aṅgitan daḷĕm iṅkaŋ sinuhun kaṅjĕŋ susuhunan pakubhuwana iṅkaŋ kapiŋ 4 iŋ surakarta. iṅkaŋ sampun katètèsakĕn kalihan luguniŋ babonipun déniŋ pahĕman radya pustaka.
katĕḍak suṅgiŋ déniṅ : radèn mas suwandi, iŋ surakarta.
paramasastra dalaḥ tĕmbuŋ tĕmbuṅipun botĕn kawéwahan sakĕḍik kĕḍika. (kalugokakĕn)
sinaṅkalan : rasa lilima ṅèṣṭi tuṅgal.
1. ḍaṇḍaŋgula
1. pamĕḍaré wasitaniŋ ati, cumaṇṭaka aniru pujaṅga, dahat muḍa iŋ batiné, naṅiŋ kĕdaḥ ginuṅguŋ, datan wruḥ yèn akèḥ ṅèsĕmi, amĕkṣa aṅrumpaka, basa kaŋ kalantur, tutur kaŋ katula tula, tinalatèn rinuruḥ kalawan ririḥ, mriḥ paḍaṅiŋ sasmita.
2. sasmitaniŋ ṅahurip puniki, mapan éwuḥ yèn nora wĕruha, tan jumĕnĕŋ iŋ uripé, akèḥ kaŋ ṅaku aku, paṅrasané sampun udani, tur duruŋ wruḥ iŋ rasa, rasa kaŋ satuhu, rasaniŋ rasa punika, upayanĕn darapon sampurṇa ugi, iŋ kahuripanira.
3. jroniŋ kuran goniŋ rasa yĕkti, naṅiŋ ta piliḥ iṅkaŋ uniṅa, kajaba lawan tuduhé, nora kĕna dèn awur, iŋ satĕmaḥ nora pinaṅgiḥ, muṇḍak katalañjukan, tĕdaḥ sasar susur, yèn sira ayun waṣkiṭa, sampurṇané iŋ badanira puniki, sira aṅgĕgurua.
4. naṅiŋ yèn sira guguru kaki, amiliha manuṅsa kaŋ ñata, iṅkaŋ bĕcik martabaté, sarta kaŋ wruḥ iŋ khukum, kaŋ ṅibadaḥ lan kaŋ wiraṅi, sokur olèḥ woŋ tapa, iṅkaŋ wus amuṅkul, tan mikir pawèwèhiŋ lyan, iku pantĕs sira guronana kaki, sartané kawruhana.
5. lamun ana woŋ micorèŋ ṅèlmi, tan mupakat iŋ pataŋ prakara, aja sira agé agé, aṅaṅgĕp ñatanipun, sariṅana dipunbaṛĕsiḥ, limbaṅĕn lan kaŋ pataŋ, prakara rumuhun, dalil khadis lan ijĕmak, lan kiyasé papat iku salaḥ siji, anaa kaŋ mupakat.
6. ana uga kĕna dèn antĕpi, yèn ucul sakiŋ pataŋ prakara, nora énak ḷĕgĕtané, tan wuruŋ tiṅgal wĕktu, paṅaṅgĕpé wus aṅĕṅkoki, aja kudu sĕmbahyaŋ, wus salat katèṅsun, bañjuré buwaŋ saréṅat, batal karam nora ṅaṅgo dèn rawati, bubraḥ sakèhiŋ tata.
7. aṅèl tĕmĕn iŋ jaman samaṅkin, iṅkaŋ pantĕs kĕna ginuronan, akèḥ woŋ jaja ṅèlmuné, lan araŋ iṅkaŋ manut, yèn woŋ ṅèlmu iṅkaŋ nĕtĕpi, iŋ paṅgawéniŋ sarak, dèn arani luput, naṅiŋ ta asasĕnĕṅan, nora kĕna dèn wor kĕkaṛĕpannèki, papañcèné priyaṅga.
8. iṅkaŋ lumraḥ iŋ maṅsa puniki, mapan guru iṅkaŋ golèk sabat, tuhu kuwalik kaṛĕpé, kaŋ wis lumraḥ karuhun, jaman kuna mapan ki murid, iṅkaŋ paḍa ṅupaya, kudu aṅgĕguru, iŋ mĕṅko iki ta nora, kyahi guru naruṭuk ṅupaya murid, dadiya kaṇṭinira.
2. kinaṇṭi
1. paḍa gulaṅĕn iŋ kalbu, iŋ sasmita amriḥ lantip, aja pijĕr maṅan néndra, iŋ kaprawiran dèn kèṣṭi, pĕsunĕn sariranira, cĕgahĕn ḍahar lan guliŋ.
2. dadiya lakunirèku, cĕgaḥ ḍahar lawan guliŋ, lan aja kasukan sukan, aṅaṅgowa sawatawis, ala watĕké woŋ suka, ñuda prayitna iŋ batin.
3. yèn wis tinitaḥ woŋ aguŋ, aja sira guṅguŋ ḍiri, aja ḷĕkĕt lan woŋ ala, kaŋ ala lakunirèki, nora wuruŋ ṅajak ajak, satĕmaḥ anunulari.
4. nadyan asor wijilipun, yèn kalakuané bĕcik, utawa sugiḥ carita, carita kaŋ dadi misil, iku pantĕs rakĕtana, darapon muṇḍak kaŋ budi.
5. yèn woŋ anom pan wis tamtu, manut maraŋ kaŋ ṅaḍĕpi, yèn kaŋ ṅaḍĕp akèḥ baṅsat, datan wuruŋ bisa juti, yèn kaŋ ṅaḍĕp kèḥ durjana, nora wuruŋ bisa maliŋ.
6. sanadyan ta nora milu, paṣṭi wruḥ solahiŋ maliŋ, kaya maṅkono sabaraŋ, paṅgawé ala puniki, sok wĕruḥ anuli bisa, yèku panuntuniŋ éblis.
7. paṅgawé bĕcik puniku, gampaŋ yèn wus dèn lakoni, aṅèl yèn duruŋ kalakyan, aras arasĕn ṅlakoni, tur iku dèn lakonana, muphaṅati badannèki.
8. lan woŋ anom anom iku, kaŋ kaṅgo iŋ maṅsa iki, aṇḍap asor dipunsimpar, umbag gumuṅguṅiŋ ḍiri, obrol umuk kaŋ dèn gulaŋ, kumĕṇṭus lawan kumaki.
9. sapa sira sapa iṅsun, aṅaluñat sarta ĕdir, iku lalabĕté uga, nom noman adoḥ woŋ bĕcik, ĕmoḥ aṅruṅu carita, carita ala lan bĕcik.
10. carita pan wus kalaku, paṅgawé ala lan bĕcik, tindak bĕnĕr lan kaŋ ora, kaḷĕbu jro caritèki, mulané aran carita, kabèḥ kabèḥ dèn kawruhi.
11. mulané woŋ anom iku, bĕcik iṅkaŋ atabĕri, jajagoṅan lan woŋ tuwa, iṅkaŋ sugiḥ kojaḥ ugi, kojaḥ iku warṇa warṇa, ana ala ana bĕcik.
12. iṅkaŋ bĕcik kojahipun, sira aṅgowa kaŋ paṣṭi, iṅkaŋ ala siṅgahana, aja sira aṅlakoni, lan dèn awas woŋ akojaḥ, iya iŋ maṅsa puniki.
13. akèḥ woŋ kaŋ sugiḥ wuwus, naṅiŋ dèn sampar pakoliḥ, amuŋ badané priyaṅga, kaŋ dèn pakolihkĕn ugi, panastèné kaŋ dèn umbar, tan aṅaṅgo sawatawis.
14. aja na woŋ bisa tutur, ṅĕmuṅna iṅsun pribadi, aja na kaŋ amamaḍa, aṅrasa pintĕr pribadi, iku sétan nuñjaŋ nuñjaŋ, tan pantĕs dipunpaṛĕki.
15. sikakna dèn kaya asu, yèn woŋ kaŋ maṅkono ugi, dahwèn opèn nora layak, yèn sira saṇḍiṅan liṅgiḥ, nora wuruŋ katularan, bĕcik siṅkirana ugi.
16. poma poma wĕkas iṅsun, mriŋ kaŋ maca layaŋ iki, lahir batin dèn èstokna, sahuniné layaŋ iki, lan dèn bĕkti mriŋ woŋ tuwa, iŋ lahir prapta iŋ batin.
3. gambuḥ
1. sĕkar gambuḥ piŋ catur, kaŋ cinatur polaḥ kaŋ kalantur, tanpa tutur katula tula katali, kadaluwarṣa katutuḥ, kapatuḥ pan dadi awon.
2. aja ṅanti kabañjur, sabaraŋ polaḥ kaŋ nora jujur, yèn kabañjur sayĕkti kojur tan bĕcik, bĕcik ṅupayaa iku, pitutur iṅkaŋ sayĕktos.
3. pitutur bĕnĕr iku, sayĕktiné apantĕs tiniru, nadyan mĕtu sakiŋ woŋ sudrapapèki, lamun bĕcik goné muruk, iku pantĕs sira aṅgo.
4. ana pocapanipun, adiguna adigaŋ adiguŋ, pan adigaŋ kidaŋ adiguŋ pan èṣṭi, adiguna ula iku, tĕlu pisan mati sampyoḥ.
5. si kidaŋ umbagipun, aṅandĕlkĕn kĕbat lumpatipun, pan si gajaḥ ṅandĕlakĕn gĕŋ ahiṅgil, ula ṅandĕlakĕn iku, mandiné kalamun ñakot.
6. iku upamanipun, aja ṅandĕlakĕn sira iku, sutèŋ nata iya sapa iṅkaŋ wani, iku ambĕké woŋ diguŋ, iŋ wusana dadi asor.
