sĕrat sapañana añariyosakĕn sawarṇiniŋ pamaṅgiḥ iṅkaŋ utami iṅkaŋ cuṇḍuk kaliyan rahosipun. déné tĕmbuŋ sapañana sampun tĕmbuŋ jarwa, naṅiŋ rahosipun dados tĕmbuŋ miriŋ, awit tĕmbuŋ sapañana kéṅiŋ kagaṇḍèŋ kaliyan tĕmbuŋ wontĕn, utawi tĕmbuŋ botĕn wontĕn, kaḷĕbĕt tĕmbuŋ sĕnĕŋ, muriḥ tĕraṅipun iṅkaŋ dipunwastani sĕnĕŋ punika nalar iṅkaŋ tanpa waton, liripun sĕnĕŋ kéṅiŋ dipunlampahi manut pikajĕṅiŋ sĕdya, ugi kéṅiŋ dipuncĕgaḥ, déné gaḍahanipun piyambak, tĕgĕsipun dédé bĕtahiŋ sanès.
yèn tĕmbuŋ sapañana kapéraŋ dados kaliḥ sagĕd dados tĕmbuŋ kawi, déné tĕgĕsipun : sapa, sumpaḥ, utawi waḷĕr, ñana : budi utawi kintĕn, amila sĕrat sapañana kéṅiŋ ugi dipunjarwani wawaḷĕriŋ budi, utawi : budi dipunwaḷĕri, punika mandar saya cuṇḍuk kaliyan surahosipun sĕrat wahu, awit sĕrat sapañana ugi kaḷĕbĕt pranataniŋ batin saha pranataniŋ lahir, amila para mahos kĕdaḥ prayitna ḍatĕŋ wados wadosiŋ tĕmbuŋ iṅkaŋ sampun kapacak saḷĕbĕtiŋ sĕrat punika, mĕnawi wontĕn tiyaŋ iṅkaŋ dèrèŋ duṅkap sampun kasĕsa ñéda, awit wadosiŋ sĕrat pañcèn botĕn gampil dipunsumĕṛĕpi. déné paṅaṅgit kula sĕrat wahu kula jarag botĕn mawi kula sĕmantakakĕn ḍatĕŋ para sagĕd, supados botĕn kĕtaṅgĕlan sadaya kaḷĕpatan namuŋ wontĕn iŋ kula piyambak, lan maliḥ sasumĕṛĕp kula dèrèŋ wontĕn baṅsa tyoṅhwa iṅkaŋ karṣa ṅaṅgit sĕrat sĕrat jawi iṅkaŋ mĕdal sakiŋ kasagĕdanipun piyambak, amila kula iṅkaŋ jajal jajal damĕl aṅgitan. sĕjatosipun kaṭaḥ baṅsa tyoṅhwa pranakan wĕdalan tanaḥ jawi iṅkaŋ tikĕl tikĕl kĕsagĕdanipun ṅuṅkuli kĕsagĕdan kula, kados ta swargi tuwan tan ciyuk san tan tjioék san pĕṅaraŋ sĕrat almĕnak pirma ḥ. buniŋ ṅayugyakarta, swargi tuwan cwa cu kwan tjowa tjoé kwan ṛĕḍaktur sĕrat kabar ikpo iŋ surakarta, swargi tuwan li hwi lam lié hwié lam pĕbantu sĕrat kabar jawi kaṇḍa, sisiṅlonipun iŋ sĕrat kabar nétrakĕñcana, tuwin bandar ṅalim, sami iŋ surakarta, tuwan ji siyan liŋ tjhié sian liŋ rumiyin ṛĕḍaktur sĕrat kabar taman pawarta iŋ surakarta, tuwan lim giyogcé aliyas babaḥ sala iŋ surakarta, punika sadaya sami priyantun sagĕd ḍatĕŋ sĕrat sĕrat jawi, kapara takṣiḥ kaṭaḥ iṅkaŋ kula dèrèŋ tĕraŋ.
