kapĕṭik sarta kawĕwahan déniŋ radèn wadana sasrawinata, abdi daḷĕm iṅkaŋ sinuhun kaṅjĕŋ sultan iŋ ṅayogyakarta hadiniṅrat.
1. mĕgatruḥ
1. pujaniŋ srat sinawuŋ sĕkar mĕgatruḥ, truhiŋ tyas manukṣmèŋ gĕṇḍiŋ, gĕṇḍiŋ rarasiŋ paṅimur, paṅimuriŋ manaḥ kiṅkin, kiṅkin kakĕnan wirahos.
2. wirahosé srat babad cariyosipun, anĕṅgiḥ ki agĕŋ maṅir, wanabaya namanipun, kaŋ dahat mumuja iŋ siḥ, ira hyaŋ sukṣma katoṅton.
3. awit sakiŋ gaḍaḥ pusaka kĕlaṅkuŋ, wahos ḍapur barukupiŋ, laṅkuŋ agĕŋ manahipun, tan purun karèḥ narpati, tyas bĕguguk ṅuṭawaton.
4. pambĕk wĕntar kuwawa kyat sura diguŋ, tan purun séba saŋ aji, iŋ pajaŋ kala rumuhun, ṅanti prapta jaman maṅkin, mataram gumanti katoŋ.
5. datan purun ñĕmbaḥ pañjĕnĕṅan ratu, kulawaṅsané prasami, kaŋ maṅka dadya paṅimur, saṅĕt dènira ṅaturi, sowan na mataram katoŋ.
6. kiwa tĕṅĕn nagari sampun tumĕluŋ, atur ruruba paniwi, kĕḍu bagĕlèn madiun, jĕpara kaḍiri paṭi, pajaŋ sĕmaraŋ sumahos.
7. mriŋ mataram bulubĕktènipun katur, pan namuŋ kantun iŋ ṅriki, kaŋ dèrèŋ sumuyut ratu, mĕkèwĕt tur bawaḥ alit, kiraŋ prayogi katoṅton.
8. saḷĕṛĕsé ṅriki kabawaḥ matarum, ṅĕndĕlkĕn punapa kyayi, kawon iŋ sabaraṅipun, kawon wadya kawon aji, sabaraṅé sruwa kasor.
9. sun pamèkkĕn katépan maṅraṅsaŋ gunuŋ, cécébol maṅgayuḥ laṅit, lir durèn kalawan timun, paran marginé kuwawi, paduka lawan saŋ katoŋ.
10. ya ta kyayi wanabaya ṅliŋnya bĕkuḥ, pan allaḥ kaŋ duwé bhumi, iṅsun suwita hyaŋ aguŋ, tan ṅawula sénapati, jĕr paḍa titahiŋ manon.
11. iṅsun namuŋ ṅukuhi duk purwanipun, goné cakal bakal kyayi, kaŋ suwargi bubak macul, tan ñañambat liyan janmi, ṛĕkasa tĕmaḥ dadi gon.
12. lan iṅsun tan nĕja ñikarani ratu, sun tan nĕja dadi aji, jĕr sun dudu waris ratu, apa kaŋ iṅucap maliḥ, ṅiŋ tan gĕḷĕm karèḥ iṅoŋ.
13. iya maraŋ sakpĕpaḍaniŋ tumuwuḥ, naṅiŋ sun pratignya maṅkin, sun gĕḷĕm ñĕmbaḥ maṅulun, mriŋ sakpĕpaḍaniŋ janmi, yèn ana janma kaŋ taṅgon.
14. anaḍahi maraŋ pucuké tumbakku, tumbakku ki barukupiŋ, wasiyaté luluhurku, kulawaṅsané prasami, jĕntuŋ tan kĕna mirahos.
15. sabĕn maṅap arṣa ṅraṛĕpa umatur, cinĕgatan sabda runtik, cinĕṇḍak caritanipun, ki agĕŋ maṅir ṅĕmasi, putrané iṅkaŋ gumantos.
16. sabaraṅé tan siwaḥ sudarmanipun, nama myaŋ tĕtĕp ṅluṅguhi, iŋ maṅir sadayanipun, maṅké malaḥ aṅuṅkuli, panbĕké lan kaŋ wus layon.
17. makṣiḥ anom warṇané sĕrada bagus, barañak ladak ñlakĕṇṭiŋ, jĕr bèḍèk kĕladuk bĕsus, wus jaka sĕpuḥ kaŋ wañci, kériṅan sasamaniŋ woŋ.
18. waṅkit praga maṅalor mlaraŋ kawĕṅku, maṅidul taṇḍĕs pasisir, maṅalor prapta iŋ bantul, kaŋ wus samya maṅèstuti, mriŋ maṅir mañcapat goloŋ.
19. rina wĕṅi kasukanira anutug, biyuṅé siŋ pakĕr ṅuni, bĕguguk tan purun ṅulun, maraŋ nagara matawis, susumbar mitakuti woŋ.
20. kunĕŋ gantya sĕkaṛĕŋ iṅkaŋ kawuwus, sénapati ṅalaga ji, iŋ mataram kaŋ amĕṅku, ri sĕḍĕŋ miyos tinaṅkil, pêpak upacara katoŋ.
21. iŋ paglaran suméwa gara supĕnuḥ, pĕnuḥ ṛĕsminiŋ naya di, makilat taṭit abaruŋ, téjamaya kumĕñar śri, maṅas kaprabawèŋ katoŋ.
22. busana bra sumirat ganda sumuluḥ, wus sébak mahéndra sari, sariniŋ raras sumawur, sĕnĕniŋ praja ṅlaṅĕni, dumĕliŋ luhur katoṅton.
23. pracinané naréndra ṛĕmbĕsiŋ madu, trahiŋ danawa riḥ yĕkti, wijiniŋ tapa pinrĕs kuŋ, kasub kasumbagèŋ bhumi, palguna digbyèŋ palugon.
24. śri naréndra pinarak nèŋ sitiluhur, rumĕṅgĕp ḍampar rukmadi, prabané pra méga santun, patiŋ pĕñcoroŋ kahèkṣi, lir sudama sèwu abyor.
25. wahyuniŋ saŋ yayaḥ lir baṭara wisnu, maṅrĕmpak prabhu sélardi, tuhu kĕlamun piturun, pakuniṅrat tanaḥ jawi, jumĕnĕŋ mataram katoŋ.
26. saḥ iṅayap saḍèrèk myaŋ para sunu, dipati mandraka ṅarṣi, jayasupanta tumĕṅguŋ, myaŋ martalaya dipati, tĕnapi tumĕṅguŋ bacor.
27. saradipa dipati paṭi iŋ kĕḍu, pajaŋ dĕmak sokawati, sumiwi ṅayunan mulku, sénapati ṅandika ris, paman mandraka sun taros.
28. aprakawis paḍusunan maṅir niku, tita tumĕka iŋ maṅkin, bĕguguk tan purun ṅulun, mĕrdaya kĕraton mami, yèn suwawi rinĕbut rok.
29. tinumpĕsan sakbrayat lan waṅsanipun, sipat lanaŋ sampun kari, dipati mandraka matur, kawula botĕn suwawi, dèn sarèḥ karṣa saŋ katoŋ.
30. nadyan ṅalit tan kéṅiŋ ginampil ripu, yèn ḷĕpat anĕrawasi, karya risakiŋ wadya guŋ, tur niṣṭa jĕnĕṅiŋ mulki, amĕṅsaḥ bĕkĕl babahon.
31. iŋ rèḥ wontĕn kaŋ dadya pakèwĕtipun, gaḍaḥ pusaka ṅajrihi, wahos ḍapuripun baru, ampuhipun ṅĕlaṅkuṅi, tan kéṅiŋ janma tĕguḥ tos.
32. kĕkulita tĕmbaga iṅkaŋ babaluŋ, wĕsi purasani tuwin, otot kawat kĕré pruṅgu, katiban pucukiŋ biriŋ, baluŋ gogrog awak bosok.
33. timbalané ṅuni sunan ṅadilaṅu, iṅkaŋ misik ḍatĕŋ mami, pun maṅir gamané puñjul, tan kéṅiŋ tinulak janmi, siṅa katiban aṅlayon.
34. tur cinĕṭa dadya pusakaniŋ ratu, kakĕmbaranipun kyayi, palèrèt iŋ béñjiṅipun, pramila kaŋ laṅkuŋ ṛĕmpit, binujuk alus kimawon.
35. lamun sampun kéṅiŋ wahosipun baru, tan wontĕn malaṅatèni, sakarṣa paduka mulku, kawula ḍatĕŋ mèstuti, śri nata ṅandika alon.
35. lamun sampun kéṅiŋ wahosipun baru, tan wontĕn malaṅatèni, sakarṣa paduka mulku, kawula ḍatĕŋ mèstuti, śri nata ṅandika alon.
36. yèn mĕkatĕn prayogi andika ṛĕmbug, arjaniŋ lampaḥ kaŋ pinriḥ, myaŋ arjaniŋ puṅgawa guŋ, kaŋ tan niṣṭakkĕn narpati, ṅiŋ kaŋ maṣṭi antuk yĕktos.
37. tur sandika dipati mandraka muwus, hèḥ ta kulup maṅkubhumi, tuwin sira siṅasantun, sĕdéné martalaya di, kapriyé ṛĕmbug sun taros.
38. jĕŋ paṅéran maṅkubhumi alon matur, dipati martalaya twin, myaŋ paṅéran siṅasantun, sumaṅga aturṇya katri, sapaṅrèḥ ulun rumojoŋ.
39. saŋ dipati mandraka kala mamatur, mriŋ putra jĕŋ sénapati, yèn maṛĕṅi karṣa mulku, duryat paduka saŋ suji, linurugna iŋ palugon.
40. ṅoŋ pamèkkĕn ṅambil mina jroniŋ kĕḍuŋ, kaŋ toya mĕkṣiha wĕniŋ, ulamnya tutut kĕcakup, mèsĕm kaṅjĕŋ sénapati, ṅartika sajroniŋ batos.
41. śri sudigbya jĕṅkar kondur aṅĕḍatun, ginaṛĕbĕg para cèṭi, maṅaṅĕn aṅĕn iŋ kalbu, kagurawa byatiŋ sandi, sarawuhirèŋ kuḍaton.
42. tata ḷĕṅgaḥ iṅayap kaŋ para arum, warṇanĕn pasowan jawi, ambabat kĕñcĕŋ tyasipun, bubaran samya miranti, sakṣikĕpirèŋ palugon.
43. duk samana hyaŋ éndracapa wus surup, ṛĕsminiŋ purṇama ganti, maṅléla paḍaŋ sumraḥ rum, kumĕñar ṛĕsĕp ṅlaṅĕni, saŋ nata ṅandika alon.
44. mriŋ ñahi tumĕṅguŋ adisara wahu, lumakua iṅsun tudiŋ, paman mandaraka iku, timbalana dipun aglis, lumĕbu mriŋ jro kuḍaton.
45. nĕmbaḥ lèṅsèr adisara sirèŋ ṅayun, prapta mandarakan paṅgiḥ, caṇṭika atata luṅguḥ, kĕlawan saŋ adipati, adisara matur alon.
46. jĕṅandika ṅandikan putranta mulku, wontĕn pakarya kaŋ dadi, gandruŋ wilaṅuniŋ masbun, saṛĕṅa saklampaḥ mami, dipati mandraka alon.
47. sampun kérid tumamèŋ jroniŋ kuḍatun, rumantap ṅayunan mulki, saŋ nata ṅandika arum, hèḥ paman suwawi sami, andika kĕlawan iṅoŋ.
48. andugèkkĕn piṛĕmbug duk kala wahu, pipikir nèŋ siti murti, sintĕn kaŋ dadya panuju, rumusak ḍatĕŋ pun maṅir, kaŋ mitadosi pakéwoḥ.
49. saŋ dipati mandraka tandya umatur, yèn maṛĕṅi jéŋ saŋ aji, duryat paduka dyaḥ ayu, dèn ajĕŋ pĕmbayun nĕṅgiḥ, linampaḥna iŋ palugon.
50. martalaya kaŋ maṅka rumĕkṣèŋ kéwuḥ, kinèn dados ḍalaŋ gusti, kaṇṭia lan kadaṅipun, jayasupanta prasami, rumĕkṣa putra saŋ sinom.
51. lan pun saradipa dados pañjakipun, tumĕṅguŋ bacor ywa kari, kaŋ minaṅka nabuḥ kĕmpul, saradipa kaŋ ṅĕṇḍaṅi, saradula nabuḥ kĕnoŋ.
52. adisara dadosa paṅgĕndèripun, déné kĕmpulé prayogi, ki bicak kinarya tuṅgul, putra paduka saŋ suji, dèn akua anak yĕktos.
53. śri naréndra dahat kapanujon masbun, paman manira maṛĕṅi, hèḥ adisara digupuḥ, timbalana si dipati, martalaya mriŋ kuḍaton.
54. jasupanta saradipa si tumĕṅguŋ, bacor saradula aglis, sandika adisara wus, kaŋ tinimbalan wus kérid, prapta ṅabyantara katoŋ.
55. śri sudigbya gupita cakcĕma madu, sira nĕnĕm iṅsun tudiŋ, sandi lumĕkṣanèŋ kéwuḥ, lan si adisara tuwin, sun gawani putraniṅoŋ.
56. janma nĕnĕm kaŋ alus rapĕt iŋ laku, laku lumĕkṣanèŋ sandi, sandiné aywa kuwaṅur, yèn kuwaṅur babayani, mĕñaṅa maṅir dialon.
57. wruhanira si maṅir iŋ mĕṅko pan wus, kĕñatan wani mriŋ mami, bĕguguk tan gĕḷĕm ṅulun, dé kaŋ dadya karṣa mami, woŋ nĕnĕm kaŋ paḍa goloŋ.
58. martalaya dadia ḍaḍalaṅipun, sandiguna iṅkaŋ nami, jasupanta aranipun, sandisasmita kaŋ nami, déné si tumĕṅguŋ bacor.
59. sun arani sandiupaya apatut, saradipa mĕkṣiḥ lami, saradula nora santun, dèn ajĕŋ pĕmbayun nuli, tinimbalan prapta alon.
60. sudarméndra nĕbda luwĕs maṅimur kuŋ, sira ñawa iṅsun tudiŋ, ṅulati tumbal praja guŋ, kaŋ maṅka ñlamĕtkĕn dasiḥ, ṅarjakkĕn sun dadi katoŋ.
61. ya si maṅir darbé tumbak ḍapur baru, kacĕṭèŋ wirayat ṅuni, dadi pusakaniŋ ratu, wus paṣṭi karṣaniŋ widdhi, sira kaŋ lumĕkṣanèŋ don.
62. wignya birat sukĕr malané tyas iṅsun, tur kaŋ wignya muṣṭi biriŋ, biriŋ kaŋ ṅaran ki baru, tur sira pan wus pinaṣṭi, lan si maṅir sapatĕmon.
63. yĕkti dadi jatukrama putraniṅsun, pupusĕn karṣaniŋ widdhi, joḍo upamané lampus, ḷĕta sĕgara lan ardi, tan kĕna tinambak iŋ woŋ.
64. saŋ kusuma pyuḥ iŋ tyas jaja mañjĕlut, kabĕḷĕt waṣpanya mijil, ṅartika sajroniŋ kalbu, nora kaya jĕŋ rama ji, woŋ kĕña kinèn nraŋ kéwoḥ.
65. yèn kawĕntar iba ucapé lyanipun, pĕṣṭi akèḥ kaŋ ṅèsĕmi, déné èṇṭèŋ bobotipun, sénapati ṅalaga ji, sumĕlaŋ kĕña kinoṅkon.
66. nora luwiḥ iku èṣṭiniŋ pakéwuḥ, naṅiŋ yèn sun rasa maniŋ, kĕlamun datan miturut, maraŋ karṣaniŋ sudarmi, duraka iṅkaŋ katĕmon.
