piwulaŋ kaṅgé lahir saha batos , tumrap iŋ maṅsa punika, mawi kasĕkarakĕn.
déniŋ : radèn purbadarśaṇa.
1. ḍaṇḍaŋgula
1. kaŋ minaṅka paṅlipuriŋ kapti, déra dahat karuba rubéda, ṛĕtuniŋ bhawana maṅké, dardahiŋ nagara guŋ, aṅribĕdi nusa lit alit, samya kambaḥ bĕñcana, rinabasèŋ muṅsuḥ, naṅgulaṅi murkaṅkara, putra putri agĕŋ alit maṅsaḥ jurit, siŋ tuwa mĕsu brata.
2. iṅkaŋ ṅaraŋ kriḍawasitèki, datan kari ṅĕtog karosannya, biyantu sakuwagaṅé, rèhniŋ kabacut sĕpuḥ, tandaṅira mawi dèn liliŋ, ṅériŋ tanapi ṅanan, runtuté pinétuŋ, aywa koṅsi salaŋ tuñjaŋ, jumbuhira kalayan lakuniŋ batin, rinipta mriḥ sarkara.
3. muhuŋ kinarya ṅandĕlkĕn pikir, kaŋ supaya tan uwas sumĕlaŋ, kataman bĕñcana gĕḍé, disabar lan tuwajuḥ, pasrahĕna lahir myaŋ batin, mriŋ hyaŋ iṅkaŋ misésa, kaŋ karya sor uṅgul, pan kabèḥ maṅsa uwala, sakiŋ kodrat kuwasané kaŋ ghinaib, paṅéran nora kéwran.
4. nusantara katĕmpuḥ ginapit, iṅgris landa nuruti ardanya, sumĕdya ambatalaké, ṅalaṅi lan mumuruŋ, kamardikan miwaḥ drajatiŋ, nagri iṇḍonésia, kaṛĕpé winĕṅku, kinarya sumbĕriŋ bogha, arta brana kĕnaa dipun darbèki, woṅé kinarya kuda.
5. kuṭa kuṭa rinĕmuk dèn broki, ṅĕdiraké baṇḍa baṇḍunira, papakiŋ samubaraṅé, gagaman ḍarat lahut, iŋ gagana dipun ambĕṅi, aṅgĕpé baṅsa kita, makṣiḥ sarwa ĕmpuk, gampaŋ digĕgirowa, ṅaṅgo mriyĕm mortir miwaḥ bĕḍil mĕsin, sĕliṅané ṛĕmbugan.
6. akalira nika lawan iṅgris, wus kinĕtog tinumplak sadaya, kurbané saya wus akèḥ, mata mata mahèwu, sinĕbar mriḥ kasiliŋ juti, prandéné boya gampaŋ, maju maju mundur, aṅĕbroki kuṭa mluwa, amrajaya woŋ bhumi diaṅgĕp mimik, coba bacut bacutnya.
7. baṅsa kita gènnya anaṅgapi, tan kadĕṛĕŋ ardaniŋ wardaya, ṅupaya uṅgul jurité, naṅiŋ mawi pinétuŋ, bĕcik apa akèḥ papati, ḍasariŋ kamardikan, tan ṅupaya muṅsuḥ, sikĕpé amuŋ samĕkta, naṅgulaṅi kaŋ sumĕja gigiḍuhi, jantraniŋ papréntahan.
8. kiniyatkĕn iŋ jro sanubari, muŋ suméṇḍé kaŋ murbèŋ bhawana, asor uṅgul nèŋ astané, lamun tinakdir uṅgul, maṅsa dadak iṅgris walandi, nadyan ṅĕbroki kuṭa, tan bakal aṅukup, tan wuruŋ muhuŋ kinarya, lésanira bĕḍil miwaḥ bambu ruñciŋ, déniŋ muḍa prawira.
9. pra muḍa wus mumpuni kriḍaniŋ, ulaḥ gĕlar anèŋ pabaratan, tatag traṅginas tan tlompé, najan karoban muṅsuḥ, nora kéwran maḷĕs aṅgitik, ḍasar prantiné pĕpak, cukup kaṅgo ṅĕpuŋ, ṅaṅgo gĕlar ĕmpritnĕba, maṅgalané muḍa prawira tan wigiḥ, muṅsuhnya gila buyar.
10. balik kula wus tan muḍa maliḥ, anèŋ tĕṅaḥ garisiŋ papraṅan, èmĕŋ gènnya nañjakaké, atiné ṅĕjak maju, otot baluŋ nora nuruti, narima nèŋ puṅkuran, urun adas sĕmbur, gagamané kabatinan, paṅèṣṭiné iŋ gusti kaŋ maha sukci, udani jĕro jaba.
11. obaḥ osik kahuniṅan sami, iṅkaŋ ala srakaḥ ṅaṅsa aṅsa, tan wuruŋ kacurṇan kabèḥ, kaŋ ala tampi bĕndu, arda murka kadya si landi, maṅsa dadak wuruṅa, tartamtu binlĕṅgu, aṅumbar aṅkara murka, aṅrĕrusak karya ṛĕtu iŋ sabhumi, coba titèn titénan.
12. aja manèḥ wus tumindak juti, lagi gagas bahé wis kacurṇan, culika siya dipun ḍèŋ, maṅsa wuruŋ pinikut, pinidana déniŋ hyaŋ widdhi, ĕntinĕn sawatara, orané kok kliru, ṅèliṅi kriḍawasita, ḍĕḍĕr dosa ṅuṇḍuḥ papa pan wus paṣṭi, siniṅkur iŋ raharja.