yèn iŋ pasisir sakiŋ pamiṛĕŋ kula iŋ kĕḍiri tuwan kwik syoŋ hoŋ siyaŋ kwéé siyoŋ hoŋ siya iŋ malaŋ tuwan gwi hok coŋ gwié hok coŋ punika kabaripun sami sagĕd ḍatĕŋ sĕrat sĕrat jawi saha rahos jawi.
déné paṅaṅgit kula sĕrat wahu tĕmbuŋ dalaḥ kasusastranipun tamtu kémawon kaṭaḥ iṅkaŋ kiraŋ saha ḷĕpat, sakiŋ pamaṅgiḥ kula botĕn dados punapa, awit kula pañcèn botĕn aṅsal paṅajaran sarta sanès baṅsa jawi, amila sadaya kaḷĕpatan iṅgiḥ botĕn kula sélaki, namuŋ sakiŋ pañuwun kula para mahos iṅkaŋ aguŋ pariŋ paṅakṣama sadaya kaḷĕpatan wahu.
1. sinom
1. isènipun ṅalam doña, iṅkaŋ wontĕn warṇi warṇi, cilik gĕḍé wus gumĕlar, yaŋ widdhi kaŋ asuŋ takdir, wis maṅkono sayĕkti, mèṅĕti dumadinipun, babatiŋ ṅarcapada, linuri luri sakalir, tarlèn namuŋ kinarya taṇḍa sañata.
2. sĕkar sinom lagya mĕkar, ñaṛĕṅi maṅsané atis, karahos trusiŋ wardaya, warata iŋ sanubari, dadya gagaran yĕkti, pabukané sipat iṅsun, sipat piraŋ prakara, wus datan kĕna winilis, kaanané ṅalam doña pañcèn ñata.
3. ñata iku gamblaŋ gamblaŋ, naṅiŋ araŋ kaŋ udani, kajaba jalma utama, kaŋ tamat maraŋ wawadi, wawadi kaŋ piniṅit, kĕkĕrané hyaŋ maha guŋ, sapa bisa uniṅa, wadiné hyaŋ maha suci, iya iku kaŋ aran antuk nugraha.
4. apa tĕgĕsé nugraha, gañjaran kaŋ sipat wĕniŋ, wĕniŋ sugci tĕgĕsira, sugci iku baraŋ ṛĕsik, datan kaworan drĕṅki, bĕciké amuŋ salugu, liré dudu pulasan, babasané jaman iki, ṅaku trisna ujaré lamis kéwala.
5. yèn maṅkono kĕnèŋ sibat, iku si woŋ tanpa pikir, pikiré muŋ anèŋ ṅarṣa, iŋ wuri tan dèn jagani, saṇḍuṅané woŋ urip, nĕlècèk sapurug purug, iku dudu guyonan, waton sipatiŋ dumadi, dèn patitis yèn ḍĕmĕn mamriḥ utama.
6. yèn arṣa laku utama, tamatna iṅkaŋ sayĕkti, tuntunané kaŋ kuwasa, apa kaŋ kok rasa kaki, kalamun wus ṅĕplĕki, iku ñata aranipun, liré ñata wus paḍa, ḍasar ḷĕgi dèn kĕñami, dèn samara sayĕkti katon ṅaléla.
7. taṇḍané wus tampa bĕrkaḥ, kaṅgonan wahyuniŋ ghaib, nora piliḥ sok janmaa, kaŋ kinasiḥ mriŋ hyaŋ widdhi, tan kĕna dèn lalantiḥ, miwaḥ dèn wulaŋ iŋ guru, guru upamanira, muŋ kinarya ṅuṅkal kuḍi, nora ana guru kaŋ maḍaṅkĕn nala.
8. ana guru kaŋ sañata, ñatané nora kahèkṣi, sipaté tan luṅa luṅa, naṅiŋ nora ṅĕtarani, ṅĕndi dunuṅé kaki, dumukĕn kaŋ koṅsi nutul, yèn sira bisa wikan, bakal wĕruḥ mriŋ hyaŋ widdhi, guru tama pituduhé ḍasar ñata.
