba kiraŋ patitis, sahèstunipun kawula, iṅgiḥ cantrik sakiŋ wukir.

45. iŋ rasamulya pukulun, abdiné saŋ maha ṛĕṣi, surasa déné kaŋ duta, bĕndara jiwanda iṅgiḥ, putra mantuné saŋ tapa, laré lola kawlas asiḥ.

46. prapta suwita tan daṅu, lajĕŋ tinariman putri, putranipun saŋ paṇḍita, ayuné kĕpati pati, wadana sawaŋ purṇama, ṅĕṅuwuŋ amilaṅĕni.

47. goloṅan bagya sahèstu, kaḷĕṛĕsan dènnya urip, kawula kaŋ sampun lama, suwita saṅkaniŋ alit, tan sagĕd tampi tariman, goloṅan cilaka mĕñcit.

48. kaŋ myarṣa samya gumuyu, kya patiḥ karasèŋ galiḥ, nulya kaŋ sĕrat binuka, wus sinukṣmèŋ jroniŋ kapti, sru ṅuṅun iŋ tyas puwara, suka sukur riŋ déwadi.

49. dyan pustaka sinuṅkĕn wus, mriŋ pra arya gantya ṅèkṣi, sadaya ṅuṅun kalintaŋ, éloké lalakon saŋ sri, wusana sukur iŋ déwa, déné ta makṣiḥ basuki.

50. samana saŋ anindyanuŋ, gya tata tata miranti, wimana titihanira, ṛĕtna manindra tanapi, taṇḍu joli lan jĕmpana, titihanira pra putri.

51. myaŋ paṛĕkan cèṭi saguŋ, kaŋ arṣa mĕṭuk saŋ dèwi, lawan titihan naréndra, kyayi ragajiwa nami, kuda uḷĕs mulus krĕṣṇa, kakasihira saŋ aji.

52. sampun samĕkta sadarum, sapalakartiniŋ margi, miwaḥ wadya sawatara, wus piniliḥ kaŋ prayogi, titiṇḍiḥ arya sakawan, paṅarṣa arya paṅèkṣi.

53. dupi sampun sampat patut, dyan maṅkat sakiŋ nagari, gumuruḥ giraŋ gambira, sabawaniŋ bĕrtyapati, amĕmataḥ upacara, cinara mĕṭuk paṅantin.

54. sarwa sri raras kadulu, tabuhan munya ṅaraṅin, punaŋ wimana iṅayap, iŋ upacara sarwasri, myaŋ iṅuruŋ uruŋ para, wadya wadu jalu èstri.

55. saṅkĕp manéka sarwanuŋ, dadya tontonan samargi, cinĕṇḍak lampahnya prapta, soriŋ rasamulya wukir, rèrèḥ aṅrĕṛĕmkĕn lampaḥ, muŋ cantrik kaliḥ tinudiŋ.

56. rumuhun matur saŋ wiku, ki cantrik sampun lumaris, tantara praptèŋ pratapan, laju maṛĕk saŋ maharṣi, umatur atur upikṣa, yèn pĕṭukan sampun prapti.

57. wimana titihanipun, garwa nata atanapi, kuda titihan naréndra, sampun samĕkta rumanti, pĕpak upacaranira, manéka kaŋ palakarti.

58. saŋ ṛĕṣi ĕntyarṣèŋ kayun, dyan matur putra saŋ aji, suka saŋ prabhu miyarṣa, sakṣaṇa saŋ maha ṛĕṣi, aṅrĕrakit pasugatan, iŋ panti tata miranti.

59. tantara pra wadya sampun, praptèŋ pratapan tinampi, riŋ saŋ tapa pinisuka, saŋ prabhu lan pramèswari, ṛĕna miyat iŋ wadyéndra, pariŋ pambagya basuki.

60. iŋ antara ari sampun, tata tata amiranti, sampat sampurṇa umaṅkat, saŋ wiku tumutur tuwin, saguŋ iṅkaŋ para siswa, cantrik cèkèl atanapi.

