pĕṭikan piwulaṅipun prabhu gĕniyara ḍatĕŋ iṅkaŋ putra kakaliḥ, karṣa daḷĕm kasambĕtakĕn dados wulaŋ putri.
ḍaṇḍaŋgula
1. ḷĕṅgaḥ madé paṇḍapa saŋ aji, lawan garwa muṅgèŋ iŋ ḍaḍampar, paṅantèn èstri kalihé, muṅgèŋ ṅarṣa saŋ prabhu, duk winĕliŋ kaŋ putra kaliḥ, winuruk iŋ masalaḥ, aṅladèni kakuŋ, prabhu tarṇité ṅandika, putraniṅsun babo dèn aṅati ati, abagus lakinira.
2. sutèŋ nata prajurit sinĕkti, tur kinoṇḍaŋ saŋ prabhu jĕṅgala, amumpuni sarjanané, iŋ pramudita putus, wicaksaṇa alusiŋ budi, prawira mandraguna, prakosa dibyanuŋ, ratu ababala kadaŋ, amĕpĕki pĕkik muṣṭikaniŋ bhumi, taruna natèŋ jawa.
3. marma babo bĕgjanira nini, sinaruwé saŋ prabhu jĕṅgala, pira pira pamor ipé, iŋ jawa goniŋ sĕmu, wit sasmita wiṅitiŋ jawi, babon iṅkaŋ ṅupaya, wiwéka wèḥ sadu, muṅguḥ iŋ panitikrama, woŋ alaki taḍaḥ sakarṣanirèki, paḍanĕn lan jawata.
4. niṣṭa madya utama dèn éliŋ, utamané babo woŋ akrama, jawata nĕkṣèni kabèḥ, pan ana kaŋ tiniru, putri adi maṅgada ṅuni, widadari koṅkulan, iŋ suwarganipun, lan sinuŋ cahya nur wéndaḥ, citrawati sinĕmbaḥ iŋ widadari, putri adi maṅgada.
5. garwanira rajèŋ mahèspati, sri maha prabhu arjunasasra, tinarimèŋ baṭarané, dènnya ṅuguŋ mriŋ kakuŋ, mila prabhu iŋ mahèspati, katĕkan garwa ḍomas, sakiŋ garwanipun, putri maṅgada aṅajap, sugiḥ maru akèḥ putri luwiḥ luwiḥ, yèn ana kinasihan.
6. mriŋ kaŋ raka prabhu mahèspati, putri maṅgada sigra añaṇḍak, kinadaŋ kadaŋ yĕktiné, pinintakakĕn wuwuḥ, iŋ sihira mriŋ raka aji, pan kinarya sor soran, kaŋ raka anurut, dadya sor soran sakawan, citrawati sakiŋ pañjuruṅirèki, tinurut déniŋ raka.
7. ḷĕgawèŋ tyas anrus iŋ pawèstri, murtiniŋ driya putri maṅgada, liwat grahitaniŋ sarèḥ, iku yogya tiniru, citrawati guruniŋ èstri, nini iku utama, suwita iŋ kakuŋ, tan garantĕs pasraḥ jiwa, ragané pan dèn aṛĕp dèn iris iris, iŋ raka tan ḷĕṅgana.
8. nora béda nini praptèŋ maṅkin, iṅkaŋ dadi tulaḍan utama, putri maṅgada aṅgĕpé, surawéyan saŋ prabhu, maṇṭuk maṇṭuk atudaŋ tudiŋ, putri kaliḥ guŋ nĕmbaḥ, iŋ rama saŋ prabhu, poma nini dipunawas, pan wanodya dèn caḍaŋ karṣaniŋ laki, dèn bisa nuju karṣa.
9. aja ṛĕṅu iŋ nétya dèn aris, aṅandika prabhu gĕniyara, tan kapirṣa andikané, muŋ solaḥ kaŋ kadulu, hèḥ ta nini madyaniŋ krami, samaṅsa iŋ sakarṣa, tan darbé pakéwuḥ, manut sakarṣaniŋ raka, citrawati waṣkiṭa osikiŋ laki, mila ḷĕgawotama.