9. akèḥ kaŋ paḍa kumĕṭak, tan ṅandĕl maraŋ hyaŋ widdhi, caturan aṅgĕré maṅap, paṅrasané tanpa rugi, muŋ waton bisa muni, iku aran janma suwuŋ, wuŋ waŋ isiné sawaŋ, sinawaŋ saya ṅrĕgĕti, poma kaki micara aja sĕmbrana.
10. gusti allaḥ pañcèn ana, ṅĕndi gonmu wus sumaṇḍiŋ, tĕmĕné makṣiḥ kaliṅan, kaŋ ṅaliṅi goḍoŋ pari, sapa bisa mapari, aliŋ aliṅé kaŋ nutup, paṣṭi katon tĕrwaca, naṅiŋ sira tan udani, pan samono kahélokaniŋ paṅéran.
11. naṅiŋ kaŋ duruŋ waspada, yèn ṅrasakké tĕmbuŋ iki, kinira tĕmbuŋ dolanan, tan wruḥ jatiné sayĕkti, dudu ṅèlmu téyosopi, dudu piwulaṅiŋ guru, mĕtu siŋ paṅawikan, wikanira sakiŋ gusti, kaŋ iṅaran wus antuk wahyu dyatmika.
12. wus ana babasanira, allaḥ kawula lan gusti, coba iku bédakĕna, arané tĕluŋ prakawis, yèn sira wus maṅrĕti, nora tuna iŋ uripmu, tan susaḥ mrana mrana, golèk guru kaŋ nuturi, kaŋ iṅaran wus bisa wor iŋ paṅéran.
13. yèn sira arṣa uniṅa, pamoriŋ kawula gusti, lamun sira jajagoṅan, rasakna iṅkaŋ sayĕkti, yèn sira wus udani, taṇḍa wus antuk rahayu, gañjarané hyaŋ sukṣma, lumintu iŋ sabĕn ari, janma iku sapa tĕmĕn tinĕmĕnan.
14. akèḥ kaŋ ṅiḍĕp iŋ allaḥ, allaḥ paṅgonané ṅĕndi, dina dina dèn upaya, tan ana kaŋ wikan siji, ṅalor ṅidul asĕpi, ṅétan ṅulon tan katĕmu, tĕmuné anèŋ juraŋ, raṅu raṅu malaḥ kolik, nora wĕruḥ gusti allaḥ aṅĕḍaṅkraŋ.
15. ḍuḥ kaki aja sĕmbrana, guguyon lan ṅèlmu gahip, gahip kĕkĕraniŋ sukṣma, malati yèn nora waris, malaḥ sok bilahèni, kadi woŋ mĕndĕm kacubuŋ, aluwuŋ kaŋ mĕndĕma, gampaŋ baṅĕt dèn tambani, mĕndĕm ṅèlmu taṅèḥ dadiya dadanan||
16. pra winasis paḍa ṅucap, jaman édan dèn arani, luguné pañcèn maṅkana, ki pujaṅga kaŋ kaḷĕmpit, métani kuraŋ titi, agé agé dènnya muwus, wus kasèp kadiparan, aṅèl lamun dèn balèni, prayogané ṅakua luputmu paḍa.
17. ḍasarira kuraŋ pana, obaḥ osikiŋ sakalir, liré apa saya cĕṭa, ṭak ṭukmu kuraŋ ṅèmpĕri, riwuté saya wĕniŋ, niniwasi yèn kabañjur, mĕsakaké kaŋ ṅalap, bakal kaliru sayĕkti, titènana ujarku yèn koṅsi cidra.
18. ḍasaré woŋ anom paḍa, lumuḥ ṅaku boḍo sami, bisané muŋ kaya ampas, kinira rasané ḷĕgi, tan wruḥ rasané pahit, tĕrus jaba jĕronipun, sapa kaŋ bakal dilat, rasa pahid dèn kuṛĕbi, datan wikan rasané dadi bayaṅan.
