1. mijil
1. lwir bramara mriḥ wijiliŋ sari, kaŋ kawran iŋ ron ron, myaŋ ri ri kaŋ sumĕruŋ amawèḥ, kéwraniŋ saŋ sadpada dènnya mriḥ, ṅudi amamardi, maduniŋ kaŋ rum rum.
2. yèku pama sarasaniŋ ati, dènnya ṅudarahos, duk sĕdyarṣa suŋ wasitèŋ raré, raṅu raṅu ririṅa ṅranuhi, déniŋ tuna budi, pĕkṣarṣa mumuruk.
3. naṅiŋ paran rèḥ woŋ tuwa wajib, wèḥ waraḥ woŋ anom, dadi kudu mardi sakadaré, mriŋ saṅgyaniŋ pra séwaya siwi, jalwèstri supadi, marṣudyèŋ paṅawruḥ.
4. naṅiŋ kulup sarèhniŋ samaṅkin, wus salin lalagon, lagéhané kaŋ kaṅgo iŋ akèḥ, baraŋ kawruḥ kudu aṅèṅĕti, srawuṅaniŋ janmi, jaman maṅkya kulup.
5. tatacara myaŋ yudanagari, maṅkya wus carup wor, nora kĕna mriḥ carané ḍéwé, dadi iya kudu sarwa ṅrĕti, trapiŋ tatakrami, wruha pintanipun.
6. mriŋ lyan baṅsa myaŋ sawaṅsa sami, sira dèn waspahos, kudu wruha awor lan misahé, trapiŋ subasita dèn nastiti, ywa koṅsi kaḷĕmpit, papan ĕmpanipun.
7. yèn nèŋ papan dèn katon ṛĕspati, ĕmpaniŋ pasĕmon, aywa dumèḥ yèn iŋ jaman maṅké, wus asalin salaganiŋ janmi, karṣèŋ sarjana di, dadiya sajuru.
8. iku sira aywa salaḥ daliḥ, yèn luhur lan asor, iŋ samaṅkya wus sinamèkaké, dadi datan ana aṇḍap iṅgil, yèn maṅkono kaki, sirèku kaliru.
9. iya nadyan iŋ jaman samaṅkin, luhur lawan asor, sapa iṅkaŋ arṣa maḍakaké, sayĕktiné ya makṣiḥ ḷĕstari, iṅkaŋ cilik cilik, iṅkaŋ aguŋ aguŋ.
10. muŋ bédané jaman mĕṅko kaki, lan kaŋ wus kalakon, duk iŋ kuna pra luhur karṣané, sarwa mĕnaŋ sarwa anèŋ ṅiṅgil, lan kaŋ dadi cilik, nora pati maklum.
11. yèn sinuda urmaté saṭiṭik, wus maṣṭi añĕṇṭok, kaḍaŋ malaḥ koṅsi cinamĕṭèn, kaŋ maṅkono kaki iŋ samaṅkin, para aguŋ iṅgil, wus krasa tyasipun.
12. iṅatasé mriŋ sasami sami, sasamaniŋ uwoŋ, tan sayoga muṅguhiŋ batiné, marmanira pra minulya maṅkin, wus katon tan pati, ṅĕguṅkĕn piaṅkuḥ.
13. malaḥ akèḥ kaŋ katon wlasasiḥ, mariŋ kaŋ nèŋ ṅisor, nora karṣa sakarṣa karṣané, sinakaṛĕp aṅgĕr nora koṅsi, kahèkṣi ṅliṅsĕmi, wus samya dèn maklum.
14. jaman kuna kalamun woŋ cilik, nèŋ marga kaprĕgok, lan woŋ aguŋ nèŋ sagon ĕṅgoné, aṇḍoḍok prok taṅané kakaliḥ, ṅapurañcaŋ sarwi, sirahé tumuṅkul.
15. woŋ aguṅé kaḷĕgan iŋ galiḥ, ṅaḷĕmbanèŋ batos, iku si woŋ wĕruḥ mriŋ awaké, ya rumasa yèn ḍèwèké cilik, katon dènnya wĕdi, mriŋ iṅsun woŋ aguŋ.
16. iŋ samĕṅko tan maṅkono kaki, pra wadana kliwon, yèn kĕpĕṭuk lawan sor sorané, anèŋ marga karṣa ñasmitani, supadya ywa koṅsi, ḍoḍok muṇḍuk muṇḍuk.
17. yèn nèŋ papan patĕmoniŋ janmi, kaŋ kĕna sabĕn woŋ, paṛĕpatan ṅrĕmbug saparluné, kawruḥ kawruḥ iṅkaŋ mahédahi, lan sĕdyaniŋ janmi, jaman mĕṅko kulup.
18. pra prayaguŋ putraniŋ narpati, myaŋ wadana kliwon, lan woŋ cilik satata luṅguhé, anèŋ kurṣi sakṣat adu wĕntis, rumĕsĕp kahèkṣi, pasmon sumèḥ masmu.
19. mèsĕm manis mèt prana mrak ati, tumrĕcĕp tinonton, kaŋ maṅkono èṅĕtĕn jro tyasé, ywa kalalèn dènnya dadi cilik, ṅrasaa iŋ ati, nĕmu bagya aguŋ.
20. nugrahèŋ hyaŋ déné pra guŋ iṅgil, samya karṣa amoŋ, aywa ṅrasa yèn para paṅgĕḍé, jaman maṅkya wĕdi mriŋ moŋ cilik, ywa maṅkono kaki, tan sayogya iku.
21. yèn maṅkono bakal nora muliḥ, lan sĕdyaniŋ batos, dènirarṣa mriḥ santosa kabèḥ, kaŋ sinaṅkan siŋ rukun rakĕt siḥ, marma kaŋ utami, iḍĕpé tyas kudu.
22. iṅkaŋ luhur dènnya sutrĕsna siḥ, mariŋ kaŋ nèŋ ṅisor, dipunkadi mariŋ séwayané, iṅkaŋ ṅaṇḍap dènnya wĕdi bĕkti, trusiŋ tyas dèn kadi, mariŋ bapa babu.
