1. asmaradana
2. prĕlu muŋ kinèn cariwis, carita kaŋ mamriḥ suka, kaṇḍa doṅèŋ sahéliṅé, lalu roŋ ratri tan néndra, dadi sayahiŋ mata, ḷĕr ḷĕran pijĕr aṅantuk, mata ḍèmpèt ḍasar picak.
3. naracak sugiḥ maṅrĕti, jĕr ta wis lawas ginulaŋ, mriŋ gustiné kaŋ wus layon, ḍasar wasis pramèŋ sastra, prawira wicakṣaṇa, ḍèmĕs luwĕs mamriḥ sarju, niŋ kadaŋ mitra wandawa.
4. drawaya amariŋ siwi, kaŋ iŋ maṅké winisuḍa, labuhan mriḥ utamané, ginupita nèŋ padésan, ran urané woŋ wuta, muŋ karya paṅémut émut, sukaniŋ tyas sri naréndra.
5. nalika ri dité kapiŋ, salikur wulan lumakya, byalakir alip tahuné, sinĕṅkalan ñata mulya, saliraniŋ sujanma, wuta wujil ḍĕṅkak bucu, antuk sihirèŋ sarkara.
2. ḍaṇḍaŋgula
1. widadaniŋ carita ginupit, sri naréndra dènnya maṅun suka, nèŋ laṅĕnarja ri dité, tri latri lamun dalu, amirṣakkĕn doṅèṅiŋ janmi, catur bucu myaŋ picak, karya sĕṅsĕm saguŋ, wadya iṅkaŋ samya séba, byar rahina kasukan aṅabĕn kambiŋ, lan wraha gantya gantya.
2. maḷĕmé soma gantya nambuṅi, dipradikan dalu dĕṛĕs kitab, tapsir lan pĕkiḥ wastané, kèḥ misil saḥ iŋ kawruḥ, aṅawruhi suciniŋ ati, sarira batal kharam, najis miwaḥ mĕkruḥ, tartip tĕtĕpé woŋ salat, pinriḥ jumbuḥ mokaranaḥ lawan takbir, ékramé kaŋ sinĕdya.
3. lawan wajibé salakirabi, waris wasiyat utaŋ piutaŋ, woŋ ñiliḥ tan ṅulihaké, tanapi dol tinuku, tĕbas gaḍé wĕtuniŋ bhumi, iku iṅkaŋ rinasa, bĕbĕnĕranipun, pĕkiḥ pasal muṅin ranña, kaŋ linalar linulur amriḥ ḷĕstari, nagara adilira.
amad ilkam
4. kaŋ piniji maca kitap tapsir, abdi daḷĕm pradikan kaŋ mulaŋ, santri nèŋ laṅĕnarjané, amad ilham ranipun, ḍasar puñjul samaniŋ kaji, marma piniji maraŋ, kaṅjĕŋ saŋ aprabhu, sriŋ dinaṅu babiŋ rapal, lawan makna ki ilham ḍasar maṅrĕti, coṇḍoŋ lan sri naréndra.
5. mula akèḥ murid para santri, sakiŋ mañca kayuṅyun mèt wulaŋ, mriŋ amad ilham kawruhé, sarèḥ pamulaṅipun, mamriḥ gampaŋ iṅkaŋ ṅlakoni, winulaŋ pinriḥ tuman, dènira mèt kawruḥ, tur koniṅan sri naréndra, dadya mĕmpĕŋ paṅajiné para santri, pujiné mriḥ katrima.
6. maraŋ kaṅjĕŋ sri nata kaŋ wajib, aṅgañjar miwaḥ aṅukum wadya, ki santri akèḥ méliké, manawa bĕgjanipun, antuk bhumi pradikan dèsi, ṅaṅgur tur olèḥ paṅan, sapa kaŋ kadyèku, nadyan bapa kakinira, nora bisa wèḥ bhumi ṅaṅgur binukti, aliha sri naréndra.
7. iṅkaŋ bisa wèḥ drajat mriŋ janmi, sarta pinta kaŋ patut ginañjar, sapaṅkaté ḍéwé ḍéwé, muŋ kari atutuṅgu, bĕgjaniŋ woŋ iṅkaŋ tabĕri, miturut iŋ sakarṣa, iku adatipun, tan liya iṅkaŋ atampa, kanugrahan kaŋ miturut iŋ sakapti, nira jĕŋ sri pamasa.