61. jajaṅgan wasi maṅuyu, uluguntuŋ sontraŋ mĕntrik, kĕbut umiriŋ sadaya, dinulu iṣṭanya kadi, satriya añjayèŋ laga, kondur boyoŋ putri adi.

62. pratapan sampun kapuṅkur, suṛĕm sunariŋ pipidik, piṇḍa aṅganiŋ kalpika, coplok kaŋ sosotya anis, kari ĕmbanan kéwala, samun nora añĕnĕni.

63. amuŋ ramé swaranipun, woŋ désa samya ṅrasani, kaliṅané mantunira, saŋ paṇḍita iku dadi, gustiniṅsun sri naréndra, iŋ garbasumaṇḍa nagri.

64. wartané iŋ ṅuni mupu, laré lola kawlas asiḥ, tiwas sami winĕlasan, putrané putri sawiji, ayu kuniŋ tanpa sama, olèḥ laré lola lali.

65. nora liwat sèwu sukur, muga ta widada dadi, usadaniŋ katuridan, dasihé iŋ désa iki, baṅkita antuk baṛĕkaḥ, kabèḥ amaṅgiḥ basuki.

66. nĕŋna rarasaniŋ ḍusun, lampahé sri narapati, sawadya tanpa saṅsaya, wus praptèŋ kikisiŋ nagri, wadya kaŋ ṅriyini lampaḥ, sampun matur iŋ ki patiḥ.

67. gugup kya patiḥ agupuḥ, buḍal sakañcané sami, mĕṭuk rawuhiŋ naréndra, praptèŋ sajawiniŋ nagri, kĕpĕṭuk tuṇḍuk ki patya, dinaṅu iŋ sri bupati.

68. hé kakaŋ patiḥ sirèku, paran iŋ sapuṅkur mami, apa ta paḍa raharjaḥ, kya patiḥ matur wotsari, ḍuḥ gusti paṅèstu tuwan, praptèŋ samaṅkya basuki.

69. amuŋ saliṅgar pukulun, wadyéndra sapraja sami, oṛĕg ṛĕntĕŋ aru ara, tyas otĕr makĕtĕr tistis, kĕtir kĕtir sanityasa, susaḥ sru ṅĕsaḥ lir sakit.

70. kaŋ saṅĕt satĕṅaḥ lampus, maṛĕmiŋ dasiḥ sanagri, muŋ mèt matĕṅiŋ pétaṅan , nira para nujum sami, paduka makṣiḥ waluya, lagya sinĕṅkĕr iŋ widhi.

71. maṅkya sarawuḥ pukulun, wadyéndra agĕŋ myaŋ alit, samya sru marwata suta, kadi kaŋ rogarda dadi, antuk usada sakala, waluya nirmala jati.

72. wĕlas saŋ nata lon muwus, wus kakaŋ aywa pinikir, maṅkya amuŋ ḷĕstaria, amaṅun sukaniŋ kapti, laju lampahnya saŋ nata, sampun mañjiŋ daḷĕm wuri.

14. paṅkur

1. jro pura raras kawuryan, wawaṅunan sarwa amilaṅĕni, wasisé saŋ anindyanuŋ, karya sukaniŋ nata, wus iṅaṅkaḥ rawuhira saŋ aprabhu, sakaliyan garwa nata, sayĕkti binayaṅkari.

2. marma kasok sukèŋ nata, amanoni ṛĕṅganiŋ pura asri, kaŋ garwa sigra sinambut, lalu luṅgwiŋ balé mas, kaŋ pinasaŋ iŋ ṅarṣaniŋ séséroŋ rum, pra rum rumarak iŋ ṅarṣa, pĕnuḥ kaŋ paṛĕkan cèṭi.

3. samya sukak maṅun suka, sakiŋ daṅu onĕŋ katĕkan kapti, samya akasukan nutug, sarya sukur riŋ déwa, liṅgarira saŋ nata samaṅkya kondur, muwaḥ sampun mawa garwa, warṇayu sutaniŋ ṛĕṣi.

