sĕrat ṅèlmu hak sajati.
bubukå
nuwun, ṅaturi uniṅå ḍatĕŋ pañjĕnĕṅanipun pårå mahos, biliḥ babonipun sĕrat ṅèlmu hak sajati, ciṭakan iṅkaŋ kapisan utawi kapiŋ kaliḥ, punikå kaṭaḥ iṅkaŋ kalintu pañĕratipun. milå sapunikå sĕrat wahu kawĕdalakĕn maliḥ iṅkaŋ kapiŋ nĕm, naṅiŋ miturut babon sanès iṅkaŋ nĕmbé pinaṅgiḥ såhå kinintĕn laṅkuŋ sampurṇå tinimbaŋ kaliyan babonipun iṅkaŋ kaciṭak rumiyin. wondéné pamacakipun amuŋ kalugokakĕn manut babonipun kémawon, botĕn pisan pisan kawéwahan, supados kasumĕṛĕpan pårå marṣudi, awit wawadosiŋ sastrå sahèstu botĕn kéṅiŋ dipun gagampil, sakalaṅkuŋ gawat. déné pañĕratipun ugi mawi katiti kaṇṭi paṅatos atos, wusånå mugi andadosakĕn kawuniṅanipun pårå mahos.
wiyosipun sĕrat punikå prasasat sampun nåmå wĕjaṅan, iṅkaŋ laṇḍĕp paṅgalihipun lajĕŋ sagĕd ambukå warånå tanpå pitĕdahiŋ guru, milå biliḥ mahos sĕrat punikå, prayogi kaṇṭi wĕniṅiŋ paṅgaliḥ tuwin talatèn, supados sagĕd ṅuniṅani wosipun, jĕr surahosipun ḷĕbĕt saṅĕt.
laré laré iṅkaŋ dèrèŋ cĕkap iŋ umur, botĕn kéṅiŋ mahos sĕrat punikå, awit sagĕd ugi ṅrisakakĕn èṅĕtanipun.
punikå parimbon barkaḥ sakiŋ paṅéran sĕcåwijåyå, kapariṅakĕn ḍumatĕŋ ibu suwargi bandårå radèn ayu nĕraṅkusumå, lajĕŋ kawasiyatakĕn ḍumatĕŋ iṅkaŋ putrå bandårå radèn ayu paṅéran jåyå kusumå, iṅkaŋ kapiŋ kaliḥ, iŋ nagari suråkartå.
juru panitisastrå : m. tanåyå
isinipun sĕrat punikå :
1. hakékaté ṅèlmu kaŋ iṅaranan : siḥ, wahyu, nugråhå.
2. martabat såṅå.
3. hakékaté kamukṣan.
4. ṅèlmu kaŋ muṅguhiŋ rasulullaḥ.
5. hakékaté såhå dat iṅkaŋ sampurṇå.
6. hakékaté ṅèlmu sajati.
7. sajatiniŋ lanaŋ lan wadon.
8. paniṅkahipun ṅèlmu ghahib.
1. hakékatiŋ ṅèlmu, kaŋ iṅaranan : siḥ wahyu nugråhå.
awit såkå karṣå lan råså, patĕmoné råså iku iŋ karṣané, dadi råså saråså, patĕmoné karṣå iŋ rasané, dadi råså sakarṣå, sampurṇané karoné, dadi sir sakarṣå, liyĕpé iŋ sampurṇå, tĕkèŋ saṅkan paran, iku ananiŋ siḥ iṅsun iŋ sirå, awité ånå rahinå wĕṅi, mulané ånå ambĕkan.
utawi hakékaté wahyu iku awit såkå éliŋ lan lali, patĕmoné dadi saṅkan paraniŋ badan, ñåwå sukṣmå badan sampurṇå, ñåwå mulyå sukṣmå sakarṣå, ḷĕsniŋ tĕkèŋ saṅkan paran, iku saṅkaniŋ wahyuniṅsun, tĕtĕpé iŋ ṅisor, iŋ ḍuwur, iŋ tĕṅaḥ, ananiŋ lintaŋ, wulan, sṛĕṅéṅé, iyå iku ĕnĕṅé iŋ ambĕkan, kaŋ tartamtu iŋ éliṅirå.
utawi hakékatiŋ nugråhå iku, awit iŋ pati lan uripé, patĕmoniŋ pati, iŋ uripé, dadi purbå wiséså, amisésani, kahanan pataŋ prakårå.
sĕpi.