8. sabaṛĕna sabaraŋ binudi, dadi tĕntrĕm adaté katĕkan, sĕdya kaŋ kalawan sarèḥ, ririḥ ṅruruḥ mriḥ runtut, tutut titis muriḥ ḷĕstari, niŋ karṣa aywa cuwa, dumadya tan wuru, riwut gĕla tan katĕkan, sasĕdyané sabĕn dina muriŋ muriŋ, riŋ ari mĕndĕm arak.
9. marakakĕn lali ati sĕḍiḥ, nalikané ĕndĕmé andadra, yèn wus turu ilaŋ dĕmé, muliḥ susahé émut, awak ḷĕsaḥ cinané nagiḥ, ginusaḥ nora luṅa, ṅantĕp ṅajak padu, mriŋ pradata ṅajak bantaḥ, saḷĕsihé prataṇḍa kaŋ dèn ĕcapi, pininta pañahurṇya.
10. ñélakana wus ṅrasa ṅĕcapi, yèn ñaṅgĕmi nora darbé arta, kaŋ bakal sinahuraké, ṅikal basa siripun, dimèn sirṇa gugatiŋ kucir, si kucir saya jĕṇṭar, jĕr ta wus winuruk, mriŋ janma kaŋ ṅalap opaḥ, mulanira cina péloné gumiṅsir, tètèḥ wruḥ iŋ prakara.
11. karanané woŋ jaman samaṅkin, dipunbisa ṅampĕt karṣanira, kaŋ tan prĕlu iŋ gawéné, lan timbaṅĕn karuhun, aywa ṅanti kĕnèŋ piranti, tatalé wus akaṭaḥ, si kucir aṅrimuk, supaya dèn utaṅana, mĕṇḍak mĕṇḍak si kusir ṅisiṅi rahi, gubras ambuné ṅambar.
12. bubar bubar tan ana niliki, sanak mitra taṅèḥ yèn martakna, pahé yèn bĕgja woŋ kuwé, brubul sanaké rawuḥ, ṅaku milu mujèkkĕn ḍiṅin, nalika misiḥ mlarat, dadi sugiḥ iku, wus maṅkono kalumrahan, paribasan ana lintaḥ paḍa miṅgir, na wadĕr paḍa mara.
13. pahé lamun borèḥ ḷĕṅa waṅi, bĕbĕd kĕliŋ sabuk ciṇḍé bara, kanigaran kaluŋ ranté, paṅantèn aranipun, paṣṭi ṛĕsĕp kaŋ samya tilik, tur ṅaṅgo sinugata, iŋ sakadaripun, pahé lamun kĕnèŋ kala, linĕbokkĕn mriŋ wisma kaŋ wus miranti, tan ana kaŋ ṅatĕrṇa.
14. nastitiya dimèné basuki, sanak mitra sabĕn dina prapta, tur paḍa ṛĕna atiné, sababé bisa ñuguḥ, ṅacarani sumèḥ dènñaṅliŋ, dadya rahab kaŋ samya, sinugata iku, pahé lamun sugiḥ utaŋ, nadyan katon sugatanira prayogi, ḍayohé kuraŋ rahab.
15. sabab wĕlas wusananiŋ wuri, bakal suka anĕmu duduka, maṅkana paribasané, mulané ta woŋ iku, aywa agé kagĕḍèn ati, tinata dimèn tata, tĕtĕpé sakayun, ṅayomi mriŋ lyaniŋ janma, mumujiya dimèn katĕkan sakapti, nira kaŋ tan ṛĕkasa.
16. rumasaa apĕs badan iki, kaŋ kuwasa muŋ saŋ hyaŋ wisésa, sumaraha sakarṣané, sinukṣma mriḥ sumunu, nĕriŋ karṣa sosikiŋ widdhi, sĕmuné sinĕmbadan, dadi ran miturut, karṣané kaŋ duwé karṣa, susuhunĕn sihiŋ gusti tam ṅĕṇḍati, titi gambuḥiŋ cipta.
3. gambuḥ
1. pépéliŋ lalinipun, tyasiŋ wadya kaŋ samya balilu, lalu lumuḥ winulaŋ nora pinikir, malaḥ tyasèŋ salaŋ surup, rupĕk budiné tur ḍompo.
2. pinardi dimèn wĕruḥ, kaŋ kajibaḥ babahuniŋ ratu, trahiŋ wirya kawuryaniŋ tyasé wĕniŋ, naṅgapi karṣaniŋ ratu, patitis tĕtĕp tan kéron.