23. maṅkonèku kaŋ iṅaṅkaḥ kaki, karṣaniŋ pra kahot, dènira mriḥ anuṅgala kabèḥ, aṇḍap luhur dadiya sawiji, piṇḍa kulit dagiŋ, otot baluŋ suṅsum.
24. lamun limaŋ warṇa wus ḷĕstari, anuṅgal sarahos, tan sulaya salaḥ sawijiné, yĕkti iya baṅkit ṅlakṣaṇani, sahusikiŋ kapti, katĕkan sadarum.
25. déné iṅkaŋ maṅka osik wisik, yèku pra kinahot, kaŋ nununtun mariŋ kahutamèn, amarṣudi mamardi mimidiḥ, mriḥ sadaya dadi, widagdèŋ paṅawruḥ.
26. yèn wus sarwa wikan iŋ paṅawrin, sayĕgti waspahos, riŋ pamawas wusananiŋ tĕmbé, baṅkit nimbaŋ tumibaniŋ ḍiri, wruḥ lakṣanèŋ urip, kaŋ ala lan ayu.
27. bubukaniŋ wibawa utami, sira dèn waspahos, ḍiṅin sakiŋ yayaḥ rénanta gèr, wité sira dadi sarwa baṅkit, sakiŋ gurunadi, kaŋ mulaŋ mumuruk.
28. kaŋ ṅayumi rahayuniŋ urip, yahiku saŋ katoŋ, tĕlu iku uwitiŋ kamuktèn, marma sira dèn ahiḍĕp kaki, sira nora kĕni, maṛĕṅkaŋ mĕmĕṅku.
29. paṅiḍĕpé mariŋ bapa bibi, bĕkti lahir batos, bapa biyuŋ gĕḍé wilalaté, nora kĕna cinamaḥ saṭiṭik, lamun koṅsi sĕrik, karya saṅsaramu.
30. paṅiḍĕpé maraŋ guru kaki, aṅaṅgo binobot, pinatuta kalawan paṅkaté, yèn paṅkaté ṅuṅkuli sirèki, sira aywa wigiḥ, manĕmbaḥ iŋ suku.
31. yé paṅkaté paḍa lan sirèki, utawa nak iṅoŋ, iya anèŋ ṅisorira aṅgèr, patrapira dèn kapara taklim, dèn rahab ṅrĕsĕpi, iŋ sawuwusipun.
32. paṅiḍĕpé mriŋ sri narapati, wĕdi lahir batos, lan nĕtĕpi kaŋ dadi wajibé, aja miṅkuḥ maṛĕṅkaŋ sumiṅkir, sapakon ṅlakoni, lan suṅkĕm sumuṅku.
33. yèn paṅiḍĕp tri prakarèŋ ṅarṣi, kabèḥ wus linakon, wimbuḥ awas éliŋ salaminé, lan tyas sĕtya sayĕkti amaṅgiḥ, rahayu iŋ wuri, wimbuḥ wahyèŋ wahyu.
2. gambuḥ
1. lawan maniŋ nak iṅsun, wajib sira aruruba kulup, mariŋ bapa mariŋ guru mriŋ saŋ aji, dé ruba mriŋ bapa biyuŋ, dèn akĕṛĕp atitiñjo.
2. lawan kĕṛĕp misuṅsuŋ, samubaraŋ kĕkaṛĕmanipun, dèn gumati dèn ṅajèni lan rumanti, sĕdyakĕna jroniŋ kalbu, agĕnti rumĕkṣa amoŋ.
3. déné rurubanipun, maraŋ guru maṅkéné trapipun, déné kĕṛĕp ṅatonkĕn wulaṅirèki, yèn ana iŋ ṅarṣanipun, dénéḍĕmĕn atatakon.
4. salwiriŋ rèḥ paṅawruḥ, kaŋ winarahakĕn mriŋ sirèku, takonana katokĕna sapaṅarṣi, myaŋ ywa sriŋ ṅluhuri wuwus, baraŋ rèḥ kapara asor.
5. déné rurubanipun, mriŋ saŋ prabhu ywa pĕḍot pujimu, muga muga gusti jĕŋ sri narapati, ruhura karatonipun, kuñcara ywa na rérégon.
6. praja tĕntrĕm rahayu, mawèt ayom ṅayĕmi tumuwuḥ, wadyanira widadaa wĕdi asiḥ, sinihana para ratu, liyan praja rumĕkṣa moŋ.
7. maṅkya rèḥ sira kulup, makṣiḥ anom ywa pĕgat sinahu, baraŋ kawruḥ dèn kudu sarwa maṅrĕti, dèn tabĕri aṅgĕguru, aywa koṅsi kabasturon.
8. karana kaŋ tinĕmu, jaman maṅkya pahé lan iŋ daṅu, duk iŋ ṅuni woŋ ṅawula narapati, nora kudu sarwa putus, muhuŋ aṅgĕr srĕgĕp sahos.
9. lawan manut miturut, loro wani ṅuñjara iŋ nĕpsu, katri bisa wicara kaŋ mamalat siḥ, papat jaga karṣèŋ ratu, lima ya sadarmèŋ kéwoḥ.
10. samono bahé cukup, karya gayuḥ wahyaniŋ kaŋ wahyu, nora kudu bisa basa baṅsa asiŋ, kaḍaŋ aṅgĕr bisa ṅiduŋ, lan bawa swara aṅgéroŋ. 11. myaŋ cucut kala lucu, baṅkit dadi mantri lan panèwu, malaḥ ana kaliwon tan bisa nulis, muŋ tèkĕn ṭok sok kaliru, pĕṅpĕṅané muŋ wiraṅroŋ.
12. prandéné tan adaṅu, antuk puluŋ jlĕg dadi tumĕṅguŋ, déniŋ labĕt sumuṅkĕm sĕtya iŋ gusti, naṅiŋ jaman mĕṅko kulup, duruŋ tamtu kaŋ maṅkono.
13. mulané paṅirèṅsun, lakon kuna kaŋ kaya iŋ ṅayun, bokmanawa iku kulup wus kawuri, jaman mĕṅko salin lagu, lagéhané kaŋ dèn aṅgo.
