1. ḍaṇḍaŋgula
2. mugèŋ lalaṭi nabi ibrahim, nabi musa astanané grana, nabi ṅisa astanané, anèŋ caṅkĕm puniku, nabi yakup iŋ baluŋ nĕṅgiḥ, nabi yusup punika, astanané suṅsum, nabi ayup usus gènnya, bagéṇḍa li astanané anèŋ kulit, iŋ dagiŋ abubakar.
3. ṅumar limpa astananirèki, anèŋ pupusuḥ nabi suléman, nabi kilir astanané, anèŋ makripat iku, laṅit pipitu kaŋ dipun gèni, nabi musa bun bunan, jaja pusĕripun, iṅkaŋ minaṅka kapala, lintaŋ kamal anĕṅgiḥ wastanirèki, kayu awitiŋ ñawa.
4. sajaratil mustapa iŋ alit, pasu kiwa tĕṅĕn gunuŋ kĕmbar, gunuŋ turṣina tĕgĕsé, nĕṅgiḥ pucukiŋ iruŋ, lambé bétal mukadas nĕṅgiḥ, watu sajidin ika, tĕgĕsé iŋ untu, lambé ḍuwur ṅisor ika, balé ṅaras uwot siratal mustakim, apan gĕtĕriŋ ilat.
5. uwaŋ tĕṅĕn kaŋ iṅaran masrik, uwaŋ kiwa iŋ mahrip punika, iman sapiṅi ḍaḍané, iman maliki iku, pan guguṅé wontĕn iŋ gigir, iman kambali apan, lambuŋ tĕṅĕnipun, kanapi iŋ lambuŋ kiwa, pan iŋ mĕkaḥ lak lakan iṅkaŋ amĕṭil, ṅaras kurṣi bun bunan.
6. ṅaras lambé loḥ kalam iŋ laṭi, lohkilmapul punika paṅucap, tĕlaga kalti ḍasaré, iṅkaŋ anèŋ pupuluŋ, susu kiwa kĕkuluŋ ati, iṅkaŋ tĕṅĕn punika, pasalatan rasul, kaŋ mugèŋ jajantuŋ ika, pan puniku iṅaran aldaka wiṅit, iṅaran bétal mukadas.
7. sèḥ sumiran añjĕṅĕr tan aṅliŋ, sakalaṅkuŋ ṅuṅun jro wardaya, woŋ iki tĕḍas kawruhé, nulya don luṅa ṅlaṅut, duruŋ maṅké dadi puniki, tĕgĕsé wis atatag, pĕñjérahé kawruḥ, sèḥ sumiraŋ awĕcana, dawĕg anak mara caritakna maliḥ, iḍĕp iḍĕp adana.
2. asmaradana
1. jatiniŋ sahurira ris, wontĕn woŋ nĕpi samodra, tan adarbé wujud roro, iṅkaŋ kahèṣṭi iŋ manaḥ, muŋ hyaŋ kaŋ maha mulya, alami anèŋ iŋ ṅriku, lali naḍaḥ lawan néndra.
2. dèn pĕsu rahina wĕṅi, pamĕndĕṅé sarta salat, tan kaṇḍĕk sĕmbaḥ pujiné, malahèŋ ṅaliḥ paṅgonan, pitĕkur wontĕn sonya, laminya kalaṅkuŋ laṅkuŋ, kaŋ pinandĕŋ muŋ hyaŋ sukṣma.
3. tan towaŋ sĕmbahiŋ widdhi, kaŋ ana iŋ waka sonya, aṅèṣṭi mriŋ hyaŋ linuwèḥ, tan ana drigama kétaŋ, amuŋ paṅèṣṭinira, tanna pandĕŋ liyanipun, kaŋ kèṣṭi muŋ hyaŋ minulya.
4. kaŋ amurbèŋ jagad sigiḥ, tan ana iṅkaŋ rinasa, kalbu iṅakĕn wismané, puniku laṅkuŋ waṣpada, sampun aroro tiṅal, dèn kaṛĕsa iman makṣum, anulak kaṅgĕp suṅkawa.
5. dadya sinuŋ tiṅal ghaib, uniṅa surupiŋ pĕjaḥ, kasĕmbadan lan èsmuné, pan sampun aṅraga sukṣma, sampun ṅakĕn wisésa, amuji pribadinipun, datan pĕgat sanalika.
6. jiwa ragané tan kèkṣi, wusiŋ aṅakĕn priyaṅga, sakiŋ gĕnturiŋ tapané, tĕrawaṅan manahira, bhumi laṅit kadriya, swarga naraka kawĕṅku, dyan pĕñcar putra sakawan.
7. samya kinèn apraŋ sabil, saḍèrèkipun sakawan, ki saréṅat pambayuné, pĕṅguluné ki tarékat, panĕṅahé kakékat, ki makripat kaŋ waruju, prasamya prawirèŋ yuda.
8. saréṅat si anèŋ jurit, pĕraboté sarya séta, madĕg maṛĕp iŋ kéblaté, tansaḥ amuji takbirṇya, niyat praŋ sadayanya, muṅsuḥ éwon datan mundur, islamé makṣiḥ akĕkaḥ.
9. tarékat si anèŋ jurit, paraboté sarya jĕnar, muṅkul wus maṛĕk kéblaté, dènnya niyatiŋ yuda na, ṅiŋ salatnya tan owaḥ, praŋ lan kapir datan mundur, imané sampun pinasaŋ.
10. kakékat si anèŋ jurit, paraboté kapuranta, wus maḍĕp kéblat wujudé, waṅsulan tan kĕna owaḥ, ṅuṛĕpi tuduhiŋ hyaŋ, olaḥ lan kapir tan mundur, tokidé sampun pinasaŋ.
11. makripat siyagèŋ jurit, sarta cĕmĕŋ paṅaṅgènnya, ḷĕṅgaḥ cĕṅĕŋ iŋ kéblaté, wujud sawiji mriŋ sukma, ati laṅgĕŋ tan owaḥ, nĕmpuḥ byatiŋ woŋ tan mundur, makripaté wus pinasaŋ.
12. muṅsuḥ kapir aṇḍatĕṅi, ginagila sinurakan, datan gumiṅsir manahé, pan muṅsuḥ kapir akaṭaḥ, tan kéṅiŋ iŋ sañjata, muṅsuḥ kapir saṛĕŋ nĕmpuḥ, kapir tan kuwat yudanya.
13. mukmin islam kaṭaḥ cicir, tinuñjĕl iŋ muṅsuḥ kopar, kapir kaṭaḥ tumpĕs ṛĕké, woŋ kapir kalaḥ praṅira, ḷĕbur tanpa wilaṅan, sakariné samya takut, mañjiŋ islam sami séba.
14. wus naṇḍaŋ kalimaḥ kaliḥ, kabèḥ wus ṅucapkĕn sadat, mĕntas praŋ sayaḥ karoné, wus suci kaŋ islam añar, adus mahin lahiran, pan sampun séba sadarum, mriŋ saréṅat dadi nata.
15. gumuyu abĕlik bĕlik, sèḥ sumiraŋ duk miyarṣa, jatiĕniŋ caritané, wusana ari andika, dadya gèr gé bañjurṇa, hyaŋ sukṣma caritanipun, mĕtokkĕn wijiliŋ sabda.
3. mijil
1. kawruhana iŋ hyaŋ purbajati, iku dènnya wiboḥ, aṅlir ṛĕtna muṅgèŋ ĕmbanané, lir anopèŋ tiṅalé sĕjati, naṅiŋ tan kahèkṣi, pan dulu dinulu.
2. paṅloṅiŋ hyaŋ sukṣma purbajati, mukṣa lir tan katon, kĕṛĕm kaṇḍĕm tiṅalé jatiné, iya margané lamun pinaṅgiḥ, gènnya aṅulati, sakiŋ pucuk gunuŋ.
3. iŋ sukmané anèŋ ḍirinèki, adat nora wĕroḥ, dyan tumurun saṅkiŋ ardi agé, nĕmĕn awas pan iṅéliŋ éliŋ, mĕkṣa tan kapaṅgiḥ, dadi braṅta wuyuŋ.
4. naṅiŋ wuyuŋ tan narimèŋ kapti, kaṛĕmirèŋ kono, saya jatmika sĕmu liriṅé, samya ṅliriŋ iŋ tiṅal kaŋ ghaib, samudananèki, iŋ tĕmbé katĕmu.
5. sukṣma iku tan adoḥ iŋ ḍiri, makuwon iŋ ĕṅgon, mapan adoḥ yèn dèn adohaké, nĕṅgiḥ paṛĕk dèn cĕlakna siṅgiḥ, mila tan kahèkṣi, kasĕlana imbu.
6. saya paṅgiḥ ya tanna kĕpaṅgiḥ, anèŋ jro kaḍaton, pan kaliṅan iŋ sawab jĕrṇihé, poma paduka papak piranti, katuṅkul gĕŋ giṅsir, dèn tĕkakna rawuḥ.
7. tarékaté dalan jroniŋ panti, paṣṭi nora méṅgok, kakékaté puniku coloké, myaŋ makripat ñatané kapaṅgiḥ, anèŋ gĕḍoŋ napi, ésbat tuṅtuŋ guyu.
8. sandi praléna wastanya siṅgiḥ, asmara siḥ nèŋ gon, iki ika sampurṇa jatiné, bagya katurun kaŋ dèn turuni, sawab ñata nabi, rasul kaŋ panutup.
9. éwamaṅkana osikiŋ, sukṣma purba ṛĕko, pratélakna ika sadayané, sĕjatiné iku luwiḥ bĕcik, liŋ aliṅan kapti, aṅlimputi iku.
10. swara lawani satru sakalir, lamun tyasnya coṇḍoŋ, bhumi sapta laṅit pitu déné, swarga nraka ṅaras lawan kurṣi, balé ṅaras tuwin, sĕjatiné tĕrus.
11. kaŋ loḥ kala nĕṅgiḥ sampun déniŋ, sukṣma nur iŋ kono, iku cĕlak èmpĕré wujudé, gĕḍoŋ sukṣma aṅkĕr luwiḥ wĕrit, yèn tan wruha kapir, dèn wĕruha kupur.
12. apan iku ayuna maṅrĕti, saguŋ kojaḥ iṅoŋ, sukma iku anukma gunané, datan kéṅiŋ anukma sĕjati, éwuḥ patrapnèki, mĕlaku ginuṅguŋ.
13. yèn ginuṅguŋ punika sĕjati, aṅèl yèn kalakon, anukmaa mriŋ hyaŋ kaŋ aluwèḥ, luwiḥ utama ginuṅguŋ siṅgiḥ, maraŋ sukṣma jati, kalaṅkuŋ ginuṅguŋ.
14. sakèhiŋ puji kalawan bĕkti, lawan laku ṛĕko, dèn asujud iŋ kĕlakoané, iku cĕpak èmpĕré kapaṅgiḥ, mriŋ hyaŋ maha sukci, adam wujudipun.
15. iṅkaŋ rasa wujutirèŋ kalbi, amrĕm iṅkaŋ katon, wujud iku dudu iŋ yĕktiné, wujut kaluwihan kaŋ sĕjati, wujudé kaŋ paṣṭi, éwuḥ yèn dinulu.
16. apan éwuḥ iŋ ujar puniki, pan ayun waṣpahos, sèḥ sumiraŋ aris iŋ sahuré, sampun lamakan kawruḥ sun iki, mèsĕm saŋ jatiniŋ, animbul iŋ wuwus.
4. maskumambaŋ
1. giḥ puniku tĕkṣiḥ séwaḥ dat sĕjati, iŋ karṣaniŋ sukṣma, amayaṅakĕn iŋ kapti, ñata awujud mukamat.
2. saŋ hyaŋ sukṣma aṅandika tinsa kamil, déné ananira, awakira awak mami, urip iṅsun urip sira.
3. cĕrmin siji tan paṛĕŋ ṅilowa siṅgiḥ, wawayaṅan tuṅgal, pan paṅawak tuṅgal jati, rupa tugal kinĕmulan.
4. sasolahiŋ kawula solahiŋ gusti, karṣané priyaṅga, ḷĕstari karṣaniŋ gusti, karṣaniŋ hyaŋ kaŋ wisésa.
5. yèn dinulu mukamat alaḥ kahèkṣi, yèn dinulu alaḥ, mukamad iya kahèkṣi, pan tuṅgal kaananira.
6. sampun katrap mukamad andika nabi, ḷĕpasiŋ paniṅal, tan ana kawula gusti, amaṅéran lagi nora.
7. iṅkaŋ nala kadi pandam aran rukmi, barisiŋ kañcana, kakĕn pamujiniŋ kapti, tanna ganti pujènira.
8. yèn ginulaŋ solahé saya ṅaṅĕni, malaḥ lali karya, ñirṇakakĕn kaŋ prihatin, tan pĕgad aṅguŋ kasmaran.
9. yèn kapaṅgiḥ kalawan jiwanirèki, sadina guŋ suka, asuka kalaṅkuŋ ĕntiŋ, yèn sampun kawĕṅku sadaya.
10. tansaḥ paṅgiḥ lali jiwa raganèki, tan adarbé karṣa, tan ana karṣanirèki, aṅiŋ karṣaniŋ paṅéran.
11. saṅsaya sru taṅisé kaduk iŋ liriŋ, murca jiwa raga, yayaḥ pĕjaḥ tanpa kanin, déniŋ pituduḥ élokira.
12. marmanipun tan awas karṣané gusti, déniŋ nĕpsu hawa, agawé sĕrikiŋ ati, aṅaliṅi iḍĕpiŋ tyas.
13. maṛĕm asiḥ iŋ samudananirèki, kaŋ bĕkti ginañjar, iŋ swarga mulya tan sipi, pinĕkṣa tur kinasihan.
14. kawruḥ dana raganira dipun suci, ĕmbanana arak, payuṅana braṅta kikin, ḍasarana sabar drana.
15. iŋ kaduñan nĕrakanirèku maṅkin, woŋ asiḥ iŋ duña, asikara awaknèki, pan sukĕr apĕṅalira.
16. kaya baraŋ sabaraŋ karyanirèki, karṣané priyoga, duña suci lahir batin, amal kalal iṅupaya.
17. sèḥ sumiraŋ samana aṅraṅkul aris, sarwi awĕcana, anak wus ḷĕga iŋ galiḥ, saṅkiŋ siḥ pituturira.
18. iṅkaŋ mugi kula bisa aṅlakoni, jatiniŋ turira, yèn paṛĕŋ kularṣa pamit, arṣa dugèkkĕn lalampaḥ.
19. sèḥ sumiraŋ wĕcanané pahit gĕṇḍis, yèn raharjèŋ lampaḥ, mugi waṅsula mariki, tatuwia mriŋ kaŋ tapa.
20. jatiĕniŋ sahurira aṅécani, yèn wilujĕŋ lampaḥ, maṅsa wandéya mariki, muŋ ṛĕké doṅa andika.
21. salamĕté lampaḥ kawula iŋ margi, ya ta jawabira, jatiniŋ sigra lumaris, sèḥ sumiraŋ ṅatĕr jaba.
22. saŋ jatiniŋ lajĕŋ lampahé lumaris, ya ta makṣiḥ lama, makṣiḥ lam lamĕn iŋ kapti, mariŋ iŋ tatamonira.
23. apan makṣiḥ ṅrĕraṅu mariŋ kaŋ lumaris, ya ta kaŋ lumampaḥ, andaruŋ lampahirèki, aṅlir ḍaṅḍaŋ tanpa coca.
5. ḍaṇḍaŋgula
1. nusup nusup iŋ papan arumpil, siluk siluk ujuṅiŋ añcala, anĕrajaŋ juraŋ pèrèŋ, tumurun jroniŋ tĕrjuŋ, pan sumĕṅka kaŋ suṅil suṅil, séla gĕŋ piṅgir juraŋ, aṅgawiŋ tumiyuŋ, tumawiŋ tinon iŋ tawaŋ, juraŋ sigroŋ aṅaṛĕpkĕn paraŋ miriŋ, laṇḍĕp kadya suléwaŋ.
2. pucak ardi pan sinuṅan masjid, iṅubĕṅan iṅkaŋ sĕkar sĕkar, laṅkuŋ ṅambar iŋ gandané, wastanira kaŋ gunuŋ, nĕṅgiḥ ardi paṇḍalasari, cinatur kaŋ paḷĕṅgaḥ, paṇḍita binagus, wastanipun sèḥ sumitra, ḍépokira pan kadi cĕṇḍana sari, muŋ kaliḥ sabatira.
3. wastanira saŋ loṭo pan ḍisil, marmanipun walu sèḥ sumitra, ḍaḍukuḥ iŋ kono ṛĕké, apan lakoni tuduḥ, kinèn ḍukuḥ cĕṇḍana sari, iŋ bésuk apan ana, woŋ tĕka mĕrtamu, yèn ṅakĕn iŋ wanasĕkar, laḥ uṅsĕdĕn iŋ kawruḥ iṅkaŋ sajati, paṣṭi paḍaŋ tyasira.
4. marma lami dènira aṅanti, sèḥ sumitra anèŋ iŋ aldaka, pan mèḥ ṅlalu paṅantiné, ya ta iṅkaŋ winuwus, jatiĕniŋ pan arṣa mampir, batin arṣa uniṅa, maraŋ kaŋ piluṅguḥ, samana laju lampaḥnya, miṅgaḥ arga samana pak loṭo lagi, ñirami kaŋ pĕṭétan.
5. apan kagyat dènira niṅali, pan pak loṭo pan kaḍatĕṅan, sigra dadan apitakèn, nama myaŋ wismanipun, jatiĕniŋ wus awawarti, wisma tuwin kaŋ nama, pak loṭo glis maṇṭuk, wus paṅgiḥ lawan saŋ tapa, loṭo matur yèn wontĕn tiyaŋ aprapti, arṣa paṅgiḥ paduka.
6. warti satriya sakiŋ wanasari, kados iṅkaŋ paduka arṣa, kĕtawis mañcur cahyané, sèḥ sumitra agugup, arṣa mĕṭuk maraŋ kaŋ prapti, ya ta wahu katiṅal, sèḥ sumitra gupuḥ, gènira ajawab taṅan, uluk salam jatiĕniŋ anahuri, ya ṅalahikum salam.
7. apan lajĕŋ astané kinaṇṭi, loṭo ḍisil kinèn gĕlar klasa, tanèn iŋ surambi bahé, ya égal kaŋ iṅutus, laṅkuŋ gugup solahirèki, samana sampun ḷĕṅgaḥ, wus tata aluṅguḥ, sèḥ sumitra atatanya, datan ñana yèn kapaṅgiḥ jatiĕniŋ, pĕrṣasat maṅgiḥ sĕsotya.
8. pan kawula satriya wanasari, pun jatiniŋ wastanta iṅwaŋ, marma kawula maréné, sayaḥ lan ayun wruḥ, iŋ ḍukuhé ṛĕké pun yayi, sèḥ sumitra sahurira, iṅgiḥ laṅkuŋ nuhun, laṅkuŋ bĕja kĕmayaṅan, paduka prapti, marma sèwu nugraha.
9. sèḥ sumitra apan awawarti, marmanipun anèŋ iŋ aldaka, wus tinutur sadayané, jatiniŋ mèsĕm iŋ kalbu, apan mahrip wañcinirèki, ya ta ḷĕkas asalat, prapta ṅisanipun, sabakdanira anulya, sabat kaliḥ apan sampun dèn kĕjèpi, añahosakĕn ḍahar.
10. kaŋ iṅatak woŋ kaliḥ nulya glis, cahos kĕṇḍi lawan sĕkul pañjaŋ, gaguḍaṅan pan ulamé, wus sinambrama sampun, jatiĕniŋ sigra ṅécani, sigra ḷĕkas anaḍaḥ, gènnya ḍahar sĕkul, sasampunira kaḍahar, gantya wahu ḍaḍaharan kaŋ sumaji, samya muṅgèŋ iŋ pañjaŋ.
11. ri sampunnya ḍahar saŋ jatiniŋ, tanya wahu maraŋ sèḥ sumitra, pun yayi lami nèŋ kéné, sĕmbayaŋ rintĕn dalu, lan amuji rahina wĕṅi, punapa sampun wikan, kaŋ sinĕmbaḥ iku, tuwin sakèḥ pujènira, sèḥ sumitra añjugul aṅraṅkul sikil, kakaŋ dèrèŋ uniṅa.
12. piṇḍo damĕl ki raka puniki, déné wahu wus matur kawula, marma kawula nèŋ kéné, aṅlakoni pituduḥ, pan paduka sun arṣi arṣi, paduka paḍaṅĕna, kaŋ basa puniku, wĕlasa ḍatĕŋ kawula, laṅkuŋ aṅrĕs wahu dènira miyarṣi, saŋ braṅta aris nabda.
6. asmaradana
1. yèn yayi nĕmbaḥ amuji, pujiné katur iŋ sapa, yèn katura paṅérané, apan néra awĕruha, lan nora wrĕna rupa, tanpa gawé sĕmbahipun, aṅura sira ṅupaya.
2. lamuna ṅaturṇa puji, mriŋ paṅéran cumĕṇṭaka, dèn aṅgĕp iŋ papaḍané, ya alaḥ kaŋ amisésa, amuŋ andikanira, ayun wruḥ wiwitanipun, kaŋ anĕmbaḥ kaŋ sinĕmbaḥ.
3. puji sintĕn kaŋ darbèni, pan puji pujiniŋ allaḥ, kawula nora daduwé, sĕlawasé tan kawasa, miwaḥ paṅgawé kita, tuwin badané sakojur, aṅi alaḥ iṅkaŋ katon.
4. pundi kaŋ iṅaran puji, yĕktiné puji punika, kanugrahan sajatiné, kaŋ tumiba iŋ kawula, tĕgĕsé kanugrahan, nĕṅgiḥ urip tĕgĕsipun, pan urip uripé sapa.
5. lamun uripiŋ hyaŋ widdhi, tan urip kalawan ñawa, tĕgĕsé ñawa jatiné, kaŋ tumiba iŋ kawula, kaŋ aran kanugrahan, nĕṅgiḥ urip tĕgĕsipun, nĕṅgiḥ uripiŋ manuṅsa.
6. pan iya jatiniŋ urip, puniku yun ṅawruhana, dèn agĕŋ iŋ panrimané, aṅèl jĕnĕṅiŋ agĕsaŋ, tĕgĕsé woŋ agĕsaŋ, kasérénan iŋ tatĕlu, iman tokit lan makripat.
7. lamun ora aṅawruhi, yayi iŋ tigaŋ prakara, iman tokit makripaté, pĕṣṭi puṇḍĕs nora gĕsaŋ,...,...,....
8. tĕgĕsé iman lan tokit, kaŋ iman paṅèstonira, kaŋ ṅèstokkĕn paṅérané, paṅéran ikaŋ kuwasa, kaŋ murba pĕkĕnira, tan wontĕn roro tatĕlu, aṅiŋ allaḥ kaŋ atuṅgal.