4. pastĕs siniwèŋ jro pura, para putri maṛĕm sumuṅkĕm asiḥ, iŋ jawi saŋ anindyanuŋ, kaŋ minisukèŋ wadya, sinakarṣa sakapti kapti anutug, wijaḥ wijaḥ makajaṅan, kasukan minum brĕnduwin.

5. samya wuru surak surak, bawa swara swarèŋ pradaṅga ṅraṅin, raras rum aṅañut añut, kasok sukaniŋ wadya, dènnya samya ṅluwari punaginipun, lamun kondur sri naréndra, arṣa wuru pituŋ ratri.

6. maṅkya wus samadya candra, dènnya samya andrawina mĕnuhi, miwaḥ saŋ sri nara prabhu, dènnya misuka maraŋ, marasĕpuḥ saŋ surasa maha wiku, tanpa siku sinakarṣa, saguŋ kaŋ maṅuyu wasi.

7. cantrik cèkèl myaŋ jajaṅgan, uluguntuŋ puṭut sukanya ṅĕntiŋ, sakiŋ samya muwaḥ muwuḥ, pĕnuḥ boja myaŋ bogha, saṅkĕp iṅkaŋ bhuṣaṇa manéka anuŋ, papariṅé sri naréndra, satata lumintu mintir.

8. samana duk nĕḍĕṅira, abujana andrawina mĕnuhi, kasaru iŋ praptanipun, wadya pacalaŋ praja, dumarojog sowan saŋ sri kusuŋ kusuŋ, dinaṅu wigatinira, umatur sarwi wotsari.

9. ḍuḥ gusti sowan kawula, tur upikṣa wontĕn mĕṅsaḥ gĕŋ prapti, rakṣasa mahèwu èwu, sakiŋ wukir sikara, rajanira sri kaladruhaka rawuḥ, pribadi ambĕkta bala, brakasakan warṇi warṇi.

10. wus karya pakuwon samya, ṛĕsaḥ iŋ rèḥ sarosa pakṣa wani, aṅrĕrisak ḍusun ḍusun, sahasa siya siya, ṅaṅsĕk arṣa marwasa mañjiŋ kaḍatun, aṅrĕbat garwa paduka, iṅgiḥ kaṅjĕŋ pramèswari.

11. gatgadèŋ tyas sri naréndra, gya ḍĕḍawuḥ mariŋ ṛĕkyana patiḥ, kinèn sawéga iŋ pupuḥ, amapag ripu arda, tan antara pĕpak kaŋ pra prawiranuŋ, samya miranti samĕkta, upakartiniŋ ajurit.

12. buḍal gumuruḥ siŋ praja, praptèŋ jawi kiṭa sampun kĕpaṅgiḥ, ṛĕkṣasa kèḥ samya ṅamuk, mamak aṅamaḥ amaḥ, manraŋ wadya iŋ garbasumaṇḍa gugup, naṅgapi kurdaniŋ ditya, rusuḥ taṅkĕbiŋ ajurit.

13. gumuluŋ uḷĕŋ uḷĕṅan, liwuŋ uḷĕŋ lawan linawan gĕnti, paṛĕŋ akawal kĕkiwul, kuwĕl gantya malandaŋ, kuwalahĕn woŋ bhumi kèḥ samya lampus, ṛĕkṣasa rosa kuwasa, wĕntala tan kĕnèŋ pati.

14. katutuḥ iŋ praptanira, brakasakan prapta ṅaṅsĕk mĕdèni, gandarwa wéwé lu ilu, galadraḥ jraṅkoŋ égraŋ, aṅgi aṅgi kĕblak lawan blĕkĕṭukur, ṭéṭékan mĕṇṭèk jaṅgitan, ṭoṅṭoṅsot myaŋ banaspati.