2. paṅkur
1. pra muḍa dipun prayitna, najan sira iŋ lahir sampun wasis, ywa pisan watak kumiṅsun, éliṅa mulabuka, ananira sayĕkti siŋ rama ibu, aṅgatèkna aja waṅkal, kaṅgo saṅu iŋ ṅajurit.
2. najan sira nèŋ payudan, aywa wani ṅlirwakkĕn paṅabĕkti, sumuṅkĕm mariŋ hyaŋ aguŋ, rumasaa yèn titaḥ, pan sayĕkti apĕs luput darbèkipun, siŋ mĕṣṭi datan rumasa, marma mintaa akṣami.
3. pra muḍa dèn kawruhana, sañjatané pĕraŋ tan amuŋ bĕḍil, mortir miwaḥ métraliyur, granat bĕḍil mĕsinnya, motor mabur mriyĕm alit miwaḥ aguŋ, iku kabèḥ kalahiran, tan rampuŋ muŋ iku kaki.
4. gaman batin aywa tiṅgal, satuhuné ampuhnya gigirisi, datan abot bĕktanipun, tur datan karoṇḍahan, tan diñana ginémbol nora baṛĕñjul, pusaka tabon wétanan, yèn dèn èṣṭi tan ṅowani.
5. lamun arṣa migunakna, gaman batin kaŋ bisa aṅrampuṅi, kurdaniŋ muṅsuḥ kaŋ liwuŋ, sayĕkti nora béda, lawan gaman kalahiran prigĕlipun, linalatiḥ sabĕn dina, supaya tan miṇḍo kardi.
6. latihan miwaḥ glaḍènnya, wiwitana kulina ñumurupi, cacad tanapi luputmu, prasaja ywa lamisan, aywa kaṛĕm ṅumpĕtkĕn kaluputanmu, siŋ tĕguḥ miwaḥ santosa, kukuḥ bakuḥ ywa gumiṅsir.
7. pan iku dadalanira, lamun arṣa kaṅgonan luhur batin, sañjata pamuṅkas tuhu, bisa ñirṇakkĕn mĕṅsaḥ, iṅkaŋ aguŋ prakosa miwaḥ dibya nuŋ, cabar sakèḥ kasĕktènnya, luluḥ tanna dayanèki.
8. taṇḍiŋ sañjata wétanan, kaŋ wus atul nandukkĕn gaman batin, iŋ pundia papanipun, tan piliḥ dalu rina, sabĕn maṅsakala pan sagĕd rinasuk, ḍasar pinaṛĕṅkĕn tuhan, pinuṣṭi muṅsuhmu gĕndriŋ.
9. naṅiŋ aṅgèr wruhanira, gaman batin waḍahmu kudu sukci, sukci ṛĕṣik tĕgĕsipun, ṛĕṣik sakiŋ kaanan, kaŋ gumĕlar iŋ duñå ywa kapiluyu, paṅkat luhur dadi jéndral, iku pamuruṅiŋ ghaib.
10. nuṅgaŋ motor gĕbyar gilap, ñaṇḍaŋ bĕcik gamannya wus cumawis, samoré tan pisaḥ pistul, binkapé gilar gilar, pètci miriŋ gĕmbèlèŋ bañjur adiguŋ, sapa sira sapa iṅwaŋ, aṅgĕpé wus gigirisi.
11. naṅiŋ kaŋ antuk wĕwĕṅan, kasinuṅan sañjata kaŋ ghinaib, datan butuḥ ṅrèntèŋ pistul, samoré tĕluŋ ḍĕpa, karoṇḍahan lamun kapĕṅkok pakéwuḥ, lumayu tur gurawalan, pistul samoréné kèri.
12. marma sawusé siyaga, gaman lahir raṅkĕpĕn gaman batin, nadyan pĕḍaŋ miwaḥ pistul, bĕḍil mĕsin garanat, lamun sira iŋ batin nora tuwajuḥ, ati uwas ajriḥ pĕjaḥ, aluwuŋ ñiṅkira tĕbiḥ.
3. sinom
1. sinomé kaŋ duruŋ éklas, tiṅgal kabèḥ kaŋ kahèkṣi, gumĕlar nèŋ jagad raya, muṇḍak tiwas gawé isin, dudu watak prajurit, aluwuŋ ḍaṅira kimpul, yèn ñaṇḍuŋ siŋ wis tuwa, binakar rasané gĕmpi, kaṭik dadak pĕraṅan dolanan ñawa.
2. yèku watakiŋ woŋ sudra, mèlu grubyug aṅlĕboni, dadi prajuritiŋ préntaḥ, wus dilatiḥ sabĕn éñjiŋ, waḍuké diwaṛĕgi, disaṇḍaṅi raṅkĕp tĕlu, yèn libur gĕmbéléṅan, adol corèk turut margi, baṛĕŋ gilir maṅkat praŋ ṭok éṭok lara.
3. nampa gilir piŋ piṇḍonya, pamit manèḥ rada isin, yèn maṅkata bakal lara, yèn tan kabĕnĕran modir, kéwuhan iŋ pamikir, jroniŋ mlaku ati biṅuŋ, nèŋ marga wus kapapag, kañcané muliḥ ginilir, takṣiḥ gagaḥ prakosa rahiné biṅar.
4. dupi prapta iŋ palagan, saya gawok kaṇṭi miris, sanajan kañcané ḷĕkṣan, wus samya apacak baris, solahnya tiŋ bĕṭiṭit, wus siyaga baḍé nĕmpuḥ, warṇa warṇa trékahnya, ana gampèŋ ampiŋ ampiŋ, ana manèḥ aṅgrombol ṅrakit sañjata.
5. ana umpĕtan iŋ guwa, anusup tĕṅaḥ wanadri, muṅgaḥ mĕḍun juraŋ juraŋ, sawĕnèḥ grudug ṅĕjègi, kampuṅé woŋ aṅuṅsi, tinilar kori tinutup, baṇḍané dipun tilar, aboté ñiṅkiri pati, ṅéman umur goṇḍèli impèn ṅlĕmpara.