9. pundi kaŋ iṅaran tokit, apan tuṅgal kajatènnya, paṅlĕburané roroné, gusti kalawan kawula, yèn tuṅgal kadiparan, yèn béda pratikĕlipun, mapan nora pisaḥ pisaḥ.
10. sĕlamĕt gèné ṅawruhi, tĕgĕsé tokit punika, tuṅgal mariŋ kawulané, kawula iku tan ana, jĕnĕṅaniŋ kawula, sĕjati jatiné suwuŋ, tanpa rupa tanpa tikaḥ.
11. tĕgĕsé makripat nĕṅgiḥ, sampun awas iŋ paṅéran, tĕgĕsé awas ṛĕtiné, kaŋ awas puniku sapa, pan jĕnĕṅiŋ kawula, wuta tuli bisu suwuŋ, tan ana kuwasanira.
12. katuriŋ sĕmbaḥ lan puji, pan katur iṅkaŋ sarira, pan badan alaḥ jatiné, tan ana sĕmbaḥ sinĕmbaḥ, pundi kaŋ aran alaḥ, araniŋ wajibul wujud, sĕjatiné iṅkaŋ ana.
13. namaniŋ sĕmbaḥ lan puji, pan kasraḥ iŋ panarima, pan kuniṅan salawasé, déné paṅéran kaŋ mulya, awon pan koṅsi tuwa, kĕdaḥ bĕcik tarimèku, aṅèl jĕnĕŋ panarima.
14. nĕṅgiḥ kaŋ nĕmbaḥ amuji, kĕñataaniŋ datolaḥ, pan dudu basané ḍéwé, mantĕpna mapan narima, artiné panarima, tanpa polaḥ tanpa wujud, lir saraḥ anèŋ lahutan.
15. pan iku ayun ṅawruhi, aṅèl yayi woŋ sĕmbayaŋ, kaŋ rayi aris sahuré, laḥ tuwan bañjurṇa pisan, iŋ sadat kapĕjahan, jatiniŋ sahurira rum, amucuṅkĕn paṅawikan.
7. pocuŋ
1. yun ṅawruhi iŋ pati sadat satuhu, tan béda ṅagĕsaŋ, pan tan ana polahnèki, polaḥ sakiŋ karṣané hyaŋ maha mulya.
2. sadat jati iṅgiḥ sĕmbaḥ iṅgiḥ lampus, sirṇané kaŋ polaḥ, naṅiŋ kaŋ sĕdya ṅawruhi, sayĕktiné tuṅgal kaŋ adarbé polaḥ.
3. yèn asadat nir saliriŋ dumadyèku, tan ana paṅéran, sabĕnĕré kaŋ pinuji, apan naṅiŋ hyaŋ sukṣma kaŋ maha mulya.
4. sadat iku nĕṅgiḥ gĕsaŋ kaŋ satuhu, giḥ puniku aran, giḥ puniku kaŋ ṅarani, sayĕktiné tuṅgal iṅkaŋ iṅaranan.
5. yèn wis dadi sadaté datan pandulu, pan pujiné nora, tan ana puji pinuji, pan puniku nĕṅgiḥ sadat iṅkaŋ tuṅgal.
6. sipat iku datolaḥ kaŋ maha luhur, lawan maha mulya, añjatèkkĕn iŋ datnèki, sayĕktiné iŋ ñawané kaŋ utusan.
7. sadat iku tanpa tĕpi lahut aguŋ, kaŋ kaṛĕm iŋ sadat, puniku rasaniŋ pati, uripipun nora kĕna iŋ palastra.
8. iku sadat gusti kawula yèn paṅguḥ, nĕṅgiḥ gènnya pisaḥ, patĕmona kaŋ sĕjati, giḥ puniku patĕmoné iṅkaŋ pisaḥ.
9. sadat iku patĕmoné kaŋ satuhu, tan ana mamaḍa, timbaṅané kaŋ sĕjati, iŋ tĕgĕsé sadat iku tan lawanan.
10. ilaŋ sadat akèḥ wiwilaṅanipun, nĕṅgiḥ tanpa wilaŋ, sadat tuṅgal kaŋ wus pĕṣṭi, ya kaŋ abot gurṇitanirèŋ badannya.
11. kaŋ wus pĕṣṭi sadaté tanpa dinulu, paniṅaliŋ sadat, aṅĕbĕki raga giri, giḥ puniku nĕṅgiḥ iṅaranan sadat.
12. sadat iku aguŋ paṅabĕktènipun, kaŋ tansaḥ iŋ sadat, mintir nalané kabĕsmi, apan uga duña kérat kabĕnĕran.
13. aṅrimaṅi sadaté kaŋ maha luhur, liriṅiŋ hyaŋ sadat, tan ana paṅéran jati, apan amuŋ iṅkaŋ alaṅgĕŋ wisésa.
14. ulatana sadat sapisan kaŋ tuhu, yèn sampun katĕḍak, tan towoŋ dènnya ṅawruhi, apan iku patĕmoné lampaḥ ñata.
15. éwuḥ tĕmĕn kaŋ sadat karasèŋ kalbu, akèḥ milya ṅucap, sadat séos kaŋ pinaṅgiḥ, paṅucapé déné kĕsasariŋ tuwan.
16. dudu basa dudu rasa kaŋ dat tuhu, dudu cipta rasa, kaŋ nugraha kaŋ dèn paṅgiḥ, giḥ puniku guru sampurṇaniŋ raga.
17. sanalika iku kumpula satuhu, iŋ nalika pélak, tan ana kawula gusti, woŋ puniku kaṛĕmiŋ alaḥ kéwala.
18. sadat roro tuṅgaḷĕn hyaŋ kalihipun, lan sĕdyané tuṅgal, lan sĕdyané saŋ dumadi, pan puniku sĕdyané ḍéwé kaŋ mojar.
19. pan puniku anané iṅkaŋ satuhu, añana déwata, tan ana iŋ bhumi laṅit, apan ora nana iŋ ṅantara.
20. tan iŋ swarga naraka iŋ ĕṅgènipun, anané loḥ kalam, tan iŋ aran tan iŋ kurṣi, ḍiḍiŋ jalal apan iya nora nana.
21. kawruhana anané hyaŋ sukṣma tuhu, aṅiŋ ananiŋ hyaŋ, ayun ñatakkĕn kaŋ ḍiri, lan malihé yun ñatakkĕn ḍèwèkira.
22. sruniŋ karṣa iṅaran apĕṅal tuhu, yĕkti sira ñata, awas aniŋ ṅaliḥ ḍiri, upamakna kadi aṅilo padésan.
23. yĕkti awas iŋ rupanira satuhu, énaké tumiṅal, amawas rupa pribadi, iya iku iṅkaŋ iṅaranan sipat.
24. kaŋ iṅaran tĕmbéné iṅaran iku, iya iṅaranan, giḥ puniku kaŋ ṅarani, sayĕktiné iṅkaŋ andarbèni aran.
25. yun ṅawruhi kaŋ iṅaran sukṣma luhur, pahésaniŋ aran, iŋ sipat apĕṅal jati, apan yĕkti datolaḥ jatiniŋ sipat.
26. kawruhana paṅéran kaŋ ujar luhuŋ, sasĕdyaniŋ nala, tanpa cipta ananèki, giḥ puniku nĕṅgiḥ iṅaranan sadat.
27. iŋ karṣané ayun ñatakkĕn ḍirèku, sartané pahésan, asaṅĕt tĕkané jati, apan iya apan tĕmahan sasotya.
28. iya iku aran roḥ ilapi tuhu, sĕnĕnaniŋ sotya, anĕlahi jagat iki, apan iku ñatané asida guna.
29. kaŋ iṅaran iya kadil apan iku, wawaḍaḥ sasotya, kaŋ iṅaran roḥ ilapi, pan puniku minaṅka rohiŋ utusan.
30. roḥ ilapi ratuniŋ saliriŋ tuwuḥ, sĕnĕnaniŋ cahya, anĕlahi iŋ sĕkalir, apan iya anĕlahi iŋ ṅilapat.
31. jagat iki yèn sinawaŋ tan andulu, aṅiŋ karṣaniŋ hyaŋ, aṅasihi iṅkaŋ asiḥ, iŋ sĕdyané apan ta iŋ manaḥ tuṅgal.
32. duk jinatèn sipat apĕṅal satuhu, sĕjatiné aran, tan ana iṅkaŋ ṅarani, giḥ puniku iṅkaŋ rasa rasulullaḥ.
33. giḥ puniku iṅaranan kaŋ satuhu, sukma tan sinukma, sukṣma kaanané ugi, giḥ puniku yĕktiné iṅkaŋ déwakna.
34. lampahira kaŋ aran déwana iku, mĕnĕŋ tanpa sadat, tan araḥ tan ĕṅgon siṅgiḥ, kaŋ déwana apan mibĕr tanpa ĕlar.
35. iḍĕpira sakĕḍap wus pĕṣṭi iku, mĕkṣiḥ paliṅgihan, lalampahan sèwu warṣi, suprandéné sakĕḍap nétra praptanya.
36. wontĕn maliḥ yayi iŋ wirayat iṅsun, sun myarṣa carita, ana woŋ bĕkti ṅlaṅkuṅi, sĕmbayaṅé apan ta mĕkṣiḥ taruna.
8. sinom
1. wontĕn santri aluk sarak, awasta ki boḍojati, pakaryané nora nana, amuŋ sĕmbayaŋ pribadi, naṅiŋ dèrèŋ udani, juṅkal juṅkĕl siyaŋ dalu, tan kéṅiŋ iṅujaran, kaŋ èstri guŋ briga brigi, dèrèŋ mari sĕmbayaṅé saya dadra.
2. nora pĕṅiŋ woŋ sĕmbayaŋ, bok kira kira pribadi, kaŋ èstri ḍasar braṅasan, sarta sosoté drawili, kaŋ jaḷĕr tan nahuri, luṅané kinabruk tumbu, tumbuné isi jĕnaŋ, baḍé kinarya ñĕkuli, sirahira ki boḍo galuprut jĕnaŋ.
3. tumulya késaŋ bĕlayaŋ, dèn papati raganèki, nulya maṅgiḥ woŋ atapa, aran ki pahésañjali, ki boḍo nikĕl warti, sampun masut aṅgĕguru, anuli kyayi guna, guŋ pitutur rina wĕṅi, ki pahésan akaṭaḥ pituturira.
4. dunuṅkĕn puji panĕmbaḥ, puniku katur hyaŋ luwiḥ, kaŋ rumĕkṣa iŋ sajagad, kaŋ asiḥ sakèhiŋ nabi, miwaḥ sakèhiŋ wali, lan saguŋ mukmin sadarum, woŋ urip aṅguṅguṅa, mriŋ alaḥ sartané wĕdi, yèn maṅkono woŋ iku tanpa gañjaran.
5. sanadyan iŋ woŋ sĕmbayaŋ, nora kĕna ginagampil, lamun nora kabĕnĕran, nora wuruŋ babayani, aṅlir woŋ rabi putri, nora kĕna grusa grusu, lamun dipun pĕkṣaa, nora wuruŋ ñuḍèt ladiŋ, tuwas rusak paṅarahé nora kĕna.
6. wontĕn maliḥ lambaṅira, ṅambil iwak jroniŋ kali, anèŋ tĕḷĕṅiŋ baṅawan, arahĕn iwaké kĕni, naṅiŋ dipun aririḥ, sampun buṭĕk toyanipun, yèn ulam sampun kĕna, sakarṣanta gèn ṅratĕṅi, laḥ sĕmbayaŋ poma dipun prayitna.
7. yèn kala sira sĕmbayaŋ, poma dèn kadi niŋ kali, iya maraŋ kaŋ sinĕdya, dèn kadi aṅilo cĕrmin, rupa iṅkaŋ sajati, awasĕna kaŋ satuhu, pan kaya rupanira, kaŋ anèŋ sajroniŋ cĕrmin, rupanira pan kadi papahès duña.
8. laḥ ki boḍo sun wĕtara, yèn ta sampun nama ṅrĕti, pĕṣṭi nĕmĕn salatira, ḍasar woŋ gugu kapati, ki boḍo awotsari, pintĕn baṅgi saŋ binagus, antuk sawab paduka, tan kétaŋ tilar woŋ èstri, ki pahésan pralambéniŋ babiŋ rapal.
9. sĕjatiné woŋ asalat, kaŋ ñata iŋ sukṣma jati, dèn kadya goné bahita, amèt rasa iŋ sĕjati, ana lambaṅé maliḥ, aṅlayar tĕṅahiŋ lahut, palwanya pan kawratan, kèṛĕm tĕṅahiŋ jaladri, ulihĕna rasa iku iŋ sagara.
10. malaḥ maṅké kaŋ bahita, oliḥ isiniŋ jaladri, maṅkana iṅaran salat, kaŋ ñata iŋ sukma jati, sahosiké wus paṣṭi, iku dadi saladipun, kaŋ duruŋ ṅrĕti salat, ṅibadaḥ rahina wĕṅi, sĕmbayaṅé apan mĕkṣiḥ lalawura.
11. ana kaholiŋ paṇḍita, sahéṅgané saŋ hyaŋ widdhi, iku mèḥ salat kaanan, mriŋ akṣara tigaŋ dèsi, kabèḥ mawi prakawis, kaŋ akṣara tĕluŋ puluḥ, minaṅka ratunira, anĕṅgiḥ akṣara alip, iya iku pralambéné iŋ hyaŋ sukṣma.
12. milanipun ana kuran, sakiŋ sastra tigaŋ dèsi, iku mawi wiwilaṅan, kalimahé siji siji, lan mawi ayat maliḥ, guṅguŋ tigaŋ dasa jus, apa kaŋ nora nana, dèn kaṇḍa iŋ daḷĕm tabsir, paman boḍo puniku dipun waṣpada.
13. lan maliḥ ta kayaparan, sĕmuné akṣara alib, apa ñata apa ora, èmpĕr èmpĕriŋ hyaŋ widdhi, ki boḍo wujud aṅliŋ, nuwun duka saŋ binagus, amba cupĕt kalintaŋ, laṅkuŋ wlas pahésañjati, mriŋ ki boḍo wuwusé lir guladrawa.
9. ḍaṇḍaŋgula
1. tĕgĕsipun rakṣa sirèŋ sigiḥ, iṅkaŋ alip pan kaanan tuṅgal, nora kĕna mati ṛĕké, limpat déniŋ kalaṅkuŋ, iṅkaŋ alip iku ilapi, déniŋ kinarya taṇḍa, karoné iṅaku, iya alip ananira, saduruṅé nora baṛĕŋ nora kari, naṅiŋ kariyiniyan.
2. tĕgĕsé iku niyat sajati, iṅkaŋ alip iku jĕnĕŋ tuṅgal, adam lan kawa kumpulé, adam kaŋ ñata iku, gèné ñatakakĕn birahi, purwa bañu lan ḷĕmaḥ, bañu urip iku, ḷĕmaḥ ñata aranira, wus kaliṅliŋ datolaḥ kaanan jati, yèku jatiniŋ niyat.
3. tĕgĕsipun kaŋ iman sĕjati, rasa tuṅgal kaanané tuṅgal, nora nana paṅérané, tan mañjiŋ mĕdal iku, ananira tuṅgal sĕjati, nora yèn tuṅgaḷĕna, pan wus tuṅgal iku, tuṅgalira tan pantara, alaḥ kabèḥ kaŋ ĕndi dudua iki, iku alip kaŋ iman.
4. déné tĕgĕsé saréṅat siṅgiḥ, iṅkaŋ alip maṅkya wus samĕkta, jabar jèré lan ĕpèsé, jabar jèré kaŋ aguŋ, gèniŋ ñata sipat kaŋ urip, éloké purbanira, tuṅgal urip iku, iya iku urip tuṅgal, uripira tan ana sirṇané siṅgiḥ, iku brĕṣṭa pakara.
5. iṅajèran kaŋ alip puniki, gèniŋ ñata kaŋ iman punika, gèné ñata birahiné, kala birahènipun, sirṇa sira lan iṅsun iki, tuṅgal iṅsun lan sira, béda béda iku, béda lahir tyasnya tuṅgal, rasulullaḥ apan tuṅgal sira jati, yèku birahènira.
6. kabèḥ iku kaŋ cahya linuwiḥ, cahya iku pan ĕṅgèniŋ ñata, kaanan tuṅgal jatiné, cahyané jati iku, kaanané tuṅgal sajati, tumurun dadi cahya, kaŋ tumurun iku, kinarṣakkĕn turunira, kaŋ tumurun muṅgèŋ yayaḥ utĕk siṅgiḥ, bétalmakmur wastanya.
7. duk tumurun cahya iku siṅgiḥ, duk muṅgèŋ baluŋ balané pukaŋ, sulbiyaḥ iku arané, gènira apulaṅyun, karo tuṅgal sĕjatèn siṅgiḥ, jiwa pajiwa nora, nora kapan dudu, aṅléla kacatonira, pandamĕliŋ kakaliḥ pan amumuri, sulbiyaḥ namanira.
8. saduruṅé kaŋ cahya tumihis, sakiŋ alam naptu alip ika, iṅaran gĕḍaḥ kuciné, iṅaran goniŋ nĕptu, saduruṅé birahi mijil, iku sanaké purba, gènira muŋ kayun, datolaḥ sampun kawayaŋ, yèn wus awar anané alaḥ maṅkyèki, nĕptu alip pinaṅka.
9. awar winor maṅké katampan siḥ, ananiŋ siḥ iŋ patugalira, dèn tuṅgalakĕn jatiné, alaḥ lan nabi iku, wujud tuṅgal ayun sĕjati, sĕkaroné uniṅa, tiṅalira bawur, alaḥ lan mukamad ika, ya wus awor paworé lan rasul iki, déniŋ alaḥ mukamat.
10. duk iŋ midĕr sawulan puniki, ana rupa nora nana rukyat, iya alaḥ sajatiné, anut kĕmpĕlé iku, apan ora maṅké kaŋ dadi, pan wus saniṅga pisan, pinaṣṭi puniku, ala bĕciké punika, yèn akĕmpĕl sastrané kabèḥ puniki, sĕmbada pĕkĕnira.
11. pataŋ puluḥ dina pan kaliṅliŋ, dadya tiṅal lawan pamiyarṣa, iṅaran alaḥ jatiné, jabrahil wiyosipun, pan iṅakĕn gagĕnti siṅgiḥ, kinarya wawayaṅan, iṅutus sirèku, ḍatĕŋ sakèhiŋ manuṅsa, akèn salat lan anĕbut sukṣma jati, lahilaha ilullaḥ.
12. satus salikur pinapan dadi, insan kamil namané punika, jumaat kĕtiṅalané, alahu akbar iku, kaguṅané sampun damĕliŋ, kawruḥ jumaat ika, sapandulon nĕṅguḥ, insan kamil purwanira, iŋ tulisé samĕktané iku dadi, bisu tuli aniyat.
13. darbé nétra nora aniṅali, apa nora iya amiyarṣa, napas amĕdal iruṅé, tan napas jatènipun, pañjĕnĕṅanira narpati, ratu prabhu satmata, aṅléla puniku, pan ratu iŋ ḍèwèkira, iŋ gĕḍoṅé iṅaranan insan kamil, sĕmbada pĕkĕnira.
14. iṅaranan nabi alaḥ siṅgiḥ, duk satus salikur dina ika, iŋ kono sapa réwaṅé, paṅaṅgo sarwa alus, tur tan ora iṅaṅgèn siṅgiḥ, sampun wuta kéwala, purik sĕmonipun, déné kinèn ḍèwèkira, apan réwaŋ sinuṅan rasa kakaliḥ, tan adoḥ iŋ sarira.
15. samĕktané lan sajènirèki, sampun tumindak jabaniŋ kiṭa, iṅaran jaliratiné, nora tĕmu tinĕmu, taṇḍanira maṅkya iŋ wĕṅi, marmanira rahina, datolaḥ tumurun, kabèḥ samĕktané dadya, kawruhana paman boḍo lambaŋ puniki, aywa sira pépéka.
16. sèḥ sumitra wahu saṛĕŋ myarṣi, iŋ kaṇḍané iŋ jatiniŋ punika, gapyuk aṅraṅkul padané, sarya ris aturipun, laḥ ta kakaŋ bañjurṇa maliḥ, manaḥ amba mèḥ paḍaŋ, saṛĕŋ myarṣa wahu, saguŋ pitutur paduka, jatiĕniŋ añjèrèhkĕn kawruḥ maliḥ, kawuri babiŋ salat.
10. paṅkur
1. laḥ ta yayi kawruhana, nĕṅgiḥ kojaḥ sakiŋ ṅusman iŋ ṅuni, saŋ ambiya namanipun, yèn kawruḥ ciptanira, woŋ puniku duruŋ islam jatinipun, tanpa sadat tanpa salat, apan ta pahi pan iṅgiḥ.
2. paṅérané yèn wĕruha, sarirané ḍéwé nora udani, dènira sĕlam puniku, imané pan imanan, duruŋ tĕka jatiné manuṅsa iku, sahéṅga satu sĕmbawa, manuŋ iṅkaŋ sajati.
3. kaŋ abuka ciptanira, iŋ woŋ édan iṅkaŋ daluya puniki, dipun grahita sirèku, sĕmuné dèn karasa, sampun salaḥ tampa kaŋ baṅsa puniku, lir tigan anambĕr ḍaṅḍaŋ, patiné datan kahèkṣi.
4. sĕṅadi amaṅsa siṅa, siṅa ḷĕbur tan wruḥ sariranèki, dĕrkuku ṅĕmuli iku, jagat ḷĕbur wus sirṇa, pan kaliṅan iṅkaŋ niṅali puniku, gĕlaṭik muni gĕnturan, surya lintaŋ kaŋ ṅaliṅi.
5. surya sasi tanpa polaḥ, suṛĕm datan katiṅalan puniki, cahyané suṛĕm kalimput, gaṅsir nimpèni sigad, jagad sirṇa kapisanan ta puniku, iku pan ayun grahita, kaŋ baṅsa puniku ghaib.
6. manawi kaŋ nĕdya pĕjaḥ, déné nora lawan woŋ iŋ duñèki, dudu alam laṅgĕŋ iku,...,..., lir ĕṅgané ta caṅkrama, malaḥ nèŋ duña puniki.
7. sahéṅga ta woŋ luluṅan, mĕkṣiḥ anèŋ iŋ dudunuṅan puniki, marmayun waṣpada iku, tan kĕna ginagampaŋ, ayun awas nĕṅgiḥ sulaŋ surupipun, apan akèḥ woŋ kapalaŋ, kĕpalaŋ bapiŋ kabatin.
8. yèn kĕmbaṅa kĕmbaŋ suṅsaŋ, luwiḥ bĕcik sinawaŋ aṛĕspati, ṅiŋ tan wontĕn pamrihipun, kaŋ wus maliḥ sasmita, yèn kĕmbaṅa cĕpaka upamènipun, bĕcil lamun tiniṅalan, samĕkta lan gandanèki.
