añariyosakĕn bab kawruḥ kasampurṇan, piritan sakiŋ wasitaniŋ guru guru iṅkaŋ sami amĕḍarakĕn tékatiŋ kasidan, kahimpun ḍatĕŋ mas ṅabèhi maṅun wijaya.
1. ḍaṇḍaŋgula
1. maṅèṣṭi wruḥ srirèŋ hyaŋ artati, tutumanĕn patĕmon wartanya, tanpa pantaran nikmaté, sor laṅĕniŋ salulut, marmanira kaŋ sampun uniŋ, kasat mata iŋ nétya, sumèḥ sĕmunipun, ayĕm tĕntrĕm anarima, muṅkur mariŋ karamèn muŋ amalatsiḥ, sihiŋ hyaŋ sukṣmanasa.
2. ṅuñjara riŋ rarasan tan aris, sanityasa suŋ srĕpiŋ sasama, sarèḥ saniṣkaraniŋ rèḥ, ririḥ paramarta rum, santa budya susĕtyèŋ kapti, katĕnta mètotaman, tĕtĕk santosatul, sakiŋ tyasé wus pranawa, anarawaŋ manrusiŋ pramana wĕniŋ, wruḥ nĕṅiŋ kaĕniṅan.
3. wiwaraniŋ warana kaŋ wĕrit, kinawruhan wĕṅané tan samar, kasarira saariné, wruḥ rahayuniŋ luyut, yitna nora kéwran iŋ wèṣṭi, maṅkana kaŋ waṣkiṭa, marma dèn aṅgayuḥ, wahyu ayuniŋ kasidan, ywa katuṅkul ulaḥ kamulyaniŋ urip, tan urup kinuṛĕpan.
4. jatinira ananiŋ ahurip, nora lama bĕbasané ana, amuŋ sagĕbyariŋ clèrèt, pĕt tumulia waṅsul, bagya lamun kaŋ baṅkit bali, mariŋ alamé lama, kaŋ luwiḥ linuhuŋ, wit gahib kaŋ duruŋ wikan, kaŋ wus tamtu pĕtĕŋ calèrèt umañjiŋ, suwuŋ woriŋ swasana.
5. yayaḥ ḷĕbu katiyup iŋ aṅin, paran kulup yèn nèŋ kono sira, kasaṅsaya salawasé, awit wawarahipun, wrĕdatama kaŋ wus mumpuni, yèn mariŋ suwuŋ sira, muŋ pĕtĕŋ tinĕmu, tanpa tĕpi katĕmahan, tuju paḍaŋ kĕna gĕbyariŋ hyaŋ rawi, mawa prabawa panas.
6. kahiṅkĕtan surya pĕtĕŋ maliḥ, ana uga sunariŋ sasăṅka, naṅiŋ muŋ sawatarané, tur mawa prabawa bun, saṅĕt asrĕp karasèŋ ḍiri, yèn sira mriŋ swasana, swasana puniku, amuŋ aṅin ananira, wor alusiŋ ponaŋ tirta lawan agni, tur uga makṣiḥ kĕna.
7. wuwuḥ sunariŋ surya lan sasi, paran kulup solahira béñjaŋ, tansaḥ panas asrĕp baé, myaŋ katiyupi bayu, aṅalaya ṅubĕṅi laṅit, aṅiñjĕŋ tanpa sotya, iku aranipun, karṣa ṅuṅsi ṅĕndi sira, trilokaya kĕbak kalimputan déniŋ, iŋ suwuŋ myaŋ swasana.
8. layak lamun kaŋ duruŋ udani, arṣa maṛĕm nèŋ suwuŋ kéwala, dumèḥ mĕṅku sakabèhé, tan wruḥ lamun puniku, pĕtĕŋ kĕmput tanpa watawis, kaŋ ṛĕmpit kalimputan, tĕmaḥ ñanuk ñanuk, wĕnèḥ aṅaṅgĕp swasana, dumèḥ alus aṅlimputi ganal alit, ḷĕmbut ṅèbĕki jagad.