6. kampuŋ iṅkaŋ kĕbak baṇḍa, aḍakané dèn susuhi, nika dalaḥ clĕṅĕpira, ṅlimpé ṅiras ḍukir ḍukir, rajadarbé sakĕṭi, ginoṇḍol mampruŋ ñaŋ lahut, aṅgĕpé jaraḥ mĕṅsaḥ, taṇḍon paṅané woŋ cilik, dipun rayaḥ siŋ darbé dipun prajaya.
7. naṅiŋ ya wis paḍa paḍa, kañcané ḍéwé ṅalami, baṛĕŋ iṅgris miwaḥ nika, kaḍĕsĕg mundur ṅoñcati, susuḥ tiniṅgal gĕndriŋ, alihan mriŋ séjé kampuŋ, tan daṅu nuli prapta, motor mabur aṅudani, ĕbom bakar mimis métraliyur granat.
8. sasiṛĕpiŋ bom ĕboman, kurbané patiŋ galintiŋ, ginotoṅan mriŋ papannya, palaŋ méraḥ kaŋ wus mranti, kaŋ tatu miwaḥ mati, rinukti sacĕkapipun, sawusé ana taṇḍa, tĕṅara ṅlumpuk iŋ taṅsi, dipun rolis kañcané siŋ cicir pira.
9. patroli wiwit makarya, ṅupaya kaŋ duruŋ bali, talusupan golèk marga, tan kĕṇḍat mulat ṅulati, slamĕtiŋ lampahnèki, ywa koṅsi binégal muṅsuḥ, iŋ kono sumurupa, tiṅkahé si juru ḍaṅir, uṅkag uṅkĕg jĕbul ḍaṅir baṭaŋ mĕṅsaḥ.
10. mati katiṇḍihan blandar, juru ḍaṅir pañcèn drĕgil, pistul dalasan kaléwaŋ, péloré wus dibubuti, tumoliḥ ṅanan ṅériŋ, kamar kamar jĕblag sampun, baraŋ baraŋ sumĕbar, kaŋ rubaḥ riṅkĕs lan alit, tukaŋ ḍaṅir lali yèn dadi prawira.
11. kasĕnĕṅĕn kaliṭihan, milihi baraŋ di èdi, kaŋ gampaŋ klĕbu kamplékan, miwaḥ gampaŋ dipun caṅkiŋ, gĕṇṭéyot malaḥ ñuṅgi, ḷĕmpitan kamli lan klambu, ilaŋ sipatiŋ wira, bali wataké siŋ asli, yèku srakaḥ kandĕl maraŋ kamélikan.
12. adoḥ tĕmĕn slèwèṅira, ṅlurug pĕraŋ ṅaṅgo ñambi, aṇḍaṅir baṭaṅiŋ mĕṅsaḥ, ambubak kamariŋ loji, isiné akèḥ bĕcik, biṅuŋ gènñarṣa aṅusuŋ, jam taṅan raṅkĕp papat, sĕtiwĕl aṅgon kaplĕri, nuli digo najan dudu aṅgonira.
13. lèprim aṅgon juru tĕrbaŋ, tan sranta diĕṅgo wani, kahos taṅan upsir sĕtap, tur sĕlèn mĕkṣa kapéṅin, diaṅgo laḥ kuwalik, bĕtèké duruŋ tahu wruḥ, wé laḥ rada kĕplantraŋ, ṅrumpaka si juru ḍaṅir, luwuŋ bali ñurasa kriḍawasita.
4. asmaradana
1. kasmaran dayaniŋ batin, kinarya sañjata pĕraŋ, taṇḍiŋ sĕbaraŋ tan méṅo, yèku sañjata pamuṅkas, piandĕl gagarannya, aja ñĕpèlèkkĕn kulup, yèn tan ṅandĕl luwuŋ aja.
2. muṇḍak ṛĕkasa aṅlatiḥ, ḍasar akèḥ raṅkènira, tur kaḍaŋ saṅgané abot, apĕs apĕsé winaraḥ, amĕpĕr pĕpéṅinan, naṅgulaṅi hawa nĕpsu, yèku marga katĕntrĕman.
3. manèḥ kudu dèn lakoni, kalamun nora kaduga, ambĕnĕrké luputiŋ woŋ, aluwuŋ ṅĕṛĕmna mata, yèn wĕruḥ kañcanira, kaŋ wani tumindak luput, éṭok éṭok boya niṅa.
4. aywa saḥ aṅgonmu mikir, ñinahu ponaŋ sanépa, isiniŋ jagad pan kabèḥ, ginĕlar maṅka pralambaŋ, sira wus pinariṅan, pañcadriya pirantimu, budi pan sañjata mulya.
5. aja wani aṅakoni, bisa ṅuṅak iŋ suwarga, ginuyu wit iku goroḥ, aluwuŋ wiwit ñudaa, trĕṣṇamu mriŋ kaduñan, kèrĕm isi duñå iku, nĕmaha ḍĕmĕn kasasar.
6. najan sira jĕṅkaŋ jĕṅkiŋ, sĕmbahyaŋ iŋ sabĕn dina, koṅsi ḷĕgok sujudané, yèn salatmu mawa sĕdya, ñuwun mriŋ gusti allaḥ, dipèk mantu kaji brèwu, cikbèn bisa pĕṇḍokan mas.
7. ḍuḥ kulup aja ṅlakoni, salat sadina piŋ lima, aṛĕp kaṅgo grèṭèl pĕṇḍok, utawa gañjaran liya, apa bahé sinĕdya, péṅinané bisa kabul, salatmu kaṅgo sorognya.