9. ana ratu guŋ prakosa, aparéntaḥ mriŋ wadya aguŋ alit, naṅiŋ tansaḥ ṅawulèku, karèḥ sakèhiŋ bala, pan sadaya sinuwitan mriŋ saŋ prabhu, sakaṭahé wadyabala, tan wontĕn kaŋ dèn laṅkuṅi.
10. anané saha tamakan, datan èstri wadiné lanaŋ siṅgiḥ, kombaŋ aṅlèŋ tawaṅipun, mriḥ maduné pratéla, ḷĕmbu nusu iŋ anaké ḍéwé iku, sarta kaŋ surasa mulya, sĕminé galiṅgaŋ jati.
11. awèḥ ganda rasa mulya, yun grahita iŋ manaḥ kaŋ sayĕkti, ujar iku luwiḥ luhuŋ, lumpuḥ ṅidĕri jagad, pan si cébol aṅgayuḥ wulan puniku, kaŋ wuta atuduḥ marga, basa puniku aruṅsit.
12. lawaṅé sawarga ika, iṅkaŋ mulya tan wruḥ marganirèki, woŋ bisu amĕgat padu, sirṇa gusti kawula, dèn grahita sĕmuné woŋ muḍa puṅguŋ, sasmitané kaŋ woŋ édan, swara tanpa nĕdya siṅgiḥ.
13. rupa karuṅu dènira, swara iṅkaŋ katiṅalan puniki, ana luhur ṅaṇḍapipun, anèŋ ṅaṇḍap luhurṇya, ana boṅkot iŋ pucukira puniku, ana kulon wétanira, wétan kulonira siṅgiḥ.
14. ana kidul ĕlorira, ana ĕlor kidulira kaŋ siṅgiḥ, ayun grahita puniku, yèn tan wruḥ duruŋ islam, masiḥ islam andana kukumé iku, sĕlamé pan sĕsĕlaman, sĕjatiné makṣiḥ kapir.
15. aṅlir ulam muṅgèŋ toya, sami tĕlas lan ulam kaŋ sayĕkti, naṅiŋ wontĕn bédanipun, kadi saṅsam lan sima, sami nama baburon alas puniku, naṅiŋ béda jatènira, éslamé kaŋ dèn kukumi.
16. éslamira sinĕlanan, imanira iman imanan nĕṅgiḥ, sadaté sadatan iku, salaté sasalatan, amuji amuŋ pujian puniku, anĕmbaha sĕsĕmbahan, yèn tan wruḥ ciptanirèki.
17. luṅsi mili tanpa toya, sakalaṅkuŋ sipaté sabda iki, kĕdaḥ grahitanĕn kalbu, bĕja kaŋ aṅgrahita, aywa dumèḥ dadaluya woŋ puniku, iku sĕmuné paṇḍita, kaŋ aṅsal sabda puniki.
18. mokal tuli iya sira, pan basirun puniku kaŋ ṅaliṅi, mokal wuta sira iku, muridun iṅkaŋ karṣa, apan iya mokal sira nĕpsu iku, mutakalimun ṅandika, mokal bisu sira iki.
19. bakal laṅgĕŋ kaantĕpan, iṅkaŋ laṅgĕŋ nĕṅgiḥ sira puniki, dudu tĕtĕpiŋ hyaŋ aguŋ, kaŋ tĕtĕp sira ika, rahmat dudu iya rahmatiŋ hyaŋ aguŋ, iṅkaŋ muraḥ iya sira, duña dudu alam iki.
20. alam dènña iya sira, alam kubur dudu sajroniŋ bhumi, kubur iya sira iku, ṅakérat dudu béñjaŋ,..., kaŋ akérat iya sira, kitab kuran sira nĕṅgiḥ.
21. bhumi laṅit iya sira, bĕlis sétan iya sira puniki, aras kurṣi sira iku, loḥ kalam iya sira, dèn grahita sĕmuné basa puniku, iŋ sasmita lalawura, aṅsuŋ cipta kaŋ wus sidik.
22. apa tĕgĕsé bismilaḥ, lan tĕgĕsé sukannalaḥ puniki, pan tĕgĕsé rahsa niku, lawan napi ésbatnya, lawan apa tĕgĕsé sadat puniku, lan apa tĕgĕsé salat, tĕgĕsé ṅakir puniki.
23. apa tĕgĕsé jinabat, lawan apa tĕgĕsé niyat iki, tĕgĕsé paṅéran iku, tĕgĕsé duña kérat, lan tĕgĕsé mukaranaḥ iya iku, lan tĕgĕsé rasulullaḥ, tĕgĕsé ékram puniki.
24. lan apa tĕgĕsé salat, lan tĕgĕsé woŋ jumuṅaḥ puniki, pira kabèḥ juṅahipun, mulané ana juṅaḥ, sakiŋ ṅĕndi asalé jumuṅaḥ iku, yèn tan wruha nora éslam, mĕkṣiḥ sirik mĕkṣiḥ kapir.
25. sakaṭahiŋ pitakonan, sĕmoniŋ woŋ lalawura puniki, dèn kaciptèŋ manahipun, ajana kaliwatan, yèn ta lamun nora ambuka sirèku, sasar susur kawruhira, kaŋ wus waṣpadèŋ iŋ siṅgiḥ.
26. sampun iṅujar sakĕcap, sarwi rahsaniŋ sasmita puniki, apan ta sira puniku, alaḥ iku ya sira, rasulullaḥ pan iya sarira iku, bismilaḥ sira punika, patékaḥ sira puniki.
27. sawirahsaniŋ sasmita, kabèḥ kabèḥ apan sira puniki, aja sisip tĕmbénipun, satĕmaḥ sira sasar, aja klèru iŋ paṅucap sira iku, aja dumèḥ muni sira, dèn wruḥ tĕgĕsira nĕṅgiḥ.
28. yun wruḥ pisaḥ tuṅgalira, apan sira dadi wĕrṇa sayĕkti, sahiṅga siya puniku, aywa gagampaŋ maṅsa, aja dumèḥ dumèḥ muni sira iku, aruṅsit tĕgĕsé sira, akèḥ aṅgampaṅkĕn siṅgiḥ.
29. yèn sira duruŋ prawira, atakona iŋ woŋ kaŋ sampun yĕkti, ṅupayaa sira iku, kaŋ woŋ alul mulana, atakèna ujariŋ basa puniku, poma uṅsĕdĕn kaŋ ñata, artiné basa puniki.
30. sèḥ sumitra saya paḍaŋ, amirṣakkĕn kojahira jatiniŋ, saya sru iŋ ajrihipun, awlasasiḥ turira, iṅgiḥ tuwan lajĕṅna maṅiṅgilipun, adan kalihan hyaŋ sukṣma, jatiniŋ añĕṅgarani.
11. ḍaṇḍaŋgula
1. lamun yayi wus waṣpadèŋ jati, sariranira dipun kawaṅwaŋ, iya iku lalironé, sampun ta yayi korup, raganira kawula jati, apan kĕmbar lan sukṣma, jumbuḥ yèn dinulu, dipun waṣpada iŋ sukṣma, kadyagané kadi atal lawan siti, lir kĕmaṇḍaŋ lan swara.
2. aṅlir tikan iŋ sawuŋ puniki, apan iṅgiḥ agalaŋ guluṅan, naṅiŋ tan ñaci paṛĕké, liwaŋ liwuŋ gumuluŋ, mĕṅko sira wus dadi pitik, samĕktaniŋ busana, iku ta winuwus, laḥ ta yayi dèn waṣpada, tinrimaa iḍĕpĕn dipun pinaṅgiḥ, iŋ ṅriku gènira apraŋ.
3. iṅkaŋ éwuḥ iŋ duña puniki, amuŋ siji pan muṅguḥ panrima, aṅiŋ panariké ṛĕké, rupané sukṣma aguŋ, kaya sira rupané widdhi, lir camĕḍak pinaṅka, uwitipun jumbuḥ, kadi sukun lan kluwiḥnya, nora béda sahirip warṇanirèki, lir kalak lan kĕnaṅa.
4. nora béda sira lawan nabi, laḥ ta yayi sira dèn waṣpada, abéda miwaḥ tuṅgilé, lir kĕpiṭiŋ lan yuyu, sukmanira dipun adani, kaŋ tumrap anèŋ raga, aḷĕmbut dinulu, dudu ĕroḥ dudu jasat, aṅlir sĕkar warṇané lan gandanèki, puniku yun waṣpada.
5. iṅkaŋ maṅkana ananirèki, laḥ ta yayi mijil sakiŋ ora, muliḥ mariŋ éra ṛĕké, sakèhiŋ woŋ buburu, ujar iku dèn wuri wuri, ciptané woŋ satĕṅaḥ, iḍĕpé woŋ iku, ana iki sakiŋ ora, raga iku muliḥ mariŋ ora muliḥ, puniku dèn kĕkudaŋ.
6. sampun kéñut yayi kapalintir, kaŋ ṅrasani sajatiné nora, iku jatiné éwuhé, kéron ujar puniku, kaŋ sampurṇa tan ayun muliḥ, tan ñañipta maṅkana, kaṅgĕpé winuwus, iŋ tiṅal suṅsun suṅsunan, poma yayi paniṅal ikaŋ rakĕsdik, sampun kiraŋ prayitna.
7. salat ati sun awas sirèki, salat iku apan suṇḍa tiga, tur ta adi adi kabèḥ, sĕmbaḥ puji puniku, kadi tirta sakiŋ iŋ ardi, mili ḍatĕŋ sagara, sĕmbahé woŋ iku, akèḥ kaṇḍĕg iŋ sawaṅan, salat jati iŋ tĕḷĕŋ pĕrṇahirèki, piliḥ woŋ kaŋ tumĕka.
8. jroniŋ salat yayi pati gĕni, kadi aṅubĕk toya iŋ daṅdaŋ, laḥ ṛĕké maṅkono bahé, ajaa kadi kukus, wĕdalipun sakiŋ iŋ gĕni, kaŋ ora dadi ana, lir siti lan bañu, aṅlir oyot mĕtu toya, awakira lir sukṣma dipun pakéliŋ, apan tigal raraga.
9. paṅuwasaniŋ ṅèlmu puniki, laḥ ta ṛĕké kadi gĕni mubal, urubé lawan mawané, panasé dèn kadulu, kukusipun dipun udani, paḍaṅé kawruhana, prabédané iku, patiné dipun prayitna, iya iku añukup sakèhiŋ wĕdi, paran kaŋ winicara.
10. sampun yaṅyaŋ amaṅéran ḍiri, laḥ ta ṛĕké aṅliṇḍuŋ iŋ sukṣma, tan wĕruḥ rina wĕṅiné, maliḥ iṅkaŋ winuwus, apan iku lamun rinicik, aja ṅaku paṅéran, aja ṅaku suwuŋ, miwaḥ ṛĕké yèn kasdua, muna muni puniku dipun pakéliŋ, yèn sira yun waṣpada.
11. kaŋ sampuna kadi woŋ aguliŋ, lan wanodya praptèŋ cumbananya, sirṇa kari sakaroné, déné kaṇḍuan lulut, awak ṛĕké dipun abĕcik, iŋ panarimanira, éwuḥ ujar iku, rasa jati lawan islam, iḍĕp maḍĕp suprandéné akèḥ kapir, iḍĕpé sok dèn tawa.
12. añawaṅi kutub wali wali, atapa iḍĕp sajroniŋ nala, yayi dèn éliŋ patiné, pati tuwan woŋ iku, sukṣma iku pinurwèŋ jati, pana kaṇṭi paṅéran, siyaŋ lawan dalu, amuji lawan paṅéran, upamané aṅlir ḍalaŋ amucuki, duruŋ aran ki ḍalaŋ.
13. sukma ḍarat nabi kaŋ aluwiḥ, laḥ ta yayi sira paṅiḍĕpan, sampun tuṅkul sira ṛĕké, dèn èṣṭi solahipun, pan paṅéran awĕlasasiḥ, marma dadia kadaŋ, iku woŋ kaŋ luhuŋ, amimitra lan paṅéran, wĕkasané amimitra karoniŋ siḥ, murca tanpa jamuga.
14. yèn tĕmua sun iḍĕpirèki, iku ṛĕké sukṣma kaŋ sañata, iṅaran ujaré ṛĕké, wahu ta kaŋ winuwus, kawulané añikĕp widdhi, aṅĕkĕp awakira, malaḥ galaŋ guluŋ, hyaŋ sukṣma maṅkya ṅandika, aja sira iŋ ṛĕké ñikĕp mriŋ mami, cĕkĕḷĕn wakira ḍawak.
15. yèn kadulu kaŋ sariranèki, apan iṅsun pan mèlu katiṅal, apan iya patitisé, aja ñikĕp mariṅsun, tĕka sira ñikĕpa ḍiri, iṅsun pan mèlu kĕna, yèn sira andulu, iṅsun mèlu katiṅalan, lamun ora maṅkono andulu ḍiri, yĕkti sira kasasar.
16. kaŋ kĕsasar pralambéné ugi, laḥ ta yayi kadi woŋ aṅudaŋ ḍalaŋ, aṅundaŋ woŋ mayaŋ ṛĕké, tan wruhi ḍalaṅipun, kaŋ aṅundaŋ kinèn aṅriṅgit, maṅkana kaŋ paniṅal, aywa kèḥ kadulu, aṅiŋ paṅéran kéwala, iṅkaŋ asiḥ iŋ awakira pribadi, aṅlir aṅilo kaca.
17. wawayaṅan dipun liŋ aliṅi, laḥ ta yayi tan wontĕn bédanya, bab ṛĕké maṅkono bahé, sĕmbaḥ lawan amuwus, dadi puji anugrahani, kaŋ wus wasis iŋ solaḥ, dadi puji iku, sĕmbahé rasa punika, yayi dipun waṣkiṭa iṅkaŋ sayĕkti, sampun apiṇḍo karya.
18. akèḥ mĕtu yayi mariŋ sĕpi, laḥ ta ṛĕké pan ayun uniṅa, isiné sarira ṛĕké, juru gĕḍoŋ puniku, pasĕnĕp tan iŋ jiwa ḍiri, siṅa dèn lakokĕna, wusana iŋ ṅriku, kiraŋ napa mantri jaba, naṅiŋ piliḥ piliḥ iṅkaŋ udani, pasĕnĕtan punika.
19. sèḥ sumitra pan saya birahi, miyarṣakkĕn iŋ wirayatira, jatiniŋ kèḥ pituturé, wusana tiṅalipun, kaŋ katiṅal sampun kaliṅliŋ, kaŋ ginĕḍoŋ gumawaŋ, laṅkuŋ sukèŋ kalbu, sèḥ sumitra aris turṇya, laḥ ta tuwan bañjurṇa maṅiṅgil maliḥ, amba laṅkuŋ kasmaran.
12. asmaradana
1. jatiniŋ mèsĕm liŋnya ris, yayi sira kawruhana, kaŋ ṅèlmu puniku ṛĕké, duk sakiŋ mulané sira, prĕnahira duk nora, dèn awas sira iŋ tuduḥ, nora kĕna sumambrana.
2. kaŋ ṅèlmu mulané dadi, pundi kaŋ ṅèlmu punika, dudu johar jisim ṛĕké, dudu ñawa dudu sukṣma, pan dudu uripira, yun awas sira puniku, kaŋ ṅèlmu liwat agawat.
3. sampun papéka iŋ waṅsit, dèn wruḥ kamulyanya dadya, kala mulanira ṛĕké, laḥ ĕndi pinaṅkanira, yèn sira nora wikan, wĕḍus alas pamènipun, lir lutuŋ kĕlambi tambal.
4. solahé kaya woŋ ṅarbi, akrubyuk kĕlambi jubaḥ, taṛĕbaŋ dadi kartiné, juṅkat minaṅka paṅgalak, sura dadi suwakan, pĕkṣané awas hyaŋ aguŋ, artiné lir susuḥ mañar.
5. pira lawasé ṅahurip, pan wikan mulané ana, rèhniŋ gĕsaŋ kèḥ paṅliṅé, tan wikan lamun uniṅa, tan pĕgad iŋ wardaya, luwiḥ sasar woŋ puniku, katuṅkul iŋ babiṅkrakan.
6. garap sastra datan yĕkti, maṅsiné ginawé ṅomyaŋ, kalamira tanpa gawé, apan kinarya éliṅan, priḥ kandĕlé tĕsbèḥnya, sujut rukuhé ginuṅguŋ, kinarya éliŋ éliṅan.
7. karṣané luṅa ṅabĕkti, sĕdya paṅgiḥ lan paṅéran, aṅaturakĕn sĕmbahé, lampahipun kata sarak, puwasané dèn kudaŋ, pĕkṣa awas iŋ hyaŋ aguŋ, kaluruŋ tambuḥ parannya.
8. polahé kaya saliṇḍit, kawuwuḥ kaya likasan, nora pĕgat méṅa méṅo, anĕmbaḥ tan wruḥ iŋ sarak, kaya woŋ katarima, ḷĕṅar ḷĕṅĕr tiṅalipun, kaya woŋ kas samudana.
9. kaŋ sampun awas iŋ widdhi, miwaḥ iŋ gandané woŋ kaŋ, iya iku kaṛĕnané, kaŋ sampun sirṇa iŋ kana, tita mantra panĕmbaḥ, tan ana liyan kadulu, amuŋ jasadé kéwala.
10. pundi sampurṇaniŋ urip, lan pundi paraniŋ pĕjaḥ, yèn tan wruha sinĕdyané, pususĕn sariranira, amriḥ waṣpadèŋ tiṅal, dèn awas sira andulu, mriḥ parana iṅkaŋ luṅa.
11. wontĕn maliḥ kaŋ ṅawruhi, sampuna marani tisna, anitis maritis ṛĕké, amuŋ gĕnaha mrayoga, añakrawati ika, lawan amba iŋ ḍĕk ḍèku, kabèḥ iku paḍa sasar.
12. aja sira milaŋ jisim, aja tuṅkul milaŋ sastra, miwaḥ sipatiŋ hyaŋ manon, lan aja sira aṅucap, iman tokit makripat, puniku pan sasar aguŋ, aja tuṅkul iŋ dat sipat.
13. polahé kaya woŋ siṅgiḥ, kaya wus tĕka iŋ olaḥ, miwaḥ iŋ mukamat ṛĕké, tiṅaliŋ woŋ kĕsawuran, iḍĕpé kĕlap kĕlap, naṅiŋ apĕkṣa kumawruḥ, iḍĕpé woŋ kapir kawak.
14. kaŋ sampun awas iŋ waṅsit, dadak kĕkaṭahĕn ujar, maḍĕp sawiji uripé, datan wontĕn kahuniṅan, tan wontĕn kapiyarṣa, wus awas dènnya andulu, ya iku tiṅal sampurṇa.
15. tiṅal jati tanpa siriŋ, waṣpada jatiniŋ tiṅal, wusirṇa kaanané, tuṅgal tiṅaliŋ panĕmbaḥ, lawan ananiŋ sukṣma, anĕmbaḥ iŋ dasihipun, anĕmbaḥ iŋ hyaŋ sukma.
16. ĕndi sĕmbahirèŋ dasiḥ, ĕndi sĕmbaḥ katarima, kaŋ suka katrima ṛĕké, pundi ta sĕmbahiŋ sukṣma, miwaḥ lamun kawula, apan pisaḥ sampun kumpul, iku gèné mukaranaḥ.
17. yèn tan wruha sĕmbaḥ pĕṣṭi, upamané kaya kéwan, kĕbo sapi kuda gudèl, tanpa tuwuḥ sampurṇanya, muṅguḥ suka nèŋ ṅaṇḍap, alumuḥ tatakon iku, ṅĕguṅakĕn ḍirinira.
18. lan dèn bisa ṅaji péliŋ, iŋ purwa madya wĕcana, tiga iku aywa supé, iŋ prakara kabĕcikan, gĕntinĕn iŋ wardaya, nadyan gantalnana tahun, yèn léna sapĕrti kéwan.
19. kaŋ éliŋ muṣṭikèŋ jalmi, kaŋ punapèk lir wĕraha, awor kalawan woŋ akèḥ, pĕkṣa gumuṅguŋ gumisa, sukan aranana muḍa, sukan aran sakit kalbu, tan wiraŋ maraŋ sujanma.
20. iya rèḥ urip puniki, tan wandé tĕkèŋ sĕmaya, aṅajia disik ṛĕké, nora wandé raganira, dèn anon minton sira, tan wandé omaḥ iŋ kubur, bĕcik takon mupuŋ gĕsaŋ.
21. supaya ṅrĕtia sami, sampun katuṅkul pépéka, kaŋ kitab markum rahosé, puniku pan luwiḥ éca, iŋ woŋ alul ṅibadaḥ, rarahosan kaŋ puniku, poma yayi dèn grahita.
22. laḥ sampun marata wiwit, arṣa nuwuhakĕn lampaḥ, puniku wus cukup kabèḥ, saguŋ wawulaŋ manira, ṅiŋ yayi dèn prayitna, aṅèstokĕna satuhu, aywa ṛĕké sumambrana.
23. sèḥ sumitra aṅabĕkti, ṅraṅkul suku ris aturṇya, paṅèstu tuwan kimawon, naṅiŋ yèn paṛĕŋ paduka, mugi tuwan waṅsula, jatiniŋ sahurira rum, sok ugi yayi slamĕta.
24. ya ta jawab taṅan nuli, ri wusnya sigra lumampaḥ, sèḥ sumitra ṅatĕraké, praptèŋ ṅaṇḍapiŋ aldaka, ya ta lajĕŋ lampaḥnya, kaŋ tinilar kari maṅu, ĕnĕṅna wus waṅsul nulya.
25. sèḥ sumitra migaḥ ṅardi, ya ta ganti kaŋ lumampaḥ, jatiniŋ daruŋ lampahé, kapuṅkur iṅkaŋ aldaka, aṅambaḥ tĕrataban, abyor branaŋ śri dinulu, iṅkaŋ sĕkar kumalata.
26. tan wus laṅĕnirèŋ margi, ya ta ḷĕpas lampahira, samana miyat iŋ ḍukoḥ, alit anèŋ piṅgir juraŋ, lami dènnya mratapa, wit kapatèn rabènipun, marma tapa anèŋ wana.
27. tanpa réwaŋ muŋ pribadi, duk anom pan koṅsi tuwa, laṅkuŋ tĕtĕp ibadahé, siyaŋ dalu datan owaḥ, awasta nur jariyaḥ, lami ḍaḍukuḥ nèŋ ṅriku, datan wontĕn karyanira.
28. muŋ sĕmbayaŋ rina wĕṅi, iṅkaŋ pinaṅan kĕḷĕman, roŋ tahun iku laminé, gènira tan kaḷĕbon upa, laṅkuŋ kasutapanya, kaŋ cinipta siyaŋ dalu, amuŋ sihira hyaŋ sukṣma.
