1. sinom
1. wuryanta dènnya manitra, nujwari iŋ wrahaspati, kaliwon taṅgal sapisan, sasi saban wuku wukir, éhé saṅkalèŋ warṣi, murtyaṣṭa amulaŋ sunu, suŋ pariwara darma, jĕŋ gusti paṅran dipati, arya maṅkunagara iṅkaŋ kapiŋ pat.
2. hèḥ saguŋ pra siswaniṅwaŋ, kaŋ sami dadya prajurit, aja wiyaŋ iŋ wardaya, rèhniŋ wus sira lakoni, balik dipunnastiti, maraŋ iŋ kawajibamu, owĕḷĕn sariranta, ṛĕkṣanĕn luhurmu sami, yèn kuciwa wèḥ alun alaniŋ raga.
3. awit sira wus prasĕtya, nalika jinuñjuŋ liṅgiḥ, saguḥ nut aṅgĕriŋ praja, myaŋ pakoniŋ narapati, sinĕkṣèn dèn èstrèni, mriŋ para wira sawĕguŋ, upama sira cidra, ñirṇakkĕn ajiniŋ ḍiri, tĕmaḥ niṣṭa wèḥ wiraṅiŋ yayaḥ réna.
4. ywa sira duwé paṅira, lamun woŋ dadi prajurit, karyané abot priyaṅga, wruhanta saguŋ pakarti, kabèḥ duña puniki, tan ana prabédanipun, kaŋ dagaŋ nèŋ lahutan, miwaḥ iṅkaŋ amoŋ tani, sumawana kaŋ suwita iŋ naréndra.
5. myaŋ kaŋ tapa jroniŋ guwa, kaŋ manusup iŋ asĕpi, lakoné paḍa kéwala, awit iku dadi margi, mriḥ katĕkaniŋ kapti, sapaṅkaté pandumipun, naṅiŋ sarananira, mantĕp tĕmĕn lan tabĕri, samĕktané iṅaranan lakṣitarja.
6. lawan sira sumurupa, kaŋ kaḷĕbu paṅabĕkti, nora sĕmbahyaŋ kéwala, kaŋ dadi paṛĕṅiŋ widdhi, sakèḥ paṅgawé bĕcik, kaŋ mantĕp suci iŋ kalbu, uga dadi panĕmbaḥ, yèn katrima iku sami, sinuŋ rahmat samurwaté badanira.
7. lamun tan mawa sarana, paran katĕkaniŋ kapti, lir bĕḍag tanpa wisaya, sayĕktinira hyaŋ widdhi, tan karṣa mituluṅi, maraŋ woŋ kaŋ datan laku, nir ṅamal myaŋ panĕmbaḥ, kumudu dipunturuti, ṅĕndi ana gusti rinèḥ iŋ kawula.
8. kaŋ maṅkono andupara, lamun jinuruŋ iŋ kapti, malaḥ naṇḍaŋ duka cipta, kasiku aṅrèḥ hyaŋ widdhi, marmanta sira sami, aja kasusu paṅgayuḥ, manawa duruŋ ṅrasa, duwé ṅamal kaŋ ṅlabĕti, bĕcik sira aṅona lakuniŋ praja.
9. déné sira iku agya, antuk kawiryawan maṅkin, yĕktiné katut prabawa, sakiŋ luluhurmu sami, ṅuni wus potaŋ sakit, dadya iŋ kapénakipun, tumiba maraŋ sira, marma dèn sukur iŋ widdhi, tarimanĕn brĕkahé woŋ tuwanira.
10. jĕr janma kaŋ wus minulya, lir waḍahé ḷĕṅa waṅi, utamané winantonan, gandané saya mĕnuhi, nadyan ṅisénan wariḥ, labĕtiŋ wé makṣiḥ arum, kaŋ maṅka sudarṣana, jĕŋ gusti paṅran dipati, arya maṅkunagara iṅkaŋ kapisan.
11. duk babaḍé murwèŋ yuda, nèŋ alas limalas warṣi, sèwu lara sèwu papa, ṅupaya mulyaniŋ ḍiri, antuk pituluŋ widdhi, katutugan karṣanipun, mukti sawadyanira, tumĕraḥ dalaḥ samaṅkin, buyut caṅgaḥ kasrambaḥ milu wibawa.