3. tumpaŋ so pamètipun, jĕr ta méliké dinokok ṅayun, siré mayar yèn kalakon dadi sugiḥ, gĕr gumĕraḥ pan ginuyu, jakṣa kaṛĕpé maṅkono.
4. lolota aja iku, lulurinĕn wulaṅiŋ luluhur, iṅkaŋ nalar dumulura aṅlĕluri, lalaṛĕn prihĕn ywa kuwur, kawuryan tyasira boloŋ.
5. ilaŋ sumĕlaṅipun, jĕr méliké malaḥ nora sarju, misiḥ éliŋ wulaṅé bapa lan wibi, utamané mantri iku, kaŋ tatag maraŋ pakéwoḥ.
6. kaŋ pĕkik warṇanipun, ulat tĕguḥ jinĕm lusiŋ kalbu, solaḥ gaṅgas rumiŋ sabda ulat manis, dèn kawawaŋ baraŋ laku, sirèku paṛĕk saŋ katoŋ.
7. tan wandé mantri iku, mapan dadi utusaniŋ ratu, kudu tètèḥ wicaranira pratitis, dutaniŋ nata puniku, tan pantĕs kalamun boḍo.
8. prĕlu aja kĕbañjur, kudu ajar wajibiŋ tumĕṅguŋ, aywa kĕmba aṅgugaḥ ati kaŋ guliŋ, jĕr aja lali tĕrlalu, lumuḥ winulaŋ lyaniŋ woŋ.
9. wusana awakipun, poṭar paṭir budiné tan ṭukul, nora kĕṇṭĕl ṅaḷĕṇṭar budi tan dadi, tinitaḥ mantri paṅayun, kuwur budiné cinopot.
10. poma aywa kapéñcut, lalabuhan kaŋ maṅkono iku, kudu sarèḥ ririḥ narimaniŋ ati, titi sarèḥ dimèn gambuḥ, bhupati aywa macéṭot.
11. tĕrahé dimèn urut, titikané woŋ atuwanipun, dadi ontuŋ yèn maṅkono woŋ ahurip, uripé sakṣat tan lampus, ginantyan turuné maṅgon.
12. mim amim ya alkamdu, lillahi rabil ṅalamin iku, tan kuwasa kawula darma ṅlakoni, miminta mriŋ hyaŋ mahaguŋ, kumambaŋa mriŋ hyaŋ manon.
4. maṣkumambaŋ
1. wus wajibé kumambaŋ kawula iki, tĕgĕsé kumambaŋ, sumaraha saŋ asuŋ siḥ, sihana salaminira.
2. sari sariniŋ karṣa rinasa sari, mamriḥ tan sulaya, yĕktiné manuṅsa iki, kakikiné mriḥ karasa.
3. kaŋ kakiki sayĕktiné iṅkaŋ wrĕḍi, basa woŋ suwita, kudu tĕmĕn lan tabĕri, ras arasĕnya binuwaŋ.
4. aywa wawaŋ buwaŋ kaṛĕm anèŋ panti, kaŋ amriḥ gumiwaŋ, mriŋ ciptanya woŋ aṅabdi, dadi srĕgĕp aranira.
5. woŋ saṛĕgĕp paṣṭi wruḥ karṣaniŋ gusti, tétéla tan samar, wanuḥ manawa manoni, niṅiŋ karṣa saŋ sinéwa.
6. wusanané manawa sira antuk siḥ, siḥ iku tan kĕna, jinaluk yĕkti tan kĕni, muŋ cinaḍaŋ muriḥ koṇḍaŋ.
7. kaḍaŋ kaḍiŋ sriŋ pinuju lunturiŋ siḥ, ira saŋ misésa, sarana antĕpirèki, kaŋ krĕtarta siḥ mriŋ nata.
8. tatalinĕn tulaḍan maṅkono kuwi, paṣṭiné iṅaran, janma tĕtĕp aṅantĕpi, mriŋ wajibé nora giṅgaŋ.
9. ṅaṅgaŋ aṅgaŋ aṅas budi tanpa dadi, dalèha léléda, dadi dadalan bilahi, ṅaṇṭiya sabariŋ karṣa.
5. kinaṇṭi
1. saranané woŋ yun luhuŋ, bĕtaḥ lapa kuraŋ guliŋ, éliṅa solaḥ jĕtmika, yèn wacana kudu manis, muriḥ sĕṅsĕmiŋ sasama, samaniŋ manuṅsa sami.