10. niṣṭaniŋ krama suwalèŋ batin, iŋ laliré nadyan ḷĕstariya, iŋ wuri supĕk manahé, iŋ paṅaṛĕpan atur, nora wani maṅké iŋ ḍuri, tyasé agarundĕlan, mégat mégot mugut, iŋ batin ajapé ala, aja ana woŋ wadon iṅkaŋ dèn sihi, amuṅa sun kéwala.
11. tan kawĕtu muŋ ciptaniŋ batin, niṣṭaniŋ badan nrus iŋ wardaya, durjana iku aṅgĕpé, yĕkti yèn buḍuk mumuk, bhumi laṅit paḍa nĕkṣèni, lan talutuhiŋ jagad, dosané ṅĕṇḍukur, widadari kabèḥ éwa, iŋ dĕlahan naraka dèn ĕṅis ĕṅis, iŋ widadari kaṭaḥ.
12. lamun nini sira dèn pasrahi, doña maraŋ laki dèn prayitna, aṅgĕpĕn ṛĕkṣanĕn bahé, nadyan wus pasraḥ iku, aja wani wani dèn wĕdi, dèn karasa rumĕkṣa, bahé aṅgĕgaḍuḥ, aja siliḥ rajabrana, nadyan badan aja ṅrasa anduwèni, pan kaguṅaniŋ priya.
13. lamun ana putri dèn pasrahi, rajabrana pan bañjur dèn aṅkaḥ, branané wus dèn wèhaké, sayĕkti duwèk iṅsun, iku aṅgĕp woŋ tahiyoli, luwiḥ niṣṭaniŋ niṣṭa, pakĕmatan aguŋ, dudu aṅgĕpiŋ akrama, bĕbĕrandu bĕruwun sétan kahèkṣi, dudu sipatiŋ janma.
14. sétan kéré pan aṅgawa ladiŋ, ṭèṭèl ṭèṭèl baluŋ wus binuwaŋ, añjĕjĕnĕsi woŋ akèḥ, bèbèté woŋ aṅlindur, tanpa dahat gawé pakarti, buru aṛĕp kéwala, mriŋ darbèkiŋ kakuŋ, sanadyan pĕpĕgatana, duwèk iki jĕr wus dadi duwèk mami, jĕr iṅsun wus ginarap.
15. iku budi satus tahiyoli, palañahan murka tur anuṅsaŋ, ñilakani tataṅgané, lakon pituŋ paṅuwuḥ, tataṅgané kaŋ dèn tulari, ajana kaŋ saṇḍiṅan, woŋ maṅkono iku, yĕkti kasrèmpèt cilaka, boṅgan gawé asaṇḍiŋ woŋ kĕnèŋ piḍir, ṛĕṛĕgĕd iŋ sajagad.
16. déné kuraŋ prabéyanirèki, laḥ usuṅĕn doña iŋ makasar, muŋ aja amuraŋ bahé, aja toliḥ mariṅsun, aṅgĕgawa ṛĕgĕdiŋ ati, lamun sira añipta, yèn atmajèŋ ratu, dadi guṅaniŋ tyasira, woŋ akrama katon woŋ atuwanèki, aṅandĕlakĕn nala.
17. iṅakrama èstri dadi abdi, wus tinitaḥ iŋ sukṣma kawĕkas, wus maṅkono titikané, karṣaniŋ baṭaraguŋ, paṅolahé hyaŋ utipati, yèn ana kaŋ anĕrak, woŋ mopo iŋ tuduḥ, baṭara sukṣma kawĕkas, abĕbĕndu manuṅsa dèn upatani, dadi wrĕjit sakala.
18. daya sampun dinukan tumuli, dadi maṅgiḥ apurèŋ dĕlahan, kalamun dèn imbu bahé, binukana iŋ bésuk, iku iṅkaŋ ambĕbayani, tanpa dadi dĕlahan, yèn maṅkono kontuŋ, poma nini dèn suwita, mariŋ laki yèn sira ginawa béñjiŋ, muliḥ mriŋ lakinira.
19. sampun tĕlas pitutur saŋ aji, iŋ tarṇité prabhu gĕniyara, mriŋ atmajèstri kalihé, pan prayoga satuhu, yèn tiniru amĕṣṭi bĕcik, aja dumèḥ woŋ buda, kaŋ duwé pitutur, kaya saŋ raja iŋ cina, pituturé sanadyan ta iku kapir, tur majusi kapirṇya.