12. iku ta kayĕktènira, pralambaṅiŋ ḷĕṅa waṅi, upamané duk samana, tan antuk pituluŋ widdhi, praptané jaman iki, tan ana caritanipun, marma dèn èṅĕt sira, aja ṅaku aṅĕṅkoki, muŋ ṅrasaa lamun anĕmpil wibawa.
13. maṅkana gya winantonan, maraŋ kaŋ jumĕnĕŋ maliḥ, jĕŋ gusti paṅran dipatya, maṅkunagara piŋ kaliḥ, pinèt sraya mriŋ éṅgris, amukul nagri matarum, sabĕḍahé kaŋ praja, ginañjar sèwu kaŋ bhumi, dadi tĕtĕp ḷĕṅgaḥ limaŋ èwu karya.
14. rambaḥ maliḥ sinaraya, maraŋ guprĕmèn walandi, mukul praŋ dipanagara, sarampuṅé iŋ ajurit, ginañjar bhumi maliḥ, sukawati limaŋ atus, lan blañja sabĕn wulan, maṅka iṅoniŋ prajurit, pataŋ èwu pataŋ atus woluŋ dasa.
15. prapta pañjĕnĕṅanira, jĕŋ gusti paṅran dipati, maṅkunagara piŋ tiga, iŋ drajad pinriḥ ḷĕstari, maṅun arjaniŋ budi, mriŋ guprĕmèn tyas sumuṅku, ginañjar kaŋ bandéra, lan mariyĕm kaliḥ rakit, iku maṅka taṇḍaniŋ siḥ pinarcaya.
16. kapriyé yèn sira ṅrasa, antuka lawan pribadi, dadi muṅkir jĕnĕṅira, kacirèn lahir myaŋ batin, ginaguywèŋ sasami, luputé gonira ṅaku, laṅguk piaṅkuhira, kasiku maraŋ hyaŋ widdhi, dadi tuna duwé turun kaŋ maṅkana.
17. lamun yĕkti sakiŋ sira, pribadi taṇḍané ĕndi, apa wus muñjuli sira, maraŋ samaniŋ dumadi, sakiŋ iŋ kramaniti, lawan apa wus misuwur, iŋ guna prawiranta, kaŋ kaṅgo maraŋ nagari, baya duruŋ lir lakoné luhurira.
18. pirabara sira bisa, ṅuruni darajad maliḥ, dadi jaṅĕt kinatigad, majadé santosèŋ wuri, tumurun maraŋ siwi, sukur bisa praptèŋ putu, milu tampa kawiryan, yogyané aṅkahĕn kaki, ra orané aja puṅgĕl sakiŋ sira.
19. lamun drajad kalakona, puṅgĕlé sakiŋ sirèki, dadi sira ṅaniaya, maraŋ darahmu pribadi, tan kandĕl iṅkaŋ wuri, ḍapur kaputuṅan laku, salagi tĕmbé bisa, antuk kaŋ darajad maliḥ, sasambuṅan yĕkti bĕcik kaŋ widada.
20. upama nora puṅgĕla, jĕr nora ṅupaya maliḥ, yèn wus puṅgĕl nadyan sira, sĕmèdi iŋ sabĕn ratri, antuké duruŋ mĕṣṭi, tiwas aṅĕṅècèr laku, marma dèn èṅĕt sira, sajroné lumakwèŋ kardi, paṅrĕkṣamu iŋ drajad aywa pépéka.
21. déné jĕjĕré wandanta, iŋ mĕṅko dadi prajurit, maju baris lawan jaga, tiyori lèsan sĕpèkṣi, iku dudu pakarti, ajar ajar jĕnĕṅipun, wus dadi wajibira, prajurit dipungĕlaḍi, papaḍané santri iṅajar sĕmbahyaŋ.
22. sinuŋ ukum sawatara, yèn ṅlirwakkĕn maraŋ wajib, iku wus lakuniŋ praja, jĕjĕgé kalawan ṅadil, sanadyan liyan janmi, duk nèŋ yayaḥ rémanipun, yèn luput rinĕṅonan, utawa dèn jĕmalani, dadi iku winĕruhkĕn tatakrama.