15. suka misésa ṅrañcana, woŋ iŋ garbasumaṇḍa kèḥ ṅĕmasi, siŋ kĕkĕs miris tyasipun, makĕkĕl kamigilan, kèḥ satriya guŋ aguŋ nĕmahi lampus, pĕpĕs tyasé tanpopaya, payaḥ saṅĕt kapalipis.

16. arya suganda myaŋ arya, kumararya wacanalam paṅèkṣi, miwaḥ arya pamyarṣèku, sampun sami praléna, kantun arya pranawa sakañcanipun, yèku arya cakrabawa, myaŋ arya locita makṣiḥ.

17. urip naṅiŋ kĕsakitan, sampun sami ginoṅsoṅan iŋ dasiḥ, bala rucaḥ ḷĕbur tumpur, tumpĕs samadyèŋ rana, kantun patiḥ sucipta maṅsaḥ aṅĕsuk, triwikrama matĕk mantra, paṅruwatiŋ satru sĕkti.

18. mĕtu lésus bayu bajra, mĕsĕs nĕmpuḥ muṅsuḥ rasĕkṣa gusis, kabur kabuñcaŋ iŋ lésus, prapta kaŋ brakasakan, aṅrèp kumrap maṅarṣa arṣa mriḥ lampus, wĕntala kasraŋ maruta, awas saŋ sucipta patiḥ.

19. salin glar ñipta dahana, ṅalad alad yayaḥ ṅayuḥ wiyati, ṅoyak brakasakan sampun, kĕsaṅlad dahanarda, tan antara ḷĕḷĕmbut sirṇa dadyawu, paḍaŋ madyèŋ pabaratan, suka saŋ sucipta patiḥ.

20. susumbar aminta lawan, kapiyarṣa patiḥ rakṣasa dupi, miyat pabaratan suwuŋ, sirṇaniŋ wadyanira, dènnya tĕlas datanpa tilas dinulu, amuŋ ana woŋ sajuga, asusumbar minta taṇḍiŋ.

21. sĕk pĕṅkarṇa kabaranaŋ, patiḥ kalagragoḍa maṅsaḥ nuli, praptèŋ ranaṅga kapaṅguḥ, lawan patiḥ sucipta, yun ayunan kalagragoḍa ambĕkuḥ, owaḥ hèḥ saparanira, manuṅsa warṇamu pĕkik.

22. ṅaléla madyèŋ ranaṅga, baya sira kaŋ luwiḥ dibya sakti, bisaa marwasèŋ muṅsuḥ, ṛĕkṣasa sirṇa gĕmpaŋ, brakasakan kaprawasa sirṇa larut, tĕka sru kagila gila, kadibyanta iŋ ajurit.

23. apa sira sri naréndra, kaŋ maṇḍirèŋ garbasumaṇḍa nagri, iṅkaŋ aṅalap saŋ ayu, ṛĕtna dèwi manindra, kyana patiḥ sucipta maluyèŋ wuwus, hèḥ buta kawruhanira, sun dudu gusti saŋ aji.

24. naṅiŋ sun patiḥ wisésa, pinasrahan baṅkaŋ alumiŋ nagri, saŋ sucipta aran iṅsun, kaŋ monaḥ satru murka, wadyanira tanpa pétuŋ sirṇa gĕmpuŋ, amuŋ kari siji sira, tĕka pakṣa kumawani.

25. ṅakua saparanira, mupuŋ duruŋ mati iŋ asta mami, kalagragoḍa sumahur, hèḥ sucipta wruhanta, iṅsun uga patiḥ wisésa dibyanuŋ, kalagragoḍa ran iṅwaŋ, balia aja kumaki.

26. aja dumèḥ lamun bisa, amarwasa saguŋ wadya rasĕkṣi, ambéṅkas sakèḥ ḷĕḷĕmbut, kĕsusu asusumbar, baya sira tuli tan kulak paṅruṅu, yèn sun kasub kasusrèṅrat, sudira suradi murti.