7. adiguna puniku, ṅandĕlakĕn kapintĕranipun, samubaraŋ kabisan dipunḍèwèki, sapa pintĕr kaya iṅsun, tugiŋ prana nora éñjoḥ.
8. ambĕk adigaŋ iku, ṅandĕlakĕn kapintĕranipun, para tantaŋ caṇḍala añĕñampahi, tinĕmĕnan nora pĕcus, satĕmaḥ dadi guguyon. 9. iŋ woŋ urip puniku, aja ṅaṅgo ambĕk kaŋ tĕtĕlu, aṅaṅgowa rèrèḥ ririḥ ṅati ati, dèn kawaṅwaŋ baraŋ laku, dèn waṣkiṭa solahiŋ woŋ.
10. déné katĕlu iku, si kidaŋ suka iŋ patinipun, pan si gajaḥ aléna patinirèki, si ula iŋ patinipun, ṅandĕlkĕn upasé mandos.
11. katĕlu nora patut, yèn tiniru mapan dadi luput, titikané woŋ anom kuraŋ wawadi, buṅaḥ akèḥ woŋ aṅguṅguŋ, wĕkasané kajalomproŋ.
12. yèn woŋ anom puniku, kakéhan paṅguṅguŋ dadi kumpruŋ, pĕṅuŋ biṅuŋ wĕkasané pan aṅoliŋ, yèn dèn guṅguŋ muñcu muñcu, kaya wudun mèḥ macoṭot.
13. iŋ woŋ kaŋ paḍa guṅguŋ, pan sapélé iku pamrihipun, muŋ waṛĕgé waḍuk kalimisiŋ laṭi, lan tĕḷĕsiŋ goṇḍaṅipun, ruruba alaniŋ uwoŋ.
14. amriḥ paṛĕk kaŋ iku, yèn wus kaṅgĕp nuli gawé umuk, pan woŋ akèḥ sayĕktiné paḍa wĕdi, tan wuruŋ tampa pisuṅsuŋ, adol saṅgup sakèhiŋ woŋ.
15. amriḥ paṛĕka iku, nora pantĕs cĕḍak mriŋ woŋ aguŋ, nora wuruŋ anuntun paṅgawé juti, naṅiŋ ana pantĕsipun, woŋ maṅkono diḍĕḍĕplok.
16. aja kakéhan saṅgup, duruŋ wĕruḥ tuturé agupruk, tutur nĕmpil paṅaṅgĕpé wruḥ pribadi, paṅrasané kèḥ woŋ guṅguŋ, kaŋ wis wĕruḥ amaléṅos.
17. aja ṅaṅgo sirèku, kalakuan kaŋ maṅkono iku, datan wuruŋ tiniténan dèn cirèni, mriŋ pawoŋ sanak sadulur, nora nana kaŋ pitados.
4. paṅkur
1. kaŋ sĕkar paṅkur winarṇa, lalabuhan kaŋ kaṅgo woŋ ṅahurip, ala lan bĕcik puniku, prayoga kawruhana, adat waton puniku dipunkadulu, miwaḥ ta iŋ tatakrama, dèn kahèṣṭi siyaŋ ratri.
2. duduga lawan prayoga, myaŋ watara ririṅa ayya lali, iku parabot satuhu, tan kĕna tiniṅgala, taṅi luṅguḥ aṅadĕg tuwin lumaku, aṅucap mĕnĕŋ anéndra, duga duga nora kari.
3. muwaḥ iŋ sabaraŋ karya, iŋ prakara gĕḍé kalawan cilik, papat iku datan kantun, kaṅgo sadina dina, lan iŋ wĕṅi nagara muwaḥ iŋ ḍusun, kabèḥ kaŋ paḍa ambĕkan, papat iku nora kari.
4. kalamun ana manuṅsa, añiṅgahi dugi lawan prayogi, iku watĕké tan patut, awor lawan woŋ kaṭaḥ, woŋ dikṣura daludur tan wruḥ iŋ ĕdur, aja sira pĕḍak pĕḍak, nora wuruŋ niniwasi.
5. mapan watĕkiŋ manuṅsa, pan katĕmu iŋ laku lawan liṅgiḥ, solaḥ muna muninipun, pan dadya panĕṅĕran, kaŋ apintĕr kaŋ boḍo miwaḥ kaŋ luhur, kaŋ asor lawan malarat, tanapi manuṅsa sugiḥ.
6. ṅulama miwaḥ makṣiyat, woŋ kaŋ kĕndĕl tanapi woŋ kaŋ jiriḥ, durjana bobotoḥ kahum, lanaŋ wadon pan paḍa, panitikiŋ manuṅsa wawatĕkipun, apadéné woŋ kaŋ ñata, iŋ paṅawruḥ kaŋ wis paṣṭi.
7. tinitik iŋ solaḥ muna, lawan muni iŋ laku lawan liṅgiḥ, iku panĕṅĕran aguŋ, winawas ginrahita, pramilané iŋ woŋ kuna kuna iku, yèn amawas iŋ sujanma, datan amiṇḍogawèni.
8. ginulaŋ sadina dina, wiwékané tuwin basa basuki, ujub riya kibiripun, sumuṅaḥ tan kaṅgonan, muŋ suméṇḍé iŋ karṣanira hyaŋ aguŋ, ujar sirik kaŋ rinĕkṣa, kahutaman olaḥ wadi.
9. iŋ maṅsa mĕṅko pan araŋ, kaŋ katĕmu iŋ basa kaŋ basuki, iṅkaŋ lumraḥ woŋ puniku, drĕṅki droi lan dora, irèn mèrèn panastèn lawan kumiṅsun, opénan nora pasaja, jahil muṭakil bĕsiwit.
10. alaniŋ liyan dèn aṇḍar, iŋ bĕcikiŋ liyan dipunsimpĕni, bĕciké ḍéwé ginuṅguŋ, kinarya pasamuwan, nora ṅrasa alané ḍéwé ṅĕṇḍukur, woŋ kaŋ maṅkono watĕkña, nora pantĕs dèn pĕḍaki.
11. iku woŋ dur bala murka, nora nana maṛĕmé iŋ jro ṅati, sabaraŋ kaṛĕpanipun, nadyan wisa katĕkan, kaṛĕpané nora maṛĕm saya bañjur, luamaḥ lawan amaraḥ, iku iṅkaŋ dèn tut wuri.
12. iŋ sabaraŋ tiṅkaḥ polaḥ, yèn aṅucap tanapi lamun liṅgiḥ, suṅkan kasosor bĕkipun, pan lumuḥ kahuṅkulan, iŋ sujanma paṅrasané ḍèwèkipun, pan norana kaŋ amaḍa, aṅrasa luhur pribadi.
13. aja nĕdya katémpélan, iŋ wawatĕk kaŋ tan pantĕs iŋ budi, watĕk rusuḥ nora arus, tuṅgal lawan manuṅsa, dipunsami karya labuhan kaŋ patut, darapon dadi tulaḍa, tinuta iŋ wuri wuri.
14. aja loño lèmèr géñjaḥ, aṅroŋ pasanakan ñumur gumuliŋ, ambuntut arit puniku, watĕkan tan raharja, pan woŋ loño nora kĕna dipunĕtut, moñar mañir tan antĕpan, déné lèmèṛĕn puniki.
15. parapéṅinan tĕgĕsña, géñjaḥ iku cécégan baraŋ kardi, aṅroŋ pasanak liripun, ṛĕmĕn olaḥ miruda, mriŋ rabiné sadulur miwaḥ iŋ batur, mriŋ sanak myaŋ pasanakan, sok sĕnĕṅa dèn ramuhi.
16. ñumur gumuliŋ tĕgĕsña, ambĕlawaḥ datan duwé wawadi, nora kĕna rubuŋ rubuŋ, wawadiné daŋ wutaḥ, buntut arit puniku pracékanipun, abĕnĕr iŋ paṅaṛĕpan, naṅiŋ garèṭèl iŋ wuri.
17. sabaraŋ kaŋ dipunucap, nora wuruŋ amriḥ olèḥ pribadi, iku labuhan tan patut, aja anĕdya télad, mriŋ watĕkan nĕnĕm prakara puniku, sayogyané ṅupayaa, lir mas tumimbul iŋ wariḥ.
5. maṣkumambaŋ
1. nadyan siliḥ bapa biyuŋ kaki nini, sadulur myaŋ sanak, kalamun muruk tan bĕcik, nora pantĕs yèn dèn nuta.
2. apan kaya maṅkono watĕkan iki, sanadyan woŋ tuwa, yèn duwé watĕk tan bĕcik, miwaḥ tindak tan prayoga.
3. aja sira niru tindak kaŋ tan bĕcik, nadyan ta woŋ liya, lamun pamuruké bĕcik, miwaḥ tindaké prayoga.
4. iku pantĕs sira tirua ta kaki, miwaḥ bapa biyaŋ, amuruk watĕkan bĕcik, iku kaki èstokĕna.
5. woŋ tan manut pitutur woŋ tuwa ugi, pan nĕmu duraka, iŋ duña tumĕkèŋ akir, tan wuruŋ kasuraŋ suraŋ.
6. maratani iŋ anak putu iŋ wuri, dèn paḍa prayitna, aja na kaŋ kumawani, iŋ bapa tanapi biyaŋ.
7. ana uga étaŋ étaṅané kaki, lilima sinĕmbaḥ, dunuṅé sawiji wiji, sĕmbaḥ lilima punika.
8. iṅkaŋ ḍiṅin rama ibu kapiŋ kaliḥ, maraŋ maratuwa, lanaŋ wadon kaŋ kapiŋ tri, ya maraŋ sadulur tuwa.
9. kapiŋ paté ya maraŋ guru sayĕkti, sĕmbaḥ kapiŋ lima, ya maraŋ gustinirèki, pariñciné kawruhana.