sĕpi sĕpiniŋ paṅucap, kaŋ dadi tĕtĕp jĕmbar ciyutiŋ bumi.
samar.
samar samariŋ paniṅal, kaŋ dadi ananiŋ bañu aguŋ asat.
samun.
samun samuniŋ paṅgåndå, kaŋ dadi ĕnĕŋ osikiŋ aṅin.
suwuŋ.
suwuŋ suwuṅiŋ pamilarṣå, kaŋ dadi ånå orané gĕni.
sirṇaniŋ pataŋ prakårå iku, kaŋ dadi kahanan tuṅgal, iyå iku iṅsun, kaŋ aran dat wajibul wujud, kaŋ sipat kahar. jamal, jalal, kamal, ḷĕpasé dat pĕt, dat pḷĕŋ, dat ḷĕs, dat lap, tĕkèŋ goné saṅkan paran, iyå iṅsun, jlĕg ñataniŋ kanugrahan, dadi pĕpĕké jagad lor, wétan, kidul, kulon, abaŋ iṛĕŋ putiḥ kuniŋ, iyå iku ĕniṅé ambĕkanirå, kaŋ wus ñåtå iŋ uripirå, iku anané sabdå sapisan, mulané ånå ambĕk sadu dibyå, ånå, witiŋ siḥ, ĕniŋ, witiŋ wahyu, iyå iku ṅèlmu ghahib, ghababul hakmal, ṅèlmu kaŋ dadi ugĕriŋ ratu, kaŋ aṅratoni iŋ karatoné.
2. martabat såṅå.
punikå ṅèlmu hakékatiŋ martabat såṅå, iyå iku martabatiŋ rasulullaḥ, iki kĕcapé.
salalahu ṅalahihi wasalam, duk lagi awaŋ awaŋ uwuŋ uwuŋ, bumi laṅit duruŋ ånå, åpå iṅkaŋ ånå, junun mukawiyaḥ arané, junun maknå ñåtå, mukårå rahi, wiyaḥ jagad jĕmbar, såpå kaŋ jumĕnĕŋ iŋ arahé jagad jĕmbar, iyå kaŋ måhå suci, saduruṅé ånå bumi laṅit tĕrus samĕṅkoné, urip iku amimbuhi purbå amisésani, luṅguhé iŋ ĕmbun ĕmbunan, sampurṇané iŋ ĕmbun ĕmbunan, utåwå iŋ rambut, urip iku kaŋ hakiki, iyå kamulyaniŋ rasulullaḥ.
kapiŋ kaliḥ, martabat maklumat, sukṣmå kaŋ ṅĕṅgoni, maklum iku kaŋ kinawruhan, sukṣmå iku karṣané, duruŋ karṣå lagi maklum bahé, såpå kaŋ jumĕnĕŋ iŋ maklum sukṣmå, iyå iṅkaŋ måhå suci, iku urip kitå saduruṅé ånå bumi laṅit tĕrus samĕṅkoné, urip iku añukupi kaŋ amurbå iŋ ḍiri, luṅguhé iŋ kĕkĕtĕg, sampurṇané iŋ kukunirå, urip iku amèṅĕti sampurṇané rasulullaḥ.
kapiŋ tigå, martabat lumat arané, duruŋ karṣå lagi aṅawruhi kinawruhan, pĕpĕké adam, såpå kaŋ jumĕnĕŋ iŋ alam maklumat, iyå urip kitå kaŋ amåhå suci, saduruṅé ånå bumi laṅit tĕrus samĕṅkoné, urip iku ånå madi, amisésani iŋ ḍiri, luṅguhé iŋ pusĕr, sampurṇané kulitirå, urip iku amaṅsiti, iyå iku tĕtĕpé rasulullaḥ.
kapiŋ pat, martabat ṅadam, ilapi, wujud ilapi, ṅadam ilapi, iŋ orané ḍéwé, wujud ilapi, iŋ wujudé ḍéwé, duruŋ karṣå lagi ṅadam, iŋ ḍèwèké, mulané ånå wiwit ora ånå, måṅkå ånå anané ḍéwé, ora ånå kaŋ agawé, såpå kaŋ jumĕnĕŋ iŋ ṅadam ilapi, wujud ilapi, iyå kaŋ måhå suci, iku urip kitå saduruṅé ånå bumi laṅit tĕrus samĕṅkoné, urip iku tan wiwitan tan wĕkasan, luṅguhé iŋ nétrå, sampurṇané gĕtiḥ kitå, iku kasuñatan kawulå gusti, kaŋ aran napi isbat, iyå iku sampurṇaniŋ pati iŋ uripé, iku ananiŋ rasulullaḥ.