29. nur jariyaḥ apan lagi, nèŋ tĕgal aṇḍaṅir kĕṇṭaŋ, jaguŋ kimpul lawan otèk, ya ta jatiniŋ wus mara, mriŋ gèniŋ kaki tuwa, nur jariyaḥ kagèt dulu, anon téjané kaŋ prapta.
30. wus narka oliya luwiḥ, ya ta ris gènira tanya, ta nak katuran pambagé, iŋ wuri pundi pinaṅka, ṅajĕŋ paran sinĕdya, jatiniŋ alon turipun, manira ṛĕké woŋ mahaŋ.
31. tan wontĕn kasĕdya yĕkti, luṅa nut karṣaniŋ lampaḥ, wanasari duk wantuné, nur jariyaḥ aṅliṅira, yèn paṛĕṅipun anak, prayogi pinarak gubuk, sipĕṅa wisma kawula.
32. éñjiŋ sakarṣa lumaris, pan sampun sontĕn punika, atĕbiḥ sasipĕṅané, jatiniŋ sahur sumaṅga, ya ta saṛĕŋ lumampaḥ, sapraptaniŋ wismanipun, nur jariyaḥ gĕlar klasa.
33. sampuniŋ ṅaturan liṅgiḥ, jatiniŋ ṛĕsĕp tumiṅal, aṛĕsik cèkli wismané, laṅgaré ḍèpèl iŋ wisma, ya ta wusnya samana, mahrib wahu wayahipun, kalihé pan sami salat.
34. jatiniŋ iṅkaŋ ṅimani, pan koṅsi praptèŋ ṅisanya, wus bakda sĕmbaḥ kaŋ ṛĕké, lajĕŋ ñugata kĕḷĕman, uwi jaguŋ kĕtéla, gĕmbili taḷĕs lan kimpul, samya nèŋ tampaḥ aḍacaḥ.
35. nur jariyaḥ ṅatag nuli, laḥ dawĕg ḍahara anak, pun bapa tatĕḍanané, kaŋ liniṅa sahur nĕḍa, ya ta saṛĕŋ aḍahar, sawusnya ki nur amuwus, añjèrèḥ iŋ paṅawikan.
36. aṅrasani babiŋ urip, urip tan kĕnaniŋ pĕjaḥ, lan takèn sukma jatiné, jatiniŋ ris sahurira, agawat ujar ika, kaṭaḥ kaŋ bisa cĕlaṭu, naṅiŋ timbuliŋ tan mirṣa.
13. maskumambaŋ
1. wontĕn kojaḥ iŋ badané dèn papati, badanira sukṣma, ṅrasa iŋ sajroniŋ urip, uripé wus kĕbak alaḥ.
2. kaŋ wus tĕka iŋ tiṅal tan kĕna pati, patiniŋ agĕsaŋ, tansaḥ amurba pribadi, iku sajatiniŋ sukṣma.
3. sukṣma iku pakumpulaniŋ ṅahurip, uripiŋ ṅagĕsaŋ, tĕka iŋ rasa sajati, rasané sariranira.
4. mèḍèŋ mèḍèŋ paṅérané dèn ulati, kĕluruŋ kĕliwat, dèn ñana urip kakaliḥ, ṅĕndi goné yèn nikia.
5. nĕpsu ilaŋ badané sapĕrti mayit, wuruŋ rasa mulya, kadi madu rasanèki, liriṅé ṅimbuhi jagad.
6. midĕr midĕr mriŋ sagara tanpa tĕpi, aliṅgiḥ bĕṅawan, arèrèn iŋ tamansari, dadiné mĕdal iŋ rupa.
7. rupa iku timbaŋ lawan rupa jati, rupa rinupana, rupa mapan rupa jati, rupanira anèŋ ṅarṣa.
8. dulu dulu kaŋ dinulu aniṅali, paḍa dulu cahya, lan sĕgara tanpa tĕpi, sarahé kéntir puyĕṅan.
9. bhumi ṅaṇḍap lintaŋ ṅawal anèŋ laṅit, wulanira jĕnar, srĕṅéṅéné baḷĕṛĕṅi, ṅèlmuné cahya lir mulya.
10. lir sasaṅka upamané bhumi laṅit, paḍaŋ mèlu paḍaŋ, paṅloŋ tiṅal milu mati, purṇama sajĕnĕṅira.
11. jagat iku kawimbuhan iŋ sakalir, kawimbuhan ika, duk sira kayuniŋ kapti, iṅaran tokitiŋ iman.
12. rupa iku mariŋ iŋ wujudiŋ batin, rupa kaŋ rinupa, rupa tuṅgal jatinèki, purwaniŋ badan sañata.
13. kawruhana kaŋ urip kĕna iŋ pati, yèn sampun palastra, kaŋ urip tan kĕna pati, waluya amuliḥ tugal.
14. panuṅgalé tan kĕna piliḥ piniliḥ, tuṅgal iŋ panuṅgal, tuṅgal ikaŋ samya urip, jatiné sapa wĕruha.
15. nugrahanya kajatènira kakasiḥ, sakèhiŋ grahita, kaḷĕbu sagara tasik, iŋ jro élok iŋ lahutan.
16. pinaṅkané taṇḍané anèŋ jro tasik, asalin paniṅal, asalin paṅucap iki, pan sampun asalin rasa.
17. rasa mulya kaŋ dèn priḥ kaŋ dèn ulati, kapaṅgiḥ kaŋ rasa, rasa jati tan kapaṅgiḥ, kaŋ ana iku iŋ rasa.
18. traṅiŋ rahsa prĕnahé ati kaŋ suci, lir wawaḍaḥ kaca, iṅisénan madu jati, ṛĕmbĕsé katon iŋ jaba.
19. tuṅgal katon wawaḍaḥ kalawan isi, iŋ jro lulut tuṅgal, mapan sampurṇa iŋ jati, sakiŋ siḥ marga sampurṇa.
20. kaŋ tan awas ananiŋ hyaŋ dèn rasani, miwaḥ sipat asma, ginuṅguŋ pinuji puji, puji iku alam paḍaŋ.
21. dèn ulati ananiŋ hyaŋ kaŋ kapaṅgiḥ, wĕnèḥ ana ṅalas, sawĕnèḥ aguŋ nastiti, dèrèŋ paṅgiḥ lan paṅéran.
22. kaŋ maṅkana pujiné woŋ kaŋ wus luwiḥ, mĕnĕŋ lan aṅucap, tan ana bédané ugi, sasolahé iku sĕmbaḥ.
23. yèn aliṅgiḥ aliṅgiḥ nucèkkĕn ati, iya iŋ rahsèŋ tyas, kaanané hyaŋ kapaṅgiḥ, tan pĕgat siḥ rèŋ paṅéran.
24. kaŋ antuk siḥ nora pati dèn tiṅali, nora aṅgrahita, iŋ rina kalawan wĕṅi, iku dasiḥ kinasihan.
25. nur jariyaḥ añjĕṅĕr tan kĕna aṅliŋ, laṅkuŋ ajrihira, umatur amĕlasasiḥ, ḍuḥ aṅgèr botĕn añana.
26. yèn pun bapa tamian ṅulami luwiḥ, prasasat nugraha, kaŋ ḍawuḥ pun bapa yĕkti, maḍaṅkĕn iŋ tyas kawula.
27. kaṭaḥ kaŋ woŋ kampir sami dèn takoni, awis kaŋ ṅĕrgañcaŋ, añjèrèḥ wêwaḥ ṅribĕdi, maṅkyamba aṅrahos paḍaŋ.
28. jatiĕniŋ mèsĕm sahurira aris, paman laṅkuŋ nĕḍa, sakiŋ paguṅguṅirèki, manira iki pan darma.
29. iṅgiḥ sakiŋ karṣaniŋ hyaŋ maha suci, nur jariyaḥ tanya, amba nuwun wĕjaŋ maliḥ, wontĕn ta kawruḥ gaṇḍéṅan.
14. kinaṇṭi
1. wontĕn pawarta puniku, saṅkiŋ kadim para wali, ujaré kawruḥ punika, duk sĕlagi mĕkṣiḥ napi, nĕṅgiḥ pundi pĕrṇahira, kawula dèrèŋ udani.
2. wirahosé kaŋ puniku, kaṭaḥ woŋ ḍatĕŋ iŋ ṅriki, tan wontĕn iṅkaŋ uniṅa, jatiniŋ sahurira ris, laḥ dawĕg paman bubarṇa, kawula ayun miyarṣi.
3. nur jariyaḥ alon muwus, nĕṅgiḥ saduruṅé dadi, suwarga lawan naraka, apan duruŋ ana dadi, iŋ ṅriku apa kaŋ ana, ḍiṅḍiŋ jalal duruŋ dadi.
4. adam lan kawa puniku, apan duruŋ ana dadi, alaḥ kalawan mukamat, apan dèrèŋ wontĕn sami, apa kaŋ anèŋ samana, lawan iṅkaŋ kapiŋ kaliḥ.
5. apa kaŋ jumĕnĕŋ ṅriku, ĕndi kaŋ wus ana ḍiṅin, sawusiŋ ana punika, sapa iṅkaŋ anĕkṣèni, lawan dumadiné ika, apa dinadèkkĕn ḍiṅin.
6. laḥ aṅgèr jarwakna tuhu, tĕgĕsé basa puniki, jatiniŋ mèsĕm liṅira, yèn paman dèrèŋ udani, saduruṅé ana jagad, pan ṅèlmu kaŋ ana ḍiṅin.
7. duk makṣiḥ ya awaŋ uwuŋ, kabèḥ duruŋ ana lahir, sayĕktiné iṅkaŋ ana, nalar iṅkaŋ ana ḍiṅin, duk duruŋ jumĕnĕŋ ika, kahar aranira nĕṅgiḥ.
8. apĕṅal iku ranipun, duk kaṛĕm makṣum wastaniŋ, apan iṛĕŋ sipatira, kahar ijo sipatnèki, kaŋ ṅèlmu kuniŋ sipatnya, kamal sipatira putiḥ.
9. sipat sakawan puniku, duruŋ ana bhumi laṅit, swarga kalawan naraka, apan duruŋ ana dadi, ṅakérat pan duruŋ kocap, adam kawa duruŋ lahir.
10. alaḥ lan mukamat iku, sadaya pan mĕkṣiḥ napi, muŋ sipat napi kaŋ ana, ṅiŋ dèrèŋ kaana yĕkti, hèṣki jĕnĕṅé punika, lan jawarèḥ namanèki.
11. lawan duk kumpulé iku, rabiṅu ujudirèki, kaŋ ḍiṅin winastan kahar, amal iṅkaŋ kapiŋ kaliḥ, jamal iṅkaŋ kapiŋ tiga, kapiŋ pat jawal puniki.
12. tĕgĕsé jamal puniku, mariŋ kahélokan adi, tĕgĕsé jalal kaguṅan, kamal sampurṇa lirṇèki, liriŋ kahar wisésanya, amisésa iŋ pribadi.
13. andadèkkĕn karṣanipun, sakĕḍap tumulya dadi, marmané ana sahadat, lawan sipat roŋ prakawis, hèṣki lan jawari ika,....
14. winastan nugraha luhuŋ, myaŋ kanugrahan kaŋ dadi, iŋ kono jumĕnĕṅira, wujudiŋ kawula gusti, asma iṅasma priyaṅga, tĕgĕsé iŋ sipat lahir.
15. awarṇa rupa pan sampun, basa swara pamirṣèki, dumadya pan sinĕkṣènan, kalawan kaŋ anĕkṣèni, puniku laḥ kawulanya, sunat parlu dadinèki.
16. dadi bobot alam iku, maraŋ manuṅsa sayĕkti, sunat parlu lan apĕṅal, mriŋ makluk tibanirèki, sunat lan parlu punika, prĕlu wajib tinon ugi.
17. sukur bab sunat lan parhu, sampun salaḥ tampa ugi, amawasa dèn waṣpada, sunat parlu añĕlaki, maraŋ kaŋ amaha mulya, tinimbaṅkĕn manuṅsèki.
18. sunat gĕlariŋ hyaŋ aguŋ, gĕntiné sukṣma puniki, iṅkaŋ ṅambil iŋ kaguṅan, lan kaŋ aran sukṣma jati, jatiné pan iya ika, iya iku iya iki.
19. yèku kaŋ duwèni wujud, dahim makripat lan tokit, iku kahélokaniŋ hyaŋ, duk dadèkkĕn ñawanèki, ñawa roḥ ilapi ika, ya sukṣma suka niṅali.
20. mriŋ sipaté ḍéwé iku, maṅkana dèn busanani, busana catur prakara, hyaŋ sukṣma ṅandika aris, iya iṅsun iya sira, ya sira ya iṅsun iki.
21. apan sampun sabiyantu, sahéṅga prayèki kaliḥ, sĕmu méraŋ gya grĕnĕmaŋ, ṅrĕgĕm lasi rasa kaliḥ, punapa paman ḷĕṛĕsa, bapa kawula puniki.
22. aṅiŋ ta aywa aguṅguŋ, sasar yèn tan ṅati ati, amuŋ ṅamé iŋ satĕṅaḥ, nĕṅgiḥ kaŋ basa puniki, yèn patitis patinira, ujaré kaŋ basa kadis.
23. puniku ayun sumurup, kaŋ ujar ṛĕké puniki, basa puniku agawat, yèn tan wruḥ sumurup nĕṅgiḥ, pan miṇḍak nasak bĕlasak, lir pĕkṣi mibĕr tan pamriḥ.
15. ḍaṇḍaŋgula
1. nĕṅgiḥ paman yun ṅawruhi maliḥ, sampun paṅliŋ ṛĕké sasurupan, yun awas puniku ṛĕké, pan éwuḥ takèn dunuŋ, lawan ora kalawan misik, lir kiñjĕŋ tanpa soca, pan parané ṅlaṅut, poma ṛĕké dèn prayitna, basa iku mapan tan kéṅiŋ kawijil, yèn duruŋ mati raga.
2. naṅiŋ poma paman wĕkas mami, sampun muṅkul gènira sĕmbayaŋ, dipun ana wĕkasané, tan ana wandénipun, lara pati dipun lakoni, tan ana jĕnĕṅira, tan wandé yèn mantuk, nora lara nèŋ dunuṅan, anèŋ duña marmané yun aṅawruhi, aja saḥ pagunĕman.
3. pagunĕman lan mitranya sami, amuŋ ṛĕké tan purun tanya, andulua sastra ahèŋ, sastra minaṅka wuruk, aja kaṇḍĕk asila siṅgiḥ, puniku ulatana, ṛĕké sampun tuṅkul, aywa kèlu ṅaṇḍap aṇḍap, dèn suŋ driya woŋ iku luntura kaŋ siḥ, asraha jiwa raga.
4. supayané yèn antuka wisik, yèn tan nĕmĕn maṅsa dèn wĕjaṅa, lamun ta sarèḥ pamrihé, éwuḥ woŋ takèn dunuŋ, marga duruŋ siḍĕm lan wĕrit, pirantiné kaŋ tĕka, nĕṅgiḥ sampun tuṅkul, poma ṛĕké dèn waṣpada, raga kita yèn luṅa sipĕŋ iŋ margi, maṅsa wandéya pulaŋ.
5. marma ṛĕké nèŋ duña dèn éliŋ, sampun sira karya dora cara, dadi panĕṅĕran gĕḍé, tan kandĕl amriḥ ṅèlmu, nora kaya iṅkaŋ aririḥ, sayĕkti akèḥ wĕlas, yèn maṅkono iku, pan kolur pamurukira, yèn mituhu kaŋ mulaŋ saya wlasasiḥ, lan sinihan iŋ sukṣma.
6. iya déné woŋ tĕmĕn puniki, uga guru woŋ kaŋ sampun pana, dadya wruḥ pañjiŋ surupé, akèḥ liré gaguru, kaŋ sawĕnèḥ tatèki tèki, asriŋ takèn paṇḍita, tan ana potipun, atakèn ṅèlmu kaŋ ñata, éwuḥ tĕmĕn araŋ kaŋ wruḥ surupnèki, nĕṅgiḥ kĕbak dunuṅan.
7. ṅuni paman manira amaṅgiḥ, lamun ṛĕké kaŋ praptèŋ sĕmaya, akèḥ kaŋ katiṅal ṛĕké, warṇa warṇa dinulu, palawaṅan akèḥ kahèkṣi, pan ana lawaŋ kĕmbar, nami warṇanipun, pan samya pucak kĕñcana, sor sorané intĕn jumĕrut pan adi, poma ywa kaṇḍĕk sira.
8. aywa kaṇḍĕk lawaŋ loro kaki, ana maliḥ lawaŋ ginapura, dèn èṅĕt iŋ kono ṛĕké, sakĕḍap tan asantun, nulya kita niṅali masjit, gumantuŋ ṅawaŋ awaŋ, tanpa caṇṭèl iku, lalaṅsèné éndaḥ pélag, kaŋ kinarya laṅsir baŋ pan laṅsir kuniŋ, putihé taturutan.
9. liyĕp liyĕp dinulu pan asri, pĕlawaṅan iṅkaŋ mĕsjit tuṅgal, bisa mĕṅa minĕp ḍéwé, dinulu katon mañcur, kadi wulan purṇamasiḍi, katraṅan déniŋ méga, lir tĕrgana kumpul, katon liyĕpiŋ asmara, katiṅalan lan mĕsjit dinulu asri, sakĕḍap narik napas.
10. lamun sira narik napas nĕṅgiḥ, rikatiŋ siḥ rupané dèn awas, maraŋ rupanira ḍéwé, poma poma puniku, aja lali iŋ jaji péliŋ, kawruhana dènira, pañcadriya aguŋ, sampun kaṇḍĕk pañcadriya, sampun koṅsi koṅsi kamanuṅsan nĕṅgiḥ, srahĕna jiwa raga.
11. sampun lali iŋ namanta siṅgiḥ, sampun ṛĕké ṅasarakĕn sastra, aja tuṅkul sastra bahé, yèn dèrèŋ antuk tuduḥ, marma ayun aṅawikani, rumaṅsaa punika, lamun anèŋ dunuŋ, ora wuruŋ tĕkèŋ tĕmaḥ, raga kita ora wuruŋ lamun muliḥ, marma ayun waṣpada.
12. kaŋ waṅsit ṛĕké sahéṅga ṅipi, tansaḥ rupané ḍéwé kawaṅwaŋ, pralambéné turu ṛĕké, sajroniŋ turu iku, aṛĕrasan nikmatiŋ urip, saniṣkara katiṅal, sajroniŋ aturu, nora béda pĕjaḥ gĕsaŋ, kaŋ wus awas amriḥ badané pribadi, yèku wĕkasiŋ sukṣma.
13. wus pinaṣṭi woŋ puniku siṅgiḥ, yèn woŋ lara paṅantĕpé tĕka, iblis lanat katon ṛĕké, anata piṇḍa guru, wĕnèḥ rupa ibu lan kaki, nini bapa lan sanak, myaŋ piṇḍa sadulur, tanna aṅajak luluṅan, ayun tĕtĕp imanira aywa giṅsir, iku tiṅal sakarat.
14. poma ṛĕké kalamun asakit, iya iku tiṅal kaŋ sĕkarat, wĕnèḥ andulu ṅèlmuné, akèḥ liré kadulu, yèn kapécut tiṅalirèki, dadi mriŋ panasaran, kaŋ agama dudu, yèn tiṅalé woŋ sampurṇa, jroniŋ pati dahana paṅgiḥ pinaṅgiḥ, wus katiṅal sampurṇa.
15. poma ṛĕké yèn prapta sayĕkti, aywa pĕgat ṛĕké ḍikirira, dèn éliŋ maraŋ kaŋ gawé, dipun éliŋ iŋ tuduḥ, ṅuṛĕbana ujar kaŋ yĕkti, kawruhana dèn awas, iŋ sakarat iku, sampun paṅliŋ iŋ paṅéran, duk iŋ kina ana woŋ kojaḥ mriŋ mami, lir woŋ mocuŋ wicara.
16. pocuŋ
1. wicarané ṛĕké kaŋ maraḥ mariṅsun, tanpa tuk jalaran, lir pĕkṣi miyak moŋ siṅgiḥ, milya patuḥ tan wruḥ paraniŋ sasmita.
2. kadim nujum siŋ wuda kadona daṅu, dadi ambĕlasar, dèn ilo ilo puniki, tanpa tutur katuṅkul dènira mayaŋ.
3. wicarané luṅa nalimpaŋ wulaṅun, amaṅgihi ḍalaŋ, ayun nanopèŋ pribadi, apan kĕṇḍĕk sĕdyané ayun nontona.
4. duk mahuné ḷĕkas ki ḍalaŋ andulu, tuhu tanpa rowaŋ, kinudaŋ pribadinèki, amĕtokkĕn sasolahé ḍèwèkira.
5. dadya maṅsul ki ḍalaŋ ḷĕkas atapuk, kagyat kaŋ tumiṅal, pĕkik warṇanta sayĕkti, akèḥ panduŋ dinulu dédé ki ḍalaŋ.
6. maṅké maṅsul ki ḍalaŋ asalin tapuk, saṅsaya kagiwaŋ, umiyat iŋ warṇa salin, aglis waṅsul ki ḍalaŋ asalin warṇa.
7. maṅké campuḥ kaŋ andulu kadi kagum, tumiliŋ kaŋ rupa, kaŋ ala tuwa yun pĕkik, ana wuṅkuk ana cébol ana wuta.
8. nora pĕgat kaŋ sĕtiné pan lumintu, pan akèḥ solaḥnya, sasolahé gagawoki, saya katut tiṅalé paṅliŋ ki ḍalaŋ.
9. pacuḥ iṅsun aniṅali kaŋ anapuk, maṅké kaŋ grahita, anonton iŋ panonnèki, pan sawĕguŋ salahé nonton sasmita.
10. ana wuwus sapa kaŋ macuḥ puniku, pan naṅiŋ ki ḍalaŋ, suwéné katoton nĕṅgiḥ, topèŋ iku anané paḍa lan ora.
11. andĕdawa ki ḍalaŋ añambi biṅuŋ, basa maliḥ rupa, kaŋ dèn gagawok prasami, iṅsun kérut milu tiṅalé woŋ édan.
12. apadudon akèḥ woŋ kaŋ katĕlañjur, iṅsun pan kagiwaŋ, déniŋ manaḥ paparon siḥ, yèn sun dulu katon dudu katon iya.
13. agya kérut gènnya aniṅali tapuk, pan iku loropan, dènnya dudu tiṅkahnèki, topèŋ iku nora tuṅgal nora rupa.
14. aywa tan wruḥ nĕṅgiḥ kaŋ badan puniku, yĕkti sira bunar, wus tuṅgal kaanan jati, mapan éwuḥ panuṅgalé lan bédanya.
15. tuṅgalipun déné tan sawalèŋ kayun, katuṅkul solaḥnya, lir cĕrmin kaŋ ṅilo siṅgiḥ, bédanipun anuduhakĕn pahésan.
