sami ñariyosakĕn kawruḥ kasampurṇan, kahimpun sarta kasĕkarakĕn ḍatĕŋ mas ṅabèhi maṅunwijaya.
1. ḍaṇḍaŋgula
1. kumawiku mamalat mamanis, aṅla ĕla kumalaniŋ nala, kaliṅan ṅaléla ḍéwé, mriḥ pambératiŋ giyuḥ, aṅruruhi wadiniŋ bhumi, maṅgyan madyaniŋ jagad, ṅuṅun ruṅsitipun, piliḥ kaŋ wikan kĕkĕran, tarlèn puja sĕmadi ĕnĕŋ lan ĕniŋ, aścarya pamoriŋ hyaŋ.
2. pan maṅkana karkatiŋ tyas naṅiŋ, andupara paran kalakonnya, lir pra wipra kaŋ pratamèŋ, parasja budyama nuŋ, witiŋ tuman kataman tistis, ri ratri sru rinoban, coba guŋ matimbun, dyan kajiyat jrit jroniŋ tyas, kaprawasa prandéné pakṣa aṅaṅgit, sumĕla tanpa ṅrasa.
3. marma dahad iŋ driya wiyadi, kaduŋ kaduk kadariŋ budaya, tanwun cinéda dadiné, déniŋ sru muḍa puṅguŋ, yun mimiṇḍa saŋ dwija kadi, kakonaŋ arṣa maḍa, paḍaṅiŋ sitèṅsu, yĕkti dahat tan tumimbaŋ, puwaramba muŋ miminta paṅakṣami, samuniŋ pasaŋ cipta.
4. dé kaŋ dadya kadarpaniŋ kapti, tarlèn sakiŋ kacaryan yun wikan, purwaniŋ dumadi kabèḥ, tĕmaḥ lalu maṅruruḥ, sarasaniŋ sastra maruṅsit, yasèŋ saŋ kawiswara, kaŋ wus kasarawuŋ, riŋ sĕrat suŋ pralampita, piniluta linutiŋ sĕkar mriḥ dadi, darṣanèŋ tyas mardawa.
5. kaŋ minaṅka purwakaniŋ ruwi, mamèt sakiŋ sarasèŋ supatra, kaŋ marṇa purwèŋ kadadèn, ḍiṅin wasitanipun, pustakadi hidayat jati, mèt sakiŋ wĕwĕjaṅan, kapiŋ dwi sinĕbut, wĕḍaran wahananiŋ dad, nukit sakiŋ kitab dakahikhal kahik, maṅkana kaŋ winahya.
6. sajatiné iṅsun dad kaŋ sukci, kaŋ amurba amisésèŋ jagad, kaŋ kawasa nitahaké, sawiji wiji wujud, dadi paḍa sakala sami, sampurṇa sakiŋ kodrat, lan iradat iṅsun, iŋ kono wus kañataan, prataṇḍané apṅal iṅsun iṅkaŋ dadi, bubukaniŋ iradat.
7. iṅkaŋ ḍihin iṅsun wus akardi, kayu aran sajratul yakina, tumuwuḥ anèŋ sajroné, iŋ alam adam makdum, ya ajali abadi nuli, cahya ran nur mukhamad, gya kaca sinĕbut, miratul khayahi nul, ñawa iya iṅaranan roḥ ilapi, gya damar winastanan.
8. kandil nuli sotya dèn wastani, daraḥ nulya iṅkaŋ ḍiṇḍiŋ jalal, aran kijab iku kabèḥ, wrananiŋ klarat iṅsun, dé artinya iṅkaŋ sayĕkti, khayu sajaratula, yakin kaŋ tumuwuḥ, jroniŋ adam makdum ika, lan ajali abadi urip sajati, tuwuḥ nèŋ tĕḷĕṅiŋ rat.
9. suñaruri makṣiḥ suwuŋ sĕpi, salaminya iŋ kahanan kita, iya iku kakékaté, dad muntlak iṅkaŋ aguŋ, ya ananiŋ asma sajati, dadi wahananira, ṅalam khadiyatu, kadwi aran nur mukhamad, wardinira iya cahya kaŋ pinuji, kacrita jroniŋ kitab.
10. warṇa kadi pĕhsi mĕrak muṅgwiŋ, jro sosotya kaŋ acahya séta, maṅgon nèŋ ṅaraḥ arahé, kaŋ kayu sajaratul, kakékaté cahya kaŋ wĕniŋ, iya ta jaliniŋ dad, kaŋ wajibul wujud, nèŋ nuṅkat ghaib minaṅka, sipatiŋ kaŋ atma dadya wahananiŋ, iŋ alam akhadiyat.
11. kaŋ kapiŋ tri mir'atul khayahi, liré kaca wiraṅi iyéka, kacarita jro kadisé, muṅgwiŋ saṅajĕṅipun, nur mukhamad iya kaŋ dadi, kakékatiŋ pramaṇa, ya rasèŋ dad iku, minaṅka asmaniŋ atma, iya iku iṅkaŋ dadi wahanané, iŋ alam wakidiyat.
12. kapiŋ catur kaŋ ran roḥ ilapi, jarwanira prataṇḍaniŋ ñawa, ñawa iṅkaŋ wĕniŋ ḍéwé, kocap iŋ kadisipun, asal sakiŋ nur mukhamadi, ya kakékatiŋ sukṣma, kaŋ iṅakĕn tuhu, kahananiŋ dad muntĕlak, pan minaṅka apṅalira atma dadi, wahanèŋ alam arwaḥ.
13. kapiŋ lima kandil dèn wardèni, iya dilaḥ kaŋ tanpa dahana, kacarita iŋ kadisé, warṇa sosotya nrawuŋ, mañcur lawan mañcoroŋ wĕniŋ, gumantuŋ tan caṇṭélan, yèku ananipun, nur mukhamad lan uṅgwannya, roḥ sadaya punika kakékatnèki, aṅĕn aṅĕniŋ janma.
14. kaŋ iṅakĕn wayaṅaniŋ widdhi, ya minaṅka ĕmbananiŋ atma, iya dadi wahanané, ṅalam misal puniku, kapiŋ nĕnĕm daraḥ lirṇèki, sosotya kacarita, jroniŋ kadisipun, darbé sorot mañcawarṇa, lawan sami kadunuṅan malékati, ya kakékatiŋ budya.
15. kaŋ iṅakĕn pahésaniŋ widdhi, ya minaṅka wiwaraniŋ atma, iya dadi wahanané, ṅalam ajĕsan iku, kapiŋ sapta kijab ya ḍiṇḍiŋ, jalal jarwanya ika, warana kaŋ aguŋ, kacarita jroniŋ kitab, mĕtu sakiŋ sosotya kaŋ mañcawarṇi, nalika mosikira.
16. aṅanakkĕn kaŋ warana katri, uruḥ kukus katrinira tirta, iya iku kakékaté, jasat kita iṅaku, warananiŋ dad kaŋ sajati, maṅka saṇḍaniŋ atma, ya wahananipun, ṅalam insan kamil ika, iya iku anané badan puniki, sampurṇa wujutira.
17. déné iṅkaŋ muni jroniŋ dalil, ḍiṇḍiŋ jalal iku kaŋ kajarwa, jro ijĕmak kiyas ṛĕké, papaṅkatan tĕtĕlu, uruḥ kukus katiga wariḥ, sajuganya pinĕraŋ, nigaŋ waranèku, ḍiṅis uruḥ aṅĕtokna, tĕluŋ paṅkat juga kijab kisma dadi, wahyèŋ jasat iŋ jaba.
18. iya iku kulit lawan dagiŋ, otot tulaŋ sapanuṅgalannya, kapiŋ dwi kijab rukminé, ya dadi wahwanipun, jasat iṅkaŋ nèŋ jro sakalir, kaya ta utĕk lawan, manik manaḥ jantuŋ, paru limpa sasaminya, katrinira kijab ṛĕtna iku dadi, wahyèŋ jasat kaŋ ḷĕmbat.
19. iya iku mani lawan gĕtiḥ, suṅsum lawan sapanuṅgalannya, baṅsaniŋ jasat kaŋ cuwèr, lan kapiŋ kaliḥ kukus, amĕtokkĕn tĕluŋ pakarti, sajuga aran kijab, pĕpĕtĕŋ puniku, dadi wahananiŋ napas, kĕdut lawan kaŋ gumrimiŋ kaŋ gumriṅgiŋ, sapanuṅgilanira.
20. kadwi kijab guntur dèn wastani, iya dadya wahyèŋ pañcadriya, tĕlu kijab dahanané, dadi wahyaniŋ napsu, iṅkaŋ kapiŋ katĕlu wariḥ, aṅĕtokaké tigaŋ, pakarti puniku, ya kijab bun toya gĕsaŋ, iku dadi kahanané sukṣma nĕṅgiḥ, kadwi kijab nur rasa.
21. iku dadi rahsa kaŋ kapiŋ tri, aran kijab nur wahya kaŋ paḍaŋ, dadi atma kahanané, déné kabèḥ puniku, tĕtĕp dadi waranèŋ widdhi, nèŋ insan kamil gwannya, iya tĕgĕsipun, kasampurṇaniŋ manuṅsa, marmanira aywa was sumĕlaŋ maliḥ, ya sira waranèŋ hyaŋ.
22. lawan maliḥ kabèḥ ananèki, kalaraté paṅéran kaya ta, kaŋ balé ṅaras kurṣiné, miwaḥ kaŋ lohkil makpul, kalam uwot sratal mustakim, taraju swarga nraka, lan niṣkaranipun, iṅkaŋ dumadi sanaya, bhumi laṅit lan sahisèn isènèki, sèsiniŋ trilokaya.
23. wus kawĕṅku ana sajĕroniŋ, waranèŋ hyaŋ iṅkaŋ sipat ĕsa, ya kahanan kita kiyé, nartani purbanipun, atma kita iṅkaŋ sajati, jati jati i, misésa sawĕguŋ, saguṅiŋ kahanan samya, mrataṇḍani iŋ kawasaniŋ pakarti, apṅaliŋ dad sampurṇa.
24. purṇa ponaŋ paṅapusiŋ tulis, kanaŋ sakiŋ jroniŋ pustakarja, ran hidayat jati déné, ṅuni iṅkaŋ manawuŋ, basa jarwa nukilan sakiŋ, kitab dakhahikhul khak, yéka swarginipun, dyan bèhi raṅgawarṣita, pujaṅgagĕŋ iŋ nagri surakartadi, muṇḍi agñèŋ srinata.
2. sinom
1. maṅkya maliḥ kaŋ winarṇa, waraḥ purwaniŋ dumadi, mèt sakiŋ surasanira, pustaka pramaṇa siḍi, karaṅanira saŋ sri, aji jayabaya prabhu, naréndra iŋ pamĕnaŋ, iya nagara kaḍiri, duk katamyan paṇḍita iŋ ṅĕrum praja.
2. awasta sèḥ maholana, ṅali samsujèn saŋ ṛĕsi, ḷĕṅgaḥ muṅgwèŋ palaṅgatan, suka sami imbal aṅliŋ, ṅlalar ḷĕṅiŋ luluṅit, koṅas ṅĕs aṅadu sĕmu, samantara saŋ natha, kaṛĕnan anon saŋ ṛĕsi, sakiŋ kèkṣi sarwa wasis saniṣkara.
3. tan antara saŋ paṇḍita, aṅambil kitab liniliŋ, saŋ natha aris tĕtanya, sĕrat punapa saŋ ṛĕsi, matur saŋ mahayogi, kitab musarar sinuhun, iṅgiḥ jaṅkaniŋ jaman, kaŋ sampun kalakyan tuwin, iṅkaŋ dèrèŋ kalakyan sampun kacĕṭa.
4. sanadyan iŋ jaman jawa, sampun kajarwa iŋ ṅriki, ṅantos praptaniŋ wĕkasan, sri naréndra duk miyarṣi, kasĕṅsĕm arṣa ṅèkṣi, sarasaniŋ kaŋ satuhu, lan minta puruhita, waṣkiṭa jaṅkaniŋ bhumi, saŋ paṇḍita matur ḍuḥ saŋ narèswara.
5. laṅkuŋ sayogya punika, naṅiŋ iṅgiḥ dèrèŋ kéṅiŋ, mĕnawi paduka natha, iṅgiḥ dèrèŋ ṅuniṅani, mriŋ purwaniŋ dumadi, ghaibiŋ kahanan saguŋ, saŋ prabhu aṅandika, mĕṅgaḥ purwaniŋ dumadi, punapa kaŋ kawrat sĕrat jitapsara.
6. tumuruniŋ kaalusan, punapa kaŋ muñèŋ tulis, ran sĕrat widyakirana, sastra harjéndra tanapi, ran sastracĕṭa tuwin, boḍa gotama saŋ wiku, saŋ paṇḍita lon mojar, ḍuḥ ḍuḥ saŋ sri narapati, rèḥ kawula punika baṅsa iŋ arab.
7. sayĕkti dèrèŋ uniṅa, surahosiŋ sĕrat jawi, suwawi ta jinarwakna, warahé sasiki siki, riṅkĕs kéwala saŋ sri, supadya amba sumurup, kéṅiŋ maṅka pipiṇḍan, pundi iṅkaŋ aṅgĕpoki, dados ombèr pambabariŋ balabaran.
8. saŋ natha dahad kaṛĕnan, kasiṅgihan saŋ ayogi, makatĕn wuryaniŋ sĕrat, jitapsara duk iŋ ṅuni, hyaŋ nur cahya winisik, ḍatĕŋ marasĕpuhipun, ratuniŋ jin maldéwa, jujuluk prabhu nur adi, duk iŋ ṅuni dèrèŋ wontĕn paran paran.
9. makṣiḥ waṅwuŋ tawaŋ towaŋ, aran jagad soñaruri, tanpa kéblat tanpa prĕnaḥ, kajawi cahyaniŋ widdhi, murup maṅkara kèkṣi, wujud agni warṇinipun, jĕnar biru lan ṛĕkta, hyaŋ dahanam dèn wastani, kacarita punika gĕsaŋ priyaṅga.
10. tan wontĕn kaŋ gĕsaṅana, daṅu daṅu ponaŋ agni, mahya hawanya kawuryan, wujud sipatiŋ sujanmi, kakaliḥ dèn wastani, saŋ hyaŋ martyujiwa laju, kumukus kukus nulya, jumĕnĕŋ gatraniŋ janmi, nèŋ jro kukus kaṇṭa janma srira cahya.