23. maṅkono uga yèn bisa, piturut sarta ṅlakoni, tamtu dèn opahi uga, wit gawé ḷĕganiŋ ati, akèḥ tuwin saṭiṭik, minurwat lan karyanipun, tan béda patrapira, prajurit jinuñjuŋ liṅgiḥ, myaŋ iṅundur iku adil jĕnĕṅira.
24. yèn tan bisa samĕktaña, nora jumĕnĕŋ prajurit, gawé tuna maraŋ praja, wèḥ liṅsĕmiŋ narapati, amuŋ sira pribadi, kaŋ ḍuwurkĕn iŋ piaṅkuḥ, muŋ lagi bisa aba, aṅgĕpmu butuhkĕn nagri, ywa kabañjur duwé cipta kaŋ maṅkana.
25. wruhanta lalakonira, sajatiné wus aṅĕmpiŋ, mriŋ praja miwaḥ naréndra, awit duruŋ potaŋ kardi, sira wus dèn pariṅi, saṇḍaŋ paṅan nora kantu, sinuba kinurmatan, puñjul sasamaniŋ abdi, maṅsakala linilan luṅguḥ satata.
26. apa kaŋ sira upaya, kamulyan anèŋ nagari, iṅajénan mriŋ sasama, ñawabi mriŋ anak rabi, nadyan para maharṣi, iṅkaŋ tapa nèŋ asamun, moŋ tani lan naṅkoda, rinéwaṅan andĕrpati, nora liyan kamulyan kaŋ dèn upaya.
27. upamané raganira, nora dadiya prajurit, iya misiḥ maṅan sĕga, apa déné ṅinum wariḥ, sakiŋ wĕtuniŋ bhumi, uga kaguṅaniŋ ratu, lan sira iṅayoman, rinĕkṣa kalawan adil, lamun datan rumasa sira duraka. 28. marma dèn sumurup sira, mriŋ siḥ kamulèniŋ gusti, béñjaŋ yèn tinuduḥ sira, lumawat ṅadoni jurit, yèku karyanta yĕkti, paṅudaṅirèŋ gustimu, kono aja pépéka, dèn maḍĕp maraŋ sawiji, naṅiŋ cipta sĕdyakna maḷĕs mriŋ praja.
29. praptèŋ papan cumaḍaṅa, iŋ parantaḥ sénapati, aja abawa priyaṅga, dumèḥ sira baṇḍa wani, lumaṅkaḥ mriḥ ṅulabi, kaŋ maṅkono sakṣat muṅsuḥ, gawé gugupiŋ rowaŋ, wèḥ giḍuhiŋ sénapati, yèn kasora dadi sira antuk dosa.
30. luṅguhé para prawira, yèn ana madyaniŋ jurit, nora wĕnaŋ duwé karṣa, ragané pama jĕmpariŋ, kaŋ muṣṭi sénapati, iŋ sakarṣa kaŋ pinanduk, linĕpas ywa saranta, aṅsahira dèn mranani, maraŋ muṅsuḥ aja kéguḥ iŋ babaya.
31. dèn kadi saŋ partasuta, bimañu kala tinudiŋ, maṅruraḥ kaŋ gĕlar cakra, déniŋ saŋ yuḍiṣṭiraji, sukaniŋ tyas tan sipi, dupi rinoban iŋ muṅsuḥ, kèṣṭi trahiŋ satriya, wĕdi wiraŋ wani pati, yèka maṅka tamsiliŋ para prawira.
32. kono sĕḍĕṅé mĕḍarṇa, iŋ kasuran guna sĕkti, ñirṇakna paniṅalira, iŋ tékad ywa walaṅati, wruhanta sénapati, wakiliŋ gusti satuhu, gusti wakiliŋ sukṣma, kaŋ kinon aṅudanèni, mriŋ kawula kaŋ sumĕdya mriḥ utama.
33. paḍa iṅaran utama, iŋ pakaryan maṅun jurit, iku kaŋ luhur priyaṅga, wus kasĕbut kanaŋ sruti, yèn tapaniŋ prajurit, ṅasorkĕn tapaniŋ wiku, wit sumuṅkuniŋ puja, nèŋ pucukiŋ gunuŋ wĕsi, saŋ paṇḍita nèŋ pucukiŋ kaŋ aldaka.