27. taté aṅĕntasi karya, muṅsuḥ sakti kéntas iŋ asta mami, nadyan para déwa kawus, karoban kaprabawa, saradibya kèḥ suḥ siŋ kadibyaniṅsun, luhuŋ sira abalia, mundura aja ṅajoni.

15. durma

1. éman éman woŋ bagus lamun palastra, aṅur ratunirèki, prihĕn lumawana, lawan jĕnĕŋ manira, sĕḍĕŋ aṅadu kasaktin, nora kuciwa, patiḥ sucipta aṅliŋ.

2. babo babo abanira pakṣa krura, aṅarṣa arṣa saŋ sri, maṅsa kalakona, yèn sun makṣiḥ waluya, laḥ payo cobanĕn mami, warastra apa, iṅkaŋ anèŋ sirèki.

3. dipun aglis payo kéné tibakĕna, iŋ jajaniṅsun añjiŋ, aja pijĕr mojar, añjèrèŋ kawijayan, kojaḥ oñjoniŋ ajurit, maṅsa wuruṅa, jĕrowanmu sun rujit.

4. saŋ gragoḍa lir sinĕbit karṇanira, maṅkrak kroḍa mawĕrdi, ṅlĕpasi sañjata, sarya asru sabawa, laḥ rasakĕna pañakit, kaŋ ambĕk sura, sida amurwèŋ lalis.

5. saŋ sucipta prayitna muṣṭi warastra, lumarap naṅgulaṅi, pagut iŋ gagana, pawor sinraŋ maruta, tantara sirṇa tan kèkṣi, ṅuṅun tyasira, sira saŋ gragoḍa glis.

6. amijilkĕn paṅabaran warṇa warṇa, néka néka kahèkṣi, naṅiŋ tanpa karya, mĕtu mĕtu katulak, déniŋ sucipta sinakti, kaku tyasira, saŋ gragoḍa tumuli.

7. muntap ṅĕtog ṅayat warastra pamuṅkas, lumĕpas aṅĕnani, jaja saŋ sucipta, wutuḥ datan tumama, ṅiŋ kantĕp kantakèŋ siti, saṅĕt kalaran, datan antara taṅi.

8. duka patiḥ sucipta ñaṇḍak gaṇḍéwa, saradibya siniḍi, sarya sinaṅénan, winantu mantra swara, pamĕpĕsan ripu sakti, hèḥ satru murka, kaŋ pakṣa muraŋ niti.

9. asalira iŋ ṅuni sakiŋ tan ana, anané muŋ trimurti, dadi lan kinirtya, iŋ maṅkya sirṇanira, sayĕkti sakiŋ pakarti, paṣṭi maluya, muliḥ awor lan aṅin.

10. mĕnĕŋ panaḥ lumarap ḷĕṛĕs iŋ jaṅga, pĕḍot gragoḍa mati, kwandanira sirṇa, mukṣa awor maruta, mirut pabaratan tistis, kéntas wus bébas, kari saŋ yakṣa aji.

11. duk uniṅa patihé mukṣèŋ ṅalaga, wadyané sirṇa gusis, kroḍa grĕŋ goraya, giro magra magalak, gumluḍug swara kapyarṣi, ṅèbĕki jagad, bhantala goñjaŋ gañjaŋ.

12. gĕñjat gĕñjot jalaniḍi ṅombak baṅkat, gunuŋ gĕŋ moyag mayig, akasa maṅampak, clèrèt baruŋ liwĕran, suṛĕm sorotiŋ hyaŋ rawi, aṅĕmu susaḥ, lir arṣa syuḥ sirṇanis.

13. sèsiniŋ rat sru mirut maras sar saran, kuwur kèwĕran wiṅwrin, bérawèŋ prabawa , nira saŋ yakṣa raja, ajĕg yèn ṅajoni jurit, jagad lir bujad, kèñjĕk iŋ saŋ yakṣaji.