9. naṅiŋ tan wruḥ yèn iku trimurti, tri tĕtĕlu murti kaalusan, alus tĕtĕlu tĕgĕsé, liriŋ alus tĕtĕlu, aḍĕm panas kalawan aṅin, iku ananiŋ hawa, ṅuni asalipun, iṅkaŋ panas sakiŋ surya, iṅkaŋ asrĕp asal sakiŋ sitaṛĕsmi, aṅin sakiŋ traṅgana.
10. tataniŋ kaŋ surya lintaŋ sasi, samya mubĕŋ ñakra magiliṅan, urun prabawa katriné, wor dadya swasanèku, măṅka wrananira hyaŋ widdhi, déra marṇèŋ kaanan, sèsiniŋ rat saguŋ, dumunuŋ mriŋ suwuṅira, sosotya muṅgwiŋ ĕmbanan salami, tan kĕna pinisaḥna.
11. mantuk tĕtĕp tanpa kartinèki, kamot momot amoŋ amisésa, sahisiniŋ jagad kabèḥ, bhumi baruna klĕbu, nora mrojol sakiŋ trimurti, isiné kahisénan, iŋ saananipun, aṅlimputi kalimputan, pĕpĕt tanpa watĕsan pĕnuḥ trimurti, tuhu amisésèŋ rat.
12. trilokaya tan ana kaŋ mirip, lir swasana prandéné punika, makṣiḥ kawula jatiné, kataṇḍa ananipun, duruŋ laṅgĕŋ nora nĕŋ ĕniŋ, pan makṣiḥ darbé obaḥ, kĕna suda wuwuḥ, tĕtĕp muŋ băṅsa pirantya, dadi dudu anané kaanan jati, jati jatiniŋ gĕsaŋ.
13. balik kaŋ ran sajatiniŋ urip, sayĕktiné mĕnĕŋ nora obaḥ, naṅiŋ iṅkaŋ obaḥ kabèḥ, yèn nora lan nĕṅipun, wuruŋ nora sida amosik, lan tan rupa tan warṇa, naṅiŋ jatinipun, sabĕn sabĕn ana warṇa, pan wus lawan rupanira kaŋ sajati, kalamun tanpa rupa.
14. yatnanana yĕkti nora warṇi, warṇa rupa nora bisa pisaḥ, warṇa warana tĕgĕsé, rupa urip satuhu, dadi warṇa kabèḥ puniki, tĕtĕp waranèŋ gĕsaŋ, kaŋ misésèŋ suwuŋ, suwuŋ kaŋ woriŋ jiwaṅga, ulatana sumiṅité anèŋ ṅĕndi, aja mucuŋ kéwala.
2. pocuŋ
1. ṅuni iṅsun ṅĕṅlĕŋ iŋ tyas puṅun puṅun, ṅudi ananiŋ hyaŋ, gya pruhita pra maharṣi, wawarahé tan sama awarṇa warṇa.
2. ana wiku mĕḍar ananiŋ hyaŋ aguŋ, yahiku cahyanta, kaŋ ṅlimputi woriŋ ḍiri, wayaṅannya dumunuŋ nèŋ nétranira.
3. bundĕr ṅuwuŋ lir sunariŋ surya nrawuŋ, aran nur mukhamat, yèn prapta antarèŋ pati, iku suṛĕm yèn siṛĕp sira palastra.
4. marmanipun yèn wus surut urupipun, aywa was sumĕlaŋ, liŋ liṅĕn ywa koṅsi lali, pilutanĕn iŋ kono gwaniŋ kamulyan.
5. ana muwus wosiŋ gĕsaŋ sayĕkti wus, kawasésèŋ sira, woriŋ sarira ri ratri, iya iku rasa lan paṅrasanira.
6. wor sawujud nèŋ napas anpas tan nupus, prataṇḍané ana, yèn napasira wus anis, yĕkti sirṇa atmanira sakiŋ raga.