8. gusti allaḥ maha sukci, kok aṅgĕp ḷĕmari blaka, kowé kaŋ gémbol sorogé, maṅkono yèn tan winĕca, sulap gĕbyariŋ duñå, pañcèn duñå susuhipun, ijajil aṅkara murka.
9. para muḍa dipun éliŋ, kasugihan yĕktinira, muhuŋ pariṅiŋ hyaŋ manon, manusa amuŋ sadarma, aṅgaḍuḥ paṅwasanya, kinèn ṅaṅgo urun urun, ṅuruni paḍaṅiŋ jagad.
10. yèku kaṅgo mituluṅi, sanak sadulur kataman, susaḥ kaŋ tan bisa mèṅèŋ, aja dadak pĕpétuṅan, cukĕŋ ṛĕṅkĕŋ binuwaŋ, baṇḍa yèn dèn umpuk umpuk, pan dadi susuhiŋ sétan.
11. kaŋ numpuk baṇḍa makĕṭi, muŋ kaṅgo butuḥ priyaṅga, kahilaṅan sipatiŋ woŋ, tĕtĕp dadi batur sétan, kaŋ nusuḥ iŋ baṇḍanya, isiḥ nékad amĕḍukun, baṇḍané bisaa tambaḥ.
12. ḍukun maṇṭuk maṇṭuk sarwi, mèsĕm gita gĕlar klasa, matané ṅiñcĕŋ lèḥ olèḥ, krĕnĕṅan miwaḥ buntĕlan, réṅkot isi maṅsakan, gula tèḥ dalaḥ sĕrutu, tĕrkaḍaŋ bĕras lan kĕtan.
13. ḍayohé wis kapiŋ kapiŋ, si ḍukun ṅrĕti wataknya, muridé kaṛĕm dioṅgroŋ, miwaḥ dipun suṅgar suṅgar, butuḥ muṇḍak sugihnya, iŋ batin kiyahi ḍukun, modar cocotmu tak garap.
14. bok ya aja uwis uwis, butuhé maraŋ wak iṅwaŋ, lumayan olèḥ olèhé, gĕṇḍiṅané ora mokal, aku mĕṣṭi kacoṅgaḥ, kaṛĕmé muŋ yèn diuguŋ, aku maṅsa gèk kéwrana.
15. waḥ muŋ trima diṛĕmbugi, ora jaluk néka néka, cukup bulpus mĕñan sĕtèŋ, laḥ iku nak anak iṅwaŋ, sira paḍa ṅrĕtia, woŋ ḍĕmĕn mĕḍukun iku, mahido awak priyaṅga.
16. yèn wis ahil lagi ṅrĕti, mĕḍukun piŋ piraŋ piraŋ, katraṅané sami mawon, kabèḥ muŋ apus apusan, siŋ tĕmĕn jĕbul laṅka, poma kaki dipun émut, pocuŋé kriḍawasita.
5. pocuŋ
1. sun pitutur supaya aywa kalantur, paḍa rasakĕna, lilimbaṅĕn kaŋ baṛĕṣiḥ, makṣiḥ muḍa dikaṛĕm ulaḥ subrata.
2. ṅudi kawruḥ kasuñatan mriḥ tuwajuḥ, minaṅka lambaran, mĕruhana ala bĕcik, aywa gampaŋ jinéguŋ iŋ nĕpsu apa.
3. watakipun woŋ ḍĕmĕn aṅumbar nĕpsu, kaṛĕm muni ala, golèk ḷĕganiŋ pamikir, tan praduli siŋ kruṅu kupiṅé lara.
4. kaŋ kadyèku tan siwaḥ lan ḷĕganipun, woŋ ṅisiŋ mĕṅkĕlaŋ, saya kaṛĕm muni sisip, golèk ḷĕga sasat ṅèṅèr margi tiñja.
5. dipun émut sira aṅgèr bocaḥ bagus, sĕjatiné duñå, iku ĕṅgoniŋ woŋ ṅimpi, raḥ arahĕn impènmu aja ṅlĕmpara.
6. paṅarahmu iku disranani laku, lakuné kulina, prasaja sabaraŋ kalir, pañci abot lamun duruŋ ṅulinakna.
7. yèn wus manuḥ salin kaŋ dipun sinahu, ṅĕblak samubaraŋ, cacadé tan dèn aliṅi, dipun gĕlar iŋ akèḥ ywa tiḍa tiḍa.
8. kaprahipun cacadé ḍéwé binuṅkus, aja kadĕnaṅan, iŋ liyan dipunbrukuti, jĕbulané isiḥ awas iṅkaŋ ñawaŋ.
9. watakipun lamun kalantur jur sliṅkuḥ, ṅaku putiḥ mĕmplak, maṅsa taṅgané maṅrĕti, sañatané wus mèḥ kĕbak sundukannya.
10. dituwajuḥ sabar kataman pakéwuḥ, kalamun cinoba, abotiŋ coba woŋ urip, yèku dipun pisaḥ lawan katrĕṣṇannya.
11. katrĕṣṇanmu nora liya yĕkti amuŋ, bojo miwaḥ anak, ḍasar cumpèn sarwa niji, gèk pinisaḥ sahiba rudahiŋ manaḥ.
12. iku duruŋ gaduk panĕmu kaŋ sampun, ṅrĕti tur ḷĕṅgana, yèn titaḥ iku upami, pinaṛĕṅkĕn niyaté lumuḥ palastra.
13. wruhanamu katrĕṣṇan iṅkaŋ tinĕmu, anèŋ ṅalam doñå, kajaba trĕṣṇa mriŋ gusti, iku goroḥ nora wuruŋ bakal sirṇa.