2. mriḥ masuk narimèŋ kalbu, bhuminiŋ kaŋ dèn wèwèhi, wohaniŋ tyas sukur rila, badané kabawaḥ sami, sabiyantu nut sakarṣa, tan ṛĕkasa kaŋ pinardi.
3. dadi atut tur piturut, manut sumaraḥ mriŋ gusti, ontuṅé dadi bĕndara, rinĕsĕpaniŋ pra abdi, darajaté wus gumiwaŋ, kĕkuwuṅé anawuṅi.
4. lir kartika pañjĕr ésuk, sumilak wadana miṅis, koṅas adiniŋ kusuma, mamayu mandayèŋ nagri, grahitanĕn dimèn srĕḍa, dasihé kapaḍaniŋ siḥ.
5. sinukarta mriḥ tartamtu, tamtuné utama titi, tĕtĕp dadi paṅahuba, niŋ wadya tĕntrĕm iŋ ati, tamtu kĕna tinulaḍa, tyasé lir wulan ḍaḍari.
6. amuḍari tyas bariwut, ruwĕt kaŋ rawat wawadi, wĕdi lamun kahuniṅan, mriŋ saŋ ambĕk ṅumaladi, tan wandé pinardi blaka, kacurṇan kaŋ ambĕk juti.
kartawilaga
7. tinula tula tinuṇḍuŋ, ḍinaḍuŋ wayaḥ bĕḍiḍiŋ, mriŋ paḍaŋ kasuraŋ suraŋ, araŋ araŋ kaŋ ṅaruhi, iba ta susahé ika, woŋ tan miturut mriŋ gusti.
8. mati nèŋ sabraŋ kaduwuŋ, klowaŋ klawuŋ tanpa kaṇṭi, sanak énaké tan ana, ijèn muŋ amor woŋ lari, basané bahé woŋ jawa, pakéwuḥ goné ñoṇḍoṅi.
9. caḍoṅé muŋ uyaḥ sĕkul, dĕstun lomboké muŋ siji, ésuk ésuk wus ginugaḥ, kinon ḍaṅir kĕbon kopi, pinardi kalawan gĕbag, kartawilaga suŋ péliŋ.
10. éliṅé luṅguhé iku, si nini bolénya bĕli, roṅèwu aṅgrisé kuna, putu loro dadi mantri, gĕḍoŋ tĕṅĕn lawan kiwa, tan lumuntur maraŋ siwi.
11. jĕr aṅgĕpé darbèkipun, goné nukokkĕn si nini, tan aṅlo kaŋ duwé sétan, mula sugihé kĕpati, tuku mantri laṅak laṅak, pan sinĕbut radèn bèhi.
12. dèn bèhi goné sĕkuṭu, bhupatiné dèn bĕsĕli, mula wani matur dora, mriŋ kaṅjĕŋ sri narapati, ñuwunkĕn ran dèn tur tanpa, salsilahé saka ṅĕndi.
13. asal siŋ ki agĕŋ butuḥ, bhupatiné soṭal saṭil, jĕr pĕṭĕl maraŋ kalaṅan, nora séba nora kĕmit, pi api pamité lara, pijĕr tèkpo dèn tuṅgoni.
14. sayaḥ ṅaliḥ uṅgyanipun, mriŋ kamar bolaḥ lalariḥ, lali sésuk dina soma, sabab ĕndĕmé wus dadi, dadi pamit ésukira, ṅĕlu muḷĕs mutaḥ ṅisiŋ.
15. sĕmuné karṣa kadurus, naṅiŋ ras arasĕn mikir, pijĕr nuruti kasukan, lali lamun duwé gusti, tita budiné dalèha, yèn pinardi luwiḥ wĕdi.
16. jĕr rumasa luputipun, wus lawas iṅuguŋ sami, puṅguŋ tumĕṅguṅé nora, bisa mardi maraŋ mantri, pitutur kaŋ mamriḥ arja, paḍa kapoka samaṅkin.
17. wit lurahé nora turu, tansaḥ ṅruruḥ iŋ pawarti, wartané sabaraŋ polaḥ, polahé kaŋ dèn wĕṅkoni, iku prayoga tinulad, bhupati mĕṅku prajadi.
18. didimèné turunipun, runtuŋ tan ana ñĕlani, iku nugrahaniŋ titaḥ, tinata kudu patitis, tĕgĕsé aran nayaka, sasakané praja yĕkti.
19. iba ta jumĕguripun, woŋ jinuñjuŋ mriŋ saŋ aji, kajèn kériṅan iŋ kaṭaḥ, tur ta nora ṅaṅgo picis, cis tra malu régéntschap, kalu trada jaga bahik.