16. lamun sampun waṣkiṭa jatiniŋ tapuk, yĕkti sampun ñata, kajatènira karon siḥ, iya iku paniṅalé kaŋ sampurṇa.
17. dèn akukuḥ tiṅalira dèn ataṅguḥ, aywa kajĕnakan, dènnya noliḥ panon nĕṅgiḥ, aja kawut aja kari aja liwat.
18. lan siŋ sapa kaŋ wikan uwoŋ nanapuk, iku wus mardika, woŋ iku wus praptèŋ yĕkti, dadya kupur mukir lyan pan sakiŋ sira.
19. liṅlaŋ liṅluŋ tan wikan iŋ lor lan kidul, kaliḥ kaḷĕṅgahan, aglis pan ayun ṅĕntosi, kadĕluruŋ solahé pan suku tuṅgal.
20. aṅiŋ iku gawéné aṛĕp mamucuŋ, tan lyan kaŋ sun pinta, apuruhita iŋ batin, paṛĕk iṅsun paḍa iṅaranan bisa.
21. lintaŋ suṅkan iṅsun yèn ana kaŋ guṅguŋ, sajiwarèŋ jiwa, karṣa pamuji pinuji, tur sumĕṅguḥ atĕmaḥ nimbraḥ iŋ mata.
22. raganiṅsun yèn paria pari gabug, nir don dènnya tuwa, aṅiŋ dènnya katon sĕpi, anèŋ ṅayun iṅajèn déniŋ atuwa.
23. yèn sastraa raganiṅsun pada aguŋ, aṇḍĕgé kéwala, agĕŋ aluhur tan pamriḥ, anèŋ ṅayun kaŋ luhur gora kawaca.
24. sapa kétuŋ inané sariranipun, mapan wus atuwa, yèn riṅgita kayunèki, anèŋ ṅayun aluhur ora kawilaŋ.
25. kaṭaḥ lamun ṅucapna sariraniṅsun, aṅépon siḥ sira, misan idĕr takèniŋ siḥ, awĕkasan manira kaloŋ kaloṅan.
26. pan sĕdalu jatiniŋ gènnya pitutur, ambabari rasa, nur jariyaḥ wus maṅrĕti, pan rumaṅsuk rumĕsĕp anèŋ aṅganya.
27. duk samana pukul lima wayahipun, méga baŋ sumirat, kaliḥ salat subuḥ sami, sabakdané lajĕŋ pinarak iŋ laṅgar.
28. jatiĕniŋ aris wahu wuwusipun, laḥ paman kantuna, manira nutukkĕn kapti, poma poma iŋ kawruḥ aywa sĕmbrana.
29. pan wus cukup kabèḥ iŋ pitutur iṅsun, naṅiŋ pirabara, yèn sĕlamĕt iṅsun bali, sun jatèni kawruḥ iŋ ḍuwur punika.
30. yèn tan waṅsul susuḷĕn mriŋ wismaniṅsun, ya iŋ wanasĕkar, nur jariyaḥ matur aris, iṅgiḥ mugi ḍatĕṅa iṅkaŋ sinĕdya.
31. naṅiŋ mugi mampira maliḥ nak iṅsun, pun bapa mèḥ paḍaŋ, saṛĕŋ paduka éraṅi, ṅuṇḍuŋ uṇḍuŋ ṅèlmu iṅkaŋ kinaṇṭoṅan.
32. sakiŋ aṅgèr wlas pun bapa kéṅiŋ ciṇṭuŋ, lami ṅaṭaŋ aṭaŋ, katuju aṅgèr ḍatĕṅi, aṅgĕbagi iŋ bubuŋ pĕtuŋ markita.
33. sru gumujĕŋ jatiniŋ ṅandika arum, kawula pan darma, hyaŋ sukṣma kaŋ akèn mampir, nahĕn sampun samana ajawab taṅan.
34. ri sampunnya maṅkat jariyaḥ tut puṅkur, waṅsul jawi ḍaḍaḥ, jatiniŋ lajĕŋ lumaris, wus kapuṅkur iŋ wana krĕṇḍawinata.
35. lampahira lajĕŋ sumĕṅkèŋ iŋ gunuŋ, muḍun margèŋ juraŋ, pĕpèrèŋ sitinya miriŋ, curi curi tĕla tĕla margèŋ gawat.
36. pan andaruŋ lampahé añjujur gunuŋ, sumĕṅkèŋ iŋ juraŋ, tan ana baya kahèkṣi, ya ta kagyat anon kukus lamat lamat.
37. éṅgar tyasé ya ta lajĕŋ lampahipun, nĕṅna kaŋ lumampaḥ, cinatur iṅkaŋ paliṅgiḥ, nèŋ séraṅan awasta sèḥ mahmujéraḥ.
38. duk wahuné paṅulu bagĕdat iku, dinosan mriŋ nata, ḷĕpat dènira ṅukumi, marmanipun ḍaḍukuḥ anèŋ séraṅan.
39. ḍukuḥ alit muŋ pèṇḍèké apipitu, sami nak putunya, kéwala atrĕsna sami, mĕsjidipun alit aṅuṅkaŋ iŋ juraŋ.
40. makmuñjéraḥ rina wĕṅi anèŋ ṅriku, anĕḍa hyaŋ sukṣma, sagĕda muliḥ mriŋ nagri, iṅkaŋ mugi antuka apura nata.
17. sinom
1. sèḥ ṅarip iṅkaŋ winarṇa, samana karṣa amampir, maraŋ iŋ ḍukuḥ séraṅan, ya ta laju lampahnèki, samana sampun prapti, jujug masjid wus apaṅguḥ, kalawan mahmuñjéraḥ, nulya uluk salam nuli, jawab taṅan ri wusnya atata ḷĕṅgaḥ.
2. laṅkuŋ kagyat ki sèḥ jéraḥ, anon cahyané kaŋ prapti, nulya ris dènnya tatanya, wisma myaŋ namanirèki, jatiniŋ wus awarti, nama tuwin wismanipun, jatiniŋ maḷĕs tanya, sèḥ jéraḥ anulya warti, kamulané jatiniŋ aṅrĕs iŋ driya.
3. owĕl kaŋ wahu pitapa, iŋ maṅké apan ṅlaṅkuṅi, iŋ galiḥ pan tĕpa tĕpa, nĕṅna samana wus mahrib, dyan sami salat maliḥ, praptèŋ ṅisa bakda sampun, lajĕŋ atata ḷĕṅgaḥ, sèḥ jéraḥ ñugata bukti, jatiĕniŋ ṅécani anulya ḍahar.
4. ri sampunnya linorodan, gantya kĕḷĕman sumaji, uwi gĕmbili katéla, kimpul kĕṇṭaŋ lawan liñjik, apan ḍinahar sami, sinambi agunĕm ṅèlmu, sèḥ jéraḥ kaŋ ababar, ambabar kawruhé sami, laḥ ta anak puniku kawruḥ manira.
5. paṅandikané hyaŋ sukṣma, bhumi lawan laṅit iki, tan émut tiṅal naniŋ hyaŋ, aṅiŋ kaŋ émut iŋ kami, atiné manuṅsèki, kaŋ jumĕnĕŋ mukmin iku, sipat kahar mratiga, tĕgĕsé puniku nĕṅgiḥ, apan iṅgiḥ ati sir lawan suwénda.
6. ati kaŋ jati punika, tiṅaliŋ puat puniki, akaṛĕm iŋ apṅallolaḥ, tan liyan tiṅalé maliḥ, tiṅal apĕṅal jati, gèniŋ kèṛĕm tiṅalipun, ĕroḥ kudus punika, tuṅgal apṅallolaḥ nĕṅgiḥ, giḥ puniku sayĕkti tiṅal sampurṇa.
7. kapiŋ kaliḥ iṅkaŋ amrat, ati suwénda puniki, yèku atiniŋ kaŋ puat, tiṅaliŋ puat maṅkyaki, kaṛĕmiŋ sipat nĕṅgiḥ, tétéla dènira dulu, kèṛĕm iŋ apṅal ika, tanna liyan tiṅalnèki, apa ṛĕké kasucianiŋ paṅéran.
8. jatiniŋ mèsĕm sahurṇya, ḷĕṛĕs tan wontĕn kaŋ sisip, kasucianiŋ paṅéran, tan ana lyan tiṅalnèki, tiṅal suwénda nĕṅgiḥ, roḥ kudus ṛĕkè ranipun, kaŋ tan pĕgat tiṅalnya, tan ana ṅaliŋ aliṅi, kasucian tiṅaliŋ suwénda ika.
9. puniku jĕnĕṅiŋ nata, roḥ kudus wastanirèki, nĕṅgiḥ puniku bisikan, wastané sukṣma kaŋ jati, sèḥ mahmuñjéraḥ myarṣi, dènira gumuyu guguk, laḥ aṅgèr bañjuṛĕna, tĕkaniŋ sir aprasami, lan manira jatiniŋ mèsĕm wacana.
10. déné piŋ tiga kaŋ amrat, ati sir namanirèki, puniku batin suwénda, gantiniŋ ṅasir puniki, kĕṛĕmiŋ dat sĕjati, tan ana liyan kadulu, aṅiŋ datiŋ hyaŋ sukṣma, pratéla dènnya niṅali, giḥ puniku tiṅaliŋ roḥ amardika.
11. tiṅaliŋ woŋ kaṛĕm iŋ dat, tan émut iŋ jiwa ḍiri, dasihé tan ana kocap, kaŋ tĕka iŋ rasa jati, dasiḥ pan sampun moklis, pan wus ĕntiŋ cacahipun, dènnya muliḥ duk nora, amulyaŋ kadya duk uni, dèn prayitna iŋ pasaŋ uliḥ punika.
12. akaṭaḥ woŋ kaŋ kĕsasar, maṅkya guru iṅkaŋ apik, upaminé warṣa tiba, anèŋ tĕṅahiŋ jaladri, aywa gañcaŋ ywa riṇḍik, dèn awas pamĕndĕṅipun, miwaha ṛĕké yitna, puniku wĕdalan ṛĕgi, apan iku ṛĕké pamiyarṣa kula.
13. ati kaŋ mukmin punika, minaṅka kuruṅan pĕkṣi, déniŋ ñata pĕkṣinira, taṇḍané kuruṅan jati, sintĕn iṅkaŋ darbèni, pĕkṣi anèŋ jro puniku, yèn ṛĕké sampun wikan, sukur sèwu yan wus maṅgiḥ, pĕkṣi lara gantilan kuruṅanira.
14. sèḥ mahmuñjéraḥ aṅucap, jĕṅĕr datan bisa aṅliŋ, gagĕtun sèwu tan ñana, yèn tamuan paṇḍitadi, anama siŋ siŋ ṅèlmi, wacana aris aṅraṅkul, ḍuḥ aṅgèr tutugĕna, tan ñana yèn wus winasis, jatiĕniŋ mèsĕm rarambèni rapal.
15. paṅandikaniŋ hyaŋ sukṣma, kaŋ kocap kadis kudusi, iṅsun abaṅun maligya, baṅsa jroniŋ manuṅsèki, iṅsun arani maliḥ, malihgé ṛĕké puniku, ḍaḍa sajroniŋ ḍaḍa, iku sun arani ati, jroniŋ ati apan iku ĕṅgonira.
16. sajroniŋ punika ana, iŋ daḷĕm wastanirèki, sajroniŋ daḷĕm punika, pipitu lalaṅsénèki, sajroniŋ lalaṅsèki, apan ana sukṣma luhuŋ, sajroniŋ sukṣma ika, iku rasa kaŋ sĕjati, jroniŋ rasa iku kaananiŋ sukṣma.
17. siŋ sapa ṅulati sukṣma, adoḥ lan sariranèki, kupur satĕmahé sira, siŋ sapa ṅulati gusti, sajroniŋ sarirèki, kapir maṅké tĕmahipun, siŋ sapa amriḥ sukṣma, sañjabané sarirèki, yĕkti kupur dèn sĕṅguḥ apa duduhan.
18. siŋ sapa ṅulati sukṣma, ṅisor lan iŋ luhur laṅit, miwaḥ kulon lawan étan, lor kidul dènnya ṅulati, sayĕkti iku kapir, dèn sĕṅguḥ adoḥ lan nĕpsu, kalamun yun waṣpada, iŋ pĕrṇahé sukṣma jati, aṅlirika kaŋ mugèŋ sariranira.
19. ywa adoḥ ṅulati sukṣma, jiwa raga dèn kaliṅliŋ, pan sakèhé kono ñata, tiṅalana dèn sayĕkti, ayun awas iŋ galiḥ, yèn tan wruha yĕkti biṅuŋ, iŋ woŋ ati bĕlasar, patiné andĕdĕl siti, raganira minaṅka tĕlaḍaniŋ hyaŋ.
20. aja sira takèn awak, yèn kĕna ranana gusti, asasiliḥ raga mulya, kupur aranana gusti, hyaŋ sukṣma mulya jati, tan wontĕn sanépanipun, siliḥ ṛĕké kaŋ mulya, minaṅka tulaḍa jati, upamané lir kawula lawan ḷĕmpaŋ.
21. yèn luput salusurira, alus waḍak jisim maliḥ, dadi baṭaŋ iŋ wĕrata, tiwas jĕnĕṅira urip, siya siya tan sipi, tan asiḥ sariranipun, poma ṛĕké dèn yitna, aṅgiluta kaŋ sayĕkti, sajatiné mandum yĕkti duruŋ kĕna.
22. naṅiŋ miyarṣa kéwala, rarasané woŋ linuwiḥ, yèn kaprècèt punika, sayĕktiné datan yukti, yèn ḷĕpat iŋ pamikir, pan kaprènèkna puniku, pan kapir kajasmiyaḥ, kaŋ wruḥ puniku sayĕkti, tan sumĕṛĕp yèn amijil kaŋ luamaḥ.
18. mijil
1. apan iṅgiḥ yun ṅawruhi maliḥ, ananiŋ hyaŋ manon, sukma mulya ṛĕké tanpa ĕṅgèn, tan jiyat lan kaŋ musapat nĕṅgiḥ, miwaḥ tan ana riŋ, ṅisor lawan ḍuwur.
2. datan anèŋ madya miwaḥ wuri, iŋ ṅarṣa tan katon, tanpa yayaḥ réna tuṅgal ḍéwé, tanpa putra sakuṭu lan widdhi, tan kĕna dinugi, iṅaraḥ iŋ kalbu.
3. dudu sukma ananira nĕṅgiḥ, aṅlir yèn tinonton, iya sira sukma sĕjatiné, awor ulat anukṣma iŋ liriŋ, raganta iŋ ati, panĕmbahé nunut.
4. lamun aran jĕnĕṅiŋ ṅahurip, ananiŋ hyaŋ manon, mèmpĕr raganira sasolahé, kéwala jasad darma dumadi, ḷĕstari karṣaniŋ, iŋ hyaŋ maha luhur.
5. yèn karṣané hyaŋ kaŋ maha luwiḥ, anĕḍèŋ hyaŋ manon, kétaŋ iŋ nala tan wrin jatiné, saguṅiŋ raga iṅkaŋ dumadi, sapa kaanèki, anĕmbaḥ hyaŋ luhur.
6. dipun kadi sacipta iŋ ati, polaḥ dèn katoṅton, sira iki tan béda jatiné, iŋ maṅké kalawan iŋ ṅuni, dèn kapiṛĕŋ ati, poma dèn kadulu.
7. ṅati pati iŋ kawruḥ sĕjati, dèn kétaŋ iŋ panon, iya raga dudu sarirané, aṅiŋ tuṅgal iŋ ana kakaliḥ, panuṅgalé jati, jatiné hyaŋ aguŋ.
8. nĕṅgiḥ iṅkaŋ sampun awas jati, iŋ nala kanya woŋ, wruḥ iŋ apa iŋ sira wahuné, pan tan ana tuwa nom lan urip, panĕmbahiŋ ati, nora lawan wĕktu.
9. èṅĕt èṅĕt poma aywa lali, sakèhiŋ wirahos, malar gumarita ati ṛĕké, kahutaman kétuŋ siyaŋ latri, yun tĕguḥ iŋ ati, iŋ tyas dipun émut.
10. maṅkana ṛĕké tèki tèki, raganira gĕñjot, amriha ṛĕké paṅérané, awèḥ kaŋ dadi trĕsnaniŋ galiḥ, miwahiŋ kabatin, ywa pépékèŋ kawruḥ.
11. kaŋ sampun antuk nugraha luwiḥ, batiné sumrawaŋ, nora nana kèṣṭi iŋ liyané, amiŋ panuṅgal paraniŋ liriŋ, yèn wis nuṅgal kèṣṭi, nora nana kétuŋ.
12. dadya tĕmahan maṅguŋ karonsiḥ, iŋ nagara kahot, lawan sukma saparipolahé, jroniŋ bĕkti akĕmbulan arip, akĕmbulan kapiŋ, lan sukṣma purba guŋ.
13. lan yun awas jĕnĕŋ paṅabĕkti, tri prakara maṅgon, dèn waṣpada iŋ paṅkat paṅkaté, sampun lilu nora aṅawruhi, iŋ woŋ aṅabĕkti, dèn wruḥ badanipun.
14. kaŋ kariyin ṛĕké samya ati, pĕṣṭi iŋ hyaŋ manon, ajriḥ iŋ nraka lawan sikṣané, dipun agĕŋ tobatiŋ ṅahurip, malaḥ dadi asiḥ, iŋ hyaŋ maha luhur.
15. kapiṇḍoné iŋ ṛĕké asmèdi, sĕdya iŋ hyaŋ manon, aminta siḥ sarta gañjarané, minta swara iŋ sajroniŋ ati, ñana aṅabĕkti, gañjaran tinĕmu.
16. piŋ tĕluné iṅkaŋ paṅabĕkti, tan ṅarṣakkĕn iŋ woŋ, tanna ṅaṛĕp aṛĕp gañjarané, nora wĕdi sikṣaniŋ hyaŋ widdhi, aṅiŋ aminta siḥ, raga tuṅgal lulut.
17. waluyaa antukirèŋ kaŋ siḥ, tan uniŋ maṅkono, sĕmbaḥ lawan kaŋ sinĕmbaḥ kiyé, saguŋ alid alid dèn kawruhi, amiŋ kaṛĕmiŋ siḥ, lali raganisun.
18. suka laṅgĕŋ urip kaŋ pinaṅgiḥ, akaron siḥ amoŋ, iŋ rarasan pocapa jro sĕmbahé, anaṅisiŋ iŋ sajroniŋ guyunèki, aṅguŋ mandra lali, iŋ raga manĕkuŋ.
19. aṅliŋ palya kaŋ kadrĕsan aṅin, saparané moyoŋ, pĕgat jaṅkar marma saparané, kombak kombak iŋ lahutan giṅsir, aṅlut drĕsiŋ aṅin, sahéṅga iŋ bañu.
20. liwat ṅlaṅut tan ana kahèkṣi, jiwané tan katon, nora amaṅéran sĕjatiné, aṅiŋ jati minaṅka ragèki, marmanipun lali, iŋ raga tan kétuŋ.
21. datan kéṅiŋ winicarèŋ budi, yèn wus tuṅgal panon, yèn maṅkana iṅkaŋ ṅaṅabĕktiné, tanna béda yèn wus anunuṅgil, iŋ tiṅal sawiji, tan roro tatĕlu.
22. trus awas tiṅalirèŋ jati, paṅgrahita anon, iṅkaŋ katon saparipolahé, datan ana pinaṛĕṅiŋ galiḥ, yèn waṣpadèŋ jati, raga yĕkti suwuŋ.
23. lawan iṅkaŋ mĕnaṅi woŋ ḍiṅin, apan dèn kinahot, para ĕsèḥ ṅulama kaŋ gĕḍé, paṅuluné sor soraniŋ wali, iṅsun mirṣa warti, nagara silukun.
24. ana ĕsèḥ sĕmaṅun namaji, asĕti tan géroḥ, kaya dadi sor soran kawalèn, ḍasar uwus guguru pra wali, anèŋ ṅatasaṅin, añar mĕntasipun.
25. wontĕn paṅandikané hyaŋ luwiḥ, sakiŋ kadis kahot, kaŋ minaṅka kajinĕmanané, sukṣma jati kajinĕman mukmin, tan ana liyaniŋ, woŋ mukmin kaŋ ugul.
26. kaŋ wus narima iŋ tuduḥ jati, kaŋ iṅakĕn gĕḍoŋ, prasĕtyané hyaŋ sukṣma jatiné, katon dudu katon iya iki, yèn dipun tiṅali, aṅlir madu juruḥ.
19. ḍaṇḍaŋgula
1. dyan warṇanĕn ta sira ki wujil, ṅèstupada iŋ hyaŋ jatiwĕnaŋ, sakalaṅkuŋ pratigñané, sumuṅkĕm anèŋ suku, dalamakan saŋ maha yĕkti, kaŋ aḍukuḥ iŋ bénaŋ, anèŋ wana samun, akĕdaḥ nĕḍa jinarwan, sapratiṅkahiŋ agama kaŋ sinĕlir, kaŋ tĕkèŋ rasa purba.
2. dasa warṣa maṅké ki wajujil, amaṅulu iŋ samadiniṅrat, pan dèrèŋ antuk jatiné, iŋ kawijilanipun, nĕṅgiḥ wujil iŋ mahospahit, amĕŋ amĕṅanira, nata majalaṅu, tĕlas sandiniŋ akṣara, wujil matur tĕlas iŋ saŋ awigusti, anuwun paṅandika.
3. saha ṅucap iŋ pada nuṅkĕmi, dalamakan iŋ saŋ aji wĕnaŋ, pĕjaḥ gĕsaŋ katur maṅké, amba nĕḍa winuruk, sastra arab pambuka warti, wĕkasané aladraŋ, aguŋ amoŋ kayun, sabĕn dina rarakĕtan, malaḥ bosĕn ki wujil aṅlĕladosi, gawé alan alanan.
4. ya paṅéran iŋ saŋ aji gusti, jarwaniŋ isi akṣara arab, tuṅgal paṅiwa lan nĕṅé, tan wontĕn bédanipun, déné misiḥ anata gĕṇḍiŋ, misiḥ ucap ucapan, karoné puniku, datanpoliḥ aguŋ méndra, tilar trĕsna kaŋ kari iŋ mahospahit, datan antuk usada.
5. marmanya luṅa ṅikis iŋ wĕṅi, aṅulati sampurṇaniŋ gĕsaŋ, sĕjatiné lampaḥ ṛĕké, saŋ paṇḍita suŋ dunuŋ, aṅulati wĕkasiŋ urip, wĕkasiŋ jatiwĕnaŋ, wĕkasé lor kidul, surupé radétya wulan, wulan nétra lawan surupiŋ kapatin, wĕkasé ana ora.
6. saŋ rahtu wahdat liṅira ris, hèḥ ta wujil aywa ta maṅkana, kadya liṅirèku maṅké, dènnya anuwun bĕndu, sĕjatiné sira nanagiḥ, sakiŋ gĕŋ pakaryanya, pan samya kaḷĕbu, paṇḍitanira woŋ duña, lamun adol warta tuku warti, aṅur aja wahdata.