67. rèhniŋ wani abadal karṣaniŋ ratu, ratu gagĕntiniŋ widdhi, kapiṇḍo sudarma tuhu, yèn tan lumĕkṣanèŋ tudiŋ, tan maṅgiḥ manisiŋ ĕndon.
2. ḍaṇḍaŋgula
1. lara pati yĕkti tan ṅiṅkĕdi, bĕkja cilaka wus paḍa atas, pininta iŋ sakduruṅé, duk lokil makpulipun, wus ciniṭak karṣaniŋ widdhi, wusana saŋ kusuma, umatur mlasayun, mèstuti karṣaniŋ rama, śri naréndra ṅandika maraŋ iŋ siwi, lir madu namur tirta.
2. ḍuḥ naḥ aṅgèr putraniṅsun nini, wus jamaké woŋ dadi naréndra, abot èṇṭèŋ muŋ linakon, ṅlakoni sapituduḥ, pituduhé pakarya maṣṭi, maṣṭiné kaŋ wirayat, wirayat kaŋ mashur, mashuré supaya dadya, dadya amriḥ pikukuhiŋ praja niti, tiniti pujamantra.
3. iŋ wusana sira amèstuti, sapituduḥ pakoniŋ sudarma, kĕluwiḥ tarimaniŋ ṅoŋ, tĕka pañiptaniṅsun, sira sasat mèlu ṅréwaṅi, juṅjuŋ kĕpraboniṅwaŋ, gonku dadi ratu, awit tĕka sudrapapa, sira mèlu narik kamulyan sun nini, iku dunuṅiŋ atma.
4. lara kĕpénak prihatin kiṅkin, panas pĕriḥ lumiriŋ sapakyan, mriŋ sudarma wani taṅgon, ḍuḥ ñawa putraniṅsun, abot tĕmĕn woŋ dadi aji, tan ṅétaŋ anak kĕña, prandéné tinuduḥ, anraŋ sandiniŋ ṅupaya, namuŋ sira kaŋ wignya ṅrĕkṣèŋ pamadi, sun srahkĕn mriŋ hyaŋ sukṣma. 5. raharjowa ḷĕstari kaŋ dadi, anraŋ priṅgabayaniŋ kudadyan, kaŋ nĕja ṅĕntasi gawé, kaŋ putra gya rinaṅkul, béñjaŋ sira yèn wus pinaṅgiḥ, lan kaŋ nĕja murkèŋ rat, prihĕn séba mriṅsun, poma poma aja sira, gĕḷĕm nuṅgal surasaniŋ priya èstri, yèn duruŋ amĕtokna.
6. prasĕtyané mriŋ sira kaŋ yĕkti, gĕḷĕma sumiwi maraŋ iṅwaŋ, ya ladènana putrèṅoŋ, lan manèḥ wĕkas iṅsun, maraŋ sira nini ywa lali, yèn kalimpé kaŋ tumbak, ḷĕṅanana gupuḥ, ḷĕṅa diyan winorana, toyanirèŋ pulaṅyun kaŋ putra nuli, winaṅsit mriŋ sudarma.
7. purwa kĕdadéhané kaŋ biriŋ, sakiŋ pulaṅyun natkalanira, paṇḍita bĕntur tapané, kriḍu mriŋ dyaḥ mamrĕs kuŋ, sakĕclapan campur paṅèkṣi, lir nikmatiŋ pamrikan, iŋ karṣa salulut, tan antara saŋ kusuma, aṅgarbini duk praptèŋ sĕmaya lahir, umijil sarpa digbya.
8. barukliṇṭiŋ tĕṅraniŋ sarpa di, duknya lahir kaŋ sarpa pinarṇaḥ, nèŋ sukuniŋ mahéndra groŋ, gunuŋ dira ranipun, tinutupan jĕmbaṅan siji, ibuné mĕkṣiḥ tapa, nèŋ pucakiŋ gunuŋ, déné saŋ maha paṇḍita, duknya kriḍu iŋ pamyat nikmatiŋ ṅrĕsmi, sĕkala ṅaliḥ prĕnaḥ.
9. muṅgèŋ srĕṅganiŋ bukit mĕrapi, sawusira iŋ alama lama, saŋ sarpa saṅsaya gĕḍé, molaḥ nèŋ sajronipun, iŋ jĕmbaṅan swara mĕliṅi, ṅakak atata janma, upasé sumĕmbur, pĕcaḥ kaŋ ponaŋ jĕmbaṅan, dadi rawa kaŋ sarpa wĕspadèŋ ṅèkṣi, pucaké gunuŋ dira.
10. ana janma tatapa rupèstri, pinaranan praptanirèŋ prĕnaḥ, tanya tinanya sébak woŋ, sapa sudarmaniṅsun, tĕṅran miwaḥ iṅkaŋ paliṅgiḥ, ibuné tutur wĕca, yèn atmaniŋ wiku, paṇḍita abĕntur tapa, duk tinutur saŋ sarpa lumarap apti, ṅulari kaŋ sudarma.
11. kèhiŋ wrĕkṣa kabarubuḥ déniŋ, samédraniŋ sawo dadi tansaḥ, ṅulatan datan katĕmon, tan antara myat gunuŋ, pucak iṅkaŋ rimawan kèkṣi, sujanma maṅun tapa, katoṅton añiṅkruk, saŋ sarpa lumarap nĕja, kĕpraṅguḥ mriŋ kaŋ tapa ṅakak swaragni, lir sundar katyup ṅaṅyan.
12. ardawlika duk prapta srĕṅganiŋ, bukit tanya mriŋ kaŋ ñiṅkruk tapa, kaŋ tapa arum sĕbdané, sarpa apa sĕdyamu, maraŋ mriŋ gyan wran maṅun tèki, ardawalika nĕbda, wruhanta saŋ wiku, marmamba praptèŋ ṅabyanta, saklaminta tinitaḥ tan wruḥ sudarmi, praptèŋ sĕmaṅkénira.
13. ḍapur nĕja tatakèn sudarmi, saŋ mĕrtapa ririḥ sĕbdanira, dé prapta kéné ḍèwèké, sapa kaŋ asuŋ tuduḥ, ardawlika pratignya yĕkti, mukyanta praptèŋ ṅabyan, taranya saŋ wiku, si ibu kaŋ pajar sĕbda, yèn sudarmaniṅsun nèŋ srĕṅganiŋ wukir, iŋ kéné prĕnahira.
14. marmaniṅsun maṅayuḥ srĕṅganiŋ, bukit wusana katĕmu sira, sira yĕkti sudarmèṅoŋ, ri saŋ wiku nawuŋ wus, dudu iŋ sudarmamu yĕkti, sĕnajan sun susuta, iŋ satuhonipun, maṅsa dadak mijil sarpa, basa janma susuta rupa sujanmi, sira dudu atmèṅwaŋ.
15. ardawlika duk tinulak iŋ ṅliŋ, kyat bĕl prĕmpĕŋ takrut nĕpsonira, pĕṭit mahéndra solahé, siraḥ ṅadĕg lir kuwuŋ, swara ṅakak otĕr mĕliṅi, upas kumutug kéntar, lir kucika takrut, saŋ paṇḍita rikalarṣa, rinaṅkus mriŋ saŋ sarwa gupuḥ dènnya ṅliŋ, sarpa sira nahĕna.
16. iṅsun jaluk pratigñamu yĕkti, yèn sirèstu sutamba sañata, sakmédrané gunuŋ kiyé, ubĕṅana awakmu, kĕmput siraḥ praptaniŋ pĕṭit, kĕlamun kĕmput sira, sayĕkti anakku, yèn tan kĕmput sira datan, iṅsun aku saŋ sarpa ṅakak gumuliŋ, tur ki mriŋ suku arga.
17. cipta nĕja maṅubĕṅi wukir, wukir tandya iṅubĕṅan sarpa, duknya mèḥ kĕmput ubĕṅé, wĕtara kuraṅipun, muŋ sajaṅkaḥ saŋ ṛĕṣi aṅliŋ, hèḥ sarpa mĕkṣiḥ kuraŋ, aṅĕmputi gunuŋ, kuraŋ saṭiṭik kiwala, yèn tan kĕmput yĕkti tan sun aku siwi, ardawalika kurda.
18. ilatira iṅèlètkĕn mijil, duk mèḥ kĕmput kaŋ ilat pinĕraŋ, iŋ ladiŋ déniŋ saŋ kahot, ilat tugĕl bĕt pan wus, raḥ sumirat sarpa gumuliŋ, ḷĕs kari dadya pĕjaḥ, kaŋ ilat pinuṇḍut, maraŋ risaŋ maha tapa, winor ladiŋ cinipta maraŋ saŋ ṛĕsi, tan suwé dadi tumbak.
19. ḍapur baru iṅran barukupiŋ, sawusira ilat dadi tumbak, kaŋ tumbak sinèlèhaké, nèŋ srĕṅganiŋ wrĕkṣa guŋ, lamun ana janma udani, maraŋ wujudiŋ tumbak, katoṅton sarpa guŋ, sumlaḍaŋ srĕṅganiŋ wrĕkṣa, muŋ si maṅir kaŋ antuk nugraniŋ widdhi, kĕlamun mulat tumbak.
20. datan maliḥ sakṣana iṅambil, mriŋ si maṅir iku purwanira, duk kala kuna kunané, praptèŋ mĕṅko ḷĕstantun, dadya wasyatira si maṅir, saŋ ṛĕtna duk nirbawa, sĕbdané saŋ prabhu, maṅrĕti kagagas iŋ tyas, darma nĕbda nini iṅkaŋ ṅati ati, tumbak iku wruhanta.
21. piliḥ woŋ tĕguḥ timbul suḥ titis, yèn amriḥ suda mandiniŋ tumbak, tandya winuruk saŋ sinom, kawijayan digbya nuŋ, pĕnawané upas kaŋ mandi, paṅlĕṛĕpaniŋ kurda, pĕṅabariŋ tĕguḥ, pasiṛĕpaniŋ pasuptan, wus kĕcakup mriŋ putra jĕŋ sénapati, sĕnadyan ta wanodya.
22. datan kéwran priṅganiŋ arumpil, agal alus puñjuliŋ apapak, kaprawiranira kahot, mrojol ṅakĕṛĕp putus, ayu murti sĕkariŋ puri, maṅrasuk kaŋ busana, busana manamun, sakĕclapan wus tan paja, yèn mèmpĕra kĕlamun putra narpati, kaŋ mĕṅku iŋ rat jawa.
23. naṅiŋ yèn woŋ kaŋ sujanèŋ liriŋ, lawan janma kaŋ sujanèŋ cipta, lan kaŋ sujanèŋ surtiné, miṅit lir tikṣwaniŋ hru, sakĕclapan tan samar ṅèkṣi, kaŋ kĕñanan lamun ta, putrané saŋ prabhu, sĕnĕn gĕbyariŋ wadana, ṅléla wĕnĕs mĕñcoroŋ mañcur dumĕliŋ, cahyané nukṣmèŋ jagad.
24. sinamuna winor guṅiŋ janmi, yĕkti béda lan kaŋ baṅsa sudra, lir lisaḥ lawan tirtané, yĕkti tan bisa carub, carub uga praptaniŋ ṅèlmi, goṭaṅa salaḥ juga, maṣṭi jagad suwuŋ, ri sampunira busana, saŋ kusuma umaṛĕk ṅarṣèŋ sudarmi, śri naréndra ṅandika.
25. wis ta nini maṅkata tumuli, mumpuŋ kalguk abĕcik saṅatnya, sira sun srahkĕn hyaŋ manon, slamĕta saklakumu, sĕlamĕta kaŋ anèŋ wuri, poma ywa kĕnèŋ baya, saṅsaraniŋ sirtu, sĕdéné woŋ lima paḍa, iṅsun pariŋ kraharjan priṅganiŋ margi, poma kaŋ wignya ñamar.
26. puluḥ puluḥ wus bĕjamu sami, janma nĕnĕm darbé ratu sudra, duruŋ kériṅan samèŋ woŋ, pirabara iŋ bésuk, arjaniŋ rat iŋ tĕmbé wuri, iṅsun maḷĕs mriŋ sira, tumĕkaniŋ luhur, namuŋ sahiki kiwala, iṅkaŋ paḍa ṅakṣama mriŋ sisip mami, poma ywa sak iŋ nala.
27. paḍa sun kon lumĕkṣanèŋ sandi, sandènira nĕmpuḥ byatiŋ priṅga, yèn luput nĕrawasaké, sarwi mèsĕm saŋ prabhu, dé kaŋ samya pinariŋ iŋ ṅliŋ, kĕpranan sĕbda nata, samya sru aṅguguk, kabĕḷĕt mijil kaŋ waṣpa, paja paja kaŋ abdi maṅajapa mriŋ, pasihan śri sudigbya.
28. kiraŋ punapa sihirèŋ gusti, iṅkaŋ sampun kapuṇḍi mustaka, cinañcaŋ pucuk kiswané, dasiḥ duk mĕkṣihipun, sudrapapa pinupu gusti, jinuju lir kukila, praptanirèŋ luhur, punapa kaŋ winaḷĕsna, mriŋ saŋ nata kĕjawi bĕḍahiŋ kulit, myaŋ tugĕlé kaŋ jaṅga.
29. datan laṅkuŋ pamujiniŋ dasiḥ, kaŋ sru rinĕṅèŋ sakarènira, tulus ṅabdèkkĕn dasihé, marca dĕlahamipun, myaŋ tulusa mĕṅku ṅrat bhumi, sinihana hyaŋ sukṣma, pamintaniŋ ulun, pinañjaṅna yoswanira, myaŋ tulusa arja kartaniŋ nagari, sakwura wurènira.
30. ulun atur pratignya mriŋ gusti, sahupami iŋ maṅir tan bĕḍaḥ, bĕḍaḥ kĕlawan alusé, suka gadĕbalipun, cinacaha sakbitiŋ bitiŋ, pinañjraha lir kiswa, kaŋ pinara sèwu, śri naréndra ṅliŋ tarima, pra mupaḍa asuŋ pratignya mriŋ mami, nata sarwi rawaṣpa.
31. adipati mandraka sigra ṅliŋ, iṅsun paḍa asuŋ karaharjan, muga ywa na sisikuné, riŋ hyaŋ kaŋ maha luhur, matur nuwun tandya ṅabĕkti, iŋ pada saŋ mĕṅku ṅrat, dèn ajĕŋ pĕmbayun, ri sampunnya gantya gantya, śri naréndra añjuruŋ puja sĕmèdi, tinimbulkĕn kaŋ putra.
32. nata pariŋ sakoṭak kaŋ riṅgid, ṛĕbab suliŋ tĕnapi kaŋ gaṅsa, bĕléñcoŋ tĕnapi gĕndèr, ki bicak gya pinuṇḍut, pan kinarya taṇḍaniŋ sandi, tinĕmbaŋ munya ṅaṅkaŋ, ṅumaṇḍaŋ aṅuṅkuŋ, muluk lir kaṛĕṅèŋ wiyat, kapĕrtaṇḍan kĕlamun uṅgul kaŋ jurit, iŋ maṅir pĕṣṭi bĕḍaḥ.
33. ki bicak tandya pinariŋ mariŋ, saradula wus mranti karyanya, kapya ginañjar artané, ṛĕtna pĕkaja jumrut, pamit ahrĕt tandya lumaris, śri nata aṅandika, mriŋ mandraka gupuḥ, hèḥ ta paman woŋ mataram, uṇḍaṅana sandi ṅulari nak mami, murca sakiŋ kuḍatyan.
34. hèḥ ta paman iŋ ubaya mami, sapa sintĕn sujanma kaŋ wignya, maṅgihakĕn putraniṅoŋ, sayĕkti lamun jatu, kramanira tandya saŋ adi, pati mandraka uṇḍaŋ, mriŋ wadya matarum, myaŋ ḍawuḥ ika pĕtĕṅan, samya kinèn jampaṅi kaŋ lampaḥ sandi, buḍal saguṅiŋ bala.