19. bayaṅané woŋ sĕjagad, yèn ṅilo sajroniŋ carmin, kaŋ ala katiṅal ala, kaŋ bagus katiṅal sigit, iku wus mralambaṅi, yèn woŋ boḍo pañcèn cubluk, nora kĕna dèn samar, pañcèn boḍo ṅaku wasis, sastra kara wolak walik nora béda.
20. bédané janma utama, gampaŋ yèn nampani waṅsit, tampa paḍa sanalika, panrimané tur pratitis, lan nora madal sumbi, sawatgata tatas rampuŋ, tur cĕṭa gamblaŋ gamblaŋ, nora ṅaṅgo ika iki, prataṇḍané wus pana wĕdaliŋ cipta.
2. asmaradana
1. kaŋ tan darbé cipta lantip, yèn tampa sasmitèŋ allaḥ, biṅuŋ liwuŋ pikirané, déné sok kumĕṇṭus paḍa, yèn ana pasamuan, lumuḥ asor kudu uṅgul, gul agulé bisa dowa.
2. wani mati dèn arani, tiwas katara yèn kuraŋ, kuraŋ sabaraŋ ñatané, tur duruŋ wruḥ iŋ rasa, rasa iṅkaŋ sañata, kayaparan tĕgĕsipun, kaŋ iṅaran rasa sañata.
3. rasa iku warṇa katri, araŋ kaŋ maṅrĕti paḍa, sawiji wiji bédané, kaŋ sapisan rasaniŋ dad, piŋ piṇḍo rasa sipat, kapiŋ tĕlu rasa tuhu, tuhu araŋ kaŋ kaṅgonan.
4. koṅsi jambul kaki kaki, ṅupaya tuhuniŋ rasa, duruŋ mĕṣṭi yèn antuké, mulané aja sĕmbrana, guguyon ṅèlmu tuwa, kuraŋ titi kuraŋ émut, yèn luput dadi rubéda.
5. luwiḥ bĕcik aṅlĕluri, pranatan kaṅgoniŋ jaman, kapriyé paḍa rékané, wajibé woŋ ṅupa boga, ywa koṅsi katilapan, maraŋ sasamaniŋ manus, supaya aji gĕsaṅña.
6. awit woŋ urip puniki, yèn tilar tĕluŋ prakara, rècèḥ tan kajèn yĕktiné, sapisan sugiḥ réyal, piŋ piṇḍo paṅuwasa, gĕnĕpé kaŋ kapiŋ tĕluŋ, yèn woŋ wis katrimèŋ lampaḥ.
7. boṅgan kaŋ samya marṣudi, paḍa golèk ṅèlmu tuwa, tuwas ṛĕkasa lakuné, tur bakalé tanpa guna, muŋ mumbul dadi méga, suwé suwé dadi mĕṇḍuŋ, tan wuruŋ tibèŋ bantala.
8. apa sira kaki makṣiḥ, kacoṅgaḥ ṅayoni sira, gugulaŋ ṅèlmu aṅèlé, ṅèlmu iku warṇa warṇa, yèn dipunjarwakĕna, kadipundi tĕgĕsipun, coba kaki ruṅokĕna.
9. jarwané iŋ ṅisor iki, sun wĕḍarké iṅkaŋ cĕṭa, supaya wruḥ sakabèhé, kaŋ aṅèl lawan kaŋ gampaŋ, pantĕs paḍa tinimbaŋ, kaŋ bĕnĕr lawan kaŋ luput, dadi bisa kira kira.
pĕcahanipun tĕmbuŋ ṅèlmu yèn dipunsĕrat mawi tĕmbuŋ tamtu kiraŋ luwĕs ukaranipun, tur abiṅuṅakĕn iṅkaŋ kiraŋ maṅrĕtos, amila kula pĕkṣa mawi gañcaran saha mawi waton jarwa suta kados iŋ ṅaṇḍap punika. déné kiraŋ maṛĕmipun para mahos gaḍahan kula namuŋ ñuwun paṅakṣama.
