ḍaṇḍaŋgula
1. lir maṅisĕp maduniŋ kaŋ sari, surasané dènira mandaya, tan milalu kamuktèné, muŋ kétaŋ prajanipun, kaŋ pininta jroniŋ sĕmadi, mugi ta pinaṛĕṅna, mriḥ arjèŋ wadyaguŋ, katĕntrĕmna iŋ tyasira, winantua iŋ saṇḍaŋ kalawan bukti, wruha iŋ yogatama.
2. sumarambaḥ maraŋ garwa siwi, kapiŋ kaliḥ iŋ panĕḍanira, mugi para atmajané, kaŋ sampun sinuŋ luṅguḥ, nama paṅran ṅrahosa biliḥ, sampun antuk nugraha, nuṅgil asmanipun, lawan kaŋ murbèŋ bhuwana, dipunsukur dèn sagĕd mrĕnahkĕn ḍiri, ṅlĕṅgahi namanira.
3. sumawana saḍèrèké sami, priya mugi éṅgal sumusula, tuk nugraha lir kadaṅé, lawan pamujinipun, ḍatĕŋ putra kasampun wañci, diwasa nampènana, iŋ sasmitanipun, kaŋ rama dènnya mriḥ arja, bantonana iŋ lampaḥ iṅkaŋ prayogi, lan pamĕsuniŋ driya.
4. lumayané dènira maṅudi, upamané palwa nèŋ samodra, nadyan wasis paṇḍégané, kalamun palwanipun, awrat datan samĕkta sami, maṅsa gé praptèŋ paran, tansaḥ kombak kombul, maṅkana para sujanma, tanpa brata ṅandĕlakĕn yayaḥ wibi, tan tĕka kaŋ sinĕdya.
5. kaŋ maṅkono kadi uḷĕr turi, awit nĕtĕs praptaniŋ diwasa, tan luṅa saka ĕṅgoné, kaŋ maṅka bojanipun, muŋ galihé ponaŋ wit turi, lami lami katrĕsan, boloŋ dĕḷĕgipun, uḷĕr mĕdal siŋ sasana, dadi kupu bambraŋ adi iṅkaŋ warṇi, wus prapta kaŋ sinĕdya.
6. tuk nugraha katĕkaniŋ kapti, nadyan raga ana dadinira, lamun kojur lalakoné, wit turi saya alum, marga sakiŋ atiné rujit, uḷĕré nora doyan, ilaŋ rahsanipun, yèn katĕmpuḥ iŋ prahara, kayu pokaḥ kaŋ uḷĕr cinucuk pitik, tĕmaḥ sirṇa kalihña.
7. kaŋ saloka tumrapé nèŋ janmi, kayu turi yèka yayaḥ réna, uḷĕr kaŋ maṅka sutané, wus tamtu bapa biyuŋ, ṅupakara wèḥ saṇḍaŋ bukti, myaŋ mrihatinkĕn iŋ tyas, suŋ pémut rahayu, koṅsi praptaniŋ diwasa, lamun putra grahita darbèni budi, wĕlas mriŋ ibu rama.
8. aṅupaya wĕkasaniŋ ḍiri, pirabara bisa amaḷĕsa, maraŋ sihé woŋ tuwané, lamun tan bakitipun, amuŋ aja adadi kardi, myaŋ karya susahira, iku saminipun, uḷĕr kaŋ mĕtu siŋ wrĕkṣa, dadi kupu anak bisa dadi pyayi, kĕna tinon iŋ kaṭaḥ.
9. kaŋ maṅkana bĕgja dèn arani, prihatiné ana dadinira, séjé kaŋ tiwas lakoné, anaké mèṅwèŋ tuduḥ, wus diwasa datanpa budi, wĕruhé muŋ woŋ tuwa, aṅgĕlar piaṅkuḥ, saṇḍaŋ paṅan mriḥ samĕkta, duwé japa aku anaké woŋ sugiḥ, tur tĕḍakiŋ awirya.
10. lamun datan maṅkénéya isin, apa aku anakiŋ sudagar, ṅétuŋ paṅan sadinané, kabèḥ titaḥ hyaŋ aguŋ, ana urip ya ana bukti, kaŋ wĕruḥ sésuk pasa, ujar kaŋ puniku, boḍo buṇḍuné daléya, kaŋ maṅkono lamun tan maṅan saari, ñaliṅuk jroniŋ driya.
11. dadi goroḥ ujaré kaŋ uwis, taṅèḥ lamun tĕrus iŋ wardaya, tékadé améñcla méñclé, bañjuré nora wuruŋ, ṅandĕlakĕn mriŋ yayaḥ wibi, salaminé maṅkana, kalé iŋ tumuwuḥ, dènira ana iŋ duña, datan lama samubaraŋ owaḥ giṅsir, raga puwara sirṇa.
12. kayaparan yèn kalakon béñjiŋ, yĕkti kadi uḷĕr iṣṭanira, sampyoḥ baṛĕŋ lan uwité, naṅiŋ ta majadipun, kaŋ rumiyin mriŋ alam suci, tamtuné woŋ atuwa, anak kari maṅu, gĕtuna jĕr wus kaliwat, nora wuruŋ uripé tan kadi ṅuni, duk makṣiḥ sudarmaña.
13. marma sinuŋ paṅèṅĕt samaṅkin, pra atmaja muga andriyaa, iŋ tĕmbé kawusanané, kalamun makṣiḥ ayun, mriŋ kadarman déra dumadi, darajad ginayuha, iŋ sapaṅkatipun, timbaṅa lan baṅsanira, supayané iŋ béñjaŋ aywa prihatin, yèn kasor kaŋ prabawa.
14. déné laku iṅkaŋ dadi margi, niŋ kawiryan yogya sumurupa, iṅkaŋ maṅka pusakané, aja agawé ṛĕṅu, myaŋ sakṣĕrik saguŋ dumadi, dipunpracayèŋ sukṣma, lan aja tĕkabur, tiṅalira kaŋ sañata, ywa sumiṅgaḥ wisésanira hyaŋ widdhi, aja aṅumbar karṣa.
15. aja pĕgat suhulirèŋ widdhi, dèn dohĕna saliriŋ bañcana, rinĕkṣaa salaminé, sinuṅa tyas kaŋ émut, dinawakna déra dumadi, nĕmua iŋ kamulyan, titi kaŋ pitutur, kĕmis taṅgal piŋ wolulas, madilawal tahun jé dèn saṅkalani, tan gatra mulaŋ siswa.