35. asraŋ gurṇitanirèŋ koswa śri, kasba sébak kaŋ watu siŋ arga, swandana lir aṅgé aṅgé, pajĕŋ krĕṇḍa raratun, pĕnuḥ iṅkaŋ sara mĕrapit, busana warṇa warṇa, lir ujana santun, wus ḷĕpas iŋ lampahira, sraŋ asĕlur mawijaḥ manéka asri, makupu kupu raras.
36. ṅlaruk tĕkap madyèŋ sawodadi, datan liṅĕn kriḍanirèŋ kasba, kunĕŋ kaṅjĕŋ saŋ arajèŋ, kaŋ tansaḥ kyat manuku, maladi niŋ wasésa jati, pinujan taya maya, aṅgandra sukṣma guŋ, purṇa saŋ maṅnuṅku puja, wus kadriya widrawa wasmayèŋ ghaib, ghaibé kraton nata.
3. kinaṇṭi
1. kinaṇṭi tindaknya laju, sira saŋ naréndra siwi, sakmarga marga rawaṣpa, kasraŋ kabĕntèr iŋ rawi, kalintaŋ dènira wuyaŋ, wayaŋ wuyuŋ saŋ sudèwi.
2. kaŋ drawaya adrĕs mĕtu, praptèŋ pipya iṅusapi, miniŋ miniŋ sru kawaṅwaŋ, riŋ saṅsaya milaṅoni, nu kadar añjala dita, duk samana saŋ ṛĕtna di.
3. kèndĕl wrĕsanèŋ wrĕkṣa guŋ, sumraḥ kasiliriŋ aṅin, sumyak swaraniŋ kĕkaywan, tĕmbarané gagrag sami, koṅas rum rumĕsĕp iŋ tyas, sumrambaḥ muryani liriŋ.
4. myaŋ riyoniŋ taru taru, labĕté katur kèn riris, warṇaniŋ kaŋ sĕkar sĕkar, sumĕḍĕŋ amrok nrus miṅiŋ, miṅiṅé maṅrundaḥ iŋ tyas, tyas mahañjum ṛĕjasèŋ siḥ.
5. swaraniŋ pĕkṣi miḷĕt kuŋ, iṣṭané kadya ṅurmati, kusuma kaŋ anraŋ marga, kapyarṣa sahiṅga gĕṇḍiŋ, ri sĕḍĕŋ paṭĕt mañura, rinasa saya ṅañut siḥ.
6. manucuk pala gumantuŋ, lir atur sĕgaḥ saŋ dèwi, gusti gustiku punika, pisugatané kaŋ abdi, karya jampiniŋ marlupa, sumraḥ mriŋ sarira gusti.
7. saŋ dyaḥ wus mrawèndèŋ sĕmu, sakèḥ sĕsmitaniŋ pĕkṣi, paṅèṣṭi asru kawuryan, saŋ dyaḥ kaṛĕnan udani, duk myat rarasirèŋ sĕṇḍaŋ, kinubĕṅan andoŋ wilis.
8. kaŋ sĕkar maṅluŋ mriŋ ranu, tirtanira manrus wĕniŋ, ṛĕsik wĕnĕs manis ñotraŋ, lumraṅiŋ lémbak ṛĕspati, kaŋ mina asĕsliwĕran, winulat tĕka ṅalap siḥ.
9. sihira saŋ ṛĕtnaniŋ rum, saŋ dyaḥ aṅandika aris, hèḥ ta nini adisara, pĕtĕkana sikil mami, ṅĕṭoké kalintaŋ lintaŋ, adisara gya mĕtĕki.
10. sarwi ṛĕṅĕŋ ṛĕṅĕŋ ṅiduŋ, maṅimur trĕñuhiŋ gusti, kinarya ṅariṅkĕn manaḥ, kaŋ manaḥ lir madu kéntir, kéntir wusanané kéntar, kéntaré pinuji puji.
11. pinuji kraharjanipun, arjaniŋ woŋ laku sandi, sandiné ywa kawĕdaka, wĕdakané solaḥ muni, uniné dipun èstokna, paṅèstuniŋ sukmana di.
12. wadiné sinamun samun, pasĕmu kaŋ migĕna siḥ, ṅasiḥ asiḥ prana mulat, manrusi kaŋ sĕja apti, apti naṅgap kyayi ḍalaŋ, sandiguna mèsĕm aṅliŋ.
13. klayu ṛĕṅĕŋ ṛĕṅĕŋ ṅiduŋ, paṅiduṅé miyak puji, hé gusti kaŋ maha mulya, kaŋ sipat samiṅun basir, kaŋ èstu tan kĕsamaran, samobaḥ mosikiŋ dasiḥ.
14. sakiŋ pamintaniŋ ulun, hé gusti kaŋ mugi mugi, aṅgañjara karaharjan, arjaniŋ dasiḥ kaswasiḥ, siḥ marma mriŋ ratu kula, ginapilna kaŋ kinapti.
15. wontĕn maliḥ kañcanipun, sandisasmita ṅraṛĕpi, ṛĕpiné pinujamantra, hé nabiku kaŋ kulihim, magĕlar saréṅatiŋ rat, kaŋ ṅrĕṅga sakèhiŋ ṅèlmi.
16. ṅuyuni jagad sawĕguŋ, muṇḍi wasésaniŋ widdhi, tur kaŋ mĕṅku kodradiŋ hyaŋ, iṅakĕn kaanan tuṅgil, murbani iŋ kaṇḍa warṇa, kawulané nunuwun siḥ.
17. ḷĕstantuna lampaḥ ulun, gèn amba dinutèŋ gusti, sĕdéné gusti kawula, kadugèna kaŋ kinapti, wontĕn maliḥ kañcanira, sandiupaya ṅraṛĕpi.
18. ṛĕpiné nuwun paṅèstu, paṅèstu sinawuŋ puji, kaŋ pinuji walisaṅa, kaŋ winĕnaŋ animbaṅi, adĕgé agama islam, winuri tumĕkèŋ maṅkin.
19. kas gayuḥ tĕḍasiŋ ṅèlmu, hèḥ saguṅiŋ para wali, kaŋ wus pan makripatira, kawula nunuwun idi, ṅidènana tyaŋ ṅumbara, maṅlarug dinutèŋ gusti.
20. mugi ywa kéṅiŋ sisiku, sisikuné lahir batin, kadugèna kaŋ sinĕja, panĕjané lampaḥ sandi, sandiné karṣa naréndra, wontĕn kañcanira maliḥ.
21. saradipa wastanipun, kĕlayu ṅiduŋ raṛĕpi, ṛĕpiné nĕlaṅsa minta, mriŋ saguṅiŋ para mukmin, iṅkaŋ kas maṅonahira, maṅèṣṭi wujudiŋ urip.
22. uripé istiyar mashur, saréṅat tataniŋ bhumi, bhumi éka néka néka, minuraḥ sihiŋ sukma di, pinuji pinujamantra, sinuwun paṅèstuniŋ siḥ.
23. siḥ mriŋ janma andon sirtu, maṅudaya narinastri, trus tumrap mriŋ ratu kula, kaŋ mĕṅku nagri matawis, kadugèna kaŋ kinarṣan, wontĕn kañcanira maliḥ.
24. saradula wastanipun, maṅiduŋ nunuwun kaŋ siḥ, mriŋ saguṅé pra naréndra, kaŋ sinaré tanaḥ jawi, kawula suwun kaŋ barkaḥ, mriŋ janma kaŋ andon laris.
25. kadugèna kaŋ kinayun, gustyamba jĕŋ sénapati, ywa ṅanti maṅgiḥ saṅsara, saṅsarané lahir batin, ya ta saŋ kusumaniŋ dyaḥ, jroniŋ tyas mèsĕm duk myarṣi.
26. sakṣana tindaknya laju, réyoṅan sakmargi margi, wantuné pyayi wanodya, ṛĕṇḍĕt dènira lumaris, sakĕḍap kĕḍap ararywan, dadya tontonan sakmargi.
27. lanaŋ wadon samya dulu, kasmaran winor marmèŋ siḥ, pasihan sinawuŋ sĕbda, ki ḍalaŋ lamun maṛĕṅi, ñipĕṅa wisma kawula, wontĕna dwi lastri kyayi.
28. kawula wĕlas sĕklaṅkuŋ, ḍatĕŋ putra dika kyayi, sĕdéné réñcaŋ paduka, kapiŋ kalihipun maliḥ, maṅké dalu ulun taṅgap, ṅrigida nèŋ wisma mami.
29. kĕpaṛĕŋ mĕrtèni ḍusun, sandiguna anahuri, laḥ kakaŋ kula sumaṅga, wisma paduka iŋ pundi, lan sintĕn nama paduka, namané ḍusun iŋ pundi.
30. iṅkaŋ sinuŋ ṅliŋ gya muwus, yèn dika tanya mriŋ mami, karan anak pak mugiya, darpawaṅsa nama mami, ḍusun manira iŋ mlaraŋ, sandiguna gya nuruti.
31. umaṅkat sakañcanipun, iŋ lastri sampun aṅrigid, tinonton sujanma kaṭaḥ, kaṭaḥ kaṛĕnan udani, kawarta ḍalaŋ nagara, laris dènnya maṅguŋ riṅgid.
32. ḷĕt sĕdalu ḷĕt tri dalu, ki ḍalaŋ iṅundaŋ ṅrigid, iŋ maṅké sampun kasusra, ki ḍalaŋ darbé sutèstri, sayĕkti éndaḥ kaŋ warṇa, warṇa manawaŋ sitèṅsi.
33. samana pan lajĕŋ katur, maraŋ ki agĕŋ iŋ maṅir, ki ḍalaŋ tandya iṅundaŋ, kapéñcut drĕsiŋ pawarti, mriŋ saŋ dyaḥ atmaniŋ ḍalaŋ, ki ḍalaŋ pan sampun prapti.
34. nèŋ tirahiŋ pĕṇḍapa wus, ki agĕŋ maṅir nĕbda aris, namudana manis sumraḥ, sumrambaḥ amikĕnèŋ siḥ, sandiguna nuwun turṇya, kyagĕŋ maṅir maliḥ aṅliŋ.
35. kakaŋ ḍalaŋ dika niku, sintĕn kaŋ pinujwèŋ nami, lan pundi pinaṅkanira, ki ḍalaŋ matur ṅrĕpa siḥ, nama kula sandiguna, asli kula siŋ kaḍiri.
36. ḍèrèk gusti duk rurumuhun, sénapati iŋ kaḍiri, suwita rajèŋ mataram, iŋ sĕmaṅké sampun lalis, kapupu madyaniŋ rana, kaŋ sampyuḥ lan pun pĕsagi.
37. milamba wismèŋ matarum, anaṅiŋ kula kiyayi, sakpĕjaḥnya sénapatya, ṅoŋ nĕja suwitèŋ aji, saŋ nata dahat tan arṣa, pinuriḥ mantuk mriŋ asli.
38. ulun iṅgiḥ nĕja waṅsul, mantuk ḍumatĕŋ kaḍiri, kĕpaṛĕŋ gawat kaŋ marga, priyaguŋ wétan prasami, baris nĕja maṅun yuda, kapiŋ kalihipun maliḥ.
39. kĕpalaŋ tan gaḍaḥ saṅu, baḍé ṅĕmis pyayi nagri, kawula liṅsĕm kalintaŋ, ṅrèḥ sadaya sampun sami, prikṣa ḍumatĕŋ kawula, ṅoŋ pilahur baraŋ riṅgid.
40. mriŋ sakantéroniŋ ḍusun, sadaya kaŋ dèrèŋ uniŋ, sampuna paduka datan, ṅoŋ blakani kaŋ sayĕkti, awrat tĕmĕn tyaŋ tinilar, mriŋ gusti kuwaḷĕdan siḥ.
41. kyagĕŋ wlas mèḥ mijil kaŋ luḥ, wusana sinamur iŋ ṅliŋ, kakaŋ ḍalaŋ sun miminta, pakaryanta mayaŋ riṅgid, wontĕna wisma kawula, sandiguna ṅliŋ mèstuti.
42. cinarita sampun dalu, iŋ priṅgidan tata riṅgid, paṅgĕndèré adisara, déné saŋ naréndra siwi, ḷĕṅgaḥ nèŋ wuriniŋ ḍalaŋ, sahiṅga putra pribadi.
43. déné iṅkaŋ nabuḥ kĕmpul, sandiupaya mantĕsi, saradipa nabuḥ kĕṇḍaŋ, sandisasmita mucuki, ri sampunnya pinucukan, sandisasmita gya ñuliŋ.
44. ṅraṅkĕp lan paṅĕrbabipun, saradula kaŋ ṅĕnoṅi, gya ṅuyu uyu sapisan, pantĕs gĕṇḍiŋ gambirṣawit, ṛĕspati kaŋ laras saṅa, mukĕt ṅlĕñĕt arum manis.
45. wusnya ṅuyu uyu suwuk, sandiguna nuli ṅriṅgid, lampahané pĕkukuhan, suluk tanduké ṛĕspati, cĕṭa trampil pĕmayaŋnya, nibani larasiŋ gĕṇḍiŋ.
46. wiramanira aruntut, tan ana brĕñjul saṭiṭik, ṛĕbabé kumrampyaŋ araŋ, suliŋ sumlĕṭit dumĕliŋ, gĕndèré tansaḥ ṅĕpiñjal, kĕmpulé aṅgĕmak muni.
47. kĕṇḍaṅé gilig tinabuḥ, kĕnoŋ goŋ gandĕm kapyarṣi, cumèplĕs tibèŋ wirama, pĕnabuhé ukur ririḥ, supaya critaniŋ ḍalaŋ, aywa kasiḷĕp iŋ gĕṇḍiŋ.
48. amlĕŋ rumĕṅĕŋ kapruṅu, déné larasé kaŋ gĕṇḍiŋ, laras nĕm jĕjĕr piŋ tiga, praptèŋ gara gara ganti, ṛĕspati kaŋ laras saṅa, suda sakpaṭĕt ṅañut siḥ.
49. praptèŋ jĕjĕr gandruŋ gandruŋ, larasé iṅkaŋ gumanti, mañura tumĕkèŋ éñjaŋ, suda sakpaṭĕt ṅĕrṣĕpi, tumprapé woŋ ḍĕmĕn sastra, laras nĕm iku upami.
50. lir janma kaṛĕnan ṅiduŋ, laras saṅa pan wus kadi, wruḥ tĕgĕsé kawi jarwa, laras mañura upami, rampuŋ kawi rampuŋ makna, gandĕm praptaniŋ rahsa di.
51. kunĕŋ maliḥ kaŋ winuwus, guṅiŋ janma kaŋ niṅali, néka néka kaṛĕnannya, ana ṛĕna ṅèkṣi riṅgid, lakoné ramé kawuryan, sĕmbada ḍalaṅé wasis.
52. ñĕpéplaŋ aṅgoné naruŋ, aké wayaŋ gandĕs trampil, kĕpraké wĕsi kumĕpyak, kumĕrcĕk yèn muni ririḥ, ṛĕpiŋ gĕṇḍiŋ gĕndèr munya, binaruŋ suluk dumĕliŋ.
53. mĕmĕs ṅlĕñĕt manis arum, rumĕsĕp amigĕna siḥ, kĕñamé luwĕs prak atya, myaŋ ana ṛĕna umyarṣi, iŋ gĕṇḍiŋ maṅéñut manaḥ, awit sakiŋ paḍa wasis.
54. wasisé niyaganipun, niyagané bĕcik bĕcik, jlagĕḍag paḍa prawira, kabèḥ moñcol moñcol sami, pĕnabuhé paḍa rampak, déné ki agéŋ iŋ maṅir.
55. nèŋ pĕṇḍapa dènnya dulu, tan liya kaŋ dén tiṅali, namuŋ atmané ki ḍalaŋ, warṇané ṛĕsik tur kuniŋ, ayu sumèḥ pasĕmunya, trus jĕtmika nukṣmèŋ galiḥ.