kapiŋ gaṅsal, martabat alip muntili arané, muntili iku witiŋ karṣå, alip iku aṅadĕg, muntili iŋ ḍèwèké, adĕg adĕgé ḍéwé, ora ånå kaŋ ṅadĕgaké, såpå kaŋ jumĕnĕŋ iŋ alip muntili, iyå kaŋ måhå suci, iku urip kitå saduruṅé ånå bumi laṅit tĕrus saméṅkåné, urip iku tan kĕnå iŋ pati, déné panuṅgalané karṣå, luṅguhé pamiyarṣå, sampurṇané dagiŋ kitå, alip iku wujud suci, iyå alip iṅkaŋ nåmå rasulullaḥ.
kapiŋ nĕm, karṣå sapisan, martabat johar awal arané, johar iku sosotyå, awal ḍiṅin, måṅkå gumilaŋ gilaŋ arané sosotyå iku, marånå maréné, kålå samånå kålå saméné, paḍaŋ tĕkå paḍaŋ, jḷĕg anané, rahinå wĕṅi, lintaŋ, sṛĕṅéṅé, wulan. såpå kaŋ jumĕnĕŋ iŋ johar awal, yå kaŋ måhå suci, urip kitå, saduruṅé ånå bumi laṅit tĕrus samĕṅkoné, johar iku pucukiŋ grånå luṅguhé, sampurṇané baluŋ kitå, urip kitå, urip iku amiséså, amĕliṅi jagadé ånå madi iŋ sakalir, amuji rahinå wĕṅi, iyå iku kaŋ nugråhå, uripé saṅkaniŋ saṅkan, kaŋ iṅaran panrimaniŋ rasulullaḥ.
kapiŋ pitu akarṣå maliḥ, martabat alam uluwiyaḥ, arané ṅalam kaŋ ṅawruhi, uluwiyaḥ iŋ kaluwihané, iŋ jagad jĕmbar, jĕmbar tĕkå jĕmbar, jḷĕg anané bumi laṅit, lor wétan kidul kulon, ṅisor ḍuwur lan tĕṅaḥ, såpå kaŋ jumĕnĕŋ iŋ alam uluwiyaḥ, iyå kaŋ måhå suci, iku urip kitå saduruṅé ånå bumi laṅit tĕrus samĕṅkoné, urip iku amĕṅkoni iŋ ĕnĕŋ, osiké luṅguhé pucukiŋ lésan, sampurṇané iŋ suṅsum, iyå iku kahananiŋ rasulullaḥ.
kapiŋ wolu akarṣå maliḥ, martabat akyan sabitaḥ arané, akyan iku ñataniŋ urip, sabitaḥ tĕtĕpé pati, måṅkå tĕtĕp tinĕtĕpan, pati iŋ uripé tĕtĕp, jḷĕg anané sagårå gunuŋ, ḍarat juraŋ guwå kali, alas sumbĕran, tĕtĕp, wulu, kuku, kulit, gĕtiḥ, baluŋ, suṅsum, otot, bayu, tĕkå jĕrowan, såpå kaŋ jumĕnĕŋ akyat sabitaḥ, iyå kaŋ måhå suci, iku urip kitå saduruṅé ånå bumi laṅit tĕrus samĕṅkoné, uripé akyat sabitaḥ iku, purbané råså, wiséså karṣå, sampurṇané otot bayunirå, luṅguhé iŋ sulbi, iyå iku ĕṅgoné rasulullaḥ.
kapiŋ såṅå, sampurṇané karṣå, martabat ṅadam prampuhan arané, ṅadam iŋ orané, prampuhan pĕpĕké arané ḍéwé ḍéwé, abaŋ, iṛĕŋ, putiḥ, kuniŋ, dadu, wuṅu, ijo kapuråntå utåwå biru, anané iŋ tĕtĕpé, ora lawan ginawé, pĕpĕk anané ḍéwé ḍéwé, såpå kaŋ jumĕnĕŋ iŋ ṅadam prampuhan, iyå kaŋ måhå suci, iku urip kitå saduruṅé ånå bumi laṅit tĕrus samĕṅkoné, uripé ṅadam prampuhan iku tan liyan kaŋ mawujud, amuŋ iku urip kaŋ wiséså, iŋ råså kaŋ amurbå iŋ karṣå, sampurṇané utĕk lan jĕrowan, iku hakékaté rasulullaḥ.