11. lir damar kuruŋ kalihnya, kawasa awawan aṅliŋ, kaŋ sajuga darbé cahya, biru brit dipun wastani, saŋ hyaŋ ardayan tuwin, saŋ marijan ajujuluk, saŋ jan asipat priya, kaŋ sajuga cahya kuniŋ, sipat kĕña winastan saŋ damariŋ dyaḥ.
12. iṅgiḥ winastan marijaḥ, nulya kĕmpal dadya swami, tantara saŋ jan marijaḥ, samya masĕnĕnan kosik, liru sorot wor sari, samantara rahsanya wus, warṇa ro kakuŋ kĕnya, kaŋ priya ran saŋ bahniñji, kaŋ wanodya winastan saŋ hyaŋ bahniñcaḥ.
13. ugi samya raga cahya, wasta jan bahnu jan kaliḥ, sakala apulaŋ jiwa, sabĕn kosiḥ paworṣari, iṅgiḥ amahanani, iŋ warṇa wĕkasanipun, susuta baranahan, wujudipun warṇi warṇi, wontĕn iṅkaŋ wujud jatiniŋ manuṅsa.
14. wonkĕn warṇa bĕr ibĕran, warṇa sato khéwan tuwin, warṇa ulam loḥ kalawan, kéwan kaŋ rumaṅkaŋ sami, déné ta saŋ jan ṅuni, sakĕmbaran ananipun, dadya yun uyunannya, para sutanya pribadi, ajujuluk saŋ raja damaradian.
15. nulya karan ĕjin dadya, sasĕbutan kawan warṇi, jan banu jan alijañjan, dupi wus antara lami, saŋ jin apalakrami, ḍahup lawan waṅsanipun, lulut akaron jiwa, saŋ jin nulya asĕsiwi, kĕmbar jalu wujud sipatiŋ manuṅsa.
16. kaŋ sajuga cahya jĕnar, winastan saŋ andajali, kaŋ sajuga cahya séta, winastanan saŋ idajil, karan sétan lirṇèki, déné darbé cahya piṅul, dupi sampun diwasa, nulya samya palakrami, saŋ idajil pinuñjul sabaṅsanira.
17. satĕmaḥ murtat tan arṣa, ṅratu mriŋ marijan saŋ sri, wĕkasan amĕmĕṅsahan, idajil uṅgul iŋ jurit, yèku purwaniŋ ṅuni, wontĕn natha maṅun pupuḥ, naṅiŋ kala samana, kaŋ maṅka gamaniŋ jurit, iṅgiḥ amuŋ paṅabaran dahanarda.
18. saŋ jan banu jan alijan, sirṇa samadyaniŋ jurit, mulya apulaŋ dahana, maṅkana saŋ hyaŋ idajil, laju jumĕnĕŋ aji, gĕntosi marijan juluk, saŋ sultan abumaraḥ, maṛĕm wus maṅun kamuktin, lama lama saŋ abumaraḥ bésanan.
19. lawan kadaṅnya priyaṅga, kaŋ nama saŋ andujali, dadya baṅsaniŋ sèluman, déné ta iṅkaŋ amakṣiḥ, darahnya saŋ jan ṅuni, nĕrahkĕn pra jawataguŋ, gya nurunkĕn manuṅsa, tĕlas cariosiŋ tulis, ririṅkĕsan sakiŋ sĕrat jitapsara.
20. dadya tĕraŋ duk iŋ kina, agni kaŋ wontĕn rumiyin, déné gĕsaṅiŋ manuṅsa, sakiŋ napsu purwanèki, marma lamun ṅĕmasi, iṅkaŋ sirṇa napsunipun, gya tan pĕjaḥ salama, mantuk mriŋ purwaniŋ ṅuni, tĕlas turṇya saŋ prabhu ji jayabaya.
21. matur saŋ sèḥ maholana, ḍuḥ ḍuḥ saŋ sri narapati, surahosiŋ jitapsara, kaŋ sampun kawahya sami, dèrèŋ mantra gĕpoki, ḍatĕŋ nukat ghaibipun, wit makṣiḥ ḍa capuran, déné ghaibiŋ hyaŋ widdhi, tanpa warṇa botĕn mawi dĕḍapuran.
22. lamun sampun mawi warṇa, sampun lan kaŋ karya warṇi, saŋ prabhu alon ṅandika, lamun makatĕn saŋ ṛĕsi, punaparṣa maṅran mriŋ, ṅalam soñaruri suwuŋ, matur saŋ yogiswara, paran ta sri narapati, sampun nama ṅalam tĕkarṣa pinaṅran.
23. ḷĕgĕg saŋ sri naradipa, koḍĕŋ kawĕṅkèn iŋ galiḥ, saŋ paṇḍita awas mulat, gya matur sarwi maripiḥ, ḍuḥ ḍuḥ saŋ sri bupati, sampun juḍĕgan iŋ kalbu, sahèstu amba iṅkaŋ, arṣa nraṅkĕn kaŋ patitis, rèḥ paduka sampun karṣa puruhita.
24. anaṅiŋ paminta amba, mugi paduka saŋ aji, karṣa andumugèkĕna, sarasèŋ sĕrat iŋ ṅarṣi, bok wontĕn kaŋ gĕpoki, lawan ghaibiŋ hyaŋ aguŋ, natha maluyèŋ sabda, iṅgiḥ sayogya saŋ yogi, pan makatĕn pucuṅiŋ widya kirana.
3. pocuŋ
1. duk iŋ daṅu makṣiḥ suwuŋ awaŋ uwuŋ, pan amuŋ swasana, iṅkaŋ jumĕnĕŋ rumiyin, nulya wontĕn hyaŋ surya candra kartika.
2. tiganipun gya samya mubĕŋ gumuluŋ, ñakra maṅgiliṅan, amahyakkĕn daya sami, saŋ hyaŋ surya aṅĕdalkĕn daya panas.
3. giḥ puniku jumĕnĕŋ alusiŋ latu, hyaŋ candra ṅĕdalna, daya bun alusiŋ wariḥ, hyaŋ kartika daya srĕp alusiŋ bajra.
4. daya tĕlu gya awor dadya sawujud, wus nuṅgil kahanan, nulya sinĕbut trimurti, jarwanipun kaalusan tigaŋ warṇa.
5. daṅu daṅu sariniŋ trimurti mĕtu, aran tripurusa, kawasa umĕsat mariŋ, ṅantarikṣa gumantuŋ tanpa caṇṭélan.
6. mĕnĕŋ namuŋ sinaṅga swasana suwuŋ, nèŋ trimurti nulya, kumriṅĕt dadya wé wĕniŋ, aṅĕṅuwuŋ winastan tirta prawita.
7. tĕgĕsipun kaalusanirèŋ ranu, gya kaŋ tirta maya, jalantaḥ tumètès dadi, jalaniḍi tĕgĕsipun toya wantaḥ.
8. daṅu daṅu ponaŋ jalaniḍi mĕtu, ṛĕṛĕgĕté dadya, bantala iṅaran bhumi, bhumi nulya mubĕŋ ñakra maṅgiliṅan.
9. guŋ gumuluŋ dalasan kaŋ samodra guŋ, dupyantara lama, mĕtyakkĕn tuwuhan tuwin, kutu kutu alaŋ taga néka warṇa.
10. lawan tuwuḥ pĕlikan sawarṇinipun, sosotya mas slaka, wĕsi rasa timaḥ sari, lan kuniṅan waliraŋ séla ṛĕjasa.
11. daṅu daṅu tripurusa kaŋ gumantuŋ, samadyèŋ akasa, akĕkĕl kumulit nuli, tumurun mriŋ bantala tantara lama.
12. pĕcaḥ wujud kaliḥ sipat manuṅsa nuŋ, jalu lan wanodya, jumĕnĕŋ wijiniŋ janmi, yéka nabi adam lawan babu kawa.
13. kalihipun gya wor sasmita salulut, tantara puputra, traḥ tumĕraḥ praptèŋ maṅkin, titi ponaŋ surasèŋ widya kirana.
14. dé kaŋ kasbut sastra jéndra riṅkĕsipun, asaliŋ manuṅsa, iṅgiḥ siŋ kawan prakawis, siŋ swasana surya candra lan kartika.
15. dupi sampun sampurṇa manuṅsanipun, béñjaŋ wusananya, iṅgiḥ sakiŋ pat prakawis, atas titis tatas putus artinira.
16. atas ruhur titis awas tatas rampuŋ, putus babar pisan, wontĕn pat prakara maliḥ, ran sampurṇa ḷĕṅit layap luyup ika.
17. sampurṇèku babar puliḥ lir iŋ daṅu, ḷĕṅit alus lirṇya, layap laku jarwanèki, luyup ilaŋ sirṇa wus tan kasat mata.
18. kajĕṅipun sampurṇaniŋ manuṅsèku, puliḥ kaalusan, sirṇa ambabarpisani, babarpisan nuṅgil hyaŋ kaŋ mahamulya.
19. déné lamun buḍa gotama saŋ wiku, makatĕn gañcarṇya, mĕṅgaḥ purwaniŋ dumadi, asalira tarlèn sakiŋ tigaŋ warṇa.
20. kaŋ ḍiṅin nur kaŋ dwi rasa katri urup, nur punika cahya, rasa tĕgĕsipun gĕtiḥ, déné urup iṅgiḥ urip jarwanira.
21. madyanipun jalma supadya sumurup, panuṅgiliŋ tiga, purbawisésa sa iṅgiḥ, purba uwit wisésa wĕnaŋ sa tuṅgal.
22. kajĕṅipun manuṅsa wĕnaŋ sahèstu, nuṅgal lan witira, tĕlas paṅandikèŋ saŋ sri, saŋ paṇḍita dahad ṛĕna amiyarṣa.
23. nulya matur manuhara ḍuḥ saŋ prabhu, duk amba miyarṣa, sarasaniŋ sĕrat kaliḥ, sastrajéndra myaŋ sĕrat buḍa gotama.
24. kalihipun ragi prayogi sinuhun, sampun magĕpokan, anaṅiŋ dèrèŋ pratitis, margi makṣiḥ sami warana sadaya.
25. dunuṅipun makṣiḥ nèŋ madya sadarum, wontĕn pralampita, gĕsaṅipun alam sahir, sami koḍok aṅĕmuli ĕlèṅira.
26. déné iḍup iŋ alam kabir saŋ prabhu, punika caṇṭoka, kinĕmulan ĕlèṅnèki, laḥ sumaṅga pundi ta iŋ ñatanira.
27. malihipun paran ta paṅañcasipun, pundi kaŋ caṇṭuka, kinĕmulan lèṅnya maliḥ, muliḥ mulya maluyèŋ alamé lama.
28. duk saŋ prabhu myarṣa turṇya saŋ awiku, kéwraniŋ wardaya, rumahos saṅĕt katitiḥ, iŋ wusana ṅandika rum mamèt prana.
29. ḍuḥ saŋ wiku paran ta iṅkaŋ kadyèku, kula dèrèŋ duṅkap, wosiŋ alam kabir sahir, laḥ suwawi kadunuŋna kaŋ sañata.
30. mèsĕm maju saŋ ṛĕsi sarwi umatur, sumaṅga saŋ natha, kapaṛĕṅa anampèni, karṇa kériŋ amba matur jatinira.
31. saŋ sinuhun mèṅlèŋ gya winisik sampun, jatiniŋ agĕsaŋ, palaṣṭa satata maliḥ, maṅgut ḍĕku sri naréndra wus widagda.
32. rumaṅsa wus sampurṇa manuṅsanipun, wrin purwaniŋ ana, waspada madyané titi, waṣkiṭa mriŋ paṅañcasiŋ kawusanan.
33. tĕlas sampun ririṅkĕsan kaŋ kasĕbut, iŋ siḍi pramaṇa, maṅkya gantya kaŋ winarṇi, wosiŋ sĕrat pañca pranawa: asmara.
4. asmaradana
1. déné awinarṇèŋ tulis, warahé pañca pranawa, muŋ duk hyaŋ guru tĕtakèn, mriŋ ṛĕsi kanékaputra, bab purwaniŋ dumadya, kadya kaŋ sampun kasĕbut, iŋ sĕrat paramayoga.
2. duk anèŋ madya jaladri, hyaŋ guru nabda: purwanya, cahya gya agni katriné, bantala nulya maruta, gaṅsalira samodra, hyaŋ jagatnata andaṅu, maṅkya paran ñatanira.
3. hyaŋ naraḍa matur aris, ḍuḥ saŋ hyaŋ jagadpratiṅkaḥ, yèn makatĕn sahèstuné, baḍé ḷĕpat iŋ paṅañcas, déné maṅran kahanan, béñjaŋ sisip sĕmbiripun, manukṣmèŋ téja waṅkawa.
4. déné atur amba ṅuni, sadèrèṅé wontĕn cahya, wontĕn swara gĕṇṭa kĕlèŋ, liripun saguŋ kahanan, kèṣṭi iŋ kajatosan, déné kajatèn puniku, sayĕkti wontĕn kaana.
5. kaŋ minaṅka sakṣi janmi, iṅgiḥ jagadiŋ manuṅsa, yĕkti tan wontĕn bédané, kaliyan jagadiŋ dunya, mila babasanira, duk cahya dèrèŋ kadulu, pan sampun wontĕn suwara.
6. apiṇḍa gĕṇṭa kĕkĕliŋ, iṅgiḥ makatĕn jarwanya, swara punika jatiné, iṅgiḥ ñawa déné gĕṇṭa, punika jatinira, kaṇṭa kĕkĕlèŋ pukulun, tĕgĕsipun dudunuṅan.
7. dados bawa dunuṅnèki, pan iṅgiḥ wontĕn iŋ kaṇṭa, kaṇṭa samar pradikané, samar ghaib artinira, déné ghaibiŋ paṅran, sumaṇḍèŋ kahanan saguŋ, babasannya warṇa rupa.
8. mĕmbuhi sipatiŋ warṇi, tan araḥ tan papaṅgénan, ṅlimputi saguŋ dumados, aṅandika tanpa lésan, pan iṅgiḥ muhuŋ bawa, ganda tanpa grana muhuŋ, purba: myarṣa tanpa nétra.
9. muhuŋ waṣkiṭa: miyarṣi, tanpa karṇa muŋ wisésa, amaṅrahos tanpa rahos, muhuŋ nĕŋ ĕniŋ dyatmika, dé kosok waṅsulira, purwaniŋ ana sahèstu, sakiŋ ora saṅkanira.