10. pramilané rama ibu dèn bĕktèni, kinarya jalaran, anané badan puniki, winĕruhkĕn paḍaŋ hawa.
11. uripira pintĕr samubaraŋ kardi, sakiŋ ibu rama, iŋ batin sakiŋ hyaŋ widdhi, mulané wajib sinĕmbaḥ.
12. pan kinarṣakakĕn iŋ hyaŋ kaŋ linuwiḥ, kinarya lantaran, anèŋ iŋ duña puniki, wĕruḥ iŋ bĕcik lan ala.
13. sakiŋ ibu rama margané udani, mila maratuwa, lanaŋ wadon dèn bĕktèni, awèḥ rasa iṅkaŋ ñata.
14. sajatiné rasa kaŋ mĕñcarkĕn wiji, sĕmbaḥ kapiŋ tiga, mriŋ sadulur tuwa ugi, milané sadulur tuwa.
15. pan sinĕmbaḥ gĕgĕntiné bapa iki, pan sirṇaniŋ bapa, sadulur tuwa gumanti, iṅkaŋ pantĕs sira nuta.
16. iŋ sawaraḥ wuruké iṅkaŋ prayogi, sĕmbaḥ kaŋ kapiŋ pat, ya maraŋ guru yĕkti, marmané guru sinĕmbaḥ.
17. kaŋ atuduḥ maraŋ sampurṇaniŋ urip, tumĕkèŋ antaka, maḍaṅkĕn pĕtĕṅiŋ ati, ambĕnĕrkĕn marga mulya.
18. woŋ duraka iŋ guru abot pribadi, pramila prayoga, minta asiḥ siyaŋ ratri, ywa ṅanti suda sihira.
19. kapiŋ lima dunuṅé sĕmbaḥ puniki, mriŋ gusti kaŋ murba, iŋ pati kalawan urip, miwaḥ saṇḍaŋ lawan paṅan.
20. woŋ nèŋ duña wajib manuta iŋ gusti, lawan dipunawas, sapratiṅkahé dèn kèṣṭi, aja dupèḥ wus awirya.
21. nora béda putra santana woŋ cilik, yèn paḍa ṅawula, pan kabèḥ namaniŋ abdi, yèn dosa ukumé paḍa.
22. yèn rumasa putra sĕntana sirèki, dadiné tyasira, aṅĕdirakĕn sirèki, tan wuruŋ anĕmu papa.
23. ṅuṅasakĕn yèn putra sĕntanèŋ aji, iku kaki aja, woŋ suwita nora kĕni, kudu wruḥ iŋ karyanira.
24. yèn tinuduḥ maraŋ saŋ maha narpati, sabaraŋ tuduhña, iku èstokĕna ugi, karyanira suṅkĕmana.
25. aja mèṅèŋ iŋ paréntaḥ saŋ siniwi, dèn pĕṭĕl aséba, aja maliñcur iŋ kardi, aja ṅĕpluk asuṅkanan.
26. luwiḥ ala alané jalma ṅahurip, woŋ ṅĕpluk suṅkanan, tan patut ṅawulèŋ aji, aṅèṅèra sapa sapa.
27. amilua iŋ bapa biyuŋ pribadi, kalamun suṅkanan, datan wuruŋ dèn srĕṅĕni, milawanana pinala.
28. mapan kaya maṅkono ṅawulèŋ gusti, kalamun léléda, tan wuruŋ maṅgiḥ bilahi, iŋ wuri aja ṅĕrṣula.
29. pan kinarya ḍéwé bilahinirèki, lamun tinĕmĕnan, sabaraŋ karṣaniŋ gusti, lahir batin tan sumiṅgaḥ.
30. mapan ratu tan duwé kadaŋ myaŋ siwi, sanak prasanakan, tanapi garwa kakasiḥ, amuŋ bĕnĕr agĕmira.
31. kukum adil adat waton kaŋ dèn èṣṭi, mulané ta paḍa, dèn rumĕkṣa maraŋ gusti, ĕndi liré woŋ rumĕkṣa. 32. dipungĕmi nastiti aṅati ati, gĕmi mriŋ kaguṅan, iŋ gusti yya sira wani, aṅgĕgampaŋ lawan aja.
33. wani wani nuturkĕn wadiniŋ gusti, dèn bisa arawat, iŋ wawadi saŋ siniwi, nastiti baraŋ paréntaḥ.
34. ṅati ati iŋ rina lawan iŋ wĕṅi, iŋ rumĕkṣanira, lan ñaḍaŋ karṣaniŋ gusti, dudukwuluhé kaŋ tampa.
6. mĕgatruḥ
1. woŋ ṅawula iŋ ratu luwiḥ pakéwuḥ, nora kĕna miṅgraŋ miṅgriŋ, kudu mantĕp sartanipun, sĕtyatuhu mariŋ gusti, dipunmiturut sapakon.
2. mapan ratu kinarya wakil hyaŋ aguŋ, maréntahkĕn kukum adil, pramila wajib dèn ĕnut, kaŋ sapa tan manut ugi, mriŋ paréntahé saŋ katoŋ.
3. aprasasat badaliŋ karṣa hyaŋ aguŋ, mulané babo woŋ urip, saparṣa ṅawulèŋ ratu, kudu éklas lahir batin, aja ṅanti nĕmu éwoḥ.
4. iŋ wuriné yèn ati duruŋ tuwajuḥ, aṅur ta aja aṅabdi, bĕcik ṅiṇḍuṅa karuhun, aja agé agé ṅabdi, yèn duruŋ éklas iŋ batos.
5. aṅur aṅiṇḍuṅa bahé nora éwuḥ, lan ora nana kaŋ ṅiri, muŋ muṅkul pakaryanipun, nora susaḥ tuṅguk kĕmit, séba mapan nora ṅaṅgo.
6. muŋ yèn ana tontonan nonton nèŋ luruŋ, gliṇḍaŋ gliṇḍuŋ tanpa kĕris, sarwi banda taṅanipun, kĕmul bĕbĕdé sasisiḥ, aṇḍoḍok piṅgiriŋ baṅo.
7. suprandéné jroniŋ tyas aṅlir tumĕṅguŋ, maṅku bawat sĕnèn kĕmis, maṅkono iku liripun, nora kaya woŋ aṅabdi, wruḥ iŋ palataran katoŋ.
8. lan kériṅan sarta ana aranipun, lan ana luṅguhé ugi, iŋ saluṅguḥ luṅguhipun, naṅiŋ ta dipunpakéliŋ, mulané pinardi kaŋ woŋ.
9. samubaraŋ iŋ karṣanira saŋ ratu, sayĕkti kudu ṅlakoni, sapalakartiné iku, woŋ kaŋ paḍa paḍa ṅabdi, pagawéyané pan sahos.
10. kaŋ ñantana bhupati mantri panèwu, kaliwon panèkĕt miji, panalawé lan panajuŋ, tanapi para prajurit, lan kaŋ nambut karyèŋ katoŋ.
11. kabèḥ iku kuwajiban sébanipun, iŋ dina kaŋ amaṛĕṅi, iŋ wiyosira saŋ prabhu, sanadyan tan miyos ugi, pasébané aja towoŋ.
12. iṅkaŋ lumraḥ yèn kĕṛĕp séba woŋ iku, nuli gañjaran dèn iñciḥ, yèn tan olèḥ nuli mutuŋ, iku sèwu sèwu sisip, yèn wus maṅarti iṅkaŋ woŋ.
13. tan maṅkono étuṅé kaŋ sampun wĕruḥ, mapan ta datan dèn pikir, gañjaran pan wis karuhun, amuŋ nahur sihiŋ gusti, winaḷĕs iŋ lahir batos.
14. sĕtyatuhu saparéntahé pan manut, yya ḷĕṅgana karṣèŋ gusti, woŋ ṅawula pamanipun, lir saraḥ muṅgèŋ jaladri, darma lumaku sapakon.
15. déné bĕgja cilaka utawa luhur, asor iku pan wis paṣṭi, ana iŋ badanirèku, aja sok aṅuriŋ uriŋ, maraŋ gusti saŋ akatoŋ.
16. muṇḍak ṅakèhakĕn iŋ luputirèku, mriŋ gusti tuwin hyaŋ widdhi, déné ta sabĕnĕripun, mupusa kalamun paṣṭi, iŋ badan tan kĕna méṅgok.
17. tulisané iŋ lokil makpul rumuhun, papañcèn sawiji wiji, tan kĕna owaḥ sarambut, tulisiŋ badan puniki, aja na mundur pakéwoḥ.
7. durma
1. dipunsami ambantiŋ sariranira, cĕgaḥ ḍahar lan guliŋ, darapon sudaa, nĕpsu kaŋ ṅambra ambra, ṛĕṛĕma iŋ tyasirèki, dadi sabaraŋ, karṣanira ḷĕstari.
2. iŋ paṅawruḥ lahir batin aja mamaŋ, yèn sira wus udani, iŋ saliranira, yèn ana kaŋ amurba, misésa iŋ alam kabir, dadi sabaraŋ, pakaryanira ugi.
3. bĕnĕr luput ala bĕcik lawan bĕgja, cilaka mapan sakiŋ, iŋ badan priyaṅga, dudu sakiŋ woŋ liya, pramila dèn ṅati ati, sakèḥ drigama, siṅgahana dèn éliŋ.
4. mapan ana sisiku tĕluŋ prakara, naṅiŋ gĕḍé pribadi, pan iki lirira, iṅkaŋ tĕluŋ prakara, aja aṅguṅguŋ sirèki, kalawan aja, nacad kapati pati.
5. lawan aja mamahoni baraŋ karya, ṭik iṭik mamahoni, samubaraŋ polaḥ, tan kĕna woŋ kumlébat, iŋ maṅsa mĕṅko puniki, mapan wus lumraḥ, paḍa wasis mahoni.