14. kudu sarwa linaṅkuŋ, sarwa bisa basa baṅsa luhuŋ, iṅgris prasman nèdĕrlan ḍitslan ostĕnrik, samonowa lamun duruŋ, antuk taṇḍa kaŋ sayĕktos.
15. ahtĕ ḍĕploma kurṣus, duruŋ kĕna dèn aṅgĕp linaṅkuŋ, mulané ta wĕkas iṅsun wanti wanti, mariŋ saguŋ anak putu, dèn prihatin aywa lémbon.
16. dèn ta marṣudi kawruḥ, kaŋ saṛĕgĕp kaṇṭiya tuwajuḥ, ajĕg juwĕt jaluk wuruk mriŋ pra baṅkit, dèn akoṅsi sarwa putus, lawan antuk taṇḍa yĕktos.
17. yèn wus maṅkono tamtu, nora susaḥ suwita iŋ ratu, nora susaḥ magaŋ koṅsi luṅsé wañci, yĕkti wus mulya uripmu, malaḥ pinilalèŋ katoŋ.
18. kaya kaŋ wus kadulu, para ḍoktĕr miwaḥ para guru, para murit uṇḍagi lan amoŋ tani, lagi bahé mĕtu jĕḍul, sakiŋ panti pasinahon.
19. blañja satus roṅatus, tĕluŋ atus malaḥ limaŋ atus, kaŋ maṅkono kaki apa tan kapéṅin, marma babo séwayèṅsun, dèn asrĕgĕp lan talatos.
20. dèn amĕmpĕŋ sinahu, aywa salaḥ wèwèŋ amaliñcur, déné kaṛĕp maḍĕp mantĕp tan nĕtĕpi, apa sawulaṅiŋ guru, cakupĕn kabèḥ iŋ batos.
21. aja sumĕlaŋ lamun, woŋ tuwanta mlarat tan kacukup, asuŋ béya waragadiŋ mèt paṅawrin, aṅgĕr sira katon maju, pra panuntun wus mirantos.
22. éliṅa woŋ tuwamu, tanpa sĕnĕŋ sajroniŋ tumuwuḥ, iya nadyan priyayi naṅiŋ sarèhniŋ, boḍo sarwa kuraŋ kawruḥ, satĕmaḥ dadi guguyon.
23. ḍasar pamĕtunipun, muŋ sahipĕt cumpèn nora cumpu, yèn dèn aṅgo ñamaptani jroniŋ urip, awĕkasan sarwa kusut, tan ṅrĕsĕpakĕn tinonton.
24. satĕmaḥ tansaḥ ṅaḍuḥ, tyasnya koḍĕŋ baraŋ karya kiḍuŋ, puluḥ puluḥ wus kapèpèt kapalipis, apĕsé woŋ sĕpĕn kawruḥ, urip pisan dadi popok.
25. mula muŋ sira kulup, kéwala dèn aṅgugu mituhu, wĕwĕliṅé si bapa kasĕbut ṅarṣi, ṅoŋ puji duwé pamĕtu, sabĕn sasi satus kĕton.
26. iŋ jaman mĕṅko kulup, nadyan pyayi lan darahiŋ ratu, yèn tan pintĕr utawa nora kasahit, nora pati dèn pahèlu, araŋ sinaruwé iŋ woŋ.
27. nadyan traḥ bahu ḍusun, lamun wasis samubaraŋ kawruḥ, sugiḥ ḍuwit saṅgon ĕṅgon dèn ajèni, ḍasar darajadé ruhur, kériṅan sinĕmbaḥ iŋ woŋ.
28. ana tulaḍanipun, bocaḥ désa anaké woŋ pikul, tur malarat pakaryané muŋ riripik, adol sukĕt goḍoŋ kayu, dadi mukti kĕcèḥ kĕton.
29. maṅkéné gañcaripun, si salikin anaké pak ĕmpluk, duwé kadaŋ wadon rada ayu dadi, sĕliriŋ prayayi cukup, salikin milu nèŋ kono.
30. duk umur pituŋ tahun, dèn paṛĕdi lan ipéné mahu, linĕbokkĕn sakolaḥ walanda gratis, cĕkaké salikin bañjur, dadi ḍoktĕr nuṅkaŋ montor.
31. pamĕtuné mèḥ sèwu, wibawané wis kaya tumĕṅguŋ, sapa ñana ḍèk cilik busuk basisik, anakiŋ kuli kaluṭuk, bisa dadi dara ḍoktor.
32. iku kéwala cukup, kinaryaa tulaḍan panuntun, nora dimèḥ tĕrahiŋ cilik pak cĕplik, lamun sakolahé putus, mukti kaya sutèŋ katoŋ.
doṅèŋ bocaḥ jiriḥ.
3. sinom
1. duk iŋ jaman kuna ana, raré jalu luwiḥ jiriḥ, si bugĕl panĕṅranira, anuju dina sawiji, wayaḥ jam wolu bĕṅi, lèkiŋ wulan piŋ sapuluḥ, bugĕl lagi dolanan, lan rowaṅira tumuli, amiyarṣa sawĕnèhiŋ raré mojar.
2. ajak ajak nonton wayaŋ, mariŋ ḍukuḥ tĕgalsari, samana ana caḥ lima, iṅkaŋ paḍa aṅrujuki, nĕnĕm lan bugĕl dadi, guṅguŋ kabèḥ bocaḥ pitu, nora antara maṅkat, tan cinatur anèŋ margi, samana wus tĕkan goné kaŋ wayaṅan.
3. kabèḥ ajĕnak tumiṅal, lakoné ñĕnĕṅké ati, ṅanti tĕkan siṛĕp janma, tan ana karasa arip, amuŋ raré sawiji, si bĕgog kaŋ uwis ṅantuk, añĕḍaki daliman, bisik bisik ṅajak muliḥ, si daliman maṅsuli iya prayoga.
4. anaṅiŋ si bugĕl ika, ya aywa dèn ajak muliḥ, tinilapakĕn kéwala, tiniṅgal ḍĕlik nèŋ margi, mĕṅko lamun nututi, ginĕtak dimèné kagum, samana wus waṅsitan, rowaṅira dèn kĕjèpi, wus atampa yèn bugĕl arṣa binéda.