3. hakékaté kamukṣan.
punikå ṅèlmu hakékaté kamukṣan, muṅguhiŋ rasulullaḥ, iki laḥ kĕcapé :
salallahu ṅalahihi wasalam, pĕkṣi nålå mulihé mulihå, iŋ paṅulu sṛĕṅéṅé, sakaguru sumurupiŋ mumbul iŋ awaŋ awaŋ, awaŋ diḷĕm tinut déniŋ iman, sĕg paḍaŋ laḥ paḍaŋ, adoḥ katon cĕrak katon byar paḍaŋ tĕkå paḍaŋ, pĕkṣi nålå ĕṅaknå lawaŋ suwargå, inĕpnå lawaŋ naråkå, ṛĕg gĕr iyå iku pĕkṣi nålå, kaŋ amiséså ḷĕyĕp sakarṣå, mukṣå tan ånå karåså, sampurṇané badané slamĕt saparané, tĕkå sakajaté.
4. ṅèlmu kaŋ muṅguhiŋ rasulullaḥ.
punikå ṅèlmu kaŋ muṅguhiŋ rasulullaḥ, iki laḥ kĕcapé :
salallahu ṅalahihi wasalam, datniŋ tanpå warånå kamulyaniŋ pati, badan muliḥ iŋ bumi, råså ñåwå muliḥ iŋ laṅit karṣå, rasulullaḥ rasané si båpå, lan rasané si biyuŋ, kumpulé sampurṇå dadi aku, luṅguhé dadi ṅĕpok, dalané sarambut pinårå pitu, iyå iku ĕṅgon witiŋ råså kabèḥ, sampurṇané karṣå, kamulyané råså, iyå iku sampurṇaniŋ rasulullaḥ, sĕg tan ånå luṅguhé, ånå nétraku kiwå, niŋ jati luṅguhé nétraku tĕṅĕn, iyå iku gon patĕmoniŋ råså tuṅgal, ånå iŋ jinĕm, luṅguhé iŋ jantuŋ, iyå iku ĕṅgon karṣå sampurṇå, laḥ niŋ åjå kari åjå ḍiṅin, yèn kari ĕndi ĕṅgoné, sapirå gĕḍéné, sakuḍup malaṭi, mañcoroŋ kadi daru, gumĕbyar kadi liliḍaḥ, iyå iku ĕṅgon kalaṅgĕṅané råså mulyå, karṣå sampurṇå, urip purbå amiséså, muliḥ ilaŋ mariŋ sajatiné ånå.
5. hakékaté såhå dat iṅkaŋ sampurṇå.
punikå hakékatiŋ såhå dat iṅkaŋ sampurṇå, muṅguhiŋ rasulullaḥ, iki laḥ kĕcapé.
ashaduwana kahanan iṅsun, anta ilaha, yèn ora ånå rupaniṅsun, ilalahu yå iŋ urip iṅsun, yå urip yå rupå, yå kahånå, kahanan tuṅgal, rupå mulyå, urip sampurṇå, kaŋ sajati tĕtĕp laṅgĕŋ tan kĕnå pati.
ashadu kahanané råså ånå, muhammad satuhu rupané råså, rasulullahu patĕmoniŋ råså iṅuripé, yå råså yå rasulullaḥ, muhammadan kaŋ tuṅgal iman, sajati tĕtĕp laṅgĕŋ dadi pañcĕriŋ ṅahurip.
6. hakékaté ṅèlmu sajati.
punikå hakékatiŋ ṅèlmu sajati, kaŋ sajatiné ṅèlmu iku sampurṇané kalimaḥ roro, iki laḥ kĕcapé kaŋ kinawruhan.
lahillahahilullahu, muhammadan rasulullahi, ora ånå paṅuripan, aṅiŋ urip iṅsun, pati iku patĕmoniŋ urip iṅsun, lahillahahilullahu, muhammadan rasulullahi, ora ånå paṅéliŋ éliŋ, aṅiŋ éliŋ iṅsun, lali iku pamĕḷĕṅé éliŋ iṅsun, lahillahahilullahu, muhammadan rasulullahi, ora ånå kinarṣanan, aṅiŋ karṣaniṅsun, råså iku sihiŋ karṣaniṅsun.