56. nétrané liyĕp malat kuŋ, kuwaṅwaŋ pamĕḍariŋ ṅliŋ, ṅliŋ swara rum manis sumraḥ, sumrambaḥ amikat iŋ siḥ, jutiniŋ karya wigĕna, mĕrkĕtĕs gandĕs prak ati.
57. tansaḥ gawé lara gandruŋ, woŋ ayu kaŋ cĕḍak ṅriṅgid, liriṅé lir digbya patya, sunariŋ waja duk kéṅis, lir kilat ṭaṭit liwĕran, sumawur amilaṅoni.
58. muŋ saṭiṭik kuraŋ bĕsus, prataṇḍa yèn duruŋ laki, ṅiŋ wus koṅas kaŋ ujwala, woŋ ayu nora jĕlèhi, wusananira kagiwaŋ, tyasira ki agĕŋ maṅir.
59. ṅĕṅlĕŋ ḷĕsaḥ kaŋ jiwa mur, baluŋ kadya dèn lolosi, lir linĕḷĕs jroniŋ manaḥ, kaŋ manaḥ wus goñjaŋ gañjiŋ, kĕkĕtĕgé salaŋ tuñjaŋ, ṛĕbut ḍucuŋ tiŋ saruwiŋ.
60. kadya pĕḍot kaŋ jajantuŋ, kĕsabĕt purṇamasidi, gumyur tan panon biratya, liwuṅiŋ cipta sébak nir, atatas nratas kabuntas, ajur mumur rontaŋ rantiŋ.
61. samana bubaran sampun, ki ḍalaŋ dènira ṅriṅgid, iṅundaŋ maraŋ pĕṇḍapa, karṣané ki agĕŋ maṅir, sinuṅan boga busana, kĕbulan myaŋ sinuŋ picis.
62. tri dasa réyal kèhipun, ki agĕŋ kañinèŋ liriŋ, dènnya ṅĕmpèk ĕmpèk karṣa, mriŋ ki ḍalaŋ rumakĕt siḥ, wusana arum dĕliŋnya, kakaŋ ḍalaŋ sun tĕtèki.
63. iŋ sayĕktos yĕktosipun, laré èstri iṅkaŋ liṅgiḥ, wontĕn wuri jĕṅandika, andika prĕnaḥ punapi, punapa atma myaŋ waṅsa, tuwin réñcaŋ kaŋ sayĕkti.
64. sandiguna aris matur, sayĕktosé atma mami, duk mĕkṣihé sénapatya, laré lahiran kaḍiri, kyagĕŋ maṅir maliḥ nĕbda, walèḥ walèḥ napa kyayi.
65. anak andika puniku, prawan punapa wus laki, sandiguna aris nabda, tĕkṣiḥ pĕrawan puniki, dèrèŋ wontĕn iṅkaŋ dadya, kĕpaṛĕŋ sĕnĕṅiŋ kapti.
66. witné ṅuni purwanipun, kaṭaḥ janma kaŋ sĕdyapti, jawab ḍumatĕŋ atmanta, naṅiŋ pun rara tan apti, dèrèŋ purun imaḥ imaḥ, laré pugal aṅlaṅkuṅi.
67. yèn tinantun baḍé ṅlalu, ṅoŋ tan sagĕd mĕkṣa kyayi, laré dama sudrapapa, milaṅoŋ uguŋ sakapti, kyagĕŋ maṅir aris nĕbda, yèn sarju dika kiyayi.
68. anak andika puniku, sun tĕḍa kinarya rabi, sandiguna aris nĕbda, yèn kyayi sudi aṅambil, mupu ḍatĕŋ tyaŋ ṅumbara, tanpa wisma dama miṣkin.
69. sumaṅga sakarṣanipun, yèn laré purun ṅlampahi, yèn tan purun sampun duka, laré pugal aṅlaṅkuṅi, guṅaŋ laré puguŋ muḍa, kawula dama mriŋ siwi.
70. kaŋ guŋ paṅakṣamanipun, kiyayi ḍumatĕŋ mami, kyagĕŋ maṅir rum sĕbdanya, sampun mawi walaŋ kapti, yèn putra dika wus arṣa, dadya jatukrama mami.
71. dika tumuta ḍuḍukuḥ, tĕtĕpa wisma nèŋ ṅriki, sandiguna arum nĕbda, kawula laṅkuŋ mèstuti, tan winarṇa duk samana, saŋ rara sampun pinaṅgiḥ.
72. bogadrawinanya klaṅkuŋ, ḍalaŋ sandiguna ṅriṅgid, lampahan suwarga baṇḍaŋ, duk srikaṇḍi dadya riṅgid, maharṣèŋ pura ṅaḷĕṅka, kunĕŋ maliḥ kaŋ winarṇi.
73. kyagĕŋ maṅir lan saŋ ayu, kaŋ anèŋ pasuptan miṅiŋ, dyaḥ duk arṣa rinaṛĕpa, rinubasaniŋ aṛĕsmi, saŋ ṛĕtna kĕkaḥ tan arṣa, tĕmaḥ rujit tyas rudatin.
74. locananya adrĕs mĕtu, pitĕkur prayitnèŋ wèṣṭi, kyagĕŋ maṅir aris nĕbda, rumĕsĕp dènnya mintasiḥ, maṅimur raras wirama, luwĕs maṅrayut sukèŋ siḥ.
75. ḍuḥ miraḥ pupujaniṅsun, kaŋ asawaŋ rumiŋ sari, sariniŋ wulan purṇama, pinuja dadi mas gusti, gusti kaŋ pinuja braṅta, braṅtani ḍatĕŋ kaŋ abdi.
76. tuhu muṣṭikaniŋ arum, rumaṅsuk sriranta gusti, sakèḥ sarkaraniŋ patma, manisé manukṣmèŋ laṭi, sĕḍĕpé karya wigĕna, ganĕp wilaṅaniŋ bĕcik.
77. bĕciké kĕlaṅkuŋ laṅkuŋ, kadi murcani paṅèkṣi, èkṣiné winayaṅkara, kĕrantĕné manaḥ kiṅkin, kiṅkiné nukṣmèŋ paduka, paduka ñawané dasiḥ.
78. punapa kaŋ dadya ṛĕṅu, dé tansaḥ ṅĕmu rudatin, datan arṣa ñarwé sĕbda, apa kaŋ dadya suwadi, ḍuḥ naḥ aṅgèr paran baya, tan wĕlas mriŋ woŋ guŋ kiṅkin.
79. parikudu jiwaniṅsun, wanuḥ lawan sira gusti, wĕnaṅna campuran sĕbda, aṅgèr manira puniki, kabyatan asmarèŋ braṅta, tan antuk ḍahar myaŋ guliŋ.
80. purwa tiṇḍaniŋ wulaṅun, duk sira ñĕlaki ṅriṅgid, muryani kiswa katujwa, naḥ aṅgèr sun ṅĕṅlĕŋ ṅèkṣi, lir rinujit rahosiŋ tyas, tatas rantas rontaŋ rantiŋ.
81. sakduruṅé sira rawuḥ, rahosiŋ tyas pan upami, lir taru griŋ kamitigan, kĕpraban bĕntèriŋ rawi, kalintaŋ dènira wuyaŋ, saṛĕŋ iŋ maṅké wus paṅgiḥ.
82. sébak linawat jawaḥ rum, sumrahé gariŋ paṅèṣṭi, lir katiban akṣa naba, gya saŋ kusumaniŋ adi, nĕbda srĕt ṅusapi waṣpa, kiyayi kula tur uniŋ.
83. kula puniki sahèstu, dédé ḍalaŋ kaŋ yĕyogi, ṅoŋ puniki putra nata, kaŋ mĕṅku nagri matawis, marginé kawula késaḥ, tinantun krama sudarmi.
84. kawula dahat tan ayun, wusana duka rama ji, kawula pilahur pĕjaḥ, aṅlès murca sakiŋ puri, ṅlaṅut ṅumbara kasyarṣa, duk prapta madyèŋ wanadri.
85. tumuntĕn pinĕṇḍĕt sunu, ḍatĕŋ sandiguna ṅuni, surahosé manaḥ kula, lir taru kakéntir wariḥ, kéntaré tanbuḥ sinĕja, dumadya prapta iŋ ṅriki.
86. iŋ maṅké paduka puṇḍut, kinarṣanan dadya krami, kawula datan ḷĕṅgana, kaṅjĕŋ rama tan udani, kĕlamun èstu paduka, sudi mupu ḍatĕŋ mami.
87. ṅiŋ wontĕn panuwun iṅsun, tuwan sagĕda sumiwi, mriŋ rama aji mataram, yèn dika èstu ñagahi, sakiŋ paminta kawula, kawula sumaṅgèŋ karṣi.
88. sakarṣa dika maṅèstu, pada tumĕkaniŋ pati, jiwamba lir saraḥ tirta, lumémbak purbaniŋ laki, sakarṣa karṣa paduka, sayĕkti kula ladosi.
89. yèn paduka datan arju, ṅabĕkti rajèŋ matawis, kawula dahat ḷĕṅgana, kinarṣanan dadya krami, sampun kaŋ sakit sĕnadyan, tĕkèŋ pati sun aṇḍĕmi.
90. ajriḥ durakèŋ hyaŋ aguŋ, duraka ḍatĕŋ sudarmi, anaṅiŋ paṅrahos kula, lamun jĕŋ rama udani, kaguṅan mantu paduka, sun dugi ṛĕna iŋ galiḥ.
91. rèhné ṅuni jiwaniṅsun, tinantun krama tan arṣi, iŋ maṅké wusananira, kawula purun ṅlampahi, iba biṅahé jĕŋ rama, śri nata mataram béñjiŋ.
4. sinom
1. sĕkala aṅlĕk kaŋ driya, ciptané ki agĕŋ maṅir, kapriyé wusananira, sun iki kalané ṅuni, tan sumiwi matawis, iba dukané saŋ prabhu, lir satru kabuyutan, sakmédraniŋ tanaḥ jawi, wus sumuyut sumiwi rajèŋ mataram.
2. namuŋ kari jĕnĕŋ iṅwaŋ, kaŋ tan nĕja maṅèstuti, duk iŋ kuna kunanira, luluhurku tan sumiwi, iŋ pajaŋ myaŋ matawis, praptèŋ mĕṅko jiwaniṅsun, wus ubaya tan nĕja, sumiwi rajèŋ matawis, nora bléna nora manut maraŋ nata.
3. awit sun darbé pusaka, tumbak kyayi barukupiŋ, sapa kaŋ klar naḍahana, sayĕkti iṅsun mèstuti, manĕmbaḥ myaŋ sumiwi, sakiki upamaniṅsun, sun ṅrĕṅèŋ mriŋ mataram, awit siŋ putraniŋ èstri, kaŋ pĕrtaṇḍan dadya jatukramaniṅwaŋ.
4. iya yèn saŋ nata arṣa, ṅukup ṅaṅgĕp maraŋ mami, sinĕbut mantu naréndra, yèn maṅkono luwiḥ gampil, tan ana walaŋ ati, sumiwi rajèŋ matarum, naṅiŋ lamun tan arṣa, ṅukup ṅaṅgĕp maraŋ mami, iŋ wusana jiwamba tumĕkèŋ léna.
5. jĕr iṅsun iki ṅibarat, kĕlawan rajèŋ matawis, pañjaŋ pĕcaḥ wastra bĕḍaḥ, jinuma mĕkṣiḥ gĕligir, dèn añcura lapis tri, yèn sun rasa purwanipun, kaya ta mĕkṣiḥ jahat, namuŋ énaké saṭiṭik, yèn saŋ ṛĕtna tulus dadi garwaniṅwaŋ.
6. aṅgĕr paṅĕmoṅku bisa, ṅladèni baraŋ sĕkawis, sarta saŋ ṛĕtna sun duta, nunuwun sihé saŋ aji, ṅapura awak mami, sayĕkti saŋ nata kolur, siḥ maṅaṅgĕp mariṅwaŋ, jĕr mantu iku upami, lamun wignya maṅĕmoŋ mriŋ atmanira.
7. pĕṅaṅgĕpé maratuwa, wus kadi putra pribadi, mokal saŋ nata karṣowa, matèni mantu kaŋ bĕcik, sasat matèni siwi, kaŋ dèn ĕmoŋ anak mantu, iku slokaniŋ kuna, wusana ki agĕŋ maṅir, aṅraṛĕpa arum wijiliŋ wacana.
8. déwané kaŋ para saŋ dyaḥ, mundriné kaŋ abdi gusti, sampun mawi walaŋ driya, yèn mĕkatĕn jiwa mami, kabĕkjan aṅsal putri, jimat tuṅguliŋ apsantun, maṅgiḥ putra naréndra, ḍasarira ayu luwiḥ, ciptaniṅsun sokur muṅguhiŋ hyaŋ sukṣma.
9. jiwoṅsun katur kèn jimat, mĕṅgala lélatul kadri, tan laṅkuŋ panuwun iṅwaŋ, mriŋ paduka woŋ akuniŋ, pariṅa usadèŋ siḥ, maṅèkṣi dasiḥ kaswayun, sakarṣa karṣanira, gusti pun dasiḥ mèstuti, tumut manut miturut ḍatĕŋ mataram.
10. sumiwi śri naranata, sénapati ṅalaga ji, saŋ ṛĕtna ḷĕjar sĕkala, kĕtara kilatiŋ liriŋ, liriṅé maṅalap siḥ, dilalaḥ karṣèŋ hyaŋ aguŋ, kĕpaṛĕŋ lan maṅsanya, saya jĕmbar iŋ matawis, kyagĕŋ maṅir kaṛĕñcana éblis lanat.
11. kagébaŋ asmaraniŋ dyaḥ, dyaḥ kaŋ tansaḥ mumulut siḥ, pan wus wantuné wanodya, ṅĕnirkĕn wékaniŋ kapti, ṅĕnirkĕn laku surti, kasujananira luput, kosul sulaṅiŋ nalar, nalaré muŋ ṅrĕmbug ṭukniŋ, ati sumpĕk buntĕt pĕpĕt budènira.
12. kapintĕrané sirṇa das, labĕté woŋ kuraŋ luwiḥ, liwuŋ lali iŋ sabaraŋ, purwa wusana tan kèṣṭi, muŋ ṅèṣṭi tlĕṅiŋ braṅti, ki agĕŋ maṅir puniku, iŋ ṅuni naṅgap wayaŋ, wayaṅé wisa martani, blécoŋ mati ḍalaṅé amakan tuwan.
13. mula mula kaŋ sujana, lalakon dèn ṅati ati, sĕbaraŋ kaŋ alus ḷĕmbat, ywa kaya ki agĕŋ maṅir, labĕté kuraŋ luwiḥ, groboḥ kasar tĕmaḥ bawur, bawur kuwur kĕtawar, tawar kĕtawur kĕtali, wujudiŋ woŋ pikiré lir kumalasa.
14. kyagĕŋ maṅir duk waṣpada, kilat liriṅé saŋ dèwi, ṅina koṅasiŋ ujyala, alon dènira ṅraṛĕmiḥ, ḍuḥ gusti saŋ dèwèstri, tur kaŋ èstu rumiŋ santun, sawaŋ purṇamasada, maṅléla mañcur dumĕliŋ, ḍasar ayu sĕmbada putra naréndra.
15. naréndra iŋ tanaḥ jawa, jawané paduka gusti, gusti kaŋ pinujamantra, mriŋ dasiḥ kaŋ sru kaswasiḥ, sihiŋ gusti kapuṇḍi, sinĕmaṅkara mawèḥ kuŋ, tulusa ṅèstupada, iŋ doña praptaniŋ akir, samantara maṅrĕṅèŋ pasihan dika.