34. iŋ tékadipun santosa, aja aṅrasani pati, apan tan winĕnaŋ sira, gumantuŋ karṣaniŋ widdhi, yèn wis tibaniŋ paṣṭi, nora piliḥ marganipun, ala mati nèŋ wisma, bĕcik mati kaŋ utami, tur sumbaga dadi ṅamalé trahira.
35. wus ana kayĕktènira, saŋ partasuta iŋ ṅuni, palastra anèŋ palagyan, lawan ḷĕgawaniŋ pati, wit dènnya aṅlabuhi, paṇḍawa maṅgiha uṅgul, puwarantuk nugraha, sira wahu partasiwi, turunipun aṅratoni tanaḥ jawa.
36. lamun duruŋ takdirira, nadyan ana hru sakĕṭi, yèn tan was was iŋ wardaya, sayĕkti nora ṅĕnani, amuŋ sajroniŋ jurit, aja sira darbé kayun, iŋ lahir amanuta, iŋ sakarṣa sénapati, batinira kumambaŋa iŋ wisésa.
37. ri sĕḍĕŋ nèŋ bayantaka, kalamun ana kaŋ wèri, nuṅkul wus buwaŋ warastra, nora wĕnaŋ dèn patèni, binaṇḍaŋ iku wajib, yèn ṅantiya nĕmu lampus, tĕtĕp aṅaniaya, gawé niṣṭaniŋ prajurit, nĕmu dosa tĕmaḥ apĕs iŋ ayuda.
38. maṅkono priyaṅganira, yèn kasĕlut iŋ ajurit, aja gugup dèn prayitna, iŋ tékad dipunpratitis, awit woŋ murwèŋ jurit, ana papaṅkatanipun, niṣṭa madya utama, yèn kobĕr dipunèṅĕti, kaniṣṭané woŋ kasĕbut nèŋ ranaṅga.
39. iŋ papan nora kuciwa, gagaman samĕkta sami, ataṇḍiŋ paḍa kèhira, tanpa kiwul iŋ ajurit, taṅèḥ ana papati, myaŋ tan ana naṇḍaŋ tatu, mundur tanpa larasan, muŋ labĕt kĕkĕsiŋ ati, kaŋ maṅkono antuk dosa tri prakara.
40. ḍihin maraŋ iŋ naréndra, dènira cidra iŋ jañji, kapiṇḍo ṅasorkĕn praja, kaŋ mulyakkĕn maraŋ ḍiri, katri maraŋ hyaŋ widdhi, ṅukuhi gaḍuhanipun, kokum pantĕs linunas, paḍané sato wanadri, yèn janmaa paṣṭi ana tékadira.
41. madyané para prawira, yèn kasĕsĕr iŋ ajurit, dadyan kèḥ kĕḍiké paḍa, kasor papané kasupit, mundur amriḥ pakoliḥ, iŋ paṅolaḥ nora gugup, sarana winawéka, kaaṅkaḥ dènnya maṅuṅkiḥ, yèn sinĕraŋ rikat rinukĕt marwasa.
42. utamanirèŋ prawira, sanadyan karoban taṇḍiŋ, tatag tur simpĕn wiwéka, wĕṅkoniŋ papan tiniliŋ, linaṅlaṅan kaŋ wèri, ĕndi kaŋ suda iŋ purun, pinaran pinarwasa, winisésa amriḥ titiḥ, èstu jaya sahaya samya raharja.
2. paṅkur
1. kapuṅkur patrapiŋ bala, ginantyakkĕn luṅguhiŋ sénapati, iṅkaŋ sinrahan wadyaguŋ, déniŋ jĕŋ narèswara, kinèn mataḥ saprayoganirèŋ wadu, kinarya rumĕkṣèŋ praja, dènira ṅupaya janmi.
2. ywa tiṅgal pituŋ prakara, mriḥ utama adĕgirèŋ prajurit, kaŋ ḍihin nalurinipun, tan kĕna trahiŋ sudra, kapiṇḍoné bhumi kalahiranipun, kaŋ makṣiḥ tuṅgal sapraja, katri tanpa cacad ḍiri.
