kinaṇṭi
2. sastra tĕgĕsé pan kawruḥ, yèku paniṅal kaŋ ĕniŋ, arja puniku minulya, sukci kaŋ ananirèki, éndra pan aguŋ asamar, aṅlimputi saananiŋ.
3. sèsiniŋ kaŋ bhuwana, yèku jatiniŋ ṅahurip, jumĕnĕŋ laṅgĕŋ priyaṅga, kaŋ kawasa pariŋ urip, kaŋ gumlar iŋ bhumintara, saṅgyaniŋ para dumadi.
4. yèku kaŋ wĕnaŋ sinĕbut, allaḥ taṅala sajati, kaŋ aguŋ mulya datira, kaŋ élok sipatirèki, iṅkaŋ wisésa asmaña, sampurṇa apṅalirèki.
5. wèḥ ayuniŋ rat sawĕguŋ, amarṇa sipat sakalir, kaŋ andum rahsaniŋ jagad, añamadi ganal alit, kaŋ kawasa wicakṣaṇa, kaŋ adil muraḥ iŋ dasiḥ.
6. tan ana iṅkaŋ ñakuṭu, jumĕnĕŋ urip pribadi, iŋ satuhuné dat sipat, asma apṅaliŋ hyaŋ widdhi, wus dumunuŋ iŋ kaanan, ananiŋ manuṅsa iki.
7. katitipan rahsanipun, paṅéran kaŋ maha sukci, puniku wahananira, datiŋ sastra kaŋ piniṅit, sotyadi sasaṅkaniŋ rat, mĕṅku prasidaniŋ dadi.
8. arjaniŋ parasdya nulus, kaŋ kawasa amumpuni, saliriŋ rasa dumina, lalantaraniŋ ṅahurip, tumuruniŋ sastra cĕṭa, jumĕnĕŋ nukat ginahib.
9. sakiŋ alamiŋ alimut, ghaibiŋ allaḥ sajati, tumitis iŋ daḷĕm rahsa, rahsaniŋ priya duk lagi, sĕṅsĕmiŋ asmaragama, pamoriŋ jalu lan èstri.
10. duk mĕḍar rahsaniŋ kakuŋ, ḷĕñĕp murcitaniŋ akṣi, tiniyup iŋ kanikmatan, iŋ kono pamorirèki, datiŋ atma kaŋ wisésa, kadim sajatiniŋ urip.
11. amoriŋ dat lan rasèku, iṅaran wadi lan mani, tumiba iŋ guwa garba, acampuḥ kalawan madi, yèku rahsaniŋ wanita, kumpulé dadi sawiji.
12. aran manikĕm puniku, yèku wawaḍahiŋ urip, wujud siji catur aran, mani madi lawan wadi, maniṅkĕm sakawanira, yèku wijiniŋ dumadi.
13. dadiniŋ manuṅsa iku, sakiŋ warṇa catur siṅgiḥ, déné wiji kaŋ ṅaranan, sariniŋ bhumi lan gĕni, miwaḥ sariniŋ maruta, sakawan paṭiniŋ wariḥ.
14. kaŋ samya iṅakĕn iku, lahiré sipatiŋ widdhi, wus wujud nèŋ catur rahsa, yèku baboniŋ jasmani, minaṅka sasaṇḍanira, abuniŋ roḥ kaŋ sajati.
15. abuniŋ roḥ tĕgĕsipun, baboniŋ ñawa sakalir, kaŋ ṅuripi sakèḥ rasa, iṅaran ñawa rohkani, yèku tohjaliniŋ sastra, sipat cahya muhkamadi.
16. mukamad iŋ tĕgĕsipun, wĕnaŋ sinĕmbaḥ pinuji, sisirahiŋ kanikmatan, rasaniŋ bhuwana yĕkti, satuhu sosotyaniṅrat, nirmala waluya jati.
17. jatiné sapa iṅkaŋ wruḥ, ṛĕsminiŋ jagad puniki, minulya iŋ uripira, sinuŋ paḍaṅiŋ paṅgaliḥ, praptaniŋ pati sampurṇa, dumunuŋ iŋ swarga luwiḥ.
18. uripiŋ sukṣmanirèku, anuṅgal hyaŋ sukṣma sukci, wus roro roroniŋ tuṅgal, tan kĕna iṅaran kaliḥ, iya uripiŋ kawula, satuhu uripiŋ gusti.
19. kawasa wisésanipun, kawula kalawan gusti, tan kĕna yèn pisahĕna, sampurṇa purwaniŋ dadi, laṅgĕŋ kahuripanira, si kombaŋ anèŋ swargadi.
20. anukṣmèŋ sagara madu, madu maduniŋ ṅahurip, ñamadi jiwa raga, iya ragané pribadi, kaŋ kawasa marṇa sipat, sipatiŋ manuṅsa iki.
21. dadi sakiŋ rasa catur, kaŋ wus kajarwa iŋ ṅarṣi, mani iku dadi rupa, madi uripé iŋ ati, wadi dadi ṅakal ñata, manikĕm ñawanirèki.
22. wujudiŋ catur warṇèku, kataṇḍa nèŋ nétra sami, manikĕm undĕriŋ nétra, mani iku dadi manik, wadi puputihiŋ tiṅal, déné kaŋ iṅaran madi.
23. urip iŋ nétranirèku, warṇa iṅarané siṅgiḥ, rahsaniŋ paniṅal ñata, punika iṅaran madi, dé wiji kaŋ catur aran, sariniŋ bhumi pan dadi.
24. carmaniŋ manuṅsa iku, sari gĕni dadya dagiŋ, sariniŋ aṅin dadya raḥ, paṭiniŋ bañu pan dadi, tulaŋ myaŋ otot prasamya, sampurṇaniŋ wujud yĕkti.
25. kaŋ waḍag lawan kaŋ alus, sakiŋ kodratiŋ hyaŋ widdhi, paḍa minaṅka warana, dadya sasaṇḍaniŋ urip, uripé pinariŋ taṇḍa, rahsa kaŋ karasa sami.
26. pininta pinta pinatut, iŋ papan ĕmpanirèki, kabèḥ iku aran ñawa, ana jalu ana èstri, paḍa minaṅka busana, lantaran karṣaniŋ widdhi.
27. marma kaŋ marṣudi kawruḥ, aywana katuṅkul sami, dipunwruḥ iŋ saṅkan paran, saṅkan paraniŋ dumadi, paran praptaniŋ kasidan, wruḥ kasampurṇaniŋ pati.
28. laḥ baya ṅĕndi gonipun, paṅéran kaŋ pariŋ urip, dèn wruḥ sajatiniŋ ṛĕtna, jroniŋ cipta dèn kaliliŋ, akèḥ sotya sama rupa, aja ṅanti salaḥ daliḥ.
29. titipan umurirèku, dèn katur mriŋ kaŋ nitipi, kabèḥ sagoloṅanira, guluṅĕn dadi sawiji, yèn wus gumoloŋ kaŋ cipta, uliḥna purwaniŋ dadi.