14. dyan jumaṅkaḥ yakṣa raja jlĕg wus prapta, ṅarṣa saŋ nindyamantri, kagyat saŋ sucipta, myat warṇèŋ yakṣa raja, naratab iŋ tyas masmujriḥ, tantara mojar, buta apa sirèki.

15. tĕka anèḥ warṇanta lan rowaṅira, ṅakua mupuŋ urip, kasèp yèn wus léna, gumuywa sri druhaka, lan nabda hèḥ ko awani, ṅucap maṅkana, wruhanta sun yakṣaji.

16. kaŋ ṅaḍaton iŋ graniŋ wukir sikara, kaladruhaka bisik, kaŋ ñĕṅkĕr saŋ ṛĕtna, manindra sutèŋ wipra, balik apa ta sirèki, prabhu jiwanda, kaŋ ṅalap garwa mami.

17. yèn sañata samĕṅko ṛĕtna manindra, iṅsun puṇḍut sahiki, lamun tan ṅaturṇa, ajur kuwandanira, saŋ sucipta datan aṅliŋ, dyan narik katga, gĕcros nuduk mawanti.

18. nitir wantĕr iŋ sira saŋ yakṣa raja, anaṅiŋ tan ṅuṇḍili, guguk guyunira, saŋ sri kaladruhaka, lan nabda kĕndĕl sirèki, woŋ tanpa ṅrasa, gĕḍému sakĕmiri.

19. tinakonan tan maluya narik katga, wanti wanti anitir, paran paṅiranta, kĕrismu muŋ sasada, dadak adrĕŋ añuduki, patiḥ sucipta, saya liwuŋ manitir.

20. daṅu daṅu saŋ yakṣa kaladruhaka, srira karasa kĕri, makĕkĕl gumuywa, patiḥ sucipta mĕkṣa, tan kèndĕl dènnya nuduki, sigra ginĕtak, kabur kabapan kadi.

21. pĕsatiŋ kaŋ puṅlu siŋ wuluḥ sañjata, dadya tiba kĕbantiŋ, tibèŋ jroniŋ pura, sira prabhu jiwanda, duk nĕḍĕŋ nuṅku sĕmadi, nèŋ sandyasana, kagyat saŋ sri miyarṣi.

22. ana swara gumĕbrug iŋ panataran, sigra saŋ sri maṅèkṣi, wruḥ lamun sucipta, kantu kantakèŋ kisma, wus ṅira lamun kya patiḥ, katitiḥ iŋ praŋ, binuwaŋ ripu sakti.

23. sĕk pĕṅkarṇa saŋ nata muṇḍut sañjata, saradibya pinuṣṭi, sarwi aṅandika, mriŋ ri ṛĕtna manindra, myaŋ para paṛĕkan cèṭi, kabèḥ kéwala, aywana iṅkaŋ kèri.

24. umañjiṅa jroniŋ gupit sandyasana, dupi saŋ pramèswari, myaŋ para paṛĕkan, sampun tumamèŋ saṅgar, pintuniŋ panti kinuñci, dyan sri naréndra, miyos sakiŋ jro puri.

25. muŋ pribadi duk prapta iŋ panaṅkilan, mulat ana rasĕkṣi, guŋ ruhur gambira, srira pituŋ prabata, gimbal jaṭa aṅajrahi, asru susumbar, swaragĕŋ gigirisi.

26. o haḥ ĕndi rupané kaŋ ambĕk sura, kaŋ mèt dyaḥ manindradi, tan kulak pawarta, lamun ṛĕtna manindra, bakal pramèswarinèki, saŋ kaswarèṅrat, kaladruhaka sakti.

27. sèsiniṅrat makĕtĕr tistis sanitya, umyat kadibyan mami, nadyan pra jawata, tintrim wiṅwrin tan mantra, anukarta karṣa mami, samĕṅko tĕka, manuṅsa majanani.