7. marmaniṅpun yèn sira yun praptèŋ luyut, aywa kalayatan, oswanta racutĕn nuli, worṇa lawan rasa lan paṅrasanira.
8. paṅrasèku anané gusti sahèstu, kawula rasanta, yèn rasa lan paṅrasa wis, wor sajuga tĕtĕp iŋ panuṅgalira.
9. sirṇa sampun tanpa rasa paṅrasa wus, muliḥ mulanira, duk sira duruŋ dumadi, bali nĕŋ niŋ nora muni nora muna.
10. wĕnèḥ muwus jatiné kaŋ murwèŋ iḍup, yahiku pramana, kaŋ masésa iŋ sakalir, dumunuṅnya nèŋ utyaka guruloka.
11. iya iku tĕmbuŋ arab bétal makmur, taṇḍané kaŋ ñata, anèŋ gĕbyariŋ paṅèkṣi, lwiḥ waspada wruḥ gumlariŋ alam dunya.
12. yèn puniku ḷĕṛĕm sira nuli turu, yèn sirṇa palastra, mulané èṣṭiné kaki, muŋ pramana kaŋ bisa nuntun mriŋ swarga.
13. wĕnèḥ jamhur amarṇa kaŋ maha ruhur, yahiku suwara, kaŋ kuwasa murwèŋ urip, prataṇḍané lamun sirṇa swaranira.
14. praptèŋ lampus mĕnĕŋ nora bisa muwus, sawĕnèḥ paṇḍita, mĕjaŋ ananiŋ hyaŋ widdhi, iya iku aṅĕn aṅĕn balé atma.
15. nèŋ jro jantuŋ jĕnak jĕñjĕm añjĕjaṅkuŋ, sakrĕjĕtiŋ sĕja, rasa paṅrasa cipta sir, păñcamaya păñcadriya kawasésa.
16. marma yèn wus prapta antaraniŋ lampus, aṅĕn aṅĕnira, nĕŋna aywa mobaḥ mosik, rasanira sirṇakna mriŋ kono poma.
17. yĕkti nĕmu sajatiné kaananmu, tan susaḥ sinĕdya, pan wus maṅgiḥ sawargadi, tĕmaḥ nikmat mupaṅat salaminira.
18. wĕnèḥ nuduḥ jatiniŋ urip dumunuŋ, anèŋ sulbinira, papan kanikmatan yĕkti, purwèŋ urip sakiŋ kono saṅkanira.
19. marma bésuk yèn wus arṣa praptèŋ layu, iŋ paṅèṣṭinira, dumunuŋna anèŋ sulbi, yĕkti mulya waluya mriŋ uripira.
20. tur amĕṅku salwiriŋ rasa sadarum, muŋ nikmat mupaṅat, salamĕt salami lami, laṅgĕŋ urip măṅka witiŋ rasa mulya.
21. wĕnèḥ suŋ wruḥ jatiniŋ gusti wus karuḥ, béñjaŋ lamun sira, wus paṛĕk antarèŋ pati, ana rupa kadya rupanta priyăṅga.
22. kaŋ akonus sakiŋ kamanuṅsanta wus, saplak nora siwaḥ, amuŋ mawa cahya putiḥ, iya iku kaŋ aran mayaṅga séta.
23. lamun iku wus kadulu iŋ sirèku, ciptaa anuṅgal, sĕjakna gĕnti umañjiŋ, dadi tĕtĕp warăṅka mañjiŋ curiga.
24. rampuŋ putus wus tan ana kaŋ winuwus, tĕtĕp iŋ panuṅgal, panuṅgaliŋ kwula gusti, muliḥ mulya tan ana gusti kawula.
25. wĕnèḥ wiku ṅaku wikan kaŋ amĕṅku, wus tanpa wĕwéka, béñjaŋ mèḥ prantaniŋ pati, ana cahya séta prapta gĕŋ sasada.