20. kalu suka trima wuruk, jadi untuṅnya séndiri, di kata bahik tiṅkahña, oraŋ suka déṅén asiḥ, na suda abis pantuña, ñŋ ini témbaŋ kinanti.
6. sinom
1. lir taru katiban warṣa, woŋ kaŋ antuk sihiŋ gusti, riyu riyu cahyanira, rumasa yèn bakal sĕmi, pirabara wohnèki, yèn slamĕt kĕna iṅuṇḍuḥ, pinaṅan amirasa, pĕloké ḍinĕḍĕr maniŋ, luwiḥ bĕgja yèn awoḥ rasa tan owaḥ.
2. tur wuwuḥ wohiŋ ṅayaṅan, iku upamané budi, niŋ nayaka iṅkaŋ sĕja, wuwuḥ darajat tan gĕmpil, puwara ṅrĕkṣa nagri, grahitané wuwuḥ wuwuḥ, wĕwĕṅkoné kaloka, mulyakkĕn isiniŋ bhumi, bok maṅkono dadi pantĕs ran niyaka.
3. koṅas budiné tan aṅas, ṅumala adoḥ mriŋ mélik, yahiku santri prawira, dadi tulaḍaniŋ mantri, kaŋ sĕja mamriḥ bĕcik, maṅkono labuhanipun, sumiṅkir mriŋ kaniṣṭan, aṅayunakĕn utami, mardi basa basukiniŋ saniṣkara.
4. karanané woŋ ṅawula, pinataḥ dadi bhupati, sinuŋ kèḥ réréhanira, kudu wruḥ wawatĕkaniŋ, mantri sawiji wiji, trapiŋ karya aywa kiḍuŋ, tinurut paréntahña, sababé ta wus ṅawruhi, tĕtĕkoné mantri kaŋ iṅĕrèḥ samya.
5. kaya ta para ṅulama, pradikan kĕtib lan modin, marbot juru suranata, taṅèḥ yèn wruha iŋ wajib, lurahé mituturi, anaṅiŋ nora ginugu, kĕsèt aṅaji kuran, kitab nora dèn praduli, lali lamun bhuminé pañcèn ṅulama.
6. madat madon ṅabotohan, nora wuruŋ bakal maliŋ, lali nora salat salat, nèŋ désa adoḥ kiyahi, paṅulu mula lali, salat pijĕr ṅadu sawuŋ, yèku pradikan sumyaŋ, patut cinopot samaṅkin, pan tinarka adol apyun nora paḍaŋ.
7. ḍuḥ ḍuḥ ta para ṅulama, paḍa gugulaṅa nuli, ṅèlmuné jĕŋ rasullollaḥ, sayĕktiné mupaṅati, kaŋ ginĕlar linuri, pataŋ prakara trapipun, dèn tĕraŋ rasanira, tumrapé sawiji wiji, déné wijaŋ jĕr ta iku basa ṅarab.
8. dudu basané woŋ jawa, aja ṅawag kudu titi, tatakona kaŋ tétéla, rapal makna dèn muradi, dadi tĕtĕp ṅawruhi, patitisiŋ kawruḥ iku, kudu guru ṅulama, iṅkaŋ wus sinĕbut mukmin, mukmin kawas kaŋ tan was tutur utama.
9. utamané ṅlakonana, salat tasbèḥ sabĕn bĕṅi, lan tasjut iku prayoga, lir jĕŋ rasul aṅlakoni, sabab yèn tĕṅaḥ wĕṅi, sarwa sĕpi rasanipun, tĕntrĕm woŋ nĕdya salat, sumalat tumrapa agni, urubiŋ kaŋ dahana wor agninira.
10. maṅkono tĕtĕpiŋ salat, para mukmin kaŋ binudi, dadiné wruḥ kinawruhan, kawula kalawan gusti, iku tĕtĕp nĕtĕpi, tan sulaya karṣanipun, gusti lawan kawula, lulurinĕn para santri, tanpa ṅĕmis muŋ ṅĕmis maraŋ kaŋ murba.
11. marma ta kadawa dawa, doṅèṅiŋ woŋ picak dadi, pitutur maraŋ iŋ wadya, jĕr lagya panujwèŋ galiḥ, sri nata suŋ pépéliŋ, mriŋ saguŋ kawulanipun, supadya ṅlakonana, wajibé sasiki siki, sri naréndra salira purṇa sajuga = juga purṇa iŋ salira sri naréndra.