14. béda lamun trĕṣṇa maraŋ hyaŋ maha guŋ, patrapé ya béda, tan kĕna aṅrumasani, darbé kwasa muŋ sumaraḥ sakarṣèŋ hyaŋ.
15. apĕs luput riṅkiḥ dosa darbèkipun, titaḥ ṅarcapada, nalaṅsa wajibirèki, aja ḍaku ṅrĕsula miwaḥ aṅgrĕsaḥ.
16. gĕsaṅipun sumrambaḥ siŋ rila tuluŋ, mriŋ saminiŋ titaḥ, nĕtĕpi siŋ dadi wajib, wajib lahir iŋ batin wajib mriŋ allaḥ.
17. yèn wus atul kulina ṅèḍĕp hyaŋ aguŋ, yĕkti tan kaduga, mosik tumindak kaŋ sisip, tandaŋ tanduk muna muni ṅaraḥ araḥ.
18. pan puniku kĕna iṅaran tuwajuḥ, bisa kasinuṅan, darajad iṅkaŋ ghinaib, yèn wus sukci tampa ilhamiŋ paṅéran.
19. titikipun sujanma kaŋ wus añakup, muṅkur siŋ kaduñan, tan ana dipun gumuni, kaŋ dièṣṭi urun paḍaṅiŋ bhawana.
20. muŋ puniku woŋ salèḥ iŋ nikmatipun, rilan tur ḷĕgawa, nora cuwa sĕpĕn rugi, praptèŋ léna wus gambuḥ ḍasar sumaraḥ.
6. gambuḥ
1. nambuṅi kaŋ karuhun, rèhniŋ makṣiḥ sajroniŋ dahuru, kana kéné kataman iŋ propokasi, kiyanatiŋ woŋ kĕpahuŋ, dadi mata mata muṅsoḥ.
2. pra muḍa dipun sarju, maṅan kuraŋ ñaṇḍaŋ rada bluwus, ra orané maṅkono sajĕgé urip, batin ḍaṅan aja mĕsgul, sayĕkti datan bĕntoyoŋ.
3. pan iki cobanipun, dadi baṅsa kaŋ darbé paṅgayuḥ, luwiḥ luwiḥ iṇḍonésiaḥ puniki, upama woŋ sakit lumpuḥ, suṅsumé sinĕsĕp nipon.
4. pan lagi baṅĕtipun, duruŋ kantuk usada kaŋ mañjur, règèŋ règèŋ katrajaŋ séjé sasakit, sakit untu paminipun, tan matiri garoŋ garoŋ.
5. tan liya béṅkasipun, bĕtaḥ nahan ṅampĕt sĕnut sĕnut, untu lara jalarané saka aṅin, ora ta yèn ṅanti lampus, kajaba wus takdir layon.
6. wĕliṅku anak putu, aja grĕsaḥ nimbruŋ katut biṅuŋ, taḥ bĕtaḥna minaṅka bĕktimu kaki, ibu prĕtiwi darbèkmu, ṛĕgĕmĕn ywa koṅsi mrucot.
7. suwunĕn mriŋ hyaŋ aguŋ, ésuk soré siyaŋ miwaḥ dalu, ṅiras namur wĕtĕŋ pĕriḥ klambi aṅin, kaṇṭi sabar nrimèŋ kalbu, jinaṅkuŋ déniŋ hyaŋ manon.
8. mandiniŋ pañuwunmu, ora susaḥ mĕḍukun piŋ pitu, ati nrima sabar kaŋ maṅka piranti, rañcagé mawa sinĕruŋ, susukcia jroniŋ batos.
9. awit sayĕktinipun, sira iku kakus mlaku mlaku, turu liṅgiḥ dalèdèr ya gémbol najis, naṅiŋ tan dadi pakéwuḥ, béda susukĕriŋ batos.
10. tan ṛĕṣik déniŋ adus, ṅaṅgo sikat laṇḍa miwaḥ sabun, anukcèni sukĕriŋ batinmu kaki, iya tan dadak mĕḍukun, sun jarwani alon alon.
11. caṭĕtĕn jroniŋ kalbu, lilimbaṅĕn supayané ñakup, runtut tata lir tinata ṭarik ṭarik, yèn tan maṅkono tumpaṅsuḥ, apĕsé patiŋ saléyor.
12. kaŋ ḍihin kudu wĕruḥ, lamun sira tan pisaḥ ririḍu, gĕḍé cilik agal ḷĕmbut gĕnti gĕnti, aṅgoḍa ṅalaṅi laku, nuntun mriŋ paṅgawé awon.
13. yèku paṅgawénipun, éblis lanat ijajil kaŋ sampun, pinaṛĕṅkĕn iŋ gusti kaŋ maha luwiḥ, aṅgubĕl iŋ jasatipun, datan kinawruhan iŋ woŋ.
14. ṅuja sakgĕṇḍiṅipun, ṅaṅgo apa bahé dipun turut, gènnya ṅriḍu manusa tan diwatĕsi, kaŋ ginoḍa lamun nurut, dikiṇṭil praptaniŋ layon.
15. ijajil dunuṅipun, sakṣĕnĕṅé tan na ṅarubiru, sakiŋ bahut gawéné tansaḥ mĕméṅin, bisa mañjiŋ agal ḷĕmbut, kèwĕs luwĕs paminiŋ woŋ.
16. kalamun arṣa ṅriḍu, nora dadak ṅalimpé ṅuk aṅuk, nora piliḥ paṅgonan tanapi wañci, péṅinané kaŋ riniḍu, cumawis sakĕṅgon ĕṅgon.
17. sapa woṅé tan kèlu, dipun uja kaṛĕpé tinurut, ḍasar gandĕs luwĕs miwaḥ pĕrak ati, naṅiŋ sapa wus ḍinaḍuŋ, sinèrèt maraŋ juraŋ groŋ.