26. iya iku nur mukhamat kaŋ satuhu, uripiŋ manusa, wawasĕn aywa gumisir, tut wurinĕn tan antara yĕkti mukṣa.
27. namu namu mriŋ wiyat nukṣma dumunuŋ, ananiŋ traṅgana, yèku cahya kaŋ nĕlahi, iŋ bhuwana wus laṅgĕŋ kaananira.
28. maliḥ asuŋ tuduḥ ananiŋ hyaŋ aguŋ, cahya maya maya, jumĕnĕŋ muṅgwiŋ ograniŋ, tuntuŋ driya anartani trilokaya.
29. bétal makmur bétal mukharam katĕlu, iŋ bétal mukadas, sumunar praptèŋ paṅèkṣi, liyĕpĕna katon ponaŋ cahya maya.
30. anarawuŋ warṇa warṇa wor dumunuŋ, liyĕpiŋ paniṅal, béñjaŋ yèn arṣa ṅĕmasi, cahya iṅkaŋ kahèkṣi siṛĕp sadaya.
31. wit ginuluŋ iŋ cahya kaŋ nèŋ jro jantuŋ, waluya ṅayaṅan, nukṣmèŋ cahya kaŋ sajati, kaŋ apaḍaŋ gumilaŋ tanpa wayaṅan.
32. laṅgĕŋ ṅuwuŋ aṅèbĕki bhuwanaguŋ, muliḥ purwanira, duk duruŋ tumurun mariŋ, ṅarcapada awarṇa warana raga.
33. maliḥ guru amĕjaŋ jatiniŋ ṅèlmu, iŋ kamulanira, ananiŋ hyaŋ maha widdhi, amuŋ sabda gahib wor iŋ rat warata.
34. cahyanipun gumilaŋ gilaŋ narawuŋ, tanpa wawayaṅan, nĕlahi sèsiniŋ bhumi, gya tumurun wor rahsa dadya manuṅsa.
35. marma tĕmtu yèn prapta antarèŋ layu, ana cahya prapta, gumilaŋ piṇḍa aṅganiŋ, tirta muṅgwiŋ ron lumbu amaya maya.
36. dyan puniku ciptanĕn dadya sawujud, lawan sabdanira, kaŋ sĕnĕdan samadyaniŋ, ṅĕn aṅĕn ta yĕkti waluya sampurṇa.
37. mulya waṅsul mriŋ asalira rumuhun, sabda gahib babar, bali aṅèbĕki bhumi, tribhuwana kĕbak baṅkit mĕgat ñawa.
3. mĕgatruḥ
1. wirayaté para wiku kaŋ duruŋ wruḥ, jatiniŋ kaanan jati, kaya kaŋ kawahyèn ṅayun, kabèḥ datan ana sisip, bĕnĕr wus nèŋ raga maṅgon.
2. sabab iku kabèḥ waranèŋ hyaŋ aguŋ, ṅuni dug duruŋ dumadi, ya kĕkĕt rakĕt tan kumpul, palikĕt nèŋ nukat ghahip, yayaḥ atuṅgil sawiyos.
3. kadyaṅganiŋ kaŋ swasana wor lan suwuŋ, nuṅgal rasa séjé wrĕni, jatiné ywa swasanèku, kaŋ manukṣma jroniŋ ḍiri, katarik duk murwèŋ rahos.
4. rahsanira yayaḥ réna wor salulut, kinĕmat siŋ nikmatnèki, kamot kaŋ swasana katut, kaanané kaŋ sajati, nèŋ mani woriŋ sawiyos.
5. iya iku purwaniŋ hyaŋ maha aguŋ, amarṇèŋ titaḥ sakalir, sakiŋ kalaraté korut, kĕkĕt nèŋ maniṅkĕm nuli, kumulit ṅĕmuli koṭoŋ.
6. tan antara kaŋ suwuŋ nulya kumĕdud, katut kaŋ swasana kosik, kasrĕg panas lan srĕpipun, kumariṅĕt tri sutèṅsi, wus kasat mata sayĕktos.