6. muŋ tindaké ḍéwé nora winahonan, ṅrasa bĕnĕr pribadi, sanadyan bĕnĕra, yèn tindaké woŋ liya, paṣṭiné iṅaran sisip, iku kaŋ lumraḥ, ṅaṅgo bĕnĕr pribadi.
7. nora nana paṅgawé kaŋ luwiḥ gampaŋ, kaya woŋ mamahoni, sira liŋ éliṅa, aja sugiḥ wahonan, dèn samya raharjèŋ budi, iṅkaŋ prayoga, siṅa siṅa kaŋ lali.
8. iṅkaŋ éliŋ aṅéliṅĕna ya maraŋ, sanak kañca kaŋ lali, dèn nĕdya raharja, maṅkana tindakira, yèn datan kaduga uwis, sira mĕnĕṅa, aja sok aṅrasani.
9. nĕmu dosa añĕla sapaḍa paḍa, déné woŋ ṅaḷĕm ugi, yèn duruŋ pratéla, iŋ bĕcikiŋ manuṅsa, aja agé guṅguŋ kaki, mĕnèk tan ñata, dadi cirinirèki.
10. déné kaŋ wis kapraḥ iŋ maṅsa samaṅkya, yèn ana dèn sĕnĕṅi, iŋ paṅaḷĕmira, pan koṅsi pandiraṅan, matané koṅsi mandĕlik, nadyan alaa, ginuṅguŋ bĕcik ugi.
11. aja ṅaḷĕm aja mada lamun bisa, yèn uga jaman maṅkin, iya samubaraŋ, yèn ora sinĕnĕṅan, dèn poyok kapati pati, nora prasaja, sabaraŋ kaŋ dèn pikir.
12. ṅaṇḍut rukun bĕcik ṅaṛĕpan kéwala, iŋ wuri aṅrasani, iṅkaŋ ora ora, kabèḥ kaŋ rinasanan, ala bĕcik dèn rasani, tan paraḥ paraḥ, wiraṅroṅé dumadi.
.8. wiraṅroŋ
1. dèn samya marṣudèŋ budi, wiwéka dipunwaspahos, aja dumèḥ dumèḥ bisa muwus, yèn tan pantĕs ugi, sanadyan muŋ sakĕcap, yèn tan pantĕs prĕnahira.
2. kudu golèk maṅsa ugi, paṅgonan lamun mirahos, lawan aja agé sira muwus, dunuṅé dèn kèṣṭi, aja agé kawĕdal, yèn duruŋ pantĕs rowaṅña.
3. rowaŋ sapocapan ugi, kaŋ pantĕs ṅajak calaṭon, aja sok mĕtua woŋ calaṭu, ana pantĕs ugi, rinuṅu mriŋ woŋ kaṭaḥ, ana satĕṅaḥ micara.
4. tan pantĕs akèḥ ṅawruhi, mulané lamun mirahos, dipunṅaraḥ araḥ ywa kabañjur, yèn sampun kawijil, tan kĕna tinututan, mulané dipunprayitna.
5. lan maniṅé woŋ ṅahurip, aja ṅakèhkĕn supahos, iku gawé ṛĕgĕd badanipun, naṅiŋ maṅsa maṅkin, tan étuŋ prakara, supata ginawé dinan.
6. dèn paḍa gĕmi iŋ laṭi, aja ṅakèhkĕn pipisoḥ, cacaḥ cucaḥ srĕṅĕn ṅabul abul, lamun andukani, dèn dumĕliŋ dosaña, mriŋ abdi kaŋ maṅgiḥ duka.
7. lawan paḍa dèn pakéliŋ, tĕguhana lahir batos, aja ṅalap raṇḍaniŋ sadulur, sanak miwaḥ abdi, kañca réwaŋ sapaṅan, miwaḥ mariŋ pasanakan.
8. gawé salaḥ grahitaniŋ, iŋ liyan kaŋ sami anon, nadyan lilaa lanaṅanipun, kaŋ aṅruṅu élik, iŋ batin tan pitaya, maṅsa kuraṅa parawan.
9. tan wuruŋ dipuncirèni, iŋ batin iṅaran rusoḥ, akèḥ jaga jaga jroniŋ kalbu, araŋ ṅandĕl batin, iŋ tyasé paḍa suda, paṅandĕlé mriŋ bĕndara.
10. ana cacad aguŋ maliḥ, aṅlaṅkuṅi sakiŋ awon, apan sakawan iku kèhipun, ḍiṅin woŋ madati, piṇḍo woŋ ṅabotohan, kapiŋ tiga woŋ durjana.
11. kapiŋ sĕkawané ugi, woŋ ati sudagar awon, mapan suka sugiḥ watĕkipun, iŋ rina lan wĕṅi, muŋ baṭiné dèn étaŋ, alumuḥ lamun kaloṅa.
12. iku upamané ugi, duwé ḍuwit pituŋ bagor, mapan nora maṛĕm iŋ tyasipun, ilaṅa saḍuwit, gĕgĕtun pataŋ warṣa, paḍa lan ilaŋ saḷĕkṣa.
13. woŋ ati sudagar ugi, sabaraŋ prakara tamboḥ, amuŋ yèn ana woŋ tĕka iku, aṅgĕgawa ugi, gagaḍèn pan tumraṅgal, ulaté tĕka sumriṅaḥ.
14. déné woŋ durjana ugi, nora nana kaŋ dèn batos, rina wĕṅi amuŋ kaŋ dèn étuŋ, duwèkiŋ lyan nĕṅgiḥ, dahat datan prayoga, kalamun watĕk durjana.
15. déné bobotoḥ puniki, sabaraŋ pakaryan ĕmoḥ, lawan kaṭaḥ liñok parapadu, yèn pahitan ĕntiŋ, tan wuruŋ aṅgĕgampaŋ, ya maraŋ darbèkiŋ sanak.
16. nadyan wasiyatiŋ kaki, nora wuruŋ dipunĕdol, lamun mĕnaŋ ĕndaŋ gawé aṅkuḥ, pan kaya bhupati, wèwèḥ tan ṅaraḥ araḥ, punika awoniŋ baṅsat.
17. kabutuḥ pisan mamaliŋ, tiniténan saya awon, apan botĕn wontĕn pĕnĕdipun, pramilané sami, sadaya ṅiṅgahana, aṅgĕgulaŋ ṅabotohan.
18. déné ta woŋ kaŋ madati, kĕsèdé kamoran lumoḥ, amuŋ iṅkaŋ dadi sĕnĕṅipun, ṅaḍĕp diyan sarwi, liṅgiḥ ṅambèn jĕjégaŋ, sarwi léyaṅan bĕdudan.
19. yèn lèrèn ñĕrèt aḍiḍis, nétrané pan mĕṛĕm karo, yèn wus dadi awaké akuru, cahya biru putiḥ, jaḷĕbut wĕdi taya, lambé biru untu pĕṭak.
20. bĕtèké satron lan gambir, jambé suruḥ araŋ wawoḥ, ambĕkané sarwi mĕlar miṅkus, watuké aṅgigil, jalagra anèŋ ḍaḍa, tan wuruŋ ṅĕstob bolira.
21. yèn mati ṅaṅgo dalindiŋ, suprandéné nora kapok, iku paḍa siṅgahana patut, aja na ṅlakoni, woŋ maṅan apyun ala, uripé dadi tontonan.
22. iku kabèḥ nora bĕcik, aja na wani aṅaṅgo, paṅgawé pataŋ prakara iku, dèn paḍa pakéliŋ, aja na wani nĕrak, kaŋ nĕrak tan maṅgiḥ arja.
23. lawan ana waḷĕr maliḥ, aja sok aṅguŋ kawuron, ṅinum sajĕŋ tanpa maṅsa iku, ĕndi liré ugi, aṅombé sabĕn dina, pan iku watĕké ala.
24. kalamun woŋ wuru ugi, ilaŋ prayitnaniŋ batos, nora ajĕg baraŋ pikiripun, éliṅé iŋ ati, pan baliyar baliyar, ĕndi ta iŋ bĕcikira.
25. lan aja kaṛĕm sirèki, iŋ wanodya iṅkaŋ awon, lan aja buka wadi sirèku, ṅarṣaniŋ pawèstri, tan wuruŋ nuli coraḥ, sampun lumrahiŋ wanita.
26. tan bisa simpĕn wawadi, sakiŋ rupĕké iŋ batos, pan wus pinañci déniŋ hyaŋ aguŋ, nitahkĕn pawèstri, apan iku kinarya, gañjaran mariŋ woŋ priya.
27. kabèḥ dèn paḍa nastiti, maraŋ pitutur kaŋ yĕktos, aja dumèḥ tutur tanpa ḍapur, yèn bakalé bĕcik, dèn aṅgo wèḥ muphaṅat, kaya pucuŋ lan kaluwak.
9. pocuŋ
1. kamulané kaluwak nom nomanipun, pan dadi satuṅgal, pucuŋ arané punika, yèn wis tuwa kaluwaké pisaḥ pisaḥ.
2. dèn budiya kapriyé iŋ bĕcikipun, aja ṅanti pisaḥ, kumpula kaya ĕnomé, ĕnom kumpul tuwa kumpul kaŋ prayoga.
3. aja kaya kaluwak ĕnomé kumpul, basa wis atuwa, tiŋ saḷĕbar ḍéwé ḍéwé, nora wuruŋ bakal dadi bumbu piṇḍaŋ.
4. woŋ sadulur nadyan sanak dipunrukun, aja ṅanti pisaḥ, iŋ samubaraŋ karṣané, paḍa rukun dinulu tĕka prayoga.
5. abot èṇṭèŋ woŋ duwé sanak sadulur, èṇṭèṅé yèn pisaḥ, pikiré tan dadi siji, abotipun yèn sabiyantu iŋ karṣa.