5. wit kabèḥ uwis uniṅa, yèn si bugĕl luwiḥ jiriḥ, gya mĕtu sakiŋ sajuga, si bugĕl nora udani, amuŋ énak niṅali, mèpèt iŋ koṭak añaṭuk, tan mulat kañcanira, samana rowaṅnya uwis, praptèŋ jaba sigra maṅkat gagañcaṅan.
6. dupi wus prapta iŋ marga, kaŋ paṛĕg garumbul nuli, bocaḥ ĕnĕm paḍa mapan, malbu iŋ garumbul ḍĕlik, kocapa bugĕl dupi, wruḥ rowaṅé tan kadulu, wus ṅira yèn tiniṅgal, muliḥ tumuli nututi, gagañcaṅan lan atiné tarataban.
7. lumayu tan toliḥ wuntat, lawan ṅuwuḥ jĕliḥ jĕliḥ, rowaṅé nĕm kaŋ umpĕtan, nèŋ boboṇḍot amiyarṣi, swarané bugĕl nuli, ajak ajak baṛĕŋ nubruk, lan aṅgro kaya macan, tantara si bugĕl prapti, iŋ marga kaŋ cĕḍak goniŋ boboṇḍotan.
8. bocaḥ nĕm baṛĕŋ narajaŋ, nubruk lawan aṅgro kadi, macan amamriḥ mamaṅsan, bugĕl baṅĕt kagèt nuli, jĕmpliŋ satĕṅaḥ mati, gya niba iŋ kisma kantu, bocaḥ nĕm duk uniṅa, si bugĕl niba iŋ siti, samya gugup bugĕl sigra ginrayaṅan.
9. awaké kaku bĕṅkayaŋ, napasé nora lumaris, muŋ kari kĕtĕk kéwala, bocaḥ nĕm paḍa kuwatir, kéwran kuwur kaŋ ati, kĕtir kĕtir tiŋ baṛĕkuḥ, kaduwuŋ tiṅkahira, samar yèn kabañjur mati, iŋ wusana daliman dadi tutuhan.
10. koṅsi suwé antaraña, si bugĕl nora ṅalilir, raré nĕm susaḥ tyasira, paḍa muwus priyé iki, yèn bugĕl dadi mati, tĕmtu paḍa dèn baḷĕṅgu, ana iṅkaŋ wacana, woŋ daliman kaŋ marahi, yèn dèn prikṣa ya bésuk paḍa prasaja.
11. yèn daliman iṅkaŋ ṅajak, ñĕgat bugĕl amĕdèni, dimèn daliman priyaṅga, dèn ukum gantuŋ iŋ béñjiŋ, daliman tan bisa ṅliŋ, ḷĕṅĕr ḷĕṅĕr baṅĕt gĕtun, norantara katiṅal, si bugĕl bisa ṅalisik, napas puliḥ taṅi sarwi gadandapan.
12. arṣa lumayu cinaṇḍak, mriŋ rowaṅé dèn riḥ ariḥ, bugĕl sira ywa lumajar, nora nana gĕḍaḥ gĕḍiḥ, jatiné kaŋ amuni, gĕro kaya macan mahu, daliman lawan iṅwaŋ, amĕdèni mriŋ sirèki, mula mĕṅko sarèhĕna napasira.
13. bugĕl makṣiḥ tarataban, lan duruŋ bisa lumaris, daliman alon ṅrĕṛĕpa, payo bugĕl paḍa muliḥ, kalamun sira misiḥ, duruŋ kuwawa lumaku, iṅsun géṇḍoŋ kéwala, gĕnténan sakañca sami, bugĕl maṇṭuk gya ginéṇḍoŋ mriŋ daliman.
14. gĕnténan sakañcanira, koṅsi praptèŋ wismanèki, bugĕl wus muliḥ iŋ wisma, raré nĕm suka tan sipi, déné si bugĕl uwis, apan nora dadi lampus, wusana si daliman, kapok tan gĕḷĕm mĕdèni, wĕdi lamun lir bugĕl lalakonira.
lidiŋ doṅèŋ aja sok mĕdèni bocaḥ jiriḥ, yèn kaya lalakoné daliman lan si bugĕl ora bĕcik. bocaḥ gila uḷĕr.
4. asmaradana
1. ana raré awawaṅi, si gorèt lamun tumiṅal, mriŋ uḷĕr baṅĕt gilané, yèn anon uḷĕr sakala, lumayu sipat karṇa, guwayané pucĕt aclum, atiné mar tarataban.
2. réwaṅé dolan udani, wadiné si korèt ika, nuju iŋ wayaḥ tĕṅaṅé, si korèt arṣa mriŋ tĕgal, ñuṅgi karañjaŋ lawan, añaṅkĕlit aritipun, arṣa mèt sukĕt kinarya.
3. makani mésané èstri, kaŋ lagi amanak añar, duk prapta iŋ tĕgalané, mulat rowaṅira iṅkaŋ, samya aṅon mahésa, nuju ṅrompol rubuŋ rubuŋ, samya ambakar wi wana.
4. korèt nulya maṛĕpĕki, wus amilu karompolan, ana sawijiniŋ raré, si bĕsur panĕṅranira, wĕruḥ uḷĕr marambat, nèŋ wit wi sigra jinupuk, iŋ taṅan karya dolanan.
5. si korèt wĕruḥ añjĕrit, malaḥ dèn wĕdèkké pisan, dèn ñuñukaké awaké, korèt niba karéṅkaṅan, mĕkṣa misiḥ dèn oyak, si bĕsur sigra binacuk, iŋ arit rahiné muñcrat.
6. mañcur mañcur mĕtu gĕtiḥ, bĕsur añjuṅkĕl iŋ kisma, tinuluṅan bocaḥ akèḥ, si korèt jĕtuŋ tumiṅal, gĕtuniŋ tyas kaliwat, naṅiŋ bĕsur kaŋ tinutuḥ, linuputkĕn raré kaṭaḥ.
.grĕma ora rukun.
5. paṅkur
1. ana woŋ aran pak wana, tuwaburu luṅa bubujuŋ mariŋ, iŋ ṅalas gagamanipun, amuŋ bĕḍil lantakan, dupi tĕkan iŋ tĕṅaḥ ṅalas kapĕṭuk, lan grĕma aran pak arga, nulya abaṛĕŋ lumaris.
