1. ḍaṇḍaŋgula
1. ḍuḥ ḍuḥ aḍuḥ pra atmaja mami, iṅkaŋ mijil sakiŋ garwaniṅwaŋ, kaŋ wus mukṣa iŋ jamané, kaŋ lahir kalaniṅsun, lara lapa dadi prajurit, siraṅgèr sumurupa, dèn pracayèŋ kalbu, gon sun mrihatinkĕn sira, awit iṅsun jumĕnĕŋ paṅran dipati, arya maṅkunagara.
2. nora pĕgat panĕḍèṅsun batin, muga sira akatumusana, kanugrahan iṅsun aṅgèr, iŋ mĕṅko wus jinuruŋ, iṅkaŋ maṅka taṇḍaniŋ widdhi, tumrapé maraŋ sira, kulup yĕktinipun, sira paḍa palakrama, antuk putra atmaja paṅran dipati, timbaŋ lan jĕnĕṅira.
3. kapiŋ kaliḥ sira wus darbèni, balé wisma abawat priyaṅga, kapiŋ tri sira wus darbé, pañci liruniŋ luṅguḥ, paḍa lawan putra narpati, kapiŋ pat sira tampa, kawiryawan aguŋ, sinĕbut jĕnĕŋ paṅéran, paḍa lawan éyaŋ ta kaŋ sakiŋ mami, myaŋ sakiŋ ibunira.
4. kaŋ maṅkono rasaniŋ tyas mami, iṅatasé baṅsaniṅsun jawa, anané iŋ jaman kiyé, wus kĕna yèn sinĕbut, kanugrahan iṅkaŋ ñartani, mulané putraniṅwaŋ, dèn narimèŋ pandum, yèku pituluṅiŋ sukṣma, iṅsun èṅĕt saṅkaniŋ kamulyan kaki, brĕkahé luhurira.
5. mĕṅko uga kulup jĕnĕŋ mami, ḷĕga buṅaḥ sukur iŋ hyaŋ sukṣma, ḷĕganiṅsun awit déné, katĕkan panĕḍèṅsun, buṅaḥ iṅsun dulu sirèki, sukurku iŋ hyaŋ sukṣma, dé saduruṅipun, sun muliḥ mriŋ kalaṅgĕṅan, bisa wĕruḥ iŋ tumañjanira sami, uripmu anèŋ duña.
6. dadi suda sandéyaniŋ ati, amuŋ kari arinta paṅéran, praṅwadana sakadaṅé, kaŋ dadi galiḥ iṅsun, déné paḍa makṣiḥ lit alit, kaŋ maṅka yuswaniṅwaŋ, wus sawidak tahun, iya lamun mĕnaṅana, diwasané yèn nora iku amĕṣṭi, dadi iŋ karyanira.
7. maṅka para arinira kaki, si suyitna iku sapaṅaṇḍap, kĕnané dèn suwunaké, uṅgahiŋ paṅkatipun, jĕnĕŋ paṅran kalamun uwis, ṅumur wolulas warṣa, wawaṅĕnanipun, kaŋ kamot jroniŋ pustaka, kĕkañciṅan guprĕmèn iṅkaŋ tiniti, iŋ nagri surakarta.
8. makunagaran iŋ sasi juli, kapiŋ nĕnĕm taṅgaliŋ walanda, kahétuŋ saka tahuné, duk sèwu woluṅatus, sawidak nĕm iṅkaŋ lumaris, sinuŋ aṅka sakawan, èr akṣaranipun, iŋ mĕṅko pamintaniṅwaŋ, maraŋ sira kabèḥ para putra mami, mupuŋ sun makṣiḥ gĕsaŋ.
9. awit iki tumĕkaniŋ béñjiŋ, iṅsun titip para arinira, praṅwadana sakadaṅé, ṛĕkṣanĕn ayunipun, aja taha amituturi, kaŋ maraŋ karaharjan, supayané bésuk, yèn gumanti jĕnĕŋ iṅwaŋ, ḷĕstariya bisa mĕṅku aṅahubi, mriŋ kadaŋ warganira.