10. witiŋ lahir sakiŋ batin, witiŋ ramé siŋ ĕnĕṅnya, witiŋ gumlar sakiŋ koṭoŋ, naṅiŋ sampun iṅĕñcĕpan, yèn namuŋ tawaŋ towaŋ, tanpa wusana pukulun, babasan maṅran kumaṇḍaŋ.
11. wosipun sirik mĕnawi, mawi nampik amiliha, yèn nampik kaparan tĕnbé, punapa iṅkaŋ ginĕlar, tan ginuluŋ lir lama, kalamun miliḥ pukulun, punapa botĕn uniṅa.
12. lamun saguŋ kaŋ dumadi, sakiŋ ghaib asalira, marma paṅarahé tĕmbé, sampun ṅantos kasamaran, ḍatĕŋ salir kahanan, iṅaṅkaḥ ywa koṅsi korup, malaḥ iṅgiḥ ṅurupana.
13. kèndĕl aturṇya saŋ ṛĕsi, hyaŋ guru sru kapiṛĕnan, ṅrahos kapraptan karṣané, dènira salir kaŋ éyaŋ, saŋ hyaŋ ad amakina, ṅratoni manuṅsa saguŋ, rumahos yèn wus waṣkiṭa.
14. muŋ samantĕn dènnya mĕṭik, surasèŋ pañca pranawa, maṅkya maliḥ kaŋ cariyos, mèt sakiŋ sarasèŋ sĕrat, iñjil purwèŋ dumadya, duk makṣihé awaŋ uwuŋ, bhumi laṅit duruŋ ana.
15. muŋ pĕtĕŋ kaŋ ana ḍiṅin, naṅiŋ allaḥ kaŋ kawasa, pan wus aṅrĕm anèŋ jĕro, sajroniŋ pĕtĕŋ limĕṅan, nulya ñipta papaḍaŋ, byar nuli ana kadulu, surya candra lan kartika.
16. nulya ñipta bhumi laṅit, nulya wijiniŋ dumadya, manuṅsa tanapi sato, ñajoḍo gya asĕsuta, lama lama branahan, tĕlas gwan amba maṅimpun, ruwiya purwèŋ dumadya.
17. puwara lamun pinikir, mirit surasaniŋ sĕrat, mĕṅgaḥ purwaniŋ dumados, wasitèŋ pra kawiswara, buda ṅarab éropaḥ, tan wontĕn prabédanipun, muŋ nuṅgil misaḥ kéwala.
18. tarlèn purwaniŋ dumadi, siŋ trimurti saṅkanira, saŋ trimurti pinaṅkané, siŋ surya candra kartika, tĕtĕp tri warṇa maṅka, wawakilira hyaŋ aguŋ, amarṇa saguŋ kahanan.
19. naṅiŋ pustaka sakalir, kaŋ sampun kajarwèŋ ṅarṣa, duruŋ ana kaŋ cariyos, yèn surya candra kartika, ika wujud punapa, muŋ sakiŋ surasanipun, supatra pustakadarya.
20. liré layaŋ kaŋ kinañciŋ, muṅgwiŋ tĕḷĕṅiŋ wardaya, ṅuni iku pusakané, saŋ hyaŋ nur cahya iŋ kina, mriŋ putra hyaŋ nur rasa, tumrun mriŋ hyaŋ wĕnaŋ laju, hyaŋ tuṅgal hyaŋ jagadnata.
21. winasita jroniŋ wisik, wisik jatiniŋ agĕsaŋ, gĕsaŋ iṅkaŋ gĕsaŋ ḍéwé, mahyakkĕn sajatinira, warṇa kahanan tiga, maṅkana iṅkaŋ winuwus, jatiniŋ hyaŋ bagaṣkara.
22. bahni jiwa dèn jarwani, gĕni urip awor rasa, adarbé cahya mañcoroŋ, kawasa suŋ daya panas, dadi babon wahana, kaliḥ kaŋ candrama wujud, tirta marta artinira.
23. iya iku bañu urip, wor rasa adarbé cahya, umañcur asrĕp dayané, jumĕnĕŋ baboniŋ toya, katri kartika ika, bayu atma tĕgĕsipun, aṅin urip kalimputan.
24. iŋ rasa cahyanya wĕniŋ, ugi asrĕp dayanira, dadi babon marutané, katrinya maṅka utusan, nira kaŋ sipat ĕsa, dérarṣa marṇa sawĕguŋ, marma duk kahanan tiga.
25. baṣkara candrama katri, kartika sampun dumadya, kĕna prabawèŋ yyaŋ manon, gya katrima nawuŋ kriḍa, mubĕŋ ñakra giliṅan, nèŋ cakrawala gumuluŋ, samya amahyakkĕn daya.
26. saŋ hyaŋ surya dayanèki, panas alusiŋ dahana, saŋ hyaŋ candrama dayané, ĕbun dadya lusiŋ toya, hyaŋ kartika dayanya, asrĕp alusirèŋ bayu, ponaŋ daya tigaŋ warṇa.
27. gya awor dadya trimurti, sariniŋ trimurti dadya, wijiniŋ manuṅsa kiyé, kadya kaŋ kawahyèŋ ṅarṣa, naṅiŋ kahuniṅana, sarèhniŋ trimurti amuŋ, maṅka waranèŋ hyaŋ sukṣma.
28. laḥ iŋ maṅkya iṅkaŋ pundi, jatiné saŋ hyaŋ kawĕkas, wĕkas wĕkasiŋ dumados, ulatana dèn kapaṅgya, aywa ṅuṅun kéwala, tabĕria aṅgĕguru, mriŋ sujana wicakṣana.
29. lawan dèn talatèn niti, caritaniŋ sastraarja, karaṅané pra kinahot, kaŋ samyamot pralampita, sasmita wosiŋ gĕsaŋ, yogya kinarya panuntun, kadya kaŋ kawahyèŋ ṅarṣa.
30. akèḥ kalamun winilis, pustaka yĕyasanira, pra ruhur iṅkaŋ kinahot, para nabi waliollaḥ, pra ṛĕsi yogiswara, iŋ kina dènnya suŋ tuduḥ, mriŋ putra séwayanira.
31. supadya ywa koṅsi lali, kalimput iŋ tyas aṅkara, kaṛĕnan kaṛĕm karamèn, kèrĕm karamatiŋ dunya, kinĕmat kanikmatan, lalu kalulun tyas limut, tan mamriḥ rahmatiŋ wuntat.
5. paṅkur
1. suwawi ta piyarṣakna, sarasaniŋ supatra kaŋ nuntuni, maṅayuḥ ayuniŋ layu, yéka duk jaman purwa, ḍahyaŋ druna caṅkriman lan saŋ binagus, bambaŋ partadéwa kuna, ya hyaŋ kamajaya ṅuni.
2. saŋ partadéwa wacana, laḥ bataṅĕn suwawi suwal mami, pundi ta tĕtĕḷĕṅipun, bantala lawan tirta, aṅĕn agni swara sĕdya rupa iku, saŋ ṛĕsi druna narbuka, jagad tĕtĕḷĕṅiŋ bhumi.
3. tĕḷĕṅiŋ tirta samodra, awaŋ awaŋ iku tĕḷĕṅiŋ aṅin, srĕṅéṅé tĕḷĕṅiŋ latu, guḍug tĕḷĕṅiŋ swara, yèn tĕḷĕṅiŋ sĕdya kasĕnĕṅan kulup, tĕḷĕŋ rupa kawujudan, saŋ partadéwa maṅsuli.
4. laḥ saŋ ṛĕsi bataṅan ta, sampun mèmpĕr naṅiŋ dèrèŋ pratitis, laḥ punapa bédanipun, bantala lawan jagad, dèrèŋ ñamlĕŋ déné ta pratitisipun, tĕḷĕṅiŋ banta jasat, mila jasat dèn wastani.
5. dadya tĕḷĕṅiŋ bantala, déné nulya kaana wujud jisim, ṅĕmot ricikaniŋ iḍup, awit asaliŋ jasat, yĕkti sakiŋ sariniŋ bhumi puniku, dadya adĕgiŋ manuṅsa, déné tĕtĕḷĕṅiŋ wariḥ.
6. andika bataŋ samodra, dèrèŋ maṅgèn punapa ta iŋ ṅuni, duk dèrèŋ wontĕn jladri guŋ, datan wontĕn udaya, dé samodra amuŋ kumpulaniŋ ranu, déné ta sajatinira, rahsa tĕtĕḷĕṅiŋ wariḥ.
7. mila rahsa iṅaranan, tĕḷĕṅiŋ kaŋ tirta déné dumadi, wujud mrataṇḍani iḍup, awit asaliŋ gĕsaŋ, yĕkti sakiŋ sariniŋ toya sawĕguŋ, lawan tĕḷĕṅiŋ maruta, saŋ ṛĕsi amardikani.
8. awaŋ awaŋ dèrèŋ mapan, wit punika muŋ kumpulaniŋ aṅin, sajatiné tĕḷĕṅipun, maruta iṅgiḥ napas, milanipun napas punika sinĕbut, dados tĕḷĕṅiŋ maruta, wit dadya taliniŋ urip.
9. tĕḷĕṅiŋ latu binataŋ, diwaṅkara yĕkti dèrèŋ patitis, punapa mĕnawi dalu, botĕn wontĕn dahana, bagaṣkara amuŋ kumpulaniŋ latu, déné ta sajatosira, napsu tĕtĕḷĕṅiŋ agni.
10. myaŋ tlĕṅiŋ swara binataŋ, gluḍug iṅgiḥ dèrèŋ méñcok punapi, biliḥ tan wontĕn galuḍug, tan wontĕn swara liyan, sajatiné tĕḷĕṅiŋ swara paṅruṅu, wit yèn pĕpĕt pamyarṣanya, tan ana swara kapyarṣi.
11. tĕḷĕṅiŋ sĕdya binataŋ, kasĕnĕṅan punika dèrèŋ maṭis, punapa iṅgiḥ kalamun, tan wontĕn sĕdyaniŋ tyas, datan wontĕn kaŋ dados sĕnĕṅiŋ kalbu, wosipun tĕḷĕṅiŋ sĕdya, iṅgiḥ panarimèŋ galiḥ.
12. wit panrima mĕṅku sĕdya, isbatipun ĕnĕŋ amĕṅku osik, tĕḷĕṅiŋ rupa dinumuk, wujud kita punika, dèrèŋ ñamlĕŋ laḥ punapa bédanipun, rupa lawan kawujudan, jatosipun tĕḷĕṅnèki.
13. rupa punika pramaṇa, milanipuna pramaṇa dèn wastani, dadya tlĕṅiŋ rupa wujud, déné pramaṇa dadya, pitĕdahan anané rurupan saguŋ, tan wruḥ mariŋ kawujudan, yèn tan wontĕn pramaṇaniŋ.
14. tĕlas cacaṅkrimanira, baṅbaŋ partadéwa kaŋ samya myarṣi, pra natha pra nanarya guŋ, samya nabda manawa, ḷĕṛĕs baṅbaŋ partadéwa aṅgènipun, andunuṅakĕn bataṅan, nulya ṛĕsi druna gĕnti.
15. amĕḍarkĕn cacaṅkriman, ana swara anaṅiŋ tanpa warṇi, binataŋ puniku gluḍug, lan rupa tanpa swara, iṅgiḥ arca punika pradikanipun, lan wujud tan kĕna pĕjaḥ, dipun pradikani wariḥ.
16. caṇṭuka ṅĕmuli lèṅnya, dèn tarbuka yéka sipat ṅlimputi, mriŋ ĕdad dumunuṅipun, wontĕn iŋ alam dunya, lawan ĕlèŋ aṅĕmuli khoḍokipun, binataŋ punika ĕdad, aṅlimputi sipatnèki.
17. dumunuŋ alam dĕlahan, taṅgal pisan sampun purṇamasiḍi, punika pradikanipun, babariŋ alam mulya, ṛĕsi druna rumaṅsa katitiḥ laju, mundur aris palarasan, pinĕgad gantya winarṇi.
6. mĕgatruḥ
1. wontĕn maliḥ pralampitaniŋ pituduḥ, yéka duk jayaséna ji, dadya brahmana nĕnamur, amĕjaŋ mriŋ garwanèki, dèwi darmi saŋ lir sinom.
2. sutèŋ ajar darmahita kaŋ mawiku, iŋ wukir kérata ṅuni, saŋ dyaḥ warṇéndaḥ pinuñjul, kaṛĕmĕné ulaḥ ṅèlmi, ṅraras rèḥ kamulyèŋ layon.
3. pamisiké srana wuluḥ wuṅwaŋ laju, sinuṅkĕn mriŋ garwanèki, kinon ṅiñcĕŋ ḷĕṛĕsipun, mastakanira saŋ aji, saḷĕbĕtiŋ murda katon.
4. kadya wontĕn balé kinĕmbar kalaṅkuŋ, asri mawa cahya putiḥ, sru maya maya kadulu, lan wontĕn wiwara kaliḥ, nèŋ ṅarṣa kèkṣi ṅalowoŋ.
5. éṇḍaŋ darmi sru ṅuṅun nulya umatur, iŋ raka ḍuḥ paran marmi, tĕka balé dwi dumunuŋ, nèŋ mastakanta puniki, raka nabda ḍuḥ riniṅoŋ.
6. umatura iŋ rama saŋ maha wiku, sayĕkti tan madal sumbi, dudunuṅan kaŋ kadyèku, saŋ ṛĕsi wacana aris, babo sutaniṅsun ḍénok.
7. wruhanamu muṅguḥ prakara puniku, yĕkti wajib priyanèki, wanodya wus bĕnĕripun, pruhita mriŋ priya nini, nĕtĕpi babasaniŋ woŋ.
8. aran guru laki krana lahiré wus, nuṅgal rasa karoṅron siḥ, batiné wor rasa tuhu, saŋ manamur sampun tampi, sasmitèŋ marṣĕpuḥ kahot.
9. dyan saŋ namur pariŋ dudunuṅanipun, yayi kawruhana maṅkin, balé kĕmbar kaŋ dumunuŋ, jro kapala iku yayi, tiñjomaya swarga kahot.
10. iya iku kayaṅané saŋ hyaŋ guru, paṅañcasé pra maharṣi, kaŋ katrima bratanipun, ṅiŋ duruŋ waṣkiṭèŋ ṅèlmi, paḍa maṅgon anèŋ kono.
11. éṇḍaŋ ḍarmi duk miyarṣa laṅkuŋ kuwur, gènira ñurasèŋ ati, nulya umatur riŋ kakuŋ, ḍuḥ ḍuḥ guru nadi mami, paran tĕka laṅkuŋ élok.