16. pinĕgat ṛĕṅganiŋ gita, pĕgagatirèŋ karon siḥ, wĕlèḥ lamun jinarwakna, maṅsaboroŋ kaŋ pĕṅgaliḥ, ṅrèḥ wus paḍa ṅraṅgoni, paṅolaḥ pudyèŋ raras kuŋ, kyagĕŋ maṅir samana, sabakdanira karon siḥ, maglur tanpa mosik dènira anéndra.
17. saŋ kusuma gya tumĕḍak, siŋ paprĕman èsmu ririḥ, kahétaŋ wĕliṅiŋ rama, sadaya wus dèn lampahi, ñaṇḍak ki barukupiŋ, ṅusapan tirta pulaṅyun, lan lisaḥ iŋ didiyan, ki baru ṅadĕg mawalik, sru ñuwara maṅakak sahiṅga sarpa.
18. yèn muṅguha janma kadya, nĕja maṅruraḥ saŋ dèwi, sĕrambut datan kumĕḍap, iŋ driya saŋ kusuma di, pujamantra pinuṣṭi, linaŋ sukṣma sarira mur, jumbuḥ muṣṭika maya, surasa siḷĕm jĕladri, tuduḥ palal ki baru waṅsul mriŋ prĕnaḥ.
19. saŋ ṛĕtna gya nusul néndra, iŋ dalu datan winarṇi, byar rahina surya muñcar, saŋ kaliḥ mriŋ kubonsari, wusnya gagandan sami, saŋ kaliḥ atata luṅguḥ, iṅayap para kĕña, bojon bĕkĕl aṅladosi, kyagĕŋ maṅir abiṅar niscayanira.
20. karṣa wus maṅéka budya, mriŋ saŋ dyaḥ kaŋ miṇḍa ratiḥ, sinamun mĕkṣa kawĕntar, nétrané woŋ éṅgar kapti, adisara tan tĕbiḥ, kaŋ tansaḥ nanduki tĕmbuŋ, tĕmbuṅé ṅuṅgar braṅta, ki agĕŋ saya limut siḥ, kaprĕnésan kaŋ manaḥ buru aḷĕman.
21. kĕmrisik rada kagétan, ki agĕŋ gya matur aris, mriŋ saŋ kusumaniŋ éndaḥ, laḥ kantuna gusti mami, pun dasiḥ yun papaṅgiḥ, lan sandiguna woŋ ayu, sakĕḍap mriŋ pĕṇḍapa, sawusnya dipun lilani, tandya mijil wus paṅgiḥ lan kyayi ḍalaŋ.
22. ki agĕŋ maṅir tatanya, wĕcanaa kaŋ sayĕkti, laré kaŋ nèŋ jroniŋ wisma, kaŋ sampun kĕrabi mami, napa anak sayĕkti, punapa pupon karuhun, sandiguna garjita, jroniŋ tyas sampun andugi, yèn saŋ ṛĕtna kaŋ mĕḍar niṣkaranira.
23. dadya nĕrusi kiwala, wusana maṅsuli iŋ ṅliŋ, sayĕktosipun punika, anak gèn kawula maṅgiḥ, wontĕn madyèŋ wanadri, kĕpaṛĕŋ saŋ ṛĕtnaniŋ rum, lagya maṛĕṅi tapa, tumuntĕn kula takèni, sintĕn iṅkaŋ susuta pinaṅkanira.
24. tan sĕtya kaŋ darbé atma, lola duk kalané alit, bapa biyuŋ sampun ṅajal, mila kula ambil siwi, kyagĕŋ mèsĕm jro galiḥ, sĕmu ñata sĕbdanipun, iŋ tyas marwata suta, ki agĕŋ maliḥ nĕbda ris, yèn iŋ maṅké pun rara sampun sawĕca.
25. kakaŋ ḍumatĕŋ kawula, ṅakĕn putra iŋ matawis, jĕŋ sénapati ṅalaga, ḍalaŋ sandiguna aṅliŋ, kagèt kinardi kardi, gĕgĕtun amaṇḍuk maṇḍuk, grayok wijiliŋ sĕbda, dados puniku kiyayi, putranipun jĕŋ sénapati ṅalaga.
26. sahiba biṅaḥ paduka, kyagĕŋ maṅir ñablèk wĕntis, nĕbda iṅgiḥ piŋ sĕkawan, iṅgiḥ iṅgiḥ iṅgiḥ iṅgiḥ, sandiguna ṅrojoṅi, sakkañca pañjak sĕdarum, ṅubyuṅi suka biṅaḥ, biṅahira ṅrogoḥ ati, kyagĕŋ maṅir nĕbda sru gawok kawula.
27. kakaŋ ḍumatĕŋ paduka, sakĕḍika kok tan uniŋ, sandiguna rum sĕbdanya, iṅgiḥ kok kula tan uniŋ, sĕdéné dara gusti, laminé sun ṅakĕn sunu, kĕkĕt tĕmĕn kaŋ karṣa, kĕlamun kula takèni, datan ṅakĕn muŋ ṅakĕn tiyaŋ ṅumbara.
28. iŋ ṅuni lamun prikṣaa, kĕlamun putra narpati, botĕné ṅoŋ pĕṇḍĕt suta, lajĕŋ sun puñjuṅkĕn mriki, kados kimawon kyayi, ayunya kĕlaṅkuŋ laṅkuŋ, lir murca kinĕḍèpna, sĕjagad tan aṅsal kaliḥ, muŋ saŋ ṛĕtna kaŋ dadya guruniŋ kĕña.
29. sĕsotyaniŋ pramudita, kumaraniŋ adi luwiḥ, nukadarirèŋ bhuwana, tan laraŋ dèn tohi pati, paṭoknya muŋ kiyayi, kaŋ bĕkja aṅumbuk umbuk, maṅgiḥ putra naréndra, pinuja ratuniŋ ratiḥ, upaminé lir maṅgiḥ ṛĕtna sakarga.
30. upami dipun suwuna, dèrèŋ kantĕnan yèn kéṅiŋ, paribasan woŋ nèŋ wisma, ḷĕṅuk ḷĕṅuk nĕmu ḍuwit, ḍuwit saḷĕkṣa kampil, isi ukon mas sĕdarum, mriŋ sawaḥ nĕmu miraḥ, mirahé sakĕṇḍi kĕṇḍi, matun gaga kabĕkjan maṅgiḥ saŋ ṛĕtna.
31. ṛĕtna kaŋ ṛĕginya kaṭaḥ, kyagĕŋ maṅir nĕbda aris, duk dika guṅguŋ kawula, lir maṅgiḥ ṛĕtna sakwukir, puniku tĕkṣiḥ kĕḍik, upaminé manaḥ ulun, maṅgiḥ ṛĕtna nĕm arga, kaŋ sami ardi marapi, ḍalaŋ sandiguna mèsĕm iŋ wardaya.
32. kabĕḷĕt sinambi mucaŋ, sinamun lakuné sandi, kyagĕŋ maṅir saya lataḥ, lataḥ gumujĕŋ wor aṅliŋ, kakaŋ lamun suwawi, sumiwi rajèŋ matarum, ṅaturakĕn saŋ ṛĕtna, yèn karṣa ṅabdèkkĕn mami, lan yèn karṣa ṅaṅgĕp mantu mriŋ kawula.
33. kawularṣa lajĕŋ ñĕmbaḥ, ṅujuŋ dlamakan saŋ aji, sandiguna rum sĕbdanya, yèn sakiŋ pandugi mami, kados lamun maṛĕṅi, saŋ nata kaguṅan mantu, iṅkaŋ kadi panuka, ṅupados punapa kyayi, yèn nampika mantu jlagĕḍag prawira.
34. jĕr ṅuni ulun miyarṣa, tĕmbaŋ rawat rawat kyayi, titir pinajarkĕn janma, ujaré sujanma alit, saŋ nata laṅkuŋ ṅudi, ṅupadya mantu kaŋ bagus, tur kaŋ sĕmbadèŋ karṣa, ki agĕŋ saya sukantiŋ, duk miyarṣa pĕmbataṅé sandiguna.
35. sĕkṣana muṇḍut taḍahan, pisugataña mĕpĕki, sandiguna kĕmbul buktya, sĕkañcané pañjak sami, sinambi ujuŋ iŋ ṅliŋ, sakpamicaranya runtut, alusé ṅlantraḥ ṅlantraḥ, wasisé jĕŋ sénapati, mĕḍaŋ gusi datan kĕna labènira.
36. tuhu ratu santya budya, swarjana raja di murti, sĕbda rum murcitan taya, sébak ambariŋ kasturi, koṅas paṅribawa siḥ, sakmédraniŋ rat tumĕluŋ, sumuyut mèstupada, miguna iŋ agal ṛĕmpit, palgunèŋ tyas tuhu muṣṭikaniŋ jagad.
37. sinukṣwarjèŋ kasba tantra, paṅlĕmbananira ṅĕntiŋ, mashur kramaté saŋ nata, murba mrabani mamanis, ilham kéblatiŋ puji, sumuṅkĕm maraŋ sukṣma nrus, digbya tan gara goda, sidik iŋ pĕṅaraḥ ririḥ, dikarèŋ rat pusakèŋ nagri mataram.
38. maharjwèŋ budya nalimpat, luhur mulya ṛĕjasèŋ siḥ, añjum puji ṅrubasèŋ dyaḥ, winayaŋ nukadar amrik, bagna sinaṅja murti, mulku rumiŋ triloka nrus, mudya kriḍaniŋ kasba, surambĕk putus mikat siḥ, wijayèŋ tyas wiranuŋ kyat murtiniŋ rat.
39. kunĕŋ maliḥ kaŋ winarṇa, iṅkaŋ lagya kĕmbul bukti, sawusnya gya linorodan, ki agĕŋ maliḥ nĕbda ris, kakaŋ lamun maṛĕṅi, gya maṅkat ḍatĕŋ matarum, sasdiguna manĕbda, kawula laṅkuŋ juruṅi, lawan ulun aṇḍèrèk tindak paduka.
40. ri sampunnya luluwaran, ki agĕŋ uṇḍaŋ mriŋ dasiḥ, kulawaṅsa anom tuwa, sadaya samya kinĕrig, upacara tan kari, taṇḍu jaran myaŋ pipikul, jajarané saŋ ṛĕtna, tĕnapi kaŋ oliḥ oliḥ, iṅkaŋ pañcèn katur śri rajèŋ mataram.
41. tĕnapi kaŋ bulubĕktya, sadaya sampun rinakit, kunĕŋ maliḥ kaŋ winarṇa, sandiguna gunĕm pikir, kĕlawan iṅkaŋ rayi, saradipa kinèn mlaku, rumiyin mriŋ mataram, ḍapur aṅujuki uniŋ, lan ki bacor lampaḥ sandi kadyènira.
42. ñamar iŋ dalu lampaḥnya, ṅrupita datan winarṇi, byar rahina surya muñcar, praptané nagri matawis, laju lumĕbèŋ puri, prapta ṅabyantara prabhu, iṅawé kalihira, woŋ loro sumuṅkĕm siti, ṅaras pada riwusnya mijil aturṇya.
5. mijil
1. ulun gusti kinèṅkèn pun dasiḥ, martalaya kaŋ woŋ, aṅuñjuki prikṣa jĕŋ saŋ maṅrèḥ, yèn iŋ maṅké lampahipun abdi, daḷĕm aṅsal kardi, pun maṅir kapikut.
2. iŋ wisaya upayaniŋ sandi, barkaḥ daḷĕm katoŋ, pan rinèṅrèŋ rèṅrèŋ sadayané, purwa madya iŋ wusana titi, malaḥ maṅké gusti, pun maṅir yun cuṇḍuk.
3. ṅèstupada mriŋ paduka mulki, sakarṣa sumahos, saha ṅuñjukkĕn bulubĕktiné, mriŋ paduka aṅuñjukkĕn maliḥ, putra daḷĕm gusti, dèn ajĕŋ pĕmbayun.
4. śri naréndra laṅkuŋ sukèŋ galiḥ, ḷĕjariŋ wiraṅroŋ, sumiram caṛĕm sumyarjèŋ rumé, kanikmatan manéṅgar sumraḥ mrik, sĕka lami ṅuni, adiniŋ nugraguŋ.
5. sumukiŋ tyas aṅĕmu mamanis, pituluŋ sukṣmanon, śri sudigbya siḥ iŋ hyaŋ pinardyèŋ, duk nirbawa aturirèŋ dasiḥ, wusana nĕbda ris, iŋ saklakonipun.
6. putraniṅsun lan kañcamu sami, apa karahayon, kadwi matur barkaḥ padukajèŋ, datan wontĕn kaŋ malaṅatèni, nata maliḥ aṅliŋ, timbalana gupuḥ.
7. paman mandaraka adipati, mriŋ jroniŋ kuḍaton, warahĕn kĕlamun ana gawé, kaŋ liniṅan nĕmbaḥ lèṅsèr sakiŋ, ṅayunan narpati, mandrakan prapta wus.
8. ḍinawuhkĕn timbalan narpati, sahtiti dutèŋ woŋ, adipati mandaraka agé, gurawalan dènira lumaris, samana wus prapti, ṅayunan saŋ mulku.
9. śri naréndra aṅandika mariŋ, mandaraka alon, hèḥ ta paman tyaŋ kaliḥ praptané, kinèṅkèn pun martalaya adi, pati atur uniŋ, yèn pun maṅir sampun.
10. kapikut kéṅiŋ upaya sandi, yun sumiwi mriŋ ṅoŋ, ṅèstupada tur bulubĕktiné, myaŋ ṅaturkĕn wayaḥ dika yĕkti, hèḥ paman dipati, uṇḍaṅana gupuḥ.
11. sadaya wadyaniṅsun matawis, kaŋ sumĕktèŋ kéwoḥ, iŋ karya yèn prapta ṅayudané, iṅkaŋ samun ywa ṅantya kadĕliŋ, yèn kadĕliŋ dadi, pun maṅir tyasipun.
11. sadaya wadyaniṅsun matawis, kaŋ sumĕktèŋ kéwoḥ, iŋ karya yèn prapta ṅayudané, iṅkaŋ samun ywa ṅantya kadĕliŋ, yèn kadĕliŋ dadi, pun maṅir tyasipun.
12. riṅas tĕmaḥ ṅadĕg surèŋ galiḥ, tan wandé praŋ ṛĕmpon, mandaraka atur sandika gé, iṅuṇḍaṅan wadya guŋ matawis, tan daṅu wus sami, sumĕktèŋ apupuḥ.
13. mandaraka wus tinuṇḍuŋ mijil, lan prawara karo, datan pĕgat tanya tinanya rèḥ, purwa madya tĕkèŋ wusanantiŋ, tri suka sukur mriŋ, muṅguḥ iŋ hyaŋ aguŋ.
14. titi sulaŋ paṅribawaniŋ ṅliŋ, gĕnti winirahos, kyagĕŋ maṅir samana karṣané, ṅrumiyinkĕn duta mriŋ matawis, tur uniŋ saŋ aji, déné kaŋ tinuduḥ.
15. sira ḍalaŋ sandiguna kaṇṭi, siṅajaya kaŋ woŋ, maṅir kabĕnĕr kamituwané, iṅiriŋ woŋ kaliḥ dasa sarwi, awahana wajik, sumĕkta iŋ kéwuḥ.
16. gagañcaṅan lampahira sami, marga tan rinahos, duṅkap prapta iŋ paṅurakané, kunĕŋ gantya śri rajèŋ matawis, ri sĕḍĕŋ miyosi, siniwèŋ wadya guŋ.
17. mĕṅgĕp pinrak ḍaḍampar rukmadi, upacara abyor, èbĕk supĕnuḥ rumiŋ parṇadèŋ, sumawur tĕka minuni sari, sariniŋ sabhumi, maṅas rumiŋ luhur.
18. iŋ kaswarjanan yudanagari, mantar sinékaŋ woŋ, iṅkaŋ manuhara raharjasèŋ, wuryan ṛĕṅgèŋ pĕrdaṅga śri sumrik, jrahiŋ busana śri, maṅémbahi santun.