3. papat otot baluṅira, iṅkaŋ tigas lima tanpa pañakit, ĕnĕm sawaŋ sawuṅipun, pitu kaŋ datan darwa, pakaṛĕman kaŋ mlarati raganipun, marma miliḥ kaŋ maṅkana, watĕké wantalèŋ kardi.
4. sawusiŋ pamilihira, pamintané mriŋ woŋ sawiji wiji, pinantĕs cĕkĕlanipun, rujuké lan sarira, paṅulahé warastra ywa koṅsi rikuḥ, rikaté dènnya marwasa, myaŋ panaṅkis amriḥ titiḥ.
5. woŋ kaŋ sĕḍĕŋ dĕdĕgira, aparigĕl tuwin kaŋ aṇḍap alit, akas cukat tandaṅipun, iku sinuŋ sañjata, watak nora kéwran sabaraŋ pakéwuḥ, muḍun juraŋ muṅgaḥ arga, aluwĕs tur miyatani.
6. woŋ kaŋ ḷĕñcir dĕdĕgira, kuraŋ tandaŋ aropèk iṅkaŋ ḍiri, iku cinĕkĕlan lawuŋ, jaṅkaḥ ḍĕpané dawa, watak corok lalantaran siliḥ panduk, mlumpad jagaŋ pasaŋ aṇḍa, aṅuṅgahi balowarti.
7. woŋ saḍépaḥ dĕdĕgira, kaŋ pawakan otot baluŋ kawijil, mariyĕm cĕkĕlanipun, amolahakĕn rosa, nadyan kĕmbĕl kĕblaḍĕr kuwawa juñjuŋ, manawa bobrok kaŋ kuda, watĕké kĕlar gĕntèni.
8. woŋ guŋ luhur kaŋ sĕmbada, iku pantĕs karya wadya turaṅgi, agampaŋ panitihipun, klar nĕmbadani kuda, naṅkis rosa mĕḍaŋ mriŋ pratala gadug, yèn tĕmpuk paḍa turaṅga, siliḥ rok amigunani.
9. déné woŋ kaŋ mandraguna, kinaryaa margaṅsa juru margi, myaŋ rarakit kuwu kuwu, kalamun anèŋ tĕba, lawan bètèŋ kaṛĕtĕg sasaminipun, kaŋ tan kéwran iŋ paṅréka, mĕmènèk lan bisa ṅlaṅi.
10. yogyané maliḥ ṅumpulna, para tukaŋ kaŋ kaṅgo mriŋ prajurit, gĕrji lawan tukaŋ puntu, karya busana wastra, tukaŋ ñamak mĕñjahit pakaryanipun, parabot kaŋ baṅsa carma, tukaŋ tapĕl lawan ñiṅi.
11. sayaŋ lan tukaŋ marakas, mirantèni bĕkakasiŋ prajurit, paṇḍé miwaḥ tukaŋ kayu, mraṅgi lawan kĕmasan, iṅkaŋ karya gagamaniŋ apraŋ pupuḥ, sadaya dipunsamĕkta, rèhniŋ rumĕkṣèŋ prajurit.
12. liya kaŋ wus kaṅgwèŋ wadya, aja sĕpi aṇḍuṅan tikĕl kaliḥ, gagaman saprantinipun, tuwin busana wastra, obat mimis kaŋ cukup dèn aṅgo ṅlurug, awit rumĕkṣa iŋ praja, tan wruḥ saṅkaniŋ bilahi.
13. ri wusiŋ pamintanira, lan piranti kaŋ kaṅgo nèŋ prajurit, maṅkana paṅrĕkṣanipun, dipuntiti iŋ bala, saṇḍaŋ paṅan iŋ saari aywa kantu, sukĕr sakit kinawruhan, dèn bisa ṅénaki kapti.
14. ywa pĕgat pamulaṅira, saniṣkara wajibirèŋ prajurit, wĕruḥna saduruṅipun, niṣṭa madya utama, myaŋ papacak pacuwan kaŋ wus tinamtu, kaŋ kaṅgo nèŋ pra prawira, dunuṅé sawiji wiji.