déné tĕmbuŋ :
ṅèlmu sakiŋ jarwa suta : aṅèl yèn duruŋ katĕmu
ṅèlmu sakiŋ jarwa suta : aṅèlé yèn wis katĕmu
ṅèlmu sakiŋ jarwa suta : aṅèlé yèn ṅadu sĕmu
ṅèlmu sakiŋ jarwa suta : ṅĕṅèl ṅèl panĕmu
ṅèlmu sakiŋ jarwa suta : ṅèlu èlu
ṅèlmu sakiŋ jarwa suta : saṅka aṅèl koṅsi ṅĕlu. punapa iṅkaŋ dipunwastani aṅèl, sampun tamtu tiyaŋ iṅkaŋ dèrèŋ sagĕd samukawis, punika limrahipun iṅkaŋ dipunwastani aṅèl.
anaṅiŋ botĕn makatĕn, sarèhniŋ ṅèlmu wahu ṅupadosipun pañcèn aṅèl, déné botĕn wontĕn tiyaŋ sadé, kĕdaḥ prĕwita pribadi, amila pamĕḍaripun kiyahi guru iṅgiḥ ḍapur ṅĕṅèl ĕṅèl, awit tiyaŋ iṅkaŋ dèrèŋ maṅgiḥ ṅèlmu iṅkaŋ sakiŋ aṅsal aṅsalipun piyambak, dipunpitĕdahana botĕn dipungugu tur malaḥ ṅrĕrècèhi, malaḥ malaḥ dipunaṅgĕp iku rak panĕmuné woŋ édan.
amila sadaya tiyaŋ iṅkaŋ sampun pana iŋ ṅèlmi botĕn pisan pisan purun adumuk iṅkaŋ dados wawadosipun hyaŋ maha sukci. punapa tiyaŋ gĕmbluŋ purun ṅrècèhakĕn gaḍahanipun piyambak iṅkaŋ padosipun kalaṅkuŋ aṅèl. (samantĕn gawatipun tiyaŋ pados ṅèlmi).
amila kapaṅgihipun ṅèlmi sami sarana tĕlatèn, sĕtiti, ṅati ati, lantip, waspada ambĕk darma.
sumaṅga punapa para iṅkaŋ sami braṅta iŋ ṅèlmi makṣiḥ sami kacoṅgaḥ ṅlampahi pados ṅèlmi tur dèrèŋ mĕṣṭi aṅsal yèn pañcèn botĕn kasinuṅan wahyu, cobi ta dipunlampahana maṅké rak tanpa damĕl. iṅkaŋ kaṭaḥ tiyaŋ sinahu iŋ ṅèlmi yèn ṛĕmbagan bab ṅèlmi lajĕŋ èṅkèl èṅkèlan (lumuḥ asor kudu uṅgul) punika bĕjané si paman ḍoplaŋ, punika taṇḍa dèrèŋ aṅsal.
3. pocuŋ
1. wus kapuṅkur babaté kaŋ ṅèlmi luhuŋ, luwuŋ aṅgurita, aṅkarané janma sami, dimèn cĕṭa kĕna kinarya darṣana.
2. darapon muŋ muriḥ wijaŋ wijaṅipun, kinarya paṅlimbaŋ, tulaḍan ala lan bĕcik, wus wajibé woŋ tuwa crita kaŋ ñata.
3. tutur iku warṇa warṇa tĕgĕsipun, tan kĕna sĕmbrana, yèn luput ambĕbayani, niniwasi dadya wisaniŋ agĕsaŋ.
4. saṅkanipun ala bĕcik gènnya ṭukul, muŋ siŋ lalampahan, apa kaŋ cinipta sami, sĕja ala sayĕkti ṭukulé ala.
5. déné lamun maraŋ bĕcik sĕdyanipun, iŋ wuri antukña, sayĕkti maṅgiḥ basuki, iku ñata coba kaki titènana.