19. sĕnĕniŋ rat katoṅtoniramsiḥ, guŋ prabhawa katoŋ, patiŋ tléram paniwèn iṣṭané, kyat kumĕñar tĕka milaṅoni, kĕprabaniŋ kèsri, ṅakasa wèḥ wuyuŋ.
20. piraŋ piraŋ ṛĕsminiŋ naya di, dumĕliŋ katoṅton, pêpak saguŋ wadya kaŋ sumiwèŋ, adipati mandraka nèŋ ṅarṣi, pra putra myaŋ ari, aṇḍèr marikĕlu.
21. tan antara wontĕn janma prapti, lampaḥnya tan alon, kèndĕl anèŋ iŋ paṅurakané, iṅkaŋ kaliḥ jujuk wriṅin kadwi, mĕpĕs pasilaniŋ, kawistarèŋ mulku.
22. śri naréndra aṅandika aris, mriŋ gaṇḍèk sĕkaron, bocaḥ gaṇḍèk ṅuméntara agé, titikanĕn sujanma kaŋ prapti, loro nèŋ madyaniŋ, wriṅin déwadaru.
23. sandika gaṇḍèk mĕsat siŋ ṅarṣi, wus cuṇḍuk sĕkaron, ki sanak ṅoŋ cinundaka rajèŋ, dika pundi lan karya punapi, kaŋ tinanya aṅliŋ, ṅoŋ tiyaŋ iŋ ḍusun.
24. cinundaka mriŋ ki agĕŋ maṅir, mriŋ kaṅjĕŋ saŋ katoŋ, ponaŋ gaṇḍèk waṅsul agé agé, prapta katur niṣkara tinudiŋ, śri nata sukantiŋ, sumyak iŋ pasĕmun.
25. wusana rum andikaniŋ mulki, timbalana alon, janma kaŋ nèŋ wriṅin kĕmbar karo, koṅkonané si jĕbèŋ iŋ maṅir, kaŋ gaṇḍèk mĕsat siŋ, ṅayunan saŋ mulku.
26. prapta ḍawuhkĕn timbalan aji, ki sanak sĕkaron, iṅandikan kaṅjĕŋ saŋ amaṅrèḥ, tur sandika caṇṭika wus kérid, prapta byantara ji, gĕpaḥ awotsantun.
27. muka sumuṅkĕm lir ṅaras siti, gupita saŋ katoŋ, bocaḥ sira umatura agé, kinoṅkon apa maraŋ si maṅir, ponaŋ duta nuli, nĕmbaḥ aturipun.
28. ulun gusti kinèṅkèn pun dasiḥ, kuñjuka saŋ katoŋ, sahiŋ sĕmbaḥ pun maṅir wiyosé, nèŋ ḍasariŋ padanta saŋ mulki, gupita saŋ aji, ya tarima iṅsun.
29. ponaŋ duta gya umatur maliḥ, mriŋ kaṅjĕŋ saŋ katoŋ, yèn maṛĕṅi karṣa padukajèŋ, abdi daḷĕm pun maṅir sĕdyapti, maṅèstupada ji, myaŋ ṅuñjuki lampus.
30. pĕjaḥ gĕsaŋnya pun abdi gusti, kuñjuka saŋ katoŋ, myaŋ ṅuñjuki parikṣa wiyosé, yèn abdi daḷĕm pun maṅir maṅgiḥ, wanodya yu luwiḥ, ṅumbara kaswayun.
31. sawĕca putra paduka mulki, rum arumiŋ sinom, radèn ajĕŋ pĕmbayun namané, lamun èstu putra paduka ji, pun maṅir sĕdyapti, sumiwi saŋ prabhu.
32. aṇḍèrèkkĕn putra paduka ji, gupita saŋ katoŋ, mula putraniṅsun sayĕktiné, purwanira iṅsun tari krami, ḷĕṅgana iŋ kapti, wusananira mur.
33. siŋ jro pura dahat sun ulati, madyaniŋ wana groŋ, jajaḥ désa amilaṅkoriné, ṅĕbo laku añjalak pandĕliŋ, mĕkṣa tan pinaṅgiḥ, iŋ wusananipun.
34. tinĕmu maraŋ si jĕbèŋ maṅir, sakĕṭi sukèŋ ṅoŋ, trima sokur muṅguḥ hyaŋ sukṣmané, lan bésuk apa goné sumiwi, si jĕbèŋ maṅir mriŋ, nagara matarum.
35. yèn wis karuhan goné sumiwi, maraŋ ṅarṣaniŋ ṅoŋ, sun kon mĕṭuk saduluré kabèḥ, lawan paman pamanira sami, anèŋ margi margi, tĕnapi wadyèṅsun.
36. duta matur mriŋ kaṅjĕŋ saŋ aji, sumiwinya kaŋ woŋ, béñjiŋ dintĕn ṛĕspati manisé, nata nĕbda muliha tumuli, gya ginañjar picis, tri dasa réyal wus.
37. myaŋ busana duta mĕsat nuli, siŋ ṅayunan katoŋ, gupuḥ prapta iŋ paṅurakané, maṅkat mantuk sakkañcanya sami, ya ta jĕŋ saŋ aji, duk sapuṅkuripun.
38. ponaŋ duta nata ṅandika ris, mriŋ mandraka alon, hèḥ ta paman uṇḍaṅana kabèḥ, ri ṛĕspati kaŋ sumĕktèŋ jurit, myaŋ kaŋ pañcèn sami, mĕṭuk putraniṅsun.
39. dèn pataha sakjawiniŋ nagri, bagénĕn ponaŋ woŋ, lan wadyèṅsun kaŋ ṅulari kabèḥ, timbalana mantuk mriŋ matawis, sandika dipati, mandraka uṇḍaŋ wus.
40. animbali wadya kaŋ tinudiŋ, ṅulari saŋ sinom, duk samana kaṅjĕŋ saŋ arajèŋ, jĕṅkar kondur amañjarèŋ puri, ginarbĕg pra cèṭi, pasowan kapuṅkur.
6. paṅkur
1. duk prapta iŋ daḷĕm pura, śri naréndra pinĕṭuk mahèswari, sumuk éṅgariŋ pasĕmun, rumiŋ ujwala koṅas, téjaniṅrat manoniŋ tawaŋ dipa nrus, rumĕsĕp sru kanikmatan, nikmatiŋ siḥ sukmana di.
2. pra garwa éṅgar sadaya, duk uniṅa kilat liriṅiŋ aji, upamanya lampaḥ dalu, kapĕṭuk obor mubyar, myaŋ lir maṅsa katri katur kèn jawaḥ rum, siram siram sru kaṛĕnan, manis sumraḥ maṅĕrṣĕpi.
3. wimbuḥ duk pinariŋ wikan, riŋ saṅsaya maṅémbaḥ sukèŋ galiḥ, kaŋ sawĕnèḥ para arum, suka winor rawaṣpa, sru kagagas kusuma kaŋ andon sirtu, pinurwa wasésèŋ praja, kadrĕsan iŋ madu riris.
4. kunĕŋ pasowan iŋ jaba, wus bubaran suḍiya iŋ ajurit, gambira ṛĕna surèṅgul, sébak wikridita byat, maṛĕm kadya ginala sasolahipun, sumĕkta ya ta kawarṇa, wadyabala iŋ matawis.
5. iŋ ṅuni iṅkaŋ dinuta, lampaḥ sandi ṅupaya saŋ ṛĕtna di, wus mantuk praptèŋ matarum, laju suḍiyèŋ yuda, alap alap kaŋ maṅka pĕṅañjuripun, kunĕŋ maliḥ kawuwusa, duta kaŋ sakiŋ matawis.
6. sakmarga asasandĕran, lampahira iŋ maṅir sampun prapti, katur niṣkara iṅutus, myaŋ wawĕliṅiŋ nata, sakṣukanya naréndra pan sanpun katur, ki agĕŋ sĕklaṅkuŋ suka, sĕkṣana ṅuṇḍaṅi dasiḥ.
7. sak maṅir kĕrig sadaya, péraŋ péraŋ gagamanira asri, muŋ tumbak pĕḍaŋ lan suduk, iṣṭa janmarṣa yuda, taṇḍu jaran jajaran miwaḥ pipikul, pra bĕkĕl pininta pinta, sakgĕgamannya miranti.
8. ya ta wahu saŋ kusuma, wus busana sinawaŋ kadi ratiḥ, maṅéjawantaḥ tumurun, tuhu ayu utama, wimbuḥ koṅas lir wulan purṇamasantun, gumilar gilar suŋ rimaŋ, kucĕm saguŋ kaŋ niṅali.
9. katĕmbèn ébatiŋ pamyat, lir mukṣwèŋ gyan tan wĕnaŋ ṅuju liriŋ, maṅlayuŋ ṅléla sumunu, nukadariŋ jagad ṅrat, adisara tan tĕbiḥ lawan saŋ ayu, kaŋ maṅka ajum paṅrundaḥ, iŋ driya saŋ kusuma di.
10. tandya wus nitiḥ wilisan, bojon bĕkĕl pêpak sumiwèŋ ṅarṣi, kaŋ baḍé ḍèrèk saŋ iŋ rum, pininta kaŋ ampilan, jajar papat pra kĕña jajari ṅayun, guṅguŋ janma kawan dasa, kaŋ ṅoḍé datan winarṇi.
11. ri sampunira sumĕkta, tandya buḍal nuju dina ṛĕspati, wĕtara gagaman sèwu, sanèsé kaŋ babĕktan, anèŋ wuri iṅirid kĕpala ḍusun, miranti sasikĕpira, kaṭaḥ janma nunut margi.
12. kĕpéṅin wĕruḥ nagara, iŋ mataram saya ṅluntak kaŋ dasiḥ, tuñjaŋ tinuñjaŋ lumaku, sakiŋ kuduné mulat, pĕṅantèné jaréné putra saŋ prabhu, warṇané kacrita éndaḥ, ayuné kĕluwiḥ luwiḥ.
13. wus ḷĕpas iŋ lampahira, upacara abra sinaŋ mĕrapit, ki agĕŋ nèŋ wurènipun, ṛĕspati nitiḥ kuda, datan tĕbiḥ lan pusaka kyayi baru, ginarbĕg santananira, kinubĕŋ gagaman asri.
14. kinaré karé wadyanya, iṣṭanira kadya binayaṅkari, sakboboté rada bagus, busananira mubyar, saŋ ṛĕtnayu tindakira muṅgèŋ ṅayun, jinajaran pra pawoṅan, para bĕkĕl magĕrṣari.
15. liniga gagamanira, butaṛĕpan lampahira sakmargi, kaṭaḥ janma samya dulu, muṅgèŋ titiraḥ marga, laré aṅon gumrubyug ṅĕtutkĕn laku, ṛĕmbĕn lampahirèŋ marga, siṅguṅiŋ èstri lumaris.
16. samana praptèŋ karasan, kyagĕŋ maṅir nahĕn ṅantya sĕlastri, ṅasokkĕn kaŋ para wadu, tĕnapi para kĕña, kaliḥ maliḥ ki agĕŋ pañiptanipun, ṅantosi timbalan nata, kaŋ baḍé mĕṭuk saŋ dèwi.
17. kaŋ abdi kinèn mĕcalaŋ, lamun wontĕn utusannya saŋ aji, éṅgal kinèn ṅaturi wruḥ, mriŋ pamoṇḍok karasan, kunĕŋ maliḥ śri sudigbya iŋ matarum, éñjiŋ miyos siniwaka, pêpak kaŋ samya manaṅkil.
18. adipati mandaraka, atĕnapi paṅéran maṅkubhumi, myaŋ paṅéran siṅasantun, kaṅjĕŋ paṅran dipatya, paṅran pugĕr paṅran purbaya sumambuŋ, paṅran jayaraga lawan, paṅran wiramĕṅgala twin.
19. myaŋ paṅéran priṅgalaya, myaŋ paṅéran tĕpasana anĕṅgiḥ, aṇḍèr sumiwi iŋ ṅayun, myaŋ paṅéran juminaḥ, pra dipati mañcanagara supĕnuḥ, wus samya rumakit tata, pĕṅaṅgo sinaŋ marṇèni.
20. patiŋ pĕñcoroŋ winulat, patiŋ tléram maṅilat ilat ṭaṭit, kumĕñar ṅrĕñĕp sumuluḥ, maliwran liwran laras, sumyar sumyar sumiram ganda sumrik rum, ṅlandĕŋ miṅiŋ mĕṅĕŋ sumraḥ, ṅĕdusi ṛĕjasèŋ èṣṭi.
21. nata nĕbda mriŋ mandraka, nĕḍa paman suwawi adum kardi, manira wontĕn kuḍatun, jĕṅandika nèŋ jaba, saŋ dipati sandika iŋ aturipun, wusana arum sĕbdanya, hèḥ ta kulup maṅkubhumi.
22. lawan sira siṅasĕkar, umĕṭuka anèŋ jaban nĕgari, mantri majĕgan sĕdarum, mapaga sudimara, yèn si maṅir iṅiriŋ gagaman aguŋ, dèn tulaka anèŋ kana, ywa ṅaṅsi akèḥ kaŋ ṅiriŋ.
23. putu pugĕr purubaya, umĕṭuka danalaya di aglis, woŋ kajoran iṅkaŋ mèlu, tumĕṅguŋ alap alap, umĕṭuka anèŋ bantul sakañcamu, dé para mantri mataram, kaŋ paḍa sumĕktèŋ wèṣṭi.
24. yèn si maṅir ṅiriŋ bala, gagaman kèḥ iṣṭa kadi woŋ jurit, balèkna sĕbda kaŋ alus, karia sawĕtara, putu priṅgalaya lan juminaḥ putu, lan putu wiramĕṅgala, putu tĕpasana sami.
25. mirantia pagĕlaran, lan sakèhé para mantri iŋ matawis, wiraguna sira iku, jogowa paṅurakan, yèn si maṅir wus prapta sira kaŋ gupuḥ, aṇḍĕgĕn upacaranya, ṅamuṅna iṅkaŋ kakasiḥ.
26. kĕlawan sĕntananira, iṅkaŋ ṅoḍé jalu tĕnapi èstri, kaŋ ṅiriŋ maraŋ kuḍatun, iṅsun nèŋ kĕmaṇḍuṅan, guŋ prajurit barisa pĕṇḍĕm sĕdarum, aṅubĕṅana nagara, disamun kaŋ ṅati ati.
27. wus rampuŋ paṅguṣṭènira, sigra maṅkat paṅéran maṅkubhumi, lan paṅéran siṅasantun, alap alap pĕṅarṣa, sampun prapta miranti wontĕn iŋ bantul, paṅran maṅkubhumi pranta, sudimara amiranti.
28. lan paṅéran siṅasĕkar, para mantri majĕgan iṅkaŋ ṅiriŋ, paṅran pugĕr purbaya wus, ṅirid wadya kajoran, sampun prapta danalaya dènnya mĕṭuk, wiraguna sakañcanya, paṅurakan amiranti.
29. myaŋ pranatanirèŋ gaṅsa, koḍokṅorèk ponaŋ bĕḍug miranti, paṅurakan ugyanipun, pélog sléndro sinĕla, mubĕŋ turut titirahiŋ ṅalun alun, nĕgari daḷĕm mataram, lir bojadrawina kèkṣi.
30. paṅéran catur tuguran, nèŋ paglaran bupati para mantri, nèŋ pañcaniti sĕdarum, dipati mandaraka, kĕmaṇḍuṅan dènira tugur umĕṭuk, kunĕŋ maliḥ kaŋ winarṇa, pĕcalaṅé kyagĕŋ maṅir.
31. sampun ṅaturi uniṅa, yèn utusanira saŋ nata prapti, kaŋ pañcèn mĕṭuk saŋ iŋ rum, kyagĕŋ maṅir gya uṇḍaŋ, wusnya rakit lir duk aṅkatira wahu, prayitna sakmarga marga, dènira ṅrĕkṣa saŋ dèwi.