28. payo nuli amĕtua bandayuda, ṅadu kadibyan dadi, kadulu saktinta, siṅa kaŋ lanaŋ yuda, kasub kaswarèṅrat yĕkti, lulus wibawa, aṅgarwa putri adi.

29. sri naréndra jiwanda dupi miyarṣa, susumbariŋ dityaji, alon lumakṣaṇa, maṛĕk arṣa lumawan, lan laṅkapira cinaṅkiŋ, duk yun ayunan, kagyat saŋ rakṣasaji.

30. tĕka sira si gĕḍé kĕmiri prapta, maniŋ iŋ ṅarṣa mami, sun sĕṅguḥ wus sirṇa, dadyawu kuwandanta, maṅkya ḷĕntrĕŋ ḷĕntrĕŋ ñaṅkiŋ, laṅkap warastra, baya arṣa jĕmpariŋ.

31. mĕṅko maniŋ kaŋ wus braṣṭa sĕṛĕṅira, bayu sirṇa ṅaḷĕntriḥ, muṅguḥ sun gĕtaka, yĕkti kontal maḷĕsat, tĕkèŋ doḥ tibèŋ jaladri, maṅsa baṅkita, bali maniŋ sirèki.

32. sri naréndra jiwanda maṅsuli sabda, hèḥ yakṣaraja mami, dudu sinatriya, kaŋ wus lumawan sira, wruhanta iṅsun narpati, garbasumaṇḍa, prabhu jiwanda mami.

33. kaŋ aṅgarwa saŋ ṛĕtna dèwi manindra, mahu ika papatiḥ, patiḥ sun wisésa, sun srahi maṅku praja, samĕṅko ya makṣiḥ urip, atuṅgu pura, ṅuṅun saŋ ṛĕkṣasaji.

34. lon wacana lagi iki iṅsun maṅgya, ratu lawan papatiḥ, kĕmbar warṇanira, nora siwaḥ sakéswa, muŋ kacèk kĕras lan ririḥ, samĕṅko paran, karṣanira saŋ aji.

35. apa sira nuṅkul ṅaturkĕn saŋ ṛĕtna, apa lumawan jurit, saŋ nata maluya, sun arṣa labuḥ wadya, nuhoni wajibiŋ aji, déné saŋ ṛĕtna, pètĕn yèn sun wus mati.

36. babo babo ladak ririḥ abanira, naṅiŋ grĕgĕtké ati, payo dèn kapara, ṅarṣa yèn arṣa wruha, kroḍaniṅsun iŋ ajurit, sigra saŋ yakṣa, raja manahut wani.

37. luput saŋ sri malumpat rikat lir kilat, ébat saŋ yakṣa aji, dyan tinut saparan, wali wali cinaṇḍak, tan kacaṇḍak guŋ ṅéṇḍani, piṇḍa wayaṅan, dinuk iŋ tiṅal kèkṣi.

38. duk sinahut amĕsat kĕsit kaliwat, wriṅutĕn saŋ yakṣaji, iṅĕsuk saŋ nata, arṣa rinukĕt iŋ praŋ, duk paṛĕk arṣa pinuṣṭi, rikat saŋ nata, ditya ginitik déniŋ.

39. laṅkap kĕna mukané sumaput ṛĕbaḥ, jĕrbabaḥ iŋ pratiwi, taṅi triwikrama, sarwi gĕro goraya, oṛĕg rug kaŋ bhumi goñjiŋ, sigra saŋ nata, ginĕtak tibèŋ tĕbiḥ.

40. saŋ yakṣéndra susumbar ḷĕbur aṅganta, maṅsa wuruŋ wor siti, saŋ nata wĕntala, muŋ kantĕp sawatara, wuṅu aṅĕmbat jĕmpariŋ, sampun lumĕpas, nujwèŋ jaja yakṣaji.

41. tan tumama tiba kantu iŋ bhantala, samantara ataṅi, sarira kĕlaran, saŋ sri yakṣa sru duka, ṅĕtog kadibyanya dadi, amĕsu budya, matĕk mantra mawĕrdi.