6. yèn yun wĕruḥ pralambaṅnya kaŋ kadulu, upama tanduran, manuṅsa ñĕbar punapi, ñĕbar gaga sayĕkti ṭukulé gaga.
7. déné lamun nandur uwitiŋ kacubuŋ, kaŋ ṭukul baḍéña, tan liya kacubuŋ sami, pan maṅkono iku kaki pipiṇḍanña.
8. muŋ puniku kinarya watoniŋ laku, saṭiṭik kéwala, muriḥ gampaŋ dèn lakoni, tur sañata nora biṅuṅaké karṣa.
4. ḍaṇḍaŋgula
1. saya ḷĕgi rasa ṅisor iki, yèn ginigit lir kadya sarkara, lamun kolu aṅlĕr bahé, yèn klĕbu baluŋ suṅsum, maraŋ jasad rumasuk yĕkti, iku upamanira, yèn muṅguhiŋ aku, manuṅsa yèn wus mupakat, baraŋ kalir apa kaŋ sinĕja sami, sasat woŋ lara waras.
2. coba kaki bĕnĕr iṅkaŋ pundi, woŋ ṅahurip kaŋ dèn prĕlu apa, anèŋ ṅalam doña kéné, akèḥ kaŋ paḍa klèru, kaŋ dèn aṅka nora ṅèmpĕri, pĕrwita mrana mrana, jaréné mĕguru, ṅèlmu tuwa yèn palastra, dina béñjiŋ lamun tumĕkaniŋ lalis, bisa muṅgaḥ suwarga.
3. pama mĕṣṭi woŋ mĕguru kaki, lamun béñjaŋ tumĕkèŋ palastra, muṅgaḥ sawarga yitmané, sahiba énakipun, lamun kĕna tinĕbas ṅaji, dak kira woŋ sajagad, jur paḍa mĕguru, hèḥ kaki paḍa éliṅa, lamun sira iku umaté hyaŋ widdhi, aja kuraŋ narima.
4. gusti allaḥ iku laṅkuŋ sĕkti, laṅkuŋ adil samubaraṅira, aja sira salaḥ gawé, arṣa mintĕri laku, papariṅé hyaŋ maha sukci, muṇḍak malaḥ duraka, kaki iŋ uripmu, jasatmu kaŋ sira gawa, nora dosa milu lara sabĕn ari, muŋ anut kaṛĕpira.
5. lamun udur prakarané pati, nadyan siliḥ nora dèn gurokna, pati iku datan wandé, awit wus mĕṣṭinipun, yèn wus tuwa bakal ṅĕmasi, ya géné dadak paḍa, kakéhan panĕmu, mrana mréné golèk warta, ṅupa guru kaŋ maṅrĕti ṅèlmu pati, tiwas kĕlara lara.
6. gugu ujar kaŋ nora ṅèmpĕri, sasat sriṅat kaŋ nora ṅupakat, dèn antĕpa sapatiné, kapriyé prasanipun, janma iṅkaŋ pikiré sami, sasat kéwan alasan, dadra dènnya kumpruŋ, aluwuŋ kaŋ sipat kéwan, wus jaragan nora duwé ika iki, balik jĕnĕŋ manuṅsa.
7. yèn maṅkono tan kĕna piniliḥ, muŋ kacèké dèn arani janma, yèn pikiré paḍa bahé, tandaṅé wus kadulu, kaŋ kacĕṭa iŋ ḍuwur iki, coba paḍa mukira, apa bédanipun, pradéné sok ṅaku bisa, lugu klèru dèn ruṅkĕpi praptèŋ pati, isin mundur tĕgĕsña.
5. paṅkur
1. paṅkur buntutiŋ carita, tatarané kaŋ kaṅgo woŋ ṅahurip, boṅgan kaŋ tan arṣa gilut, luguné tur ya lumraḥ, jaman iki tumĕkané jaman bésuk, kaŋ prĕlu ṅupaya paṅan, lan pratikĕl golèk ḍuwit.