2. tantara grĕma pak wana, wĕruḥ ana kidaŋ lagya gayĕmi, nèŋ soriŋ gayam añjĕrum, suka gya pinaranan, miṇḍik miṇḍik saka iŋ wuri aṅruṇḍuk, pak arga gya atut wuntat, lumaku ririḥ tan tĕbiḥ.
3. dupi paṛĕk nulya mapan, mĕṇḍak ṅiñcĕŋ kinira wus patitis, sañjata pinĕsat sampun, naṅiŋ nĕmpaḥ tan muña, kaŋ nèŋ wuri taṅgap bĕḍilé pinlatuk, jumĕḍot ṅĕnani ĕṇḍas, kidaŋ jola tĕrus mati.
4. dyan woŋ roro gurawalan, amarpĕki waṅkéné kidaŋ dupi, paṛĕk pak wana amuwus, laḥ bĕgja tĕmĕn kakaŋ, dawĕk lajĕŋ pinaro kéwala rampuŋ, pak arga maṅsuli sugal, pinaro kapriyé iki.
5. ñamlĕŋ tĕmĕn ujarira, énak énuk arṣa jaluk sapaliḥ, bĕḍilmu nora pikantuk, mĕjĕn mlĕmpĕm anĕmpaḥ, lamun jaluk saparo sun ora éntuk, gawakna mriŋ wismaniṅwaŋ, ṅoŋ opahi ĕṇḍas kikil.
6. pak wana kĕprépun kakaŋ, sampun mĕṣṭi kula aṅsal sapaliḥ, amarga kula kaŋ wĕruḥ, andika tan uniṅa, lamun wontĕn kidaŋ aṅgayĕmi jĕrum, nadyan bĕḍil kula nĕmpaḥ, pun mĕṣṭi olèḥ sapaliḥ.
7. pak arga nora maluya, punaŋ kidaŋ sigra pinaṅkul nuli, lawan wuwusira saru, nora praduli sétan, buron alas siṅa iṅkaŋ mĕṇṭuŋ ontuŋ, wĕruha kidaŋ roŋ jinaḥ, woŋ kowé nora matèni.
8. pak wana nora saranta, waṅké kidaŋ rinĕbut sakiŋ wuri, pak arga koṅsi mèḥ ambruk, waṅké kidaŋ maḷĕsat, krura maṅkrak pak arga sigra manubruk, añikĕp mariŋ pak wana, rinukĕt arṣa binantiŋ.
9. pak wana paṅgaḥ ataḍaḥ, dadya uḷĕŋ gĕlut gĕnti kaguliŋ, iŋ siti guluŋ gumuluŋ, gantya kakaḥ kakahan, kokot kèkèt guḷĕt rukĕt tiŋ baṛĕkuḥ, karoné paḍa rosaña, wus samya wuru alali.
10. samana ana woŋ désa, arṣa amèt wrĕkṣa iŋ wana uniŋ, woŋ roro guḷĕt agĕlut, wus lali tanpa mulat, lawan ana waṅké kidaŋ gumaluntuŋ, lan sañjata kaliḥ samya, sumèlèḥ siti tan tĕbiḥ.
11. woŋ amèt wrĕkṣa aṅira, karanané samya uḷĕŋ alali, déniŋ ana kaŋ rinĕbut, yèku waṅkéniŋ kidaŋ, ciptaniŋ tyas tinimbaŋ paḍa rinĕbut, baya bĕcik iṅsun gawa, dyan kidaŋ pinaṅkul nuli.
12. ginawa luṅa wus tĕbaḥ, kaŋ agĕlut makṣiḥ guḷĕt kapati, kalihé wus sayaḥ ḷĕsu, kasok ḷĕsaḥ samana, samya kèndĕl sakiŋ saṅĕt sayahipun, kalihé awas tumiṅal, waṅké kidaŋ tan kahèkṣi.
13. aṅira ginawa sima, dyan pak wana mĕñat luṅa rumiyin, ciptaniŋ tyas wus tan parlu, nutukkĕn tutukaran, tuwas sayaḥ wus tan ana kaŋ rinĕbut, baya nĕtĕpi babasan, madu baluŋ tanpa isi. lidiŋ doṅèŋ siŋ sapa ora rukun kĕkañcan, kajaba kapitunan, amaṣṭi sugiḥ satru.
santri sumuci suci.
6. pocuŋ
1. kaŋ cinatur añariŋ agama rasul, ana santri désa, abaṅĕt sumuci suci, mula karan iman tĕkabur namaña.
2. ḍasar cukup pariné ṅanti roŋ lumbuŋ, kĕboné sakaṇḍaŋ, sugiḥ wĕḍus bèbèk pitik, sakiŋ baṅĕt gĕmi lan cĕṭil kaliwat.
3. marmanipun sinĕbut iman tĕkabur, wis sabĕn caturṇ, mulya mulyané woŋ urip, nora kaya woŋ iṅkaŋ salat sĕmbayaŋ.
4. uripipun suci tan ṛĕgĕd salugut, linulutan baṇḍa, dèn wĕdèni sétan éblis, déniŋ wĕruḥ santri kakasihiŋ allaḥ.
5. patinipun cinaḍaŋ suwarga aguŋ, béda woŋ abaṅan, iku satruniŋ hyaŋ widdhi, patinira dadi intipiŋ naraka.
6. marmanipun ki santri iman tĕkabur, yèn mriŋ woŋ abaṅan, gĕṭiṅé kapati pati, yèn klasané dinĕmok laju kinumbaḥ.
7. yèn kĕpĕṭuk méṅo ñimpaŋ tutup iruŋ, lamun kaḍayohan, saduruṅé kinon liṅgiḥ, tinakonan apa ta salat sĕmbayaŋ.
8. lamun ṅaku tan ṅlakoni limaŋ wĕktu, dyan tinuṇḍuŋ luṅa, muwus tan bisa ṅlakoni, wanuḥ lawan woŋ kaŋ tan agama islam.