32. iŋ bantul samana prapta, ki tumĕṅguŋ alap alap tumuli, gupuḥ gupuḥ dènnya mĕṭuk, alus manisiŋ sĕbda, ḍuḥ naḥ aṅgèr ulun iṅutus saŋ prabhu, kaŋ rumiyin paṅèstunya, jĕŋ sénapati matawis.
33. ḍumawuha mriŋ paduka, kyagĕŋ maṅir ḍĕku manuwun kaŋ siḥ, alap alap maliḥ muwus, kapiŋ kaliḥ kawula, kinèn mĕṭuk mriŋ paduka lan saŋ ayu, taṇḍa siḥ trĕsnaniŋ nata, lan amba atur prayogi.
34. padukarṣa sowan nata, aṅaturkĕn ḍumatĕŋ saŋ ṛĕtna di, ambĕkta dadamĕl aguŋ, karya salaḥ grahita, yèn suwawi éṅgal waṅsulna pukulun, sĕpaliḥ aṇḍèrèkĕna, sĕpaliḥ rumĕkṣèŋ maṅir.
35. ḍuḥ aṅgèr ywa salaḥ tampa, baḍé lami paduka nèŋ matawis, saŋ nata aṅayun ayun, baḍé abojakrama, mriŋ paduka sakĕlaṅkuŋ asihipun, ki agĕŋ nurut kiwala, kaŋ wadya waṅsul sĕpaliḥ.
36. tandya laju lampahira, sudimara samana sampun prapti, paṅran kakaliḥ umĕṭuk, ḍumatĕŋ iṅkaŋ putra, tandya ḷĕṛĕp wahu dèn ajĕŋ pĕmbayun, manĕbda ḍatĕŋ kaŋ raka, ḍuḥ kakaŋ ki agĕŋ maṅir.
37. laḥ punika kaṅjĕŋ paman, paṅran maṅkubhumi iṅkaŋ satuṅgil, paman paṅran siṅasantun, sami mĕṭuk kawula, kyagĕŋ maṅir siŋ kuda éṅgal tumurun, aris dènira lumampaḥ, wus cuṇḍuk lan paṅran kaliḥ.
38. ki baru tan kĕna tĕbaḥ, radèn ajĕŋ pĕmbayun tĕḍak aglis, lumajĕŋ maṅrahup suku, ṅabĕkti mriŋ kaŋ paman, sĕkalihan kaŋ paman tansaḥ ṅĕmuluḥ, saŋ dyaḥ nuṅkĕmi karuna, ri wusnya gya tata liṅgiḥ.
39. ki agĕŋ maṅir ṅabĕktya, iŋ sujudanira paṅéran kaliḥ, tan ñana kĕna iŋ apus, prananiŋ sandi samar, paṅran kaliḥ nĕmbrama kaŋ lagi rawuḥ, titi manis wijaŋ wijaŋ, ḷĕḷĕmbaran maṅañut siḥ.
40. wijaḥ wijaḥ ḷĕmpaḥ ḷĕmpaḥ, siṅa iṅkaŋ kuraŋ dipun wuwuhi, amayaŋ mayaniŋ wuyuŋ, kayuṅyuné iṅaraḥ, ṅaraḥ araḥ sumyar sumraḥ manis arum, ki agĕŋ maṅir aturṇya, manuwun kasmarèŋ galiḥ.
7. asmaradana
1. paṅran kaliḥ saṛĕŋ aṅliŋ, ḍuḥ ki jĕbèŋ lakon iṅwaŋ, iṅutus kaṅmas saŋ rajèŋ, mĕṭuk rimtanira saŋ dyaḥ, tĕnapi mĕṭuk sira, wit sakiŋ kaṛĕnanipun, kaṅmas aji iŋ mataram.
2. sokur muṅguḥ mriŋ hyaŋ widdhi, kaguṅan mantu lir sira, namuŋ sira bahé jĕbèŋ, kaŋ bisa momoŋ saŋ ṛĕtna, kĕlamun sira bisa, lir momoŋ kaṅmas saŋ prabhu, rukun rakĕt maratuwa.
3. pĕṣṭi aguŋ sihiŋ aji, ṅadaté kaṅmas naréndra, wis nora ṅarani uwoŋ, sapa sujanma kaŋ bisa, moṅmoŋ ṅladèni putra, nira kaṅjĕŋ kaṅmas prabhu, dèn sruwé aguŋ sihira.
4. aja kaŋ lir sira kaki, wuwuḥ dadi mantonira, pĕṣṭi kĕluwiḥ asihé, tikĕl lawan sapa sapa, ḍasar wus ubayanya, kaṅmas sudigbya matarum, siŋ sapa woṅé kaŋ bisa.
5. maṅgihakĕn saŋ ṛĕtna di, sayĕkti jatukramanya, ginaḍaŋ gaḍaŋ iŋ tĕmbé, dadi wraṅkaniŋ saŋ nata, tur ginañjar nagara, bagĕlèn sakurutipun, lan manèḥ iṅsun dinuta.
6. mariṅkĕn payuŋ kakaliḥ, kaŋ kuniŋ tlacap saŋ ṛĕtna, déné iṅkaŋ ijo sèrèt, ginañjarakĕn mriŋ sira, taṇḍa mantu naréndra, lan taṇḍa sihé saŋ prabhu, jĕbèŋ maraŋ jĕnĕŋ para.
7. ki agĕŋ manuwun kaŋ siḥ, irèŋ nata kaŋ ḍumawaḥ, ḍumatĕŋ kawula maṅké, sun pĕtak muṅgèŋ mustaka, cinañcaŋ pucuk kiswa, pun dasiḥ pañiptanipun, tan pisan pisan sagĕda.
8. maḷĕs siḥ daḷĕm saŋ aji, kaŋ rumĕntaḥ mriŋ kawula, tan laṅkuŋ panuwun iṅoŋ, mriŋ kaṅjĕŋ śri naranata, mugi mugi pariṅa, siḥ ṅapuntĕn ḍatĕŋ ulun, prakawis iŋ kina kina.
9. paṅran kaliḥ saṛĕŋ aṅliŋ, hèḥ jĕbèŋ aja rinasa, prakara mahu mahuné, iṅsun kaŋ naṅguŋ mriŋ sira, yĕkti tan dadi apa, muŋ nontona saŋ ṛĕtnayu, awit dadi garwanira.
10. yĕktiné kaṅmas nĕrpati, yèn galiha kaŋ maṅkana, maṅsi sun tĕkowa kéné, mĕṭuk sira lan saŋ ṛĕtna, tĕnapi pra atmaja, myaŋ sakèhé puṅgawa guŋ, kaŋ paḍa mĕṭuk mriŋ sira.
11. déné prakara iŋ ṅuni, kaṅmas sultan wis tan karṣa, aṅgaliḥ prakara rèmèḥ, wis dibuwaŋ mriŋ sagara, kaṅmas jĕmbar galiḥnya, lan manèḥ pitutur iṅsun, maraŋ sira gĕgĕṇṭoṅan.
12. bésuk yèn prapta matawis, kaguṅan pĕṅaṅgĕpira, jĕbèŋ maraŋ kaṅmas katoŋ, tuwin paman mandaraka, ṅadaté kaṅmas nata, yèn diguṅani tĕrtamtu, moprol abrol siḥnya tiba.
13. apa kaŋ sinuwun kaki, maṣṭi sira pinariṅan, jĕr mantu lanaŋ sawiyos, ḍasaré bagus warṇanta, garwamu dèn la ĕla, kinacèk samèŋ sadulur, ṅrèḥ putra pĕmbaṛĕp gĕsaŋ.
14. tur sandika kyagĕŋ maṅir, paṅran kaliḥ maliḥ nĕbda, sun tuturi manèḥ jĕbèŋ, rèhniŋ sira nĕja séba, maraŋ kaṅmas naréndra, kapiṇḍoné woŋ asĕpuḥ, lagi sapisan punika.
15. baturmu balèkna kaki, kaŋ paḍa gawa gagaman, kuraŋ rumakĕt katoṅton, aṅur konĕn paḍa ṅrĕkṣa, nèŋ maṅir bokmĕnawa, watir sira tiṅgal kulup, rowaŋ ṅaṛĕp sĕpi wuntat.
16. wit tĕka panduga mami, sira jĕbèŋ maṣṭi lawas, nèŋ nagara mataramé, muŋ ṅamuṅna upacara, iṅkaŋ umiriŋ sira, kĕluwiḥ bĕcik kadulu, sĕnadyan gawa gagaman.
17. kaŋ patut dipun tiṅali, rèhniŋ séba maraŋ nata, tur lir ramakira ḍéwé, pamriḥku supaya aja, ṅĕgèt ĕgèti janma, jĕr wadyané kaṅmas prabhu, yèn wĕruḥ gagaman raṅap.
18. siṅunĕn tĕmaḥ tan éliŋ, lir tinĕbak sétan kawak, dadiné sira katoṅton, wĕlas maraŋ woŋ mataram, sasat wĕlas saŋ nata, kahèkṣi nalikanipun, bĕcik aṅgĕpmu mriŋ nata.
19. taṇḍa siḥ ṛĕsĕp darbèni, bapa maratuwa nata, kyagĕŋ maṅir rum aturé, sandika sĕkṣana préntaḥ, saguṅirèŋ gagaman, pininta kaŋ pañcèn mantuk, namuŋ kantun kawan dasa.
20. iṅkaŋ pininta lumiriŋ, kĕlawan kaŋ upacara, kaŋ jajari saŋ lir sinom, tĕnapi iṅkaŋ ṛĕmbatan, ya ta sampun umaṅkat, saguŋ gagaman kaŋ mantuk, mriŋ maṅir tugur sadaya.
21. rumĕkṣa yèn ana wèṣṭi, tandya paṅéran kaliḥnya, paṅandikanira alon, hèḥ jĕbèŋ payo glis maṅkat, sĕlak iṅarṣa arṣa, kaṅmas sudigbya matarum, kyagĕŋ maṅir tur sumaṅga.
22. gya buḍal paṅéran kaliḥ, tindakira muṅgèŋ ṅarṣa, prasamya nitiḥ kudané, wuri pisan alap alap, kyagĕŋ maṅir prĕnaḥnya, nèŋ wurènira saŋ iŋ rum, ki baru tan kĕna tĕbaḥ.
23. cakĕt lan kĕpuhiŋ wajik, duk prapta iŋ danalaya, pinĕṭuk paṅran dipatos, pugĕr paṅran purubaya, ya ta duk yun ayunan, rayi kaliḥ lan saŋ ayu, sumĕḍot rahosiŋ driya.
24. upama panaḥ tumitis, manĕrus tañcĕb miŋ manaḥ, maṅuntar untar rahosé, saŋ ṛĕtna tandya tumĕḍak, sakiŋ wahananira, yèn kaŋ rayi kaliḥ mĕṭuk, manĕbda ḍatĕŋ kaŋ raka.
25. hèḥ kakaŋ ki agĕŋ maṅir, kakaliḥ punika ḍimas, pugĕr ḍimas purbayané, prasamya mĕṭuk manira, tĕnapi jĕṅandika, ki agĕŋ éṅgal tumurun, siŋ kuda agurawalan.
26. ri sampunnya tata liṅgiḥ, prasamya asasalaman, atas agama islamé, paṅran pugĕr purubaya, nĕmbrama iṅkaŋ prapta, nĕbda luwĕs manis arum, kakaŋ saklampaḥ paduka.
27. punapa raharja sami, kyagĕŋ maṅir aturira, iṅgiḥ sami karahayon, barkaḥ daḷĕm śri naréndra, kaŋ ḍumawuḥ kawula, tandya paṅran kalihipun, ṅabĕkti ḍatĕŋ saŋ ṛĕtna.
28. sru guguk matur wor taṅis, ḍuḥ kakaŋ ĕmbok kawula, tan ñana ñana sĕmaṅké, ciptamba kadya supĕna, duk pinaṅgiḥ paduka, katujonipun bok ayu, duk murca sakiŋ jro pura.
29. ṅumbara maṅlaya bhumi, maṅlaṅut wusanani, pinupu kyagĕŋ maṅiré, dados maṅgèn prĕnahira, coba klamun sanèsa, kaŋ mupu paduka èstu, sajĕg jumlĕg tan kĕpaṅgya.
30. saḍèrèk ibu sudarmi, saŋ ṛĕtna duk amiyarṣa, pĕnaṅisé rayi roro, agĕmbor asru karuna, sĕṛĕt wijiliŋ sĕbda, kagagas duk purwanipun, aḍimas aja rinasa.
31. wis liguwa sira yayi, kapriyé mĕṅko jĕŋ rama, iya iŋ sakpuṅkur iṅoŋ, apa paḍa karaharjan, tanapi kadaŋ kadaŋ, tuwin para ibu ibu, kaŋ rayi kaliḥ aturṇya.
32. sadaya raharja sami, namuŋ sakmurca paduka, rama ibu lan sĕḍèrèk, samya mĕgĕŋ bukti néndra, wayaŋ wuyuŋ sakpraja, jro pura samya udan luḥ, samun téjaniŋ nagara.
33. ḍĕḍĕt ṅakasa rawati, kĕpyur kĕpyur ṅĕmu rimaŋ, iṣṭa labuḥ kaŋ wiraṅroŋ, déné kaŋ para dipatya, samya kinèn ṅupaya, ḍumatĕŋ paduka èstu, mriŋ tĕpasiŋ sawo dadya.
34. tĕkèŋ maṅké dèrèŋ sami, umantuk sakparan paran, nagari sĕpi kimawon, ri wusnya tĕntrĕm sadaya, gya paṅéran kaliḥnya, tumuli ḍawuhkĕn tĕmbuŋ, timbalan daḷĕm śri nata.
35. ḍuḥ kakaŋ ki agĕŋ maṅir, timbalanira jĕŋ rama, ḍumatĕŋ paduka maṅké, jĕṅandika tan kalilan, bĕkta dadamĕl kaṭaḥ, bok karya sanès panĕmu, mriŋ saguŋ wadya mataram.
36. lan maliḥ lamun ṅèsĕmi, maraŋ liyaniŋ nagara, kiraŋ rumakĕt katoṅton, muŋ ṅamuṅna upacara, iṅkaŋ ṅiriŋ paduka, tĕnapi janma pipikul, sĕdéné sujanma kĕña.
37. prayogi dipun tiṅali, taṇḍa bĕkti mriŋ naréndra, piŋ kaliḥ maratuwané, sintĕn kaŋ pantĕs juñjuṅa, kĕjawi wadyabala, atmaja lan putra mantu, kadaŋ tĕnapi sĕntana.
38. kakaŋ punika tur mami, kyagĕŋ maṅir duk miyarṣa, suka atur sandikané, kaŋ wadya gya iṅuṇḍaṅan, sampun mantuk sadaya, guṅguŋ janma pataŋ puluḥ, namuŋ kantun upacara.
39. kaŋ umiriŋ kyagĕŋ maṅir, tĕnapi kaŋ para kĕña, iṅkaŋ ḍèrèk saŋ lir sinom, samana atandya maṅkat, sakiŋ iŋ danalaya, kaŋ dadya cucukiŋ laku, paṅran maṅkubhumi miwaḥ.
40. jĕŋ paṅéran siṅasari, dé paṅran pugĕr purbaya, cakĕt nèŋ ṅarṣa saŋ sinom, ki agĕŋ nèŋ wurènira, asoṅsoŋ mliyo patra, déné wĕkasaniŋ laku, ki tumĕṅguŋ alap alap.
41. sakañca prayitnèŋ wèṣṭi, goloŋ kĕlawan wadyanya, paṅran pugĕr purbayané, déné ḍalaŋ sandiguna, sakañcanira samya, anèŋ kanan kériṅipun, ki agĕŋ maṅir kaŋ tansaḥ.
42. ananduki adu manis, patiŋ kraṇṭuk pasmon samar, sumrasaḥ parisĕjané, kyagĕŋ maṅir ciptanira, nuli agéya paṅgya, lawan jĕŋ sultan matarum, wus ḷĕpas iŋ lampahira.