7. karṣaniŋ hyaŋ kañataan dadi wujud, wujudiŋ kaŋ jabaŋ bayi, wanodya tanapi jalu, lawan kaŋ swasana makṣiḥ, anèŋ jro dadi pirantos.
8. pirantiniŋ manuṅsa kaŋ alus alus, ḷĕstari manukṣmèŋ ḍiri, anaṅiŋ pakartinipun, swasana manut piranti, kaŋ awaḍag uratiŋ woŋ.
9. karṣaniŋ hyaŋ pinéraŋ dadi tri juru, kocap iŋ hidayat jati, kapala ran bétal makmur, swasana kumriṅĕt dadi, tirta maya nèŋ jro panon.
10. iya aran tirtamarta kamaṇḍanu, pardikané bañu urip, loro jroniŋ jaja kasbut, iŋ bétal mukharam isi, jĕjantuŋ iŋ jĕro koṭoŋ.
11. muŋ swasana nèŋ ṅriku manukṣmèŋ suwuŋ, tĕlu koṇṭol dèn wastani, bétal mukhadas puniku, mèsi mani madi wadi, ya isis wasana koṭoŋ.
12. amaṅsuli pakartiniŋ kamaṇḍanu, tansaḥ amidrawèŋ ḍiri, nurut iŋ daraḥ lan bayu, kaŋ daraḥ kumĕjot kosik, aṅĕbut swasana dados.
13. napasiŋ woŋ mlĕbu mĕtu lira liru, lawan swasana iŋ jawi, dadi tataliniŋ iḍup, băṅsa santri amastani, salat dahim pujiniŋ roḥ.
14. iya iku bĕbasané pra linaṅkuŋ, suwuŋ mĕṅku ananèki, iya anapas kaŋ winĕṅku, yèn suwuṅé jagad iki, mĕṅku swasana iŋ kono.
15. karoñcènĕn kalamun kabèḥ tinutur, lir layaŋ hidayat jati, riṅkĕsé swasana mahu, kaŋ nèŋ jroniŋ raga dadi, piranti kaŋ alus yĕktos.
16. kaŋ nèŋ ruhur dadi cahya pramanèku, mĕṅku păñcadriya nuli, pĕñcar bisa ṅambu ṅruṅu, bisa ñwara lan maṅèkṣi, kaŋ anèŋ tĕṅaḥ kawahos.
17. iya dadi păñca maya kaŋ amĕṅku, rasa paṅrasa cipta sir, baṅkit ṅaṅgit ṅira nuju, ñana ñakrabawa tuwin, swasana kaŋ anèŋ ṅisor.
18. kwasa mĕṅku păñca asmara yahiku, witiŋ kasĕṅsĕm saṛĕsmi, sakiŋ păñcadriya tumrun, nukṣmèŋ păñca maya trus mriŋ, păñcasmara mĕṅku rahos.
19. ran asmara turida piŋ kalihipun, asmara tăntra kapiŋ tri, kapat asmara ciptèku, dadiné woriŋ saṛĕsmi, asmaragama kacriyos.
20. kabèḥ măṅka kalaratira hyaŋ aguŋ, dé swasana kaŋ nèŋ jawi, dadi kaanan sawĕguŋ, téja kuwuŋ kilat ṭaṭit, calèrèt jaladara wor.
21. méga mĕṇḍuŋ ampak ampak guntur kĕtuk, bayu bajra aṅin aṅin, amun amun daru puluŋ, kabèḥ sahisiniŋ laṅit, swasana kaŋ dandos dandos.
22. bhumi bañu wrĕkṣa gulma lata lumuŋ, sarupaniŋ kaŋ kumĕlip, kaŋ gumrĕbĕg kaŋ kumrumpyuŋ, tan lyan swasana kaŋ dadi, tuhu swasana kuwahos.