18. muṅguḥ sañatanipun, yèn sirarṣa wĕruḥ uṅgyanipun, radèn rara ijajil kaŋ tansaḥ kiṇṭil, ṅrukĕt iŋ pañcadriyamu, marma diawas sutèṅoŋ.
19. déné pañcadriyamu, salawasé ṅaliṅi anamu, ṅuwasani ragamu dipun kĕmuḍi, marmané titaḥ tan pĕcus, wĕruḥ dunuṅiŋ hyaŋ manon.
20. kajaba wus winahyu, gusti allaḥ kapaṛĕŋ pituluŋ, karṣa ṅégla ṅĕblak tanpa aliŋ aliŋ, naṅiŋ tan gampaŋ yèn duruŋ, gunayuha nora coṇḍoŋ.
21. kalamun arṣa gayuḥ, ṅambaḥ marga tumuruniŋ wahyu, añaḍaŋ antuk siḥ marmaniŋ widdhi, naṅiŋ ta duruŋ tinamtu, wahyu lir ṅambaŋ guméyoŋ.
7. maṣkumambaŋ
1. marganira wahyuniŋ dat kaŋ ghinaib, tan kĕna ginambar, pinĕṭa lir sriwĕdari, miwaḥ tan kadi grojogan.
2. nora mili gumliniŋ lir tukiŋ ardi, cumlorot lilintaŋ, kumilat byar kadya ṭaṭit, kumléyaŋ sakiŋ gagana.
3. cĕkakané kabèḥ tan ana kaŋ mirip, nora mantra mantra, wahyèku ñata ghinaib, margané ya kaghaiban.
4. mara kaki sun jarwani siŋ sakĕḍik, tan kĕna sĕmbrana, pikirmu kudu ñuwiji, yèn tan murṇi paṣṭi tuna.
5. iŋ sakawit sira mĕpakna piranti, pĕpak tĕgĕsira, ywa ana kaŋ ṅuciwani, samĕktakna kaṅgo mlampaḥ.
6. dé piranti kaŋ sinĕbut iku kaki, pañcadriyanira, pinĕṭa wĕlaḥ kĕmuḍi, pamĕlahmu ywa pĕpéka.
7. raganira kaŋ dadi palwa sadarmi, sinataŋ lumampaḥ, ṅanan ṅériŋ nut kĕmuḍi, muḍik milir tan suwala.
8. suwalané giyota yèn klĕbon wariḥ, borot sakiŋ ḍasar, yèn tan tinambal tumuli, kèrĕm pan dadi babaya.
9. mila wajib giyota dipun parṣudi, sabĕn maṅsakala, tinliti apa kaŋ ṛĕmpit, ḍĕmpulané sĕtitèkna.
10. déné sataŋ dalaḥ wĕlaḥ aywa kari, wajib dèn parikṣa, yèn aṛĕp kaṅgo sawañci, supayané datan ñamar.
11. iŋ samĕṅko palwa dalaḥ kaŋ piranti, samĕkta iŋ karya, tan ana kaŋ ṅuciwani, wus saḍiya nèŋ samodra.
12. apa iya prahu bañjur wira wiri, ṅambaḥ iŋ supitan, ujuŋ tĕluk miṅgir gisik, laḥ sapa kaŋ ṅlampahĕna.
13. sataŋ wĕlaḥ babaṛĕṅan nambut kardi, mĕṅku iŋ sakarṣa, tumrapiŋ palwa muŋ kari, nurut wondéné sok béka.
14. yèku lamun sataŋ wĕlahnya tan ḍamis, manuṅgal sakarṣa, karṣané si juru muḍi, montaŋ mantiŋ lampahira.
15. najan prahu sinawaŋ tan golaŋ goliŋ, tukaŋ sataŋ wĕlaḥ, diya diniya tan tuṅgil, prahuné tan lumakṣaṇa.
16. kompal kampul tan kèrĕm datan lumaris, maṅka nora kaṇḍas, naṅiŋ dayaniŋ piranti, sataŋ wĕlaḥ bèñcèŋ karṣa.
17. marmanira sawusé samya rumanti, juru sataŋ wĕlaḥ, kudu ana juru muḍi, yèku kaŋ maṅka panutan.
18. juru muḍi kaŋ maṅguŋ awas ṅulati, ombakiŋ samodra, lampahiŋ aṅin ta ugi, pinindĕŋ kaṇṭi prayitna.
19. éwadéné yèn wus tumĕkaniŋ takdir, kagunan paṅwasa , niŋ juru muḍi kaliṇḍiḥ, alun gĕŋ ṅuñcalkĕn palwa.
20. kaŋ giyota sataŋ wĕlaḥ juru muḍi, pisaḥ sowaŋ sowaŋ, tan bakal srawuṅan maliḥ, prahu suwuŋ kambaŋ kambaŋ.
21. juru muḍi kéntir madyaniŋ jaladri, tĕbiḥ kilèn wétan, glagĕpan rékané ṅlaṅi, untuŋ yèn diuntal lodan.
22. pan maṅkana gagambaraniŋ ṅahurip, woŋ tan darbé ṅamal, lahiré putiḥ jro kuniŋ, dudukwuluhé rasakna.
8. mĕgatruḥ
1. sasambaté juru muḍi minta tuluŋ, saḍéla ḍéla tan kèkṣi, wit kérut sajroniŋ alun, kontal ṅalor ṅidul tĕbiḥ, pupuntoné muŋ cumaḍoŋ.
2. kapaṛĕṅiŋ gusti kaŋ murbèŋ sawĕguŋ, kaŋ kuwasa bhumi laṅit, lindurané jroniŋ alun, tumuli dipun luwari, gragap ṅaḍĕp ṅarṣèŋ manon.