12. déné muŋ saŋ bhuwana balik pukulun, kaŋ kapraḥ manuṅsa sami, kaŋ dèn èṣṭi saŋ hyaŋ guru, tĕka punika kuwalik, hyaŋ guru kayaṅan maṅgon.
13. kapalaniŋ manuṅsa prasasatipun, lot lotan lowé puniki, ṅoŋ minta dunuṅanipun, saŋ namur ṅandika maliḥ, babo miraḥ ariniṅoŋ.
14. bĕnĕr sira anaṅiŋ ta ariniṅsun, sira dèn saranta ḍiṅin, kayaṅan iku tĕtĕlu, dadi misiḥ kuraŋ kaliḥ, iŋ jaja lan baga ḍénok.
15. marma maṅkya sĕmproṅĕn maniŋ riniṅsun, dyaḥ darmi ṅèstokkĕn nuli, dèn ḷĕṛĕṣkĕn jaja laju, wruḥ balé kajĕnar kaliḥ, saya sru ṅuṅun iŋ batos.
16. saŋ brahmana suséna gya ṅandika rum, wruhanta balé kakaliḥ, kaŋ nèŋ jro ḍaḍa yahiku, ṅéndraloka dèn wastani, kayaṅan luwiḥ kinahot.
17. ya swargané bhaṭara éndra riniṅsun, paṅañcasé pra narpati, kaŋ tan patitis iŋ kawruḥ, iŋ béñjaŋ katrimanèki, amuŋ dumunuŋ nèŋ kono.
18. nulya sĕmproŋ iṅiñcĕṅkĕn baganipun, iŋ raka wontĕn kahèkṣi, balé ijo nom sumunu, dahad kacaryan saŋ dèwi, gya saŋ namur manabdalon.
19. wruhanira balé ijo kaŋ dumunuŋ, anèŋ jroniŋ baga yayi, yahiku kayaṅanipun, baṅsa jin lan pra sujanmi, kaŋ katrima nukṣmèŋ kono.
20. éṇḍaŋ darmi maliḥ umatur riŋ kakuŋ, ḍuḥ guru nadiṅoŋ yĕkti, sun trusiŋ tyas sĕtya tuhu, maṅkya iṅgiḥ mugi mugi, pariṅa pituduḥ yĕktos.
21. kĕplasipun dudunuṅan kaŋ sahèstu, dé paduka dèn dunuṅi, kayaṅaniŋ jawataguŋ, kaŋ raka wawajar ririḥ, wruhanira ariniṅoŋ.
22. iya iku kawruḥ kantĕpaniŋ iḍup, sajatiné raga iki, dèn arani jagad aguŋ, kaŋ dadi taṇḍané baṅkit, aṅglar paṅawikan kahot.
23. kaŋ amĕtu saka paṅwasaniŋ kalbu, dé jagad kaŋ gumlar iki, pan jagad cilik sinĕbut, amarga wuwuḥ iŋ warṇi, ṅaṅgo antara katoṅton.
24. prataṇḍané kabèḥ lan sarana iku, ṭukulé kalawan wiji, lan jagadiŋ manuṅsèku, amĕṅku triloka yayi, iya gon tĕluŋ wĕwĕṅkon.
25. kaŋ adadi warananiŋ uripipun, ĕṅgoniŋ cipta paṅèṣṭi, ṅiŋ kabèḥ iku kawĕṅku, kwasané kahanan jati, marmanta ywa kabĕsturon.
26. amaṅéran mriŋ rurupan kaŋ kadulu, luput yèn maṅkono yayi, karana jatiniŋ iḍup, wus kasrira sarira tri, ḷĕkĕt anèŋ raga maṅgon.
27. anaṅiŋ ta lamun ṅĕṅkokana luput, déné sisilahanèki, iŋ urip aywa aṅaku, iŋ pati ṅakuwa urip, urip iṅkaŋ murbèŋ layon.
28. yèn iŋ urip aṅĕṅkoki lan aṅaku, kasiku mriŋ kaŋ mĕṅkoni, iŋ agama lawan kukum, yèn iŋ pati aṅukiri, kawruhé kaliru ĕṅgon.
29. tĕmaḥ kuwur surupané sasar susur, ĕmbuḥ ĕmbuḥ kaŋ dèn èṣṭi, lir kiñjĕŋ tanpa pandulu, ibĕré ṅubĕṅi laṅit, ṅalayaŋ nèŋ ṅalam koṭoŋ.
30. dé marmanta dumunuṅé saŋ hyaŋ guru, muṅgwèŋ kapalaniŋ janmi, nèŋ utĕk kayaṅanipun, iku muŋ pralambaŋ yayi, jatiné pramaṇaniŋ woŋ.
31. iku iṅkaŋ binasakkĕn saŋ hyaŋ guru, wit pramaṇa iku dadi, guruniŋ aṅga sakojur, prataṇḍané yèn maṛĕṅi, pramaṇanta ḷĕṛĕm ḍénok.
32. aṅganira milu ḷĕṛĕm nuli turu, yèn pramaṇanira taṅi, raganta ya milu wuṅu, sahobaḥ osikiŋ ḍiri, pramaṇa kaŋ maṅka pandom.
33. marmanira kayaṅaniŋ pramanèku, aran téñjomaya yayi, déné iŋ kono puniku, kaṅgonan kaŋ cahya wĕniŋ, lan maniŋ para kinahot.
34. amastani guruloka tĕgĕsipun, guruniŋ jagadirèki, gon paniti ala ayu, pramaṇa kaŋ milaḥ miliḥ, sakiŋ palawaṅan loro.
35. iṅaranan mata iya tĕgĕsipun, paṅĕmotaniŋ sakalir, iṛĕŋ baŋ kuniŋ lan piṅul, kamot anèŋ nétra yayi, lan iṅaran saŋ hyaŋ manon.
36. dé bhaṭara éndra marmanta dumunuŋ, nèŋ jaja tĕgĕsé yayi, yèku karṣa: wit karṣèku, ya dadi ratuniŋ ḍiri, maṅrèḥ iŋ raga riniṅoŋ.
37. prataṇḍané yèn karṣanta ḷĕṛĕm wastu, raga ṅalumpruk tan osik, kayaṅanira sinĕbut, ṅéndraloka liré yayi, ratuniŋ jagad riniṅoŋ.
38. lan iŋ kono ana palawaṅanipun, kèhé loro dèn arani, ati kalawan jajantuŋ, kalawan ampĕru yayi, déné karṣa iku ḍénok.
39. akayaṅan anèŋ tĕḷĕṅiŋ jajantuŋ, lawan kĕna dèn arani, saŋ hyaŋ ĕsa tĕgĕsipun, iya iku kaŋ piniji, utawa tuṅgal saĕṅgon.
40. katĕluné saŋ hyaŋ jin marma dumunuŋ, ana iŋ baganiŋ janmi, tĕgĕsé rahsa riniṅsun, sabab rahsa iku dadi, kahanané badaniŋ woŋ.
41. prataṇḍané yèn rahsanta pĕpĕt maṣku, nora nuwuhaké wiji, dadiniŋ jiwa sahèstu, sakiŋ rahsa asalnèki, lan tĕgĕsé rahsa ĕṅgon.
42. kanikmatan kaŋ ĕmat kalaṅkuŋ laṅkuŋ, kayaṅané dèn arani, iŋ janaloka liripun, jagadiŋ manuṅsa yayi, wiji mani kaŋ dadi woŋ.
43. ya iṅaran hyaŋ nur rasa tĕgĕsipun, rasa iṅkaŋ bisa urip, kumpulané kabèḥ mahu, iṅaran triloka yayi, tĕgĕsé jagad tĕluŋ gon.
44. iya uga winastanan ṅalam tĕlu, lawan iṅaranan maniŋ, sukṣma purba kadwinipun, sukṣma wisésa kapiŋ tri, sukṣma ruhur ariniṅoŋ.
45. paḍa sakiŋ trimurti jumĕnĕṅipun, sasari tĕtĕlu yayi, gĕni aṅin lawan bañu, naṅiŋ gĕni mahu yayi, iya dudu gĕni tunon.
46. lawan dudu gĕni diyan iṅkaŋ murup, dudu gĕni paṇḍé wĕsi, lan dudu baḍiyaŋ maṣku, gĕni sirat sasariniŋ, saŋ hyaŋ surya kaŋ sumorot.
47. iya iku wahanané dadi napsu, déné aṅin iku yayi, iya dudu aṅin lésus, dudu aṅin kaŋ sumilir, dudu kaŋ ṅobahké kayon.
48. lawan dudu aṅin ububan puniku, aṅin sorot sasariniŋ, sosĕkiŋ kartika maṣku, iya iku iṅkaŋ dadi, napasira ariniṅoŋ.
49. déné bañu mahu iku iya dudu, bañu mili sakiŋ kali, dudu bañu samodraguŋ, dudu bañu sĕṇḍaŋ bĕlik, dudu tĕṛĕsaniŋ kayon.
50. dudu bañu padasan lan bañu sumur, dudu bañu udan yayi, iya dudu bañu umbul, ṅiŋ bañu sĕnĕniŋ sasi, kaŋ dadi rahsa kawiyos.
7. mijil
1. marmanira tĕlu iku yayi, kaŋ sawĕnèhiŋ woŋ, aṅarani brama barunané, lawan bajra sawĕnèḥ mastani, a: oma: mĕnawi, riniṅkĕs paran um.
2. kèndĕl dènnya misik saŋ apĕkik, marṣĕpuḥ nabdalon, pasmon sumèḥ mor èsĕm wuwusé, aḍuḥ radèn yèn makatĕn yĕkti, surahosiŋ ṅèlmi, pan sadaya jumbuḥ.
3. lan wasitanira saŋ maharṣi, yogiswara kahot, iṅkaŋ kawrat iŋ darmasoñané, yèn purwaniŋ dumadi puniki, sakiŋ samadyaniŋ, ṅawiyat witipun.
4. winastanan ṅuma ditya karti, pradikané kaŋ wos, ṅuma saŋ hyaŋ asoman tĕgĕsé, iṅgiḥ wulan ditya jarwanèki, hyaŋ surya lan maliḥ, karti tĕgĕsipun.
5. apan iṅgiḥ kartika saŋ pĕkik, katrinya wor sorot, lan kawarti katiga swargané, ḷĕt ĕḷĕtan tri atus paṅèkṣi, purwaniŋ trimurti, iṅgiḥ sakiŋ ṅriku.
6. kaŋ winastan kaalusan katri, lamun kĕmpal dados, gĕsaṅipun pra dumados aṅgèr, lamun pisaḥ iṅgiḥ aṅgĕsaṅi, jawi ḷĕbĕt mèsi, trimurti sahèstu.
7. andikanya saŋ namur laḥ iṅgiḥ, asami kémawon, kaŋ pralambaŋ tan wontĕn bédané, wasitanya pra pratamèŋ ṅèlmi, muhuŋ sakiŋ muriḥ, moñcèrakĕn kawruḥ.
8. ṛĕsi darmahita duk miyarṣi, wacanèŋ saŋ anom, maṅgut lawan nabdalon ḍuḥ aṅgèr, kasiṅgihan andikanta yĕkti, tĕmaḥ amimbuhi, kĕkahiŋ paṅrĕṅkuḥ.
9. amuŋ éṇḍaŋ darmi dèrèŋ tampi, kĕplasiŋ surahos, makṣiḥ raṅu raṅu tyas kawĕkèn, apuwara umatur iŋ laki, ḍuḥ ḍuḥ saŋ binaṅkit, guru nadi ulun.
10. iŋ samaṅkya rahosiŋ tyas mami, duk tampi pasĕmon, wosiŋ kawruḥ malaḥ sru kawĕkèn, pundi iṅkaŋ kawula ugĕmi, pundi kaŋ tinampik, ñuwun jatosipun.
11. priyotama dupi amiyarṣi, aturṇya saŋ sinom, mèsĕm sarwi wacanana aṅgèr, wruhanira anané hyaŋ widdhi, nora rupa warṇi, tan kĕni dinulu.
12. nora gatra tan kĕna dinugi, uga nora maṅgon, ṅiŋ mimbuhi sumrambaḥ iŋ kabèḥ, kĕbak jroniŋ bhuwana ṅèbĕki, iya aṅĕlèbiḥ, iŋ tĕḷĕbiŋ kalbu.
13. ṅiŋ kwasané wus anèŋ sirèki, kaya ta: yèn anon, tanpa nétra: muŋ nétranta nikèn, kaŋ kinarya niṅali sakalir, lamun amiyarṣi, tanpa karṇa maṣku.
14. muŋ karṇanta kaŋ siniliḥ dadi, pamyarṣèŋ hyaŋ manon, yèn manabda tan mawa lésané, ya lésan ta kaŋ kinarya aṅliŋ, yèn aṅganda yayi, ya grananta iku.
15. kaŋ kinarya ṅuswa arum manis, kalawan rumahos, saduruṅé karasa iŋ tyasé, tĕgĕsira kaŋ aṅrasa yĕkti, ya karṣanta yayi, karṣané hyaŋ aguŋ.
16. wus maṅkono kéwala ri mami, wĕḍaraniŋ rahos, sayĕkti wus kawawas uwosé, éṇḍaŋ darmi sakala wus tampi, wisikaniŋ laki, kabèḥ wus kacakup.
17. tyasnya paḍaŋ piṇḍa purṇamaniŋ, basanta katoṅton, kadya sampun antuk nugrahané, sampun ilham tan samar pamoriŋ, hyaŋ wasésa tuṅgil, iŋ kahananipun.
18. dyan matur riŋ raka lan patitis, ḍuḥ déwataniṅoŋ, yèn makatĕn paṅéran jatiné, yĕkti wontĕn jatosiŋ ahurip, kaŋ raka duk myarṣi, ya manabda arum.
19. lawan mĕṅkul luṅayaniŋ swami, babo miraḥ iṅoŋ, ya maṅkono naṅiŋ ta: na aṅgèr, ywa kinira yèn urip kaŋ mosik, sajatiniŋ urip, kaŋ mĕniṅniŋ maṣku.
8. maskumambaŋ
1. purṇa ponaŋ wasitanira saŋ aji, srijayamiséna, mriŋ garwanya éṇḍaŋ darmi, maṅkya iṅkaŋ winurṣita.
2. duk iŋ ṅuni sri kusumawicitra ji, natha binaṭara, iŋ daha iṅgiḥ kaḍiri, nuju luṅgwèŋ palaṅgatan.