42. mĕtu iṅkaŋ gĕgrĕmĕtan néka warṇa, sakiŋ tutuk aṅgili, piṇḍa ampak ampak, ampuḥ amawa wisa, duk paṛĕk saŋ sri udani, yèn saŋ yakṣéndra, masaŋ kĕmayannèki.

43. dyan siḍakĕp umĕnĕŋ ṅĕniṅkĕn cipta, mĕtyakkĕn aṅin aṅin, mĕsĕs bayu bajra, nĕmpuḥ gĕgrĕmĕt sirṇa, tantara tĕka makĕṭi, kaŋ sato wana, manéka warṇa tuwin.

44. sarupané sato kéwan kaŋ rumaṅkaŋ, sakiŋ tutuk yakṣaji, samyaṅguŋ gambira, sĕdyarṣa amarwasa, mariŋ saŋ jiwanda aji, dupi wus cĕlak, nata umĕnĕŋ maliḥ.

45. tan antara mĕtu gĕŋ kaŋ bayu bajra, nĕmpuḥ sato wanadri, sirṇa sanalika, katub iŋ marutarda, ṅuṅun yakṣéndra maṅèkṣi, paṅabarannya, cabar kabèḥ tan dadi.

46. dyan amĕsu budya dadya dahanarda, sakiŋ sarira mijil, murub ṅalad alad, yayaḥ ṅayuḥ ṅawiyat, prayitna saŋ jiwandaji, ñipta wé marta, lwiḥ adrĕs iŋ wiyati.

47. tan antara siṛĕp punaŋ dahanarda, maras tyas saŋ yakṣaji, ṅira lamun arṣa, kĕtitiḥ madyèŋ rana, naṅiŋ mĕkṣa tan gumiṅsir, marma maṅkana, makṣiḥ ana kaŋ kèri.

48. kamayané pamuṅkas ran windasara, iku luwiḥ pramati, siṅa kaŋ kataman, lumpuḥ sarira ḷĕsaḥ, tyas kisruḥ sumaput yĕkti, datan panon rat, tan antara ṅĕmasi.

49. dyan amĕsu yakṣéndra sarwi susumbar, babo saŋ jiwandaji, aywa buṅaḥ buṅaḥ, dumèḥ baṅkit anulak, saguŋ paṅabaran mami, mĕṅko rasakna, pamuṅkasiŋ kasaktin.

50. mĕṅko yèn wus kataman kamayaniṅwaŋ, yĕkti liwuŋ sirèki, kĕna sun galaṇḍaŋ, mariŋ kayaṅan iṅwaŋ, sun sikṣa sun èkṣi èkṣi, lan iṅsun karya, paṅéwan éwan yĕkti.

51. tan antara pĕtĕŋ ḍĕḍĕt lilimĕṅan, jagad kĕmput katawis, amawa prabawa, kĕkĕs karasèŋ aṅga, sĕntosa saŋ jiwandaji, narik warastra, saradipa siniḍi.

52. byar katraṅan kèkṣi saŋ kaladruhaka, mara arṣa marpĕki, awas sri jiwanda, gya mĕṇṭaŋ saradibya, lumĕpas panaḥ ṅĕnani, jaṅganiŋ ditya, kapisanan ṅĕmasi.

53. srira ṛĕbaḥ gumĕbrug tiba gya mukṣa, suka saŋ jiwandaji, wusana rumasa, nadyan jumĕnĕŋ nata, wus ijèn datanpa kaṇṭi, apa karyanya, luhuŋ amurwèŋ lalis.

54. dyan siḍakĕp umĕnĕŋ amuntu cipta, pañcadriya tinarik, tantara wus mukṣa, saṛĕŋ sakratonira, sirṇa wus tan ana kèri, puliḥ waluya, arga sunya kahèkṣi.

tañcĕp kayon

séṅkalan : sèwu ḍomas catur dasartati.

9 sura 1840