3. muriḥ gamblaŋ rada gampaŋ panampamu, impèn kaŋ dipun lampahi, nèŋ ṅarcapada ḍinapuk, ḍalaŋ wayaŋ miwaḥ kĕlir, kaŋ naṅgap niyaga bléñcoŋ.
4. iṅkaŋ naṅgap anèŋ buri kĕlir muṇḍut, lampahané ponaŋ riṅgit, ki ḍalaŋ sayĕkti saguḥ, wayaŋ binabar iŋ kĕlir, kĕlir paḍaŋ sakiŋ bléñcoŋ.
5. kyayi ḍalaŋ lan kaŋ naṅgap sampun jumbuḥ, sakaro wus dadi siji, niyaga cacaḥ sapuluḥ, tumindak wajib nabuhi, sawĕṅi dadi salakon.
6. déné wayaŋ mobaḥ dalaḥ ṛĕmbagipun, ki ḍalaŋ iṅkaŋ majibi, kuwasa murba myaŋ ḍapuk, ñolahkĕn kriḍaniŋ riṅgit, kaṅgo bubuṅaḥ kaŋ nonton.
7. kyayi ḍalaŋ tĕrkaḍaŋ bisa kalimput, ṅrèwès swara sakiŋ jawi, dilabuhi nilar baku, bakuniŋ pakĕm kaŋ paṣṭi, nuruti kaŋ paḍa nonton.
8. maṅkonowa sayĕkti nora kalantur, babasané tiṅgal kĕlir, sakĕḍap tumuli waṅsul, nurut pakĕmé sakawit, lumraḥ kaduk gènnya bañol.
9. dupi baṅun éñjiŋ lakoné wus rampuŋ, niyaga bubar ḍisiki, nora dadak tĕṅga ḍawuḥ, wit wus samya wruḥ iŋ wajib, atĕré pan tañcĕp kayon.
10. kyayi ḍalaŋ tan daṅu nuli sumusul, tiṅgal pirantiniŋ riṅgit, wayaŋ koṭak kĕlir kantun, lan kaŋ naṅgap tan pinaṅgiḥ, apadéné lan siŋ ṅĕgoŋ.
11. nora cukup muŋ karan ki ḍalaŋ lucu, antawĕcana ñukupi, gaṇḍaŋ gĕṇḍiŋ gĕṇḍĕŋ gĕṇḍuŋ, ḍasar bisa nuju pikir, wondéné dadi pitakon.
12. apa iya bisa mĕṅku kañcanipun, niyaga kabèḥ piranti, lamun ñata wus añakup, makṣiḥ siji kaŋ dèn udi, lawan kaŋ naṅgap patĕmon.
13. pan maṅkono tĕtĕp sampurṇaniŋ laku, kyayi ḍalaŋ wus pinaṅgiḥ, lan kaŋ naṅgap ñata gambuḥ, yèku loroniŋ atuṅgil, kinaṇṭi saĕṅgon ĕṅgon.
9. kinaṇṭi
1. nak anak dipaḍa émut, piwĕliṅku kaŋ nèŋ ṅarṣi, éliṅana mulabuka, ananira duk iŋ ṅuni, rama ibu lalantaran, sĕṅkĕran gènmu tumitis.
2. tumètès gya dipun kaṇḍut, iŋ guwa garbaniŋ bibi, laminira saṅaŋ candra, ibumu nama garbini, mara aṅgèr piyarṣakna, sĕmakĕn sajroniŋ ati.
3. apalanku trima lowuŋ, kinarya aṅgrénda pikir, sastrajéndra hayuniṅrat, wuryaniŋ wasitajati, jatiniŋ kaŋ tinarbuka, kawruḥ adi kaŋ piniṅit.
4. sastra tĕgĕsé pan kawruḥ, yèku paniṅal kaŋ wĕniŋ, arja minulya tĕgĕṣṇya, suci iŋ ananirèki, éndra panaṅgulaŋ samar, aṅlimputi saananiŋ.
5. sasiné kaŋ bhawana guŋ, yèku jatiniŋ ṅahurip, jumĕnĕŋ laṅgĕŋ priyaṅga, kaŋ kawasa pariŋ urip, kaŋ gumlar nèŋ jagad raya, saṅyaniŋ para dumadi.
6. yèku kaŋ wĕnaŋ sinĕbut, allaḥ taṅala sajati, kaŋ aṅguŋ mulya datira, kaŋ élok sipatirèki, kaŋ kawasa wicakṣaṇa, kaŋ adil muraḥ mriŋ dasiḥ.
7. wèḥ ayuniŋ rat sawĕguŋ, amarṇa sipat sakalir, kaŋ andum rahsaniŋ jagad, añamadi agal alit, iṅkaŋ wisésa asmanya, sampurṇa apṅalirèki.
8. tan ana iṅkaŋ ñakuṭu, jumĕnĕŋ urip pribadi, iŋ satuhuné dat sipat, asma apṅaliŋ hyaŋ widdhi, wus dumunuŋ iŋ kaanan, ananiŋ manuṅsa iki.
9. katitipan rasanipun, paṅéran kaŋ maha sukci, punika wahananira, datiŋ sastra kaŋ piniṅit, satuhu sosotyaniŋ rat, mĕṅku prasidaniŋ dadi.
10. arjaniŋ parasdya nulus, kaŋ kawasa amumpuni, saliriŋ rasa dumina, lalantaraniŋ ṅahurip, tumuruniŋ sastra cĕṭa, jumĕnĕŋ nugat ghinaib.
11. sakiŋ alamiŋ alimut, ghaibiŋ allaḥ sajati, tumitis iŋ daḷĕm rahsa, rahsaniŋ priya duk lagi, sĕṅsĕmiŋ asmaragama, pamoriŋ jalu lan èstri.