6. luwiḥ abot woŋ duwé sanak sadulur, jitus taṇḍiṅira, yèn goloŋ sabaraŋ pikir, kacèk uga lan woŋ kaŋ tan sugiḥ sanak.
7. lamun bĕnĕr lan pintĕr pamomoṅipun, kaŋ ginawé tuwa, aja ṅaṅgo abot sisiḥ, dipunpaḍa pamĕṅkuné mriŋ sĕntana.
8. mapan éwuḥ woŋ tinitaḥ dadi sĕpuḥ, tan kĕna gumampaŋ, iya maraŋ saduluré, tuwa anom aja béda trapiŋ karya.
9. kaŋ saṛĕgĕp kalawan iṅkaŋ maliñcur, paḍa dèn kawruhan, sira aḷĕma kaŋ bĕcik, kaŋ maliñcur agé sira bĕndonana.
10. yèn tan mari binĕndon goné maliñcur, agé tinatrapan, sapantĕsé lan dosanèŋ, pan sĕntana dimèné dadi tulaḍa.
11. lan woŋ liya darapon wĕdiya iku, kaŋ paḍa ṅawula, iŋ batiné wĕdi asiḥ, pan maṅkono labuhan woŋ dadi tuwa.
12. dèn ajĕmbar dèn amot lawan dèn mĕṅku, dèn piṇḍa sagara, tyasé ṅĕmot ala bĕcik, mapan ana papañcèné sowaŋ sowaŋ.
13. pan sadulur tuwa kaŋ wajib pitutur, maraŋ kaŋ taruna, kaŋ anom wajibé wĕdi, sarta manut wuruké sadulur tuwa.
14. kaŋ tinitaḥ dadi anom aja mĕsgul, batin rumasaa, yèn wis titahiŋ hyaŋ widdhi, yèn mĕsgula ṅowahi kodratiŋ sukṣma.
15. nadyan bĕnĕr yèn woŋ anom dadi luput, yèn ta aṅaṅgowa, iŋ pikirira pribadi, pramilané woŋ anom aja uguṅan.
16. yèn dadi nom dèn wĕruḥ iŋ ĕnomipun, déné iṅkaŋ tuwa, dèn kaya bañu iŋ bèji, déné wĕniŋ paniṅalé aja samar.
17. lawan maniŋ ananiŋ pitutur iṅsun, yèn sira amaca, layaŋ sabaraŋ layaṅé, aja pijĕr katuṅkul niṅali sastra.
18. caritané ala bĕcik dipunwĕruḥ, nuli rasakĕna, layaŋ iku sakuniné, dèn karasa kaŋ bĕcik sira aṅgowa.
19. iṅkaŋ ala kawruhana alanipun, dadiné tyasira, wĕruḥ ala lawan bĕcik, iṅkaŋ bĕcik wiwitané sira wruha.
20. woŋ kaŋ laku maṅkana wiwitanipun, bĕcik wĕkasanña, woŋ laku maṅkana wité, iŋ satĕmaḥ puniku pan dadi ala.
21. iŋ sabaraŋ prakara dipunkadulu, wiwitan wĕkasan, bĕnĕr lan luputé kèṣṭi, ana bĕcik wĕkasané dadi ala.
22. dipunwĕruḥ iya iŋ kamulanipun, kalawan wĕkasan, puniku dipunkaliṅliŋ, ana ala dadi bĕcik iŋ wĕkasan.
23. éwuḥ tĕmĕn babo woŋ urip puniku, apan nora kĕna, kinira kira iŋ budi, araŋ mantĕp wijiliŋ basa raharja.
10. mijil
1. poma kaki paḍa dipunéliŋ, iŋ pitutur iṅoŋ, sira uga satriya arané, kudu antĕŋ jĕtmika iŋ budi, ruruḥ sarwa wasis, samubaraṅipun.
2. lan dèn nĕdya prawira iŋ batin, naṅiŋ aja katon, sasabana yèn duruŋ maṅsané, kakĕndĕlan aja wani miṅkis, wiwéka iŋ batin, dèn samar dèn sĕmu.
3. lan dèn sami mantĕp mariŋ bĕcik, lan ta wĕkas iṅoŋ, aja kuraŋ iya prayitnané, yèn wus tinitaḥ mariŋ hyaŋ widdhi, iŋ badan puniki, wus papañcènipun.
4. ana woŋ narima wus titahiŋ, hyaŋ pan dadi awon, lan ana woŋ tan nrima titahé, iŋ wĕkasan iku dadi bĕcik, kawruhana ugi, aja salaŋ surup.
5. yèn woŋ boḍo kaŋ tan nĕdya ugi, tatakon titiron, anarima iŋ titaḥ boḍoné, iku woŋ narima nora bĕcik, déné iṅkaŋ bĕcik, woŋ narima iku.
6. kaya upamané woŋ aṅabdi, amagaŋ saŋ katoŋ, lawas lawas katĕkan sĕdyané, dadi mantri utawa bhupati, miwaḥ saliyané, iŋ tyasé panuju.
7. nuli narima tĕrus iŋ batin, tan mèṅèŋ iŋ katoŋ, tan rumaṅsa iŋ kanikmatané, sihiŋ gusti tĕkèŋ anak rabi, woŋ narima bĕcik, kaŋ maṅkono iku.
8. naṅiŋ araŋ iŋ maṅsa samaṅkin, kaŋ kaya maṅkono, kaŋ wis kapraḥ iya salawasé, yèn wis ana liṅgihé saṭiṭik, apan nuli lali, iŋ wiwitanipun.
9. paṅrasané duwèké pribadi, sabaraŋ kaŋ kaṅgo, nora èṅĕt iŋ mula mulané, awitiŋ sugiḥ saṅkaniŋ mukti, panrimaniŋ ati, kaya goné nĕmu.
10. tan rumasa murahiŋ hyaŋ widdhi, jalaran saŋ katoŋ, iŋ jaman mĕṅko iya mulané, aran turun woŋ lumakyèŋ kardi, tyasé tan saririḥ, kasusu iŋ akuḥ.
11. araŋ kaŋ sĕtya amaḷĕs iŋ siḥ, iŋ gusti saŋ katoŋ, lawan kabèḥ iku iŋ batiné, tan anĕdya narima iŋ widdhi, iku woŋ kaŋ tan wrin, iŋ nikmat ranipun.
12. woŋ kaŋ tan narima dadi bĕcik, titahiŋ hyaŋ manon, iki iya kita rupané, kaya woŋ kaŋ aṅupaya ṅèlmi, lan woŋ sĕdya ugi, kapintĕran iku.
13. uwis pintĕr naṅiŋ iku makṣiḥ, gonira ṅupados, iŋ uṇḍaké ya kapintĕrané, utawa uṅgahiŋ kawruḥ yĕkti, duruŋ maṛĕm batin, lamun duruŋ tutug.
14. iŋ paṅawruḥ iṅkaŋ dèn sĕnĕṅi, kaŋ wus sĕm iŋ batos, miwaḥ iŋ kapintĕran wus déné, iŋ samubaraŋ pakarya uwis, nora ṅaṅgo lali, kabèḥ wus kawĕṅku.
15. yèn woŋ kaŋ kuraŋ narima ugi, iku luwiḥ awon, baraŋ gawé aja agé agé, aṅaṅgowa sabar lawan ririḥ, dadi baraŋ kardi, ṛĕsik tur rahayu.
16. lan maniṅé babo dèn pakéliŋ, iŋ pitutur iṅoŋ, sira uga paḍa ṅĕmpèk ĕmpèk, iya maraŋ kaŋ jumĕnĕŋ aji, iŋ lahir lan batin, dèn ṅrasa kawĕṅku.
17. kaŋ jumĕnĕŋ iku kaŋ bawani, wus karṣaniŋ manon, wajib paḍa wĕdi lan bĕktiné, aja mampaŋ paréntahiŋ aji, nadyan anom ugi, lamun dadi ratu.
18. nora kĕna iya dèn wahoni, paréntahiŋ katoŋ, ḍasar ratu bĕnĕr paréntahé, kaya priyé gonira sumiṅkir, yèn tan aṅlakoni, pĕṣṭi tan rahayu.
19. naṅiŋ kapraḥ iŋ maṅsa puniki, aṅgĕpé aṅrĕṅkoḥ, tan rumasa lamun ṅĕmpèk ĕmpèk, iŋ batiné datan nĕdya éliŋ, kamuktèné iki, ṅĕndi saṅkanipun.
20. yèn éliṅa jalarané mukti, pĕṣṭiné tan ṅrĕkoḥ, sakiŋ batin duruŋ ṅrasakaké, iŋ pitutur iṅkaŋ ḍiṅin ḍiṅin, ḍasar tan praduli, wuruké woŋ sĕpuḥ.
21. iŋ dadiné baraŋ tindak iki, araŋ iṅkaŋ taṅgon, sakiŋ duruŋ ana laṇḍĕsané, ṅaṅgo iŋ karṣanira pribadi, ṅawag baraŋ kardi, dadi tanpa ḍapur.
22. mulané ta wĕkas iṅsun iki, dèn kĕṛĕp tatakon, aja isin ṅatokkĕn boḍoné, sakiŋ boḍo witiŋ pintĕr kaki, muŋ nabi kakasiḥ, pintĕr tan winuruk.
23. sabakdané pan tan ana ugi, pintĕré tatakon, mapan lumraḥ iŋ woŋ urip kiyé, mulané woŋ anom dèn tabĕri, aṅupaya ṅèlmi, dadiya pikukuḥ.
24. iŋ driyanira dadi tatali, iŋ tyas dimèn adoḥ, sakèhiŋ ati kaŋ ala kiyé, nadyan lali apan nuli éliŋ, yèn woŋ kaŋ wus ṅèlmi, kaŋ baṅĕt tuwajuḥ.