7. iṅkaŋ adol warta tuku warti, kumiṅsun kayaa wĕruha, iku iŋ aṇḍé aṇḍéné, arupa kadi kuntul, lir atapa tĕṅahiŋ wariḥ, mĕnĕŋ tan kĕna obaḥ, ambĕkipun tĕrus, api apinya mèt maṅsa, lir tĕtĕlu putihé putiḥ iŋ jawi, iŋ jro pan ana ṛĕkta.
8. surupiŋ arka gumaṇṭèŋ wĕṅi, pan pun wujil pan anuntun wrakṣa, baḍiyaṅan nèŋ dagané, pasoñané saŋ wiku, ujuŋ tĕpi iṅkaŋ jaladri, kaŋ aḍukuḥ iŋ bénaŋ, anèŋ wana samun, agalayaŋ tanna pala, lir kaŋ boga ombak sumawur kahèkṣi, paraŋ groŋ kaliwuṅan.
9. saŋ ratu wahdat liṅira ris, sira wujil paṛĕka dèn éṅgal, sarta aṅasta kuciré, sarwi dèn ĕlus ĕlus, tinibanan siḥ kaŋ jati, hèḥ wujil ruṅokĕna, iŋ sasmitaniṅsun, lamun sira kaḷĕbua, iŋ naraka iṅsun ḍéwé kaŋ ṅlĕboni, aja kaŋ kaya sira.
10. sigra pun wujil pan asuŋ bĕkti, matur sira iŋ saŋ adiniṅrat, sakalaṅkuŋ panuwuné, sampun ṛĕké pukulun, ḷĕhĕŋ sésa tuwan pun wujil, mañjiṅa iŋ naraka, pun wujil sawĕguŋ, pan sami wruḥ kahélaṅan, guru sétan tan ana salayèŋ kapti, kapti sahéka praya.
11. pèṅĕt iṅsun sira ki wawujil, déné sira iya anèŋ duña, aja sumbraŋ nèŋ iŋ gawé, kawruhané dèn èstu, raganira yèn dédé jati, kajatin dudu sira, iṅkaŋ sampun wĕruḥ, sĕjatiné kaŋ sarira, maṅka sasat waṣpadanira hyaŋ widdhi, iku marga utama.
12. utamané wujil iŋ ṅahurip, kawruhana sajatiné salat, sĕmbaḥ sarta pamujiné, jatiné salat iku, dudu ṅisa pan dudu mahrip, sĕmbayaŋ aranira, wĕnaŋ wujil iku, lamun aranana salat, pan minaṅka sasĕkaré salat dahim, winastan tatakrama.
13. ĕndi kaŋ aran salat sĕjati, aja nĕmbaḥ yèn tan katiṅalan, tĕmahé asor kulané, yèn sira nora wĕruḥ, kaŋ sinĕmbaḥ iŋ duña iki, lir péndaḥ nulup gagak, wuluné dèn sawur, manuké maṅsa kĕnaa, awĕkasan amaṅéran adam sarpin, sĕmbahé siya siya.
14. lawan ĕndi iṅaranan puji, sapa muji wĕṅi lan rahina, yèn ora sarta tuduhé, tan sampurṇa iŋ laku, yèn silarṣa waṣkiṭèŋ puji, dèn ñata iŋ sarira, pan iŋ wĕtonipun, kaŋ atuduḥ ananiŋ hyaŋ, pan iŋ wĕgtu iŋ napas yogya ṅawruhi, sukṣma catur prakara.
15. catur prakara kaŋ anèŋ sirèki, bhumi gĕni aṅin lawan toya, samana duk panampĕlé, sipaté iku catur, jalal kahar kamal lan kamil, gatra pan sipatiŋ hyaŋ, wawolu guṅipun, pañjiṅé punaŋ sarira, mañjiŋ mĕtu yèn mañjiŋ di prĕnahnèki, yèn mĕtu di parannya.
16. tuwa anom kaŋ anasir budi, pan lakuné ikuné iku kawruhana, yèn atuwa di anomé, yèn anoma puniku, ĕndi goné tuwané iki, lan anasir pawaka, kuwat apĕsipun, lamun kuwat di apĕsnya, lamun apĕs di kuwat apĕsirèki, aja tan katupikṣa.
17. miwaḥ ta kaŋ anasir aṅin, pan lakuné iku kawruhana, ana kalawan orané, lamun ana puniku, ĕndi goné ora puniki, iṅkaŋ anasir toya, pĕjaḥ gĕsaṅipun, lamun urip di patinya, lamun mati di goné patinirèki, sasar yèn ora wruha.
18. kawruhana tataliniŋ urip, iṅkaŋ aniṅali sariranya, kaŋ tan apĕgat pujiné, ĕndi pinaṅkanipun, kaŋ amuji lan kaŋ pinuji, aywa tan nora wruha, marmané woŋ aguŋ, paḍa aṅruruḥ sarira, dipun ñata iŋ uripira pribadi, uripira nèŋ duña.
19. dipun wikan iŋ urip sĕjati, lir kuruṅan raganya sadaya, bĕcik kaŋ wruḥ iŋ manuké, rusak yèn sira tan wruḥ, hèḥ wujil salahirèki, iku maṅsa dadia, yèn sira datan wruḥ, bĕcikana kaŋ sarira, awismaa iŋ ĕṅgon ikaŋ asĕpi, aywa kacakrabawa.
20. aja adoḥ aṅulati kawi, kawi iku pan ñatèŋ sarira, punaŋ rat wus ana kéné, kaŋ minaṅka pandulu, krĕsna jati sarira iki, siyaŋ dalu tan owaḥ, pandulunirèku, punapa ṛĕké pracina, kaŋ ñatèŋ sarira ñatané ya iki, sakiŋ sipat pakaryan.
21. mapan rusak kajatèné wujil, dadiné kalawan karṣanira, kaŋ tan rusak dèn wruḥ maṅké, sampurṇaniŋ pandulu, kaŋ tan rusak anané iki, minaṅka tuduhiŋ hyaŋ, kaŋ wruḥ iya iku, maṅka sĕmbaḥ pujinira, maṅka uwis kaŋ wus wruḥ ujarirèki, asimpĕn kanugrahan.
22. sayogyané hèḥ sira ki wujil, dènnya ṅa iŋ sarira, yĕkti ṅayaa tĕmahé, raraganira iku, lamun wujil dèn lalarisi, iṅkaŋ ñatèŋ sarira, salahé tan bĕsur, amumuraŋ raganira, iṅkaŋ dadi tiṅalé katimanèki, kaŋ dèn liriŋ nétyanya.
23. kawruhana sarira puniki, iya iku ñata iŋ paṅéran, tanapi yèn ta dadiné, wadi sariranipun, ana maliḥ kaŋ ayĕktèni, samya ṅruruḥ sarira, sĕbdané tanpa suŋ, amucuk sakiŋ sukarta, tanpa suṅa kaliru iŋ pĕrṇahnèki, iku iṅaran lampaḥ.
24. tan wus ñata ananiŋ hyaŋ widdhi, iya iku kasuciyaniŋ hyaŋ, ana ṅaku kaŋ wruḥ maṅké, ḷĕkṣananya tanpa suŋ, raga sastra tan dèn gugoni, alalis iṅsun braṅta, kaŋ sampun yĕkti wruḥ, anèŋ karṇi punaŋ raga, paniṅalé dèn tawaŋ rahina wĕṅi, tanpa suŋ guṅguŋ raga.
25. iku polanira ki wawujil, dèn bisa sira amétani raga, aja muŋ aṅruṅu bahé, dèn sayĕkti iŋ laku, ayun sarta lawan paṅlikiŋ, yèn karoné wus ñata, pan iŋ wĕtonipun, tan ana pakéwuhira, iku sira sayĕktiné sami sami, wĕnèḥ kaŋ dèrèŋ wikan.
26. kaḍoḍokan dènira niṅali, karoné ṛĕké tan katiṅal, bawéra iŋ prĕnahé, jatiné sipatipun, mapan warta iṅkaŋ udani, yèn ora aṅĕṅgona, pĕgat tiṅalipun, tiṅal jati kaŋ sampurṇa, aniṅali nakiraḥ yĕkti dumĕliŋ, kaŋ sĕjatiné rupa.
27. mapan bédanira ki wawujil, déné kaliṇḍiḥ salahé ika, bédané tan siŋ purwané, wujil sampun tan émut, lamun aguŋ tutup tan wujil, tan ana kawusannya, siyaŋ dalunipun, dèn rasani woŋ akaṭaḥ, kitabipun upama brakutut muni, asriŋ dèn gawé pikat.
28. dèn wruḥ surupiŋ mĕnĕŋ lan muni, yèn tan wruha iku tan sampurṇa, sampun ta pĕkṣi ĕnĕṅé, yèn muni aywa umuŋ, lir kukila kanigara jrit, puniku saminira, tan wruḥ tĕgĕsipun, iŋ ujar kaŋ ginĕḍoṅan, sira wujil aja sira bisa aṅliŋ, liṅira kaŋ utama.
29. ĕndi rupané kaŋ mĕlèk wĕṅi, aywa koṅsi amba tiṅalira, karo iku tanpa gawé, yèn ora tan tinutup, iŋ paniṅa kaŋ sampun ghaib, paran margané wruha, iŋ sariranipun, paṅruṅunipun punika, iŋ asalé sampun apan iku muni, tanpa suŋ yèn mĕnĕṅa.
30. ora mĕnĕŋ ora muni wujil, hèḥ ta wujil atakona sira, kaŋ atèki tèki kabèḥ, sĕmbaḥ puji dèn wĕruḥ, sĕmbaḥ akèḥ warṇané wujil, liṅira saŋ utama, woŋ amuji iku, sanalika guŋ sawabnya, paḍa lawan asĕmbayaŋ satus warṣi, yèn wus wruḥ pirantinya.
31. kaŋ sampun wruḥ iŋ pirantinèki, sĕmbaḥ pujiné tanpa pĕgatan, mapan tan ana wĕktuné, woŋ aguŋ yèn amuwus, paḍa lawan sawidak warṣi, pan sampun amardika, sampurṇa woŋ iku, iŋ wĕktu tan kabĕndana, kaŋ bĕndana solahé anèŋ jro masjit, apiṇḍa manuk ika.
32. nora kĕna pinahido wujil, wuwusiŋ naya pan kadi niṅrat, wujil atakona maṅké, ana muji iŋ dalu, iŋ rahina guŋ sawapnèki, yèn kĕnaa tatanya, iŋ sasaminipun, mapan lawan rolas warṣa, yogya wĕnaŋ pun wujil atèki tèki, sampun ta kĕpaṅgiha.
33. ana ṛĕké nĕṅgiḥ paṅabĕkti, sanalika guŋ sawabé ika, yèn wikan iku duduhé, paḍa lan rolas tahun, iṅaranan tapakur nĕṅgiḥ, yèn mĕnĕŋ di prĕnaḥnya, takokĕna iku, sapa kaŋ atuduḥ ika, uṅguḥ turun iŋ napas mĕnĕŋ lan muni, iku dipun waṣpada.
34. hèḥ ta wujil mĕnĕṅa sirèki, iṅkaŋ luwiḥ ṛĕké woŋ sĕmbayaŋ, déné norana wĕktuné, sampurṇa ta woŋ iku, raragané norana kèri, tĕkèŋ wulu syuḥ sirṇa, satuhuné laku, pagurokĕna dèn ñata, iŋ woŋ iṅkaŋ sampun tumĕkèŋ iŋ jati, iku lampaḥ utama.
35. aja nĕmbaḥ hèḥ sira ki wujil, lamun ora katon kaŋ sinĕmbaḥ, sĕmbaḥ puji tanpa gawé, pan kaŋ sinĕmbaḥ iku, anèŋ ṅarṣa wahyu dumĕliŋ, anané pan minaṅka, anané hyaŋ aguŋ, aywa sira kasamaran, hèḥ ta wujil ika wruḥ dipun patitis, dimèn gambuḥ iŋ nala.
20. pocuŋ
1. maṅka pémut limutiŋ nala kalimput, kéwran iŋ wĕwĕran, tan wrin sasmitèŋ rahsadi, dimèn sampat samaptaniŋ siptamaya.
2. lamun kabul kalabon ḷĕbdaniŋ kalbu, bubuka cinitra, samaniŋ purṇamasiḍi, ramlan alip tata truṣṭèŋ sabda nata.
3. purwanipun mĕḍar wasitaniŋ guru, maraŋ muridira, bismillaḥ rahmanirakim, allakamdulilahi rabil ṅalamina.
4. assalatu walamu salajĕṅipun, ṅala sayiddina, wa molana muhkamaddin, wala ihi wa sahbihi ajmaṅina.
5. amma bakdu anapon sasampunipun, amuji iŋ allaḥ, lan amuji kaṅjĕŋ nabi, rasulullaḥ maṅka sami kawruhana.
6. rahsèŋ ṅèlmu kakékat iṅkaŋ wus kusus, sajatiniŋ kanaŋ, nampurṇakkĕn iŋ ṅahurip, iku liré ṅèlmu iṅkaŋ linaraṅan.
7. kaŋ sinĕruŋ iŋ nabi wali mukminun, ṅuni uni datan, wontĕn kaŋ purun nĕmbaṅi, sakiŋ dahat wadiniŋ ṅèlmu punika.
8. awitipun rinumpakèŋ sĕkar pucuŋ, dyan raṅgawarṣita, nĕmpuḥ byat amĕḍar wadi, sarupané pamĕjaṅé gurunira.
9. kaŋ dèn ĕbuk iŋ parimbon sadayèku, samya tinĕmbaṅan, kinarya sulukiŋ ṅèlmi, pan minaṅka pambéṅkasiŋ tyas ardaya.
10. nalika duk kinuñcaŋ déniŋ hyaŋ aguŋ, pisaḥ duña rowaŋ, anèŋ sabraŋ nagri ṅaciḥ, woŋ kakaliḥ lan mas yakir prĕnaḥ paman.
11. naṅiŋ nuju lara rumab pamanipun, miṅgu suṅkawèŋ tyas, tan kĕna tinari tari, duk makirtya jumuṅaḥ rabiṅulawal.
12. lèk piŋ pitu tahun jé maṅsa kapitu, candra saṅkalanya, naya suci paṇḍita ji, purwakaniŋ ṅèlmu nukil sakiŋ kitab.
13. ahya ṅulumudin pan sakiŋ anurun, tabsir ibnu ṅabas, ṅèlmu kak kaŋ dèn rahsani, tasisiŋ ros masalaḥ kiyas pahésan.
14. kaŋ dèn ilo lawan kaŋ ṅilo puniku, jatiné wayaṅan, anané kaŋ ṅilo paṣṭi, iya iku tan ana prabédanira.
15. tĕgĕsipun kaŋ ṅilo iku hyaŋ aguŋ, anapon wayaṅan, jatiné kaŋ ṅilo paṣṭi, iya iku kaŋ iṅaranan datulaḥ.
16. malihipun aran sipatulaḥ iku, iya sipatira, paṣṭiné kaŋ dèn rahsani, apṅalullaḥ pan iya paṅgawénira.
17. dèn tuwajuḥ poma aja sak sirèku, aja kumalamar, lawan aja piṇḍo kardi, krana woŋ kaŋ makripaté wus sampurṇa.
18. liré kaŋ wus prapta iŋ wadahul wujud, sakaṭahiŋ asya, pan iku kukumé napi, déné kakékatiŋ napi iku asya.
19. isbatipun nĕṅgiḥ datullaḥ puniku, paṣṭi awakira, naṅiŋ ta dudu sirèki, ĕndi ana manèḥ lamun dudu sira.
20. iya ṅĕndi iŋ ĕṅgoné ñatanipun, marma akèḥ woŋ kaŋ, kasamaran tan wrin jati, sabab kéron akèḥ akèhiŋ pawarta.
21. wowor sambu karana sahiŋ paṅawruḥ, iku tan umiyat, iya iŋ wujud kakaliḥ, yèn makṣiha kakaliḥ duruŋ sampurṇa.
22. kawruhipun hèḥ gé liŋ éliŋ ta saguŋ, anak murid iṅwaŋ, poma aja wani wani, aṅarani allaḥ sakaṭahiŋ asya.
23. déné lamun dèn arani allaḥ iku, yèn makṣiḥ umiyat, iya iŋ wujud kakaliḥ, yĕkti kupur woŋ iku pataŋ madahat.
24. apan kawruḥ iŋ dalilé awakipun, yèn ṅahénalana, karana andika nabi, rasullullaḥ rapalé paman ṅarapa.
25. lan napsahu pakat ṅarapa rabahu, tĕgĕsé siŋ sapa, wruḥ iŋ awaké pribadi, maṅka tĕmĕn tĕmĕn wruḥ paṅéranira.
26. yĕktinipun paṅandikaniŋ hyaŋ aguŋ, lapal jroniŋ kuran, muni iŋ dalilé napi, alhusikum lawan palatub siruna.
27. tĕgĕsipun iŋ daḷĕm awakirèku, sadaya apa ta, tan ana sira tiṅali, sajatiné awak iku kasuñatan.
28. iŋ hyaŋ aguŋ kaŋ wajaḥ sawiji iku, ñata lamun tuṅgal, lawan wontĕn lapal maliḥ, sakiŋ ahya ṅulumudin nukilira.
29. innal kahu taṅalahi ya nahibun, lan maliḥ lidira, wal insanu ya ghaibi, liré allaḥ taṅala iku pan sukṣma.
30. nadyan muṅguḥ kawulané ya sukṣmèku, ana maliḥ rapal, ṅallahu bahitunaṅsi, lawan maliḥ wal insanu rahilulaḥ.
31. wal batinul kakku wal lahirul kakku, tĕgĕsé hyaŋ sukṣma, batiné manuṅsa yĕkti, tuwin manuṅsèku lahiré hyaŋ sukṣma.
32. batinipun ñata nadyan lahiripun, sami ñatanira, tan ana bédané ugi, nora pisaḥ iŋ antaraniŋ panuṅgal.
33. ujar iku poma ajana kawĕtu, mariŋ woŋ akaṭaḥ, dèn asasab kaŋ awiṅit, iŋ paṣṭiné iku nasarakĕn uga.
34. jĕr woŋ iku kadohan upayanipun, pañanané uga, iŋ kana ana hyaŋ widdhi, utawa dèn ñana kéné tan ana.
35. miwaḥ lamun paṛĕka paṛĕkĕn iku, dèn arani ana, iŋ kéné paṅérannèki, utawa kana dinaliḥ tan ana.
36. dadi bĕstu kaŋ maṅkono kawruhipun, liré wuruŋ sabab, suwuŋ ṅèlmuné tan dadi, iŋ dadiné nĕmbaḥ maṅran mariŋ sétan.
37. ṅèstu makdum sarpin dèn ucapna iku, tur maṅsa gĕḷĕma, jĕr ana taṇḍané yĕkti, woŋ kaŋ duruŋ darbé guru kaŋ sampurṇa.
38. tuduhipun dadi sasar iṅkaŋ ṅèlmu, kapir atĕmahan, paṅandikaniŋ ṅulami, sarupané woŋ kaŋ wuruŋ tumĕkèŋ kak.
39. duruŋ guru kaŋ paṣṭi pituduhipun, satuhuné sétan, kaŋ minaṅka gurunèki, dadya manut amaṅéran riŋ atñana.
40. sĕlaŋ sambut akèḥ akèḥ kaŋ cinatur, pan pijĕr kaliṅan, iŋ wicarané pribadi, ṅalam dalil sakiŋ yakalé priyaṅga.
41. ṅèlmu iku poma anak putuniṅsun, dèn agĕmi paḍa, simpĕnĕn sajroniŋ ati, aja mĕtu dèn dudu prayoganira.
42. dèn asĕruŋ ṅaṅgowa paraḥ yèn muwus, karana iŋ maṅsa, mĕṅko akèḥ manuṅsèki, kaŋ katuṅkul iŋ ṅèlmu rasa myaŋ swara.
43. lan katuṅkul iŋ ujariŋ sastranipun, ṅèlmu kaḷĕpasan, lan katuṅkul aniṅali, sarirané kaṇḍĕg iŋ ucap ucapan.
44. pijĕr ṅèlmu sarak dèn pĕndĕŋ ginilut, aṅlakoni salat, sujut rukuk añiṅgahi, karam mĕkruḥ dèn sĕṅguḥ aṅuwisana.
45. nora wĕruḥ kaŋ maṅkono sirik aguŋ, bitṅaḥ panasaran, panĕluhan jahil jidin, déné iṅkaŋ ṅukuhi jariŋ akṣara.
46. tan kadyèku kaŋ wus aṅgrahitèŋ kawruḥ, iŋ wĕrdiniŋ iman, tokit makripat sayĕkti, nora kaṇḍĕg iŋ ṅèlmu ucap ucapan.
47. liré ṅèlmu sarak karana katuṅkul, kaṇḍĕg iŋ saréṅat, aṅèl tumĕkaniŋ ghaib, iṅkaŋ luwiḥ bĕnĕr yèn kinatujonan.
48. kaŋ rahayu muṅguḥ mariŋ iŋ hyaŋ aguŋ, anadéné woŋ kaŋ, makripaté sampun wasis, tan ṅawruhi iŋ swarga lawan naraka.
49. apan amuŋ ṅawruhi pribadinipun, sajatiné iṅkaŋ, maha luhur maha suci, nora liyan anadéné woŋ kaŋ samya.
50. kumaluṅkuŋ iku dadi boḍonipun, jĕr tan pawoŋ sanak, kalawan woŋ pĕkir miṣkin, kaŋ maṅkono maṅsa dadaka olèha.
51. marga ayu kaŋ nalamĕtakĕn iku, muṅguḥ iŋ makripat, marma kèḥ kaŋ boḍo sami, sabab ṅaguṅakĕn iŋ ṅèlmu saréṅat.
52. kitab nahwu saratman tèk nikmatipun, dèn guṅguŋ dèn kudaŋ, kalimput iŋ sétan tartib, kamajétun lan tarab bajéhun ṅasran.
53. sarat bagu jédan jahédun karimun, lan ilram jahédan, pan iku dadi upĕkṣi, iṅsun ralim apa ana kaya iṅwaŋ.
54. iṅsun wĕruḥ iŋ rahsané kitab aguŋ, tur ta misiḥ mĕntaḥ, katuṅkul amuruk ṅaji, brahalané dadi dèn géṇḍoŋ dèn ṛĕmbat.
55. dèn ñana wus iya kaŋ maṅkono iku, aṅguŋ maca kitab, tur siji duruŋ kahèṣṭi, woŋ maṅkono iku taklit jahil pitĕnaḥ.
56. ṅèlmunipun dadi sirik marganipun, sasar kabĕlasar, déné ṅèlmu kaŋ wus kak sis, iṅkaŋ ñata nora nana tiral liyan.