23. tĕtĕp dadya wawakiliŋ kaŋ mahaguŋ, kawasa murwèŋ sakalir, marma pra guru kaŋ tan wruḥ, ananiŋ kaanan jati, swasana kaŋ salin ĕṅgon.
24. nuli paḍa dèn aṅgĕp kaŋ maha aguŋ, pinaṅran pinuṇḍi puṇḍi, kaya kaŋ kawahyèŋ pucuŋ, tan wruḥ yèn iku trimurti, salin gon salin lalagon.
25. salin asma lan salin paṅwasanipun, lamun manukṣmèŋ mriŋ caciŋ, yĕkti muŋ maṅkĕṛĕt mulur, yèn manukṣmèŋ walaŋ baṅkit, mibĕr maḷĕtik mañcolot.
26. yèn mañjiŋ woŋ bisa ṅaṅgit bisa ṅiduŋ, tĕrkaḍaŋ bisa udani, mariŋ sajatiniŋ iḍup, wruḥ saṅkan paraniŋ urip, paṅrakitiŋ rèḥ tan kéron.
27. marmanira kabèḥ paṅaṅgĕpiŋ guru, kaŋ paḍa maṅéran mariŋ, rasa paṅrasa cahya nuŋ, maṅran mriŋ pramana tuwin, maṅran swara ciptèŋ batos.
28. kaya iṅkaŋ kawahya iŋ sĕkar pucuŋ, sayĕkti béñjaŋ umañjiŋ, mriŋ swasana moriŋ suwuŋ, arṣa ṅuṅsi mariŋ ṅĕndi, ṅarṣa wuri ḍuwur ṅisor.
4. paṅkur
1. jaba jĕro kahèbĕkan, iŋ swasana sanadyan kaŋ tan ṅèlmi, iya manukṣmèŋ mriŋ suwuŋ, kawur iŋ tawaŋ towaŋ, nora béda lawan iṅkaŋ ahli ṅèlmu, kalamun nora waspada, dunuṅiŋ kaanan jati.
2. sajatiniŋ uripira, kaŋ wus awor tan pisaḥ siyaŋ ratri, sajroniŋ kur'an kasĕbut, minkibaril warita, gusti allaḥ rakĕtan lan rasanipun, liré wus awor sarasa, rasa sajroniŋ ṅahurip.
3. urip iṅkaŋ mawa jiwa, jiwanira măṅka warana jati, jatiniŋ urip puniku, yĕkti tan ṅaṅgo ñawa, nora ñwara nora gănda nora dulu, nora muna tan ṅandika, tanpa rasa paṅrasa nir.
4. amuŋ nĕŋ ĕniŋ dyatmika, nèŋ kaanan ananira pribadi, naṅiŋ kabèḥ kaŋ kadulu, apan wus kahuniṅan, kaŋ karuṅu wus kapyarṣa iŋ hyaŋ aguŋ, kaŋ kaambu wus kagănda, kaŋ ñwara kasabda yĕkti.
5. kaŋ aṅrasa wus karahsan, inaloha huwasamiṅwal ṅalim, allaḥ iku jĕmbar aguŋ, uniṅa saniṣkara, nora samar ya nukat ghahipbulguyup, liriŋ wiji pĕpiṅitan, sumiṅit iŋ rahsanèki.
6. naṅiŋ piliḥ kaŋ uniṅa, lamun ora lawan pituduḥ jati, lapalé layu khayapu, tan kĕna kaya ṅapa, ananira samar tan kĕna ginayuḥ, yèn ora lan wahyuniŋ hyaŋ, naṅiŋ wajibul wujudi.
7. liré wajib wujudira, iya aran kayun ila birakin, urip tanpa jiwanipun, muŋ daya prabawanya, aṅuripi sèsiniŋ bhuwana saguŋ, nĕṅé bisa karya obaḥ, kayun ila pindarèni.
8. bisa urip roŋ paṅgonan, liré urip nèŋ ṅalam kabir sahir, kabèḥ muŋ pribadinipun, iŋ kéné kana ana, iya kana kéné tan ana ñakuṭu, muŋ sawiji nora owaḥ, laṅgĕŋ iŋ salami lami.