25. kacèk uga lan kaŋ tanpa ṅèlmi, sabaraṅé kahot, déné ṅèlmu iku iṅkaŋ kaṅgé, sadinané gurokna kariyin, pan saréṅat ugi, parabot kaŋ prĕlu.
26. ṅèlmu saréṅat puniku dadi, wawaḍaḥ kaŋ yĕktos, kawruḥ tĕtĕlu kawĕṅku kabèḥ, pan saréṅat kaṅgo lahir batin, mulané dèn sami, braṅtaa iŋ ṅèlmu.
11. asmaradana
1. paḍa nĕtĕpana ugi, kabèḥ paréntahiŋ sarak, tĕrusna lahir batiné, salat limaŋ wĕktu uga, tan kĕna tiniṅgala, sapa tiṅgal dadi gabug, yèn miṅsiḥ ṛĕmĕn nèŋ praja.
2. wiwitana badan iki, iya tĕka iŋ saréṅat, ananiŋ manuṅsa kiyé, rukun islam kaŋ lilima, nora kĕna tiniṅgal, iku parabot linuhuŋ, muṅguḥ woŋ urip nèŋ duña.
3. kudu uga dèn lakoni, rukun lilima punika, mapan ta sakuwasané, naṅiŋ aja tan linakyan, sapa tan ṅlakonana, tan wuruŋ nĕmu bĕbĕndu, paḍa sira ṅèstokĕna.
4. paréntahira hyaŋ widdhi, kaŋ ḍawuḥ mriŋ nabiyollaḥ, iŋ dalil kadis ĕṅgoné, aja na iṅkaŋ sĕmbrana, rasakna dèn karasa, dalil kadis rasanipun, dadi paḍaṅiŋ tyasira.
5. nora gampaŋ woŋ ṅahurip, yèn tan wĕruḥ uripira, uripé paḍa lan kĕbo, aṅur kĕbo dagiṅira, kalal yèn pinaṅana, pan manuṅsa dagiṅipun, yèn pinaṅan paṣṭi karam.
6. poma poma wĕkas mami, anak putu aja léna, aja katuṅkul uripé, lan aja duwé kaṛĕman, maraŋ papahès duña, siyaŋ dalu dipunémut, yèn urip maṅgiḥ antaka.
7. lawan aja aṅkuḥ bĕṅis, ḷĕṅus lanas laṅar lañcaŋ, calak ladak sumalonoŋ, aja ĕdak aja ṅĕpak, lan aja siya siya, aja jahil parapadu, lan aja parawadulan.
8. kaŋ kaṅgo iŋ maṅsa maṅkin, prayayi nom kaŋ dèn gulaŋ, kaya kaŋ wus muni kuwé, lumaku tĕmĕn kajèna, tan ṅaṅgo étuŋ murwat, lumaku kĕkuḍuŋ saruŋ, añjaluk dèn ḍoḍokana.
9. pan tanpa kusur sayĕkti, satriya tan wruḥ iŋ tata, ṅuṅgulakĕn satriyané, yèn aṅaraḥ ḍinoḍokan, aṅaṅgowa jajaran, yèn niyat luṅa añamur, aja ḍoḍokkĕn manuṅsa.
10. iku poma dipunéliŋ, kaki mriŋ pitutur iṅwaŋ, kaŋ wis muni buri kuwé, yèn ana iṅkaŋ ṅaṅgowa, cawaṅan woŋ bĕlasar, sakiŋ nora ṅruṅu tutur, ḷĕbar tan dadi dandanan.
11. baraŋ gawé dipunéliŋ, ṅaṅgowa tĕpa sarira, paréntaḥ lan sabĕnĕré, aja anbĕk kumawawa, amriḥ dèn wĕdènana, déné ta woŋ kaŋ wis luhuŋ, goné amĕṅku mriŋ bala.
12. dèn priḥ wĕdi sarta asiḥ, pamĕṅkuné mariŋ wadya, winĕruhĕna iŋ gawé, dèn bisa aminta minta, karyaniŋ wadyanira, iŋ saluṅguḥ luṅguhipun, ana karyané priyaṅga.
13. sarta wĕruḥna iŋ bĕcik, gantuṅana iŋ tatrapan, darapon pĕṭĕl karyané, dimèné aja sĕmbrana, aṅlakoni iŋ karya, ywa dumèḥ asiḥ sirèku, yèn léléda tatrapana.
14. nadyan sanak sanak ugi, yèn léléda tinatrapan, murwatĕn lawan sisipé, darapon paḍa wĕdiya, iŋ wuri ywa léléda, iŋ dana kramanirèku, aja pĕgat dèn warata.
15. lan maniṅé suta mami, muṅguḥ aṅgĕp woŋ ṅawula, dèn suka sukur iŋ batos, aja pĕgat iŋ panĕḍa, mriŋ hyaŋ kaŋ amisésa, iŋ rahina wĕṅinipun, mulyaniŋ nagara tata.
16. iku uga dèn pakéliŋ, kalamun mulya kaŋ praja, mupaṅati mriŋ woŋ akèḥ, iŋ rina wĕṅi ywa pĕgat, nĕnĕḍa mriŋ paṅéran, tulusiŋ karaton prabhu, miwaḥ arjaniŋ nagara.
17. iku wawaḷĕsiŋ batin, muṅguḥ woŋ suwitèŋ nata, iŋ lahir sĕtyatuhuné, lawan cacaḍaŋ sakarṣa, badan datan ḷĕgana, iŋ siyaŋ dalu pan katur, pati uripiŋ kawula.
18. gumantuŋ karṣaniŋ gusti, iku trapiŋ wadya sĕtya, nora kaya jaman maṅké, yèn wis olèḥ kaluṅguhan, trapé kaya woŋ dagaŋ, ṅétuŋ tuna baṭinipun, iŋ tyasé datan rumasa.
19. uwité dadi priyayi, sapa kaŋ gawé mriŋ sira, nora wĕruḥ wiwitané, iya wĕruhé witira, dadi sakiŋ ruruba, mulané iŋ batinipun, paṅétuṅé lir woŋ dagaŋ.
20. pikiré gĕlisa puliḥ, rurubané duk iŋ dadya, iŋ rina wĕṅi ciptané, kapriyé lamun bisaa, maḷĕs sihiŋ bĕndara, liṅgihé lawan tinuku, tan wuruŋ aṅrusak désa.
21. pamrihé gĕlisa baṭi, nadyan bésuk dèn pocota, duwèké sok wisa pulèḥ, kapriyé lamun tataa, polahé salaŋ tuñjaŋ, paḍa kaya woŋ bĕbruwun, tan étuŋ duga prayoga.
22. poma paḍa dèn pakéliŋ, ṅaṅgowa sukur lan lila, narima iŋ sapañcèné, lan aja amriḥ sarama, mriŋ wadya naṇḍaŋ karya, lan paḍa amriha iku, arjané kaŋ désa désa.
23. woŋ désa pan aja ṅanti, éwuḥ goné nambut karya, sasawaḥ miwaḥ tĕgalé, garu maluku tĕtĕpa, aja dèn ulaḥ ulaḥ, dimèné tulus nanandur, pari kapas miwaḥ jarak.
24. yèn désa akèḥ woṅnèki, iṅkaŋ baṭi paṣṭi sira, wĕktuniŋ pajĕg uṇḍaké, dipunrèrèḥ pamrihira, aja ṅanti ṛĕkasa, dèn wani kalaḥ rumuhun, béya kuraŋ pariṅana.
25. kapriyé gĕmaha ugi, sakèhé kaŋ désa désa, salin bĕkĕl pĕṇḍak ĕpon, pamĕtuné juŋ sacacaḥ, bĕktiné karobĕlaḥ, satĕmaḥ désané suwuŋ, priyayi jaga pocotan.
26. poma aja aṅlakoni, kaya pikir kaŋ maṅkana, tan wuruŋ liṅsĕm tĕmahé, dèn paḍa aṅèstokĕna, mriŋ pitutur kaŋ arja, nora nana alanipun, woŋ ṅlakoni kabĕcikan. 27. nonoman samĕṅko iki, yèn dèn pituturi arja, araŋ kaŋ aṅruṅokaké, dèn samur asasĕmbranan, ĕmoḥ yèn anirua, malaḥ maḷĕs apitutur, paṅrasané sampun wigña.
28. aja ta maṅkono ugi, yèn ana woŋ cacarita, ruṅokĕna sahuniné, iṅkaŋ bĕcik siraṅgowa, buwaṅĕn iṅkaŋ ala, aṅgitĕn sajroniŋ kalbu, ywa ṅaṅgo budi nonoman.
12. sinom
1. ambĕké kaŋ wus utama, tan ṅĕṇḍak gunaniŋ janmi, amiguna iŋ aguna, sasolahé kudu baṭi, pintĕré dèn aliṅi, boḍoné dinèkèk ṅayun, pamrihé dèn inaa, mriŋ paḍa paḍaniŋ janmi, suka buṅaḥ dèn ina sapaḍa paḍa.
2. iṅsun uga tan maṅkana, balilu kaŋ sun aliṅi, kabisan sun dèkèk ṅarṣa, isin mĕnèk dèn arani, balilu iŋ sujanmi, naṅiŋ batin iṅsun cubluk, parandéné jroniŋ tyas, lumaku iṅaran wasis, tanpa ṅrasa prandéné sugiḥ carita.
3. tur duk iṅsun makṣiḥ bocaḥ, akèḥ kaŋ amituturi, lakuniŋ woŋ kuna kuna, lalabĕtan iṅkaŋ bĕcik, miwaḥ carita ugi, kaŋ kajaba sakiŋ ṅĕbuk, iku kaŋ aran kojaḥ, suprandéné iṅsun niki, tĕka nora nana uṇḍakiŋ kabisan.