57. ḍèwèkipun iya iku dudu iku, naṅiŋ iku uga, utawi sakèhiŋ ricik, lan sakèhé ibaraté wus kapaṅgya.
58. anèŋ suluk lawan anèŋ kitab usul, kadya kaŋ aṅucap, sira urip ana ḍiṅin, ana kari ana kadim ana añar.
59. ana mĕtu kalawan ana lumĕbu, ana ḍèwèk miwaḥ, ana kaŋ baṛĕŋ sayĕkti, tuwin ana wiwitan ana wĕkasan.
60. kabèḥ iku iya dadi pujinipun, dènira maspadak, akĕn iŋ hyaŋ maha suci, iŋ datolaḥ sipat asma abṅallullaḥ.
61. tĕgĕsipun pan iya kaŋ awèḥ iku, rupa papahésan, mapan iŋ ananirèki, aṅaguṅkĕn iŋ wujudiŋ kadim baka.
62. paṣṭi iḍup laṅgĕŋ datan kĕnèŋ lampus, wĕruḥ tan winaraḥ, ñata saduruṅiŋ lahir, amiyarṣa iŋ saduruṅé aṅucap.
63. iya iku kaŋ aran ṅulumuddinu, ṅawruhi lirira, iŋ ananira pribadi, poma dipun bĕcik panarimanira.
64. lawan dipun bĕcik iŋ rahsanirèku, lawan ciptanira, myaŋ tékadira dèn tuṅgil, tuṅgal wujud iŋ wujudé iku ĕsa.
65. marmanipun iṅaranan ĕsa iku, sabab tan narima, iŋ wiwilaṅan kakaliḥ, upamané kadi ĕroḥ lawan jasat.
66. lagya duruŋ mati ĕsa namanipun, ñata anarima, iŋ wiwilaṅan duk urip, maṅka kĕna sakèhiŋ asya iṅaran.
67. sadayèku jumĕnĕŋ lawan alahu, dé alaḥ punika, jumĕnĕŋ lawan pribadi, iya iku sajatiné iŋ sahadat.
68. lan satuhuné iman tokit lan makrup, lan kakiŋ saréṅat, lawan sajatiné takbir, lan kakiŋ roḥ ilapi abadan rahman.
69. déné iku maṅka witiŋ urip aguŋ, mila jinulukan, nĕṅgiḥ abadan rahmani, pan karana iku ñata i datolaḥ.
70. ĕdat iku anapon sĕjatinipun, iya rasulullaḥ, mapan iŋ wajaḥ sawiji, poma poma aja ĕsak maliḥ sira.
71. ujar iku kaŋ ĕsak sayĕkti kupur, tur kapir iŋ allaḥ, déné iṅkaŋ para nabi, para wali lan para mukmin sadaya.
72. nĕṅgiḥ lamun aṅlakoni ujar iku, sira koṅsi prapta, iŋ surahsa kaŋ sĕjati, iya kaya nora nana bédanira.
73. lawan rasul pan maṅkono ujar iku, iya dadi ñata, tyas tĕtĕp iṅkaŋ wus prapti, iŋ wujudiŋ kawula kalawan allaḥ.
74. iya iku manuṅsa kaŋ uwus ṅlĕbur, iŋ papan sadaya, lawan sakaṭahiŋ tulis, lawan iṅkaŋ aṅlĕbur urip sadaya.
75. hèḥ ta saguŋ guŋ alit nak putuniṅsun, paḍa kawruhana, kaŋ aran alaḥ sayĕkti, iya iku kaŋ ṅucap alahu akbar.
76. poma dipun pracaya iŋ ujar iku, aja kumalamar, lawan aja piṇḍo kardi, krana aṅèl tĕmĕn muṅguḥ iŋ ṅagĕsaŋ.
77. rahsa iku kudu dèn pĕndĕŋ dèn gilut, mapan nora nana, iṅkaŋ aṅluwihi maliḥ, iya sakiŋ iŋ ṅèlmu tuduḥ punika.
78. naṅiŋ kudu dèn wĕrit aja kawĕtu, ywa dadi rarasan, karana tan aṅrasani, jisim lahir tan aṅrasani kaŋ rusak.
79. ujar iku tan ana maliḥ lyanipun, poma kukuhana, aja owaḥ aja giṅsir, aja obaḥ aja mamaŋ aja ĕsak.
80. aja kuwur dèn gĕnaḥ paṅrakitipun, wruha liŋ pinaṅka, rahsèku ĕṅgoniŋ pati, pati iku goniŋ muliḥ darussalam.
21. mĕgatruḥ
1. wontĕn maliḥ wasiyatiŋ para guru, mriŋ saguŋ kaŋ wuri wuri, poma ajana katuṅkul, karana woŋ iŋ ṅahurip, tan wuruŋ praptèŋ mĕgat roḥ.
2. marmanipun dèn tumĕmĕn ulaḥ ṅèlmu, wasiyatiŋ para wali, lan wulaṅiŋ guru guru, dèn tumañcĕp jroniŋ ati, aja dèn sambi guguyon.
3. supayané dadia paṅémut émut, pamĕjaṅé sunan giri, kaḍaton mriŋ garwanipun, dadia tĕpa palupi, amriḥ waṣpadèŋ pasĕmon.
4. aturipun kaŋ garwa hé jĕŋ sinuhun, amba kapéṅiŋ kapati, aṅsala barkaḥ pukulun, masalahiŋ woŋ ṅahurip, kawruḥ kaŋ mariŋ hyaŋ manon.
5. iṅkaŋ raka aris paṅandikanipun, laḥ ñahi ṅambila aglis, saḷĕmbar kaŋ goḍoŋ lumbu, nulya isènana wariḥ, iŋ kono goniŋ patĕmon.
6. iya kawruḥ kaŋ muṅguḥ mariŋ hyaŋ aguŋ, sakṣana kaŋ garwa ṅambil, ron lumbu iṅisèn bañu, nulya katur mariŋ laki, sinuhun giri kaḍaton.
7. iṅkaŋ garwa dèn ajak mriŋ gon kaŋ samun, jĕŋ sinuhun ṅandika ris, ñahi sun wruhkĕn sirèku, dulunĕn pasĕmon iki, maṅkéné muṅguḥ iŋ kawroḥ.
8. waṣpadakna iŋ paḍaŋ paḍaṅiŋ bañu, ya iku ṅibarat gusti, dé obaḥ obaḥ kaŋ bañu, ṅibaratiŋ kawulèki, déné iku iṅkaŋ ḍahon.
9. kaŋ kinarya wawaḍahiŋ bañu iku, iya ṅibarat jasmani, kawruhana obahipun, iŋ bañu iku obahiŋ, kaŋ paḍaŋ paḍaŋ iŋ kono.
10. krana paḍaŋ iku pan ñataniŋ bañu, bañu ñata waḍaḥ iki, tĕgĕsé paniṅal iku, tuṅgal kajatèné déniŋ, tampaniŋ siḥ apadudon.
11. iku kawruḥ kaŋ sampurṇa kaŋ wus kusus, yèn ora maṅkono ñahi, luput tur sasar woŋ iku, kaŋ garwa umatur aris, ḍuḥ sinuhun guruniṅoŋ.
12. kadyaparan kawula dèrèŋ aṅgayuḥ, timbalan tuwan sayĕkti, mĕkṣiḥ pasĕmon puniku, ṅandika jĕŋ sunan giri, tĕgĕsé ñahi iṅkaŋ woŋ.
13. iya iṅkaŋ aniṅali iŋ hyaŋ aguŋ, kéwala dènnya niṅali, lan mata kapala iku, laḥ iku ñatané ñahi, kaŋ garwa maliḥ turṇya lon.
14. kadyaparan paniṅal amba pukulun, mata kapala kaŋ pundi, kaŋ raka ṅandika arum, ñahi tan ñaṇḍak sirèki, iŋ pasĕmon kaŋ maṅkono.
15. yèn maṅkono majua dèn paṛĕk iṅsun, sakṣana ḷĕṅgaḥ sumaṇḍiŋ, sarwi aṇḍĕpèpèl bukuḥ, maṅkana nuli winisik, laḥ ñahi sira tan wĕroḥ.
16. basa mata kĕpala paniṅal iku, ya matanira pribadi, kaŋ bundĕr iku kaŋ dulu, iŋ alaḥ maṅka dèn aglis, dulunĕn cahya iŋ kono.
17. ya cahyané iŋ paniṅalira iku, ñata yèn tuṅgal paṅakṣi, dadi kasuñatanipun, tan liya ḍèwèkirèki, kaŋ anonton kaŋ tinonton.
18. jĕr paṅéran tanpa nétra yèn andulu, lan tanpa swara yèn aṅliŋ, ya paniṅalira iku, swaranira kaŋ kinardi, ya sira iku hyaŋ manon.
19. dadi iṅkaŋ nĕmbaḥ kaŋ sinĕmbaḥ iku, ya kaŋ muji kaŋ pinuji, laḥ iku jatiniŋ kawruḥ, kaŋ garwa aglis nuṅkĕmi, iŋ suku saŋ wiku katoŋ.
20. ṅandika rum mriŋ garwa ñahi sun pémut, poma aja salaḥ tampi, lan aja koṅsi katuṅkul, iŋ maraŋ liyanirèki, dèn asĕruŋ dèn sĕromboŋ.
21. iya iku kawruḥ kaŋ paḍa lan iṅsun, tĕlas wĕjaŋ sunan giri, wontĕn maliḥ wĕjaṅipun, nĕṅgiḥ paṅéran sumĕṇḍi, nalika amĕḍar kawroḥ.
22. mriŋ kaŋ putra tasisjati wĕjaṅipun, pratiṅkahiŋ ulaḥ ṅèlmi, kulup ḍasar salat iku, pan iya luluguḥ mami, sahadat paṅucap iṅoŋ.
23. basa puji iku papaṅanan iṅsun, tĕgĕsé muṅguḥ iŋ pati, basa urip patiniṅsun, basa wujud rahsa mami, iku ratu gĕŋ kinahot.
24. yèku aran ratu iŋ sabĕnĕripun, ratu iṅkaŋ maha luwiḥ, karana woŋ urip iku, yèn duruŋ tumĕkèŋ pati, islamé duruŋ gumacos.
25. tĕlas paṅran sumĕṇḍi wawĕjaṅipun, paṅran juminaḥ winarṇi, duk mirahos tĕgĕsipun, iŋ sarira lan kaŋ siwi, ya kulup apa sira wroḥ.
26. iŋ jatiné kaŋ aran sarira iku, aturiŋ putra tan uniŋ, yèn botĕn paduka tuduḥ, akĕn kaŋ rama liŋnya ris, kulup iṅsun kaŋ atudoḥ.
27. mariŋ sira tĕgĕsé sarira iku, sukṣma kaŋ tan owaḥ giṅsir, kaŋ tan ana wĕkasipun, tanpa tuduhan lirṇèki, dudu jisim kaŋ bĕrgogok.
28. dudu ati dudu rohkani pan dudu, ya sarira iku kaki, kaŋ amurba misésèku, iŋ awak kaŋ lahir iki, tĕgĕsé pisan maṅkono.
29. ya datolaḥ kaŋ aran sarira iku, dadi kasuñatan yĕkti, maṅka tiṅalana saguŋ, kasuñatan datolahi, yèku aran tiṅal wutoḥ.
30. dadi alaḥ kéwala paniṅalipun, karana iŋ woŋ ṅahurip, yèn tan wruḥ sariranipun, maṅka wuta praptèŋ pati, nora kaya kaŋ waṣpahos.
31. iŋ sarira dadi wruḥ paraniŋ lampus, poma kulup dèn udani, iŋ sariranira iku, marmané akèḥ tan ana wrin, iŋ sarira pijĕr kéron.
32. kéronipun iŋ paṅgawé kawir kuwur, muŋ iku kaŋ dèn kawruhi, marma antĕpira iku, aja kasarakĕn ugi, karana uwis katoṅton.
33. pan manuṅsa kĕkandĕḷĕn sarakipun, aṅèl tumĕkaniŋ ghaib, kaŋ putra nĕmbaḥ umatur, kaŋ rama ṅandika maliḥ, kulup yèn sira wus wĕroḥ.
34. iŋ pratiṅkaḥ kaŋ kaya maṅkono iku, aywa kulinèŋ nagari, yèn mantĕp panarimèku, wus ĕntèk poma dèn titi, wontĕn maliḥ winirahos.
35. sunan kalijaga paṅandikanipun, pawoŋ sanak iṅsun sami, tékaté wajibul wujud, liré ananiŋ kaŋ paṣṭi, yèn iṅsun ora maṅkono.
36. kaŋ sun tobatakĕn rahina lan dalu, yèn ṅucapa ujar iki, lahilaha ilalahu, karana kaŋ bhumi laṅit, tan ginawé iŋ hyaŋ manon.
37. sabab añar alaḥ taṅala puniku, apan manuṅsa kaŋ kadim, allaḥ iku uripipun, kalawan ĕroḥ sayĕkti, manuṅsa urip tanpa roḥ.
38. alaḥ iku uripé kĕna iŋ lampus, manuṅsa tan kĕnèŋ pati, lan mulana kaŋ amuwus, alaḥ tan kĕna iŋ pati, manuṅsa kaŋ kĕnèŋ layon.
39. dadi suṅsaŋ kabalik paṅucapipun, kaya babasan sajroniŋ, matĕŋ ana mĕntahipun, déné muṅguḥ tékat mami, yèn matĕŋ matĕŋ jaba jro.
40. lwiriŋ allaḥ yèn urip tan kĕnèŋ lampus, sanadyan kawulanèki, ya urip tan kĕnèŋ lampus, yèn maṅkono iya dadi, jaba mĕntaḥ matĕŋ iŋ jro.
41. yèn dèn ñana alaḥ taṅala kaŋ iḍup, manuṅsané aṅĕmasi, dadi ana gèṭèk nuṅsuŋ, sasataṅé dèn boṅkoki, anujoni tirta ĕrob.
42. ṅaji sarak tanya tarékat babipun, hèḥ ta pawoŋ sanak mami, yèn arṣa tatakon ṅèlmu, kakékat makripat nĕṅgiḥ, sawĕcané kaŋ gumacos.
43. saratipun mañjiŋ wahu gurunipun, aṛĕp pasraḥ jiwa ḍiri, aja rumaṅsa aṅgaḍuḥ, gĕtihé satètès nĕṅgiḥ, aturṇa iŋ guru kono.
44. hèḥ ki luhuŋ salawé aja katuṅkul, mapan iṅantĕp puniki, boya kaya iṅkaŋ wĕruḥ, iŋ alaḥ dadi tan sirik, aja kaya woŋ kaŋ boḍo.
45. kaŋ binunton atiné maraŋ hyaŋ aguŋ, hèḥ ki luhuŋ kalamun wis, waṣpada mariŋ hyaŋ aguŋ, nuli waṣpadaa mariŋ, rupa ḍéwé aywa kéron.
46. iya iku salat dahim tĕgĕsipun, iṅaran puji nĕkṣèni, yèn kinarṣakakĕn iku, déniŋ hyaŋ sayĕkti dadi, waliyullaḥ tur kinahot.
47. lamun ora maṅkono mukmin kasiku, déniŋ ta ujariŋ ḍikir, lahilaha ilalahu, makdumma kalawan batin, tĕtèbèŋ lahir kimawon.
48. kyayi luhuŋ salawé alon umatur, jĕŋ suhunan kadospundi, mĕṅgaḥ babar pisanipun, ṅandika jĕŋ sunan kali, hèḥ ki luhuŋ dèn waṣpahos.
49. iŋ makripat muṅguḥ kasampurṇanipun, aywa makṣiḥ aniṅali, sirik yèn makṣiḥ andulu, duruŋ sampurṇa sayĕkti, liré sirik makṣiḥ roro.
50. misiḥ ṅétuŋ iŋ wisésaniŋ hyaŋ aguŋ, kaṇḍĕk mimilaŋ wosnèki, ḷĕwiḥ tan sampurṇa iku, ki luhuŋ slawé turṇya ris, ḍuḥ sinuhun guruniṅoŋ.
51. kadyaparan salamĕté kaŋ satuhu, kaŋ botĕn mikaliḥ kardi, aṅandika jĕŋ sinuhun, hèḥ ki luhuŋ prahsa tuṅgil, yèn misiḥ kaya maṅkono.
52. duruŋ prapta maraŋ takdiré puniku, déné tĕgĕsipun tokit, pan rahsa purba puniku, nĕṅgiḥ rahsané pribadi, rahsa pĕkĕnira kono.
53. matur maliḥ ki luhuŋ gaṅsal roṅpuluḥ, ulun pirṣakna babarji, kadyaparan tuṅgilipun, kawula kalawan gusti, sèḥ malaya ṅandika lon.
54. hèḥ ki luhuŋ sĕlawé kawula iku, paṛĕk paṛĕké lan gusti, tĕbiḥ iṛĕŋ iṛĕŋ iku, iŋ nétra lan putihnèki, lan makṣiḥ tĕbiḥ kaŋ otot.
55. ulu iriŋ kalawan dagiŋ iŋ gulu, déné paṛĕké babarji, muṅguḥ datolaḥ lan makluk, ya pĕkĕnira pribadi, tan maraŋ ñata hyaŋ manon.
56. ṅibaraté lir sotya lan sĕnĕnipun, hèḥ ki luhuŋ prahsa tuṅgil, puniku paṣṭiniŋ kawruḥ, ñata kaŋ ṅucap puniki, iṅkaŋ dèn ucap hyaŋ manon.
57. giḥ puniku pamaṅgiḥ paṅawruḥ iṅsun, ki luhuŋ umatur aris, ḍatĕŋ manira anuwun, ṅandika jĕŋ sunan kali, sampun samar dèn pitados.
58. sampun tĕlas poma dèn samyèmut, ajana pépéka sami, iŋ jatiné ujar iku, lan mulana kaŋ tan ṅrĕti, budinĕn dèn koṅsi wĕroḥ.
59. agunĕma maraŋ woŋ wus tuṅgal kawruḥ, liyané aywa dèn wruhi, yèn tan sabadan ñawèku, poma poma wĕkas mami, aja gĕbrèḥ bok kacĕṭok.
60. kacĕṇṭoké krana gĕŋ gĕṅé pakéwuḥ, amuŋ sampurṇaniŋ pati, marma kèḥ kaŋ tiba luput, wus bĕnĕr paṅrakitnèki, iŋ pati tĕmaḥ maléyot.
61. maléyoté déniŋ pakaṛĕmanipun, tan kĕlar tibaniŋ pati, kéron misiḥ wowor sambu, munya arta anak rabi, kabèḥ paḍa dadi muṅsoḥ.
62. laḥ ta iku pakéwuhé woŋ tumuwuḥ, nora kĕna kamitoliḥ, anak rabi bapa babu, brana arta pèni pèni, jroniŋ sakaratil mahot.
63. ujar iku gugulaṅĕn mupuŋ duruŋ, yèn wus kasèp niniwasi, sapa kaŋ bisa tutuluŋ, aja pijĕr olaḥ mukti, iŋ pati ywa kabĕsturon.
64. nadyan wus wruḥ yèn aṅguŋ gawé katuṅkul, marmané ajana kibir, jĕr sira duruŋ ana wruḥ, rasané muṅguḥ iŋ pati, mula iṅsun iki lumoḥ.
65. pakaṛĕman sun tilar tan ana kantun, lakuniṅsun ḍiṅin ḍiṅin, kaŋ niṣṭa tanpa karyèku, tĕmahan nĕlaya budi, tanpa pédaḥ yèn rinahos.
66. wusananya lir kawahyon ciptaniṅsun, darbé paṅgrahita ĕniŋ, pan iŋ lahir sĕdyanipun, aṅantĕpi cara abdi, muŋ pamriḥ iṅsun iŋ batos.
67. karya sasap pañiṛĕpiŋ tyas tĕkabur, déné muṅguḥ tékat mami, sun tobatakĕn satuhu, lamun tan sampurṇèŋ pati, séṅga jisim koṅsi bosok.
68. tuwin wutuḥ sapa kaŋ mahido kupur, yèn mĕkṣa tan pracayèki, ñatakna kapatèn iṅsun, yèn wus kinubur dèn aglis, ḍuḍukĕn séṅga ṅlagoroŋ.
69. tuwin bosok aṅur pakakna iŋ asu, yèn duruŋ wruḥ sajatiniŋ, puruhitaa ywa ṅawur, tĕmaḥ samar pati kapir, woŋ urip yèn tanpa tudoḥ.
70. ṅapirani yèn ṅamuṅna saratipun, yèn tan darbé ṅèlmu jati, déné babar pisanipun, nora dèn ḷĕbokkĕn tulis, laraṅan agĕŋ kinahot.
71. wontĕn maliḥ kojaḥ sakiŋ guru guru, kaŋ wus winĕjaṅkĕn mami, sun kumpulkĕn dadya suluk, paḍa aṅgitĕn iŋ galiḥ, dadya tarbukaniŋ kawroḥ.
22. kinaṇṭi
1. kinaṇṭi pandukiŋ dunuŋ, kaŋ kinudaŋ para wali, mukmin kas para ṅulama, myaŋ wicakṣana bèrbudi, kabudayaniŋ paniṅal, kaŋ pinĕḷĕŋ ḷĕṅiŋ galiḥ.
2. katoṅtona iŋ paṅèstu, riŋ sakaratil mahoti, iŋ paṅrèḥ aja sulaya, jamaniŋ ṅahurip iki, yèn prapta jaman kamukṣan, kaŋ aputus dèn patitis.
3. dèn awas wasananipun, yèn iŋ maṅkana linuwiḥ, tĕgĕsé luwiḥ tan ana, iya iṅkaŋ mamaḍani, iku nora magĕpokan, tan ana iṅkaŋ ñĕlaki.
4. naṅiŋ waṣpada kalaṅkuŋ, sahobahiŋ rat kaliliŋ, yĕkti nora kasamaran, maṅkono liré sayĕkti, alaḥ iku tanpa rupa, nora abaŋ nora kuniŋ.
5. nora iṛĕŋ nora wuṅu, nora dadu nora putiḥ, tan mañcoroŋ tan mañcurat, tan mañcoroŋ kadi sasi, tan cumlorot kadi lintaŋ, tan gumĕbyar lir hyaŋ rawi.
6. lan nora mambu hyaŋ aguŋ, nora sĕḍĕp nora waṅi, mis bacin maniŋ iyowa, iṅkaŋ pĕṅuk iṅkaŋ tĕṅik, wus nora gĕpoki pisan, aṅambar mĕnuhi bhumi.
7. lan alaḥ nora aṅruṅu, sèwu mokal lamun tuli, kaŋ kumriñciŋ kaŋ kumrampyaŋ, kaŋ jumĕbrèt kaŋ gumĕrit, kaŋ gumluḍuk kaŋ gumloḍak, yèku wus nora ṅamboni.
8. naṅiŋ kabèḥ wus kawĕṅku, jro laṅit jabaniŋ laṅit, unèn unèniŋ sajagad, tan kĕkilapan sayĕkti, lan alaḥ puniku nora, ana rasa kaŋ ṅrasani.