3. iṅaḍĕp mriŋ wasi wisumba lan patiḥ, myaŋ saŋ sicagana, aṅrĕmbag kriḍaniŋ nagri, paḷĕṣṭaniŋ paṅguṣṭika.
4. sri naréndra nulya aṅandika aris, hèḥ wasi wisumba, séjé kaŋ iṅsun rasani, bab kawruḥ ananiŋ swarga.
5. paran tĕka ana ditya muṅgaḥ swargi, yèn maṅkono apa, nora nana bédanèki, danawa lawan manuṅsa.
6. saŋ wisumba umatur ḍuḥ saŋ siniwi, sampun kapiéram, mriŋ ditya kaŋ miṅgaḥ swargi, sajatosipun punika.
7. iṅgiḥ namuŋ swarganiŋ ditya pribadi, tan nuṅgil manuṅsa, muhuŋ wontĕn saṅaṇḍapiŋ, canélanya saŋ hyaŋ kala.
8. dados amuŋ wontĕn kaalusanèki, iŋ hawa kéwala, hawa punika sayĕkti, prabawèŋ napsu kéwala.
9. yèn tumitis karya darudahiŋ kapti, lir mĕntas anéndra, utawi piṇḍa sujanmi, kaŋ prapta sakiŋ wisata.
10. manahipun pĕtĕŋ kĕdaḥ muriŋ muriŋ, butĕŋ tan sarantan, punika tan liyan sakiŋ, klĕbĕtan alusiŋ hawa.
11. tumusipun tuwuḥ kanĕpsoniŋ kapti, sahèstu prabéda, kaliyan swarganiŋ janmi, lamun swarganiŋ manuṅsa.
12. iṅgiḥ amuŋ wontĕn iŋ gĕsaŋ sajati, gĕsaṅiŋ dumadya, kaŋ nartani awal akir, jumĕnĕŋ wahyu dyatmika.
13. kawitipun siŋ sarèḥ saranta kapti, santa lan santosa, myaŋ rila ḷĕgawa éliŋ, pranawa lawan waspada.
14. kosokwaṅsulipun iṅkaŋ miminihi, sasariŋ kamukṣan, nĕpsu goyaŋ supé tuwin, maṅu mèṅlèŋ amaṅiwa.
15. punika kaŋ ṅéwahkĕn dyatmikèŋ kapti, anĕnarik maraŋ, panasaraniŋ paṅèṣṭi, tan tumĕkèŋ kalaṅgĕṅan.
16. déné sasar tan muŋ mriŋ dĕlahan gusti, nadyan marcapada, mĕnawi tan awas éliŋ, iṅgiḥ ugi praptèŋ sasar.
17. kawitipun kaŋ dados durgamèŋ kapti, dora mélik cidra, anaṅsaya kaṛĕm tuwin, lumuḥ lan kĕsèt suṅkanan.
18. dora cara nirṇakkĕn tĕmĕniŋ kapti, mélik narik maraŋ, supé wĕkasan kasarik, kakaṛĕman maṅgihĕna.
19. lumuḥ maṅgiḥ kaboḍohan kiraŋ budi, kĕsèt maṅgiḥ cuwa, maṅsuli witiŋ sayogi, kaŋ mriḥ rahayuniŋ cipta.
20. mriḥ ḷĕstari kalakṣitaniŋ dumadi, saranta amaṅgya, wĕniṅiŋ manaḥ mĕnawi, rila amaṅgiḥ kamulyan.
21. èṅĕt maṅgiḥ papaḍaṅiŋ manaḥ gusti, yèn manahnya paḍaŋ, lan wĕniŋ jasaté suci, kapraptan saciptanira.
22. awit tĕrus lahir batosipun ṛĕsik, sèstu kadunuṅan, waspada waṣkiṭèŋ budi, déné waspada punika.
23. sumĕṛĕp mriŋ kahanan kaŋ katon lahir, sumaṇḍa iŋ nétra, waṣkiṭa punika uniŋ, saliriŋ kaŋ kabatosan.
24. pan sumaṇḍa wontĕn saḷĕbĕtiŋ galiḥ, kéṅiŋ winastanan, sampun nuṅgil kwula gusti, iŋ sasolahbawanira.
25. mobaḥ mosik kasinuṅan kwasa gusti, kèndĕl aturira, wasi wisumba saŋ aji, saṅĕt sukaniŋ wardaya.
26. wit sakala kadyaṅaniŋ ṅilo carmin, cĕṭa wéla wéla, kaŋ dadya rubédaŋ budi, miwaḥ marganiŋ kamulyan.
27. apuwara sri naréndra ṅandikaris, é wasi wisumba, baṅĕt panarima mami, kabèḥ pralampitanira.
28. nadyan iṅsun muni wus ḍĕḍasar ṅèlmi, sirèku minaṅka, sasaṅliŋ déné mimbuhi, paḍaṅiŋ pramaṇaniṅwaŋ.
29. lan rumasuk iŋ rasa praṅrasa mami, sun sĕṅguḥ wisikan, balik iŋ mĕṅko sarèhniŋ, uripé wus rinaṅgonan.
30. kahanané iŋ dĕlahan mĕṅko lagi, saka paṅgrayaṅan, wit duruŋ ṅlakoni mati, paran paman siḍagana.
31. paman iṅkaŋ sampun ṅlampahi ṅĕmasi, duk praŋ lawan ditya, raja baṇḍura iŋ ṅuni, paran layap liyĕpira.
32. wĕḍaṛĕna supadya kéṅiŋ binudi, lan dadya paṅlimbaŋ, tĕpuṅé kaliyan ṅèlmi, matur ṛĕsi siḍagana.
33. ḍuḥ sinuhun rèhniŋ pĕjaḥ amba ṅuni, pĕjaḥ siŋ kadadak, sakiŋ paṅintĕn mĕnawi, sanès lan pĕjaḥ saranta.
34. lamun pĕjaḥ saranta punika saŋ sri, yèn sampun waṣkiṭa, iŋ panĕṅran kaŋ sayĕkti, paṅracut kukutanira.
35. sahèstunya antan antan siŋ sakĕḍik, wasana sirṇanya, sayĕkti mawi antawis, saṛĕŋ kaŋ pĕjaḥ dadakan.
36. sanalika muŋ kados kinĕbat saŋ sri, ṅiŋ rèhniŋ kawula, sampun anaṅsuli ṅèlmi, iṅgiḥ botĕn was sumĕlaŋ.
37. botĕn samar ḍatĕŋ kahananiŋ paṣṭi, nalika kĕplasnya, lir tiyaŋ wuru branduwin, pramaṇa bliwur byar byaran.
38. gya katiṅal pañca ṛĕtna mrabawani, cahya cĕmĕŋ ṛĕkta, jĕné pĕṭak miwaḥ wilis, naṅiŋ sarèhniŋ kawula.
39. iṅgiḥ sampun sumĕṛĕp prawitanèki, botĕn amba manaḥ, patiḥ byantara nambuṅi, ḍuḥ saŋ dwija paran tĕka.
40. wontĕn iṅkaŋ katiṅal amañcawarṇi, ṛĕsi siḍagana, apĕpajar mriŋ kya patiḥ, cahya kaŋ cĕmĕŋ punika.
41. gĕsaṅipun gĕgrĕmĕtan radèn patiḥ, laḥ iṅgiḥ punika, ṅalam pĕtĕŋ dèn wastani, yèn korup iŋ ṅriku béñjaŋ.
42. yĕkti nuṅgil yitnèŋ gĕgrĕmĕtan paṣṭi, déné cahya ṛĕkta, iṅgiḥ punika dyan patiḥ, gĕsaṅipun sato kéwan.
43. winastanan ṅalam kanĕpson sayĕkti, yèn kèrĕm mriŋ ṛĕkta, béñjaŋ saŋ atma umañjiŋ, yitmèŋ kéwan kaŋ rumaṅkaŋ.
44. iṅgiḥ amuŋ nuṅgil mriŋ alusiŋ agni, déné cahya jĕnar, punika sajatosnèki, gĕsaṅiŋ ibĕr ibĕran.
45. winastanan ṅalam pépéṅinan iṅgiḥ, alusiŋ maruta, yèn kaṇḍĕg mriŋ cahya kuniŋ, wor yitnaniŋ bĕr ibĕran.
46. déné cahya séta punika dyan patiḥ, gĕsaṅipun mina, ṅalam kalalèn kaŋ nami, iṅgiḥ alusiŋ udaka.
47. yèn kasĕṅsĕm kèrĕm wontĕn cahya putiḥ, tan wun sukṣmanira, wor yitmaniŋ ulam kali, dé cahya ijĕm punika.
48. gĕsaṅipun saguŋ tatawuhan iṅgiḥ, ṅalamiŋ kaŋ rahsa, yèn korup nèŋ cahya wilis, tan wun nukṣmèŋ tatawuhan.
49. tantara byar katiṅal cahya tri warṇi, umañcur kalintaŋ, lan cahya mañcoroŋ wĕniŋ, naṅiŋ sarèhniŋ kawula.
50. sampun uniŋ sababipun mila iṅgiḥ, muŋ kèndĕl kéwala, sri naréndra daṅu maliḥ, mriŋ saŋ ṛĕsi siḍagana.
51. yèn makatĕn punapa kaŋ dèn wastani, cahyaniŋ triloka, saŋ ṛĕsi umatur: iṅgiḥ, naṅiŋ ugi winastanan.
52. cahyanipun trimurti punika saŋ sri, kalusan titiga, dahana toya myaŋ aṅin, waṅsul iŋ kahananira.
53. kahananiŋ napsu waṅsul mriŋ hyaŋ rawi, kahananiŋ rahsa, waṅsul ḍatĕŋ sitaṛĕsmi, déné kahananiŋ napas.
54. waṅsul ḍatĕŋ purbaniŋ traṅganèŋ laṅit, tigaŋ bab punika, mĕnawi kĕmpal sayĕkti, tamtu tuwuḥ dados gĕsaŋ.
55. lamun pisaḥ dadosipun aṅgĕsaṅi, saŋ natha ṅandika, ḍuḥ sumitra saŋ maharṣi, bab kahananiŋ agĕsaŋ.
56. sayĕktosé sampun kula sumĕṛĕpi, yèn gĕlaraniŋ rat, purwané sakiŋ trimurti, iṅkaŋ winastan a: o: ma.
57. waṅsul maṅkya kaŋ winastan aṅgĕsaṅi, kadiparan paman, kula dèrèŋ ṅuniṅani, matur ṛĕsi siḍagana.
58. ḍuḥ sinuhun kaŋ winastan aṅgĕsaṅi, kahananiŋ gĕsaŋ, yĕkti siŋ tarik tinarik, makatĕn wijaṅanira.
59. jagad agĕŋ tarikan lan jagad alit, napsu tĕtarikan, kaliyan hawa iŋ jawi, hawa tĕgĕsipun awan.
60. awan sakiŋ purbaniŋ hyaŋ bagaspati, yèn rahsa punika, tarikan lan maya saŋ sri, iṅgiḥ ĕbun toya gĕsaŋ.
61. tuwuhipun kaŋ krahos asrĕpiŋ ḍiri, asrĕp purwanira, sayĕkti sakiŋ iŋ ratri, ratri sakiŋ hyaŋ candrama.
62. lamun napas punika tarik tinarik, kaliyan swasana, sakiŋ lintaŋ purwanèki, saŋ iswara aṅandika.
63. iṅgiḥ paman sadaya ṅoŋ sampun tampi, wontĕn maliḥ iṅkaŋ, dados rahosiŋ pamikir, iṅgiḥ kaŋ nama triloka.
64. liré tigaŋ paṅgénan iṅkaŋ rumiyin, nama guruloka, lan ṅéndraloka kapiŋ tri, winastanan janaloka.
65. guruloka kaswargané hyaŋ pramèṣṭi, déné ṅéndraloka, hyaŋ éndra kaŋ darbé swargi, janaloka kaswargannya.
66. pra manuṅsa: kaŋ makatĕn kadospundi, ṛĕsi siḍagana, matur iṅgiḥ saŋ siniwi, biliḥ kawula punika.
67. iṅgiḥ sakiŋ paṅaran aran witnèki, klèntuniŋ pañana, dé triloka kaŋ sajati, iṅgiḥ trilokaniŋ badan.
68. dunuṅipun guruloka wontĕn ṅiṅgil, winastan utyaka, lamun éndraloka saŋ sri, dumunuṅnya wontĕn madya.
69. winastanan pranawa kaŋ kapiŋ katri, aran janaloka, wontĕn ṅaṇḍap dèn wastani, pariṅsila: wardinira.
70. kaŋ utyaka iṅgiḥ utĕk jarwanèki, pranawa punika, jajantuŋ tĕgĕsnya saŋ sri, pariṅsila: pariṅsilan.
71. triloka ya dados prataṇḍaniŋ urip, déniŋ ginaḍuhan, paṅwasaniŋ dad sajati, utyaka paṅwasanira.
72. tri prakawis mirṣa ganda amiyarṣi, pranawa kwasanya, pan iṅgiḥ tigaŋ prakawis, ambudi rasa rumaṅsa.
73. pariṅsila tuwin wagaprana iṅgiḥ, kwasanya tri warṇa, karasa mirasa tuwin, aṅĕdalkĕn rahsa mulya.
74. lantarannya sakiŋ pakakuṅan tuwin, wanodya duk samya, campuḥ paworiŋ saṛĕsmi, amurwa waranèŋ gĕsaŋ.
75. sri kusumawicitra ṅandika maliḥ, paran ta punika, papajaré paman ṛĕsi, sampun muluk amaṅaṇḍap.
76. ṛĕsi siḍagana matur mèsĕm sarwi, pra sujana iṅkaŋ, sampun putus ulaḥ ṅèlmi, sayĕktosipun tan kéwran.
77. nuṅgilakĕn jagad agĕŋ jagad alit, jagad gĕŋ punika, gĕlaran badan puniki, yèn jagad alit winastan.
78. gĕlaraniŋ bhuwana punika saŋ sri, yĕkti botĕn béda, sami amĕṅku trimurti, sri naréndra duk miyarṣa.
79. mèsĕm iŋ tyas déné sampun amĕṭuki, lawan kawruhira, patiḥ byantara nambuṅi, matur riŋ saŋ maha dwija.
80. ḍuḥ saŋ dwija paran ta badan puniki, aran jagad jĕmbar, bhuwana ran jagad alit, saŋ siḍagana papajar.
81. ḍuḥ saŋ patiḥ mila badan dèn wastani, jagad gĕŋ punika, makatĕn dunuṅannèki, jagad bhuwana punika.