8. durma
1. datan mundur wus prapta sajroniŋ praja, paṅéran maṅkubhumi, kĕlawan paṅéran, siṅasari paréntaḥ, mriŋ para wadya paṅirid, lampahiŋ kasba, kinèn atata sami.
2. ywa kaliru prĕnahira juga juga, jajar ṅlima ṛĕspati, ṅarṣa tĕkèŋ wuntat, aywa ḍompo kaŋ lampaḥ, kaŋ wahos kinèn amaṇḍi, sarta liniga, ywa pĕgat yitnèŋ wèṣṭi.
3. wus warata wadya samya ḍinawuhan, ṛĕmpĕk lampahiŋ baris, sap sapan arampak, atap awijaḥ wijaḥ, gumuluŋ aṅgoloŋ pipit, untabiŋ kasba, kadya séla blĕkiṭi.
4. sraŋ asĕlur busana manéka sinaŋ, sébak kaŋ prawatagni, yyaḥ lir wukir sĕkar, wĕnèḥ arṣunabèŋ wyat, blĕdug kaŋ mĕṅaṅgo putiḥ, sakiŋ mandrawa, sébak kuntul maṅrawi.
5. sonar iṅkaŋ pra méga asri araras, sorot lir lintaŋ ṅaliḥ, tansaḥ gĕbyar gĕbyar, sĕnĕniŋ sara mantap, kĕpraban pradiptyèŋ rawi, maṭaṭit liwran, ṅakasa ṅĕmu kiṅkin.
6. paṅrikirèŋ turaṅga asri baruṅan, wor gĕrdĕgiŋ lumaris, pañĕlukiŋ janma, nonton asri kawuryan, dadya tontonan sakmargi, iṣṭaniŋ lampaḥ, lir andon jayèŋ jurit.
7. duk samana wus prapta iŋ paṅurakan, koḍokṅorèk munya tri, tĕnapi kaŋ gaṅsa, urut lun alun munya, kyat umyaŋ lir karṇgèŋ laṅit, bĕḍugnya ṅantag, yayaḥ ambuyaṅkari.
8. kyagĕŋ maṅir saṅsaya éṅgar kaŋ driya, wiraguna tumuli, mĕṭuk sigra sigra, alon iŋ sĕbdanira, ḍuḥ anak ki agĕŋ maṅir, aṅgèr paduka, arṣa lumĕbèŋ puri.
9. tuñjuk mukak ḍatĕŋ maratuwa nata, ulun atur prayogi, guṅiŋ upacara, kantuna wontĕn jaba, ki agĕŋ maṅir nuruti, paṅéran papat, kaŋ anèŋ pañcaniti.
10. tur uniṅa ḍumatĕŋ darma naréndra, lamun ki agĕŋ maṅir, kèndĕl paṅurakan, ṅantosi kaŋ timbalan, saŋ nata ṅandika aris, mriŋ gaṇḍèk karwa, hèḥ gaṇḍèkipun aglis.
11. timbalana putraniṅsun nini ṛĕtna, lan lakiné si maṅir, konĕn laju maraŋ, pura katĕmu iṅwaŋ, ywa kasuwèn anèŋ jawi, kaŋ gaṇḍèk nĕmbaḥ, lèṅsèr ṅayunan mulki.
12. gurawalan wus prapta iŋ paṅurakan, ḍawuhakĕn sĕbda ji, nĕḍa jĕṅandika, ṅandikan śri naréndra, kĕlawan saŋ kusuma di, iṅarṣa arṣa, wontĕn sajroniŋ puri.
13. nata laṅkuŋ onĕŋ ḍumatĕŋ kaŋ putra, myaŋ kasĕsa yun uniŋ, ḍatĕŋ jĕṅandika, rèhniŋ gusti sudigbya, dèrèŋ naté naté kyayi, kaguṅan mantya, mila paduka kyayi.
14. kaŋ nimbaṅi siḥ supĕkĕtnya saŋ nata, ya ta ki agĕŋ maṅir, ḍĕku tur sandika, déné saŋ naréndratma, pinĕṭuk jĕmpana nuli, laju tindaknya, kyagĕŋ ḍarat lumaris.
15. anèŋ wuri ki baru tan kĕna tĕbaḥ, sĕntana gĕrbĕg sami, praptèŋ pañcanitya, naréndratma gya tĕḍak, ginarbĕg iŋ para cèṭi, gya laju miṅgaḥ, ḍumatĕŋ sitiiṅgil.
16. gya pinĕṭuk pra kĕña sajroniŋ pura, samya aṅĕmu taṅis, praptèŋ brajanala, dipati mandaraka, umĕṭuk saŋ kusuma di, aṅĕmu waṣpa, wusana ṅandika ris.
17. aḍuḥ ñawa putuniṅsun nini ṛĕtna, tan ñana mĕkṣiḥ urip, sun ulati sira, lawas nora kĕpaṅgya, ṅanti ñĕbar wran matawis, añjajaḥ désa, milaṅkori tan paṅgiḥ.
18. wana gunuŋ urut pasisir tan paṅgya, sun ñana uwis mati, mĕṅko sira ñawa, katĕmu mĕkṣiḥ arja, sèwu ḷĕgané kaŋ ati, maraŋ lakinta, iya mas putu maṅir.
19. pan sakĕṭi jumuruŋ mriŋ lakènira, iya mas putu maṅir, kaŋ nĕmokkĕn sira, sira maṣṭi tan séba, maraŋ nagara matawis, ginawa miṅgat, bablas liyan nĕgari.
20. ri sampunnya tandya sami tata ḷĕṅgaḥ, kĕmaṇḍuṅan miranti, saŋ ṛĕtna ṅandika, ḍumatĕŋ iṅkaŋ garwa, ḍuḥ kakaŋ ki agĕŋ maṅir, punika éyaŋ, mandaraka dipati.
21. kaŋ ṅuyuni tyaŋ mataram sadayanya, jĕŋ rama tan udani, amis bacin miwaḥ, bambaŋ lum alumiŋ rat, jĕŋ éyaŋ kaŋ masésani, tandya saŋ ṛĕtna, ṅabĕkti saŋ dipati.
22. kyagĕŋ maṅir sĕkṣana maṅaras pada, mandaraka dipati, manĕmbrama iṅkaŋ, prapta amanis sumraḥ, nuwun turṇya kyagĕŋ maṅir, dipati manda, raka maliḥ nĕbda ris.
23. hèḥ mas putu sun asuŋ prayoga sira, sira arṣa ṅabĕkti, maratuwa nata, jĕbèŋ prayoganira, ṅaṅgowa tata nagari, ywa gawa tumbak, mriŋ pura datan kĕni.
24. kèrèkĕna iŋ kéné iṅsun kaŋ tĕṅga, ya ta ki agĕŋ maṅir, wagugĕn kaŋ driya, daṅu tan kĕna nĕbda, kumĕjot sajroniŋ galiḥ, paṅartikanya, tumbakku barukupiŋ.
25. jaba yèn wus baṛĕŋ pĕḍoté jaṅganta, pisaḥ kĕlawan mami, tandya saŋ kusuma, adrĕs paṅimurira, lir gurimis puṣpita mrik, acampur kilaŋ, drawa surahosiŋ ṅliŋ.
26. aḍuḥ kakaŋ paduka ywa walaŋ driya, punika éyaŋ yĕkti, kaŋ pitajĕŋ nala, sampun tataniŋ praja, yèn arṣa lumĕbèŋ puri, tan kéṅiŋ bĕkta, gagaman jawi kĕris.
27. laḥ ta kakaŋ kaŋ wĕlas ḍatĕŋ kawula, yèn dika bĕkta biriŋ, datan wandé kula, sinĕṛĕŋ mriŋ jĕŋ rama, iṅran tanpa praja niti, yèn jasat kula, kadukan jĕŋ rama ji.
28. botĕn wandé paduka katut kiwala, dika kĕlawan mami, pinisahkĕn rama, bibraḥ tataniŋ krama, jĕr ciptaniṅsun kiyayi, ḍatĕŋ paduka, tan nĕja maliḥ kapti.
29. doña kérat tulusa mĕṅku mriŋ kula, dika paṅéran mami, mila jasat kula, purun ṅlampahi krama, ḍumatĕŋ paduka ṅuni, tur purwanira, kinramakĕn tan apti.
30. dènnya nĕbda saŋ ṛĕtna kawĕlas arṣa, nuṅkĕmi paṅkyan sarwi, adrĕs locananya, ṅusapan asta kiwa, kaŋ kanan aṅasta wĕntis, kyagĕŋ samana, sumĕḍot iṅkaŋ galiḥ.
31. yèn ṅantia pinisahkĕn lan saŋ ṛĕtna, kadiparan wak mami, tan wandé palastra, aṅur sun turutana, woŋ ayu tur dadi galiḥ, nuragèŋ kĕña, mundri taliniŋ urip.
32. wus jinakis karṣaniŋ hyaŋ maha mulya, tan kĕna owaḥ giṅsir, nuruti kaŋ garwa, atur sĕmbaḥ sumaṅga, kaŋ wahos kinantun jawi, datan antara, kĕparak kaliḥ mijil.
33. aṇḍawuhkĕn timbalan daḷĕm śri nata, ḍatĕŋ saŋ kusuma di, ḍuḥ gusti paduka, kinèn iṅgal ramanta, lumĕbĕt ḍatĕŋ jro puri, gusti paduka, tindaka ṅrumiyini.
34. saŋ ṛĕtnayu sĕkṣana malbèŋ jro pura, śri naréndra jaliṅsi, nèŋ séla gigilaŋ, rayi kaliḥ nèŋ ṅarṣa, paṅéran amaṅkubhumi, lan rinta paṅran, siṅasari tĕnapi.
35. jĕŋ paṅéran dipati muṅgèŋ iŋ ṅarṣa, paṅran pugĕr lan maliḥ, paṅéran purbaya, saŋ ṛĕtna duk katiṅal, lan adisara tumuli, iṅawé nata, saŋ dyaḥ lumajĕŋ aglis.
36. sru karuna tandya nuṅkĕmi kaŋ rama, sasambat mĕlas asiḥ, śri nata ṅandika, aḍuḥ ñawa sun trima, karyamu maharṣèŋ sandi, wis ta mĕnĕṅa, aja kĕlara naṅis.
37. maḷĕbua maraŋ daḷĕm pupuṅkuran, saŋ kusuma tumuli, malbèŋ ḍatulaya, kĕlawan adisara, déné pra garwa myaŋ sĕlir, samya karuna, ṅrubuŋ kaŋ lagi prapti.
38. añjrit gumĕr gumrumuŋ sajroniŋ pura, guluṅan anèŋ siti, saŋ ṛĕtna kantaka, ri wusnya paripurṇa, tĕntrĕmiŋ taṅis tumuli, maliḥ kawarṇa, kaṅjĕŋ sudigbya murti.
39. pra paṅéran kaŋ anèŋ ṅarṣa saŋ nata, kinèn sumĕktèŋ wèṣṭi, ṅiŋ ywa kawistara, sonar liriṅiŋ nétya, déné paṅran maṅkubhumi, lan rinta paṅran, siṅasari umijil.
40. mriŋ maṇḍuṅan aṇḍawuhakĕn timbalan, jĕbèŋ ki agĕŋ maṅir, sira iṅandikan, lumĕbu mriŋ kuḍatyan, ya ta ki agĕŋ iŋ maṅir, atur sandika, kérid paṅéran kaliḥ.
41. kaŋ ampilan sadaya kantun nèŋ jaba, sapraptané jro puri, anèŋ ṅabyantara, nĕmbaḥ iṅawé nata, ki agĕŋ gya sèlèḥ kĕris, ṅabĕkti nata, duk sumuṅkĕm pada ji.
42. sénapati bĕl prĕmpĕŋ émut dukanya, duk kuna aṇḍatĕṅi, kyagĕŋ maṅir duknya, grana maṅaras jĕṅkya, ṅiṅgatan maraŋ saŋ aji, kaduŋ ujuŋnya, jinĕṅku mriŋ saŋ aji.
43. kĕtaṅgor iŋ séla gigilaŋ siraḥ craḥ, rahira kocar kacir, polonira muñcrat, kyagĕŋ maṅir wus pĕjaḥ, jumĕnĕŋ jĕŋ sénapati, sarwi ṅandika, wus ḷĕga ati mami.
44. kinèn ñamun kyagĕŋ maṅir pĕjahira, layon wus dèn sahèni, winĕdalkĕn wuntat, iŋ kori bubutulan, surupiŋ baṣkara ganti, purṇama muñcar, paṅran catur wus mijil.
45. sampun paṅgiḥ lan dipati mandaraka, ḍawuhakĕn sĕbda ji, mriŋ saŋ mandaraka, éyaŋ ḍawuḥnya rama, guŋ ampilannya pun maṅir, ki barukarṇa, pinuṇḍut mriŋ jro puri.
46. sabab wayaḥ jĕṅandika dèrèŋ klilan, moṇḍok wontĕn iŋ jawi, iŋ rèḥ kaṅjĕŋ rama, dèrèŋ dugi onĕŋnya, ḍumatĕŋ ki agĕŋ maṅir, sinuba suba, wontĕn sajroniŋ puri.
47. déné kulawarga lan sĕntananira, kinèn aṅaso sami, nèŋ daḷĕm paduka, dipati mandaraka, tur sandika wus andugi, dadya ṅandika, ḍatĕŋ kaŋ ṅampil ampil.
48. laḥ ta ĕndi ki baru pinuṇḍut nata, tĕraŋ mas putu maṅir, iŋ samĕṅko paḍa, lagi baṅĕt onĕŋnya, nuli iṅaturkĕn mariŋ, dipati manda, raka gupuḥ nampèni.
49. gya iṅaturakĕn maraŋ jroniŋ pura, mandaraka kakaŋ muṇḍi, wus prapta jro pura, ki baru katur nata, sĕklaṅkuŋ truṣṭa saŋ aji, cipta wus datan, ana malaṅatèni.
50. adipati mandaraka sampun mĕdal, kĕmaṇḍuṅan wus prapti, wran maṅir sadaya, iṅajak mundur tandya, mriŋ daḷĕmé saŋ dipati, sĕklaṅkuŋ dènnya, ṅupasuba rinastri.
51. saguṅiŋ woŋ maṅir samya ṅéca éca, rinĕṅga ṛĕṅga sami, sinluḍaḥ sĕbaraŋ, boga busana wastra, ṅuni tan ñana iŋ kapti, gustiné pĕjaḥ, mila éṅgar kaŋ kapti.
52. tatayuban sĕbaraŋ ṛĕtnaniŋ manaḥ, ubyuŋ ubyuŋ rinastri, wusnya lama lama, wĕruḥ gustiné léna, sakĕclapan sumĕdyapti, béla gustinya, tandya sami pipikir.
53. wusnya guyup tandya samya ṅèstupada, maraŋ rajèŋ matawis, atur prasĕtyanya, panuṅkulé katrima, iŋ maṅké padésan maṅir, ginaḍuhkĕn mriŋ, mandaraka dipati.
54. pan pinara nĕnĕm kaŋ saduman maraŋ, mandaraka dipati, déné kaŋ saduman, dipati martalaya, jayasupanta tĕnapi, pun saradipa, tumĕṅguŋ bacor déniŋ.
55. kaŋ saduman mriŋ tumĕṅguŋ saradula, samya suka kaŋ tampi, gañjarané nata, cipta asraḥ susĕtya, iŋ gĕsaŋ praptaniŋ pati, pinujamantra, ṅarjani saha dasiḥ.
56. bĕḍahira iŋ maṅir pan sinĕṅkalan, tri boja tata bhumi, duk samana jĕŋ saŋ, sénapati ṅalaga, mashur ruṅrumiŋ sabhumi, kratonnya piṇḍa, sinawuŋ ḍaṇḍaŋgĕṇḍis.
tamat