9. lamun ṅaku aṅlakoni limaŋ wĕktu, bañjur tinakonan, iŋ sadad kalimaḥ kaliḥ, lan sinowal rukuniŋ agama islam.
10. déné lamun bisa jawab kabèḥ mahu, lagi iṅacaran, luṅguḥ iŋ salu tanapi, tinakonan kaŋ dadi parluniŋ karya.
11. naṅiŋ namuŋ babasan sinuguḥ aṅgur, nora tahu pisan, ñugata wédaŋ sacaṅkir, muwaḥ kinaŋ sakĕñèḥ kéwala nora.
12. wus misuwur wataké iman tĕkabur, dènira tan kapraḥ, lan kumĕt cĕṭil kapati, marmanira taṅgané gĕṭiŋ sadaya.
13. kabèḥ ñatur anané iman tĕkabur, malaḥ ana iṅkaŋ, aṅĕsotké ñĕpatani, woŋ tan kapraḥ baya bakal nora lumraḥ.
14. tan adaṅu iŋ dina sawiji nuju, iŋ maṅsa pĕtĕṅan, wayaḥ jam sawĕlas bĕṅi, kyahi iman tĕkabur sasomahira.
15. duruŋ turu ṅruṅu swara gumarubug, lir swarèŋ dahana, kagèt woŋ loro tumuli, mĕtu wĕruḥ lumbuṅé kaŋ kabasmaran.
16. ki tĕkabur lan ñahiné baṛĕŋ jumbul, lan bĕṅok sasambat, tuluŋ tuluŋ jĕmplaŋ jĕmpliŋ, tan antara gĕni marèntèk iŋ wisma.
17. bĕl amurub mubal katĕmpuḥ iŋ bayu, ñahi iman saya, añjĕliḥ gumuliŋ siti, tuluŋ tuluŋ jĕmplaŋ jĕmpliŋ galimpaṅan.
18. ki tĕkabur lir tĕmpaliŋ polahipun, naṅiŋ nora bisa, añiṛĕp urubiŋ gĕni, awit amuŋ priyaṅga badan sapata.
19. taṅganipun kruṅu sambat kagèt mĕtu, naṅiŋ duk tumiṅal, omaḥ kaŋ murub kabĕsmi, wismanira kiyahi iman jubriya.
20. datan èstu taṅginan tandaŋ tutuluŋ, malaḥ malaḥ samya, suka iŋ tyas sokur mati, ki tĕkabur ḷĕbur sabaraṅé kobar.
21. ṅanti ésuk taṅgané tan ana ṅiṅuk, wismané ki iman, kabèḥ wus ĕntèk kabĕsmi, dalaḥ rajakayané gĕsĕŋ sadaya.
22. ki tĕkabur ḷĕṅĕr ḷĕṅĕr muṅur muṅur, ñahiné sansaya, baṅĕt biṅuŋ lir woŋ bariŋ, wus rumasa yèn dadi kéré dadakan.
7. mĕgatruḥ
1. kaŋ sun ruṅu dodoṅéṅan duk iŋ daṅu, ana woŋ désa sawiji, ki ḷĕgawa namanipun, sutané papat kaŋ kaliḥ, jalu iṅkaŋ loro wadon.
2. ki ḷĕgawa baṅĕt kamlaratanipun, anaṅiŋ budiné luwiḥ, ḍĕmĕn baṅĕt atutuluŋ, maraŋ woŋ kaŋ naṇḍaŋ kiṅkin, muwaḥ kaŋ kasaṅsayèŋ don.
3. tur ta tanpa pamriḥ lan mélik salugut, maṅkéné ruwiyèŋ ṅuni, ki ḷĕgawa ambĕkipun, sanadyan mĕṣkin kapati, tan tahu ṅrĕsula aṅloḥ.
4. muwaḥ dènnya aṅgahota bĕḍag buruḥ, nora pati dèn parṣudi, namuŋ sakapénakipun, muŋ aṅgĕr uwis ñukupi, sapira butuhiŋ pawon.
5. wus narima tan kraya raya aṅgayuḥ, dadiniŋ widada sugiḥ, kaŋ dèn èṣṭi jroniŋ kalbu, muŋ bisaa mituluṅi, mriŋ woŋ kaŋ naṇḍaŋ pakéwoḥ.
6. iya iku kalamun ḍèwèké kruṅu, tataṅgané sukĕr sakit, éṅgal dènnya tiñjo mriku, tanya karananiŋ sakit, lan wawaraḥ kaŋ wus klakon.
7. usadané goḍoŋ anu karo anu, ḍèwèké bañjur ṅulati, gogoḍoṅan kaŋ tinutur, lawan saliyané maliḥ, lan tinamakakĕn gupoḥ.
8. cékat cèkĕt rikat datan mawi rikuḥ, dènnya ṅrĕṅkuḥ mirakĕti, sinami lan sutanipun, nora mawi wigaḥ wigiḥ, nora gigu tĕgĕl taṅgon.
9. lamun duruŋ waras tansaḥ sabĕn ésuk, ḷĕgawa dènnya nuwèni, malaḥ malaḥ sabĕn dalu, ki ḷĕgawa aṅĕlèki, muji nulya karahayon.
10. yèn taṅgané kasripahan anak putu, tumuli bahé niliki, lawan nuli atutuluŋ, ibut dènnya nambut kardi, kaŋ dadi parluniŋ layon.
11. lawan mikul aṅuntapkĕn praptèŋ kubur, ṅanti sarampuṅé nuli, muliḥ mariŋ wismanipun, kalawan éklasiŋ ati, winéhan salawat ĕmoḥ.
12. lamun ana taṅgané nĕmu pakéwuḥ, kabañcanan bañjir gĕni, éṅgal tĕka atutuluŋ, lan ṅrĕkṣa mamriḥ basuki, tan aṛĕp pituwasiŋ woŋ.
13. lamun wĕruḥ tataṅgané éman éwuḥ, mantu manak atanapi, darbé parlu liyanipun, gĕlis tĕka aṅréwaṅi, tata tata amirantos.
14. myaŋ rumĕkṣa amuriḥ slamĕt rahayu, koṅsi tĕkan wisiŋ kardi, ki ḷĕgawa lagi mantuk, tan mawi mamriḥ pakoliḥ, lila lahir trusiŋ batos.