9. ana sasmitanirèŋ hyaŋ, muñèŋ kitab dakhahikul akhahik, ḍiṅin nitahakĕn kayu, sajaratul yakina, tuwuḥ anèŋ jroniŋ alam adam makdum, ajali abadi ika, tĕgĕsé gĕsaŋ sajati.
10. tumuwuḥ anèŋ bhuwana, ya duk makṣiḥ waŋ ṅuwuŋ soñaruri, suwuŋ iŋ salaminipun, anèŋ kaanan kita, laḥ puniku ulatana dèn kapaṅguḥ, takokna mriŋ pra paṇḍita, kaŋ puṇḍuḥ piṇḍaniŋ pati.
11. prandéné kaŋ wus sampurṇa, iŋ paṅawruḥ tan samar woriŋ ḍiri, kaŋ ṅaliṅi wus kadulu, mléla tan kalamatan, wruhiŋ prana pambukané tan kaliru, jro liyĕp layap karasa, sakiŋ prana pranawaniŋ.
12. kaŋ maṅkono winastanan, sampun pana nuṅku pudya sĕmèdi, maladiniŋ iŋ panĕkuŋ, muni sajroniŋ kur'an, antamutu kablal mahota puniku, liriŋ mati jroniŋ gĕsaŋ, iya gĕsaŋ jroniŋ pati.
13. kaŋ maṅkana sayĕktinya, piliḥ janma kaŋ baṅkit aṅlakoni, sakiŋ aṅèl sakalaṅkuŋ, kalamun duruŋ ĕkas, paṅĕkĕsiŋ iktékat sayĕkti takut, éwadéné kĕna uga, ginulaṅa muriḥ lantiḥ.
14. déné ta purwèŋ paṅaraḥ, raḥ arahĕn sisiriḥ sabĕn ari, añĕñuda hawa napsu, yèn wus ṅrasa kawasa, kalamăṅsa siṛĕpiŋ woŋ liṅsir dalu, ṅuṅsia gon kaŋ prayoga, papan kaŋ pakantuk sĕpi.
15. nulya ṅracut păñcadriya, kwasanira sirṇakna ywa lumaris, nétra liyĕpĕn anuju, graniŋ arga tur séna, pramananta worṇa liyĕpiŋ pandulu, mulat lumakṣa nèŋ oswa, dèn santosa ywa gumiṅsir.
16. dyan nata lakṣitèŋ oswa, mahya mañjiṅira dèn sarèḥ ririḥ, winawas ywa koṅsi wor suḥ, wor liyĕpiŋ paniṅal, dèn gumoloŋ ḷĕṅiŋ tyas tantara tamtu, rasaniŋ aṅga karasa, jro ros rosan kèṅsĕr kosik.
17. katarik nĕṅiŋ pirantya, tan antara gumrĕmĕt mara mariŋ, marak wor oswa rumasuk, ywa was dèn tĕtĕk sira, sĕriŋ rasa karasa trusiŋ susuṅsum, samantara rasanira, woriŋ paṅrasa sirṇanis.
18. kari kalaratiŋ atma, woriŋ warṇa rupa wus mulya tuṅgil, tuṅgil iŋ kaananipun, ananiŋ kaĕniṅan, konaŋ onaŋ ménak iŋ kanikmatan nuŋ, iŋ kono sakarṣanira, déra mriḥ karkatiŋ kapti.
19. sayĕkti wus katarima, kaŋ narima ananira pribadi, wit wus paworiŋ sawujut, roro roroniŋ tuṅgal, tuṅgalira makṣiḥ kĕkaliḥ puniku, marga lagi panuṅgalnya, sajroniŋ madya puniki.