82. nadyan tĕbiḥ myaŋ jĕmbara tanpa tĕpi, pan matsiḥ kantĕnan, pétaṅipun yèn winilis, waṅsul jagadiŋ manuṅsa.
83. sintĕn iṅkaŋ sagĕd añjajagi budi, lan suwaranira, tan pĕgad sajĕgé urip, upami dèn sĕratana.
84. kiraŋ papan laṅkuŋ suwaraniŋ jami, yĕkti tanpantara, tĕlasipun lamun lalis, kaliyan prataṇḍanira.
85. kaŋ bhawana iṅgiḥ kawasésèŋ janmi, samana kya patya, saklaṅkuŋ maṛĕm iŋ kapti, puwara maliḥ tĕtanya.
86. ḍuḥ saŋ dwija maṅsuli sabdanta ṅarṣi, duk paduka séda, wontĕn maliḥ kaŋ kahèkṣi, kanaŋ cahya tigaŋ warṇa.
87. cahya mañcur mañcoroŋ kaliyan wĕniŋ, katiga winastan, sami cahyaniŋ trimurti, laḥ duk samantĕn saŋ dwija.
88. punapa ta sampun tĕlas kaŋ kahèkṣi, saŋ paṇḍita nabda, makṣiḥ wontĕn cahya maliḥ, gumilaŋ tanpa wayaṅan.
89. praptèŋ ṅriku kula lajĕŋ mèṅĕt maliḥ, byar wruḥ gumlarira, sèsiniŋ dunya sakalir, wus rumaṅsa ḷĕbda jiwa.
90. upamiṅoŋ lajĕṅa satatar maliḥ, praptèŋ cahya samar, sayĕkti laju ṅĕmasi, maṅsa waṅsula mriŋ dunya.
91. wit wus mulya wibawa sampurṇa jati, mulya artinira, muliḥ puliḥ ṅuni uni, dé: wibawa jarwanira.
92. sampun mĕṅku kaluwihan rasa jati, sampurṇa jarwanya, rampuŋ ambabarpisani, waṅsul mantuk mariŋ ora.
93. naṅiŋ mantuk ḍatĕŋ ora radèn patiḥ, tan gampil punika, yèn botĕn putus iŋ ṅèlmi, ṅèlmi wosiŋ karuṅsitan.
94. karuṅsitan purwa madyaniŋ dumadi, praptaniŋ wasana, kinawruhan ywa sinaṅliŋ, wruḥ paṅglar lan guluṅannya.
95. dados botĕn samar moriŋ kwula gusti, wruḥ paṅrakitira, paṅracut kukutiŋ pati, patitis wosiŋ kĕkĕran.
96. duk samantĕn papajarira saŋ ṛĕsi, mriŋ ṛĕkyana patya, saŋ natha mèsĕm nabda ris, sampun paman siḍagana.
97. sampun cĕkap kèndĕl samantĕn rumiyin, yèn patiḥ byantara, dèrèŋ sagĕd anampèdni lyan ari maliḥ rinĕmbag.
98. ṛĕsi siḍagana tampi matur aris, ḍuḥ iṅgiḥ saŋ natha, kluhuran sabda saŋ aji, mèḥ kalajĕŋ atur amba.
99. kyana patiḥ kapranan tyas masmu tistis, kalaṅkuŋ kasmaran, myarṣa wasitèŋ saŋ ṛĕsi, puwara laju bibaran.
100. nahĕn gantya iṅkaŋ ginupita maliḥ, pralampitèŋ tékat, kukutan praptèŋ kajatin, mriḥ gambuḥ gambariŋ swarga.
9. gambuh
1. maṅkya iṅkaŋ winuwus, wasita di wosiŋ praptèŋ lampus, kacarita iŋ ṅuni duk mukṣanèki, sri aṅliṅdarma iŋ daṅu, nalika murwakèŋ layon.
2. kaṭaḥ iṅkaŋ kadulu, jroniŋ liyĕp layapiŋ ṅalayu, cinaḍaṅiŋ saguŋ ṅalam myaŋ swarga di, aṅragoḍa aṅrĕriḍu, mriḥ kaṇḍĕg ywa praptaniŋ don.
3. dé kaŋ katon karuhun, ṅalam pĕtĕŋ lir antarèŋ dalu, kaŋ tan antuk sunariŋ hyaŋ sitaṛĕsmi, ya cahya iṛĕŋ iŋ ṅriku, kalaṅkuŋ kyèḥ kaŋ katonton.
4. baṅsa grĕmĕt mahèwu, wor prabawa bhuwana maliṇḍu, dyan ṅrañcana muriḥ saŋ sukṣmana nuli, kaṇḍĕg swarga sarwa jamus, ṅiŋ saŋ sukṣma wus waspahos.
5. tan samar jroniŋ kalbu, wruḥ jatiniŋ paṅrañcana wahu, kinĕḍèpkĕn kapiŋ tri sirṇa tan kèkṣi, gya wontĕn maliḥ kadulu, ṅalam bra markata katon.
6. cahya baŋ anarawuŋ, sajĕroniŋ kaŋ alam kadulu, saguṅiŋ kaŋ sato rumaṅkaŋ mawarṇi, wor prabawa agni murup, gya sakyèhniŋ kaŋ buburon.
7. samya saṛĕŋ ṅrĕriḍu, mriŋ saŋ sukṣma kèndĕla iŋ ṅriku, umañjiṅa iŋ kaswargan kaŋ sarwabrit, naṅiŋ saŋ sukṣma tan ayun, wruḥ yèn arṣa kajalomproŋ.
8. gya kĕḍèp kapiŋ tĕlu, sirṇa nulya maliḥ kaŋ kadulu, ponaŋ ṅalam sumunar ya cahnya kuniŋ, sajĕroniŋ ṅalam ṅriku, saguŋ ibĕran katoṅton.
9. prabawanya aṅin guŋ, gya kaŋ para ibĕran sadarum, aṅrañcana muriḥ saŋ sukṣmana mañjiŋ, iŋ swarga sarwa kuniŋ guŋ, ṅiŋ saŋ sukṣmana tan kéron.
10. mriŋ jatiniŋ paṅriḍu, kinĕḍèpkĕn piŋ tri tan kadulu, tan antara wontĕn maliḥ kaŋ kahèkṣi, ṅalam kawĕniṅan yèku, cahya séta kaŋ katoṅton.
11. sajroniŋ ṅalam ṅriku, katon saguŋ buburoniŋ ranu, mina mina manéka warṇa mĕpĕki, prañcana mriḥ saŋ sukṣma nuŋ, manukṣmèŋ alam ulam loḥ.
12. ya swarga sarwi piṅul, ṅiŋ saŋ sukṣma muŋ mĕnĕŋ tan ayun, kinĕjĕpkĕn kapiŋ tri sirṇa tan kèkṣi, gya ṅalam tuwuhan rawuḥ, wahananiŋ cahya ijo.
13. jroniŋ ṅalam sumunu, katon ponaŋ tuwuhan mahèwu, amardapa royo royo masmu wilis, nĕḍĕŋ pala puspita rum, kaŋ prabawa waṅkawa wor.
14. kawaṅwaŋ wèḥ wulaṅun, aṅlam lami mriḥ saŋ sukṣmana nuŋ, kacaryana nukṣmèŋ swarga mañcawarṇi, ṅiŋ saŋ sukṣmana tan ayun, wrin yèn yitnaniŋ kakayon.
15. ṅrañcana mriḥ dumunuŋ, nukṣmèŋ kono dyan kĕjĕp piŋ tĕlu, sirṇa ponaŋ cahya mañcawarṇa nuli, salwiriŋ cahya iŋ ṅayun, nukṣmèŋ cahya kaŋ mañcoroŋ.
16. jroniŋ cahya narawuŋ, ana urup umaṇṭĕr kadulu, gĕŋ sasada jalu ṅadĕg andarbèni, sorot muñcrat warṇa wolu, iṛĕŋ abaŋ kuniŋ mawor.
17. séta ijo myaŋ biru, wuṅu dadu saṛĕṅan kadulu, lawan swarga kawuryan laras sarwasri, ṅiŋ saŋ sukṣmana wus wĕruḥ, yèn paṅrañcana mriḥ kéron.
18. yèku sajatinipun, kayaṅaniŋ para jin sadarum, muhuŋ gwaniŋ kamuktèn kéwala sami, déné swarga kaŋ kadulu, iṛĕŋ ṅĕṅrĕŋ mĕnaŋ kados.
19. muṣṭikèŋ bhumi nrawuŋ, yéka kadadyaniŋ niṣṭèŋ kalbu, yèn jumĕnĕŋ iŋ ṅriku tan wandé dadi, ratuniŋ ponaŋ jin jamus, déné swarga baŋ kaŋ katon.
20. abra markata murup, mimba sotya gĕniara yèku, kadadéyan sakiŋ ḍuṣṭanirèŋ kapti, yèn jumĕnĕŋ wontĕn ṅriku, tan wandé iŋ tĕmbé dados.
21. ratu jin abaŋ iku, déné swarga kaŋ kuniŋ narawuŋ, piṇḍa ṛĕtna dumilaḥ punika ṅuni, kadadyan duraniŋ kalbu, lamun jumĕnĕŋ nèŋ kono.
22. tan wun tĕmbé sirèku, dadi ratuniŋ jin kuniŋ tantu, déné swarga iṅkaŋ katon sarwa putiḥ, lir manikmaya sumunu, punika ṅuni kaŋ dados.
23. sakiŋ sĕtyaniŋ kalbu, yèn jumĕnĕŋ nèŋ kono tan wuruŋ, saŋ sukṣmana dadi ratuniŋ jin putiḥ, dé swarga ijo kadulu, lir manik téñjomayabyor.
24. yèku kadadyanipun, santosèŋ tyas kalamun dumunuŋ, anèŋ kono dadi ratuniŋ jin wilis, dé swarga kaŋ sarwa biru, amasmu muyĕk katoṅton.
25. lir nila pakaja nuŋ, kadadéyan siŋ sambadèŋ kalbu, yèn jumĕnĕŋ nèŋ ṅriku saŋ sukṣma béñjiŋ, dadi ratuniŋ jin biru, déné swarga kaŋ katoṅton.
26. asarwa wuṅu ṅuwuŋ, piṇḍa manik pusparaga nrawuŋ, ya kadadyan sakiŋ sambawaniŋ kapti, yèn jumĕnĕŋ wontĕn ṅriku, tan wandé iŋ tĕmbé dados.
27. ratunirèŋ jin wuṅu, dé kaŋ katon swarga sarwa dadu, muñcar mimba muriḥ dalima laṅkuŋ sri, yèku kadadéyanipun, siŋ éwaḥ giṅsiriŋ batos.
28. yèn jumĕnĕŋ nèŋ ṅriku, tan wun dadi ratuniŋ jin dadu, apuwara swarga woluŋ warṇa ṅarṣi, sampurṇa nuṅgil sawujud, dadya cahya mañcur katon.
29. jroniŋ kaŋ cahya mañcur, katon ana sipatiŋ rupa nuŋ, piṇḍa tawon gumana nrawuŋ nĕlahi, laḥ iya iku gonipun, kawaṣkiṭan kaŋ sajatos.
30. yéka ta warṇanipun, saŋ sukṣmana wahanèŋ hyaŋ aguŋ, kaŋ mimbuhi salwiriŋ wawarṇèn sami, ṅlimputi sahubĕṅipun, jagad gĕŋ alit tan mrojol.
31. prapta iŋ ṅriku laju, maṅkat mariŋ triloka liripun, ṅambaḥ mariŋ kahananiŋ ṅalam katri, tataran kapisan kasbut, ṅalam janaloka kahot.
32. swarganiŋ manuṅsèku, liré iya gon wijiniŋ manus, tĕgĕsira papaniŋ rahsa sajati, andarbèni cahya mañcur, kaliḥ éndraloka kaŋ gon.
33. iku swarganiŋ ratu, sajatiné gon paṅrasa iku, andarbèni cahya mañcoroŋ nĕlahi, kaŋ kapiŋ tĕlu sinĕbut, ṅalam guruloka ĕṅgon.
34. swarganiŋ para wiku, artinira papan pramaṇa nuŋ, iya iku kaŋ darbèni cahya wĕniŋ, naṅiŋ saŋ sukṣma tan ayun, dumunuŋ alam tĕluŋ gon.
35. kumpuliŋ cahya tĕlu, mañjiŋ mariŋ cahya kaŋ kalaṅkuŋ, paḍaŋ nrawaŋ gumilaŋ gilaŋ nĕlahi, tanpa wayaṅan iŋ ṅriku, rèḥ saŋ sukṣma wus waspahos.
36. lamun puniku duruŋ, praptèŋ jati jatiniŋ dudunuŋ, tĕmaḥ mĕnĕŋ manuṅku ṅĕniṅkĕn kapti, tantara ana kadulu, cahya samar saŋ sukṣma wor.
37. purṇa waluyèŋ daṅu, praptèŋ wĕkas wĕkasiŋ tumuwuḥ, iŋ wusana sumaṅga kaŋ samya myarṣi, saṅgyaniŋ kaŋ wasita nuŋ, mriḥ dumunuŋ praptaniŋ don.
38. rèḥ purwa wasana wus, kawasita lir kawahyèŋ ṅayun, maṅkya namuŋ gumantuŋ kaŋ anampèni, sintĕn kaŋ waspadèŋ sĕmu, wasiṣṭèŋ wawaṅsit kahot.
39. sayĕkti baṅkit ñakup, wosiŋ rasa kaŋ sampun winuwus, paran tĕmbé sajroniŋ layap mĕnawi, koṅsi katona sahèstu, rurupan kaŋ élok élok.
40. kaŋ mriḥ sĕṅsĕmiŋ kalbu, añĕñaḍaŋ gumiwaŋ mriḥ dudu, iba dènnya kapiécanĕn nèŋ margi, kaṭaḥ swargagĕŋ kadulu, aṅragoḍa mriḥ kajlomproŋ.
41. maṅkya paran kadyèku, wasitaniŋ pra wasiṣṭèŋ ṅèlmu, dènnya marṇa kahanan iṅkaŋ pinaṅgiḥ, iŋ béñjaŋ wusanèŋ lampus, kaŋ nora sampurṇèŋ kawroḥ.
42. ana iṅkaŋ dumunuŋ, kaswarganiŋ para jin sadarum, ana mañjiŋ yitmèŋ sato minèŋ wariḥ, ana mañjiŋ kayu watu, ana kaŋ nitis mariŋ woŋ.