10. mĕṅko ayo kulup andum kardi, liya sakiŋ wajibmu priyaṅga, sira sun bubuhi aṅgèr, rumĕkṣa mriŋ aḍimu, kaŋ wus iṅsun titipkĕn sami, sun arṣa nutugĕna, kuwajiban iṅsun, anata iŋ prajanira, muriḥ tambaḥ lulusa sira ĕṅgoni, lan para kadaṅira. 11. waḷĕr iṅsun maraŋ sira kaki, aywa limut paḍa èstokĕna, kaya kaŋ sun tutur kiyé, ḍihin ywa karya giyuḥ, kapiŋ kaliḥ ywa gawé isin, katri ywa karya sira, rusuḥ iŋ paṅrĕṅkuḥ, piŋ pat aywa mriḥ piala, mriŋ wandéwaŋ piŋ lima sira ywa kardi, nĕpsuné galiḥ iṅwaŋ.
12. kabèḥ iku dadi wulaŋ mami, iŋ samaṅsa sira apépéka, wani nĕrak waḷĕr kiyé, tan luput sakiŋ iṅsun, atas sakiŋ sira pribadi, yĕkti kĕna patrapan, sahujariŋ kuṅkum, kajaba kaŋ wus winahya, sumurupa wajibiŋ woŋ iṅkaŋ sami, antuk kamulyanira.
13. sakiŋ praja paṅgonaniŋ lahir, iṅkaŋ ḍihin nut wiradatira, piṇḍo ñaṅkul sagawéné, katri sakadaripun, biyantoni arjaniŋ nagri, kapiŋ pat aṅowĕla, mriŋ pitunanipun, piŋ lima milu rumĕkṣa, pakéwuhé kapiŋ nĕm amurinani, rusaké prajanira.
14. lamun datan maṅkonowa kaki, yĕkti karam lamun sira paṅan, awit niṅgal mriŋ khukumé, tĕtĕp kaniṣṭanipun, añamahkĕn prabawa kaki, ñudakakĕn darajat, kaŋ maṅkono kulup, yèn kĕna dèn siṅgahana, aṅgĕgawa maraŋ luluhurmu sami, nirkĕn traḥ witaradya.
15. rèhné iṅsun wus ṅlahirkĕn kaki, iṅkaŋ dadi surasaniŋ driya, maraŋ sira sadayané, iŋ mĕṅko wĕkas iṅsun, dèn arukun sahéka kapti, lawan sadulurira, kaŋ èstri myaŋ jalu, kaŋ paḍa nuṅgal sudarma, aja ana ala iṅalanan sami, iṅkaŋ mawa sarana.
16. sakiŋ waḍag tuwin sakiŋ ṛĕmit, sumawana sakiŋ liyanira, lahir batin kaŋ agawé, durta sasaminipun, sapa iṅkaŋ gĕḷĕm ṅawiti, kĕna upataniṅwaŋ, ywa maṅgiḥ rahayu, nĕmua bĕnduniŋ sukṣma, poma poma sira kabèḥ aja lali, èstokna ujar iṅwaŋ.
17. iŋ wusana pandoṅaku kaki, maraŋ sira kabèḥ atmajèṅwaŋ, iṅkaŋ rahayu sĕdyané, dinawakna kaŋ umur, winantua nugraha jati, sinuṅana kamulyan, prapta kaŋ kinayun, kaŋ maraŋ iŋ karaharjan, nir bañcana rinĕkṣahèŋ maha sukci, salamĕt doñèŋ kérat.
18. wanti wanti wulaṅiŋ sudarmi, darma tama tĕmĕn tinumana, manuṅsa maṅka sĕmbahé, mariŋ hyaŋ maha aguŋ, iṅkaŋ aguŋ asiḥ dumadi, dadiniŋ srat cinitra, ditya manis nuju, limalas iṅkaŋ candrama, sasi sura tahun dal saṅkalèŋ warṣi, déwa trus mulaŋ putra.