20. duruŋ tuṅgal iŋ wasana, marmanira makṣiḥ waṅsul kĕkaliḥ, lir krĕṣṇa kalawan wiṣṇu, lamun krĕṣṇa katiṅal, saŋ hyaŋ wiṣṇu sayĕktiné tan kadulu, yèn wiṣṇu nèŋ suralaya, bhaṭara krĕṣṇa tan kèkṣi.
21. naṅiŋ krĕṣṇa iya krĕṣṇa, wiṣṇunira wiṣṇu sajati, béda pamoriŋ ṅaluyut, krĕṣṇa sirṇa waluya, puliḥ wiṣṇu ṅayaṅan salaminipun, marma panuṅgaliŋ madya, muŋ aran gambuḥ iŋ widdhi.
5. gambuḥ
1. ya siŋ gatuṅgal lagu, panĕkuṅan kaŋ kocap iŋ paṅkur, lan paṅukut paṅracut patrapiŋ pati, muŋ béda masésa iku, winasésa praptèŋ layon.
2. déné patrapiŋ lampus, wasitané pra wiku kaŋ putus, pawartiné antara kuraŋ tri sasi, rasaniŋ rasa wus surut, suṛĕm sumirat iŋ rahos.
3. nuntun karkatiŋ kalbu, samubaraŋ kaŋ kambaḥ kaambu, kĕmba kĕmba kumambaŋ tan malbèŋ budi, mriŋ kabudayan tumambuḥ, abĕr bérawaniŋ batos.
4. yèn wus maṅkono tamtu, antara ri sranduniŋ aṅgamu, ana iṅkaŋ krasa lara salaḥ siki, ĕmbuḥ piḷĕk watuk ṅĕlu, muḷĕs luṅkraḥ tyas kaḷĕson.
5. yèn wus maṅkono kulup, aywa ulap kumĕlab iŋ kalbu, kabèḥ baraŋ kaŋ dadi triṣṇaniŋ ati, myaŋ salwiriŋ kaṛĕmamu, biratĕn aywa katoṅton.
6. malaḥ nulya mriḥ laku, anirṇakna kabèḥ hawa napsu, liriŋ hawa kabèḥ pĕpéṅinan kaki, nĕpsu duduka puniku, kalamun baṅkit maṅkono.
7. kawarti wus tartamtu, tan karasa rasaniŋ laramu, muŋ karasa srira ḷĕsaḥ sawatawis, tĕmaḥ waspadèŋ pandulu, tan was pamawasiŋ batos.
8. sakiŋ ṛĕsik tyasipun, mriŋ pĕputon mantĕp tan tumpaŋ suḥ, dyan aywa saḥ ṅèṣṭi woriŋ kwula gusti, lir kajarwèŋ sĕkar paṅkur, mriḥ ywa kéron praptaniŋ don.
9. yèn wusiŋ kèkṣi konus, kamanuṅsanira sayĕkti wus, saya paṛĕk praptaniŋ antarèŋ pati, dèn patitis pamawasmu, wawasĕn dipun waspahos.
10. iku măṅka panuntun, sasmitèŋ hyaŋ iṅkaŋ maha aguŋ, aywa giṅga gulaṅĕn guluṅanèki, béñjaŋ yèn wus praptèŋ lampus, iku maliḥ sapatĕmon.
11. yèn wus ḷĕsaḥ aṅgamu, gya pasraha mapan kaŋ pakantuk, lir manĕkuŋ kaya kaŋ kawahyèŋ ṅarṣi, ṅrakĕta nĕṅiŋ paṅukut, myaŋ paṅracut aywa kéron.
12. yĕkti tantara daṅu, suṛĕm susunariŋ pramanamu, katut déniŋ kasatiŋ kaŋ tirta wĕniŋ, iya tirta kamaṇḍanu, iŋ kono dipun mirantos.
13. émpakna pĕpuntonmu, paṅrakitiŋ ṅukut ywa kalimput, saṛĕṅana pĕtiŋ pramana dèn aglis, puput wus layu khayapu, tĕlas wasitaniŋ mahot.
tamat.