4. carita gon iṅsun nular, woŋ tuwa kaŋ momoŋ ḍiṅin, akèḥ kaŋ sugiḥ carita, sun ruṅokkĕn rina wĕṅi, samĕṅko makṣiḥ éliŋ, sawisé diwasaniṅsun, bapak kaŋ pariŋ wulaŋ, miwaḥ ibu mituturi, tatakrama iŋ pratiṅkaḥ kaŋ raharja.
5. naṅiŋ paḍa èstokĕna, pitutur kaŋ muni tulis, yèn sira nĕdya raharja, aṅgonĕn pitutur iki, gon iṅsun ṅéliŋ éliŋ, pitutur woŋ sĕpuḥ sĕpuḥ, mugi paḍa bisaa, aṅaṅgo pitutur bĕcik, ambrĕkati wuruké woŋ tuwa tuwa.
6. lan aja na lali paḍa, mriŋ luluhur iṅkaŋ ḍiṅin, satindaké dèn kawruhan, aṅuraṅi ḍahar guliŋ, goné amantiŋ ḍiri, amasuḥ sariranipun, tĕmuné kaŋ sinĕja, muṅguḥ woŋ nĕḍa iŋ widdhi, lamun tĕmĕn lawas éṅgalé tinĕkan.
7. paṅéran kaŋ sipat muraḥ, juruṅi khajatiŋ dasiḥ, iṅkaŋ tĕmĕn tinĕmĕnan, pan iku ujariŋ dalil, ñatané ana ugi, iya ki agĕŋ iŋ tarub, wiwitané nĕnĕḍa, tan pĕḍot tumĕkèŋ siwi, wayaḥ buyut caṅgaḥ warèṅé atampa.
8. panĕmbahan sénapatya, kaŋ jumĕnĕŋ iŋ matawis, iku kapaṛĕŋ lan maṅsa, ḍawuḥ nugrahaniŋ widdhi, saturuné ḷĕstari, sakiŋ brĕkatiŋ luluhur, mriḥ tulusiŋ nugraha, iṅkaŋ kari kari iki, wajib uga anirua lakunira.
9. mriŋ luluhur kuna kuna, ĕṅgoné amantiŋ ḍiri, iya sakuwasanira, sakuwaté aṅlakoni, ñĕgaḥ turu saṭiṭik, sarta ñuda ḍaharipun, pirabara bisaa, kaya iṅkaŋ ḍiṅin ḍiṅin, atirua sapratĕlon saprapatan.
10. ana ta siliḥ babasan, paḍa sinahua ugi, lara sajroniŋ kapénak, suka sajroniŋ prihatin, lawan iṅkaŋ prihatin, mapan suka iŋ jronipun, iku dèn sinahua, lan mati sajroniŋ urip, iṅkaŋ kuna pan maṅkono kaŋ dèn gulaŋ.
11. pamoriŋ gusti kawula, pan iku iṅkaŋ sayĕkti, dadiné sotya ludira, iku dèn waspada ugi, gampaṅané ta kaki, tĕmbaga lawan mas iku, linĕbur iŋ dahana, luluḥ amor dadi siji, mari nama kĕñcana miwaḥ tĕmbaga.
12. iṅaranana kĕñcana, pan wus kamoran tĕmbagi, iṅaranana tĕmbaga, wus kamoran kĕñcana di, mila dipunwastani, mapan suwasa puniku, pamoré mas tĕmbaga, pramila namané salin, lan rupané sayĕkti puniku béda.
13. cahya abaŋ tuntuŋ jĕnar, puniku suwasa murṇi, kalamun gawé suwasa, tĕmbagané nora bĕcik, pambĕsoté tan ṛĕsik, utawa nom ĕmasipun, iku dipunpaṇḍiṅa, soroté paṣṭi tan sami, pan suwasa bubul arané punika.
14. yèn arṣa karya suwasa, darapon dadiné bĕcik, amilihana tĕmbaga, olèha tĕmbaga prusi, binĕsot iṅkaŋ ṛĕsik, sarta masé iṅkaŋ sĕpuḥ, ṛĕsik tan kawoworan, ḍasar sari paṣṭi dadi, iku kĕna iṅaran suwasa mulya.
15. puniku mapan utama, tĕpané badan puniki, lamun arṣa ṅawruhana, pamoré kawula gusti, sayĕkti kudu ṛĕsik, aja katémpélan nĕpsu, luamaḥ lan amaraḥ, sarta suci lahir latin, didimèné sarira bisa atuṅgal.
16. lamun ora maṅkonowa, sayĕktiné nora dadi, muṅguḥ ṅèlmu iṅkaŋ ñata, nora kĕna dèn sasabi, éwuḥ gampaŋ sayĕkti, puniku woŋ duwé kawruḥ, gampaŋ yèn winicara, aṅèl yèn duruŋ maṛĕṅi, iŋ wĕtuné binuka jroniŋ wardaya.
17. naṅiŋ ta sabaraŋ karya, kaŋ kinira dadi bĕcik, pantĕs dèn talatènana, lawas lawas bok pinaṅgiḥ, dan mantĕp jroniŋ ati, ṅimankĕn tuduhiŋ guru, aja uga bosĕnan, kalamun arṣa utami, mapan ana dalilé kaŋ wus kalakyan.
18. para luluhur sadaya, goné nĕnĕḍa iŋ widdhi, bisaa baboni praja, dadi ugĕriŋ rat jawi, sakiŋ talatèn ugi, ĕṅgoné katiban wahyu, iŋ mula mulanira, lakuniŋ luluhur ḍiṅin, aṇḍap asor ĕṅgoné anamur lampaḥ.
19. tapané ṅaṅgo aliṅan, pan sami alaku tani, iku kaŋ kinarya sasap, pamrihé aja katawis, ujub riya lan kibir, sumuṅaḥ iṅkaŋ siniṅkur, lan ĕndi kaŋ kaṅgonan, wahyuniŋ karaton jawi, tinémpélan aṅgĕpipun kumawula.
20. puniku laku utama, tumindak sarta kakĕlir, nora ṅatiṅalkĕn lampaḥ, wadiné kaŋ dèn aliṅi, panĕdyané iŋ batin, pan jĕro paṅarahipun, asoré ṅĕmu rasa, prayoga tiniru ugi, anak putu aja na tiṅgal lañjaran.
21. lawan ana kaŋ wasiyat, prasapa kaŋ ḍiṅin ḍiṅin, wajib paḍa kawruhana, mriŋ anak putu kaŋ kari, lan aja na kaŋ lali, anĕrak wawaḷĕripun, maraŋ luluhur paḍa, kaŋ minulyakkĕn iŋ widdhi, muga muga muphaṅatana kaŋ daraḥ.
22. wiwitan kaŋ aprasapa, ki agĕŋ iŋ tarub wĕliŋ, iŋ satĕḍak turunira, tan rinilan ṅaṅgo kĕris, miwaḥ wahos tan kĕni, kaŋ awak waja puniku, ḷĕmbu tan kĕna ḍahar, dagiṅé lan ora kĕni, aṅiṅua maraŋ woŋ waṇḍan tan kĕna.
23. déné ki agĕŋ séséla, prasapané nora kĕni, iŋ satĕḍak turunira, ñampiŋ ciṇḍé dèn waḷĕri, kalawan nora kĕni, iŋ ṅaṛĕpan nandur waluḥ, wohé tan kĕna maṅan, panĕmbahan sénapati, iŋ ṅalaga punika iṅkaŋ prasapa.
24. iŋ satĕḍak turunira, mapan nora dèn lilani, nitiḥ kuda uḷĕs napas, lan maliḥ dipunwaḷĕri, nitiḥ turaṅga ugi, kaŋ kĕkoñcèn surinipun, ḍahar ṅuṅkurkĕn lawaŋ, iŋ wuri tan anuṅgoni, dipunémut aja na nĕrak prasapa.
25. jĕŋ sultan aguŋ mataram, prasapané nora kĕni, mriŋ tĕḍaké yèn nitiha, jaran bĕndana yèn jurit, ṅaṅgo wahos tan kĕni, kaŋ laṇḍéyan kayu wĕrgu, lan tan iṅakĕn daraḥ, yèn tan bisa tĕmbaŋ kawi, pan prayoga satĕḍaké sinahua.
26. jĕŋ sunan pakubhuwana, kaŋ jumĕnĕŋ iŋ samawis, kondur madĕg kartasura, prasapanipun tan kĕni, nĕṅgiḥ kalamun nitiḥ, dipaṅga saturunipun, sunan prabhu maṅkurat, waḷĕr mriŋ saturunnèki, tan linilan ṅujuŋ astana iŋ bĕtaḥ.
27. lawan tan kĕna ṅaṅgowa, ḍuwuŋ saruṅan tan mawi, kandĕlan yèn nitiḥ kuda, kabèḥ aja na kaŋ lali, lan aja na gagampil, puniku prasapanipun, nĕṅgiḥ jĕŋ susuhunan, pakubhuwana piŋ kaliḥ, mriŋ satĕḍak turunira linaraṅan.
28. maṅan apyun nora kĕna, sinĕrétan dèn lilani, iṅuntal pan linaraṅan, sapa kaŋ wani ṅlakoni, narajaŋ waḷĕr iki, yèn ṅanti kaḷĕbon apyun, pan kĕna iŋ prasapa, jinabakkĕn tĕḍaknèki, jĕŋ susunan iṅkaŋ sumaré ṅlawiyan.
29. prasapa jĕŋ susuhunan, pakubhuwana kapiŋ tri, mriŋ satĕḍak turunira, mapan datan dèn lilani, agawé kandĕl ugi, woŋ kaŋ séjé jinisipun, puniku linaraṅan, anak putu wuri wuri, aja ana kaŋ wani nrajaŋ prasapa.