15. kacarita iŋ sawiji dina nuju, kiyahi ḷĕgawa lagi, ḷĕgèḥ luṅguḥ muṅgwiŋ taṅgul, aniṅali laré mañciŋ, nèŋ kali amèt ulam loḥ.
16. tan adaṅu bocaḥ kaŋ amañciŋ mahu, kaplèsèd kacĕmpluŋ kali, galuṇḍĕŋ klĕḷĕp iŋ kĕḍuŋ, kagèt ki ḷĕgawa nuli, cañcut sakiŋ taṅgul añjlog.
17. gĕbyur kali lalu salulup iŋ kĕḍuŋ, tantara mĕntas tumuli, raré wus katon pinaṅgul, dyan sinèlèhkĕn iŋ gisik, laré wus satĕṅaḥ layon.
18. dyan iṅupakara sarira ginaṅsur, sinuntak tirta wus mijil, tantara ṅalilir sampun, napasira kĕmpis kĕmpis, dyan taṅi luṅguḥ bĕgogok.
19. krasa lara marlupa kapala ṅĕlu, nulya dèn tĕrakĕn muliḥ, ginéṇḍoŋ sampun lumaku, praptèŋ wismanira nuli, raré dyan sinèlèḥ salon.
20. rénanira tumiṅal baṅĕt añjumbul, sutané rinaṅkul nuli, lan sasambat biyuŋ biyuŋ, ḍuḥ gèr kĕnoŋ géné iki, dé tĕka muliḥ ginéṇḍoŋ.
21. sutanira tan bisa maṅsuli wuwus, muŋ tansaḥ gènira naṅis, ki ḷĕgawa alon muwus, niki wahu kula uniŋ, sutanta mañciŋ ulam loḥ.
22. botĕn suwé kĕplèsèd kĕcĕmpluŋ kĕḍuŋ, lajĕŋ kula salulupi, sagĕd pinaṅgiḥ rahayu, samaṅké suwawi aḍi, sutanira kula boroŋ.
23. rénanira sakalaṅkuŋ gĕtun ṅuṅun, wusana suka iŋ kapti, déné sutané rahayu, muwus saṅĕt trimakasiḥ, mriŋ ki ḷĕgawa kaŋ géṇḍoŋ.
24. lawan muwus tujuné andika wĕruḥ, miwaḥ ḍaṅan mituluṅi, ḍuḥ kakaŋ pañiptaniṅsun, sasat kakaŋ kaŋ suŋ urip, nambuŋ umuriŋ sutèṅoŋ.
25. laḥ punapa kaŋ maṅka wawaḷĕs iṅsun, tarlèn sutaniṅoŋ maṅkin, kula amuŋ darma gaḍuḥ, andika kaŋ darbé siwi, sakarṣanta kula boroŋ.
26. namuŋ kula iŋ maṅké minta sumurup, kakaŋ sintĕn kaŋ wawaṅi, lawan pundi wismanipun, ki ḷĕgawa tan maṅsuli, muŋ mèsĕm maṇṭuk kémawon.
27. lajĕŋ késaḥ kalépat tan mawi muwus, dèn aṇḍĕg gèḍèg tan apti, kaŋ darbé wisma sru ṅuṅun, naṅiŋ niyat aṅulati, dunuṅiŋ kaŋ ambĕk kahot.
28. nĕṅna iṅkaŋ saṅĕt maṅuṅun gĕgĕtun, iŋ sawiji dina maniŋ, wayaḥ baṅun bambaŋ ésuk, ki ḷĕgawarṣa mriŋ kali, anèŋ marga kapĕṭuk woŋ.
29. iya iku sudagar sugiḥ jujuluk, kiyahi sanaartati, mĕntas iŋ jagoŋ iŋ dalu, gluyuran tan turut margi, lan blukéran mutaḥ kĕcoḥ.
30. ki ḷĕgawa wus aṅira yèn woŋ wuru, mĕntas iŋ jagoŋ iŋ wĕṅi, ki ḷĕgawa wĕlas dulu, anulya dèn ĕtut wuri, kaṇṭi wéwéka iŋ batos.
8. kinaṇṭi
1. tan daṅu antaranipun, saŋ wuru niba iŋ siti, kadgatèŋ tyas ki ḷĕgawa, gugup agahan nuluṅi, rinaṅkul luṅayanira, lan iṅupakara ririḥ.
2. dyan iṅiṅgahkĕn mriŋ taṅgul, sasoriŋ kayu trĕṅguli, saŋ wuru wus tan kèṅĕtan, tinurokkĕn laju guliŋ, winulat paṅaṅgonira, amarabot sarwa adi.
3. warastra sawitan muṅguḥ, latar putiḥ aṅaṛĕmit, kulambi lakĕn sikĕpan, abĕnik suwasa murṇi, kĕrisé sĕlut iyasan, timaṅé jalébraḥ adi.
4. ṅaṅgo ali ali tĕlu, baṇḍil lan suwasa pèni, kabèḥ maripat barléyan, èrloji waltamas bĕcik, karṣèt ranté ĕmas jawa, kalamun dèn kĕrta aji.
5. ṛĕgané paṅaṅgonipun, luwiḥ tĕluŋ èwu rispis, ki ḷĕgawa ṅuṅun iŋ tyas, aṅlocita jroniŋ ati, upama woŋ iki nora, kawĕruhan lawan mami.
6. nèŋ kéné pribadi turu, tan wuruŋ dèn balèjèdi, iŋ durṣila sabèŋ marga, wus maṣṭi wuda baliṇḍis, kariya amuŋ saruwal, mĕmĕlas tĕmĕn woŋ iki.
7. sahiki priyé akalku, kajaba muŋ ṅoŋ tuṅgoni, ya ṅanti sataṅinira, marma ki ḷĕgawa nuli, anuṅgoni anèŋ dalan, koṅsi prapta iŋ byar éñjiŋ.
8. malaḥ ṅanti pukul wolu, kaŋ turu lagi ṅalilir, grégaḥ liṅgiḥ kagyat mulat, nèŋ taṅgul ṅisor trĕṅguli, lan tinuṅgu iŋ woŋ tuwa, sru ṅuṅuniŋ tyas tan sipi.