2. awit woŋ nèŋ ṅalam doña, doña iku tĕgĕsé ĕmas picis, yèn tan ṅidak doñanipun, sasat nora nèŋ doña, paḍa bahé karo woŋ tumĕkèŋ lampus, iku kaki rasakĕna, kaŋ koṅsi karasèŋ ati. 3. mulané sabisa bisa, ihtiyara kaŋ koṅsi olèḥ asil, naṅiŋ kaŋ mujur lakumu, aja kaworan cidra, cidra iku suwé suwé nĕkĕk gulu, yèn tan ṅandĕl titènana, rasané woŋ cidra kaki.
4. naṅiŋ poma aja pisan, ṅĕlakoni paṅgawé kaŋ tan bĕcik, yahiku upamanipun, ḍĕḍĕr baraŋ kaŋ ala, lamun ṭukul tan wuruŋ uwohé bésuk, nandur ala ṭukul ala, apa sira doyan bugti
sarèhniŋ sampun tĕlas aṅgèn kula damĕl titimbaṅan kaṅgénipun tiyaŋ ṅagĕsaŋ dumugi iŋ jaman akir, punika gumantuŋ wontĕn kĕpaṛĕṅipun iṅkaŋ baḍé ṅlampahi, kula tiyaŋ mardika sagĕd kula namuŋ cariyos sagadugiŋ pamaṅgiḥ kula, dados nama sampun ṅĕplĕki kaliyan tĕmbuŋ kula : sapañana.
iŋ ṅaṇḍap kula gĕntos ñariyosakĕn bab ḷĕṛĕs ḷĕpatiŋ pitutur iṅkaŋ sampun mrataḥ tiyaŋ sajagad, déné pitutur wahu sakaṭahiŋ tiyaŋ sagĕd, pituturipun sasat tan prabéda, amila kula gĕlaripun piṇḍaḥ supados sami dipunsumĕṛĕpi tur kéṅiŋ katimbaŋ punapa saḷĕṛĕsipun, kula iṅkaŋ ṅuñcèki kulitipun, sampun kĕtaṅgĕlan aṅgèn kula ḍapur mardika, kados iṅkaŋ kawĕca iŋ sĕkar sinom ṅaṇḍap punika.
sinom
1. wolak walik sastra kara, pinadu tan uwis uwis, pituturé woŋ sĕjagad, sabĕn sabĕn mituturi, amuŋ pitutur bĕcik, pradéné nora dèn turut, taṇḍa kuraŋ sampurṇa, kumĕṇṭus mĕkṣa nuturi, duruŋ pana gumagaḥ amulaŋ putra.
2. coba ulun arṣa wikan, apa watonmu kaŋ yĕkti, yèn bĕcik iku sampurṇa, sampurṇané saṅka ṅĕndi, yĕktiné duruŋ uniŋ, watonmu muŋ tiru tiru, tiwas paḍa kaṅélan, gawé waton nora bĕcik, yèn bĕcika maṅsa nora dèn turuta.
3. yèn sira aṅantĕpana, lamun bĕcik iku adi, dadi sira wus prañata, amukir maraŋ hyaŋ widdhi, sira arṣa ñélaki, tandurané hyaŋ maha guŋ, kabèḥ isiniŋ jagad, gusti allaḥ kaŋ nanduri, déné sira kumĕṇṭus yun ṅilaṅana.
4. tandurané gustinira, ala tanapi kaŋ bĕcik, kabèḥ kaŋ gumlar iŋ jagad, saané wus pinañci, nora kĕna dèn loṅi, ala bĕcik dipuntuntun, muŋ rékané manuṅsa, baraŋ kodrat dèn owahi, boṅgan sira woŋ ḷĕgan golèk momoṅan.
5. lamun sira arṣa wikan, karṣané hyaŋ maha sukci, ala bĕcik wus kinarya, ḍasar kapaṛĕṅiŋ gusti, yèn gusti datan apti, sak nalika wus ginuluŋ, tan ṅanakkĕn kaŋ ala, paṣṭi sanalika bĕcik, piraṅèlé yèn dadi karṣaniŋ allaḥ.