30. wontĕn waḷĕr kaliwatan, sakiŋ luluhur kaŋ ḍiṅin, linaraṅan aṅambaha, wana krĕṇḍawahanèki, déné kaŋ amaḷĕri, saŋ danañjaya iŋ daṅu, lan maliḥ winaḷĕran, kabèḥ tĕḍakiŋ matawis, yèn dolana iŋ wana rami tan kĕna.
31. déné sisirikanira, yèn tĕḍakiŋ dĕmak ugi, aṅaṅgo wuluŋ tan kĕna, lawan ta kaŋ ñirik maliḥ, bĕbĕd loṇṭaŋ tan kĕni, kalamun tĕḍak madiun, lan payuŋ ḍaṇḍan abaŋ, tĕḍak madura tan kĕni, ṅaṅgo polèŋ lan baṭikan paraṅrusak.
32. tĕḍakiŋ kudus tan kĕna, aḍahara dagiŋ sapi, tĕḍakiŋ sumĕnĕp ika, nora kĕna ajaŋ piriŋ, watu pan datan kĕni, ḍahar kidaŋ dagiṅipun, mapan ta linaraṅan, goḍoŋ palasa kinardi, ajaŋ maṅan pan puniku nora kĕna.
33. kabèḥ anak putu paḍa, éliŋ éliṅĕn ywa lali, prasapa kaŋ kuna kuna, waḷĕriŋ luluhur ḍiṅin, èstokna iŋ jro ṅati, aja ṅanti nĕmu dudu, kalamun wani nĕrak, paṣṭi tan maṅgiḥ basuki, sinom salin girisa iṅkaŋ atampa.
13. girisa
1. anak putu dèn èstokna, waraḥ wuruké si bapa, aja na iṅkaŋ sĕmbrana, maraŋ wuruké woŋ tuwa, iŋ lahir batin dèn bisa, aṅaṅgo wurukiŋ bapa, iŋ tyas dèn paḍa santosa, tĕguhĕna jroniŋ nala.
2. aja na kuraŋ panrima, iŋ papaṣṭèniŋ sarira, yèn sakiŋ hyaŋ maha mulya, nitahkĕn iŋ badanira, lawan dipunawas uga, asor luhur waras lara, tanapi bĕgja cilaka, urip tanapi antaka.
3. iku sakiŋ iŋ hyaŋ sukṣma, miwaḥ ta iŋ umurira, kaŋ cĕṇḍak lawan kaŋ dawa, wus pinĕṣṭi mriŋ hyaŋ sukṣma, duraka yèn mahidowa, miwaḥ kuraŋ panarima, iŋ lohkil mahphulé kana, tulisané pan wis ana.
4. yogya paḍa ṅawruhana, sisikuné badanira, ya maraŋ hyaŋ maha murba, kaŋ misésa maraŋ sira, yèn sira duruŋ uniṅa, prayoga atatakona, mriŋ kaŋ paḍa wruḥ iŋ makna, iku kaŋ para ṅulama.
5. kaŋ wis wruḥ rasaniŋ kitab, darapon sira wĕruha, wajib mokaliŋ hyaŋ sukṣma, miwaḥ wajibiŋ kawula, lan mokalé kawruhana, miwaḥ ta iŋ tatakrama, saréṅat dipunwaspada, batal karam takokĕna.
6. sunat lan prĕlu punika, prabot kaṅgo sabĕn dina, iku kaki dipunpaḍa, tĕraŋ iŋ pitakonira, lan aja bosĕn jagoṅan, maraŋ kaŋ para ṅulama, miwaḥ woŋ kaŋ wus sampurṇa, paṅawruhé mriŋ hyaŋ sukṣma.
7. muwaḥ patrap tatakrama, iŋ tindak tanduk myaŋ basa, kaŋ tumiba maraŋ niṣṭa, tuwin kaŋ tumibèŋ madya, tanapi tibèŋ utama, iku sira takokĕna, ya maraŋ woŋ kaŋ sujana, miwaḥ mriŋ woŋ tuwa tuwa.
8. kaŋ paḍa bisa micara, tuwin kaŋ ṅaholaḥ sastra, iku pantĕs lakonana, bisa maḍaṅkĕn tyasira, karana ujariŋ sastra, utawa tĕka carita, iṅkaŋ kinarya géṇḍolan, amurukkĕn mriŋ woŋ muḍa.
9. lawan sok kĕṛĕpa maca, sabaraŋ layaŋ carita, aja anampik mriŋ layaŋ, carita iŋ kuna kuna, layaŋ babat kawruhana, caritané luhurira, darapon sira wĕruha, lalakoné woŋ prawira.
10. miwaḥ lalakon nalika, kaŋ para wali sadaya, kaŋ paḍa olèḥ nugraha, asalé sakiŋ punapa, miwaḥ kaŋ para satriya, kaŋ digdaya iŋ ṅayuda, lakuné sira tirua, lalabĕtan kaŋ utama.
11. nora susaḥ amiruṅga, muṅguḥ lakuniŋ satriya, carita kabèḥ pan ana, kaŋ niṣṭa lan kaŋ utama, kaŋ asor lan luhur paḍa, miwaḥ lakuniŋ nagara, pan kabèḥ anèŋ carita, ala bĕcik sira wruha.
12. yèn duruŋ maṅarti sira, caritané takokĕna, ya maraŋ woŋ tuwa tuwa, kaŋ paḍa wruḥ iŋ carita, iku iṅkaŋ dadi uga, muṇḍak kapintĕranira, naṅiŋ ta dipunéliṅan, sabaraŋ iṅkaŋ kapyarṣa.
13. aja na tiru iŋ bapa, baṅĕt tuna boḍo muḍa, kĕṭul tan duwé grahita, katuṅkul maṅan anéndra, naṅiŋ anak putu paḍa, mugi allaḥ ambukaa, maraŋ iŋ pitutur yogya, kabèḥ paḍa añakĕpa.
14. iŋ sawĕwĕkasiŋ bapa, muga ta kalakonana, kabèḥ paḍa mituruta, panĕḍaniṅsun mriŋ sukṣma, lanaŋ wadon salamĕta, maṅgiha suka raharja, iŋ doña miwaḥ ṅakérat, dinoḥna iŋ lara roga.
15. umuré paḍa dawaa, paḍa atut aruntuta, maraŋ saduluré paḍa, paḍa sugiha barana, tanapi sugiha putra, papaka jalu wanodya, kalawan maniṅé aja, ṅanti kapĕgatan trĕsna.
16. paḍa uga dèn pracaya, aja sumĕlaŋ iŋ nala, kabèḥ pitutur punika, mapan wahyuniŋ hyaŋ sukṣma, ḍawuḥ mriŋ sira sadaya, jalaraniŋ sakiŋ bapa, hyaŋ sukṣma pariŋ nugraha, maraŋ anak iṅsun paḍa.
17. dèn bisa nampani paḍa, muṅguḥ sasmitaniŋ sukṣma, iṅkaŋ ḍawuḥ mariŋ sira, winĕruhkĕn bĕcik ala, añĕgaḥ kaṛĕpanira, maraŋ paṅgawé kaŋ ala, kaŋ tumiba siya siya, iku papariŋ hyaŋ sukṣma.
18. pariŋ péliŋ maraŋ sira, tinuduhakĕn iŋ marga, kaŋ bĕnĕr kaŋ kaṅgo uga, iŋ duña iṅkaŋ sampurṇa, mugi anak putu paḍa, kĕnaa dadi tulaḍa, kabĕcikaniŋ manuṅsa, tinirua iŋ sujanma.
19. sakèhiŋ woŋ kapéṅina, aniru iŋ solahbawa, maraŋ anak putu paḍa, aṅgĕpé wĕdi asiha, kinalulutan iŋ bapa, kèḍĕpa paréntahira, tulusa mukti wibawa, iŋ satĕḍak turunira.
20. dinoḥna sakiŋ duraka, winantua iŋ nugraha, sakèhé nak putu paḍa, iṅkaŋ ṅimanakĕn uga, maraŋ pituturiŋ bapa, allaḥ kaŋ ñĕmbadanana, iŋ pandoṅaniṅsun iya, iŋ tyas iṅsun wus rumasa.
21. wak iṅsun upama surya, liṅsir kulon wayahira, pĕḍak mriŋ surupé uga, atĕbiḥ mariŋ timbulña, pira lawasé nèŋ duña, iŋ kahuripaniŋ janma, maṅsa ṅanti satus warṣa, iya umuriŋ manuṅsa.
22. mulané sun muruk maraŋ, kabèhé atmajaniṅwaŋ, sun tulis sun wèhi tĕmbaŋ, darapon paḍa rahaba, ĕṅgoné paḍa amaca, sarta ṅrasakkĕn carita, aja bosĕn dèn apalna, iŋ rina wĕṅi éliṅa.
23. lan mugi paḍa tirua, kaya luluhuré paḍa, sudira bĕtaḥ atapa, sarta waṣkiṭa iŋ nala, iŋ kasampurṇaniŋ gĕsaŋ, kaŋ patitis nora mamaŋ, iku ta panĕḍaniṅwaŋ, muga paḍa kalakona.
24. titi tamat kaŋ carita, sĕrat wawaḷĕr mriŋ putra, kaŋ yasa sĕrat punika, nĕṅgiḥ kaṅjĕŋ susuhunan, pakubhuwana kapiŋ pat, iŋ galiḥ panĕdyanira, kaŋ amaca kaŋ miyarṣa, yèn lali muga éliṅa.
25. tĕlasiŋ panuratira, sasi bĕsar piŋ saṅalas, akad kaliwon tahun dal, tata guna swarèŋ nata, maṅsaṣṭa windu sañcaya, wuku suṅsaŋ kaŋ atampa, ya allaḥ kaŋ luwiḥ wikan, obaḥ osikiŋ kawula.