9. daṅu daṅu mèṅĕt lamun, ṅuni jagoŋ duk iŋ wĕṅi, wuru gya muliḥ priyaṅga, baya ta ambruk iŋ margi, wusana alon tataña, mriŋ woŋ tuwa kaŋ nuṅgoni.
10. paman paran mulanipun, andika luṅguḥ iŋ ṅriki, lan sintĕn nama andika, pundi iṅkaŋ dèn dunuṅi, déné andika lir tĕṅga, gèn kula tinam nèŋ ṅriki.
11. ki ḷĕgawa lon sumahur, walèhiŋ nama lan maliḥ, mratélakkĕn wismanira, sumawana suŋ udani, kamulané dènnya tĕṅga, purwa wusana wus titi.
12. ki sanaartati ṅuṅun, mèṅĕt lalakoniŋ latri, iŋ wusana ṅlocitèŋ tyas, katujuné awak mami, ana kaŋ wĕlas rumĕkṣa, woŋ ambĕk raharja luwiḥ.
13. upama nora dèn tuṅgu, mriŋ kyahi ḷĕgawa iki, dadi apa awak iṅwaŋ, mĕṣṭi pinarwasa mariŋ, bajul ḍarat sabèŋ marga, paṅaṅgo dèn balèjèdi.
14. sanadyan nora dèn bunuḥ, woŋ wis sasat buta mati, kari kapénak kéwala, sakarṣa karṣa dumugi, wusana alon wacana, ḍuḥ paman ḷĕgawa maṅkin.
15. kula sakalaṅkuŋ nuwun, siḥ marmanta mariŋ mami, sasat kapotaṅan gĕsaŋ, punapa paman iŋ maṅkin, iṅkaŋ kula waḷĕsĕna, mariŋ andika jawi.
16. amuŋ asiḥ trĕsnaniṅsun, lan wiwit ari puniki, andika tĕtĕpa dadya, bapa kula doña ṅakir, tan laṅkuŋ samaṅkya paman, andika kula aturi.
17. ṅatĕrṇa mriŋ wismaniṅsun, awit kula dèrèŋ pati, saras kadi sabĕnira, siraḥ makṣiḥ krahos sakit, mumĕté kaliwat liwat, andika tuntun wak mami.
18. kyahi ḷĕgawa duk ṅruṅu, wacanèŋ ki saartati, lon maluya malat prana, ḍuḥ ḍuḥ aṅgèr anak mami, sampun sandéya iŋ driya, suwawi kula tut wuri.
19. koṅsi sadumuginipun, iŋ wisma maṅgya basuki, déné ta paṅrĕṅkuhira, iŋ kula pinèt sudarmi, sakalaṅkuŋ biṅaḥ kula, naṅiŋ sajroniŋ tyas mami.
20. botĕn pisan pisan lamun, aṅgèn kula anĕṅgani, rumĕkṣa iṅkaŋ sarira, adarbé pamriḥ pakoliḥ, amuŋ nuhoni pipiwulaŋ, kaŋ dadi wajibiŋ urip.
21. dèn aḍĕmĕn atutuluŋ, mariŋ woŋ kaŋ kawlasasiḥ, myaŋ mariŋ papa saṅsara, ṛĕkṣanĕn mamriḥ basuki, naṅiŋ ywa darbé paṅaraḥ, waṅsulaniŋ wuri wuri.
22. amuŋ makatĕn puniku, aṅgèr iṅkaŋ kula èṣṭi, milanya dupi andika, sagĕd amaṅgiḥ basuki, kula sampun laṅkuŋ biṅaḥ, tan mamriḥ waḷĕsan wuri.
23. ki sanaartati ṅuṅun, myarṣa waṅsulan kadyèki, puwara mojar ṅrĕṛĕpa, ḍuḥ aḍuḥ rama kiyahi, asaṅĕt panuwun kula, muŋ tĕtĕpa ṅakĕn siwi.
24. laḥ suwawi paman sampun, kula atĕṛĕna muliḥ, ḷĕgawa iṅgiḥ sumaṅga, anulya umaṅkat sami, lumampaḥ alon alonan, iŋ marga datan winarṇi. 25. sampun praptèŋ wismanipun, kiyahi sanaartati, dupi tĕkèŋ palataran, ki ḷĕgawa aniṅali, gumlariŋ bañjar pomahan, wiyar raras aṅrĕsĕpi.
26. rérégol agĕŋ amuṅgul, laléyan (pagĕ bata) tĕpuŋ pasagi, ḍĕṇḍĕŋ ponaŋ karaŋ kirṇa, tinon tumaruna wilis, tarap punaŋ tiris dĕnta (klapa gaḍiŋ), tĕpuŋ pucaŋ amaṅapit.
27. piṅgir priŋ pĕtuŋ tumiyuŋ, ṅayom wèḥ ayĕmiŋ ati, anulya mañjiŋ paṇḍapa, joglo gĕŋ rinĕṅga asri, pasrèn asrèn warṇa warṇa, tinata pantĕs miranti.
28. nora wus lamun winuwus, ḷĕgawa ṅlocitèŋ kapti, ñata lamun woŋ kaṣkaya, katara rakitiŋ panti, miranti sarwa samakta, baya ta sudagar sugiḥ.
29. dyan ki sanartati muwus, paman suwawi ywa wigiḥ, ḷĕṅgaha sakarṣanira, iŋ salu punapa kurṣi, kularṣa cucul sakĕḍap, andika ḷĕṅgaḥ paṇḍapi.
30. ki ḷĕgawa alon muwus, laḥ iṅgiḥ aṅgèr prayogi, ki artati malbèŋ wisma, tantara gya mĕdal maliḥ, dèrèŋ koṅsi awacana, ki ḷĕgawa nulya pamit.
31. sarwi mĕñat maṅkat sampun, dèn aṇḍĕg datan kadugi, wola wali dènnya ṅundaŋ, ki ḷĕgawa tan maṅsuli, malaḥ saya ririkatan, ṅuṅun ki sanaartati.