7. sajatiniŋ lanaŋ lan wadon.
utåwå sajatiniŋ lanaŋ iku kumpulé karṣå iṅkaŋ sampurṇå, iyå iku éliṅirå, anadéné sajatiniŋ wadon iku, kumpulé råså mulyå, iku lalinirå, trapé éliŋ lan lali, iku amĕṅku winĕṅku, iku arané wahyu nugråhå, pamoriŋ siḥ arané, mulané ånå lanaŋ sajroniŋ wadon, ånå wadon sajroniŋ lanaŋ, maṅkono iŋ hakikiné, iyå iku jĕnĕṅé kawulå gusti, allaḥ lan muhammad.
8. paniṅkahipun ṅèlmu ghahib.
punikå paniṅkahipun ṅèlmu ghahib kaŋ mulyå kaŋ sampurṇå, paniṅkaḥ kaŋ muṅguhiŋ rasulullaḥ, iki laḥ kĕcapé.
allaḥ kaŋ aṅawinaké, muhammad kaŋ dadi waliné, sahidé malahékat papat, akawin sajroniŋ johar, apatĕmon sajroniŋ ånå, apulaṅsiḥ sajroniŋ ora, mas kawiné ṅèlmu ghahib kaŋ sampurṇå, yå dat jĕnĕŋ iṅsun, yå iṅsun iŋ sirå, pomå pomå åjå sak åjå sĕrik, iki pamaṅsit iṅsun iŋ sirå.
bumi pitu laṅit pitu sahisiné iku ora ånå, allaḥ muhammad rasul ora ånå, pati, urip, duñå, akérat, kubur, lan patakonan malahékat kirun wanakirun, ora ånå, suwargå naråkå, ṅaras kurṣi ḍiŋ ḍiŋ jalal, ora ånå, wot traju pakumpulan kirå kirå ora ånå, lahir batin, wiwitan, wĕkasan, kabèḥ kabèḥ iku ora ånå, kabèḥ iku karaton iṅsun, iŋ sirå, iyå iṅsun kaŋ jumĕnĕŋ iŋ dat kaŋ laṅgĕŋ iŋ sipat, kaŋ ånå iyå iṅsun, kaŋ ora ånå iyå iṅsun, anané iku kabèḥ tartamtu iŋ siḥ iṅsun, iyå iṅsun kaŋ laṅgĕŋ mulyå sampurṇå, pomå pomå iki ḷĕpasé.
dat ĕniŋ tanpå warånå kamulyaniŋ pati, patĕmoné siḥ iṅsun, dat ḷĕs mulyå sakiŋ saṅkan paran, dat éliŋ goniŋ pasuciyan iṅsun, sampurṇaniŋ urip, kahuripanin pati, patitisiŋ kawruḥ, tĕtĕpé wahyuniṅsun, dat lap laṅgĕŋ tan saṅkan paran, ananirå iku siḥ iṅsun, iyå iṅsun iŋ sirå, pomå pomå åjå sak åjå sĕrik, kabèḥ iku ora liyan iṅsun, pituduḥ kaŋ sampurṇå iku, urip pituŋ prakårå, kåṇṭå, warṇå, ambu, råså, urip, rupå, kaånå kahanan tuṅgal, iŋ anané iku sampurṇané ṅurip kitå kabèḥ, déné wĕkas kaŋ mulyå iku pati pataŋ prakårå, patĕmoné sĕpi, samar, samun, suwuŋ.
sĕpi, sĕpiniŋ paṅucap.
samar, samariŋ paniṅal.
samun, samuniŋ paṅgåndå.
suwuŋ, suwuṅiŋ pamiyarṣå.
maṅkéné ḷĕpasé.
dat pĕt, dat pḷĕŋ, dat ḷĕs, dat lap, laṅgĕŋ tan saṅkan paran, iyå iṅsun gon mulyå tanpå kirå, pomå dèn rumåså, åjå rumåså, kabèḥ iku kaguṅané kaŋ måhå suci, wulu kuku dèn ḷĕbur, dèn ḷĕbur déniŋ napsu aluwamaḥ, kulit dagiŋ dèn ḷĕbur déniŋ napsu amaraḥ, baluŋ suṅsum dèn ḷĕbur déniŋ napsu supiyaḥ, utĕk jĕrowan, dèn ḷĕbur déniŋ napsu mutmahinaḥ, otot bayu dèn ḷĕbur iŋ uripé, urip tĕtĕpé iŋ ambĕkan, ambĕké napas, tanapas, anpas, nupus, sampurṇå muliḥ mariŋ sajatiné ora, badan ñåwå sampurṇå mulyå, ilaŋ mariŋ sajatiné ånå.