12. duk mĕḍar rahsaniŋ kakuŋ, ḷĕñĕp murcitaniŋ ṅakṣi, tiniyupiŋ kanikmatan, iŋ kono pamorirèki, datiŋ atma kaŋ wisésa, kadim sajatiniŋ urip.
13. amoriŋ dat lan rasèku, iṅaran wadi lan mani, tumiba iŋ guwa garba, acampuḥ kalawan madi, yèku rahsaniŋ wanita, kumpulé dadi sawiji.
14. aran manikĕm puniku, yèku wawaḍahiŋ urip, wujud siji catur aran, mani madi lawan wadi, manikĕm sakawanira, yèku wijiniŋ dumadi.
15. dadiniŋ manusa iku, sakiŋ catur warṇi siṅgiḥ, déné wiji kaŋ iṅaran, sariniŋ bhumi lan gĕni, miwaḥ sariniŋ maruta, sakawan paṭiniŋ wariḥ.
16. kaŋ samya iṅakĕn iku, lahiré sipatiŋ widdhi, wus wujud nèŋ catur warṇa, yèku baboniŋ jasmani, minaṅka sasaṇḍanira, abuniŋ roḥ kaŋ sajati.
17. abuniŋ roḥ tĕgĕsipun, baboniŋ ñawa sakalir, kaŋ ṅuripi sakèḥ rasa, iṅaran ñawa rohani, yèku tohjaliniŋ sastra, sipat cahya mukamadin.
18. mukamad iŋ tĕgĕsipun, wĕnaŋ sinĕmbaḥ pinuji, sisirahiŋ kanikmatan, rahsaniŋ bhawana yĕkti, satuhu sosotyaniŋ rat, nirmala maluya jati.
19. jatiné sapa iṅkaŋ wruḥ, ṛĕsminiŋ jagad puniki, minulya iŋ uripira, sinuŋ paḍaṅiŋ paṅgaliḥ, praptaniŋ pati sampurṇa, dumunuŋ iŋ swarga luwiḥ.
20. uripiŋ sukmanirèku, anuṅgal hyaŋ sukma jati, wus roro roroniŋ tuṅgal, tan kĕna iṅaran kaliḥ, iya uripiŋ kawula, satuhu uripiŋ gusti.
21. kawasa wisésanipun, kawula kalawan gusti, datan kĕna pinisaḥna, sampurṇa purwaniŋ dadi, laṅgĕŋ kahuripanira, si kombaŋ anèŋ swarga di.
22. anukmèŋ sagara madu, madu maduniŋ ṅahurip, kaŋ ñamadi jiwa raga, iya ragané pribadi, kikawasa marṇa sipat, sipatiŋ manusa iki.
23. dadi sakiŋ rahsa catur, kaŋ wus kawahya iŋ ṅuni, mani iku dadi rupa, madi uripé iŋ ati, wadi wadi ṅakal ñata, manikĕm ñawanirèki.
24. wujudiŋ catur warṇèku, kataṇḍa nèŋ nétra mami, manikĕm undĕriŋ nétra, mani iku dadi manik, wadi pamutiḥ iŋ tiṅal, déné kaŋ iṅaran madi.
25. uripiŋ nétranirèku, warṇa iṅarané siṅgiḥ, rahsaniŋ paniṅal ñata, puniku kaŋ aran madi, dé wiji kaŋ catur aran, sariniŋ bhumi pan wadi.
26. carmaniŋ manusa iku, sari gĕni dadya dagiŋ, sariniŋ aṅin dadya raḥ, paṭiniŋ bañu pan dadi, baluŋ myaŋ otot prasamya, sampurṇaniŋ wujud yĕkti.
27. kaŋ waḍag miwaḥ kaŋ alus, sakiŋ kodratiŋ hyaŋ widdhi, paḍa minaṅka warana, dadya sasaṇḍaniŋ urip, urip pinariṅan taṇḍa, rahsa kaŋ karasa sami.
28. pininta pinta pinatut, iŋ papan ĕmpanirèki, kabèḥ iku aran ñawa, ana jalu ana èstri, paḍa minaṅka bhuṣaṇa, lantaran karṣaniŋ widdhi.
29. marma kaŋ marṣudi kawruḥ, aywa na katuṅkul sami, dipun wruḥ iŋ saṅkanparan, saṅkanparaniŋ dumadi, paran praptaniŋ kasidan, wruḥ kasampurṇaniŋ pati.
30. laḥ baya ṅĕndi gènipun, paṅéran kaŋ pariŋ urip, dèn wruḥ sajatiniŋ ṛĕtna, jroniŋ cipta dèn kaliliŋ, akèḥ sotya maḍa rupa, aywa koṅsi salaḥ daliḥ.
31. titipan umurirèku, dèn katur mriŋ kaŋ nitipi, kabèḥ sagoloṅanira, guluṅĕn dadi sawiji, yèn wus gumoloŋ iŋ cipta, uliḥna purwaniŋ dadi.
32. ḍuḥ pra muḍa pamĕliṅku, aja kĕmba maca ṅliliŋ, isiniŋ kriḍawasita, supaya wiwit mĕruhi, laku jantraniŋ ṅagĕsaŋ, tan wuruŋ nĕmahi lalis.
33. rampuṅiŋ paṅaraṅipun, kriḍawasita ñaṛĕṅi, sĕnèn ḷĕgi kapiŋ saṅa, ruwaḥ jimawal kaŋ warṣi, sinaṅkalan swarèŋ arga, amakéwuhi nagari.
tamat.
séṅkalan : swarèŋ arga amakéwuhi nagari.
sĕnin ḷĕgi , 9 ruwaḥ 1877