9. tĕgĕsé kaŋ rasa kĕcut, nora ḷĕgi nora guriḥ, nora aḍĕm nora panas, nora pĕḍĕs nora asin, sĕpĕt gĕtir pahit nora, naṅiŋ mupaṅat sayĕkti.
10. tan lara nora aṅĕlu, nora énak nora sĕḍiḥ, nora buṅaḥ nora susaḥ, sirṇa saliriŋ dumadi, yèku wujudiŋ hyaŋ sukṣma, sipatolaḥ kaŋ mumpuni.
11. kaŋ nora kĕna dinumuk, kaŋ tan kĕna dèn rasani, tan kĕna dèn ambu miwaḥ, nora kĕna dèn tiṅali, muŋ dumuk dinumuk iya, sarta kodraté pribadi.
12. lan ambu iṅambu iku, rasa rinasa pribadi, ruṅu rinuṅu priyaṅga, tiṅal tiniṅal pribadi, ya iku kaŋ iṅaranan, datolaḥ iṅkaŋ kakiki.
13. iŋ kono goné pakéwuḥ, éwuhé woŋ olaḥ ṅèlmi, bok tumpaṅso salaḥ tampa, boté iṅkaŋ niniwasi, tan wuruŋ rinèwèŋ sétan, dèn ḍaḍabyaŋ dèn gĕbugi.
14. jĕnĕṅé ṅèlmu puniku, luṅguhé kawan prakawis, kaŋ ḍiṅin iku saréṅat, tarékat kaŋ kapiŋ kaliḥ, kakékat kapiŋ tiganya, makripat piŋ pat lirèki.
15. liré siji sijinipun, iŋ paṅrèḥ kaŋ dèn ḷĕgĕti, saréṅat iṅkaŋ ginulaŋ, tĕgĕsé saréṅat nĕṅgiḥ, tatakramaniŋ ṅagĕsaŋ, kaŋ dèn liṅliŋ dèn kawruhi.
16. kaŋ dèn éman badanipun, dèn ṛĕkṣa dèn gumatèni, amawas sariranira, waḷĕs winaḷĕs ṅahurip, sahur sinahur tan goṭaŋ, lara linaran sayĕkti.
17. maṅkono sahurutipun, woŋ saréṅat pamrihnèki, déné woŋ ahli tarékat, amawas wĕkasiŋ ati, tĕgĕsé kaŋ pinaṅéran, mituhu kaṛĕpiŋ ati.
18. mĕndĕŋ pamĕndĕṅiŋ kalbu, sahosikiŋ tyas kahèkṣi, déné kaŋ ahli kakékat, ĕroḥ kaŋ dipun iḍĕpi, dèn éliŋ éliŋ winawas, wĕkas wĕkasiŋ dumadi.
19. aja pijĕr adudunuŋ, dumunuŋ jamaniŋ urip, urip anèŋ ṅalam duña, tan wuruŋ yèn bakal muliḥ, muliḥ maraŋ kalaṅgĕṅan, ginulaŋ paṅrèhirèki.
20. kapiŋ paté kaŋ winuwus, wĕkasiŋ rèḥ kaŋ pinuriḥ, kaŋ para ahli makripat, sinarapat dèn siṛĕpi, siṛĕp saguŋ ṛĕṛĕsĕpan, sinĕsĕp wusana sĕpi.
21. rasa rinasan ginĕluŋ, ginulaŋ gulaŋ ywa paṅliŋ, kapiḷĕŋ ḷĕṅlĕṅiŋ tiṅal, katiṅal iŋ siyaŋ latri, éliŋ lukitaniŋ alam, dadi satruniŋ dumadi.
22. yèn dinadaka bok dudu, marma saguŋ iṅkaŋ sami, ulaḥ ṅèlmu kaḷĕpasan, wajib samya ṅati ati, kapat pisan dèn waṣpada, lakuniŋ rèḥ siji siji.
23. akèḥ aṅèl tĕmaḥ luput, kaḍaŋ gampaŋ bilahèni, sakiŋ kuraŋ kaprayitnan, wiwéka kaŋ dèn kawruhi, béda kaŋ wus kanugrahan, kaŋ sinĕbut para wali.
24. kapat pisan wus kacakup, malaḥ siji nora gĕmpil, maṅsaḥ aṅaṅsaḥ makripat, mèmpĕr wahyuniŋ pra nabi, kaŋ kinonaŋ konaŋ sira, kaŋ wus tan kĕna sinisip.
23. gambuḥ
1. kojaḥ iṅkaŋ ginambuḥ, wontĕn caritaniŋ wali kudup, sakiŋ jawi nama saŋ sèḥ sutabari, laṅkuŋ wantĕr tékadipun, tur karamaté kinahot.
2. myaŋ warṇanira bagus, wĕwĕg pidĕkṣa asĕmu ṅraṅkuŋ, alalana mriŋ ṅarab piṇḍa raryalit, sami lan ṅumur tri tahun, sarwi wuwuda kimawon.
3. myaŋ paṇḍita guŋ aguŋ, miwaḥ amir molana kaji rum, dèrèŋ kondur sakiŋ dènnya muṅgaḥ kaji, iŋ ari jumuṅaḥ kumpul, raryalit prapta dumrojog.
4. tanpa larapan uluk, salam salamu ṅalahékum, ya tuwanku mulana rum amir kaji, lan para jumaḥ sadarum, nulya tan jawat gumuroḥ.
5. ya ṅaléka salamu, hèḥ raryalit luṅguha sirèku, nulya ḷĕṅgaḥ iŋ ṅarṣané amir kaji, ṅandika risaŋ amir rum, hèḥ para juṅaḥ sapa wroḥ.
6. raré kaŋ darbé sunu, para juṅaḥ sadaya umatur, ḍuḥ pukulun datan wontĕn kaŋ udani, sudarmèŋ raré puniku, iŋ ṅarap ṅriki tan tumon.
7. iṅgiḥ prayoginipun, tuwan daṅu pribadi puniku, asalipun pun raré sakiŋ iŋ pundi, ṅandika amir kaji rum, hèḥ walat iṅsun tatakon.
8. iŋ ṅĕndi pinaṅkamu, déné tanpa larapan praptamu, raré matur ya tuwanku amir kaji, dèrèŋ purun jarwa ulun, iŋ purwané praptaniṅoŋ.
9. amba tanya rumuhun, iŋ tuwan mriḥ jumaḥ sadarum, aṅandika molana rum amir kaji, ya walaḥ apa kaṛĕpmu, bĕcik takona mariŋ ṅoŋ.
10. apa kaŋ adi luhuŋ, apadéné masalahiŋ ṅèlmu, iṅkaŋ ṅĕkak miwaḥ iṅkaŋ ghaib ghaib, raryalit alon umatur, gampil yèn tuwan wus sagoḥ.
11. déné tatakèn ulun, ghaibiŋ allaḥ lan malihipun, ghaibiŋ mukamat puniku kaŋ pundi, mèsĕm ṅandika amir rum, hèḥ ṭolé yèn sira takon.
12. ghaibiŋ alaḥ iku, pan muhkamad dé muhkamad iku, pan ghaibé pan alaḥ iṅkaŋ sayĕkti, iku yèn sirarṣa wĕruḥ, sarwi gumujĕŋ turṇya lon.
13. ya tuwan molana rum, miwaḥ para jumuṅaḥ sadarum, pan jawabé mukamat ghaibiŋ widdhi, kaakĕn punapa iku, muhkamad déniŋ hyaŋ manon.
14. punapadéné lamun, alaḥ winastan ghaibiŋ rasul, alaḥ iku kaakĕn napa mriŋ nabi, ya ṭolé iṅsun tan ṅruṅu, kaya ujarmu maṅkono.
15. mara jarwaa gupuḥ, tĕka ṅĕndi pinaṅkanirèku, raré matur ya tuwanku amir kaji, dèrèŋ purun jarwa ulun, ulun maliḥ atatakon.
16. iŋ tuwan saŋ amir rum, miwaḥ para jumuṅaḥ sadarum, salat juṅaḥ kaŋ tuwan sĕmbaḥ punapi, tuwin salat limaŋ wĕktu, kularṣa wĕruḥ sayĕktos.
17. ṅandika molana rum, saha para salèḥ para jamhur, iya ṭolé sun salat jumuṅaḥ iki, tuwin salat limaŋ wĕktu, tan liya nĕmbaḥ hyaŋ manon.
18. lamun nora kadyèki, nora ĕsaḥ sĕmbaḥ pujinipun, wus mukamat kaŋ muni iŋ dalil kadis, raryalit ika duk ṅruṅu, sarwi wĕntisé dèn ĕntrog.
19. sun iḍĕp tan kadyèku, ya tuwanku molana kaji rum, iŋ panĕmbaḥ tuwan anĕmbaḥ hyaŋ widdhi, luwiḥ sakiŋ sèwu luput, prasasat nĕmbaḥ ḍéḍéyos.
20. panĕmbaḥ tuwan ṅawur, siya siya tan wrin jatinipun, tiṅaliŋ kaŋ sĕmbaḥ tuwan sakiŋ pundi, ḍatĕŋ pundi purugipun, pundi ĕṅgèné hyaŋ manon.
21. ḍĕḷĕg amir kaji rum, para juṅaḥ kabèḥ tiŋ paliṅuk, dènnya kaluhuran sabda lan raryalit, daṅu daṅu mojar arum, ya ṭolé iṅsun tan wĕroḥ.
22. iŋ ĕṅgoné hyaŋ aguŋ, lan araniŋ sĕmbaḥ iya tan wruḥ, miwaḥ witiŋ sĕmbaḥ iya tan udani, maṅka raré ika muwus, ya tuwanku rum saŋ katoŋ.
23. myaŋ para salèḥ jamhur, pamuwusé kadya raré timur, aṅgĕrayaŋ tan ana iṅkaŋ gĕpoki, anĕmbaḥ muji hyaŋ aguŋ, tuwan jawakna mariŋ ṅoŋ.
24. kaakĕn napa iku, alaḥ déniŋ paduka amir rum, aṅandika molana rum amir kaji, ya ṭolé marma sun sĕbut, sun mulya mulya hyaŋ manon.
25. déné gawé mariṅsun, lan akarya manuṅsa sadarum, andadèkkĕn balé ṅaras bhumi laṅit, miwaḥ iŋ sahisinipun, dinadèkkĕn iŋ hyaŋ manon.
26. myaŋ swarga narakèku, awal akir lahir batinipun, nora liyan kabèḥ titahiŋ hyaŋ widdhi, ralyalit sugal amuwus, aḥ gĕnaḥ apa saŋ katoŋ.
27. paṅucapira iku, tuwin para salèḥ para jamhur, pamuwusé tan ana iṅkaŋ prĕmati, morèk pijĕr akatuṅkul, paḍa ḍikir légog lohok.
28. pijĕr sujut lan rukuk, uwus maṛĕm sĕmbaḥ pujinipun, taṅèḥ lamun praptaa iṅkaŋ ginahib, paṅrasané wus pinuñjul, tan ana grahitèŋ kawroḥ.
29. hèḥ molana kaji rum, miwaḥ para juṅaḥ para jamhur, raré alit kéwala paṣṭi udani, kaŋ kaya ujarmu iku, yèn kabèḥ titaḥ hyaŋ manon.
30. naṅiŋ sirèku ṅawur, aṅarani tan wruḥ aranipun, amir matur ya tuwanku raré alit, paduka jarwa rumuhun, asal tuwan kaŋ sayĕktos.
31. aṅandika sèḥ samsu, tabarit hèḥ molana kaji rum, sakiŋ ĕmbuḥ sakiŋ tambuḥ prapta mami, sakiŋ kadadéan duruŋ, dadi pan iṅsun wus dados.
32. iṅkaŋ ghaibul uyup, duruŋ dadi ya alaḥ ya rasul, duruŋ dadi pan iṅsun dadi rumiyin, kaŋ luwiḥ mulya pan iṅsun, sakiŋ sakèhiŋ dumados.
33. maṅkana molana rum, lawan para jumuṅaḥ sadarum, sami nĕmbaḥ iŋ suku saŋ raré alit, raryalit maliḥ amuwus, hèḥ molana rum saŋ katoŋ.
34. pañjawabmu hyaŋ aguŋ, sira arani ghaib sadarum, rasul sira arani ghaibiŋ widdhi, raryalit pan bisa muwus, kaya ujarmu maṅkono.
35. lan sĕmbayaŋmu iku, kaŋ sira sĕmbaḥ nĕmbaḥ hyaŋ aguŋ, yèn maṅkono sira misiḥ paḍa kapir, duruŋ islam kaŋ satuhu, déné tékatmu maṅkono.
36. sira apa paḍa wruḥ, makamiŋ allaḥ lan wujudipun, lawan kaya apa rupané hyaŋ widdhi, sira apa wus kapaṅguḥ, apa lanaŋ apa wadon.
37. matur amir kaji rum, miwaḥ para jumuṅaḥ sadarum, ya duk timur kawula dèrèŋ udani, iŋ sual tuwan puniku, raryalit maliḥ mirahos.
38. yèn maṅkonowa hèḥ rum, aja nĕmbaḥ iŋ allaḥ sirèku, tan sampurṇa sira muṇḍak kupur kapir, aṇḍĕku amir kaji rum, pan sarwi aris turṇya lon.
39. ya tuwanku sèḥ timur, iṅgiḥ sintĕn paduka pukulun, sèḥ ṅandika sarwi rupa kaki kaki, ḷĕṅgaḥ iŋ kurṣi mas murup, nèŋ ṅarṣané rum saŋ katoŋ.
40. kurṣi karamatipun, sami gawok kaŋ miyat sadarum, paṅaṅgoné sadaya wus sarwa laṅkiŋ, pamuwusé mriŋ amir rum, hèḥ amir yèn sira tan wroḥ.
41. sajatiné ya iṅsun, iṅkaŋ lanaŋ wadon iya iṅsun, miwaḥ iṅkaŋ minum minuman ya mami, kaŋ taṇḍak taṇḍak ya iṅsun, tan édan ṅédankĕn iṅoŋ.
42. kaŋ tambuḥ tambuḥ iṅsun, iṅkaŋ ghaib kaŋ suyut ya iṅsun, iṅkaŋ rasa kaŋ rumaṅsa iya mami, kaŋ nĕmbaḥ sinĕmbaḥ iṅsun, kaŋ puji pinuji iṅoŋ.
43. iṅkaŋ nikmat ya iṅsun,..., iṅkaŋ lahir iṅkaŋ batin iya mami, kaŋ ṅrasani iya iṅsun, kaŋ rinasan iya iṅoŋ.
44. iṅkaŋ wĕdi ya iṅsun, iṅkaŋ wani tan liyan ya iṅsun, iṅkaŋ kadim sayĕktiné iya mami, kaŋ manikĕm iya iṅsun, kaŋ dadi awak pan iṅoŋ.
45. kaŋ anom tuwa iṅsun, iṅkaŋ lanaŋ iṅkaŋ wadon iṅsun, iya iṅsun iṅkaŋ sugiḥ iṅkaŋ miṣkin, iṅkaŋ ratu iya iṅsun, kaŋ dadi bala ya iṅoŋ.
46. iṅkaŋ akèḥ ya iṅsun, iṅkaŋ saṭiṭik pan iya iṅsun, iṅkaŋ joḍon iṅkaŋ sĕlèn iya mami, iṅkaŋ lumaku ya iṅsun, iṅkaŋ maṇḍĕg iya iṅoŋ.
47. iṅkaŋ gumuruḥ iṅsun, iṅkaŋ mĕnĕŋ sayĕkti ya iṅsun, ṅaṇḍap ṅiṅgil kanan kériŋ iya mami, wuri ṅarṣa iya iṅsun, kaŋ lor wétan kidul kulon.
48. nora liyan ya iṅsun, kaŋ loḥ kalam nukat ghaib iṅsun, kaŋ dat sipat apṅal pan ya mami, kaŋ wujut ṅèlmu nur suhut, sajatiné iya iṅoŋ.
49. kaŋ bhumi gĕni bañu, miwaḥ aṅin aṅin iya iṅsun, iṅkaŋ sabar iṅkaŋ kĕras iya mami, iṅkaŋ alim iya iṅsun, iṅkaŋ kĕṛĕŋ iya iṅoŋ.
50. iṅkaŋ ḍihin ya iṅsun, iṅkaŋ kari tan liyan ya iṅsun, kaŋ saréṅat kaŋ tarékat iya mami, kakékat makripat iṅsun, kaŋ iman tokit ya iṅoŋ.
51. iṅkaŋ alaḥ ya iṅsun, iṅkaŋ mukamat pan iya iṅsun, pan ghaibiŋ mukamat pan iya mami, ghaibiŋ alaḥ ya iṅsun, kaŋ gĕḍé cilik ya iṅoŋ.
52. iṅkaŋ anak ya iṅsun, iṅkaŋ ṅanakakĕn iya iṅsun, kaŋ kĕkadaŋ kaŋ alola iya mami, ya iṅsun kaŋ kalèk makluk, kaŋ alip lampahiŋ iṅoŋ.
53. kaŋ min kaŋ aké iṅsun, kaŋ min akir kaŋ dat iya iṅsun, iṅkaŋ duña kaŋ akérat iya mami, kaŋ swarga naraka iṅsun, ya iṅsun kaŋ jaba jĕro.
54. hèḥ mulana kaji rum, miwaḥ para jumuṅaḥ sadarum, iṅsun pémut aywa pépéka ṅahurip, mokal yèn sira nora wruḥ, ṅahurip tĕmahan layon.
55. iŋ kono gon pakéwuḥ, luwiḥ éwuḥ kèḥ woŋ salaŋ surup, ṅèlmu sarak dèn arani aṅuwisi, malaḥ panasaran aguŋ, yèn tan darbé ṅèlmu jatos.
56. aja pijĕr kumluṅkuŋ, iku dadi dadalaniŋ kumpruŋ, pĕṅuŋ biṅuŋ ĕmbuḥ ĕmbuḥ kaŋ dèn rukti, kitab kuran ṅuṇḍuŋ uṇḍuŋ, koḍĕŋ brahala ginéṇḍoŋ.
57. kaḍaṅan woŋ kaḍaḍuŋ, iŋ drubikṣa dèn ajaka luruŋ, mriŋ pĕpèrèŋ pĕri piniṇḍa apsari, sarwi siniwèŋ ḍuḍuwur, jinagan déniŋ gandarwo.
58. paṅrasané swarga guŋ, tan uniṅa yèn kalbèŋ bĕkukuŋ, kaŋ maṅkono taṅguŋ taṅguŋ dadya janmi, ya aṅur dadia lutuŋ, patiné tanpa karahos.
59. tanpa pratikĕl iku, sirṇané iya datanpa tutur, dadi jalma yèn tan wruḥ tanañjultarki, datan wuruŋ katalikuŋ, hèḥ éliŋ éliŋ rum saŋ katoŋ.
60. ya ta risaŋ amir rum, saha para salèḥ para jamhur, duk miyarṣa riŋ sabda risaŋ siniwi, samya nĕmbaḥ ṅrahub suku, sarwi ṅraṛĕpa turṇya lon.
61. ya tuwanku sèḥ sĕpuḥ, mugyaṅsala sapaṅat pukulun, lan paparab tuwan kularṣa udani, alon ṅandika sèḥ pikun, hèḥ mulana rum saŋ katoŋ.
62. lan jumuṅaḥ sadarum, nora ta sira wĕruha iṅsun, aran iṅsun iya saŋ sèḥ sutabarid, sawusnya ṅandika uluk, gya amusna sakiŋ ĕṅgon.
63. ghaib sakurṣinipun, nulya sinuhuran salamipun, pan gumuruḥ sarwi andoṅoŋ prasami, jĕtuŋ gĕtun asru ṅuṅun, joto joto tiŋ paḷĕṅgoŋ.
64. aṅuṅgo uṅgo saguŋ, agĕŋ alit samya tiŋ paliṅuk, ṅuṅak uṅak maṅu maṅuṅuné déniŋ, praptané lan késahipun, nora nana iṅkaŋ wĕroḥ.
65. kaŋ kari saṅĕt maṅu, aṅkĕn wawayaṅan wuyuŋ, maṅu maṅu laṅkuŋ sakiŋ poyaŋ payiŋ, kayuṅyun saṅĕt kilayu, yèn kagrayaŋ tan aṅgayoḥ.
66. iŋ kayumananipun, kaya kaya kaléyaṅa wahyu, wèḥ wirayat yayaḥ maniyup yaŋ yaṅiŋ, kĕkayaṅan mriḥ rahayu, kayun ṅupaya hyaŋ manon.
67. dadya samyayĕg guyub, sadaya nĕdya puruhitèku, ṅèlmu iṅkaŋ nampurṇakkĕn iŋ ṅahurip, ana ṅétan ṅalor ṅidul, sawĕnèḥ ana aṅulon.
68. titi kikayatipun, wali mulya poma poma saguŋ, anak putu rasakna ḷĕpiyan niki, séṅga dé koṅsi sumurup, mriŋ tékat iṅkaŋ maṅkono.
69. naṅiŋ aja aṅawur, gugurua mupuŋ ana umur, yèn dèn ajab iŋ tulis bahé tan kĕni, lamun duruŋ aṅgĕguru, gurayaŋ nora gumacos.
70. dadya ahli tasawub, ahli usul miwaḥ ahli suluk, lamun duruŋ ahli puruhita ṅuṅkiḥ, yĕkti tĕmaḥ sasar susur, wantĕré aṅas kémawon.
71. jĕr iki antĕpipun, paṅrakité parabot paṅracut, iku nora kaḷĕbu sajroniŋ tulis, amuŋ cumaṇṭèl iŋ guru, sawab laraṅan kinahot.
72. tamat pamitranipun, ari soma iŋ lèk kapiŋ pitu, iŋ jumadiawal warṣanipun alip, isakanya kaŋ lumaku, wujud nabi murwèŋ katoŋ.
73. yèka ta kaŋ manurun, raré muḍa cumaṇṭaka baṅun, amanĕḍak rawiyadi kaŋ ginahib, nĕṅgiḥ wirayatiŋ suluk, jaman dĕmak winarṇèŋ don.
74. lawan caritanipun, wali mulya kaŋ sampun linuhuŋ, kaŋ paparab nĕṅgiḥ saŋ sèḥ sutabarid, lalana kalantur lantur, praptèŋ arab kacariyos.
75. samya bantahan ṅèlmu, iṅkaŋ aṅèl araŋ kaŋ anĕmu, iŋ pasĕmon sasmitaniŋ ṅèlmu jati, taṅèḥ wikan kaŋ anurun, rahsaniŋ ṅèlmu kinahot.
76. amuŋ dènnya kayuṅyun, caritanya iŋ jaman karuhun, mokal wruha kaŋ ghaib kaŋ wĕrit wĕrit, wĕwĕrané iŋ paṅawruḥ, darma anurun kimawon.
tamat