6. samaṅkya wus katon ñata, anané iŋ doña iki, atas karṣaniŋ paṅéran, mulané aja kumaki, agé agé nuturi, watonmu muŋ tiru tiru, kok aṅgĕp wus sampurṇa, tiwas aṅisin isini, luwiḥ bĕcik uripmu paḍa narima.
7. éliṅa yèn sira titaḥ, dèn pariṅi bisa urip, apa paḍa waḷĕs sira, maraŋ kaŋ kuwasa sami, jĕbul aṛĕp ṅayoni, kaŋ karya pati uripmu, dudu padon tĕmĕnan, si gĕmbluŋ ujaré sami, saya dadra ṛĕmbugé kaŋ muraŋ krama.
8. yèn sira kasiku béñjaŋ, aja mĕsgul aṅlakoni, sokur makṣiḥ dadi janma, yèn dèn titisaké gĕñjik, pakanamu muŋ tĕki, rina wĕṅi saba ṅĕṇḍut, aṛĕp tobat tan bisa, aṛĕp gugat mĕñaŋ ṅĕndi, taṅisana wis kasèp maṅsa baliya.
9. samaṅkya wus gamblaŋ gamblaŋ, anané iŋ doña iki, sabaraŋ tan kabĕnĕran, éwuḥ aya iŋ pabudi, dadya wus mrataṇḍani, urip iku sipat luput, ala bĕcik tan béda, lamun miliḥ iṅkaŋ ṅĕndi, aṅèl timĕn wolak walik sastra kara.
10. ruṅokna sapisan ĕṅkas, ana paribasan maniŋ, cacahé limaŋ prakara, kadya iŋ ṅisor puniki, luwiḥ élok sayĕkti, naṅiŋ kaŋ duruŋ sumurup, luguné pañcèn ñata, tatané uga ṅĕplĕki, kodratolaḥ asal mula mulanira.
11. woŋ dana kĕlara lara, woŋ tuluŋ kĕpĕṇṭuŋ mĕṣṭi, woŋ éman bakal kapiran, woŋ tutur kojur sayĕkti, woŋ mardika kaŋ mĕṣṭi, tan tuk rahmatiŋ hyaŋ aguŋ, punika saya cĕṭa, gamblaŋ gamblaŋ wus sayĕkti, yèn woŋ urip sipat luput uripira.
12. dadya prĕlu amĕrdika, mardika ananiŋ ḍiri, ḍiri kita kaŋ sun trĕsna, rina wĕṅi kaŋ sumaṇḍiŋ, ṅoŋ gawa dadi kaṇṭi, dak trĕsnani koṅsi bésuk, nora muŋ lalamisan, tĕmĕn ñata trusiŋ ati, gusti allaḥ wus bĕnĕrké nora salaḥ.
13. ulun iki dadya titaḥ, nora prĕlu anuturi, tuluŋ aku nora bisa, dadana uga tan baṅkit, ṅéman uga dak sirik, muŋ mĕrdika sĕnĕŋ iṅsun, ṛĕmbugku piraŋ piraŋ, dudu ḍapur mituturi, kaṇḍa blaka kaanané ṅalam doña.
14. ñariŋ kaanan kaŋ ñata, kaŋ sampun dipunidaki, dadya nora tuna duṅkap, béñjiŋ tanapi samaṅkin, kaŋ ṅaliṅi kaliṅliŋ, gumawaŋ sapurug purug, tan ana kaŋ kaliṅan, jagad aguŋ jagad alit, wus warata kinĕmat sampun kaasta.
15. dadya jumĕnĕŋ priyaṅga, aṅganya wus tan kahèkṣi, tĕbiḥ cĕlak tan katiṅal, béñjiŋ tanapi samaṅkin, wus sami tan kawarṇi, bali alamé asuwuŋ, wuṅwaŋ sipatiŋ alam, aṅĕlaṅut tanpa tĕpi, titi pana wus tĕlas iṅkaŋ carita.