43. ana mriŋ cahya mañcur, cahya wĕniŋ mañcoroŋ narawuŋ, ana iṅkaŋ nukṣmèŋ suwuŋ soñaruri, ana karat ñi ra kidul, dadi gandarwo jaraṅkoŋ.
44. ana nèŋ naraka guŋ, nraka wédaŋ nraka api murup, nraka pĕtĕŋ nraka ĕṇḍut ana maniŋ, ginada iŋ wana kirun, ana binujuŋ binaḍog.
45. mriŋ jamak juja bésuk, warṇa warṇa usulé pra rusul, kaŋ asalkĕn salsilahé praptèŋ kalis, koṅsi bisa karya uwur, mriŋ woŋ kaŋ duruŋ waspahos.
46. mriŋ pahésaniŋ lampus, pupusaniŋ pambudi muŋ ĕmbuḥ, masaboroŋ karṣané kaŋ maha suci, sakiŋ tyasé saṅĕt kisruḥ, muŋ pasraḥ mariŋ hyaŋ manon.
47. lamun maṅkono iku, karṣanira pra dwija iŋ daṅu, apa amuŋ caṅkriman kéwala iki, apa muŋ kinirèŋ kalbu, babo tĕka karya éwoḥ.
48. lamun maṅkana pĕrlu, aṅulati sajatiniŋ ṅèlmu, mèt sarana sirṇaniŋ warṇa sakalir, kadya kaŋ sampun kasĕbut, iŋ sĕrat wirit kinahot.
49. hidayat jati muwus, kaŋ sampun kaswaspada pinutus, yĕkti baṅkit ambirat ṛĕñcanèŋ pati, sakĕḍèp nétra wus rampuŋ, praptèŋ uluwiaḥ maṅgon.
50. wontĕn paṇḍita muwus, sajatiné ananiŋ iḍup, asal sakiŋ nora nana duk iŋ ṅuni, nulya dèn anakkĕn iku, baṛĕŋ wus ana wujud woŋ.
51. gya pinriḥ sirṇanipun, muŋ maṅkana karṣané hyaŋ aguŋ, muliḥ mariŋ ajal kamulané ṅuni, lamun tan maṅkono luput, paran pĕrluniŋ tumuwoḥ.
52. lalu nĕmahi lampus, punaparṣa manitis mriŋ ratu, kaŋ tartamtu élok kalakoné nitis, ḍahyaŋ druna duk iŋ daṅu, kĕblusuk malbu mriŋ bĕlo.
53. déniŋ mlèsèt nĕripun, baya sakiŋ aṅèlé kalaṅkuŋ, sampun maliḥ manuṅsa sakula maṅkin, kaŋ sampun tamtu kalèntu, mañjiŋ mriŋ ratuniŋ laron.
54. kratoné añjĕṅgunuk, ḷĕmaḥ ḷĕmpuŋ sinĕṅguḥ swargaguŋ, binaléṅkraḥ iŋ raré saŋ natha nuli, iṅambil laju kinrusuk, matĕŋ kinrĕmus iŋ uwoŋ.
55. sukṣmané mĕsat ṅlaṅut, arṣa nitis maliḥ kaŋ pakantuk, paran lamun maṅkana iṅkaŋ pinaṅgiḥ, yĕkti saṅĕt kawlas ayun, sukṣma kaŋ biṅuŋ ṅaloyoŋ.
56. marma lamun pinuntu, mati nitis tan wontĕn sahèstu, iṅkaŋ ana mati sasar sukṣmanèki, ṅumbara mriŋ ṅawaŋ ṅuwuŋ, lir kiñjĕŋ tanpa pandulon.
57. biṅuŋ tan wrin iŋ dunuŋ, paṅrasané piṇḍa aṅganipun, woŋ supĕna marma sayogya binudi, mati kaŋ sampurṇèŋ dunuŋ, suwawi dipun upados.
58. wontĕn wasitanipun, wiku tama kaŋ pratamèŋ kawruḥ, wusiŋ pati wus ginambar jroniŋ guliŋ, kaŋ iṅaran sasar iku, kaya kaŋ wus kacariyos.
59. lir ṅimpi jroniŋ turu, déné iṅkaŋ sampurṇa puniku, rasanira lir woŋ turu nora ṅimpi, tan paḍaŋ tan pĕtĕŋ iku, iya tan rahos rumahos.
60. yèku iṅkaŋ sinĕbut, cahya samar pamoriŋ ṅaluyut, nora iṛĕŋ nora abaŋ nora kuniŋ, nora wuṅu dadu biru, tan mañcur wĕniŋ mañcoroŋ.
61. tan wanodya tan kakuŋ, nora araḥ lan nora dumunuŋ, amuŋ nikmat mupaṅat sajroniŋ guliŋ, liré nora ṅĕṛĕs linu, tan ṅrasa luwé kaḷĕson.
62. tan ṅrasa mĕlèk turu, rumaṅsané baṛĕŋ wus awuṅu, baya iku kaŋ iṅaran nukat ghaib, nukṣmèŋ ṅalamé ṅalimut, maluyèŋ ghaibiŋ rahos.
63. iŋ kono pisahipun, saŋ hyaŋ atma lan rasanta tuhu, rasanira asal alusiŋ trimurti, déné hyaŋ atma puniku, ya wahananiŋ hyaŋ manon.
64. wahanané hyaŋ aguŋ, waṅsul nuṅgil lawan ananipun, gya alusiŋ trimurti mĕnĕŋ tan osik, iŋ kono iṅaran turu, marma tan rahos rumahos.
65. samantararṣa wuṅu, saŋ hyaŋ atma muṅup siŋ ṅalimut, iya miṅip sakiŋ papaniŋ asĕpi, iṅaran ṅimpi puniku, yèku pamoriŋ paṅrahos.
66. lan atma murwèŋ wuṅu, mèṅĕt makṣiḥ lalaṅĕn nèŋ kalbu, amĕmaṅun raras rahosiŋ duk taṅi, kaŋ katiṅal kaŋ kaambu, kaŋ kapyarṣa kaŋ rinahos.
67. ginambar jroniŋ kalbu, dupi babar byar iṅaran wuṅu, mèṅĕt ṅuṅun puṅun puṅun jroniŋ taṅi, ṅira sasmitèŋ hyaŋ aguŋ, tan wruḥ yèn iku paṅrahos.
68. rahosira duk wuṅu, katut kèrĕm karasa jro turu, marmanira impèn iku tan sayogi, binudi kadadyanipun, sasat maṅéran paṅrahos.
69. ghaibiŋ kaŋ mahaguŋ, jroniŋ kalbu katon jagad aguŋ, sañatané iya jagad sami ugi, iŋ jaba jĕro satuhu, sarambut pan ora kahot.
70. déné purwaniŋ turu, raganira kaŋ mĕnĕŋ karuhun, narik maraŋ saranduniŋ aṅga nuli, ya mĕnĕŋ nora lumaku, nadyan kaŋ rahos paṅrahos.
71. ya mĕnĕŋ tan lumaku, dé hyaŋ atma maluyèŋ ṅalimut, ḷĕs wus turu lir kaŋ jarwa iŋ ṅarṣi, laḥ rasakĕna puniku, dèn mĕmĕt mèt wosiŋ pasmon.
72. wusana rèḥ kula muŋ, amaṅimpun pralampitanipun, para ĕmpu ĕmpu kaŋ sampun mumpuni, yèn ṅoŋ priyaṅga tan gayuḥ, kaṇṭi matur maṅsa boroŋ.
10. kinaṇṭi
1. wontĕn maliḥ kaŋ pitutur, sakiŋ pra wasiṣṭèŋ ṅèlmi, ananiŋ kaŋ sipat ĕsa, sayĕkti luwiḥ ginahib, liré ghaib iku samar, liré samar tan kahèkṣi.
2. naṅiŋ mĕṣṭi ananipun, kabèḥ sahisiniŋ bhumi, manusa lawan jin sétan, sato pitik iwèn tuwin, sosotya watu kañcana, wrĕkṣa gulma lata tuwin.
3. kaŋ gumrĕbĕg kaŋ kumrumpruŋ, kaŋ kumlĕṇḍaŋ kaŋ kumriñciŋ, kaŋ mañcoroŋ kaŋ gumĕbyar, kabèḥ ananiŋ hyaŋ widdhi, naṅiŋ iya winastanan, saguṅé iṅkaŋ kahèkṣi.
4. iṅkaŋ agal iṅkaŋ ḷĕmbut, kaŋ ñwara lan kaŋ tan muni, dudu ananiŋ hyaŋ sukṣma, tan maṅgon nèŋ soñaruri, laḥ ta paran jatinira, ulatana dèn kapaṅgiḥ.
5. sajatiné hyaŋ maha aguŋ, kaŋ jumĕnĕŋ nuṅkat ghaib, liré wiji pipiṅitan, sumiṅit nèŋ rasanèki, rasa jroniŋ pĕjaḥ gĕsaŋ, iya gĕsaŋ jroniŋ pati.
6. iṅkaŋ mati iṅkaŋ iḍup, iya iṅkaŋ maha suci, jroniŋ mati bisa gĕsaŋ, jroniŋ gĕsaŋ bisa mati, iya iku kaŋ winastan, pamoriŋ kawula gusti.
7. yĕkti tan pisaḥ sarambut, rarakĕtan siyaŋ ratri, ñatané amuŋ sajuga, pati urip muŋ sawiji, ya aran roroniŋ tuṅgal, ana taṇḍané kaŋ yĕkti.
8. yèku wujudiŋ antĕlu, lamun dèn arani mati, jĕbul urip bisa kabrak, lamun winastanan urip, jĕbul mĕnĕŋ nora obaḥ, marmanta pati lan urip.
9. iṅaran tuṅgal sawujud, wujud siji asma kaliḥ, anata pralampitanya, pra wiku kaŋ wus mumpuni, sapa kaŋ wus nora samar, sĕlaniŋ pati lan urip.
10. bisa urip tanpa nupus, laḥ samaṅkya iṅkaŋ ĕndi, kaŋ urip pakéyan tiga, lawan sapa iṅkaŋ dadi, gatra wujudiŋ kukila, dudu iṅkaŋ putiḥ kuniŋ.
11. iṅkaŋ bisa dadi manuk, déné iṅkaŋ putiḥ kuniŋ, muŋ maṅka buṅkus kéwala, buṅkusé kaŋ bisa urip, dupi urip wus dumadya, wus saṅkĕp sipatiŋ pakṣi.
12. gya ṅiṅsĕp kaŋ kuniŋ piṅul, maṅka paṅan nèŋ sajroniŋ, antiga dupi wus tĕlas, buntĕlé kaŋ putiḥ kuniŋ, gya nucuk caṅkok pinĕcaḥ, lakir aran insan kamil.
13. jumĕnĕŋ urip kaŋ wujud, tan béda dadiniŋ janmi, dudu iṅkaŋ wujud kama, iṅkaŋ dadi jabaŋ bayi, wujud samar amanukṣma, jumĕnĕŋ sajroniŋ mani.
14. mĕnĕŋ mati tanpa wujud, yahiku kaŋ dèn wastani, witiŋ gĕsaŋ sakiŋ ora, aṅrĕm jroniŋ soñaruri, liriŋ suwuŋ tawaŋ towaŋ, babasané pra winasis.
15. winastan galihiŋ kaṅkuŋ, tantara kaŋ mĕnĕŋ mosik, mosik mahyakkĕn kawasa, wus gĕsaŋ sarana jisim, samĕta lan rasanira, babar aran isan kamil.
16. liré wus sampurṇa wujud, wujud urip ṅaṅgo jisim, ṅaṅgo rasa ṅaṅgo ñawa, kaya kaŋ kawrat kintèki, kaŋ marṇa rèḥ sastrajéndra, yuniṅrat wadiniŋ bhumi.
17. sastra tĕgĕsé pan kawruḥ, yèku paniṅal kaŋ ĕniŋ, arja puniku minulya, suci iŋ ananirèki, éndra iku aguŋ samar, aṅlimputi sadayaniŋ.
18. sèsiniŋ kaŋ bhuwanaguŋ, yèku jatiniŋ ṅahurip, jumĕnĕŋ laṅgĕŋ priyaṅga, kaŋ kawasa pariŋ urip, kaŋ gumlar iŋ bhumintara, saṅgyaniŋ para dumadi.
19. ḷĕmbut tan kĕna jinumput, agĕŋ aṅèbĕki bhumi, kaŋ wus samya iṅaranan, babasané pra winasis, waraṅka mañjiŋ curiga, koḍok ṅĕmuli lèṅnèki.
20. dé wité jumĕnĕŋ wujud, wujudiŋ manuṅsa iki, maṅkana lantaranira, dadiné urip kaŋ mosik, tumuruniŋ sastracĕṭa, kaŋ aran nuṅkat ginahib.
21. sakiŋ alamiŋ ṅalimut, ghaibiŋ allaḥ sajati, tumitisiŋ daḷĕm rahsa, rasaniŋ priya duk lagi, sĕṅsĕmiŋ asmaragama, pamoriŋ jalu lan èstri.
22. duk mĕḍar rasaniŋ kakuŋ, ḷĕñĕp murcitaniŋ dakṣi, tiniyup siŋ kanikmatan, iŋ kono pamorirèki, dadiŋ atma kaŋ wisésa, kadim ajali abadi.
23. amoriŋ dad lan rasèku, iṅaran wadi lan mani, tumiba iŋ guwa garba, acampuḥ kalawan madi, yèku rasaniŋ wanita, nèŋ kama kumpul sawiji.
24. aran maniṅkĕm puniku, yèku wawaḍahiŋ urip, wujud siji catur aran, mani wadi lawan madi, maniṅkĕm sakawanira, yèku wijiniŋ dumadi.
25. dadiniŋ manuṅsa tuhu, sakiŋ warṇa catur ṅarṣi, déné wiji kaŋ ṅaranan, sariniŋ gĕni lan bhumi, miwaḥ sariniŋ maruta, sakawan paṭiniŋ wariḥ.
26. kaŋ samya iṅakĕn iku, lahiré sipatiŋ widdhi, wus awor iŋ catur rahsa, yèku iṅaran trimurti, sakawan minaṅka ḍasar, yahiku sariniŋ bhumi.
27. kabèḥ maṅka wrananipun, rahsa kawan warṇa ṅarṣi, wus ḷĕkĕt tanpa antara, yèku baboniŋ jasmani, minaṅka sasaṇḍanira, abuniŋ roḥ kaŋ sajati.
28. abuniŋ roḥ tĕgĕsipun, baboniŋ ñawa sakalir, kahuripan sakwèḥ rahsa, kaŋ aran ñawa rokhani, yèku ta jaliniŋ atma, sipat cahya mukhamadi.
29. dadiné manuṅsa tuhu, si catur warṇa iŋ ṅarṣi, mani iku dadi rupa, rupaniŋ uripirèki, madi uripiŋ paṅrasa, wadi iku dadi budi.
30. maniṅkĕm ñawanirèku, dé wiji catur iŋ jawi, sari bhumi dadi carma, tumus iŋ karṣa marahi, ḍahga kaṛĕm anĕnaḍaḥ, sari gĕni dadi dagiŋ.
31. tumus karṣa dadi napsu, sari aṅin dadi gĕtiḥ, tumus mahanani napas, paṭiniŋ bañu pan dadi, tulaŋ lan otot prasamya, tumus toya rasa jati.
32. paworiŋ kaŋ rasa catur, lan sari kawan prakawis, lir madu lan manisira, myaŋ pami kaŋ puspita mrik, lan gandanira kaŋ ṅambar, yĕkti pinisaḥ tan kĕni.
33. lir surya lan panasipun, tan kĕna binéda yĕkti, kadi aṅilo pahésan, tuṅgal solahbawanèki, wus jumĕnĕŋ warṇa rupa, iya warananiŋ urip.
34. déné urip kaŋ satuhu, jumĕnĕŋ ĕnĕŋ lan ĕniŋ, ĕnĕṅé babar warana, warana kaŋ obaḥ sami, ĕniṅnya ambabar gĕsaŋ, gĕsaŋ iṅkaŋ bisa mosik.
35. mobaḥ mosik wor sawujud, tan kĕna pisaḥ salami, salaminira iŋ donya, iṅkaŋ mobaḥ iku jisim, kaŋ mosik rasa paṅrasa, atasiŋ atma sajati.
36. marmanta dèn awas émut, rasakna iŋ tyasirèki, sapa iṅkaŋ mosik mobaḥ, sapa iṅkaŋ ĕnĕŋ ĕniŋ, dèn waspada wor misahnya, cèwèt yèn nora udani.
37. mulané kĕna sinĕbut, uripé saka iŋ pati, ananira sakiŋ ora, mobaḥ sakiŋ ĕnĕŋ ĕniŋ, wuṅunira sakiŋ néndra, ramé sakiŋ suñaruri.
38. marmanta kaŋ tan sumurup, saréṅaté suñaruri, ruwĕt kéwraniŋ wardaya, diya diniya iŋ kapti, paran purwanira ana, sapa ta iṅkaŋ akardi.
39. dadiné saguŋ tumuwuḥ, ṅandĕl yèn sakiŋ hyaŋ widdhi, naṅiŋ makṣiḥ tiḍa tiḍa, déné tan wruḥ taṇḍa yĕkti, tur jatiné wus tĕtéla, tumali tĕḷĕṅiŋ urip.
40. mulané yèn arṣa putus, tatas patitisiŋ pati, pruwitaa pra paṇḍita, kaŋ uwus pratamèŋ ṅèlmi, anata titikanira, ṛĕsi kaŋ waṣkiṭèŋ jati.
41. yèku kaŋ kaṛĕm manuṅku, asumèḥ pamulu wĕniŋ, nétra tajĕm tyas jatmika, paramarta tanpa pamriḥ, ayĕm tĕntrĕm anarima, sumaraḥ sarèhiŋ budi.
42. yèn micara sarwa arum, raras muŋ mamriḥ utami, sakĕcap dadi piwulaŋ, pépéliŋ paliniŋ urip, supaya dadya raharja, raharjaniŋ dunya ṅakir.
43. dunya lahir tĕgĕsipun, liré ṅakir iku batin, dadi paṇḍita kaŋ wus kas, tan kéwran karya ayuniŋ, tyasiŋ sasamèŋ tumitaḥ, sakiŋ wus pratawèŋ ghaib.
44. kaŋ ghaib wajibul wujut, yahiku jatiniŋ urip, laḥ ĕndi ta uripira, cupana iṅkaŋ patitis, yèn sira bataŋ kaŋ obaḥ, apa badan kita iki.
45. badan iku sasat watu, obahé ana kaŋ kardi, prataṇḍané lamun néndra, kaŋ ṅobahkĕn nora mosik, raganira galuṇḍuṅan, lir palwa tanpa kĕmuḍi.
46. yèn binataŋ napas nupus, wit yèn napas sirṇa mati, napas tan darbé paṅwasa, tan bisa rumĕkṣa jisim, sajatiné napasira, iku muŋ alusiŋ aṅin.
47. tan darbé rasa sarambut, prataṇḍané lamun guliŋ, napasira makṣiḥ wĕtaḥ, tan wruḥ ganda arum manis, lamun sira bataŋ rasa, dumèḥ ṅwasani sakalir.
48. kuwasa aṅambu ṅruṅu, kwasa mirṣa kwasa aṅliŋ, kuwasa aminta minta, amisahkĕn pĕḍĕs asin, naṅiŋ iya dudu gĕsaŋ, makṣiḥ ana kaŋ mĕṅkoni.
49. kapurba iŋ paṅrasamu, ana prataṇḍané ugi, yèn paṅrasa lagi karṣa, aṅraras iṅkaŋ kinapti, rasanira gumalambyar, tan tĕtéla iŋ pamyarṣi.
50. sansaya kalamun turu, tĕtéla yèn dudu urip, sasat wus mati walaka, sadaya kadayanya nis, yèn sira bataŋ paṅrasa, iku sajatiniŋ urip.
51. iku iya dudu iḍup, taṇḍané kalamun guliŋ, paṅrasa tan darbé kwasa, saya lamun ora ṅimpi, tan rumaṅsa kakuŋ priya, maṅka iya makṣiḥ mosik.
52. makṣiḥ bisa kĕrot ṅlindur, makṣiḥ baṅkit jiṅkruŋ miriŋ, dadi makṣiḥ aran gĕsaŋ, paṅrasa muwus tan mosik, yèn aṅĕn aṅĕn iṅaran, gĕsaṅira kaŋ sajati.
53. wus ana paparabipun, babasané pra winasis, aṅĕn aṅĕn balé atma, balé paṅgonan lirṇèki, atma tĕgĕsira gĕsaŋ, dadi aṅĕn aṅĕnnèki.
54. iku muŋ ĕṅgoniŋ iḍup, dudu uripiŋ dumadi, jatiné ṅĕn aṅĕn ika, aṅin papan patĕmoniŋ, hyaŋ atma lan paṅrasanta, dadi warananiŋ urip.
55. apa urip kaŋ dumunuŋ, sajroniŋ ṅĕn aṅĕn kuwi, kaŋ aran jatiniŋ gĕsaŋ, wit kwasa ṅrèḥ obaḥ osik, amurba rasa paṅrasa, amasésa cipta ĕsir.
56. yèn pinikir duruŋ jumbuḥ, lan asmané kaŋ sajati, wit jati jatiniŋ gĕsaŋ, tan maṅgon ĕṅgon sawiji, jroniŋ triloka kèbĕkan, iku muŋ nèŋ sanubari.
57. kuwasané muŋ amĕṅku, sahobaḥ osikiŋ jisim, iya jumĕnĕŋ naréndra, ṅiŋ naréndranta pribadi, dudu kaŋ ṅratoni jagad, kaŋ isi samodra wukir.
58. dadi iku tĕtĕp amuŋ, maṅka susulihiŋ widdhi, siniliḥ kinon masésa, masésa sawiji wiji, siji sijiniŋ kahanan, iya sasat ana siji.
59. nadyan sawijiniŋ tĕṅu, iya sajak isi siji, balik kaŋ maha kawasa, sajagad amuŋ sawiji, pinrĕjĕt winijaŋ wijaŋ, dadi wiji siji siji.
60. siji sijiné ajumbuḥ, jumbuḥ muŋ wujud sawiji, siji laṅgĕŋ salaminya, tĕtĕp nora owaḥ giṅsir, laḥ kaŋ ĕndi ulatana, aja muṅkur miṅkar muṅkir.
11. paṅkur
1. sawĕnèḥ manusa ana, aṅakoni ya iṅsun maha suci, socaniŋ jagad sawĕguŋ, iku woŋ cumaṇṭaka, aṅlĕṅkara kumaluṅkuŋ ṅaku aku, kahananiŋ hyaŋ wisésa, iṅkaŋ masésa sakalir.
2. laḥ ta ĕndi taṇḍanira, lamun sira ṅaku wujudiŋ gusti, tĕka makṣiḥ maṅan turu, lan makṣiḥ buṅaḥ susaḥ, tĕtĕp lamun sira kawula satuhu, yèn ṅaku kawula blaka, kĕna iṅaranan muṅkir.
3. tan rumaṅsa ananira, yèn minaṅka warananiŋ hyaŋ widdhi, sinĕḍaḥna anandĕdulu, aṅganda aṅandika, amiyarṣa aṅrasa rumaṅsa iku, maṅsa baṅkita maṅkana, yèn tan tuṅgal iŋ hyaŋ widdhi.
4. laḥ ta maṅkya kadiparan, kaŋ iṅaran pisaḥ kalawan tuṅgil, yèn pisaha nora iḍup, lamun aṅaku tuṅgal, coba agé wĕcakĕna waṣkiṭamu, béñjaŋ éñjaŋ ana apa, apa kaŋ arṣa pinaṅgiḥ.
5. wasitaniŋ dwijawara, yèn sirarṣa wĕruḥ jatiniŋ urip, wus nora kĕna ginayuḥ, pan tanpa pitĕdahan, saŋ paṇḍita tan kwasa asuŋ pituduḥ, muŋ kari santosaniŋ tyas, kaŋ bisa mriḥ moriŋ ghaib.
6. kawuri wasitèŋ dwija, jroniŋ sastra ñĕñĕt sarasanya nis, soña saniṣkarèŋ dunuŋ, nir tan nèŋ warṇaniŋ rat, kwèḥ kahanan samun tan kĕni tinuju, parandéné iṅaranan, sèsiniŋ rat dinrĕsiŋ siḥ.
7. linĕkĕtiŋ sukṣmanasa, sañatané tita yyan dèn ulati, lawan wicakṣèŋ pandulu, tuna yyan piniarṣa, lan ḷĕbdaniŋ karṇa kaduŋ yyan dèn ambu, lawan kawasèŋ oswasa, tan kĕni sinabdèŋ laṭi.
8. paṅèṣṭiné muŋ kinaṇṭa, samar moriŋ pranawèŋ wardayaniŋ, dinayan dayaniŋ kayun, yuniŋ tyas sinantosan, mriḥ sinuŋ siḥ nitya sasmadi madrĕs nrus, nirṇakna niṣkaraniŋ rat, maṅruwat ruwĕtiŋ kapti.
9. amĕpĕt ĕtukiŋ cipta, natas wrana triloka kaŋ ṅawĕri, ya murtiniŋ ahumèku, winĕṅkaŋ mriḥ narawaŋ, jroniŋ wrana kawuryan asri narawuŋ, liyakiŋ kaŋ wuluḥ wuṅwaŋ, kawaṅwaŋ maṅkawa wĕniŋ.
10. kono konusiŋ saŋ hyaṅ: sa, koṅas sakiŋ sosotyaniŋ tyas ĕniŋ, naṅiŋ kwèḥ saṅsayèŋ ĕnu, yyan tilariŋ sarana, yakti sinraŋ riŋ wèri wèḥ wuru riwut, puwara wigariŋ karṣa, kuwur kowar kaŋ kinapti.
11. riŋ paṅrèḥ woriŋ ririṅa, winatara trapiŋ sita satiti, guŋ tajĕm jĕñjĕm maṅĕjum, sarjuniŋ rèḥ silarja, jatmikèŋ tyas manrusiŋ srirarum ruruḥ, wahyèŋ nayana ṅumala, woriŋ nĕŋ wardaya jrĕniḥ.
12. jĕnĕk jununiŋ jinaṅka, jumĕnĕṅkĕn jiwandana nĕŋ ĕniŋ, mĕnĕŋ mriḥ niṅiŋ panĕkuŋ, kĕnaniŋ nugrahèŋ hyaŋ, konaŋ onaŋ ménakiŋ kanikmatan nuŋ, maṅonaḥ iŋ nala lana, narawaŋ wruḥ saṅkaniŋ siḥ.
13. yayaḥ rarasiŋ brĕmara, ṅrĕmiḥ ṅrĕṅiḥ ṅimĕr yun ṅosmèŋ sari, siŋ kwèhniŋ rikaŋ mriḥ wuruŋ, rèḥ mriḥ wuryèŋ srĕṅkara, kĕna sakiŋ ririḥ kaŋ sĕkar tan ruru, myaŋ kadi mèt minaniŋ lwaḥ, kaŋ wé lana lir malani.
14. marma ywa kalpèŋ lakṣita, riŋ paṅuṅkiḥ kĕdaḥ darpambĕk pati, sĕṅkut srĕŋ surayèŋ kayun, ywa léna yatnèŋ praya, pañcadriya prihĕn yĕg samya mamayu, maṅayat waluyèŋ laya, paṇḍawa piṇḍaniŋ kapti.
15. paṅarṣa saŋ darmawaṅsa, bimarjuna naṅkula lan saŋ ari, darmawaṅsa martèŋ kalbu, bhima santosèŋ karṣa, danañjaya péwéka prayitnèŋ kayun, naṅkula sadéwa maṅka, jumbuhiŋ kawula gusti.
16. pañcaryambĕk abipraya, wor sarahsa maṅayuḥ silastuti, mèt kotamaniŋ tumuwuḥ, mriḥ wahyèŋ wahyu dayat, déniŋ daya dinayan yĕg sabiyantu, tĕmaḥ katĕkyaniŋ sĕdya, dadya darṣanèŋ paṅèṣṭi.
17. lir tikṣwaniŋ hru winawas, lan luṅitiŋ rarayuŋ adu manis, tan kĕni méndra sarambut, guŋ bĕk maṅĕmbat ĕmbat, rumambatiŋ astra riŋ ĕri cumuṇḍuk, gaṭuk pucuké kacupan, tumañcĕp kacĕcĕp iŋ siḥ.
18. sihiŋ hyaŋ jatiwisésa, sakiŋ tĕlas rasa paṅrasanta ris, woriŋ atma jiwa ta nrus, purṇa murwakèŋ rahsa, tĕmaḥ tita satiti kamulyèŋ daṅu, muliḥ maṅrèḥ trilokaya, trus mulat murtiniŋ urip.
caṇḍaké : sĕrat asmaralaya
